لي تلوع جبده - نصيحة لا يدش وخاصه غناتي واصحاب الاتيكيت

[شيبه محتشر]

السلام عليكم ورحمة الله وبركاته

الخميس لي طاف قالوا الشباب نبي طبخه غريبة وعجيبة
فسألنا الدكتور قوقل
طلع لنا شوربة الحريره وهي شوربة مغربية
فقلت انا لها

لمهم شفنا المكونات ويبناه

براويكم الصور وبعدين بقول
هي طلعت سهله بس خلط بلط

كيلوين لحم هندي والا عربي

كاسين حب هريس ونقعهم بالماي لين ما ينقع راسهم

كيلوين طماط مقطع ومضروب ضرب بالخلاط لين ما يعترف

حبيتن بصل وحط من الثوم ما تروم

بريالين دنقو من عند الخباز الايراني والا قوطين جاهزين
ربع زبدة كبيرة
ثلاث حبات ماجي بقر
شعيريه لي مثل البلاليط كاس كامل

ربطة كزبرة بريال
وربطة بقدونس بريال
وكرفس بطل كل لي فيه وخل اخر شي وقطعها

كل انواع البهارات حط
انا حطيت
ملح وزنجبيل وثوم وبزار وكمون وجرفه

نفور اللحم وحب الهريس بجدر ضغط نص ساعه لين ما ينضي اللحم والهريس

نيييب جدر ثاني ونحط فيه الزبدة

نحط البصل والثوم ونحمره شوي




بعد ما نحط فوقه اللحم والهريس
نييب الدنقو الجاهز ونحطهم وياه

ونييب الطماط المضروب

ونحن نحرك




وبعد اي شي لونه اخضر من لي قطعناه ونحطه

ونتم نحركه

وبعدها نييب كاس طحين ونصب فوقه ماي

لين ما يستوي عيينه سايله
حتى نغلظ الشوربة

وهذي النتيجة النهائية

نسكر الجدر ونخليه 10 دقايق على نار هادية

والنتيجة النهائية

سلمت يداك يا مولينكس



على فكرة محطين بالموضوع عدس
بس قلنا نحن هريس

:ala::ala::ala:

 

[ReaL DaY]

قصه حياته بالعنوان

بس يبالكم جدر يديد

 

[عيوز مشتطه]

شوربه وطحين وعيين وانته اي شي بتلطمه

 

[نسيم البحر]

تسلم يالشيف على هل الطبخات شوقتنا لطبخ

بس عندي سؤال كم جدر أستعملت أشوف الصور كلها جدور

 

[زيتونة(><)]

شكلهآ لذيييييذ << وحده تحب الخلط بلط خخ

أنزين نظفوا الغاز واشترو لكم سماطات ترا بكل مكان بتحصلونها ..!

يمكن يـــــــــــمـــــــــــكــــــــن أسويها بس بدون ثوم وقرفهـ :bad:

وبالعافيهـ عليكم //

 

[غادة الرياض]

يوووووه يالمشوااااااار
أكون صريحة معك يالشيبة والله مستحيل أطبخ شيء زي كذا لا وطحين كمان !!
ماشاء الله عليك ياصبرك

الشيء الثاني ياخي ليش احس دايم شغلكم بربسة × بربسة يالرجاجيل ؟؟؟

وبالعافية عليكم بس متأكد طلعت لذيذة !! :eh_s(6):

قصه حياته بالعنوان

بس يبالكم جدر يديد

:3nb:

 

[MiNoOo 87]

مسـاك الله بالنور و السـرور . .

ما شاء الله . . تسلم إيـدك ع الشوربه . .

هني و عافيه عليــــكم . .

ربي يحفظــك . .

:rose:

 

[ربي ثبت قلبي...]

وعليكم السلام ورحمة الله وبركاته

بالعافيه أخوي الشيبة ..

ويعطيك العافيه ..

الهريس على قولتكم نحن نقوله حب ^^ .. أهل الحجاز غالبا الشوربة يعملونها فيه حيييل لذيذة ^^

ربي يحفظك

 

[*فارسة الشارقة*]

الجميل انك تبتكر أكلات وتتدخل المطبخ ..
لكان بقولك شيء غير الجدر لأن قديم جدآ وغير صالح والمعدن يوم يستوي جديم يظهر مادة مب زينة ,,
يعطيك العافية

 

[شيبه محتشر]

السلام عليكم ورحمة الله وبركاته


عندي شباب يمسحون الصحون والجدور احسن من لوكس


للي بس تلوع جبده