المساعد الشخصي الرقمي

مشاهدة النسخة كاملة : بصريـــــــــــــــح العباره

البـ شما ـطرانه
11-05-2005, 08:18 AM
بكل حب و امتننان ...بكل موده و احترام .. بصريح العباره .. حبيت اطرح موضوعي .. اباكم اتشاركوني رايكم .. حبيت اشوف باي زاويه تنظرون للموضوع .. موضوع استغربت منه .. زادت دهشتي ..اوووووه ارتسمت علامات التعجب اللي مثل هالشكل (!) 6 او7 علامات فوق راسي اتخيلوا بس انتوا

اندش بالموضوع بذكر لكم سالفه صارت لي
يوم من الايام ... كنت قاعده على النت . اسوي البروجيكت ..طبعا في الجامعه ( تبون تعرفون اي جامعه ههههه............. ههههه)المهم .. كنت فاتحه على موقع الجوجيل .. و عيني على الكمبيوتر .. و فجأه اللي اسمع اربيعتي اللي قاعده احذالي اترمس عمرها .. قلت الحمد و الشكر .. اكيد اتخبلت .(( ياربي ليش ما نزلت جزء اليوم .. يعني ليش هاي ذالتنه ..عنبو كل يوم على هاي الحاله . نقعد نترياها ,,, )) قعدت اربيعتي و حالتها حاله .. التفت صوبها .. قالتها يا بنت فلان شو بلاج تتحرطمين .. لايكون عن البروجيكت .. الا الطيبه اترد عليه و اتقول ...

شو اقولج يا فلانه .. هاي الكاتبه .ذبحتنا . كتبت قصه من شهر .. و القصه رهييييييييييييييييبه ..رووووووووووووووعه . و خلاص بموت .. ابه اعرف شو بيصير لسعيد .. و اربيعه خليفه ( ابطال في القصه) فطيم .. حصه ..ومريم (( هاييل شخصيات من القصه بعد)) وصلت الجزء 54 ( اتخيلو بس .. اذا الجزء الواحد فيه 4 لين خمس فصول )لين اللحين ما حطت الجزء 55 ( ياربي كيف اربيعتي فيها صبر )

انا كل الفتره اللي ترمس فيها و انا امبطله عيني .. ابه اعرف شو يعني و شو الهدف ..صديت اشوي و يلا يكمل الحديث.. اربيعتي ووحده ثالثه و بعد ثانيتين دشت وحده رابعه

((انزين تتخيلين .. بتنزل اليوم الجزء))
"" لا ما اعتقد .. لان قبل يومين نزلت بس اليوم ما اعتقد ."
(( اذا بتنزل و بدشين المنتدى خبريني عسب احدر و اشبك النت و اقرا الجابتر ))
""خلاص .. بس اقول خلصتي قصه ....... شفتي شو صار في حمد الخيلي ""
(( هييييييييه قريتها و خليت اربيعتي تقراها يا هي رهيييبه القصه بس يحليلها ميثه ما تستاهل ))
"" بس الكاتبه ليش خلت سعيد يموت .. حرام عليها و ايد كان شخصيته حلوه ""

المهم دااااااااام الحديث و اتواصل .. انا ساعه معاهم و ساعه اتابع اللي عندي ..لين ما بدا كلاسي و اترخصت من عندهم ..

السوال .. اللي هو بصريح العباره ........
هل مثل هاي القصص.. يعكس و يلا يهدف لشي معين .. يكون لصالحنا .. نتعلم منه ؟
تعليقي : ما عتقد لان .القصه تحمل 90% من مواقف و حورات خياليه .. يعني الكاتبه ترسم واقع من نسج خيالها .. ماله معنى ( زوج يحب زوجته .. صاحت و حطت راسها في حضن ريلها .. ما يابو عيال .. اكيد العيب من الزوج .. لا اكيد من الزوجه ..) موقف ثاني ( شافها و هي لابسه بجامه و ظهرت و شعرها امبطل .؟.شافته و هو توه ظاهر من الحمام متخرس و شعره امبلل .. يات و فتحت العقم و اتخبلت عليه ) بعض الردود بين الشخصيات :فدييته امووت فيه احبه . ياربي كيف بتعذبي هاي البنيه شو هالعيون اللي عليها ))
يعني برايكم هل يحق لوحده اتعبر بهاي الطريقه او واحد يكتب قصه بهالاسلوب.. اي واحد بيقرا و خاصه النت كل احد يحدره .. قبل..على ايامنا يوم انخلص الثانويه . اول سنه جامعه يكون عندنا نت اللحين من اول ابتدائي الطلاب يحدرن النت . الطلابات الثانويه و الطلاب فاتحين المنتديات و مشتركين ..و يقروون بهالشكل .. اذا ما شي راقبه يعني انخرب عمرنا و انخرب جيلنا .. انفتح عقول شبابنا و بناتنا اشيا خياليه و اذا صارت بتصير 1% من واقع حياتنا ,,انا اقول معظم القصص اللي تنكتب اونه بدون كوبي و بيست من اعمال الاعضاء اونه عندهم فن الكتابه و مهارات الحوار الجيد ورسم احداث القصه بشكل يحمل فن الادب او البلاغه و اللي بتراودن عليها الاعضاء القصص اللي تحمل من هالطابع ..( الرومانسي)و اكيد اتلاحظون هالشي .. تركوا قصص نجيب محفوظ و طه حسين ..و قعدوا يتابعون قصص لا تحمل لو بشي بسيط يخدم لغتنا افكارنا ..حتى قيمنا اللي متربين عليها ( هالزمن ما شي قيم و لا مبادىء كلهن امتسحن)
الله يعين مجتمعنا
ودامت ديار شما البطرانه عامره بالافراح و المسرات
مهرة بلا فارس
11-05-2005, 10:21 AM
والله كاتبه القصة مسودة الويه وماتستحي ع ويهها عل الحجي الي كاتبتنه



والله يبعد عيالنا عن شرات ها القصص






والله يعطيج العافية اختي
حورالامارات
11-05-2005, 01:26 PM
وااااااااااااااااااااااااااااااااي والله شو اقووولج من رايي ان اللي كاتبه هاي القصة

تعيش في خياااااااااالي وتعاني من حرمااااااااان ونقص يعني لو وحدة كبيرة وعاقلة وفاهمة ما بتتطرق لالفاظ وعبارات غير اخلاقية بطريقة غير مباشرة

يعني هاي كاتبة القصة لتبرز نفسها من هذاا المنطلق

وتكوووووووووون مميزة بطريقة غير ...........



والله الحين لو اتكلمنا عن الجيل اللي موجود بتلاقي نادرا ما نلاقي شباب وينات ما يفتهمووووووووون الكل يدور وينبش في كل شيء


عندهم اصرار غير طبيعي على اللي يبووونه ليش ما تعرفوووون ..




الله يهديهم ويحميهم ان شاء الله


........
الأسـيف
11-05-2005, 03:07 PM
قلة ادب


وبس
المهيري
11-05-2005, 03:16 PM
على قولة الأسيف

قلة ادب
وبس
رهف
11-05-2005, 03:24 PM
,,انا اقول معظم القصص اللي تنكتب اونه بدون كوبي و بيست من اعمال الاعضاء اونه عندهم فن الكتابه و مهارات الحوار الجيد ورسم احداث القصه بشكل يحمل فن الادب او البلاغه و اللي بتراودن عليها الاعضاء القصص اللي تحمل من هالطابع ..( الرومانسي)و اكيد اتلاحظون هالشي ..


سمعي اختي
انا الحين اكتب قصه وما مستعده احلف انها هب بخط ايدي
لانج اجملتي بكلامج
فانا بنظرج سارقه القصه
وغيري بعد يسرق
انزين هالقصه ما تلاحظين انها بلهجة اماراتيه
يعني بسرقها من اماراتيين
زين والاماراتيين بسرقونها من منوو
شو كلنا نسرق
ما شيء كتاب قصص محترمين

يعني اي واحد يكتب قصه رومانسيه يعتبر قليل ادب
واللي يكتبون شعر غزلي وخواطر عاطفيه بعد قليلين ادب
انزين واللي يحس باي شعور كائن ما يكون نوعه
وما يعرف يعبر عنه غير بالكتابه شو يسوي
الصراحة كلامج ما اقنعني
وضحي اكثر ولا تجمعين


هل مثل هاي القصص.. يعكس و يلا يهدف لشي معين .. يكون لصالحنا .. نتعلم منها

تقريبا معظم قصص النت الاماراتيه قريتها
وخاصه قصص موقع الم الامارات

ومن خلال قرايتي لبعض القصص
في احداث فعلا تصير في مجتمعنا
ويمكن تكون مرة ع الكاتب نفسه وحب يحبكها بقصه


يمكن المثالين اللي ذكرتينهم فيهم نوع من الخيال نوعا ما
لكن ما يصح نجمع
لان فيه قصص تهدف لهدف معين
وبعضها تناقش قضايا معاصره
وما تمس الاخلاق

ومن خلال الشخصيات تقدرين تشوفين ان هالنوع فعلا نفسهم انشوفهم في كل مكان وفي كل بيت تقريبا


واذا على الرقابه
فتكون من الاهل ومن البيت

بس ما اعتقد ان مثل هالقصص - اللي تحمل الفاظ دخليه وبديئه فقط -
بتأثر عليهم كثر ما تأثر عليهم الفضائيات والنت بسوالفهم
وكثر ما تجذبهم الاشعار والخواطر

وها ربيعاتج واايد متعلقات بالقصص مثل ما يتعلق البعض بالمسلسلات المكسيكيه والافلام الهنديه الدخيله
ويمكن تعلقهم بقصص محترمه ،، ما تخالف الشريعه والتقاليد

والله يهدي الجميع

والسموحه ع الاطاله

رهف
معاني
11-05-2005, 04:38 PM
السلام عليكم ...

اولا هلا اختي شما ..ع الموضوع ... و بما انه يتكلم عن كتابه القصص في الانترنت نت ... فانا اعتبر نفسي وحده من الي موجه لها ها الكلام..بما اني مشرفه ع برزة القصص .. و اني وحده من الي تكتب القصص و اتنزلها في البرزه ...




((انزين تتخيلين .. بتنزل اليوم الجزء))
"" لا ما اعتقد .. لان قبل يومين نزلت بس اليوم ما اعتقد ."


السوال .. اللي هو بصريح العباره ........
هل مثل هاي القصص.. يعكس و يلا يهدف لشي معين .. يكون لصالحنا .. نتعلم منه ؟
[COLOR=Red]تعليقي : ما عتقد لان .القصه تحمل 90% من مواقف و حورات خياليه .. يعني الكاتبه ترسم واقع من نسج خيالها ..


لا اعتقد انك مررتي بجميع القصص الموجوده في الانترنت حتى تحكمي عليها بانها قد تكون خياليه و قد رصدتي عليها نسبة مئويه تدهشني بالفعل .... او انك ابحرتي في مخيلت الكاتب لتعلمي ما يجول في خياله و يسطره بين كتاباته ....

اعترف باني اكتب القصص لكن لم اتطرق الى جانب الخيال ...او الى ما يسيء الى اخلاقيات قد تفسد المجتمع سواء كان بالكلمة او العباره ..

,,انا اقول معظم القصص اللي تنكتب اونه بدون كوبي و بيست من اعمال الاعضاء اونه عندهم فن الكتابه و مهارات الحوار الجيد ورسم احداث القصه بشكل يحمل فن الادب او البلاغه و اللي بتراودن عليها الاعضاء القصص اللي تحمل من هالطابع ..( الرومانسي)و اكيد اتلاحظون هالشي ..

بالعكس مجرد هوايه احب ان اقضي بها وقتي و استمتع بها كثيرا..مثل اي شاعر ..يحب ان يستمع الاخرون الى اشعاره .. و يرغب في معرفة اراءهم..فلا اجد فرق بين هاوي الكتابة الشعريه او القصه او الخاطره ...بغض النظر ان كانت تحمل فن الادب او البلاغة ..فانا احب ان اوجه قصتي الى مسار لهجتي وواقع بيئتي التي عشت فيها ...

تركوا قصص نجيب محفوظ و طه حسين ..و قعدوا يتابعون قصص لا تحمل لو بشي بسيط يخدم لغتنا افكارنا ..حتى قيمنا اللي متربين عليها ( هالزمن ما شي قيم و لا مبادىء كلهن امتسحن)
كلامك سليم ميه بالـ % اتفق معك ..و ليس فقط القصص ولا تنسي الخواطر و الشعر .. ..الذي يحمل الكلام الفصيح .و الكثير الكثير من الادب العربي ... الذي ضاع وتلف بين طيات هذا الزمااااااان ... لكن هذ لايعني اننا قد خرجنا عن قيمنا و عاداتنا و مبادئنا....و اعذريني اذا تكلمت عن نفسي فقط ..لاوضح لك ان ليس كل كاتب قصه بهذا الزمن نيته ان يدمر او يخرب الاجيااااال ..فكاتب القصه مثله مثل الشاعر و الاديب يحب ان يوصل موهبته الى الناس .. فقبل ان ابدا بتشر قصصي ...اتذكر ان كل لفظ و قول نحن محاسبون عليه ......
الأزد
11-05-2005, 07:18 PM
السلام عليكم
الأخــــت شــمــا

أقدم لك شكري على هذا الموضوع الجميل

الأخت رهـــف
و
الأخت وله النعيمي
و
الأخ المهيري
و
الأخت حور الامارات
و
الأخت معاني
أقدم لكم جزيل شكري على مداخلاتكم الجيده

الأخ الأسيف..... أشكرك على مرورك الجميل وأرجوا أن تكون مداخلاتك في صلب المواضيع التي تطرح لا أن تكون مداخلات محوره او بعيده عن مضمون الطرح وشكرك لكم
أخوك الأزد :mf_charli
الأسـيف
11-05-2005, 07:27 PM
معلومه

المهيري بنت

وبسسسس
الأزد
11-05-2005, 07:35 PM
أشكرك أخي الأسيف على الملاحظه

واقدم بالغ أعتذاري للأخت المهيري ولها مني فائق الإحترام

أخوكم الأزد
خيماوية و النعم
12-05-2005, 12:03 AM
اوافق اختي


رهـــــــــــــــف

و

معا ني


على كل كلمة كتبوها


والسموحة

خيماوية و النعم
البـ شما ـطرانه
18-05-2005, 03:10 PM
الاخت رهف .. و معاني ..المهيري..الاسيف الازد ....و شحيه و نعم مشكورين على المرور

اما عن تعليق كل من الاخت رهف و معاني

اسمحولي . .. طرحت هالموضوع هب للنقاش .. لاني تعبت من اطرح مواضيع النقاش (قبـــــــــــل)
و هذا يؤدي اني لازم اطيح رمسه و اشد في الكلام .. و اخاف ما يعيبكم اسلوبي
طرحت عن طريق لفته و احس هاي ظاهره انتشرت .. و بس

و ما اريد اخسر عضوات حبوبات شراتكم
رهف
18-05-2005, 03:56 PM
أختي شما البطرانه
الموضوع مطروح للنقاش
انتي لج رايج وانا لي رايي
واكيد انتي مقتنعه برايج وانا مقتنعه برايي
وانا ما رديت ع موضوعج عسب اخسرج او اخسر اي حد
لا والله
وجهة نظر وحبيت ابينها
اطرحي رايج واسلوبج وان شاء الله ما بيكون فيه اي خلاف

ويمكن انتي تقنعيني برايج ويمكن العكس

والسموحه

رهف
العوسج
18-05-2005, 10:09 PM
صحيح كل واحد له حرية الرأي والمسأله تتطلب أسلوب النقد البناء وليس الهدام ..


أما عن مسألة القصص فأكثر شي مايعجبني فيها هو ذكر القبائل خصوصا لما تكون قبائل معروفه فأعتقد هالشي ماله داعي أما من ناحيه أخرى فالقصص حلوه ... ولو إني لست من رواد قراءة القصص المنتداديه


سلامــــي
أم هزاع
18-05-2005, 11:27 PM
مرحبااا باختي


بس فعلا قلة ادب



أم هزااااااع
هجران
19-05-2005, 01:50 AM
مشكورة اختي على الموضوع المهم صراحة

بس انا مستغربة من شي ...


يعني شو الفايدة من هالقصص .؟؟!!


وخاصة القصص الغريبة العجيبة واللي على قولتج فيها اشياء خيالية .. وحب وخرابيط ...؟؟!!

والكل اربع وعشرين ساعة عالنت عسب بس يقرا هالقصص ...ومودر كل اشغاله بس عشان هالقصص ..!!!!


وفيها كلمات وايحاءات بذيئة

ها انا ما اسميه ابداع او فن ....


والله يعين



السمــوحة
هجــــران
البـ شما ـطرانه
25-05-2005, 04:54 PM
هلا و غلا اختي رهف

اسمحيلي ع التاخير في الرد .. بس لي رجعه على ردج .. بس اسمحيلي هالفتره اشوي مشغوله ..و في نفس الوقت ابه اقرا قصتج.. لاوصلج my point

و ابه اقرا قصه من قصص اختي معاني ..

وبشكل عااام ... انتي ما فهمتي ردي عدل بالمره الاولي و الثانيه