ღ.ღ. مثل الهــوا و المــاي .. سيـــف ضـروري ღ.ღ.

[~ شحية قح ~]

السلام عليكم و رحمة الله و بركاته ..


مخبوركم ؟؟

اهون ؟؟ اهون شوي ؟؟ اهون امكم ؟ خوتكم ؟ التريووت كلهم ؟؟ زينين ؟؟

:mf_zippy:


المهم يا بني شح فديت روحكم


انا تهورت و كتبت قصة ... اقروها و ان شااء الله تعيبكم .. و ابا اشوف ردود مشجعةعسب انزل الاجزاء الثانية :mf_death:

بسم الله نبدا ..


شمـا :: بنية حبوبة رزين و طباعها هادية و وايد مريحة في التعامل و متفوقة بدراستها .. عمرها 20 سنة .. و تدرس في جامعة زايد في دبي ... عليها جمااااااال كل بنات حواء يحسدنها عليه .. هي طويلة وجسمها مليان معتدل ( غرشوب ) .. بيضة و شعرها اسود طويل و عيونها نواعس تذبــح.. صوااريخ مب عيون ..مستحيل تمشي جدا ادمي و ما يلتفت لها.. كانت تعق الطير من السمااا ..


مهرة :: أخت شما و عكسهــــا تماماااااا .. مهاري بعد بنوتة حبوبة .. بس وايد حشرية و سوالف وفوضوية و ملسونة و عفوية لابعد الحدود يعني اللي بقلبها ع لساانها ع طول .. مول ما تعرف تجامل ..و اطباعها طفووووليــة كانت اللمة ما تحلا الا بها .. و هي اللي معطية للبيت جو مرح.. عمرها 17 سنة وهاي اخر سنة لها بالمدرسة.. و كان جمالها متواضع و شكلها وايد عادي يعني مالها هاك الجمال اللي ينرمس عنه وحليلها بس تقاطيع ويهها السمحة خلتها تدخل القلب بدون استئذان لانها بنوتة عفوية و شيطونة بس عســــــــل ^_^


:: شما و مهرة هن البطلتين في قصتنا هاذي .. وااااااايد يحبن بعض .. كل وحدة منهن تموت ع الثانية .. هن خوات و ربايع و ولايف .. هن ببساطة روح وحدة و انقسمت في جسدين .. ان صاب وحدة منهن شي استهمت عليها الثانية بجنون .. و ان فرحت وحدة منهن فرحتلها الثاانية من كل قلبها .. وان وحدة منهن غلطت تنبه الثانية .. و هن بالنسبة لبعض خزانة الاسرارالمقفلة اللي تتأمن الثقة فيها ... مهرة و شما كل حد يشهد لهن بأخلاقهن العالية ترا امهن ربتهن احسن تربية من بعد وفاة المرحوم ابوهن .. و اخوهن سعيد هو اللي قايم بالواجب و متولي مسؤولية البيت كله و هو انسان متدين و صاارم و شديد .. وايد صاك ع خواته .. و هالشي قربهن من بعض زيادة و زيااادة ::





الجزء الاول



شمـا يالسة في غرفتها على سريرها و تتصفح المجلة و تشرب عصير .. و شوي و الا يصيح موبايل مهرة ..


شما :: مهاااري .. موبايلج يرن تعالي شليه ...

مهرة و هي تصارخ من بعيد :: ياية يــــــــااية ...

يت مهرة تدافش من بعيد و بطلت الباب بكل اندفاع و سارت صوب موبايلها .. و بدون ما تنتبه عالرقم سيدة ردت لانها خافت انهم يصكرون ..

مهرة :: الو

...... :: الوووو

مهرة و هي معقدة حياتها يوم سمعت صوت ريال غريب : خير اخوية بغيت شي ..

...... :: هذا مب تلفون سهيل ؟؟

مهرة :: وانت شو رايك يعني !! لا هب تلفون سهيل ... شكلك مغلط

...... ( يستهبل) :: بس هذا رقم سهيل و انا متاكد .. هو بايعنه عليج و الا شو ...؟

مهرة ( وهي محرجة ):: قلت لك هب تلفون سهيل شو بلاك انت ما تفهم ... لازم يعني تييك هزبة تخليك تفهم غصب ؟؟


يوم سمع الريال مهرة ترمس و هي محرجة ضحك ضحكة وايد وقحة صدق رفعت ضغط مهرة ..

مهرة :: اسميك قوي عين ... بطل هالحركات عن تييك زنوبة بين عيونك ..

..... :: البنات اتطورن قامن يلبسن بوت و انتي بعدج تحيجين ع الزنوبة القرمبع مالج ... ههههه

مهرة :: المشكلة انك تتحرى عمرك ظريف و في الحقيقة و الواقع تراك الا تافه ما تسوى بيزة ..

...... :: ههههههه فديتج والله

مهرة منصدمة :: نعــــم !! .. انت شكلك واحد خايس مب محترم و مينون ظاري تسوي هالحركات عسب تحد بنات الناس يردن لك حاسيتك ..

جان يضحك الريال بطريقة وايد وقحة مرة ثانية خلت مهرة تعصب من الخاطر ..

مهرة :: قلـــــــــــــة أدب ..
و صكت التلفون بويهه ..


ما واحاها غير تلتفت يسارها صوب شبرية شما الا و تشوف شما نااقعة ضحك و مغطية ابويهها المجلة ..

سارت مهرة صوبها و هي تعض ع شفايفها .. جلعت المجلة من ايدين اختها و ضربتها بها على راسها بالقو ..

مهرة :: يعني يالسباالة مالقيتي تضحكين غير يوم اكون انا معصبة ..

شما ترمس و هي تضحك :: لا بس عجبني اسلوبج ... اظني الا حرم يستهبل على اي بنت ثانية من عقب اليوم ..


مهرة :: لا شكله قوي عين ... انتي ما تعرفين يا اخت شما ان من اهم مواصفات المغازلجي المعاصر انه يكون قوي عين عسب يكون مغازلجي فول اوبشن ..

شما :: هههههههههههه .. وانتي شو اللي خلاج تردين عليه اصلا .. ناقصين مشاكل ويا سعيد .. جان درى باللي صار من شوي بزوالنا ترا .. زين منه سمح لنا يكون عندنا موبايل بعد جهود جهيدة ..


مهرة :: شدراني اناااااا .. كنت اتحراها ربيعتي موزوووه ..

شما :: موزة هاي اللي بصفكم اللي عزمتج انتي و حصوه ع حفلة عيد ميلادها ؟(( حصة هي بنت عم شما و مهرة و هي بسن مهرة و ربيعتها الروح بالروح و بنفس الصف )) ..


مهرة :: هيه هاي هي ..

شما :: انزين منو بيوديكم ..؟؟

مهرة و هي تغمز لشما :: راشد بياخذنا .. (( راشد هو بعد ولد عمهم و اخو حصة و كل الاهل يعرفون انه يحب شما و يبا يعرسبها اول ما يتخرج من الجامعة ))


شما تغيرت ملامح ويهها و نزلت راسها و رجعت تقلب صفحات المجلة ..

مهرة :: ياويل حااالي .. كل هاذي مستحى .. لك يضرب الحب شو بيزل .. هههههه

رفعت شما راسها و ابتسمت لاختها ابتسامة باهتة و ردت تطالع المجلة .. و هي تقول في خاطرها .. اي مستحى و اي حب .. ليتج دريتي بحالي و بحب قلبي لمن صوبه يسير ..


مهرة :: انزين شماني اباج تعطيني شوية من مكياجج .. و اباج تحطيلي تراج تعرفيني مول ماعرف احط ..

شما :: فالج طيب كم مهرة عندي ...

مهرة :: مب زين ترا عقب اصدق ..

شما :: انزين صدقي بس مب وايد .. مافينا تتبطرين علينا ..

مهرة :: ههههههه

شما :: انزين تعالي شو لون بدلتج ..

مهرة :: وردية ..

شما :: خلاص سيري تسبحي و بدلي و انا بحط لج مكياج خفيف و بلف شعرج لفة ناعمة .. و بتغدين قمر اربعطعش ..

مهرة :: شمووه دخيلج حققي لي هالامنية .. خلي الناس تشوفني احلى عنج لو ليوم واحد بس ..

 

[~ شحية قح ~]

شما :: حليييييييلج .. بوية لو شو ما سويت لج و لو شو ما عدلت فيج انا في الحلاة محد يتحداني ..هههه

مهرة :: انزين يلا اجلبي ويهج طلعي برا الغرفة خليني اتزهب و اخلص عقب بزقرج تكملين شغلج..

شما :: حشااا اللي يسمع يقول عروس بتزهب في غرفتنا ..

مهرة :: بسم الله علية من هالطاري .. بعدني نونو ..

شما :: وايد مستصغرة عمرج .. اماية يوم كانت قدج كانت حامل بالبلوة العودة سعّوود ..

مهرة :: اماية عاد الحب كان سابي قلبها خخخخخخ وانا شو حادني ع عثرة العرس وغيره مابا اعرس طول حياتي .. ابا اتم جيه سبهللة ...ههههه

شما و هي تبتسم :: بييج يوم بتغيرين كلامج ..

مهرة :: انزين ابكتب تعهد ههههه زولي الحينة بخلص شغلي قبل لا يوصل رشوود و حصوه ..


طلعت شما من الغرفة وخلت مهرة تاخذ راحتها و تتزهب.. و عقب فترة يوم خلصت مهرة ردت زقرت اختها شما عسب تخلص لها الرتوش الاخيرة ..

يت شما و حطت ميك اب خفيف لمهرة و لفت شعرها بطريقة ناعمة .. ترششت بعطور فرنسية و لبست شيلتها و عباتها وجان يرن موبايلها .. شافت رقم حصة ظاهر عندها بالشاشة ..


مهرة :: مرحباااالساااع

حصووه :: يابو عيون سود و وسااع ..

مهرة :: اي سود اي وساع الله يخليج .. الا قولي شلقى و معتمة

حصة :: ههههه خلينا نشوف الزين كله الحين .. تعالي ركبي السيارة نحن جدا باب بيتكم ..

مهرة :: انزين الحين بظهر لكم .. الحين بتزيغين .. بدا العد التنازلي هههه

حصة :: هههههه اوكي يلا نترياج ..

نزلت مهرة تحت و جبلت صوب باب البيت .. وهي طالعة والا جان يحدر سعيد البيت نفس الحزة ..


سعيد و هو يطالع مهرة من فوق لين تحت بنظرات غريبة جنه الا مب يايزله .. و مهرة واقفة و مجتفة ايديها و تطالع زوايا البيت عسب تتحاشى تطيح عينها بعينه .. لان مهرة و شما وايد يخافن منه تراه شديد و صارم وايد ..


سعيد :: وين سايرة حضرتج بهالعدول كله ؟؟؟

مهرة :: اممم .. لا ماشي .. بس ربيعتنا في الصف عازمتني انا و حصة حفلة عيد ميلادها .. و حصة الحينة تترياني برا ..

سعيد :: هيه ادري تراني شفت سيارة راشد سافطة جدا باب البيت .. و بعدين ماتدرين ان حفلات الميلاد هاي بدعة .. جق شو تسيرينها ..

مهرة :: بس سعيد ..

سعيد و هو يقطع رمستها :: لا تيلسين تبسبسيلي .. و بعدين كيف تركبين ويا ريال غريب وانتي متعطرة و سافرة ...

مهرة :: اي ريال غريب .. انا سايرة حفلة بنات ..

سعيد و هو مغيظ :: قصـــوووووورج .. و راشد شو عادتنه يعني ؟؟ مب ريال غريب عنج و لازم تحتجبين عنه .. ؟؟؟؟؟


مهرة :: اووووه .. الا هو رشوود ..

سعيد :: مهرووه ماشي سيرة ... سيري غرفتج و مسحي هالمصخرة اللي ع ويهج قبل لاحذفج انتي و اختج من الدنيا ..

مهرة :: اففففف ..
و ربعت بسرعة صوب حجرتها ..
شما :: مهاري .. شو بلاج ؟؟ ما بتسيرين ؟؟\

مهرة :: لا طبعا .. وين بسير و الا بشو بتهنى بحياتي دام هالعلة سعيد يالس ع افاادنا .. ناوليني الموبايل خليني ارمس حصوه .. بقولها اني هب سايرة ..


مهرة :: الو حصة

حصة :: مهاري وينج تحيرتي ؟

مهرة و قابظتنها الغبنة .. :: خلاص حصوص هب سايرة .. سعيد صادفني و ما خلاني اسير ..

حصة : افاا حرااام .. من خلصت المدراس واناماشفتج .. حرام جذه بخاطري اشوفج ..

مهرة : خلاص حصة ماعليه خيرها في غيرها ..

حصة :: خلاص مب مشكلة .. بس بنشوفج ان شااء الله في وقت ثاني ..

مهرة :: اذا الله اراد ..

حصة :: اوكي فداعة الله

مهرة :: مع السلامة enjoy your time( استمتعي بوقتج ) ..

صكت مهرة التلفون و غلقته ..
و اتنهدت بقوة ... و يلست ع ركبها جريب من شبرية شما .. وطت راسها و كانت متظايجة ع الاخر ..
يت شما .. و لمت خصل شعر اختها اللي طايحة ع ويهها و ودتهن ع ورا ..

شما وهي تبتسم :: بلاها راعية هالويه السموح معتفسة ؟

مهرة :: احنا لين متى بنتم جذه .. لا عايشين حياتنا شرا باجي الاوادم لا نطلع و نسير .. شو هالاخو المصيبة اللي ابتلينا به .. لو ابوية كانت عايش جان ماستوابي كل اللي يستوي بي من سبة هالاخ المصوون ..


شما :: مهاري حياتي .. سعيد هب بلوة و ابتلينا بها ... سعيد اعظم اخو في الدنيا كلها .. كفاية انه تحمل مسؤوليتنا و هو بعده صغير .. كان يحرم نفسه و يعطينا في الوقت اللي كانو كل الشباب اللي بسنه يستمتعون بحياتهم هو كان يكد عسب يعيشنا عيشة هنية .. و ما يحسسنا بكبر نجبة وفاة ابوية رحمة الله عليه ..

مهرة و عيونها بدت تدمع :: رحمة الله عليك يابوية ..

شما تكمل رمستها و هي تمسح ع شعر مهاري :: سعيد دين و ريال عارف الله و يحاسبنا ع كل صغيرة و كبيرة و هو متشدد ويانا بس ترا كل ها عشان مصلحتنا .. لانه يبا يخلينا نغدى بنات يفخر ابهن ابوهن لو كان بعده عايش ..

هني مهرة بديت عينها تتوالى بذرف الدمعات .. اللي مب هاين على شما انها تشوفهن ينزلن من عين اختها الغالية ..

شما و هي تضم مهرة بين ذراعها :: حبيبي مهاري .. والله ان سعيد يحبج و يخاف عليج من كل شي ... لا تلومينه على حرصه الزايد لج .. معزتنا الكبيرة هي اللي خلته يتصرف ويانا بهالاسلوب .. و يعاملنا بهالمعاملة ..

و هني مهرة يلست تصيح بصوت .. من بعد ماكانت تذرف الدموع بصمت .. و كل ماعلا صوتها شدت شما القبضة عليها .. و يلست تهدي فيها و تمت ع هالحال
لين مارقدت مهرة و خذتها لسريرها بشويش .. و لحفتها و يوم بغت تفج عنها عسب تسير ترقد شافت ان صبع مهرة السبابة متشبث بايدين شما بالقو .. كأن مهرة تقول لشما .. يا شما انتي منجاية الوحيد عقب ربي في هالبيت اللي ضاق به الحال من بعد ابوناا ..

ابتسمت شما و زخت صبع مهرة و بعدته شوي و باست ايديها و سارت رقدت



اتمنى ان هالجزء عيبكم ... و تريو الجزء الثاني ^_^



فداعة الرحمن

عليكم الرب حافظ ..



شحية قححححححححح :mf_viking

 

[معاني]

يه يه يه..

شحيه قح ..

طلع الابــــــــدااااااع ..

عيبتــــــــني القصــــــــة ..وايـــــــــــد...

و اتريــــــــا التكمـــــــــله ...

ابا اعرف قلب شما لمنــــــــو ساير ....؟؟؟

و عيبتنـي شخصية سعيد....نادره .

معانـي ..

 

[أدركت القـ م ـر]

السلام عليكم ورحمة الله وبركاته







هلا وغلا بشحيه قح .. الترايوووت كلهم يسلمووووون عليج خخخخ

المهم انتي شحالج..؟ وعربانج..؟


خويتي الخط وايد صغير والكلام تحت بعض عسب جيه في المرات اليايه لا تنسين تكبرين الخط ... انا بسويلها كوووبي بيست احينه في الوورد وبحاول اقراها في اقرب فرصه



ثانكس الغلا لا خلى ولا عدم

تحياتي
أواشيهـ

 

[~ شحية قح ~]

معاني ....


و قســــم بالله استانست ع ردج ... انا الحينة شحيووه قح المبتدئة تمدحني معاني اروع كاتبة في الدنيا ^_^

و جان اترقد .. :mf_zippy:


خلاص يوم بيطلعوني في الجريدة و بستوي مشهورة بقول معانيوه كانت تدعمني خخخخ
<< وايد تحلم :mf_viking





ثانكس الغالية ع مروورج ^_^







أواشي ..

حلاااات الموضوع بوجودج اصلا .. اسمحيلي الغالية كنت اكتب القصة ع الفير و نزلتهاالصبح و كنت مصطلة بالحيل ههه خلاص مرة ثاانية فاااالج طيب ازخرفه اوديه عند اروتشي بعد يضبطه ههه



تسلمين لي شيختي ^_^







شحية قح ..





:smile:

 

[شيخة البنات]

شحيه قح

ابوي انتي شكله لسانج طووووووووووووووووووووووووويل

مب هينه


اخاف تكونين مهره هذي !!



عيبني اسلوبج في الكتابه ....القصه لين الحين مافيها شي يديد...احداث دايما تصير في اي بيت ...بس الاسلوب شدني اكثر ...نتريى الجزء الثاني...هذي اول مره اقرأ قصه حد كاتبنها من الاعضاء....لج الشرف يعني ...خخخخخ.....



كيب ات اب دارلينغ



شيخة البنات

 

[~ شحية قح ~]

شيخة البنات ..


وربي انت فــــــــــــــــن :mf_zippy: ...


هاي مهرة لسانها بيطول زيادة وزياادة بس ترو ع لغابتها انتو بس خخخخ
ومب بس لي الشرف .. الا قولي اني افكر اطبع مشاركتج و ابروزها واعلقها بحجرتي ..


(( همسة :: لا ترتقدين وايد قلت افكر خخخخخخخخخ ))


ثوالف الغالية :mf_zippy:

 

[~ شحية قح ~]

الجزء الثاني ..



اليازية :: ها مايد ... بشّـر ..

مايد ( اخو اليازية بالرضااع و دوم منحاز لها و يسوي كل اللي تباه لانها هي اخته الوحيدة و دلوعة اهلها و واااايد شريــــرة ) :: ابشرج بشو؟؟

اليازية :: لا تستوي ماصخ عاد .. اقصد لك سالفة البنية ..

مايد :: هيه قصدج ربيعتج الحبيبة هههه ..

اليازية :: تخسى الا هي مالقيت غير اني احب هاي ..

مايد :: بس الصراحة وايد ملسونة ..

اليازية :: ادريبها .. انت ماشفت كيف يلست تفاتن علية و تقل ادبها يوم ... و سكتت ..

مايد :: يوم شو ؟؟؟

اليازية :: ماشي ماشي ..
:: اليازية كانت من نوع بنات المدارس اللي يقصن ع ربيعاتهن و حب و ماحب و اعجاب و هالخرابيط اللي حرمها ديننا .. و هي كانت بنفس مدرسة مهرة .. و بما ان مهرة بنية ذات شعبية قوية في المدرسة فحبت انها تقردنها و تسويلها حركات .. ::

رجعت اليازية بذاكرتها سبعة ايام ورا .. و تذكرت اللي صار بينها و بين مهرة في مسرح المدرسة .. بعد ماظهرن من لجنة الامتحان ..
بأخر يوم من ايام امتحانات الفصل الاول ..
طلعت اليازية من لجنة الامتحانات و حطت قلمها في جيبها و جبلت صوب اليدار اللي مجابل الباب صوب وين ما كانو شلة بنات متيمعات و مهرة من بينهن ..

اليازية :: مرحبا بنات ..

شلة البنات :: مرااحب هلا يزوي ..

اليازية حطت ايديها على زند مهرة و قالت بكل دلع :: بنات تسمحن لي اخطف هالمزيونة منكن لثواني .. لان اليوم بيكون احلى يوم في حياتي و انا في خاطري شي و ابا اقوله لها ..

البنات لاحظن طريقة اليازية الماايعة في الرمسة و اتظايجن منها لان حركتها كانت تنرفز .. بس سمحن لمهرة تسير وياها ..

سحبت اليازية مهرة وياها .. و هن يمشن قالت مهرة :: خير يزوي .. روعتيني شو السالفة ..؟

اليازية و هي قابضة ايد مهرة :: اممم .. ماشي .. بس ولهت عليج ..

مهرة :: غربل عدوج ما مداج تولهين علية البارحة شايفتني هههه

اليازية :: اااه يا مهرة لو تدرين باللي بقلبي لج ..

مهرة مستغربة و في خاطرها تقول .. بسم الله بلاها هاي ..

اليازية :: اليوم يوم مميز بالنسبة لي و ابا اقولج فيه شي مميز .. تعالي بوديج مكاني السري ..

مهرة :: عندج مكان سري بعد .. عـــاااشووو هههه

قادت اليازية مهاري صوب خنخوش صغيرون ورا مسرح المدرسة .. و قبضت ايديها بالقو و قالت لها .. مهاري .. تأمنين بالحب ..؟

مهرة :: والله ياليازية .. مافي حب ايي الا من عقب الزواج ..

اليازية :: ههههه لا لا اقصد ... يعني بنية تحبينها و هي تحبج و تموتن ع بعض ..

مهرة :: ..............

مهرة فجأة حست بالخوف .. و حست جنها ماتعرف اليازية .. حست انها غريبة عنها بعد ما كانت تعدها من اقرب ربيعها ..


اليازية :: مهرة انا احبج .. و مستعدة امووت عشاانج ..

فجت مهرة عيونها لاخر حد .. شوية و بيظهرن من مقبعهن.. و ايديها ترتجف .. حست اليازية برجفة ايدين مهرة ... و بدال ماتهدها .. قوّت القبضة زيادة ..

اليازية :: مهرة انا اقدر شعور الخوف عندج الحينة .. لانه طبيعي وموجود عند اي حبيبين في الدنيا ..

زاد خوف مهرة و حاولت تطلع من المكان اللي ودتها اياه اليازية هالانسانة اللي كانت مثالية بعين مهرة وبلحظة وحدة تحولت كل المعزة اللي بقلبها لها لشعور مقرف و اشمئزاز ...
.
يودت اليازية مهرة و منعتها انها تطلع ..

اليازية :: مهاري دخيلج لا تعذبين عاشقتج .. قولي انج تحبيني ..

مهرة و بحركة حازمة طيرت ايدين اليازية اللي ما طاعت اتهدهااا من يوم ما سحبتها من عند ربيعاتها ..

مهرة(بصراخ) :: هديـــــــــــــــــــــــــني .. يا قليلة الاب .. أخ عليج طحتي من عيني ..

اليازية وهي منصدمة :: مهاري .. غناتي .. شو قلتــــــــــي ؟؟؟؟؟

مهرة :: اظنج سمعتيني ... والله اني كرهتج .. شو هالحركات هاذي .. يــع اجز منج انا دام ان هاي سواياج ..

اليازية :: مهاري حرام عليج والله احبج ..


مهرة :: جـــــــــــــــب اقولج ... حبتج القرااادة ... يعلج الشوزن ..


هني اليازية مارامت تجاري اكثر وكشرت عن انيابها و بانت ع حقيقتها :: انتي احمدي ربج اني عطيتج ويه .. شوفي نفسج منو و انا منو .. اشكري ربج اني تنزلت لج.. غيرج تتمنى اني ارابعها ..

مهرة :: خلي ربعتج حقج ماباها .. عفتج يااليازية دام هاذي سواياج ...

سكتت اليازية شوي عقب كملت رمستهاو هي تبلع ريجها :: صدقيني يا مهرة ان ما بيصير لج خير .. بخليج تندمين ع اليوم اللي رمستيني فيه بهالطريقة ..


مهرة :: شو بتسوين يعني ؟؟

اليازية و الشرار يطشر من عيونها :: بهلكج ..برويج الويل..

مهرة ::: ههههه هيه صح واايد ... انتي خلج ع البنات المقصة اللي قاصة عليهن ابرك لج ..

الياازية :: انا بنتقـــــــم .. بسويبج سوات ما قد سواها مسلم بمسلم ... ما برتاح الا يوم اشوفج منكسرة لي و تترجيني ... بخليج تندمين انج اتجرأتي و ذليتي اليازية بنت حريز..

مهرة و هي تتصنع الخوف :: وانفـــادي .. و يلست تضحك باستهزااء .. تخسين الا انتي ...

انهد حيل اليازية و تفيزرت عالارضية الوصخة بهاذاك المكان المعتم .. و مهرة سارت بعيد عنها و هي بعدها مب مستوعبة اللي صار وياها .. اليازية كانت تناهي و تناعر و تهدد جنها مختلة عقليا .. و مهرة كانت زايغة منها .. وبسرعة جبلت صوب بوابة المدرسة و شافت سعيد يترياها في سيارته .. ركبت وياه ومانطقت بولا كلمة و ردت راسها عالكشن عسب تحاول تنسى الكابوس اللي مرت فيه من شوي ..

.
.
.

مايد :: حووه يزووي .. وين وصلتي ..؟

اليازية :: ها.. هني هني ..

مايد :: بشو كنتي سرحانة .؟

اليازية :: ماشي .. بس المهم انت الحين خبرني .. سويت اللي قلت لك عليه .. ؟؟

مايد :: هيه ..

اليازية ( بحماس) :: خبرني شو استوى ..

مايد :: ماشي .. صكت التلفون بويهي و هزبتني ..

طالعت اليازية في الارض و هي مجتفة ذراعينها .. و كانت تتخيل لو ان مهرة جدامها عسب تذبحها و ترتاح ..

مايد :: اسمحيلي اليازية .. انا ماروم اتعامل ويا بنات بهالشراسة ..

اليازية :: مايد انت وعدتني انك تنتقم لي منها و تييب راسها و تدمرها ... كيف ترد طلب حبيبتك يزوية .. والا انت راضي عن اللي سوته فية ؟؟؟!!!


اليازية كانت قاصة ع مايد .. كانت قايلة له ان مهرة كانت مطلعة رمسة عليها .. وانها شوهت سمعتها عند بنات المدرسة و هي تريد انها ترد كرامتها و تبين ان مهرة هي البنية الصايعة ... والا اليازية اصلا ماتروم تخبر مايد السبب الحقيقي .. ماتروم تخبره عن سواد ويهها ..


مايد :: لا طبــــــــــــــــــــعا هب راضي ... انا اشوف ان من عقب اجازة نص السنة نسير نخبر الادارة عليها و هم يتفاهمون ويا ولي امرهاا عسب ايئدبها هالسبالة الملسونة ..


اليازية وهي زايغة :: ها ... لا لا .... وتتصنع الصياح .. ما بيكون عندنا دليل .. انت بلاك ماتفهم ..


سكتت شوي و عقب ردت ترمس ..
اليازية :: اباك تأدبها ... ابا تخليها تحرم تطلع عني اشاعات مرة ثانية .. هي اللي سمعتها عليها غبار هب العكس .. وانا ابا اثبت هالشي لباجي البنات ..


مايد :: انزين بس كيف بحقق لج مطلبج .. انا بغيت اقردنها ع التلفون و اسجل صوتها عسب تسمعين باقي ربيعاتج و ماقدرت .. هي اللي ادبتني ههههه

اليازية :: والله انك متفيج تضحك .. دور لي طريقة مالي خص ..

فجأة طلعت براس مايد فكرة مظبطة عسب اييب راس مهاري ..

مايد :: يزووي .. جان بغيتي كل شي يمشي ع هواج و تصير هالخايسة لعبة بيدينج بغيتج تييبين لي شي واحد بس ..

اليازية :: شو هو .. اشر انت بس ..؟

مايد :: شرات ما طلعتي لي رقم موبايلها .. اباج تظهرين لي ايميلها ..

اليازية :: تــم مرة واصل .. بييبلك ورقة و قلم .. و بعطيك اياه .. تراها عطتني اياه اول ماتعرفنا ع بعض ..

و سارت تييب له و هي الفرحة مب واسعتنها ..

 

[~ شحية قح ~]

اليازية :: اندوك سجل ... *****_***@HOTMAIL.COM**

مايد و هو يكتب :: خلاص خلي الباجي علية ... اعتمدي علية ..

اليازية بابتسامة خبيثة :: تسلم عينك و راسك يدوم ..


=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-
:: في بيت المرحوم حارب بن سعيد ( اللي هو بيت بو سعيد )::


الساعة 10 الصبح و شما و مهرة و اختهن الصغيرة هند ( 8 سنوات ) ..

كانن يالسات ع ارضية الصالة و يطالعن التلفزيون و يتريقن .. و الجو كان هـــاااااااادي .. و شما تجلب القنوات ..

فجأة صرخت مهرة صرخة شرخت يدران البيت ..

شما :: بسم الله مهوور شو بلاج ..

مهرة و هي تعفد ع شما و تنشع الرموت كنترول من ايدها :: ردي القنـــاة .. رديــها ..

مهرة وقفت ع حيلها و تجربت من التلفزيون و تفرفر القنوات جنها عيوز مرتبشة .. و عقب ثبتت ع قناة وحدة ..

مهرة :: هيــــه .. هاكوو طلع طلع طلع ..

شما بغت تكفخ مهوور يوم شافت ان مهرة كانت حاطة رسوم ( سميد ) ..

شما :: عنبووووووج مهاااااري .. حتى هنودة الياهل ما اشتطت شراتج .. خيبة شقد مستصغرة عمرج ..

مهرة مب معطتنها ويه و حاطة عينها ع الشاشة :: هيا انظرو سميد .. و غامرو الفريد .. من الف الف عام يعود من جديد ..

مهرة + هنودة :: .. تتترتااا .. سمييييييد .. تترتا .. سميد ..

شما :: هههههه وايد مرتبشات يعني ... الا هو سميد لا ياب و لا ودّى ..

يلسن الخوات الثلاث ( شماني + مهاري + هنودة ) يطالعن التلفزيون .. شما يالسة ع الكنبة ..و هنودة متربعة و حاطة حذالها طاسة الكورن فليكس .. و مهاري منسدحة ع ظهرها و حاطة تكية تحت راسها و تلعب بباب الطاولة اللي محدر فوقها التلفزيون بريلها تفجه و تبنده و كان يطلع صوت مزعج يصاوي ..

هنودة :: بس خلاص مهاري بسج من تلعبين بريولج .. ابا اسمع ..

شما :: صدقت هنودة .. مب رايمة اقبض اصواتهم من الحشرة اللي مسوتنها ..

مهرة :: انزين بس خلااااص .. عنبو .. كلتوني بقشوري ..

شلت مهرة بعمرها و سارت عالكنبة اللي يالسة عليها شماني .. و تفيزرت عليها و حطت راسها ع ثبان شما .. و شما يلست تلعب لها بشعرها ..
مهرة :: شمااني ..

شما :: عيونها ..

مهرة :: متظااايجة .. و ملااانة بالقو ..

شما :: هيه والله من بدت عطلة نص السنة و نحن كل يوم نطفش زيادة .. انا وايد ولهت ع الجامعة .. ماولهتي ع المدرسة ..؟؟

مهرة :: هيه انتي مصرية لازم بتولهين .. والا انا شو ابا بالمدرسة .. خل تولي تزول .. هاي اخر سنة لي بخلصها و بفتك .. و مستحيل اكمل دراستي ..

شما :: ليش ان شااء الله .. بتعرسين ... ؟؟؟؟؟؟

مهرة :: اوهووووه .. انتي بلاج ع هالطاري ليش وايد مستلغثة ع العرس !! .. يابوية تريي علية لين يستوي عمري 26 عقبها يستوي خير ..

شما :: يعني يوم بيستوون عيالي كبر هنودة .. ههههه

و من سمعت هنودة اسمها ينطرى سيدة نقزت ..

هنودة :: بشو كنتن تحشن فية ؟؟ اعترفن هااا ؟؟

مهرة :: خيـــــبة مب اذن .. عربسات ..

شما :: هههههه سمي سمي .. حتى اختج بتاكلينها بعيونج ..

مهرة :: عاد اللي يسمع باكلها بعيوني يطيح واقف ... الا هن قد السمسوومة ما يبانن .. مب شرات عيونج انتي و هنودة ... كل عين بعين تخلي الكافر يستسلم ..

هنودة + شما :: اللللللله اكبــــــــــر ..

هنودة :: شكلها ناوية تحرق البيت بكبره بعيونها .. شمووه .. زوليها و افتكي منها ..

شما :: لااااااماقدر .. حبيبتي هاي .. عقب منو عندي اتشيطن وياه و اصدع براسه ..

مهرة تطلع لهنودة لسانها عسب تغايضها ..
هنودة و هي تفج عنهن :: مـــــــــــــــالت ..

مهرة و هي تعدل يلستها و تفتح كفها وتشوار على هنودة :: على ويهج ..
و ردت حطت راسها ع ثبان شما ..

شما :: يعني لهالدرجة انتي كارهة المدرسة ؟؟

مهرة :: هيه و الله و اكثر من ما تتخيلين بعد ... خصوصا من عقب سالفة اليازية ..

شما :: انا بروحي انصدمت منها يوم خبرتيني .. سبحان الله كنتي تمدحينها من بداية السنة .. بس فاجأتج بأخر يوم من الفصل الاول .. بس الحمدلله انج عرفتيها ع حقيقتها من الحينة ..

مهرة وهي تغمض عيونها و تذكر السالفة :: اعوذ بالله من هالاشكال ..

=-=-=-=-=-=-=-=-=-= يســــــــــود الصمـــــــت =-=-=-=-=-=-=-=-=-=


مهرة قطعت السكوت و قالت ::: انا بسير ايلس ع النت الحينة بتسلى شوي .. يوم بينسفون الاكل ع السفرة تعالي خبريني .. اوكي

شما :: ان شاء الله ..

...

جبلت مهرة صوب غرفتهن .. و يلست عالكمبيوتر .. كانت حاطة الخلفية صورتها يوم كانت صغيرة .. كانت الصورة تضحك .. عسب جيه مهرة كانت تحبها .. كان عمرها قراب السنة و كمن شهر.. كانو مصورينها و هي متفيزرة في الصالة و تاكل يح و موصخة حلجها كله و حوالينها كله بذور اليح و كان شعرها مفلول و مكشكش و مرقدين صوب واحد من الكشة بمقبض صغيرون .. و كانت تطالع الكاميرا و شاقة حلجها و تطالع بكل براءة ..

اول ما فجت الكمبيوتر ضحكت على عمرها من الخاطر .. و سارت باست الشاشة .. (( تراني قلت لكم انها خبلة )) ... عقب بطلت ماي ميوزك و حطت اغنية ميحد ( سعد الليالي ) ... بس خلتها واطية لان لو سعيد سمعها جان فتح لها محضر ..

يلست تغني وياه وهي مرتبشة .. جان عقبها نشت و بطلت المسنجر .. و اول ما بطلته .. شافت اضافتين يداد ... وحدة بايميل (جتيل الشوق) .. و الثانية بايميل ماينعرف اذا هو ايميل بنية او ولد .. ( في اي بي و حذاله ارقام ) ...

مهاري سوت اكسبت ( قبول الاضافة ) حق الايميل الثاني و كنسلت الايميل الاول .. و تمت سرحانة بالشااشة تفكر في شو انها ممكن تسوي عسب تجتل هالفراغ اللي منغص عليها حياتها ..

و فجـــأة .. نقزت مهرة من مكانها يوم سمعت صوت المسنجر (( الصوت اللي يظهر يوم اول ما يحدر عندكم شخص يكون اون لاين )) ..


سيدة قامت مهرة و دقت هالبوكس الصغير اللي طلع عندها بطرف الشاشة من تحت ..


و.....يتبع

 

[معاني]

مشاركة: ღ.ღ. مثل الهــوا و المــاي .. سيـــف ضـروري ღ.ღ.

ههههههههههه

كشخه سوالف الخوات ...

لكن اليازيه الله اكبـــــــــــر عليـــــــــها ... شيطانه ...

الله يستر من الياي ..

حلو اسلوبج...:smile:

ننتـــــــــظر ..


معـاني ..​