بقـَشةْ عِيَايـزْ ;`

غنَاتْيـے · 22 يناير 2012

يِسعدْ لي مِساكْ يا عِطر المِسى . .
ويسعد لي أيامكْ يا مسعدنِي

حبّك مِثل بَاريسْ مايِنتسَـى . .
ومِثل جَمال باريسْ يشدنّي
.
.
♥
.
.
السَلامْ عَليكمْ ورَحمة الله وبَركاته . .
مساكمْ اجواء شتوية بحتـه :yaw:

تصدقوون بررد اوروبا أهون عن هني . . ؟
ومن دقيقتين ادور كشمتيه وآخر شي اصلاً طلعت لابستنـها :

ko::

شكري وملحي . . أ أ أ أ قصد شكري وتقديري لكل المتابعين . .
لي فاته آخر جزء من ديزني يرجع ريوس الصفحة السابقة timo

توجهنا صباحاً لـ باريس . .
بين باريس وديزني لاند 45 دقيقه فقط بالسيارة . . وكانت الأجواء جميلة طول الدرب . .
ووصلنـا الفندق Concorde - Paris أخس فندق سكنته في حياتي !!

كرهت ربيعات ختيه هن ناعتين لها هالفندق . . ع شو ياحسره ؟!
اوكي تحته مول بس الغرف وايد وايد كئيبة تييب الحكه :1577_1186768770:

اللوبي وايد كبير يوم تحدر تقول خلاص هذا هو . .
وفيه وايد خليجين . . بس من داخل هب حلو ابداً -_____-"

وأهلاً وسهلاً بكم في باغــي . . قوس النصر :ml7:

احينه بتخبركم . . يقولون انه باريس مدينة الجمال . . الأنوار . . الرومانسية . .
احينه الجمال فيها مناطق طبيعية خارجيه نحن ماسرناها . . وفيها انوار صدق وايد . .
امّا رومانسيه من وين ياحظّي . . منو هذا لي بيروم يعيش اجواء قلوب في نص الزحمه :ml7:

ماعلينا . . أول شي سرنا الشانزليزيه . .
حق الشوبنق طبعاً . . شارع ويمينه ويساره كوفيات ومحلات . .

وحدرنا أول شي lv . . نحن سرنا جريب الضحى . .
بعدها الناس . . الله لا يرويكم خلاف كيف ونحن رادين خطفنا عليه من بعيد . .
تخيلو المحل وااايد وااايد ضخم 3 طوابق وكل طابق روحه مدينة :eh_s(6):

ونحن رادين . . تدرون شو ؟!
والله طابور برع المحل بالدور يدخلون الناس بالطوابير . . تخيلتو المنظر ؟!

وكملنا شوبنـق . . :msafer:

انا طبعت كنت بجتل عمريه ابى اسير fendi . .
ليييييش . . لانه اسوارتيه فندي اللي هي هاي ضاعت عني في جنيف :cRy:

لين احينه مش فاهمه كيف طاحت من ايدي . .
انا دوم البسها واحبها اكثر شي في الدنيا :cm:
قالت لي اللّي في المحل انه عندهم فرع ثاني في الافيي . . فـ حطيت امل اني بحصلها اليوم لي بعده . .

وحان وقت الغدا . .

عقبها سرنا الفندق ريحنا شوي . .
وردينا ظهرنا ع المسا . .

مشينا واايد لين وصلنا ساحة الكونكورد . .
وهاي صورة المسلة المصرية اللي ع اليسار . .

مسلة الملك رمسيس الثاني . .
يقولون انه مصر اهدتها لـ فرنسا كـ تقدير لـ علمائهم اللي ساعدو المصريين في اكتشاف حضارتهم . .
مادري ليش احس انه جذب سارقينها timo

آخر الشانزليزي . . شي كشكات . .
تبيع اشيا متنوعة . . و وقفنا ناكل جريب :qlb:

ورجعنا الفندق . . التعيييييييييس -_-"
بس جيه ماحبه كيفي انزين :ili:

good night paris ♡

لِيت الشَوارعْ تِجمع إثنينْ صدفة . .
لا صَار شبّاك المَواعيد مجفي ;`
.
.
♥
.
.

غنَاتْيـے · 23 يناير 2012

ألمحْ أطيَافكْ ورَى ذِيكْ الوجِيه . .
وأدري انك مَنت حُولي بَس أحنْ

سُولفو لِي عنكْ وتمتَمتْ أبيه . .
قَالو طيّب هُو يحبّك ؟ قِلت أظنْ
.
.
♥
.
.
السَلامْ عليكمْ ورَحمة الله وبَركاته . .
مساكم برد وأجواء جميلة لا تُقدر بثمن :shyy:

شو رايكم فيني . . ؟
يوم استوي نشيطة احبني علنيه ماخلى من نفسي . . :qlb:

الشكر والتحايا مراضيف لكل المتابعين ♥ ♥ ♥ ♥

نكمل جولتنا في باريس . . اللي كانو اخواني مقريين تكون بدايتنا الصباحيه عن جاليري لافييه . .
اكيييد الكل يعرفه لانه موجود في دبي مول :eh_s(6):

ومِن الداخل . .

طبعاً كنت حاطه في بالي شو ابى . .
باقي هديه حق الغاليه امايه . . وحق اختيه الكبيره . . فـ خلصت اموري بسرعة :ah:

اتشوووو= الحمدلله . .
والله يالسه اعاطس هلكت من الحساسية :a050:

بعد ماخلصو اخواني . . ماشاءلله عليهم مايقصرون في اعمارهم . .
سارو طابق طابق . . محل محل . . زنقة زنقة :ml7:

طلعنا نتمشى في أرجاء باريس المزدحمه . .

وحان وقت الغدا . .
صدق محتاجه غدا اللحينه لاني في قمّة يووعي :212:

بعدها ردينا الفندق نريّح كالعادة ونصلي . .
وكان المخطط فيما بعد برج إيفل ViV

حصلت الإسوارة بس لون ثاني :cm:
واحسها مال الأولاد . . مايخصني عادي المهم تكون عندي :cm:
اول مارديت من السفر رحت المارينا ادورها . . قالو بيردون اييبونها . . متى يعني :ha:

المكرونز لي في الصورة wahh
OMG ! وايد عجيييب بس موجود هناك . . وانا والكايد كنّا ندوره لانه حد في جامعته قايل له عنّه وانه مشهور في باريس . .
احينه اتريا حد يروح فرنسا اييب لي منه timo

والعصر . . هيّا بنا إلى Tour Eiffel . .

سويييت فيهم سواه هذاك اليوم . .
قلت لهم بنتم لين تغرب الشمس عسب اصوره في النهار وفي الليل :ml7:

وشو مايضرب لكم مهب بارد يكسر العظام . .
وعاطيني ويه والله يالسين . . واختيه تتحرطم تقول لي : اكتبي تحت هالصورة . .
الصورة اللتي قتلت اصحابها من البرد :

ko::

أكييييييييييييد ان شاءلله بنزل له موضوع منفصل في برزة التصوير . .
هب من اشويه هلكت من البرد والزجمه والخشم مليّك الا في سبيل الصور 58g

لازم الشعب الاماراتي مخاالفييين . .
برد موت ياناس . . ومع ذلك ناكل آيس كريم wahh

بعدنا ردينا نتمشى ونجوب شوارع باغي . .
لين لفت انتباهي هالكوفيه وحدرانه -----> انتي مايلفت انتباهج غير الأشيا لي مامنها فايده :ah:

وردينا الفندق . .
وسرنا انا والكايد اونه نتبضع في السوبرماركت . . ناخذ اشيا حق العشا . .
بتخبل كل مكان عندهم مكرونز يخرب بيت البطره حتى في السوبرماركت :h015:

بقـى جزء واحد في رحلتنا الأوروبية . .
الله أكبر الله أكبر . . يأذن الظهر . .

أشوفكمْ ع خير w0w
.
.
♥
.
.
صُوته مِثل نَفحة هبُوب النِسَايمْ . .
كِل ماسمَعته قِلت ربّي يدِيمه ;`

غنَاتْيـے · 24 يناير 2012

فِي ينَايرْ . .
طَعم النُوم يختلف .. طَعم القهوة مميز . .
رائحة الحَطف / المِعطف الأسود . .
العِطر . . وحّتى المواعيد . . كُل شَي مُختلف ♥
.
.
♥
.
.
السلام عليكم ورحمة الله وبركاته . .
مساكمْ دهن عود . . أو مساكم شبّة ضو ----> تختار الأشيا لي تحبها :00100:

برررد يا ناس . .
سؤال في حد يشغل الكنديشن يوم يرقد هـ الأيام ؟ ----> كنديشن timo
دخيلكم قولو هي عن احس اني مخلوق فضائي . . الصراحه ماروم لازم المكيف يشتغل رغم انه ماقدر اتنفس جيداً -__-"

نكمل رحلتنا في آخر يـوم فـ باغي وجولتنا الأوروبية اللي استمرت 14 يوم . .
شكراً جزيلاً على كل تقييم انكتب لي sos3

في هذا اليوم . . كنّا مقررين أول مكان نزوره صباحاً هو متحف اللوفر . .
وبالفرنسي Musee du Louvre صعب :ml7:

اشترينا التذاكر من النفدق وتوجهنا الى هناك . .

( الصورة اللي تحت ع اليسار . . دعاية متحف اللوفر في بوظبي - جزيرة السعديات 2013 ان شاءلله )

وأهلا وسهلاً بكم في اللوفر

oo:

شفتو السيد اللي ع اليمين . .
تدرون كم طوله ؟! تكملته دبلات الدبلات . . بتوقفون جيه اذا ماكنتو ماخذين التيكت من قبل :ili:
الحمدلله الشحوح دوم اذكياء اشتريناها من الفندق وفكينا عمرنا . .

المتحف وايد كبير وفيه وايد طوابق وخناخيش . .
الصراحه تعبنا ماكملناه واختيه الا تشوف ونحن نسحبها ملينا ياخي :

ko::

جانب من المتحف . . ماصورت وايد . .

ذلووونا بالموناليزا La Joconde‏ . .
زحمه وضرب نعل عليها محطينها بروحها بزاويه . . والله شينه شي رسمات البنات احلى عنها :ml7:
وع فكره حجمها صغيير ماتوقعت حجم اللوحة جيه . .

انزييين المتحف شو يضم . . ؟
قسم لحضارة مصر وايد كبيييير في مومياء ومحنطات وخزفيات وغيره . .
طبعاً سارقينها من مصر اثناء الحملة الفرنسية . . يوم اقول لكم حرامييين :1577_1186768770:
الحضارتان اليونانية والرومانية . .
وفيه تحف فنيه ولوحات فنيه زيتيه . .

بعدها طلعنا وتمشينا في شوارع باريس . .
آآآه يا المـطر . . أكثر شي حبيته كانت ممطره بإستمرار . .

المسا طلعنا نتعشى آخر عشا في باريس . .
وانا ماكلت لانه ولا شي عيبني -_-"

وطيارتنا كانت اليوم لي بعده الصبح . .
وطيران الاتحاد الكريهيين . . اخرونا ساعة . . يقولون عسب الأحوال الجويه . . كانت تمطر بقوّة . .

وصلنا دار زايد بالسلامـة :yola:
وبعدها بيوم وقت تفريغ الشنط من الهدايا . .

والإنتهاء من ترتيب الصوغة . .
ع قولة اخواني . . سلامة بعد ماشتريتي هدايا حق الفريج اللي عدالنا :eh_s(6):

وجي أكون خلصت رحلتيه . . تم بحمد لله . .
بذلت اقصى جهد عشان اخلص بسرعه

oo:

اسمحولي ع القصـور . .
فمان الله :shyy:
.
.
♥
.
.

أصنعُو للغَد ذِكريات تضحكنَا . .
اصنعُو للغد أصدقاء يمسكُون بأيدينا . .
اصنعو للغد أنفاس مقبلة بـ كل تفاؤل

غنَاتْيـے · 25 يناير 2012

السَلامْ عَليكمْ ورَحمة الله وبَركاته . .
صبَاحكمْ إبتسامة رضا . . وعَفو وعافيه مِن رب العَالمين :fafaf:

فـي هالرَد بذكر إمور عن سـفرتيه بشكل عام ومعلومات يمكن تفيد أحد فيكمْ يوم من الأيام :00100:
ماحبيت اذكرها قبل بين السطور . . لانها يمِكن ماتنقـرى . .

في البداية . . الفيزا . .
تأشيرة شنغن . . تسويها ع أول دولة بتزورها . . يعني في حالة سفرتيه ( ألمانيا ) . .
وبعدين يوم نتنقل من ألمانيا - سويسرا - باريس . . مانحتاج الجوازات . . المهم مريت ع المانيا وعندك شنغن في جوازك . .

سعر التأشيرة لمدة 3 سنوات 700 درهم . .
انا عطيتهن مكتب معروف دوم نتعامل معاه وخلصهن لي . .
واهم نقطة صورتك لي بتعطيها اياهم ماتكون مطابقة لصورة الجواز + خلفية بيضه :gooddw:

كانت غلطتي قبل السفر انيّ ماقريت أكثر عن الأماكن اللي بنزورها . .
الشـي خارج عن ارادتي بسبب انشغالي في العمل . .

سفرتنا كانت بارده جداً وممتعة . .
كنّا نلبس من كل شـي 2 :eh_s(6):

♥ - ألمانيا . .
حبيت ميونخ . . ويمكن لانه اول مره اشوف الثلج في هالمدينة فـ صار لها حُب خاص فـ قلبي . .
أمّا بالنسبـة لشعبها !!
ماحبيتهم أبداً . . أوغاد :212:
تعاملهم سـيئ . . ع قولة اختيه . . شو تتوقعون من احفاد هتلـر :ml7:

♥ - سويسرا . .
لوزيرن ( تفاحة اوروبا الذهبية ) و جنيف ثاني أكبر مدن سويسرا . .

السويسريـن لطفاء . . بالرغم من انجليزيتهم الضعفيه بس يحاولون قدر المستطاع المساعدة . .
عكس الشعب الفرنسي تماماً . . haah
سويسرا غاليه جداً . . من مواصلات وأكل وسكن وتسـوق . .
مثلاً نحن 4 أشخاص . . في وجبة غداء حتى لو 3 اطباق او هب وجبة رئيسة كاملة . .
مايطلع الحسـاب أقل من 600 درهم . .

♥ - لوزيرن . . عشقت مطرها وثلجها . . واتمنى أزورها مره ثانيه سواء في الشتاء أو الصيف :eh_s(1):
يجذبني جسر شابيل الخشبي لي خبرتكم عنّه سابقاً وبعرض له صور ان شاءلله منفصلة في برزة التصوير . .
Chapel Bridge الجسر تم بناؤه عام 1933 و أحترق تقريبا بالكامل عام 1993م وتم إعادة بنائه . .

فيها حياه وحركة جميلة . . توقف عند البحيره تبان لك الجبال من بعيد . .
منظرها أخّاذ حتى لو كانت مغطاه بالثلج . . فيها قمم جبال كثيره أشهرها Titlis . .
انا المعارضه الأولى للصعود إلى هناك سواء بالتلفريك أو غيره timo

♥ - جنيف . . فيها المقر الأوروبي لمنظمة الأمم المتحدة و المقر الرئيسي لمنظمة الصليب الأحمر عسب جيه سمّو جنيف عاصمة السلام . .
في حد مايعرف نافورة جنيف المشهورة ؟
بنيت النافورة في عام 1886 وتعتبر من أطول النوافير بالعالم يسمونها Jet d'Eau . .

♥ - باريس وديـزني . .
ديزني رائعه للكبار والصغار . . وكنّا موفقين في اختيار مكان الإقامة . .
اللي ضايقني الزحمـة . . بس أجواء لا تعوّض . .

باريس . . كنت متوقعتنا أجمل بكثير من شدّة حُب صديقاتي لها . .
زحمه وانتو بكرامه احسها وصخة . . وفوق هذا شعبها القذر . . والله ريحتهم خايسـه :212:

ليش اجمل العطور فرنسيه ؟
لانهم شعب قذر ماكانو يحبون يسبحون . . فـ صنعو العطور عشان بس يتعطرون مايحتاي يسبحون " فيـس يرجّع "
وبالفعل عطورهم رائحتها مختلفه حتى لو موجوده عندنا في البلاد . .

والشانزليـزيه زحمه لا يُطاق . .
مثلاً في ميونخ . . في المارين حتى لو توقف وتشوف ع مد النظـر ناس . .
ماشي مدازز . . في باريس العكس . .
خاصه السيّاح من الصين مادري كوريا :ili:

الأماكن كلها زحمه سواء محلات أو مطاعم أو كوفيات . .
كل شـي بالدور . . الشغلة تطلع من خاطرك ماتبااها :

ko::

مانختلف . . حلوة باريس بأنوارها . . وحلوة بـ برج ايفل وقوس النصر واللوفر . .
اطلقو عليها مدينة النور لانها سنة 1828 أول مدينة أوروبية تضاء شوارعها بمصابيح تعمل بالكيروسين . .

لـو كان لي خيار انيّ ازورها مره ثانيه . .
بوافق من أجل التسـوق فقط . . له مُتعه خاصة في باريس :msafer:

التنقل بين هذه الدول . .
كان عن طريق القطار . . أرخص عن الطيران الداخلي والأمتع . .
تشوف الطبيعيه الخارجيه وتذكر الله . .

قطاراتهم نظيفة ومرتبه . . وماشي زحمه . .
تحجز التكيت عن طريق الإنترنت أو محطة القطار نفسها . .

يمكن في مصطلحات ماتعرفونها . .
بشكل عام لازم تاخذ معاك لاب توب وانت مسافر بيفيدك بـكل شي . .

عرفنا ترجمة البيانات الموجوده عن طريق احد المواقع . .
اللي تحتوي على رقم المقصوره ورقم الرصيف اللي يتوقف عنده القطار والوقت . .

الاب توب كان يفيدنا يوم نبى محل معين مافي داعي نجوب الشوارع بحثاً عنه . .
نشوفه ع الخريطه ونتبعه في اليوم التالي . . او تأكيد حجوزات الفنادق وتغييرها . .

أرخص بطاقة تليفون والأفضل في سويسرا . .
اسمها lebara . .
وفي فرنسا Orange . .

الكِل كان معارض على فكرة سفرنا في الشتاء . .
والحقيقة ماتندمت أبداً اني خطيت هالخطوة . . كانت تجربة جديدة وأكثر من رائعه . .
الحياه هناك ماشية مافي اي تعرقل في حالة سقوط الثلوج . .

استمتعت بكل دقيقة مع اخواني . .
أحبهم وعسى الله يحفظهم لي . . خاصة في سفرتيه هاي تعلمت الكثير

مخططاتي في السفر القادمة ( في خاطريه وما بصرّح فيها أمام الوالد والوالده الا بعد سنة عن اتصفع )

- لنـدن . .
- فينيسيا . .
- ايطاليا . .
- امريكا . .

في الأخير شكراً بحجم السماء . . من قلبي لكل شخص تابعني . .
أتمنى إنّي مانسيت حد . . والأسماء لي بكتبها في ذاكرتيه لانه التقاييم اليديده تغطي ع الجديمة . .

MiNoOo 87
طير الشوق
عايشه
شيبة محتشر
راعية المعاني
د . فارس
بوحمدة
عطر الأماكن
تدرون ليش ...؟؟
sad smile
ربي ثبت قلبي ...
نظرة غرآم
ϩḩέyσ5e
شموخ شحية
سعود دلك
الجارح2003
هدوء طفله
فتى العرب

أشوفكمْ في سفرات قادمة بإذنه تعالى

غنَاتْيـے · 4 فبراير 2012

مَالي ومَالْ الأوَادمْ مِن بعِيد وقرِيبْ . .
الكَلمه الطَيبه بـوجيههمْ كَــافيه

المَــال لـَو يِشتري الدِنيا مَــا يقدرْ يجيبْ . .
النيّه الطَيبه والسِترْ والعـَافيه

السَلامْ عَليكمْ ورَحمة الله وبـركاته . .
مساكمْ و صـَباحكمْ سكّر زياده :ax:

اشحالكمْ اخواني وخواتيه عساكم بخير ؟!
عوده ع السـريع للإنعـاش المُدونه :3nb:

مِن يوم الأربعا امايه وابويه قايلين لي انه بنسير راس الخيمه :cm:
لا وهب بس جيه . . لازم تحضرين عرس مع امج واختج . . بصفّع عمري ع قولة شيُوخي . .

اروح عرس بالنسبه لي يعني اعدام تايـــم haah
البيت محد في فـ weekend يعني لازم ارضى بالأمـر الواقع . .

بالخميس . .
ربيعتيه في الدوام يابت لي شي أحبـه :a040:

مابعطي حـد :yy:
استـويت مدمنه عليه ومن فتره خلّص في الأسواق كنت ادوره كل مكان . .
عاده فديتها ماتحب تخلي شي في خاطريه . .

ومن فتـره وصلتني هديه من اختيه الكبيره . . شكراً مليون مره يا ام بطي :shyy:

الحصالة اللي شكل كاميــرا . .
ويابت لي شي ثاني cute من قبل ادوره . .

هذا حجمه مقارنه بغرشة العطر . .

----> هههههههههههههههه حركات التاجرات بس هم يقارنونه بدبة ماي العين :3nb::3nb::3nb:

رجعت من الدوام حطيت ملابسيه اسرع شي في الدينا . .
كنت راده متأخره اصلاً

يالله يا غناتي تلبسي للعرس :laaa:
ماحب المكياج وماحب الأعراس ماحب اي شي يتعلق فيهم . .

وانا آخر وحده مخلصه كالعـــاده . .
وسيده من بوظبي للـعرس :ili:

احلى شي في العرس . .
العروس حدرت ع موسيقى كلاسيكيه ووحده تعزف ع الكمــان

وصلت البيت ماعرف كيف خوزت غسلت ووطيت راسي . .
كانت مصدعة واحس عيوني مصدعات ع قولة عيوز مشتطه :eh_s(6):

بصبح الجمـعة . .

أحلى شي في راك . . الريوق احس له دوم طعم مختلف هناك . .
ادري طفاسه خمير وبطاطس عمان :3nb:

اخويه الكبيره بعد كان في راك فـ بعد الغدا اتصل واقترح نسير المنار مول . .
وهيّا إلى هناك . . مع رواضي فديت نصخها

وغناتي ماتفوّت هالشـي . .

ونحن هناك . .
شفت شي في عمريه ماريته في بوظبي ولا دبي ولا بشوف شراته ماظنّي . .

شو مستوي في البنات ؟!!
متــــخبلات !! والله اخس عن العرس واستغفر الله حركات الاغراء . . مخلوقات غريبه . .
شو مستوي في الدنيا :212:
منصدمه بعدني من لي شفته . .

ردينا البيت ع اذان العصر . .
وبعدها كنا مخططين نزور بيت عموه ونشوف يدوه . .

فديتج يا يدوه الله يطول بعمرج

شفنا عمّي هناك . . عمّي الوحيد . .
حبيت الأجواء بلمتهم . .

أول ماطلعنا وركبنا السياره . .

أنا : ابويه يعني احينه عمّي اكبر عنك بكم سنه :eh_s(6):
انزين شو يعني هو يقول البحر خب . . يالله كيف أسأل . .

بعدين شفت من بعيد اسواق الخليج . .
انا : ابويه ابى اروح :think:
ابويه : شو تسوين تشترين مواعين . . ؟ امايه عطتني نظره . .
انا : انت ودني ماعليك . .

واايه فديت باباتي وداني . . احب احس انّه بعدني البنت الصغيره رغم وجود اخواني الأولاد :3nb:
ودخييلكم شو اشتريت ؟

هههههههههه مال أول . .
ذكريات دكان حسين :eh_s(6):

ومسـاء الخير يا راك . .

من أسباب ذهابنا لـ راك ايضاً . .
زيارة بنت خالتيه بسبب قدوم المولوده اليديده . .

واااااااااااي فديت بيبي شمّا . . اجنن ريحتهم هالبييبيات :a040:
يوم يا الفـرج . . العودة إلى العاصـمة . .

وصح مبروك عليكم الجسر اليديد يا أهل راك :ala:

يا نبض بنتـك ♡
عَسّى تعيشُ بخّيرْ . . وعَسى عمرك فَرح ؛ يَـا فَرحة الدِنيَا و مَافِيھَـا !*

غنَاتْيـے · 10 فبراير 2012

زَارني بَعد العصرْ عندي حَضرْ . .
بَس ما طوّل قعد له ساعتين

يوم سلّمت شَمسنا عني ظِهر . .
قِلت وينْ تبغى . . ؟ تمّهل يا ظنين
.
.
♥
.
.
السَلامْ عَليكمْ ورَحمة الله وبــَركاته . .
مسّاكم ولياليكمْ خير وعافيه :ax:

شكراً جزيلاً لكل متُابعين يَوميات بِقشة عيَـايزْ لاخليت ولاعدمت timo
هذا الإسبـوع اللي مَـر كِنت مشغوله جداً جداً في الدوام طبعاً . .

أوصل البيت ع اذان المغرب وما فوق . .
تعب صدق وهالشي بيتواصل لين الإسبوع القادم . .

فـ لذلك اختيه وربيعاتنا حبّو يغيرون لي جو . .
وطلعنا نتغدا قبل أمس في سوق البري عقب الدوام هالرمسه الساعه 5 :think:

شعُور رائع يوم اللي حواليك يهتمون بنفسيتك ويتمنون لك الأفضل

أمــس الخميس . . كان ابويه مرتب انه نسير المزرعه عقب مانرجع من دواماتنا :a040:

وبصـبح الخميس . .

الأيام لي طافن حتى مايمديني اشرب القهوه يصبونها وتبرد -__-"
امس بس تنفست شوي . . واحب اقضي ع الأقل اول نصف ساعه من صباحي في البرزة قبل ما اغوص في الشغل . .
ويمزرون الفنيال من العياازه مايوقفون ويصبون لي . .

ونحن رادين خطفت الدكان :eh_s(6):
اهم شي حق المزرعه . .

وتوجهنا الى هُناك سايرتين ماشاءلله نحن وايد . .
وحشرة قوم بطي ht5

يامرحبا بكم في مزرعة ابويه اقربو . .
هذا العريش مسوينه من فتره بس انا ماسرت والكل مستانس عليه . .
صدق وااايد حلو . . وبرع في يلسه والجو جميل . .

ومن داخل . .

وفيه تلفزيون وكرمتو حمّام . .
قلت حق ابويه حط لنا انترنت انزين . . :

ko::
امزح امزح . . أحب هالأجواء بعيداً عن التكنلوجيا . .

وأجمل يلسـه وسوالف . .

ورحله استكشافيه في المزرعه مع طويل العمر . .
إلى درس الهوش وانتو بكرامه . .

وهني ابويه ياربي شو قال اسمه . .
هييييييييييي مسطاح الرطب :eh_s(6):

وأحلى شي في المزرعه . .
النبببببببببببببببببج

ماشاءلله ماشاءلله هب مجاملة لانه نبج مزرعتنا بس ماقد كلت نبج احلى منه . .
ودايماً اييبون لنا البيت ووزعّو كل مكان . .
والكل يتخبر عنه وين نبج مزرعتكم نبى منه . .

والبيت مسوين لنا ذره . . ماحب آكلها بهاي الطريقه . .
اتم الا تشير في ضروسي :eh_s(6):

والشلّه . . أهم شي فارس حبّة الشبس اكبر عن ثمه :3nb:

أذن المغرب صلينا وكلمنا يلستـنا . .
عقب ههههههههههههه . . طبعاً في المزرعه شي بيدار . . اظني 3 . . طبعاً هم بعاد عنّا . .

تخيلو يومياً يسون خبز ع الدرام OMG تخيلتو كييف !!
وشوفو الخبزه مكبرها ؟!

شوفووووووو :wnash:

ههههههههه انا تم في خاطريه اذوقها . .
جربتها . . وامايه هب طايعه هههههههه اونه جزّت شو مسوينها فوق الدرام :3nb:

8 ونص خلاص استوا برد واليهالو مدثرين مودين معاهم كفرات . .
ورجعنا المنزل . . كانت طلعه حلوة لولا حشره اليهال :think:

هناك أوجاع لا يُزيلها دِفء البَعض ولا بلاغتهم اللغويّه في التخفيف عنّا فـ بعض
الأوجاع خلقت لـ تقربنا إلى الله خُلفت لكَي نسجدْ ونقترب ♡

غنَاتْيـے · 26 مارس 2012

وِينكْ عَن إحسَاسِي ووينكْ عَن الجَو . .
الجو يِشبه ضَحكتكْ وامنيَاتكْ

أستَبشرتْ كِل البِشر وأمطرتْ توّ . .
جُو بُوظبي ♥ اليُوم مِن جَد فَاتكْ

:rose:

السَلامْ عَليكمْ ورَحمة الله وبَركاته . .
مسّاكم الله بالخير والعافيه جميعاً timo

عرفتوووني . . ؟
هي انا غناتي . .

oo:

اشحالكم عساكم بخير السموحه ع القصور . .
دوووم جيه حالتيه . . انا كل يوم افكر الف مره انّي اكتب استقالتي haah

اممممممم . . هذا الرد ابى احط عنّه من زمان . .
من ضمن هواياتي . . احب اجمّع السوفنيرات . . ( تذكارات )

من الأماكن لي ازورهن . . أو الأشخاص لي حولي يعرفون
انّي احب اجمع هالأشيا فـ هب مقصرين معايه . .

اعتبرهم كنزي الثمين . . والصغاريه غرفتي بالنسبة لهم بلاد العجائب :boredsmiley:
لانهم معروضين بشكل يثير فضولهم . .

احب انكم تشاركوني برؤيتها . .
بنبدا من اليسار من فوق لـ تحت :ah:

الصَحن التذكاري : خذته من جنيف . .
البطاقة : مشاركتيه في حدث مهم فـي دوامي . . والأمن يطلعون لنا هالبطايق كتصريح لدخول مكان الحدث . .
وتحتوي ع اسم المشاركه فـ انا محتفظه في كل بطاقاتي كـ ذكريات جميله . .

الصحن التذكاري : خذته من الحديقه في ألمانيا . .
الدرهم : خذته من ديزني مكتوب عليه فرنسا بعدّة لغات حتى العربيه

البنت الصينيه : من هزاع ولد اختيه . .
المكعب لي فيه ماي ودلافين : من هزاع وبطي لدى زيارتهم لـ الأكويريم في دبي . .
تمثال الأوسكر : من اخويه الكايد من امريكا . . يعني انا خذت الاوسكر كـ best sister :ah:

وايد مجّات عندي من أهم السوالف لي احب اجمعهن . .
اللي ع اليمين : من قطر ( المتحف الإسلامي )
اللي عداله : سانديغو من أمريكا . . من اخويه الكايد . .
وبعدين من ربيعتيه . . واللي ع اليسار خذته من قطر . .

بروشورات . .
جازمين حرمة علاء الدين : خذته من ديزني . .
ومال قطر اكيد يعني خذتهن من الدوحه . .
وشعار روح الإتحاد ذكريات اليوم الوطني الـ 40

اهم الأشيا :
الصحن اللي مكتوب عليه جلاسكو . . من سكوتلند . .
مستشار شيبه عندنا في الدوام كان ساير يحضر حفل تخرج ولده ويابه لي هديه . .
التمثال الغريب : واحد من قسمي يابه لي هديه يوم سارو الوفد كيب تاون . .
المنظره الصغيره عليها برج ايفل : هديه من اختيه ام بطي في آخر زياره لها لـ فرنسا . .
ورا الساعة الرمليه في البرج التوأم خذته من ماليزيا . .
الصحن الثاني : تذكار خذته من بانكوك . .

الصحن التذكاري : خذته من زيارتي لـ سنغافوره . .
الصحن اللي فوق البكس مع الجف والساعه : هديه لي من مصر . .

ننتقل للصوب الثاني :

صور الغوالي :shyy:
ورا في اكواب بعد + لعبت الخيول مالي اللي اموت عليها . .
يوم أدورها اطلّع موسيقى لمعزوفه مشهوره . .

اهم شي امكله . .
omg omg omg . . snowball . . وايد احب ايمّع منهن . .
هاي المجموعه كامله :

من اليمين لـ اليسار :
من لندن . . هديه من ربيعتيه منى . .
من فرنسا . . انا خذتها من باريس . .
من الدوحه . . انا ماخذتنها . .
من ميونخ واللي عدالها من فيينّا هديه من اخويه سلطان . .

♥

اول ثنين من سويسرا . .
وحده من اختيه يوم سارت واللي عدالها من ربيعتيه . .
الثالثه من لوس انجلوس . . هديه من ربيعتيه منى . .

♥

تحت ع اليمين . .
بعد من جنيف . . يوم سارو شباب قسمي جنيف . .
واللي عداله من تركيا هديه من اخويه سلطان . .
ومال ميكي وميني انا خذتها من ديزني . .

♥

اول وحده من سويسرا وتحديداً خذتها من لوزيرن . .
ولي عدالها خذتها من ميونخ . . وعقبها من بانكوك وآخر وحده سنو وايت خذتها من باريس بعد . .

اهم الأشيا :

الصحن التذكاري من ديزني . .
والبطاقه اللي عليها بطوطه ذكريات زيارتي لـ اول مره لـ ديزني . .
الدانبو ياني هديه من امريكا . .
الميداليه الباص هديه من منى . . لندن . .

برج ايفل مع ميني خذته من ديزني . .
امممم شرات الصينيه . . تذكار من مسؤولي كان ياي من مدريد . .
البكس الصغير لي لونه اخضر هذا صندوق موسيقي خذته من جنيف . .
يعزف لحن النمر الوردي . .
القارب مع البنت خذته من بانكوك يرمز للسوق العائم في تايلند . .
الصحن تذكار اشتريته من ميونخ . .
بوك ع شكل دلاغ وفيه علم سويسرا خذته من لوزيرن . .
السياره مسوايه من قوطي الكولا خذتها من بانكوك - السوق الليلي . .

مج : روح الاتحاد . .
اللي عداله من فرنسا . . والتيرمس من قطر . .
الأبيض مكتوب عليه آي لف ميونخ . . واللي عداله من مول الامارات . .

وفي الآخير . . على ثلاجتيه المتواضعه :

السمُوحه ع الإطالـه . .
أشوفكمْ ع خير :fafaf:

غنَاتْيـے · 18 أبريل 2012

السَلامْ عَليكمْ ورَحمة الله وبركاته . .
صبـاحكمْ وَرد جميعاً :rose:

مُشاركتي في مُسابقة الشيخ مَاجد بن محمد الإعلاميّة للشَبابْ - فئة التَصويرْ
تَحت عِنوانْ - طَيف المَاضي -

http://home.sheikhmajidawards.com/photograph/طيف-الماضي/

أحتاجْ تشجيعكم لي في أول مرحلة مِن خلال التصويتْ عبر الموقع الإلكتروني
بالضغطْ على المربع الأصفر أسفلْ الصُورة في جهة اليَسارْ .

شاكره لكم دعمكمْ المُستمر لي
تقبوا فائق الإحتِرامْ والتقديرْ ،،

سَلامة الشِحي ♡

غنَاتْيـے · 19 مايو 2012

غنَاتْيـے · 9 يوليو 2012

بقـَشةْ عِيَايـزْ ;`

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

نحن نقدر خصوصيتك