• مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

" الـــــــروح الغراميـــــــــة "

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد : " الـــــــروح الغراميـــــــــة "

السلام عليكم ورحمة الله
اختي العزيزه تلع لعناق ما شاء الله تبارك الله....ابداع في منتهى الروعة...خيال بلا حدود...وموهبة فريدة
"اللهم اني اعيذك بكلمات الله التامة ، من كل شيطان وهامة ومن كل عين لامة"
يجب ا اعترف لك اختي العزيزة اني لم اقرأ ومنذ مدة طويلة كتابة بنفس هذا المستوى الابداعي او حتى قريباً منه..بارك الله فيك وفي موهبتك
الشخصيات تبدو كالحقيقية بل هي كذلك... لكل شخصية منها مذاق وطعم مميز... ومستساغ..تتابع الاحداث...الاسلوب الحواري والخواطر الخاصة...راااائعة...جعلتني اعيش جو القصة بكل ما فيها...افراح واحزان...طهارة الزمان والمكان...عبق الماضي الاصيل...صورة حقيقية لذلك الماضي الفريد بكل جوانبه...حتى اني صرت احس وكأني احدى شخصيات القصة (من خف الكواليس) اتابع لهو الفتيات والفتيان على الشاطيء...مرحهم تحت المطر..لقاءات العشاق...ومزاح الفتيان....القصة ومن بدايتها بوصف الامطار الغزيرة على مزارع بوعلي...أوحت بالكثير من التعقيدات والأحزان المتلاحقة..والتي سيكون لبو علي وعائلته نصيب فيها
ميثه...الفتاه العربية الخليجيه الاصيله بعزتها وكبريائها ومكانتها الكبيرة بين أهلها وذويها.
سعيد الشاب الطموح رغم قسوة الحياة...العاطفي الحساس...الشاعر اللبيب...حلم واقدام وعزيمة لا تلين وشخصية قوية مع القليل من نزوات الشبان
حمد الاخ الحنون...مزنة..رمز الصداقة والوفاء...الجدة..ابو حمد..ام حمد..قايد ...خليفة...شخصيات بألوان ونكهات مختلفة..ترسم لنا أجمل وأروع لوحة
القصة كما يبدو لا تزال في أولها...ولازال للأحداث بقية مع مزيد من التعقيد والأحزان...ميثة لمن ستكون..لسعيد....صار الامر مستبعد ....لقايد....لا أظن....ربما لابن بوعلي...حارب اسمه على ماأعتقد...أو شخصية جديدة....هل ستبقى ميثاني بطلة القصة للنهاية ام سيجد في الامر جديد....ثم ما مصير باقي الشخصيات..مزنة وحمد...خليفة...لطيفة...حصة..والصغيرة شما....سلامة وعبدالله...لازال هناك الكثير من التشويق والغموض...ونحن بالانتظار
في الختام ارجو ان لا اكون قد أطلت عليك...وارجو ان تقبليني قارئة جديدة لقصتك...من بلد مجاور...ارض الحرمين
أختك رسيل
"عفواً بالمناسبة ما معنى اسمك تلع لعناق؟"


:mf_cupidh

مو جنج عطيتيني اكثر عن حقي !!!!

أشكرج من كل قلبي ماتعرفين هالكلام اللى كتبتيه واللى خذ من وقتج وايد ..شو يعنيلي ..
الله لايحرمني من تواجدج بقصتيه الروح الغراميه ..

تلع لعناق
 

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد : " الـــــــروح الغراميـــــــــة "

الجزء الرابع


والبنات من الزيغه ما لقطن شي ..
ميثه بخوف: مزنه بلاه سعيد يزاعق .. كنه السالفه تخصه !!
مزنه تحاتيه اخوها :والله علمي علمج ..
وهناك جدا الدكان ..العرب متيمعين و الكل يالس يسمع ويشوف ..
بوحميد محتشر :لالالالا اللحين تحط ايدك ع كتاب الله و تحلف يمين..
وسعيد وابوه بصوب ووياهم خليفه ..
بوسعيد :والله ولديه محشوم من هالسوايا يابوحميد .. وعن الحلفان .. ولديه مب حالف لو على موتي ..
بوحميد :محد غيره كان في الدكان البارحه .. هو اللى شل الفلوس .. اللحين تحلف يمين ..
سعيد يفهمه: يابوحميد انا من صغير اشتغل عندكم ولاكد مره حطيت ايدي في مال حرام .. اللحين بعد هالعمر اقوم اصرق وانزل براس بويه وهلي ..
بوسعيدوالدمعه بعينه :يابوحميد .. انته ادرى بولديه سعيد واكثر واحد تعرفه ومن صغير يشتغل عندك ومخاويك في كل بقعه ..
وبوحميد معصب حده:وين المطوع وينه ؟؟.. بعده مايا ..!!
وبوحمد يالس فطرف غامضتنه فلوسه .. ومب عارف شو يقول .. الفلوس البارحه كانت في الدرج وسعيد ذاك الوقت كان هناك .. (ورد يطالع سعيد وكيف يدافع عن عمره .. وحسه مظلوم) ..عيل منو صرقني ؟؟.. وحمد نفس تفكير بوه بس حمد عنده نقطه وحده بانه سعيد مظلوم ومستحيل يسويها ..وسعيد كل اللى يفكر به ان محتاي لميثه بهاللحظه .. وعشان هو مظلوم وماسوى شي غلط .. ماافتكر بالسالفه وايد لانه مصير الحق يظهر بيظهر ..
المطوع :ضع ياولدي يدك على كتاب الله ..
بوسعيد والعبره خانقتنه : يامطوع هذا سعيد ولديه انا مربينه .. مايسوي جذه ..
وسعيد ميت قهر من بوحميد ومن عناده ..
خليفه يحط ايده ع جتف اربيعه : ماعليه ياسعيد سو اللى يقوله المطوع ..
بهاللحظه رمس بوحمد : والله ماحطيت ايدك ..
والكل انصدم ..وبوسعيد ارتاح قلبه يعرف بوحمد ..قلبه نظيف ..وبهاللحظه قايد شرد ..ومن دزت قايد لحمد .. صد حمد صوبه منصدم ..
حمد تذكر انه قايد كان وياهم ذاك اليوم:قايد !!!!معقوله قايد ..ولحقه ..
بوحميد ياشر بعصاته :بتخبرك انته بايع عمرك ؟ .. تراها مب لك روحك .. لعيالك .. هذي الفلوس شقى عمرك وتعبك ..
بوحمد يقطعه :خلاص ياخوّيه .. سعيد شرات حمد ولديه وانا مربينه ومااعتقد يسويها ولد بو سعيد ..ومسكه من جتفه وحظنه ..
بوحمد :اسمحلنا ياسعيد ..اسمحلنا يابويه ..
وسعيد يشوف به ميثه ويحظنه بقوه : لا عمي مابدى منك شي ..
ووقفت السالفه .. و هل الفريج يرمسون فذيج السالفه وماعندهم غيرها ..
وميثه من درت باللى استوى .. تمت تصيح من الخاطر ..
ميثه :حراااام عليهم يتبلون عليه حرام ..
شمه :اذا سعيد ما صرق عيل منو صرق فلوسنا ..
ميثه تصرخ عليها:ظهري برى ..انتي روحج ياهله ماتفهمين شي ..
شمه تسويلها حركات بعيونها :مالت عليج ماحبج ساعات ..
هذا أكيد قايد محد غيره هو ورى هالسوايا هو اللى صرق بويه وعمه .. ماعليه .. ماعليه ياقايد الايام بتكشف كل شي .. ياولد عمي ..
وهناك ع الرمله .. قايد وحمد ..
حمد :عيل ليش ودرتنا من رمس بويه وقال ولد راشد ماشل البيزات ..
قايد :افا .. افا والله ياولد عمي .. ماهقيتها منك تشك بي وتنصر الغريب .. افا
حمد متردد :عيل منو اللى صرقنا ؟
وقايد سار عنه وتم حمد شاك في السالفه ..
وسعيد من رد البيت شاف امه تصيح .. وسار لها ..
سعيد يوخي لامه ويحب راسها :فديتج يااميه .. شعنه هالدموع .. الغاليه الدموع مخلوقه لغيرج مب لج .. ويمسحها بصبوعه وبطرف سفرته ..وامه تلوي عليه بحنان ..
سعيد يحط راسها ع صدره : صدقيني ياامايه الحق بيظهر يوم من الايام ..اذا مب اليوم باجر ..
ومزنه واقفه عند الباب وماقدرت تمنع دموعها وهيه تشوف هالمنظر ..

وبنفس اليوم الفليل .. نفاف يطيح .. والكل راقد .. ماعدا ميثه عفت الرقاد وراحه البال كيف ترقد وحبيب قلبها الكل ضده .. والميث متلحفه وهيه تسمع زخات المطر خاري .. ماقدرت ترقد شلت بعمرها السطح ..
وهيه تفتر في السطح .. سمعت حد يناديها .. ومن الظلمه ما عرفت منو .. جاسها خوف .. وبغت تربع .. بس من شافت سعيد محطي الفنر جداه .. صخت .. كانت لابسه شيله ومب متغشيه .. والمطر بدى يحدد جسمها .. ومن الظلام سعيد ماكان يشوفها بوضوح ..
سعيد يتاملها : ماادري احساس جاسني ..انج بتكونين عندي ويه هالغيث ..
وميثه ماترمس صاخه .. وسعيد يتاملها بالظلمه ..كان يشوف رسمه جسمها بهالظلمه ..
كانت منخشه ورى الييدار مكان النزله من الدري .. فما يبيّن منها شي غير نص كفها مكان مسكتها للييداريعني صبوعها .. ونص ويها .. وسعيد يحس بحركتها هذي ميثه الياهله .. ميثه اللى كانت تترابع جدا البحر .. تم يتاملها دقايق .. حتى الميث تحس بهالصمت والسكون الروح هيه اللى ترمس ..روحها الغراميه ..
بوسط زخات المطر .. مرت دقايق ومحد يرمس ..
سعيد يتاملها: بلاج؟
وميثه منزله راسها ..
سعيد :انتي مصدقتنهم؟
ميثه رفعت راسها ع طول : حرام عليك تقول هالرمسه .. انا اول وحده بوقف ضد عمي وبقوله انك انته مظلوم ..
سعيد بصوت حزين : عيل .. لاتتركيني أرجوج .. يوم اني حبيتج .. محد (ن) يحب انسان ويعيش من دونه .. أغلى اماني العمر اني تمنيتج .. وأشغلت قلبي فيج والروح مفتونه .. لو تطلبين العمر .. عمري أعطيتج .. يرخص عمر الانسان لو نال مكنونه .. عن عين كل الناس بعيوني حطيتج .. وسميتج روحي الأبديه ..
وميثه ساكته ..
ويمرن ثواني ..
سعيد منزل راسه.. ويسمع موج البحر الثاير : أريد جواب ..؟
ميثه تتذكر قايد : سعيد انا مستحيل أودرك .. لوشو ماصار مستحيل اوافق ع ولد عمي .. او غيره .. مستحيل مااتخيل عمريه لغيرك ..
سعيد يتأملها ويدقق بجلماتها: وانا بتم متمسك بج مثل ماانتي متمسكه بي .. و وفائج لي بيخليني أخطبج للمره الثانيه وثالثه ورابعه ..
ميثه تتذكر رمسه حمد : وانا بترياك ..
سعيد بشاعريه :ميثه .. نحن لبعض ..أنا لج وانتي لي ..

ومن نزلت ميثه وهي تتذكر شكل سعيد .. رغم المصايب اللى اتييه من كل صوب .. اتم ابتسامته الغاويه اللى تحييه الامل بقلبها .. ماتتغير .. آآاااه ياسعيد ماتتخيل اشكد أحبك ..وذايبه بهواك ..
وهيه نازله طاف حمد في الممر .. وميثه ارتبكت ..
حمد :شو اتسوين فوق هالحزه ؟
ميثه مرتبكه :أشم هوا مليت من حجرتي .. وسارت
وحمد توا بيدش حجرته .. وزقرته ميثه ..
حمد يفتر صوبها :لبيه..
ميثه متردده:بغيتك بسالفه بويه..
حمد:رمسي ..
ميثه:يوم ولد راشد كان فدكان بويه ماكان عنده حد من ربعه ؟
حمد يتذكر :امممم هو و قايد بسس.. ليش تتخبرين ؟
ميثه بدت تفكر .. معقوله قايد يصرق عمه .. !!!!
قايد:حووووه..سيري انزين .. انا بنام تصبحين على خير ..
وميثه تمت في الليوان تفكر .. هذا قايد ويتبلى على سعيد محد غيره ... عين الظالم لاتنام .. والحق لازم بيظهر ..
وباجرها الميث سارت بيت عمها .. ولقت سلامه يالسه بروحها في البيت ..
ميثه :سلامي وين قايد ابييه بسالفه...
سلامه مستغربه :وليش تتخبرين عنه ؟
ميثه:سلامه صدقيني ولد عمج هو اللى صرق بيزات بويه .. (وبعفويه ) مب سعيد ..
سلامه وملامحها متغيره :انتي شو تقولين !!!قايد صرق فلوس بويه ..صرق عمه .. شقايل مايستوي ..! ماتركب السالفه ؟؟؟
ميثه :صدقيني كل شي من قايد يستوي وجايز .. هذا يصرق ابوه عادي ..يتصدق ..
سلامه تقاطعها:بس .. حرام عليج تتهمينه بهالشي .. هذا ولد عمج .. ندري انج تكرهينه بس ماتوصل السالفه انج تتهمينه بهالسوا .. اعوذ بالله .. اشوه قلبج انتي ؟؟لهدرجه ماليتنه بغض وكراهيه صوبه ..
ميثه العبره خانقتنها:وانتوا مب حرام عليكم .. ظالمين ولد سعيد وابوه وهله .. كلما يستوي شي فهالفريج تتهمون ولد راشد به .. والله امه ماتنام الليل الا والدمعه بجفونها .. والله حرام عليكم ..
سلامه :انتي بتخبرج !!شو يعنيلج سعيد هذا بحياتج ..؟
ميثه وكنه اختها داست عاليرح : يعنيلي ولا مايعنيلي .. السالفه اكبر عن جيه .. السالفه ابها ظالم ومظلوم .. و يسد انه اخوه مزنه .. وهو مظلوم وماصرق بويه .. وولد عمج هو اللى صرق .. والايام بتكشف لج ..
سلامه تحاورها:وشو اللى يأكدلج هالشي ؟
ميثه :هو محد غيره ..هو اللى كان ويه ولد راشد ذاك اليوم ..
سلامه :والله كيفج سوي اللى بتسوينه .. وشوفي المشاكل اللى بتيبنها لبوج وعمج ..
ميثه :انا برمسه ..
سلامه : لاترمسينه عقب بتستوي مشاكل .. تبين تخترب العلاقه بينه وبين عمه ..؟
ميثه :كيفه هو اللى جنى على عمره .. يتحمل ..
سلامه : ميثه اذا تبين هلج يتفارقون .. هالشي راجع لج .. بس لاتلومينا عقب ..
ميثه تتطالع عيون اختها:معقوله انتي سلامه !!بس تفكرين بهلج وبسمعه هلج .. ولا هل مزنه عادي ماتفتكرين ابهم .. اسمحيلي اقولج انه ضميرج ميت ..وظهرت وتغشت سريع ..

وهي ظاهره شافت قايد بالممر توا داش ومن شافها جاسه شعور غريب .. نفس الشعور اللى صابه يوم شافها ذاك اليوم تحت الصرمه .. مب عارفله شعور ملخبط .. فرح بشوفها على حزن على شوق ..
قايد ب وله :حيالله هالشوف والله ..
ميثه :وووه خوز عن الدرب بظهر ..
قايد :انا بتخبرج .. ؟من معلمنج القسوه ؟؟..
ميثه : اللحين شو بتلز .. ولا ازقر عمتيه..؟
قايد يضحك :عمتج محد .. وعمج محد .. وعيال عمج بعد محد كلهم خاري
ميثه تصرخ :ورايه شغل ..وخر ابسرعه ..
قايد هايم ابها :فديتج .. ياخي شكلج يوم تعصبين يذبح ..
ميثه باسف:والله ماتخّيل .. تغمضني حالتك حليلك والله .. وتفتر عنه بويها ..
قايد مربع ايده :حرمتيه عشان جي مااخيل ..
ميثه معصبه : ايخسي حرمتك ياحرامي .. انته اللى صرقت بويه ..
قايد يتجدم صوبها وميثه ترد ع ورى بخوف .. ويلوي ايدها .. وميثه تحاول تفج منه ..
قايد :شوووه؟؟
ميثه وغشوتها طاحت :حرامي بخبر بويه .. شل ايدك ..
قايد يطالع ويها ويتامله به : فديت روحج وينج عن عيوني ..كني اول مره اشوفج ..!ويدقق بملامحها ..
ميثه تتويع:انته منوه تتحسب عمرك ..يالحرامي ..
قايد:شووه؟؟عيدي مره ثانيه ..؟
ميثه رافعه خشمها وبصوت واطي وعيونها بعيونه جنها تتحداه: حرامي .. انته صرقت عمك ..
ومن نظرتها .. تم يبحلج قايد بعيونها .. كانت غير .. حسبها تلمع من القهر .. حس بالكراهيه اللى بقلبها له .. هني قايد ذاب من الخاطر ..
قايد :أحبج ..
وميثه تثور وتحاول تفج منه ..
ومن صريخ ميثه تظهر سلامه ..
سلامه شهقت : قايد هد ايدها بتقصفها .. حرام علييك ..
بهاللحظه يدخل عبدالله وهو معصب .. ومن يشوف قايد لاوي ميثه .. انصعق ..
عبدالله :ايييه شو تسوي بالبنيه ..!!!
وقايد ينتبه له ويفج ميثه اللى سارت بعيد عنه ..
عبدالله ويهه احمر:يالنذل .. تصرق عمك .. سودت ويوهنا جدام خلق الله .. اللحين وين بويه بيودي ويهه من الناس وين بنودي ويوهنا الناس بتاكلنا اكل .. مابترحمنا ..
وقايد يطالعه بخوف .. كيف درى ؟؟ كييييف؟؟ غيث مخبرنهم .. غيث محد غيره ..هو الوحيد اللى يعرف هالشي محد غيره ..
عبدالله مسكه من كندورته : ظهر الفلوس ظهرها ..
ميثه : اللى في القدر تطلعه الملاس ياقايد ..
عبدالله يفتر صوبها:ميثه روحي البيت ..
سلامه :عبدالله .. دخيلك هده مافينا ع جلام الناس يسد اللى فينا ..واللى بيينا منهم ..
عبدالله : ياسلامه هذا صرق ابوج .. صرق عمي .. نزلت براسنا حسبيه الله عليك ..
سلامه :دخيلك .. عشان خاطر اللى ببطني ..
وقايد ضاربنه هّم وغّم ..مب عشان سالفة عمه .. عشان نظره ميثه اللى خلته مايسوا ولا بيزه .. ميثه تكرهني ..تكرهني حرام عليها انا شو سويت ابها عشان تكرهني هالكثر .. حرام ..حرام .. أنا أحبهاوالللله أحبها ..يابشر خبروها اني احبها ..خبروها ..

وبجذه ظهرت براءه سعيد بن راشد .. وقايد اعترف لهم .. وغيث طول ذيج الفتره ماكان مرتاح نفسيا عشان جذيه قال كل شي .. اللى يسكت عن الحق شيطان أخرس ..
وعدت الامور على خير .. بذيج الفتره هدت الاوضاع .. قايد تاثر نفسيا بسبه نظرة الناس له .. وماقام يخالطهم شرات اول .. حتى مب قادر يحط عينه بعين عمه .. وحبه لميثه اللى مقطع له فواده .. ولانه مقاطع غيث كان كله روحه وكله يهاذي بميثه .. وميثه اللى ماتنام الليل الا بابتسامه نابعه من الخاطر لامل مشرق ويه سعيد .. وسعيد يحاول يخوّز الاشواك بدربه بكل وفى وتضحيه .. ليوصل لمبتغاه اللى هو "ميثه .. روحه الغراميه " ..
ومرت الايام .. وفي مره من المرات الرواح .. ميثه ومزنه ولطيفه توهن ظاهرات من بيت لطيفه .. وكل وحده منهن شاله بقشه فيها ثياب خيطتها لهن ام لطيفه .. والجو بدى يظلم بسبب المطر .. .. وتزيد زخاته .. وهن ردات .. شافن واحد مكور نفسه ويالس عالطين جدا بيت مهجور .. وطريقه يلسته جي وبهالجو مب طبيعيه ..
مزنه شهقت وتاشر بصبعها :ميثووه لحقي ولد عمج ..
ميثه تتطالعه :شو اباه .. يوّلي .. يالله طوفن عن ايي ويرمسنا اللحين ..
حصه :حرام عليج شوفي شكله متعور ..
ميثه تير عباة مزنه من طرف:مافيني عليه .. يالله طوفن .. تخرسنا ماي ..
مزنه تبحلج به :صدقيييني به شي ..
وراحت ميثه صوبه وتقربت منه .. وشافته يتنافض ولاوي ع عمره ..
ميثه بخوف:قايد .. اشفيك؟
وقايد مارد عليها .. يالس يتنافض ..وغير كان
ميثه زاغت ووخت جداه .. وبخوف فظيع بقلبها الصغير : ولد عمي بلاك ؟ بلاك تتنافض جي؟
وبهاللحظه قايد رفع راسه .. ومن شاف ميثه جداه .. رد وغمض عيونه كنه يتالم بصمت ..
قايد ومغمض عيونه ..ويتنافض بطريقه مب طبيعيه: بردان .. بردأأأأأأن ..
وميثه تفتر صوب ربعها وبخوف:بنات تعالوا ..دخيييلكن ..
مزنه :شو السالفه ..؟
ميثه بخوف :ماادري ..يقول شي مب فاهمه عليه ..
قايد يطالعها وبكلمات متقطعه :ميثه بردان .. دفيني .. اباج ادفيني ..بمووووت من غيرج ..
حصه:يقولج بردان ..
ميثه تفتر صوب ربعها :يقولي ادفيه .. وظهرت من البقشه كندوره حمد ولحفتبه ..وهي تلف القطعه عليه حس قايد بان ميثه بتكون له .. ومستحييل ترضى بغيره ... ميثه تحبني .. تحبني ..
قايد :برداان ..
ميثه العبره خانقتنها :دخيييلكن زقرن أي حد تشوفونه بالدرب .. انقفضن ..
وبهاللحظه تحركن البنات ..ومن ردن .. وقفن ع طرف .. وسعيد من شاف ميثه تعدل القطعه .. صخ .. وتم يطالع .. وميثه ولاعليها من حد ..زايغه ع ولد عمها ..
خليفه يفتر صوب قايد :بلاه الشيخه ؟
ميثه ع طرف: ماادريبه ..ريناه جي يتنافض ..
خليفه شهق:الحق سعيد .. هذا محموم امره ..
وسعيد يطالع الميث جنه يلومها بنظراته .. وميثه ماهمها غير ولد عمها ..شو استواله ؟؟.. وحصه من شافت سعيد وهي مب فحاله تمت تطالعه .. جذبها خشمه السليل .. من فتره ماشافته .. عيبها فيه انه يفازع كل حد ومايتردد .... ومزنه بذيج اللحظه حاسه بخوها .. تعرفه .. بس لامته لانه هالشي مب بايد ميثه .. وعقب سعيد وخى وشله والبنات ساروا وراهم ..
وطبعا كل هل الفريج عرفو بالخبر .. والعرب كلهم يتوافدون صوب بيت بوحميد ..وعقب المغرب .. هل ميثه كلهم في بيت عمها .. وميثه كانت يالسه فحجره اللى يالسين فيها الحرمات ..
مزنه ترمس امها:امايه غناتيه .. بروح البيت..
ام سعيد :من وياج ميثه ..
ميثه:هيه عمتيه .. ضايجات من الزحمه ..
ام سعيد :برايكن عيل ..
وخبرت ميثه امها ويدوتها انها بتروح البيت ويه مزنه .. ومن ظهرن .. لقن سعيد واقف عند الباب .. وميثه من شافته فرحت من خاطرها .. وعيونها تلمع ..وسعيد يحاول يجفيها .. بس ماقدر انه يمنع روحه من السلام عليها ..
سعيد بجفا:اشحالج؟
ميثه تتطالعه من تحت الغشوة: الحمد لله ...
سعيد يطالع اخته:وين امج؟
مزنه مستغربه :امايه بعدها بتم ويه الحرمات .. اشفيك؟
وميثه تتطالعه وانتبهت انه يحاول يتحشاها بنظراته.. وسعيد يحس بمدى القرب امبينهم .. وخاطره بس يرفع راسه ويشوفها .. مشتااااق لها بهاللحظه مووت ..لكنه مجروح منها ..
سعيد بجفى: يالله مزنووه البيت ..وعطهم مقفاه ومشى ..
مزنه تفتر صوب ميثه: مضايج جنه !!..
ميثه بحزن وتتطالع مقفاه:ليش يجفيني ؟.. وأنا اتمنى شوفه لي كل لحظه وثانيه .. ونزلت راسها ..
مزنه :فديتج ميثاني .. أكيد مضايج من سالفه .. انا برمسه لج ..
ميثه تكابر:لا ترمسينه مايحتاي .. خله ينقع فقوطي اخير له ..
وتمت ميثه ذاك اليوم تصيح بحجرتها .. هي من وين بتلاقيها من سعيد .. ولا من قايد اللى ماتخلص مشاكله ولا من وين ؟؟؟ الله يهديك ياسعيد ..
وعالسفره العشى قوم مزنه .. سعيد يالس يتعشى غير عادته .. مضايج وجنه شال هموم الدنيا عراسه ومزنه ماحبت ترمسه الا يوم يخلص عشاه ..وعقب ..
سعيد يفرش فراشه:مزنووه تعالي ..
مزنه اطل من الدريشه وميوده الحدايد :لبيه الغالي ..
سعيد:ادخلي ..
مزنه:اذا بترمسنيه عن الميث .. فانا يايه بنفسي ارمسك بهالموضوع ..
سعيد يعدل التكيه ويتنهد بصوت عالي .. ومزنه من التنهيده يلست جداه ..
مزنه تمسح عشعره :اشفيك حبيبي؟
سعيد قلبه معورنه : تصدقين اختي .. اليوم من شفتها ويه ولد عمها حسيتها ابعييده عني .. ابعييده وايد مب كني بيني وبينها خطوات قلال .. ماادري حسيتها مب الميث غناتيه .. وحده ثانيه ماعرفها .. كني بيني وبينها درووب مسافاتها طويله.. ما أروم أوصل لها ..
مزنه:وشو اللى خلاك تحس بهالاحساس؟
سعيد بنظره لوم :انتي ليش سرتي عنها ودرتيها بروحها وياه ..؟
مزنه :شو نسوي من الزيغه ما رمنا نسوي شي غير نزقر اللى نشوفه بالدكاكين ..
بهاللحظه سعيد يتذكر شكلها كيف تلحف قايد بالكندوره .. وافتر بألم الصوب الثاني ..
سعيد :انزين يالله انا تعبان اريد ارقد ..
مزنه تنش:ع فكره ترا ميثه ظهرت من بيت عمها تصيح من جفاك .. حرام عليك وايد حز بخاطرها ..؟
سعيد وهو مغطي راسه بالحاف: حسيت ابها .. يالله ظهري وجتّلي الليت ..
مزنه :وما عورك قلبك ؟
سعيد مغطي راسه بالحاف : وهي ماحست بي .. ليش ؟
ومرن يومين ..ميثه ومزنه يرمسن عند السطح ..
مزنه :اليوم بنسير صوب حصه نتحمد ع سلامتها من الحمّه ..
ميثه :هيه حليلها البارحه تتخبر امايه عني .. تلومت صراحه ماسرتلها ..
وبهاللحظه سمعت ميثه حد يسكر الباب .. وحست انه هذا سعيد اللى دش .. وماافترت صوبه ..
مزنه موخيه براسها تحت تتطالعه .. وسعيد من شافها عطها نظره وافتر عنها ..
مزنه تطالعه:فدييييته ربي ..
ميثه :مالت ع صنعته .. احسبه متكّبر مرات ..
مزنه :حرام عليج ميثوه ..أخوّيه مايهون عليه ..
ميثه :بذمتج يعني !!! بشوف ولد عمي طايح بالسكّه ومايباني افازعه .. يروح ينقع زيين ..
مزنه :هيه صح شخباره هو ؟
ميثه متغصصه من سعيد : يوّلي نشاّده عنه اتخبر عن احواله بعد ..
مزنه :هههههههههههههههههههههههههههههه عيل أمسات اللى يشوف شكلج وانتي خايفه عليه مابيقول انج تبغضينه هالكثر..
ميثه تتذكره:ماادانيه .. بس ماادري ليش من شفته .. حنّ قلبي عليه ..
مزنه :انزييين العصر بنروح ..
وميثه ببرود :عيل العصر بنتلاقى .. انا بنزل اللحين ..
مزنه :برايج عيل ..
..مزنه من نزلت .. تولاها سعيد .. اللى يالس يترياها بحجرته .. بس يترياها تريح قلبه ..يترياها تقوله ميثه سالت عنك ...
سعيد بفضول ذابح صدره:نشدت عني ..؟
مزنه :لا ..
وسكت سعيد .. وتم متغصص منها .. منو المفروض يزعل انا ولا هي ؟.. فديتها والله حلاته الزعل عليها .. (وابتسم ) ورد يطالع اخته اللي يالسه ترتب حجرته ..
سعيد يمرر صبوعه بشعره الاسود اللامع : آأأأأه .. كيف أحبها .. ياخي هالبنت متربعه بفوادي من سنين وما كد حطيت بخاطري صوبها شرات هالمره ..
مزنه تبتسم :بس هيه ماغلطت .. ولد عمها ولازم بتقوم بالواجب .. يعني شو تباها تودره جي ..
سعيد بنظره حاده :مزنووه .. أنا مااريدها تقرب صوبه موليه .. لو ولد عمها .. هذا المخلوق مضيع مذهبه .. مااريدها ترمسه ولا تعطي وتاخذ وياه ..
مزنه : فديتها الميث اصلن ماكانت بتروح نحن البنات عزرنا عليها ..
سعيد يطالعها بنظره :يبالكن خيزرانه انتي واللى كانت وياج ..
مزنه تناقشه : لاوالله ..(ومحطيه ايدها عخصرها ) يعني تبانا نودره ؟ حرام ..
سعيد :جان ييتوا يميع وخربتونا ما ودرتوها روحها وياه ..
مزنه تتطالعه : سعوووود ..
سعيد يطالع الرسمه اللى رسمها .. وبنبره عذبه:شو فيج؟
مزنه ترفع ايدها وتحركهم:يالله يالله يغار الحبيب ..
وسعيد مستحي : هيه بعد شو ...هذي لي انا وبس .. مااريد حد يطالعها او يرمسها .. الميث مخلوقه لي روحي ..
مزنه تبتسم : تغار عليها وايد ..؟
سعيد مستحي :الميث تكويني شقايل مااغار عليها ..الميث كل تكويني ..
مزنه :تحبها وايد ؟
سعيد بشاعريه:روحي و روحها واحد (ويأشر بصبعه) ..وهي روحي الغراميه .. انا ازحف ع الارض من بعد اميال واتخطي كل البلاد لجل اطلب رضاها يا مزنه ..

وميثه من نزلت وهيه منقهره من تجافي سعيد .. منوه يتحسب عمره ..طفس .. والله براويه الويل .. بخليه يحرم يسوي هالحركات مره ثانيه ..
وهيه نازله شافت يدتها وشمه يالسين في الليوان .. ويلست جداهم ..وشمه كانت فارشه حلوياتها جداها ..
ميثه :الله .. من وين لج كل هالحلاوه ؟
شمه تناولها قطعه منها :سعيد اشترالي اياهن .. بس بعطيج هذي عشان ماتخلص عني ..
ومن قالت شمه جي .. حطت ميثه القطعه وماخذتها .. وافترت صوب يدوتها ..
شمه مستغربه وتناولها :خذيها .. عادي ..
ميثه تناظر الحلوى جنها تناظر سعيد :ما أريدها .. خليها لج ..
شمه تحطها بثمها الصغير :كيفج ..
وحطت ميثه راسها بثبان يدوتها .. وهي متكدره من عمرها ..
ميثه :آآآآه .. ياايدوه ..ويدوه تمسح ع راسها ..
يدوه :بلاج بنتي متعوقه من شي ؟
ميثه تلعب بشيله يدتها: يدوه عوقي أنا .. ماله علاج؟
يدوه بخوف:ويديه .. شهالرمسه ..؟
ميثه تتطالع الخوف اللى انرسم بثنايا ويه يدوتها وضحكت :هههههههههههههههههههههههههههههههههههه فديت روحج علني ما اخلى اناااااااااااااااا .. وتمت تحظنها وتبوسها بويها .. ويدوه مب عارفه لها ..
ميثه تيود ويه يدوتها :يدوه تعرفين شو عوقي .. اني أحبج مووووت ..
والعصر سارت ميثه بيت مزنه عشان تاخذها .. وهيه داشه شافت بو سعيد ..
بوسعيد :حيالله شيختنا ميثاني .. حيالله ببنت سعيد .. هيييي الله يرحمج يدج كني اشوفه بج .. سبحان الله ..
ميثه مستحيه : الله يخليك عمي ..
وتظهر ام سعيد وترحببها ..
بوسعيد :عوشه .. مب جنج تشوفين حيات المرحوم عبيد ..
ام سعيد تضحك :هييي الله يرحمهم ..
.. وتروح ميثه عنهم حجره مزنه ..وهيه طايفه في الممر شافت سعيد ظاهر من حجرته ويزقر مزنه ..كان لابس وزار بس بدون ازديري (فانيله) وعضلاته بارزه وشعره مبلول وطايح ع يبهته ورقبته ..كنه توا متسبح ..
ميثه من شافته شهقت بصوت عالي ..ماتت من المستحى ..ومن كثر ماهي كانت مستحيه حست بالممر اللى يودي حجره مزنه طوييل وايد وماتقدر تنخش بالحجره عنه ..
وسعيد بهاللحظه اللى شافها فيها .. استحى .. وخفف من حده صوته ..
وقدهم واصلين عند الحجره ظهرت مزنه ..تباغم ..
مزنه :يايه ..يايه ..ومن شافتهم ..
سعيد منزل راسه :السلام عليج ..
ميثه وهي داشه الحجره .. تبا تفتك .. :وعليك السلام ..
وسعيد لاحظ جفاها ..وافتر صوب اخته ..
سعيد :خلاص تمي وياها .. بسير لاميه ..
مزنه: برايك ..
وميثه ميته من المستحى وخدودها مستويه ورديه .. ويالسه ع طرف ماترمس كعادتها ومزنه حاسه بهالشي ..
مزنه :يالله نروح بنبطي على لطفوووه .. وتلبس عباتها ..
ميثه تتطالعه من الدريشه يرمس ابوه وامه .. وتحرك ايدها: ياويلي .. انا شقايل اظهر اللحين .. استحي مزنووه مااريده يشوفني ..
مزنه :نشي نشي ..بنخطف ابسرعه ..
ميثه تتطالعه .. وبشوق وشاعريه: أحبه .. وترد تتطالع مزنه بنظره رومنسيه ..
مزنه تتطالع عيونها الذبوحيه ..ولاحظت ابها شي يبرق:ههههههههههههههههههههههههههههههههههه ياويلي منكم انتوا الاثنين ..جاني من اصبح وامسي ايلس اجابلكم اسمع شرا هالرمسه اخاف تعادوني بهالمرض ..
ميثه تتطالعه :آاااه حلو ..بس عذاااااااب ..
وهم ظاهرين وطول الدرب لبيت اربيعتهم .. ميثه تفكر بروحها الغراميه سعيد حبيبها .. ندمت انها ردت عليه السلام من ورا خاطرها .. بس احسن عشان يتادب ..
ومزنه ترمس وترمس وعلى بالها ميثه تسمعها ..
وعقب مرن على لطيفه وخذنها .. وهن واصلات عند بيت حصه .. لقن الباب مفتوح ..وسمعن اصوات رياييل .. ولزن ع طرف ..جان يظهر من الباب عبدالله ولد عم ميثه .. و عقاب اخو حصه .. وميثه كانت بتلعوز بولد عمها عبدالله بس من شافت عقاب صخت ..
عبدالله من شاف البنات :السموحه منكن الشيخات ..
لطيفه :بالحل الشيخ ..
عقاب يطالعهن :حياكن الله ..قربن قربن ..
وعقاب عرف ميثه من هالبنات وتم مستانس ذاك اليوم لان ميثه عندهم في البيت ..ومن دخلن عليها الحجره شافن وياها بنات .. والميث من دخلت الكل مفتر صوبها ..
البنات :السلام عليكن ..
وردن السلام ..
وتوايهو البنات ..وتمن ويه حصه سوالف ..
وعالمغرب .. شمه محد في البيت ويدوه مسويه حشره ..
ام حمد :ياميثه .. روحي اميه بيت راشد تخبريهم جن اختج عندهم ؟
ميثه تنش:يوم اقولكم ماتخلونها تظهر .. محد يطيع شوري ..
يدوه خاطفه في الممر :لاتضاربينها ..
وسارت ميثه وهيه تمشي صوب الباب .. دخلت شمه .. وطاحت بها اختها ..
ميثه :كل ها لعب ويه الدماني ؟
شمه تنط وتترجاها : صبّريه بخبرج .. كنت ويه سعيد .. هو خذني صوب البحر وعقب بويه قاله يوديني البيت ..
ميثه :ماشاء الله عليج ..ياالله دشي داخل ..اللحين بيأذن ..
وهن داشات ..شمه :مييثوه .. سعيد يسلم عليج ..وتتطالعها ..
ميثه مبتسمه : شوه قال ؟
شمه :قالي سلمي على يدتج وامج واختج ميثه .. لاتنسييين .. واشترالي حلاوه بعد ..
ميثه تبتسم :الله يسلمه ..
شمه :ليش تبتسمين ؟
ميثه تتطالعها: مستانسه وايد ..
شمه بجديه:عشان سعيد سلم عليج ..
ميثه تبتسم : يالله نتيدد .. ومشت قبلها ..
وبهاللحظه خليفه كان ظاهر من بيتهم ..وبيت لطيفه امره مجابلنهم .. والباب قوم خليفه ع سيد دريشه لطيفه ..بهاللحظه طاحت عينه ب لطيفه وهي يالسه تسقي الورده اللى محطيتنها عدريشتها .. وهيه حليلها ماانتبهت له .. تم يطالعها وهيه تسقي الورده .. وبدى يدقق النظر بالورده .. معقوله تكون هيه اللى تحط الورد !!!بهاللحظه شافته لطيفه وهو يطالعها واندست بسرعه ع طرف الدريشه .. وهي محطيه ايدها الثنتين وراها و رافعه راسها عالييدار وتتنصخ بصعوبه .. فدييييييييييييييت رووحه .. وهي مغمضه عيونها تتذكر شكله .. وااا فديته انا ..
واشوي وتسمع حد يرمس عند الدريشه ..
خليفه : السلام عليج الشيخه ..
ومن الزيغه لطووف ماردت عليه .. تريد تستوعب ..شو اللى يستوي بهالدنيا ..اخيرا حس بها خليفه وحن قلبه عليها ..!!!
خليفه :أدريبج انج هني وماتبين تردين عليه .. وأدريبج انج راعيه الورد اللى كل يوم ينحط عالكرسي عند الظهر ..يابنت الايواد .. حشمي هلج وعيب عليج هالسوا
ولطيفه تسمع هالرمسه وهي منزله راسها ..
خليفه يكمل :حرام تنزلين براس هلج بفعايلج ..والله مايستاهلون منج هالشي .. والبنيه اللى حاشمه نفسها وهلها بعزتها وعزّة نفسها وكرامتها هي اللى تكبر بعين الريال .. مب بالورد وهالخربطان .. استري نفسج وربج فوق بيستر عليج ان شاء الله ..
ومن بعد هالرمسه لطيفه انجرحت جرح مايبرى ..وتمت تصيح ..
وباجرها .. البنات سارن يغسلن الثياب .. وحصه مايت وياهم ولطيفه سارت لها البيت تتخبر عنها ..
لطيفه :انتي خبله ؟
حصه بصوت يرتجف :أحبه أقولج أحبه .. والله أحبه موووت ..
لطيفه تيود ايدها :حصيص فديتج .. لاتعلقين قلبج بأوهام مالها اول ولا تالي ..
حصه تناظر عينها :صدقيني مب اوهام .. انا متاكده من مشاعري واحاسيسي .. أحبه .. أنا من يوم شفته وانا اهاذي به .. والله طيفه في خيالي مايخوز عن بالي .. صورته هني ..(وتاشر ع راسها ) .. والله طيفه مايفارجنيه ..
لطيفه بحزن : لاتفكرين زوود وتعلقين روحج به.. هو مايدري عن هوى دارج .. سعيد مايصلح لج ياحصه..
حصه والعبره خانقتنها : وانتي !! خليفه يدري بحبج اللى مبهدلنج صوبه .. يدري انج ماتنامين الليل الا وخياله بعينج ..!!!مايدري !!! علقتي عمرج بحب زايف طول هالسنين.. وانا ولا مره منعتج من هالشي .. واللحين اتيين وتمنعين ابسط حقوقي .. هذي مشاعر تظهر من القلب انا مااروم اتحكم بها .. خلاص حبيت وطحت شراتج .. وتتطالعها ..ردي عليه ؟؟ جي نزلتي راسج .. ؟؟
لطيفه ترفع راسها:حصه .. انا غلطت ومحد وجهني .. ولانج اربيعتي مااباج تغلطين شراتي .. لانج مع الايام بتمرين باللي انا مريت به .. صدقيني مابتتحملين بيكون هالشي فوق طاقتج .. واحب أريحج وأقولج اني بديت انسى خليفه ..
حصه تفتر صوبها وتتطالع عيونها وتشّد على جلمه كذابه:كذااااابه .. كذابه تقصين على منوه انتي ..؟انا أقرى الحزن بعيونج والهم اشوفه بويهج .. لطيفه جنج نسيتي انا منوه ؟انا اربيعتج دارستنج دراسه .. يعني هالرمسه مب عليه ..
لطيفه بدت العبره تخنقها : صدقيني مااحبه اريد أنساه ..
حصه تتطالعها :تريدين تنسينه ..مب بديتي تنسينه ..
وتمر الايام والليالي .. ولطيفه تعاني من الجرح اللى جرحها به خليفه ..و هي نيتها صافيه وحبها طاهر وعفيف .. وماقصدت انها تخون ثقه هلها .. لامت عمرها مليون ألف مره تمت تفكر برمسه خليفه مب عشان خليفه .. لا .. عشان هلها .. بوها اللى رباها وكبرها وامها اللى معطتنها كل الثقه .. وخليفه لاحظ من بعد مارمسها ماقامت توصله ورود .. وحصه اللى بدى قلبها يخفق لسعيد ..
وفي يوم من الايام .. ولطيفه وحصه كانن يتشرن من البزار .. وهن ردات بيوتهن في السكّه لمحهن خليفه ..
وطبعا هو مايدري انه هاذي لطيفه .. ولطيفه من شافته كرهت عمرها .. ورمسته ترن بذونها ..
خليفه يرمس لطيفه :الشيخات هاتن عنكن البقشه .. ثجيله عليكن ..
لطيفه بجفى : مشكور ..
خليفه :لا والله اختي ثجيله عليج وايد هاتيه لاتخيلين ..
وحصه مستغربه من لطيفه ..
لطيفه بجفى واضح :قلت خلاص مااريد .. حل عن سماي ..ومشت عنهم ولحقتها حصه.. وخليفه عرف انه هذي لطيفه .. واستغرب من اسلوبها ..
خليفه يهز راسه ويضحك :صدق انهن ناقصات عقل ..
وطول الدرب وحصه دموعها تنزل ع ويها لين رقبتها .. وحصه تحاول وياها وهي مب راضيه ترمس ..وهن يمشن ..
حصه :شعنه ماترمسين؟
لطيفه تصيح :مااريد ..
حصه :شوفي ..تراج عقب ماتهدين بتخبرينيه كل شي .. لاتتحريني بطوفها لج ..
وطول الدرب ولطيفه تصيح ..وحصه كارهه عنادها ..
وعقب شافهن سعيد .. وطلب منهن يشل قشارهم .. وحصه عطته البقشه .. ولطيفه ماطاعت ..
سعيد :لا افا عليج اختي نحن نخدمكم هني ..
لطيفه من بين دموعها :يزاك الله خير ..
وحط سعيد البقشه ع جتفه وحصه ولطيفه يمشن وراه .. وميثه وشمه كانن يمشن فاخر السكّه رادين من بيت لطيفه يايبيين الكنادير .. وميثه من شافت سعيد وياهم .. بغت تموت .. وتمت واقفه مكانها ..
وشمه تنادي سعيد بس سعيد ماسمعها ..
وميثه تتطالعهم بحزن .. وسعيد ماانتبه لها وصل حصه .. حتى لطيفه ماانتبهت دخلت البيت ع طول ..وميثه من ردت البيت تمت تصيح .. حرام عليه جي يسويبي ناوي يذبحني هذا ولا شو !!!
ومرت الايام .. ميثه تجفي سعيد من الخاطر .. وسعيد متكدر من اسلوبها ..
سعيد منقهر :روحيلها انزين..
مزنه :اشفيك ؟؟البارحه سرت لها فضيحه كل يوم والثاني اطب بيتهم شو بتقول عني خالتيه ام حمد ..؟
سعيد :جي ماتسال عني .. لهدرجه هنت عليها.. ويطالع الرسمه ..
مزنه :قمتوا تجفون بعض وتقسون على بعض .. واخر شي تلومون بعض .. وانته تعرف الميث عنيده بطبعها ..
سعيد طالع من الليوان:لالا صدقيني بها شي ..
مزنه :وين بتروح؟
سعيد متغصص : بروح بنفذ من هالدنيا .. عنبو جنها ماخلت بي عقل ..
مزنه : أستغفر الله ..
وفوق السطح ..
مزنه :مضايج لانج ماقمتي تسألين عنه شرات اول ..
ميثه بونه حزن وتهز راسها:مايستاهل حد يسال عنه .. مايستاهل ..
مزنه تناظر عيونها الذابله:ميثووه .. اشفيج ؟
ميثه بألم فظيع :قوليله .. ميثه تتحمل كل شي .. الا خيانه الحبيب ..!!
ومزنه شهقت وحطت ايدها ع ثمها :خيانة!!!!انتي شو تقولين؟
ميثه مفتره عنها والعبره خانقتنها :اللى سمعتيه يامزنه ..
ومزنه من نزلت وهيه تفكر وماقدرت تخبر اخوها بهالجلمه القويه ..
وباجرها الضحى ام ميثه ويدوتها وميثه يايين من عند ييرانهم .. وسعيد خطف من عندهم وسلم عليهم .. وميثه من وقف سعيد ياخذ علوم هلها ..مشت عنهم ودخلت البيت ع طول .. وسعيد انجرح من حركتها هذي لدرجه انه من مشت عنهم افتر صوبها لااراديا .. لا الميث اكيد بها شي ..ولا هي مستحيل اتسويبي جذيه !!!! ..
وميثه من حركتها هذي تمت تصيح .. هيه ماتريد تحقره بس هو يجبرها على هالشي .. تموت ولاتحقر سعيد او تزعله او تكدره .. هذا سعيد .. عيونيه اللى اشوف ابها ..
وبعد الغدى .. قال سعيد لاخته الموقف اللى استواله مع الميث اليوم الصبح ..
سعيد : ماادري ياخي هالبنيه شقايل تفكيرها ..منوه المفروض يضايج .. انا ولا هيه ..؟؟
مزنه خايفه من رده فعله :خلك من سالفه ولد عمها .. أمسات قالتلي اوصلك رمسه ..وخبرته ..
سعيد منصعق :شوووووو؟؟؟ الا خيانة الحبيب .. هاي شو تخورط ..من وين يايبه هالرمسه ..؟
مزنه :اشدارنيه ابها تقول هو روحه بيفهم قصدي ..
سعيد معصب ..ومنقهر :روحي ازقريها ..
مزنه :اللحين !!!!
سعيد يلبس كندورته ابسرعه :هيه اللحين ..ازقريها ..
وفوق السطح .. ركبت ميثه الدري وماتدري انه سعيد كان ويه مزنه ..ومن شافته ..
ميثه متفاجئه وميوده غشوتها عدل:سعيد !!!
سعيد :هيه سعيد .. بدمه ولحمه ..
ميثه منزله راسها :ممكن تعطيني مقفاك .. دقايق ؟
سعيد :شوه ؟
ميثه : لف ويهك اشوي .. أريد ادخل شعريه ..
وميثه يالسه ادخل عقصها وسعيد مغمض عيونه ..ومتوتر ..
مزنه:خلاااص ..
سعيد يطالعها واقفه ع طرف:ممكن تفسريلي الرمسه اللى مطرشتنها ويه مزنه ..
وميثه من سمعته يقول جيه ماعرفت شو ترد عليه .. تمت ساكته ثواني ..
سعيد :جوابي ؟
ميثه مفتره عنه ..ومتردده :أأأأأ واضح مايحتاي تفسير ..
سعيد مستغرب منها : ليش بنت معزبي ..شو شفتي عليه عشان تنعتيني بالخاّين .. ؟
ميثه تفتر صوبه وميوده غشوتها:انته ليش ترمسنيه جذيه !!
سعيد ردّ لصوابه :أنا أسالج ..ردي الجواب ؟
ميثه عاطتنهم مقفاها :مابجاوبك الا يوم يعتدل اسلوبك ..
سعيد :ان شاء الله .. شيختيه ممكن تردين ع السؤال ؟
وميثه ميته قهر من اسلوبه .. وعشان تقهر به زوود ..
ميثه :لانك خاّين ..
سعيد يتقطع من داخل بسبة هالجلمه .. وببرووود:انزين خاّين .. ممكن السبب ؟
وميثه مفوله من برووده ..وبنفس الوقت خانقتنها العبره ..
مزنه :والله مايرزى .. الله يهديكم ..
سعيد :مزنه .. دخيلج هالشي بيني وبينها ..
ميثه متردده :أأأأأ .. شفتك تشل سمان حصه بنت آل علي وتوصلها لين بيتهم ..
سعيد يحاول يتذكر .. وثواني : انزين .. ويعني .. شو فيها تراها اربيعتج .. شفت القشار ثجيله عنها وفازعيتها .. هذا واجب ..
ميثه تلومه : وانا يوم فازعت ولد عمي قمت تجفيني .. حتى السلام كنت ترده من ورى خاطرك .. اشوفك مارمست عن هالسالفه..؟
سعيد ياشر بصبوعه:انتي ادرى بحركات ولد عمج .. وتعرفينه زين مازين .. اما انا نيتي نظيفه صوب البنت .. وايخسي انظر لها نظره شينه ..( وثواني سكت .. وبصوت واطي) .. انتي جرحتيني بجلمه خايّن .. ماتدرين شو سوتبي هالجلمه ..
وميثه ساكته والعبره خانقتنها ..
سعيد يطالع الارض وحاس بدموعها ويعاتبها:الله يسامحج جانج نعتيني بالخاين بسبة هالشي .. والله ماهقيتها منج .. اتوقع من أي حد .. حتى اربيعي خليفه أتوقع منه.. الا انتي ياميثه .. الا انتي ..
وميثه بدت عبراتها تنزل ع ويها :انا مب قصدي انعتك بهالجلمه.. طول الفتره اللى طافت وانته تجفيني وانا من شفتك ويه بنت آل علي ..وسكتت والعبره خلاص بدت تخونها .. وحطت ايدها الثنتين ع ويها وتمت تصيح .. وسعيد يشوفها تصيح جذه .. نزل راسه ماقدر يشوفها اكثر ..
سعيد : لاتذرفين دموعج على أي حد ..
ميثه وهي تصيح :انته مب أي حد ..
بهاللحظه صخ سعيد .. وتم يطالعها.. بس الجرح اللى بقلبه بعده ينزف ..ومزنه من شافتها تصيح اتجدمت صوبها ولوت عليها ..
سعيد يطالعها شقايل لوت ع اخته ..وحن قلبه عليها من الخاطر بهاللحظه.. بس :ميثه لايغرج المظهر الخارجي .. و راح ..
ميثه وسط دموعها :مزنه .. سعيد مايحبنيه ..
مزنه تمسح عراسها :ميثاني دخيلج .. لاتسوين بعمرج جيه ..
وميثه دخلت حجرتها وهيه بعدها تصيح .. عمرها ماشافت ذيج النظره بعين سعيد .. كانت نظره لوم وعتب .. كانت قاسيه عليها وايد وايد ..ما قدرت تتحملها .. ميثه حست بانها بدت تنضج فكريا اكثر وتكبر بعواطفها و مشاعرها واحاسيسها وبدت تفهم انه الحب محتاي صبر وتضحيه و وفاء .. وطول ذاك اليوم تمت ميثه متكدره .. حتى سعيد نفس حالتها ..من ظهر من بيتهم راح المزرعه .. وهناك شاف خليفه .. ويالسين عالحصير ..
خليفه ميود الداس ويقص به الزرع : رب ماشر بو عسكور ؟
سعيد محطي راسه ع الييدار :قسيت عليها وايد .. قسيت على أجمل مخلوق فهالدنيا ..وخبره بالسالفه كلها ..
خليفه يتذكر لطيفه :أقولك .. ناقصات عقل الحريم ..
سعيد يطالع العوانه : حبيبي .. حبيبي ريح افكارك ترا بعض الشكوك اوهام .. حبيبي مستواك أكبر وحرام يكون تفكيرك .. تصدق بي كلام الناس بعد عشره دهر واعوام .. تباني احلف بربي ولا فكرت في غيرك .. انا ادري .. ادري هذي الغيره واعذرك صدق ماتنلام .. ولكن ياعشيري كيف تحسسني بتقصيرك ؟؟ أنا ماغرني وقتي ولا غرتني الايام ..أنا طبعي مثل الاول مثل ماكان تصويرك .. كفى ..كفى عين من الله خير ..تعال .. تعال وفي عيوني نام .. تعال وعايش ايامي على موال تعبيرك .. اشوفك بس فاحلامي .. عسى الله يكثر الاحلام اذا جابتلي اعلومك تفرحني تباشيرك .. حبيبي .. حبيبي اعرف ظروفك وانا ادري لظروف احكام .. ولكن لاتخلي الوقت يبين فيك تغييرك حرام نضيع ايام قضيناها بمرح وانعام .. حرام فوادك الطيب يتابع شك تقكيرك ..

*للتنويه :كلمات الشاعر الاماراتي المبدع :يمعه بن نايم الكعبي ..

واشوي وعقاب يايب وياه الفواله و انتبه له سعيد ونش وحط السماط عالفراش عشان يحطون الفواله ..
وبهاللحظه افتر خليفه وشاف الشيخ علي .. وهو يعق الداس ..
خليفه ينفض كندورته :نشّ الله يغربلك .. الشيخ علي ياي صوبنا ..
وربع خليفه اما سعيد يسحب عمره سحب ماله خاطر ..
خليفه يوايهه ويحب راسه : الله يطولنا بعمرك ..
سعيد يوايهه ويحب جتفه : تفضل عمي ..
الشيخ علي يطالع النخل :كل شي تمام .. محتايين شي ..
خليفه :لا الحمدلله .. كل شي مرتب يطولنا بعمرك .. الا انته لازم تقرب صوبنا .. تاكل شي من الرطب اللى خرفناه ..
وحصه كانت فبيت سعف النخيل اللى مسوينه فطرف المزرعه وكانت تعابل الفواله ..
حصه :عقاب نسيت القرص العضيلي ماشليته ..
عقاب :ان شاء الله بشله .. انتي اللحين روحي البيت ..
وحصه تلبس عباتها .. وتطالع سعيد وخليفه يرمسون ويه ابوها .. وهي تحترق خاطرها تعرف شو سر ضحكه سعيد ..
ومرن ثلاث تيام .. وفي اليوم الثالث من الفير والمطر يطيح .. وميثه نفسيتها تحسنت اشوي من شافت المطر يصب وزخاته تضرب ع دريشتها .. وكانو يتريقون في الليوان ..
يدوه يالسه تدهن الزبده بخبز رقاق لشمه .. وميثه يالسه عالتكيه وكانت فاله شعرها وخصلات ع ويها .. وهيه تتطالع المطر .. وسارحه بخيالها لبعيد ..ويظهر حمد من حجرته ..
حمد :اميه صبيلي شاهي ..
ام حمد تلز له :قرب فديتك ..
بوحمد :حمد .. اباك تظهر المراجب كلها وسعيد وخليفه بيعاونوك عليها ..
حمد :هيه ابويه ان شاء الله .. وافتر صوب اخته ..ميثه لاتتحركين بعد بج قصيد اللحين ..
ميثه ترد خصلتها لورى:شوه ..؟
حمد يحط اللقمه بثمه :سلامتج ..
بوحمد يفتر صوبها :بنتي تريقتي ؟

وعالضحى بعد ماخف المطر .. ظهرن البنات صوب اليبل .. وكانن مربوشات ..وهن يطالعن البنات يلعبن مع بعض والصبيان يلعبون بصوب ..كانن يمشن جدا البحر .. ويشوفهم واحد من الاولاد ..
مانع :وين سايرات؟
حصه :وانته شو لك تتخبر ؟
مانع :ردن بيوتكن ولا اخبر عليكن العرب ..
ميثه :هذا مانع بو السان ..مأذي شموه اختي دوم يضاربها .. وزقرته ..
ويتجدم صوبهن .. والاولاد وراه ..وهو ميود زوّره ويشخط ابها ..
مانع بصوت عالي :منوه منكن توها يالسه تراددني ؟
حصه تتجدم صوبه :لا والله !! أنا .. خير شعندك ؟
مانع يطالع طولها:بشخطج بهالزوّره .. ان مارديتي بيتج ..
ميثه شهقت :عيييب شو هالرمسه ؟
مزنه :مانع حبيبي عيب هالرمسه ..
حصه تثور :ايييه انته منوه تتحسب عمرك .. (وتجدمت صوبه عشان تضربه )والله العلوم بتوصل لهلك .. ماعليه ..
مانع يرد ع ورى:لالالالا الله يخليج .. الله يخليج ..لاتخبرين ابويه
حصه :جب جب .. مستقوي علينا اونه .. رح مناك ..يالله يالله ..
مانع منقهر منها :شوه تبن ليش زقرتونيه ..انتي اييه ليش زقرتيني ؟
راشد :وين خالوه ميثه امبيكن ؟
وميثه تشل غشوتها وتضحك بصوت عالي ..:رشوودي ..
راشد :خالتيه العبي ويانا عسكر وحراميه ..
مزنه تضحك :هههههههههههههههههههههههه أتخيل ..
ميثه :لاانا اتخيلج تلعبين وياهم القبّة ..ههههههههههههههههههههههه
وكلهن ضحكن ..
مانع :اييييه انتي من فريجنا اول مره اشوف ويهج .. انتي وايد غاويه ...
البنات يضحكن عليه .. ومانع مستغرب ..
وميثه تتطالع براءته وتضحك عليه ..
مانع يرمس راشد :تقربلك ؟
راشد :هذي خالتيه ميثه ..
بهاللحظه يسمعون حد يباغم ويراكض من بعيد .. كان هذا خليفه .. وسعيد كان يلحقه .. وميثه من شافت خليفه يربع جي اطالعت لطيفه اللى كانت تتطالع خليفه وماعلقت عليه شرات كل مره ..وهم يشوفون هالمنظر ماتوا من الضحك ..والاولاد ارتبشوا ..خص مانع ..
مانع يباغم :ههههههههههههههههههههههههه سعيد نزخه لك .. ويركض ..
ويترابعون الصبيان ويه سعيد يزخون خليفه ..
وميثه تضحك من خاطرها حتى مزنه .. بعكس حصه اللى كانت تبتسم .. ولطيفه ماقدرت تمنع روحها من الضحك .. خاصه شكل خليفه وهو يربع وميود سفرته ع راسه ..
وهم قدهم واصلين اليبل .. يلسو ع صخره عوده وايد ..
لطيفه تباغم :لحقن بنات .. فرصااد ..فرصاد ..
ميثه تتطالعه :فرصاد بعينج .. هذا حماّض ..
مزنه تثور :الللله حماّض .. يالله خاطريه اتذوق منه ..
لطيفه :سيرن يالله انا شفته قبلكن ..
حصه: اييييييييييييه بنات اريد .. لطووووف يالزطيه ..
ميثه تفتر عنهن :انا بتمشى عنكن .. ومشت ..
مزنه تصد لها:ميثوووه لاتروحين بعيد وايد ..
ميثه :لا هني جريب ..
والبنات يلسن ايمعون الحماّض بيشلونه صوب امهاتهم .. وميثه تمشي ومب حاسه انها ابتعدت عنهم وفجاه حست بعمرها جدا البحر .. المنظر كان حلو .. والجو مغيم .. والبحر واليبل .. روعه .. يلست جدا صخره ميمعه فيها ماي المطر ..وهيه تفتر ع يسارها .. شهقت .. جافت اثنينه على مرجب .. يطالعونها .. وهي من شافتهم بلعت ريجها من الخوف حتى ماردت الغشوه عويها .. ماقدرت تتحرك ..تمت متصنمه تتطالعهم وهم يطالعونها ويسوقون المرجب صوب الرمله .. وميثه من شافتهم يايين صوبها ردت ع ورا بخطوات كنها تريد تستوعب اللى تشوفه .. من وين يايه هالاشكال ؟؟؟.. ربعت وهي تتطالع وراها كل خطوة ..بهاللحظه حست انها ابتعدت عن البنات وايد .. وهي تركض وتصيح وتباغم .. تحس بالسكون في الفريج كنه ماحد يسمعها كنها روحها فهالدنيا .. خوف مب طبيعي .. ظهر قلبها من بين ضلوعها من رهبة اللى تشوفه ..حتى البنات مالقتهم ..تمت تزقر ابوها و أخوها حمد وهيه تباغم .. وفجاه طاحت على ركبتها ماقدرت تركض اكثر وتتنصخ بصعوبه ..ومن دموعها اللى ذرفتهن ماقدرت تميز حد ..

..
..
..




شو استوالها الميث ؟؟؟


ولا تحرموني من ردودكم الشيووخ ..


اختكم
تلع لعناق
 

رسيل

๑ . . عضو بقراطيسة . . ๑
التسجيل
17 نوفمبر 2005
رقم العضوية
4376
المشاركات
10
مستوى التفاعل
0
الجنس
رد : " الـــــــروح الغراميـــــــــة "

وعليكم السلام اختي
مشكوره عالجزء...بقراه وراجعتلك بالتعليق
رسيل
 

معاني

::أديبة البرزة ::
التسجيل
24 نوفمبر 2004
رقم العضوية
2489
المشاركات
7,525
مستوى التفاعل
39
الجنس
الإقامة
قلب زايـد
رد : " الـــــــروح الغراميـــــــــة "

تلع العناق..

مشكوره يا الغاليه ع الجزء..

و لي عوده ..

لازم اقرا و انا مكيفه و مزاجي اوكى..

و الكووفييه من صوب علشان نندمج زين ما زين...

معاني..
 

معاني

::أديبة البرزة ::
التسجيل
24 نوفمبر 2004
رقم العضوية
2489
المشاركات
7,525
مستوى التفاعل
39
الجنس
الإقامة
قلب زايـد
رد : " الـــــــروح الغراميـــــــــة "


خالفت كل الناس يا زين لرضاك...
و سلمت لك قلبي وروحي هدية..
يا منوتي هونك ع قلب يهواك..دام الغلا من بيينا بالسوية...

علاقة جميلة و روعه تجمع بين قلبين بعاد بس قراب في نفس اللحظه سعيد و ميثه....
الله يخلي مزنه مرساااااااال الحل...
يحليلها حصه حب من طرف وااحد..يا خوفي فـ يوم ترتبط بـ سعيد..ترا ميثه ما تستاهل...
و خليفه و لطيفه اتمنى نهاية علاقتهم اتكون حلوه....
الموقف الاخير لـ ميثه يمكن يتدخل فيه سعيد.. و يكون هالموقف صلح بين سعيد و ميثه ...
اسلوب جميل و رائع يعطيج الصحه و العافية تلع العناق ..
و ننتظر الجزء القادم لا تبطين عليناااا

معاني...​
 

غنَاتْيـے

مُصورَه فُوتُوغرَافيه ♥
التسجيل
1 أغسطس 2005
رقم العضوية
3845
المشاركات
14,841
مستوى التفاعل
4,076
الجنس
الإقامة
بــوظَبيـے . . *~
216588423.jpg

.
.
61156536.gif

.
.
๑ تلع لعناق ๑
.
.
صباح الخير غناتيه..!!
في كـل جزء تبهريني بإبداعكِ المتجدد..!!
سملت لنا هذه الأفكار..وسلم لنا هذا القلم المبدع..!
.
.
قايد..في هالجزء كسـر خاطريـه طشه..ماعنيه مادانيه..^.^
بس يوم كان قابض ميثه وقال إلها أحبج..أحس قالها من خاطره..!!
بس مايستاهلها طبعــا..!
.
.
سعيـد..عاشق..وولهــان..ربي يجمعه مع ميثه.. امممم ومن حقه يزعــل الغيره بتاكله ياحليله..^.^
وميثه حرام عليها اتصده جذه عنبوها زاد مايسوا عليه ..>>> وايد مندمجـه..!
.
.
لطووف ربي يعينها خليفه..جافي وجاسي...في أسلوب أخير عن جيه يرمسه ابها..بس أحس آخر شي بتييب راسه ومردها له..!!
حصيص عاذرتنها هاي مشاعر واحاسيس ماتروم تتحكم أبــها..بـس لو تبتعد عن دربه أخير ألها..!
.
.
عسى ميثه تكون بخير..شوقتيني..ابى اعرف شو بيستوي عليها..واممم شرات ماقالت معاني فديتها في إحتمال انه سعيد يساعدها..^.^
.
.
بإنتظار الجزء اليديد لا تبطين علينا..!
.
.
406653534.jpg
 

ونه شوق

๑ . . عضو مشارك . . ๑
التسجيل
24 ديسمبر 2003
رقم العضوية
929
المشاركات
183
مستوى التفاعل
1
الجنس
الموقع الالكتروني
رد : " الـــــــروح الغراميـــــــــة "

ماااااااااااااااااااااشااااالله عليييييييييييييييييييييج
الصراحه صج في قمة الرووووعه الله يعطيج العافيه يا تلع لعناق بيني وبينج انا هالمنتدى مكنسلتنه من زمان ما أدخله لكن يوم قالولي ان في قصه روعه اسمها الروح الغراميه في البرزه والله ماترددت اني ارد عليج صج والله منصعقه من كتابتج عندج موهبه صراحه واحب اقولج اني مهووسه بشي اسمه قرايه قصص والله يعطيج العافيه
واللحين بعلق على الشخصيات الصراحه شخصيه سعيد وايد اندمجت فيها واايد رومنسي وشاعري والله ياليت لو في حد جي بهالزمن كلهم دفاشه المهم وشخصيه قايد بعد لفتتني هالريال وايد اناني واحس انه بيسوي مشاكل ومابيخلي ميثه بحالها ومزنه فديييييتها والله كشخه هالبنيه حتى حصه ولطيفه وخليفه يفطسني من الضحك والله اقعد روحي اكركر اللى بيشوفني بيقول هاذي مينونه اكيد الصراحه كل شخصيه احلى عن الثانيه واحلى شي بالقصة انج توقفين القصه عند الموقف الحساس واتمنى انج لاتبطين علينا اوكي الشيخه









تعاااااالي ماخبرتينا شو يعني نكج؟؟؟تلع لعناق رووعه صراحه


تحياتي لج
ونه شوق
 
التعديل الأخير:

قناص الآريام

๑ . . زائر . . ๑
التسجيل
12 مارس 2005
رقم العضوية
3262
المشاركات
4,060
مستوى التفاعل
101
الجنس
الإقامة
uae
رد : " الـــــــروح الغراميـــــــــة "

السلام عليكم ورحمة الله وبركاته

عيل .. لاتتركيني أرجوج .. يوم اني حبيتج .. محد (ن) يحب انسان ويعيش من دونه .. أغلى اماني العمر اني تمنيتج .. وأشغلت قلبي فيج والروح مفتونه .. لو تطلبين العمر .. عمري أعطيتج .. يرخص عمر الانسان لو نال مكنونه .. عن عين كل الناس بعيوني حطيتج .. وسميتج روحي الأبديه ..

لاتفكرين زوود وتعلقين روحج به.. هو مايدري عن هوى دارج .. سعيد مايصلح لج ياحصه..
حصه والعبره خانقتنها : وانتي !! خليفه يدري بحبج اللى مبهدلنج صوبه .. يدري انج ماتنامين الليل الا وخياله بعينج ..!!!مايدري !!! علقتي عمرج بحب زايف طول هالسنين.. وانا ولا مره منعتج من هالشي .. واللحين اتيين وتمنعين ابسط حقوقي .. هذي مشاعر تظهر من القلب انا مااروم اتحكم بها .. خلاص حبيت وطحت شراتج .. وتتطالعها ..ردي عليه ؟؟ جي نزلتي راسج .. ؟؟


مشكوره


وادري انها قليله وما توفي حقك


بحفظ الرحمن ورعايته

أخوج قناص الآريام
 

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد : " الـــــــروح الغراميـــــــــة "

ماااااااااااااااااااااشااااالله عليييييييييييييييييييييج
الصراحه صج في قمة الرووووعه الله يعطيج العافيه يا تلع لعناق بيني وبينج انا هالمنتدى مكنسلتنه من زمان ما أدخله لكن يوم قالولي ان في قصه روعه اسمها الروح الغراميه في البرزه والله ماترددت اني ارد عليج صج والله منصعقه من كتابتج عندج موهبه صراحه واحب اقولج اني مهووسه بشي اسمه قرايه قصص والله يعطيج العافيه
واللحين بعلق على الشخصيات الصراحه شخصيه سعيد وايد اندمجت فيها واايد رومنسي وشاعري والله ياليت لو في حد جي بهالزمن كلهم دفاشه المهم وشخصيه قايد بعد لفتتني هالريال وايد اناني واحس انه بيسوي مشاكل ومابيخلي ميثه بحالها ومزنه فديييييتها والله كشخه هالبنيه حتى حصه ولطيفه وخليفه يفطسني من الضحك والله اقعد روحي اكركر اللى بيشوفني بيقول هاذي مينونه اكيد الصراحه كل شخصيه احلى عن الثانيه واحلى شي بالقصة انج توقفين القصه عند الموقف الحساس واتمنى انج لاتبطين علينا اوكي الشيخه

تعاااااالي ماخبرتينا شو يعني نكج؟؟؟تلع لعناق رووعه صراحه


تدرين شو خاطريه .. خاطريه اغتالج ..
وبعدين نكي ..اذا كنتي تعرفين بالقصيد بتعرفين شو هو !!! السموحه منج :mf_tongue
 

روووح

๑ . . عضو ملكي . . ๑
التسجيل
3 أكتوبر 2004
رقم العضوية
2261
المشاركات
2,727
مستوى التفاعل
5
الجنس
رد : " الـــــــروح الغراميـــــــــة "

تلع لعناق تلع لعنااااااااااااااااااااق تلع لعناااااااااااااااااااااااااااااااااااااااااااااااااااااااااااااااااااااق


حراااااااااااااااااااام عليج شو هالقصة

شو سويييييييييييييييييييييييييييتي فينااااااااااااااااااااااااااااا

شو اقوووووووووووووووول بس ياااااااااااااااااربي شوووووووووو ارد

اهيء اهيء اهيء


والله صحت صيااااااااااااااااااااااااااااااااح على القصة................وااااااااااااااااااااااااااااااااايد اتأثرت في القصة واحداااااااااااثها ..حسيت اني عاااااااااااااااااااااااايشة وياهم ....احس بأحااااااااااسيسهم واشعر بمشاااااااااااااااااعرهم....ااااااااااااه ياتلع لعناق...عيشتينا فزمن اتمنى ارجع اعيشه...زمن البسااااااااااطة...زمن الحب.....زمن النقااااااااااااااااااء...زمن العااااااااااااااااااااااااااطفة الصادقة..........زمان اول اللي ما يعوضه اي شي....ماااااااااااااااااااالت على الحياة الحين....مااااااااااااااااااااااااااااااالت

تلع لعنااااااااااااااااااااااااااااااااااااااااااااااااااااااااااااااااااق.....شو هالقصة.........؟؟؟؟؟؟؟؟؟؟؟؟وشو هالابدااااااااااااااااااع............مرت علي قصص......ومرت عي رواااااااااااياااااااااااااات...بس شرااااااااااااااات قصتج ما مر علي شي الصراحة............اول مرة اقرا قصة تشدني لهاي الدرجة.....عجيبة القصة.......ورهيبة حيييييييييييييييييييييييييل



والشخصيااااااااااااااااااااااااااااااااات رووووووعة

سعيد روماااااااااااااااااانسي حيل وشاعري ......ناااااااااااااااااااااااادر وجود اللي شراته هالايااااااااااااااام.....احسه بيضحي حيل عشان مايخسر حبه


ميثة.....شوي ياهل في مشاعرها....

خليفة احسه صح سوالف وحبوب لكنه مب ماااااااااااااااااااال مشاااااااااااعر وعواطف...واقعي زيادة عن اللزوم

حصة ولطيفة......كسروا خااااااااااااااااااااطروا :(

مزنة..............هيه اللي غامضتني بين هالناس..................تعبت حيل وياهم


الصرااااااااااااااااااحة مب عاااااااااااااااااااارفة كيف اعبر عن اعجاااااااااااااااااااااااااااااااااااااااااااااااااااااااااااابي الشديد بالقصة الفنتااااااااااااااااااااااااااااااااااستك


السموحة منج يالغلااااااااااااااااااااااااااااا اتأخرت حيييييييييييل في الرد....بس كنت اتابع قصتج اول بأول...........وصار لي مدة اتريا جزء يديد


يالله عااااااااااااااااااااد لا تتأخرين علينا.....متى بتكون النهاية...................ان شاء الله تكون نهااايتها خير



تلع لعناااااااااااااااااااااااق



تلع لعناااااااااااااااااق


بسألج



انتي اللي كاتبه القصة بنفسج


اذا انتي اباج في طلبة


اول جاوبي وعقب بخبرج شو الطلب




وبس








روووح تحييج
 
عودة
أعلى