تعرف على قطع الكمبيوتر الداخليه ...شرح بالصور ...

السلام عليكم ورحمة الله وبركاته


شحالهم وشو الاخبااار ....


طبعا اغلبكم ما حاول يبطل كمبيوتره ويشوف شو اجزاءه الداخليه ....ويطمش على الموجود ...اعرفكم ما عندكم جرأه تخافون يخترب شي ...اذا ما حاولتو عيل كيف بتتعلمون ... انا تعلمت من هاي الطريقه ...الاستكشاااف لين ما عرفت كل شي وشغلته ...


المهم بشرح لكم بطريقه مبسطه شوهي الاجزااء الرئيسه في الكمبيوتر ....


يلا الحين بنخليكم ويا الصور والشرح البسيط ...


نبدأ بها الكمبيوتر الي عندي من 5 سنين ولا اكثر شوفو شكله مسكين يهم ...ابتلى فيني ...الحين مخلنه للتجارب وحق اخواني الصغااار يلعبون فيه ...



طبع الكل يعرف شكل الكمبيوتر من ورا ... كله مكان تركيب الوايرات (السماعه والشاشه والماوس والفلاش ميموري والكيبورد والطابعه و...الخ... )

طبع هاي الاشياااء كلها تكون موصله في المذربورد (اهم قطعه في الكمبيوتر) بنشوفها بعد شويه ...


الحين نفك البراغي بس مال الجانب الايمن عشان نفتح المستور ...

وبيطلع لنا هالشكل ...




وايراات وبلاوي ...ههههههه شغله معقده ...بس ترا بسيط والله ...

وهاي صوره تقريبه للمذربورد وعليها كل الاشياء موصله فيها






هنيه طبعا بننتبه للمروحه والي تحتها بيكون المبرد وتحت المبرد بنحصل شو ...؟؟؟؟ اكيد بنحصل البروسيسر او المعالج ... ها الي تسمعون عنه يوم يقولون سرعته الكمبيوتر 2.3 جيجا هالمعالج ...

واليمين المروحه نفس شرايط الفملي مال اول او شرايط السيجا ...شوفتوهم الي محطيين بالطول ...هذينه الراااام ...هاي يسمونها الذكراه المؤقته ...هاي تخزن كل شي تسويه يوم الكمبيوتر مبطل واول ما تبنده ينمسح منها كل شي ...وحجمه الحين وصل اعتقد 4 جيجا .. يمكن وصل 8 مااعرف ما تابعت اخر التطورات ...

نرجع للشرح ...


اوووه نسيت ...ترا المذرد البرود هيه اللوحه المستطيله هاي الكبيره الي تحت ...عرفتوها ...الي ما عرفها يرفع ايده ...؟؟


الحين ببطل الكمبيوتر قطعه قطعه .... ترا ما صورت بالفيديو لوكان فيديو بتتعلمون الطريقه عدل ... بس يالله شي احسن من لا شي...


ها اول قطعه موزع الكهربه (البور سبلاي power supply)



ها اسميه القطعه الفدائيه في الكمبيوتر ... ها شغلته توزع الكهربه على حسب احتياجكل قطعه في الكمبيوتر ... ولو زادت الكهربه في الكمبيوتر ها تنظم وتقللها عن طريق ما اعرف شو المهم فيه شي (مب مهندس كهربه انا بسال اخوي الكبير هوه يعرف)...

المهم ليش سميت هالقطعه الفدائيه ...لان لو الكهربه زادت في الكمبيوتر تحترق هاي القطعه وتقطع الكهربه عن الكمبيوتر بكبره ...لانلو دشت فيه كهربه زياده كانت قطع الكمبيوتر اغلبها بتحترق ..يعني بدون هاي القطعه الكمبيوتر سلم عليه ...


الحين شوفو هاي القطعه الي بالوسط لونها ازرق ...موقفه بالطول ...



ها كرت الشاشه (graphic card)
كرت الشاشه هنيه وين نركب واير الشاشه عشان تشتغل كروت الشاشه وكل ما كان الكرت نوعيته زينه يكون الوضوح والدقه اوكي وماعليهم كلام والكمبيوترات اليديده الي تكون مخصصه للالعاب يكون فيها كرتين للشاشه ...هاي معلومه حلوه للي يحبون الالعاب

هاي القطعه بعد ما بطلتها من مكانه ...







وهاي القطعه الثالثه المودم ...المودم على حسب الكمبيوتر انا مالي جديم فالمودم ياااك قطعه تركيب مب مدموج ويا المذربورد ...نضيفه في الاكسبانشن سلوت (الاضافات)

وها شكله من جدااام



فيه فتحتين نفس مال التلفون وحده نشبك فيها للنت عن طريق خدمه الديل اب (مال اول الحين كله شامل ولا برودباند ولا وايرلس)


والحين طريقه فك الرااام ....






شوفو انا وين أاشر على الرااام ... شوفو في النهايه والبدايه في قطعه بيضه ...هاي نضغطها لتحت من المكانين وبعدها نقدر نشيل الرااام ... وفي كمبيوتري انا مركب اكثر عن رااام وحده مركب اثنين واقدر ازيدهم ل 3 على حسب الاماكن المتوفره لها ...



ادري ايدي حلوه ...مايحتااي تقولون ...:gooddw:


خل نكمل ...


الحين شوفوا صبعي وين أشر ... على المعالج ... يلا عليه ...




ترا مسوين له حمايه ... بس وين بيروح مني ....بطلعه بطلعه ,...


اول شي نشيل المروحه من فوقه ... هاي مثبتينها بحديده تنشل شوفوها فوووق ...


بس ما بطلتها ... ترا هنيه ما يباله قوه بس يباله شويه عقل ...


شوفو شو تحت المروحه ...



هذا ظهر المعالج ....هالمربع الاخضر الصغير ...

طلعته من مكااانه







شوفو شكلها كله ابر ..ها القطعه الصغيره الحين ...قيمتها 900 وفوق على حسب السرعه ..




شوفو ها الي محدد عليه بأيدي ...ها يسمونه هيت سينك heat sink وين عيوز مشتطه هيه دارسه في التقنيه تعرف عن هااي الامور اعتقد



الحين بيسألني واحد ها شو فايدته ...

سمعتوا ترا سألني ...

ها فايدته يا طويل العمر ...انه يبرد الكمبيوتر من الحراره ...نفس المكيف ...ها ياخد الحراره ويوزعها على اطرافها شغله زينه ...

ترا عدو الكمبيوتر الاول ...الحرااره ..لو تزيد الحراره بيذوب القرص الصلب او الهارد درايف ...


وعلى طاري الهارد درايف ...




ترا ها شكله ...

شوفو كيف كبير ... ها حجمه 20 جيجا (مال اول ) الحين الفلاش وصل 36 جيجا اعتقد واصغر من ها بوايد ...



شوفو شكله منورا كيف ... شفتو الثلاث اماااكن ... اول واحد من اليمي مال الكهربه والثاني مال الجمبر بشرحه الحين والثالث مال الواير IDE الي نوصله فيه وياالمذربورد ...وبشرحه تحت ..

انزين الجمبر الي هوه الي في الوسط ... شوفو بتحصلون نفس الابر شفتوها بس الاخيره شكلها غير محطين عليها جمبر صغير ...ها يحدد نوع الهارد درايف اذا كاااان اساسي ولا اضاافي في الكمبيوتر يعني لو كاان عندي 2 هار درايف واحد لازم يكون الجمبر ماله على اليسا والثاني بالوسط ...يعني نشل القطعه الصغيره ونغير مكانها ...اعرف ما فهمتوا ...


وعلى فكره ها نوعه IDE Hard drive مب اليديد SATA Hard drive وترا الفرق بينهم هوه الواير ... بس الواير ... برويكم كيف ...




شفتو الوايرات ...هاي الويرات يسمونها IDE واليديد الحين يسمونه sata خل يولي اليديد خلنا بالجديم ...

انزين هاي الوايرات مال الهارد درايف والفلوبي درايف ومال السيديات ...كلهم تقريبا نفس الواير الا الفلوبي يكون شويه صغير ...


خلاص بطلنا كل شي الحين برجع وبركب كل شي من اول ويديد ولازم نرجع كل شي مكانه .....




وصلنا الوايرات بمكانها وها شكله من جدااام ...

شفتوا شي انتبهتوا ....

الوايرات لازم يكون اللون الاحمر فوووق ...شفتوا الوايرات فيه خط احمر ها لازم يكون فوووق ...



انتبهو على وايرات الكهربه لازم اللون الاصفر يكون فوووق ...هاي الطريقه السهله للتركيب والفهم على حسب اللون ...





تم بحمد الله فك وتركيب الكمبيوتر ...شفتوا باستخدام بس سكروب واحد وصغير بعد ....ما يباله شي ... ادري لو كااان شرح بالفيديو بيكون احسن ...


واهم شي لازم نأكد لكم ان الكمبيوتر اشتغل بعد هاااي العفسه كلها ....





شوفوا ...كل شي تماااام والحمدلله ....


اتمنى اني اكون قدرت اوصل لكم المعلومه ...والي يبا اي شرح يتفضل ويقول ...وانا جااااهز ان شاااء الله ...والي اقدر عليه بسويه ...:gooddw:


والسلام ختاااام ...وما اوصيكمنبا تقييم وردووود مشجعه ...تراني تعبت ...وان شاااء الله الله يوفقني واحط لكم طريقه عمل الفورماااات .بنص ساعه بس ...وهذا ما سوف تعرفونه بالحلقه القادمه ...<<> هالشعار الي يطلع يوم يخلص الرسوم ...

رد: تعرف على قطع الكمبيوتر الداخليه ...شرح بالصور ...

11111 111111111111111111111

أنقر للتوسيع...

وعليكم السلام ورحمة الله وبركاته

ما شاء الله عليك اخووي

شغل متعوب عليه والله

و أنا عن نفسي عندي لاب لاب مريح راسي ما اقدر ابطل و اركب :Afkr:

تستحق التقيم و الخمس نجوم اخووي
ربي يعطيك العافية

وتحرمان من يديدك

رد: تعرف على قطع الكمبيوتر الداخليه ...شرح بالصور ...

السلام عليكم


اسميك ما خليت شي .. الا ليتك محطنه من زمان

نسيت تقولهم عن التوستد كيبل هذا الي متقطع نسيت شو سالفته :


وهاي القطعه الي تقول انها بـ 900 .. استاذنا يقول انها بـ 500 ذلنا ذل عليها :shompe:


اسميني عفتهم وعفت وايراتهم وسكاريبهم :mf_tongue


انته خلصت وافتكيت جان عندك شي ميودنه لين الحين طرشه صوبي :^^:


وشكرن لك :bt:

رد: تعرف على قطع الكمبيوتر الداخليه ...شرح بالصور ...

:00eek::00eek:



و أين صبوع يديك البوقية


هب يديك أكبر عن الكمبيوتر خخخخ

سوووويلف

ما شاء الله
:eh_s(6):

رد: تعرف على قطع الكمبيوتر الداخليه ...شرح بالصور ...

موضووع مميززز


يوم بفضي بقرييه

تستااهل التقييم علييهـ

رد: تعرف على قطع الكمبيوتر الداخليه ...شرح بالصور ...

رد: تعرف على قطع الكمبيوتر الداخليه ...شرح بالصور ...

مميز يا خبير التكنولوجيا

تسلم عزيزي

رد: تعرف على قطع الكمبيوتر الداخليه ...شرح بالصور ...

رعـد قال:

وعليكم السلام ورحمة الله وبركاته

ما شاء الله عليك اخووي

شغل متعوب عليه والله

و أنا عن نفسي عندي لاب لاب مريح راسي ما اقدر ابطل و اركب :Afkr:

تستحق التقيم و الخمس نجوم اخووي
ربي يعطيك العافية

وتحرمان من يديدك

أنقر للتوسيع...

حاظرين للطيبين ...

وانت تحسب الاب توب سلم من ايدي .....

تعال وشوف ...

http://bokhalil.99k.org/up/uploads/723618e63b.jpg

بس الاب توب شويه اصعب من الكمبيوتر العادي قطعه وايد صغيره وطريقه فتحه شويه صعبه ...بس ها ما يصعب على الي يبي يتعلم ...
استكشف لاتيلس بطل وخرب ترا من ها الشي بتتعلم ...

وحياااك يالغالي :wrd:

رد: تعرف على قطع الكمبيوتر الداخليه ...شرح بالصور ...

ولد الأجواد قال:

:00eek::00eek:

و أين صبوع يديك البوقية


هب يديك أكبر عن الكمبيوتر خخخخ

سوووويلف

ما شاء الله
:eh_s(6):

أنقر للتوسيع...

ههههههه صبعي ترا اصغر من القطعه هااي ...

حشى مب عين ...ههههههههه

حياااك خولي ونتمنى نشوفك دوووم خلك مبركن عندنا ها ...وان شاااء الله تكون استفدت

رد: تعرف على قطع الكمبيوتر الداخليه ...شرح بالصور ...

عيوز مشتطه قال:

السلام عليكم


اسميك ما خليت شي .. الا ليتك محطنه من زمان

نسيت تقولهم عن التوستد كيبل هذا الي متقطع نسيت شو سالفته :


وهاي القطعه الي تقول انها بـ 900 .. استاذنا يقول انها بـ 500 ذلنا ذل عليها :shompe:


اسميني عفتهم وعفت وايراتهم وسكاريبهم :mf_tongue


انته خلصت وافتكيت جان عندك شي ميودنه لين الحين طرشه صوبي :^^:


وشكرن لك :bt:

أنقر للتوسيع...

تكلمت عنه بس باسمه الثاني ide cable ...

وترا السعر الي حاطنه شكله مال اول مب من ربع dual core و quad core >>>

ههههههههههه الله يعينج لاحقه لاحقه ياينج العجب بعدين ..

عندنا شايااء ميودينها بس نسيت وين بشوف لج في الهارد درايف اعتقد مال اخر3 سنين كله موجود ... حتى الروجكت النهائي مال التخريج موجود ... شوفي كتاب الرياضيات مال صف اول ثانوي البروجكت الي مسوينه اكبر منه ... هههههه

وحياااج خالتي ...