• مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

" الـــــــروح الغراميـــــــــة "

معاني

::أديبة البرزة ::
التسجيل
24 نوفمبر 2004
رقم العضوية
2489
المشاركات
7,525
مستوى التفاعل
39
الجنس
الإقامة
قلب زايـد
رد : " الـــــــروح الغراميـــــــــة "

تلع العناق السموحه منج ..


بس شو عجييييييييييييييييب هالجزء ..

يالله كيف استمتعت و انا اقراااااااااااااه ..

سعيد يقهر يقهر يقهر ..

و سالفه الجريق عجيييييبه لوووووووووووووول

اتمنى يصير شي يخرب ملجة ميثه ع قايد ..

جان زين قايد يحس لدمه ..
الي يقهرني بالقصه كله ..حصه مدري ليش ,..؟؟

ننتظر الجزء القادم .

معاني ..
 

مشاعر قلب

๑ . . عضو نشيط . . ๑
التسجيل
20 نوفمبر 2005
رقم العضوية
4418
المشاركات
213
مستوى التفاعل
1
العمر
38
الجنس
الإقامة
مااااايخصكم
الموقع الالكتروني
رد : " الـــــــروح الغراميـــــــــة "

قصة تستاهل المتابعة



مشاعر قلب
 

قمر دبي

๑ . . عضو نشيط . . ๑
التسجيل
9 أبريل 2006
رقم العضوية
4723
المشاركات
327
مستوى التفاعل
15
العمر
41
الجنس
الإقامة
دبي
رد : " الـــــــروح الغراميـــــــــة "

ما شاء الله اليوم يلست اقراا قصتج وعيبتني الصراحة احس البنات في منتداكم يعرفن يكتبن القصص بارعات ما شاء الله بوصف الاحداث وقصتج حلووه اذكرنا بايام اول يا ليتها ترد لناا الله يوم كنا ساكنين بجلفار بس هااا الحين غيرنا البيت والمنطقة والاماره بس جو القصه خلنا نرد نذكر كل شيء
بس اختيه لو سمحتي عندي طلب يوم بتدخلين لحدث غير عن الحدث القبلي تخلين بينهم سطر فاضي او اثنينه وتكبرين الخط بعد والسموحة ونتريا البارت اليديد
 

قناص الآريام

๑ . . زائر . . ๑
التسجيل
12 مارس 2005
رقم العضوية
3262
المشاركات
4,060
مستوى التفاعل
101
الجنس
الإقامة
uae
رد : " الـــــــروح الغراميـــــــــة "

السلام عليكم ورحمة الله وبركاته

تلع العناق

ندري قصرنا ويااج

منج السموحه الشيخه

ظروفنا هي السبب

والا قصتج ما عليها كلام ابد

بس ماادري وين تسيري الله يهدااج تتأخرين علينا

المهم نحن وياج ع الخط

ونتريا الباقي

يعطيج العافية

دمتي بحفظ الله ورعايته

أخوج قناص الاريام
 

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد : " الـــــــروح الغراميـــــــــة "

مرحبـــــا الساع ..

معاني ..
شاكره لج مرورج الدايم :redface: لاخلينا يارب ..

مشاعر قلب ..

اوكيه اقريه .. وعطيني رايج :eek:k:

قمر دبي ..
:mf_tongue ماحب حد يامر عليه ..

لالالالالا خلاص فالج طيب اللي تبينه بيستوي .. شاكره لج مرورج الكريم .. بس عاد لاتقطعينا


أخويه قناص الآريام

لا والله ماقصرتوا وياي بالعكس انا اللي مقصره بس ماعليه كل حد وظروفه [SH14][/SH14] وان شاء الله الجزء الثامن بيكون وياكم خلال هالاسبوع ..


واسمحولي عالقصوووووووور
تلع لعناق:smile:
 

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد : " الـــــــروح الغراميـــــــــة "

الجزء الثامن

ميثه تحط ايدها عراسها وبصوت واطي :أبويه ..
و طاحت مغشي عليها ..البنات افترن صوبها وصرخن .. ومريم ربعت تخبر امها ويدوتها ..
عفره تشلها من الارض وتباغم :يدوووووووووووه .. امييييييييييييييييه لحقوني ..
سلامه تصيح :عفره شو فيها .. عفره شو فيها ميثه ..؟؟
والحريم شلوها وودوها الشبريه .. وشلو عنها الذهب .. ووصل الخبر عند الرياييل .. وبو حمد خل كل شي وسار يشوف بنته شو استوابها ..
بوحميد :اتعشو اتعشوا ..خير ان شاء الله خير ..
قايد ضايع : شوفيها حرمتيه؟
عبدالله ويهه معتفس :شعرفنيه علمي علمك ماتشوفنيه مجابلنك و لااتحركت عن شيفتك .. من وين بعرف ؟
قايد وهو ميود الخيزرانه بتوتر :والله ان حل بها شي .. بذبح عمريه ..وسار وهو مب عارف شو يسوي .. و وين يروح ..
عبدالله يفتر صوبه : تعال وين بتروح ؟
قايد شرات التايه مارد عليه ..
عبدالله يتلفت يمين يسار: ان شاء الله هالليله تعدي عخير ..
واشوي ولا يشوفون بوحمد حادر لهم سار له عبدالله ..
بوحميد : عسى ماشر .. شو فيها البنيه؟
بوحمد: خل الجماعه يتعشون ويسرحون ..والمليج عشوه وخلوه يتوكل ..
بوحميد :لا اله الا الله ..
العرب :لا اله الا الله .. لا اله الا الله .. لا اله الا الله ..
عبدالله واقف ويسمع ولا فاهم شي ..:ابويه يعني ماشي ..قايد مابيملج ع بنت عمي الليله..!
بوحميد :ماتسمع عمك شو يقول ..!
وقايد مضايج ومتكدر وشال البيت شل بصوته ..
قايد: حميد شو يعني ؟؟متى بملج ؟
حميد: قايد ظهر ظهر حرمتيه يالسه في الليوان تترياك تظهر ..
قايد يفتر صوب الليوان: حميييد حرام عليكم حسو بي ..ابا اعرس ..
وظهر قايد وسار لغدّير ..
غديّر:انته شو تقول ماتشوف حالة بنت عمك طاحت عليهم ولا قادره ترمس حتى وين تبا تعرس بها ..
قايد :مايخصني من تصح باجرها بملج ..رح خبر ابوها هالرمسه ..
غديّر :ان شاء الله يصير خير ..انته خل حرمتك تنش اول ويصير خير عقب .. وربك اللي كاتبه بيستوي ..
قايد بحسره :اشوه حرمتيه ؟ بعدها ماصارت حرمتيه ؟ شوه هالحظ الردئ .. ممفففففففففففف .. وظهر ..
ميثه من طاحت باجرها صابتها حمى .. ولزمت فراشها من ذاك اليوم .. والمطوع مب قادر يفسر حالتها .. وابوها تعنى وسار صوب الذيد عشان يعالجها .. بس كل المطاوعه مستغربين من هالحاله .. مالها علاج غير القرآن الكريم ..
مر اسبوع ..
بهالوقت الفليل الغيث ماوقف طول اليوم وهو يصب ماشاء الله ..وسعيد من يرد البيت والنوم يجفيه من عقب طيحه الميث .. غناتي شو صابها ؟؟؟؟ كان هالسؤال يمر بقلبه ف اليوم اكثر من مليون مره .. ومزنه اتم يالسه فترات طويله واعيه تحس بهالشي انها قريبه من اربيعتها .. ومن الضيجه كانت تروح ترمس ويه اخوها ..
مزنه بصوت واطي:سعيد راقد ؟
سعيد يشل اللحاف عنه ويهه : تعالي ..
مزنه تقرب صوبه : ليش شعرك خرسان ماي ..
سعيد منزل راسه :كنت فوق السطح ..
مزنه اطالعته نظره :انزين حط هذي عليك بتمرض جيه ! وليش مارقدت ؟
سعيد وهو يتنهد : آااه .. وين بيهنالي ارقاد يامزنه والقلب مسلوبه روووحه ..
مزنه بعيون كسيره : افديت قلبك ياخويّه ..

أوعدك .. لودارت الدنيا ومالت .. وكلن راح بطريقه .. وضعنا في بحور الفراق .. وادري ابحوره عميقه .. ببقى لج مخلصن وافي .. في الحضور وفي المغيب ..

ومرت الايام .. وميثه ع حالها .. طايحه بالفراش ونادر ماترمس .. وبو ميثه يراكض كل بقعه .. وحمد يوميا يقرا عليها قرآن .. ويدوه تمسح عراسها بماي مقراي فيه .. وشمه توصل أخبار ميثه لمزنه .. وسعيد النوم يجفيه كل ليله ويسامر القمر بكتاباته وشكواه للورق .. خلااااااااص الروح ماتت من عقب طيحه ميثه .. وقايد الكل حسه غييير .. كان حزين الملامح وعصبي اكثر عن اول .. بدى الفريج يخلو من الضحكات والفرح .. والحزن والالم يطوي كل بيت .. ميثه كانت غاليه على كل حد .. هل الفريج كانو حاسين بهل ميثه .. كانو يحزنون لبعض ويفرحون لبعض ..
بطي يتراكض بكل صوب: يدوووووه .. يدووووووه .. امايه العوده ..
ام حمد تظهر من عند ميثه خايفه: شو بلاك ؟ شو مستوي ؟
راشد يمشي وراه :ايييه روعت يدتيه بلاك تزاعق جذه ..!
بطي:يدووه .. خالتيه بتربي ..
راشد يركب الدري الليوان:يدووه طرشتنا صوبج نخبرج انتي وامايه العوده ..
ام حمد:فديتج بنتي .. يالله بالسلامه .. يالله تسهل يالله ..
بهاللحظه بينت شمه من حوطه الزرع : راشد .. شو سالفتكم ..؟
اتجدم راشد صوب حوطه الزراعه .. ولقى يدوته يالسه تعابل ف الزرع ..
راشد: خالتيه سلامه بتربي !!
شمه بابتسامه عريضه :والللله سلامي بتيييب لنا صغيرون .. يدوووه يدوووه لحقي سلامه ..
يدوه يالسه تعابل الشتلات الصغيره ..وهيه ناشه : شعندج تزاعقين ..؟
وخبرتها ..
يدوه ظبيه مب مهتمه : تخورطين شرات عوايدج ..
شمه تترجاها بصوتها:لا يدوه .. والله رشود مخبرنيه ..وامايه سارتلها بعد .. حتى اساليه ..
راشد من ابعيد وهو يمشي: شمن رشووود ؟
شمه وهيه فرحانه : الله سلامه بتيب ياهل يدووه .. ياهل يديد ..
راشد يمطها من كندورتها :اييييه شو رشود .. أنا أكبر عنج .. ازقرينيه خالي راشد ..
شمه ادزه :اووووه مب وقته ..
راشد :امايه العوده تسمعينها شو تقول ..؟
بهاللحظه بينت الدماني من ورى النخله .. :يدووه بنسير وياج نحن..
شمه :هيه فديتج يدوووه .. دخيلج ..
راشد مانتبه لدماني من شافها نزل راسه ..وراح يمشي بيظهر من حوطه الزرع ..
يدوه ظبيه: يالله تسهل عليها وعلينا يارب .. اميه شمه اسقي الزرع والنخل واختج بتعاونج .. ولا تلعبون بالماي وتعبرونه ..
شمه تحط ايدها اليسار عخصرها:لا والله يدووه انا بروح وياج .. مب تامه هنيه .. هيه بعد شوه ؟(وتفتر عن يدوتها)
يدوه ظبيه :اصصصص وين بتروحين وياي خلج ويه الميث..محد وياها ..
شمه وهيه فرحانه:يالله من متى مافرحنا .. من عقب طيحه ميثه نسينا شي اسمه ضحكه من القلب ..
وسارت يدوه ظبيه وتمن شمه والدماني يسقون الزرع .. وراشد ظهر ويه يدوه ظبيه..
ولطيفه كانت فبيت حصه ويالسات ف الليوان .. ودخلت عليهم ام حصه .. ونشن البنات صوبها .. ومن عقب ماسلمن عليها ..
لطيفه: خالتيه بشري .. قامت بالسلامه بنت سعيد ..
ام حصه :الحمدلله اتسهلت بنت سعيد ويابت ولد ..
حصه بابتسامه رقيقه :حليلها .. (و ردت تتطالع حصه اللى ناظرتها بحنان )..
واشوي ويسمعون حد يهود ..
بهاللحظه ربعت لطيفه وانخشت بحجره اربيعتها ..
عقاب :هود هود .. بنحدر .. حد عندكم ..؟
حصه: هدا ..
ام حصه :محد غريب احدر فديتك ..
عقاب بتعب:اشحالج اميه ؟
ام حصه :ابخير فديتك .. ناقصنكم شي ..؟
عقاب يفكر بعمق: لا بس .. (وافتر صوب اخته) حصووه .. سوولنا دلال اقهوه وجاهي ..
حصه : ان شاء الله .. بس من هذا اللى حدر وياك ودخل الميلس ..؟
عقاب : هذا سعيد بن راشد .. المهم من تخلصين طرشيه صوبنا .. وظهرت من عندهم حصه ومن نطق اسم سعيد ماعرفت شو تسوي خاطرها تصيح .. سارت صوب لطيفه وخبرتها بكل شي وودتها العريش عشان تعاونها ..
.. وتم عقاب ويه امه يطالعها بنظرات ..
عقاب متردد :الغاليه .. أأأأأأ (ونزل راسه )
ام حصه :شو سالفتك ؟
عقاب :بنت سعيد شو الحال عليها ؟
ام حصه مستهمه ع ولدها :فديتك حالها مثل ماهو ماتغير .. مايدرون شو صابها ..!!
عقاب نزل راسه : الله يشفيها ..
وحصه ولطيفه يسوون القهوه .. ومن خلصن طرشن الدلال ..
حصه :دخيييلج بس نظره .. نظره ..
لطيفه تيرها من طرف ثوبها : حصووه مافيني اتوهق ويه اخوج .. طبي السالفه وانجبي!! لا بالصفريه فوق راسج ..
حصه سحبت ايد اربيعتها .. وربعن صوب الليوان .. وهن يركبن الدري ابسرعه ..
لطيفه تضحك : ههههههههه لاتسحبيني .. بطيحيني ..
بهاللحظه ظهر سعيد وخليفه من الميلس .. والبنات افترن صوبهم .. وكل وحده منهن صخت .. بس سعيد وخليفه ماشافوهم لان الليوان ابعيد عن الميلس .. و البنات بحركه سريعه اندسن ورى الييدار اللي بين الحجر .. وهالييدار كان مزخرف بنقوش ودواير صغيره .. والبنات يقدرون يطالعونهم بعكس سعيد وخليفه اللى مايقدرون يلمحونهم حتى ..
لطيفه تناظره بشوق .. وهيه محطيه صبوعها عالنقوش:آااه ..
حصه تشوف خطواته وحركات ايده وهو يعدل سفرته .. وبهمس :لا تروح عني دخيلك ..
لطيفه تتخطاها عشان تشوفه عن قريب .. وهيه مب حاسه بعمرها وشيلتها نزلت عجتفها وتسحب وراها و خصلات شعرها مغطيه ويها ..
حصه بهس:لا تظهر ..
لطيفه انتبهت لعمرها .. ومشت صبوع يديها ع قصتها تردها لورى .. ومن نعومة شعرها عاندتها خصله ونزلت وسوت شكل قوس .. وغطت نص ويها .. كانت جناااان واللى محليها اكثر نظره عيونها الهايمه .. عايشه فعالم ثاني .. افترت عنهم وسندت ظهرها عالييدار ..وهيه منزله راسها ومحطيه ايديها ورى ظهرها.. تفكر ..اتجدمت صوبها حصه ..
حصه تتفحص ويها ..وبالذات رموشها اللي سون ظلال عخدها وهيه منزله راسها ..وبخوف:شو فيج فديتج؟
لطيفه بصوت واطي:ماشي ..
حصه ترفع خصله لطوف ورى اذونها : خاطري اكسرلج هالقناع اللي لابستنه .. أدري انج تحبينه لكنج تكابرين ..
لطيفه ساكته ..
حصه افترت صوب الباب وبشوق: يبا يذبحنيه !!
لطيفه رفعت راسها و اطالعتها بحزن: ظهرو ..؟؟
صدت لها حصه واطالعت عيونها اللى شافت بها لمعه حاده وتترجاها بصوتها: انتي شو فيج ؟؟ ماحب هالنظره !!!!!!!
افترت لطيفه صوب الباب وشافت البقعه خاليه .. خليفه روح خلاص..!
حصه تتطالعها ودمعتها حايره وسط عينها وبصوت واطي: وافقي ! على الاقل وحده فينا تلاقي حبها !!
لطيفه تتنهد: امسات من طرش اخته دانه تتخبرنيه ليش رديته ؟؟ تصدقين حسيته مهتم بي .. (رفعت راسها) حسيته صدق يباني ومهتم بقلبي .. مادري مب عارفه بالضبط شسوي ؟
حصه تلف صوبها وتيلسها : قلبج شو يقول ؟
لطيفه ناظرتها :قلبي ..قلبي يباه .. بس عقلي يقول لا ارفضيه ..
حصه : انتي ليش تسوينبه جيه ؟؟ قلبج قاسي صراحه ؟؟
لطيفه ببرود وبصوت واطي:منوه اللي قلبه قاسي انا ولا هوووو ؟؟؟
حصه بلهفه وهيه تحط الشيله عراس لطوف:تدرين .. نشي ..وتسحب ايدها وتربع بها ..
لطيفه تربع ومالها خاطر:حصوووه عن الخبال .. فجي ايدي ماريد اروح صوب الشير ..
حصه :جب .. ويربعون ..
وركبت حصه الدرام .. عشان تقدر تتطالعهم وهم يمشون في السكه ..
لطيفه تفتر يمينها ويسارها: حصوووه .. عقاب بيشوفج نزلي ..
حصه تصاصرها : الله ياخذج سكتي .. بس نظره .. روحي روحي بيتكم فكيني من حشرتج ..
بهاللحظه زقرهم عقاب .. وحصه من الزيغه وهيه تنزل تخرطفت وطاحت .. ولطيفه ربعت بيتهم .. عقاب يتجدم صوبها ..
عقاب بصوت حاد : شو كنتن تسون هنيه ؟
حصه تشوف ريولها ومب قادره ترمس شو بتقول بعد سواد الويه .. تمت تصيح من العوار ..
عقاب منزل راسه لمستواها : دواج يالهرمه .. عيل راكبه فوق شو ادورين ؟ وشلها ..
حصه تصيح :تعورنيه تعورنيه ..
عقاب معصب :تتطالعين الساير والراد .. راكبه فوق الدرام ..
حصه وسط دموعها: كنت ابا لوزه ..
عقاب بعين حاده :ماشاء الله عليج .. يعني ماتعرفين اللوز بعده مانضح ..!!!
من عقب صلاة العشى .. الكل يتيمع بحجره ميثه..حمد يالس يقرى القرآن الكريم .. وبوميثه يمسح ع راسها بماي زمزم ..وعبدالله الوناسه مب شالتنه ومن كثر ماهو فرحان يومين ماظهر من البيت من عقب ماربت سلامه .. وخليفه كان فبيت اخته دانه يرمسها بخصوص لطيفه ..
دانه وهيه تسحي شعر بنتها :سرتلها وقالت لي ..الجواب عنده ..!!
خليفه : الجواب عنده !! هذي شسالفتها تفر ألغاز ولا شو ؟؟
دانه بغيض : برايها انزين ومكثرهن البنات اللي يبون الستر ياخليفه..
خليفه يفكر هذي شو تقصد .. الجواب عنده !!
دانه تتطالعه :فديتك شو فيك ؟ والله وايدين غيرها .. وامايه حاطه فبالها وحده وماتبي غيرها .. وبيني وبينك انا ريتها من قريب ماشاء الله عليها زوينه ومحشومه وراعيه بيت ..
خليفه اطالعها بنظره : بنت منوه ؟
دانه تبتسم:مزنه بنت راشد .. اخت اربيعك سعيد ..
خليفه يفكر وتم ساكت ومارمس ..
بهالوقت .. عقاب كان يالس روحه عالدجه اللى في نص الفريج .. ولمحه سعيد وهو يمشي ف السكه راد البيت .. ويلس وياه .. واشوي وخليفه كان طالع من بيت اخته وهو خاطف شافهم ويلس وياهم ..
عقاب مهموم وتنهد من الخاطر: آاااه .. ؟
سعيد افتر صوبه وبصوت عذب: عذاب الحب .. ولا ..
خليفه اطالعهم : هاه ..
عقاب وعيونه تلمع : الحب !! قلبي يعورنيه ..
خليفه باحساس غير :شوه هو الحب ؟
سعيد يطالع البدر : الحب .. شي ماينوصف .. مشاعر واحاسيس تنولد بالقلب .. (ويهز راسه) .. احساس ماينوصف صراحه .. احساس ينعش الروح .. غير ..
وخليفه يسمعه وعقاب يفتر صوب سعيد:وان مات هالاحساس ؟
سعيد يتذكرالميث: مات الاحساس !! .. لا مستحيل تذبل وتموت المشاعر .. الحب الاول صعب يموت او يتنسى ..
عقاب رفع راسه :آآآآآااااه ..
سعيد : .. صعب تقتل الحب من قلبك وتمحيه .. بس الاصعب ان يحاول الغير قتل حبك ..
عقاب :و صعب انك تحب شخص ومايدريبك .. والاصعب انك تستمر في حبه رغم عدم احساسه بك ..
اطالعهم خليفه بنظره : حليلكم ..
عقاب ضحك ضحكه بارده :هههههههههههه وحالك ؟
سعيد اطالع خليفه اللي استنكر رمسه عقاب وابتسم ابتسامه باهته ..
خليفه :شو فيه حالي ؟
عقاب :سعيد شف عيونه ؟
خليفه يرمش بعيونه : شو فيها عيونيه ؟
سعيد ابتسم ونزل راسه يتذكر غناته ..

لا وعذاب اللى مفارق حبيبه .. لا صار مايقوى على طول فرقاه .. مثل المريض اللى يدور طبيبه .. لا كانت جروحه تدور مدواوه .. أثر الحياه بغير خلي صعيبه .. فيها الم والمراره والمعاناه .. لوقلت هو روحي ماهي غريبه .. ولو يطلب اعيوني اعطيته وتفداه ..

خليفه نش عنهم : الله كريم .. يالله انا اترخص .. تامروني بحايه ؟
سعيد: وين بها ..؟ ايلس اشوي ..
عقاب :هيه .. اطالع عمرك بالمنظره قبل لاترقد ..
خليفه بنص عين : وبعدين وياك انته .. انا الحب ومصايبه خليته لك .. وسار
بهاللحظه افتر سعيد صوبه : صارحيتها بمشاعرك ؟
عقاب : و ان خبرتها .. مابتكون حلالي ..
سعيد : اها .. من طرف ..؟
عقاب بحزن :ماتدريبي .. ماتدري بواحد ماينام الليل الا وهو يتذكر صوتها اللي انحفر بقلبي .. طيفها انرسم ف خيالي ..كانت غير ..
سعيد يتذكر حبيبته وبصوت عذب : انته تشوفها ؟
عقاب بحسره:ياليت .. ياليت والله .. ولا مره شفتها .. بس صورتها وهيه ياهل تامه فبالي ماخازت ..
سعيد :هذا العشق سنه من الله .. اطلب من الكريم يحل بلواك ..
عقاب : سعيد أحبها ...!! والله شي يعور القلب ..
سعيد يطالعه ..: آااااه .. مخطوبه ؟
عقاب : محيرنها لولد عمها .. واللحين هيه ميهوده ومادري شو الحال عليها !!
بهاللحظه انصعق سعيد وهو يسمع هالرمسه .. صخ .. حس برعشه هزت اطرافه وكيانه .. تم ساكت يطالع عقاب .. عقاب يفضفض له ومب حاس بنظرات سعيد له .. وهو كاره هاللحظه .. كارهنها ومايريد يسمع زوود .. ويتذكر شو قال عنها .. عرف بانه عاني ميثه .. ميثه ما غيرها .. البنت اللي كان يرمس عنها اربيعه طول هالفتره تظهر معشوقته .. ومن رد البيت وهو مب فحاله .. بيتحمل كل شي .. الا شي واحد انهم يطرونها على السانهم .. يطرون الميث .. لا وعقاب اربيعه .. البنت اللى كان يرمس عنها .. تظهر ميثه .. هالشي مايقدر يستحمله تم منصدم .. حتى التفكير مب قادر يفكر .. صح انه ميثه ماعادت له ..بس بمجرد انه يسمع طاريها على السان حد كان هالشي شرات السجينه تنغرس فقلبه وتضرب به عده طعنات فمكان واحد.. هالاحساس مايقدر يقاومه .. هاليوم نزلت دمعه حاره عخد سعيد .. دمعه قهر وألم .. مسحها عطول .. وأقول الصبر يادمعه أنا وانتي نخل واخيول ..

الصبح .. لطيفه ظهرت من بيتهم وبنفس اللحظه خليفه كان واقف عند الباب يسكر مزلاج باب بيتهم .. رفع راسه .. ناظرها بلهفه .. جاسه احساس غريب صوبها .. موجه من المشاعر والاحاسيس .. كنه اول مره يشوفها .. اطالعو بعض ثانيه .. عقبها نزلت راسها و كملت دربها .. وخليفه يعدل سفرته ويطالع خطواتها ومن عقب افتر عنها ومشى فدربه .. ولطوف وهيه تمشي تحس بقلبها يدق بقوه مب طبيعيه .. ويديها ترتجف .. نظرته كانت غير .. ومن زوود ماهي كانت متوله لشوفته خاطرها تلف وراها عشان تشوف مقفاه على الاقل .. بلحظه اللي صدت ورى شافته افتر صوبها ويطالعها .. تلاقت النظرات مره ثانيه .. جان يعورها ويها من الخاااااااطر.. بعكس خليفه اللي ضحك وثناياه بينت .. وابسرعه خطفت السكه صوب بيت حصه .. وخليفه مب عارف لعمره .. من يومين وهو يفكربها وخص يوم ردته واااااايد حز بخاطره .. ولطوف من دخلت على اربيعتها وهيه تصيح ..
حصه توها ناشه وهيه زايغه :شووه فيج !!!
لطيفه :شافنيه شافنيه ..
حصه ترد شعرها ع ورى ومب مستوعبه: لطوف حبيبي شو فيج ؟
لطيفه محطيه ايدها الثنتين عويها:أقولج شافنيه .. اللحين شو بيقول !!!وتمت تصيح بصوت مسموع ..
حصه تعق الجمبل عنها وتنش تسكر الباب : منوه اللى شافج .. خليفه ؟
وخبرتها السالفه كلها ..
لطيفه :شافنيه وانا اطالعه .. لا والمشكله من صديتله ضحك الطفس ..
حصه : اووه اريد انام .. عيل يوم انج تعشقين ثراه ليش مابغيتيه .. !!!
لطيفه وهيه تصيح :عشان يتادب .. ولا انا اريده حصوووه .. انا انسان بلا روح دونه ..
حصه : انزين انتي ليش تصحينه ؟
لطيفه وهي تصيح :أحبه ..
حصه تتنهد :والله احترنا وياج يابنت علي ..

وقوم بوحميد مستانسين بالياهل اللي دخل حياتهم .. بس فرحتهم مب مكتمله .. كانت ناقصتنها ميثه وروحها المرحه .. كانو مفتقدين سوالفها وضحكتها .. وغصب عنهم يذرفون دموعهم عليها .. من عقب ماربت سلامه باسبوع .. ام حميد ويدوه ظبيه يالسات يسوّن المشموم .. ومن زود فرحتهم بولد عبدالله سون كميه كبيره عشان يوزعونها للفريج .. كانو يالسين ف الليوان .. والبنات يساعدونهم .. وام حمد من يوم مرضت بنتها وهيه ماتظهر من البيت الا عند الضروره ..
يدوه : اميه مريم روحي هاتي أوراق المشموم فوق السطح محطيتنها ..
شمه :يدوه فديتج .. اروح اييب الزعفران والصندل والزباد ..
ام حميد : هيه .. بتلقينها فحجره عمج عطرف المندوس ..
ومن يابت مريم الاوراق .. جففتها يدوه ورشت عليها اشويه عطور من اللي عندها ..
وشمه من سارت حجره عمها .. سمعت حس قايد يزقرها وسارت له..
شمه واقفه عند حدايد الدريشه: هاه ..
قايد يشل اللحاف عن راسه وياشر بايده : شعندج انتي !!!! شعندكم محتشرين وشالين البقعه شل ..!
شمه :وانا شلي .. اتخبر امهاتك .. وسارت
بهاللحظه خطفت يدوه وسمعت صريخه وهيه واقفه عند حدايد الدريشه: قايد .. قايد نش ..الشمس بتغرب وانته بعدك عفراشك ..
قايد يلحف راسه :أهوووه استوت السالفه ..
يدوه دخلت عليه :قم ابويه ..
قايد :يدووه الله يهديج .. البارحه راقد متاخر .. دخيلج لاتحرميني من لذة النوم ..
يدوه :نش نش صل الضحى ومن عقبها رح جابل اخوانك ..قم يالله ..وتير عنه اللحاف ..
قايد اير عنها اللحاف :دخيلج يدوه مب رايم انش تعبان والله ..
يدوه وهيه محطيه ايدها ع جتفه ..: فديتك قم .. النهار للكد والليل للرقاد .. قم جابل حلالك اخيرلك ..
قايد بعد مافقد الامل :يدتيه أقولج تعبان !! روحي ابا اشرد من التفكير بميثه ..
يدوه ظبيه تخوز اللحاف وترتبه : ماشي تعبان .. يالله نش .. غربت الشمس ..
قايد يصلب روحه :افديت روحج يدوه ..
بهاللحظه خطفت شمه وهيه شاله العطور .. زقرتها يدوتها ..
دخلت شمه وناولتها العطور ..
قايد يتاملها وشاف فيها ملامح ميثه :ميثه اشحالها ؟
شمه: شو بقول يعني الحمدلله .. مثل ماهي ماتغير الحال ..
يدوه وهيه ميوده العطور ونبره صوتها متغيره وطالعه من الحجره: الله يشفيها .. آاه .. كم تسوا ضحكتها وسوالفها .. والله محد بيعوضني فيها هالبنيه ..
قايد يطالعها :شمه تعالي ..
شمه تتقرب صوبه بخوف:...شوه؟
قايد :هههههههه ماباكلج .. قربي .. ولمح فيها نظره ميثه ..
قايد يتامل بعيونها : سبحان الله .. فيج من ملامح الغاليه .. وابتسم يتذكر ميثه ..
اتجدمت شمه وهيه ساكته وتتطالعه: شو تريد ..؟
قايد :ميثاني تتخبر عني ..؟
شمه: بقولك بس لاتزاعق عليه ؟
قايد بعده مبتسم بويه شمه :رمسي ؟
شمه : لا ..
قايد سكت وعقب ثواني ..: انزين سلمي عليها ؟
بهاللحظه نشت شمه وسارت ووقفت عند الباب ..
قايد مستغرب من حركتها :شو فيج ؟
شمه منزله راسها : بس ميثه ماتحب تسمع طاريك فعشان جيه انا مابا ازعلها وهيه مريضه ..
قايد تكدر :عيل فارجي ..
وطول الوقت والبنات مرتبشات ويساعدن امهاتهن .. ومن خلصن ام حميد حطت المشموم عالتكيات الميلس والليوان والحجر عشان الريحه تفوح بكل بقعه .. ويدوه شلت شويه صوب قوم ميثه .. والباجي طرشنه ويه شمه والدماني يوزعونه ليييرانهم .. وهن ظاهرات لقن سعيد توا بيظهر من بيتهم ..
سعيد : صبحكم الله بالخير ..
شمه ومزنه : صبحك الله بالنور والسرور ..
سعيد يفتح لهن الباب : حياكن الله ..
بهاللحظه ظهر قايد وشافهن يرمسن ويه سعيد ..وتغيرت ملامحه .. سعيد مشى وافتر صوب السكه .. ومن اختفى زقرهن قايد قبل لايدشون بيت سعيد ..
شمه تصاصر الدماني :ياااربيه مفففف شو مشكلته هذا ؟؟ اليوم طايحبي طيحه ..شو مشكلته !!
قايد يتجدم صوبهن :تعالن .. شموه شو قالج هذا ؟ونزل لمستوى راسها ..
شمه : ممففف منوه هذا ؟
الدماني :عاني سعيد !
قايد :هيه ..شو قالج أتخبر عن ميثه ولا رمس عنها بشي ..؟
شمه بصوت عالي: وهو شخصه يرمس عن اختيه !!!!
قايد هنيه كنها صفعته طراق : .. هيه ..صدقج هو شخصه .. ميثه خطيبتي .. وسار
شمه تتطالع خطواته :فقدته .. أظنيه خرف ..
الدماني :ههههههههههههههههههههههههههه ..
ومن دخلن لقن ام سعيد يالسه ادخن البيت ومزنه سارت ويه البنات تغسل الثياب وظهرن البنات وسارن ياخذن العلوم الدينيه وبالدرب صوب البحر .. وهن ماشيات شافن البنات يمشن عالبحر ..
لطيفه : بنت سعيد هنيه .. خشمج ..
حصه :اشحالج شمه ؟
شمه مستحيه :يسرج حاليه ..
حصه : وينج انتي ماتقربين صوبنا موليه حشى بطرانه الاخت ..
شمه : بيتكم ابعيد عن بيتنا .. ووبعدين يدوه تزاعق عليه ان سرت مكان ابعيد ..
لطيفه تلعوزبها: شماني .. البعد بعد القلوب مب بعد الدروب .. ولا شو رايكن بنات ؟؟؟
حصه تضحك:لالالالا هيه عندها مزنه شو تبابنا نحن .. ههههههههههههههه
شمه طفرت :اييييييييييييه .. مابرمسكن ..
والبنات يضحكن ..
مزنه وهيه تضحك : عن الغلاسه طفرتوبها ..
شمه تسحب ايد الدماني ومشت ولطوف وحصه يمشن وراها ..
لطيفه :شموووه فديتج ..
حصه :شمامي ماعاش اللي يزعلج .. والله غلاتج من غلات الميث .. يالله عاد سامحينا .. مابنعيدها مره ثانيه ههههههههههههههههه
لطيفه ماسكه طرف ثوبها :علني افدى هالخدود المورده .. ياربييييه ..
شمه تخوز ايدهم :اييييه ماحب حد ايود ثوبي .. ولا يود خدودي .. يالله خوزن مناك ..
لطيفه : .. افا ..
وهناك ع طرف كانت لمه شباب ويه السماج بو سالم .. بس وسط زعيق الاولاد وصراخهم ولعبهم والبنات الصغاريه يلعبن ف رمل الابيض .. قوم لطوف ماحسوبهم .. بس بلحظه حصه شافت خليفه وخبرت لطيفه اللى يالسه تراضي شمه ..
حصه تعدل عباتها :الله يغربلج .. وسكتت فجاه وشافت سعيد ميود الليخ وكان يسوي شغله عطرف وهو منزل راسه .. وماشلت راسه تمت تتطالعه .. ياربيه هالمخلوق !!! غير ..
لطيفه ماسكه ايدها :طوفي ..
حصه : يااااااااااااويلي منه .. شعره يخبل ..
لطيفه : منوه؟
حصه ادز اربيعتها :لالالالا ماباج اطالعينه ..يالله طوفي ..
شمه تفتر صوب الشبيبه : منوه هذا اللي خبلبج ؟
حصه انتبهت لعمرها : طوفي لطووف ورانا شغل ..
البنات ومزنه يزقرن حصه ولطيفه عشان يروحن يغسلن ..
ومن خلصن ..
مزنه و شمه والدماني كانو يمشون في السكه رادين بيوتهن .. وصلن الدماني ومشن وهن يمشن خطفن السكه اللي تودي صوب بيوتهن وصادفهم حمد وهو شال جفّير فيه سمج ..
حمد :السلام عليكم ..
ردو السلام
شمه تحط صبوعها ع خشمها :وعععع شوها خوز مناك مناك .. وده عند يدووه ..
حمد مستحي :الله يخسج من بنيه (وياشر عليها بايده ) يالله البيت يالله ..
ومزنه تتطالعه من تحت غشوتها .. مادري تحس بهالمخلوق غير .. جيه خجول ومايرمس وايد .. من تشوفه اتم مستانسه طول اليوم ويتم قلبها يقول اشيا واشيا وايده .. وحمد مارفع راسه عليها .. وهالشي عيب مزنه وااايد .. تمت تتطالع فعيونه اول مره تحس انه حمد ياخذ من ميثه .. كانت تحس بقرب المشاعر أكثر بكثير من تواجدهم وقربهم ف مكان واحد .. كانت ادقق برمسته وبحركات ايده يوم يرمس ويه اخته ..
شمه تيود طرف عباة مزنه :وااااع ريحه خايسه .. لا تيودني دخيلك ..
حمد :نعمة ربج يالهرمه .. بهاللحظه حط عينه ع مزنه ..
حمد :مادري شقى مستحمله هالغلسه .. ومشى ..
مزنه ماقالت شي بس ابتسمت .. اول مره يرمسها بهالطريقه .. وحمد عمره ماتخيل ان ممكن هالانسانه بتعنيله شي بحياته .. ومن دخل حمد باب بيتهم ..
مزنه تبتسم وتتذكر حمد :شموه حرام عليج فشلتيه !!
شمه ادزها داخل بيتهم :جب .. ماتشوفينه شال السمجات وينطنط فيها .. عباله مسك هندي ولا عنبر .. يريدنا ندهن به ياي صوبنا ..
مزنه :ههههههههههههههههههههههههههههههههههههههه ..


الضحى كان نفاف بس من عقب صلاه الظهر بدت الارض ترتوي وريحه الطين تفوح بكل بقعه والمطر ينزل وماوقف .. والرواح المطر بدى يخف .. ويصب ع شكل زخات وبفترات متقطعه .. شمه كانت فوق السطح وهيه نازله كانت شاله غنجه محلى وغرني .. وكانت تمشي اشوي اشوي ع الدريات عن اطيح .. بهاللحظه حمد كان خاطف .. لمحها .. ومشى وعقب رد ورى ..شافها شاله الغنجه .. ومد بايده صوبها عشان يشل عنها ..
حمد : هاتيه عنج .. اربيعة ميثه مطرشتنه ؟
شمه :هيه ومحد يهبش ..قبل ما ميثه تذوق منه ..
حمد :ليش عاد !!
شمه تشل الغنجه عنه :مزنوه موصيتني .. ومشت ..


..

.. ؟؟





تلع لعناق
 

معاني

::أديبة البرزة ::
التسجيل
24 نوفمبر 2004
رقم العضوية
2489
المشاركات
7,525
مستوى التفاعل
39
الجنس
الإقامة
قلب زايـد
رد : " الـــــــروح الغراميـــــــــة "

بالشفاا يا ميثه ..

يلا بنفتقد ميثه و سعيد... و بنيي لـ مزنه و حمد .

و قايد ويهه لوح ..يقولوله البنيه ما تباه و مب راضي يفج..

علاقة لطيفة و خليفة وايد حلوه ..

يعطيج الف عافية

تلع العناق..

و ننتظر جديدج..

معاني؟؟
 

قناص الآريام

๑ . . زائر . . ๑
التسجيل
12 مارس 2005
رقم العضوية
3262
المشاركات
4,060
مستوى التفاعل
101
الجنس
الإقامة
uae
رد : " الـــــــروح الغراميـــــــــة "

السلام عليكم ورحمة الله وبركاته

ياسلااام عليج ياتلع العناق

إنتي الصراحه شخصيه عجيبه

تسلم حروفج وتسلم افكارج وتسلم أحاسيس

مااستبعد ياتلع العناق إن قصتج لو تشاركي فيها مكان

الا تحصد من وراها شي

يعطيج العافيه تعيشينا الجو فقصتج

ماشاء الله عليج
حافظج الرحمن

اتمنى لج التوفيق وكل الخير

تقبلي خالص الود والاحترام والتقدير

أخوج قناص الأريام
 

قناص الآريام

๑ . . زائر . . ๑
التسجيل
12 مارس 2005
رقم العضوية
3262
المشاركات
4,060
مستوى التفاعل
101
الجنس
الإقامة
uae
رد: " الـــــــروح الغراميـــــــــة "

السلام عليكم ورحمة الله وبركاته

تلع العناق

أنتي وين يابنت الناس ..؟!

أبي أكمل القصه

روعة الإسلوب مبهرني


ردي وكملي لنا القصه

وأتمنى أنج تكوني الا بخير وصحه

واتمنى لج كل التوفيق


أخوج قناص الأريام​
 

تلع لعناق

๑ . . عضو . . ๑
التسجيل
30 أكتوبر 2005
رقم العضوية
4236
المشاركات
70
مستوى التفاعل
0
الجنس
الإقامة
اماراتّ العزً ..
رد: " الـــــــروح الغراميـــــــــة "

الجزء التاسع

..



شمه :هيه ومحد يهبش ..قبل ما ميثه تذوق منه ..
حمد :ليش عاد !!
شمه تتناول الغنجه عنه :مزنوه موصيتني .. ومشت ..
حمد مشى وراها شرات الياهل : ماشاء الله واايد تحبها ..!
شمه : لا تتخبر .. الهوا اللي تتنفسه .. ودخلت عند يدوتها وامها ..
حمد وقف عند الباب وتساند عليه بايده اليمين: الهوا اللي تتنفسه !.. آاه ..جان زين والله نحصل ربع اللي تحصله الميث ..
شمه افترت صوبه :شوووو؟؟؟
بس حمد سار حجرته ومسك قرطاسه اللي تعود يكتب فيه .. كانت دريشته مفتوحه واطل على البحر .. يلس يتامل البحر فتره طويله ويرد ينزل راسه ويكتب ويرد يحط القلم عثمه .. ويبتسم روحه ويتذكر الغر .. بهاللحظه دريشته ضربت بقوه عالحدايد .. وصرير الهبوب المخيف يحرك أغصان الشير .. والجو بدى يغيم ..وهو يسمع زعيق اليهال وهم يربعون لبيوتهم .. بلحظه اللي كان يناظر فيها بنتين صغار دخلن بيوتهن .. سمع حس يدوه تزاعق .. ظهر .. ولقى شمه راكبه شيره اللوز .. ويدوه محتشره ..
حمد :يدوه خليها عنج .. أنا براويها هالسباله .. وسار لها ..
شمه :حمد شسوي ! .. شيلتيه طارت و تعلقت اهنه .. تعال ساعدني ..
بهاللحظه افتر صوب شيره قوم مزنه اللي اغصانها متشابكه مع اغصان شيرتهم ..
حمد ياشر عليها بايده :نزلي انابييبها لج .. نزلي ..
ونزلت شمه وسارت تعاون يدتها وتلم الثياب وياها .. وحمد بلحظة ماظهر الشيله ..وهو ميود الغصن بحذر عشان بينزل .. لمح مزنه تلم الثياب اللى بدت الهبوب تنثرها عالصبّه .. صخ .. خانته عيونه بذيج اللحظه .. تم يناظرها .. وهو يحرك الاغصان عشان يشوفها بوضوح .. ملامحها ماكانت تبين.. بس .. تم يدرس خطواتها وحركاتها .. كانت تربع من الصبّه لين الليوان .. وقفت ترمس ويه امها .. ضحكت .. كانت غير .. عدلت شيلتها وهيه تحرك شفاتها .. حركة صبوعها وهيه تعدل شيلتها خبلتبه .. مالقط شي من اللي قالته .. ومن عقب دشت الحجره .. تم يتأمل المكان دقايق .. وهو بعده منبهر بهالغر اللي ظهر فجأة بحياته .. افتر صوب حس ابوه وهو يزاعق ع اليهال .. ورد صوب حس مزنه اللي ظهرت من الحجره وهيه تزقر امها .. تم يطالعها لين ماخطفت الممر الثاني واختفت عن نظره ..
حمد :آااااااه .. ياويلي من تصاويبج ..

بهالوقت .. حصه ظهرت من بيتهم بتسير صوب لطيفه .. وهيه تسكر الباب .. شافت عيال خوانها وخواتها يلعبون خاري ويه يهال الفريج .. ومسويين حشره .. ولمحت لطيفه توايج عليهم من باب بيتهم ..
لطيفه تأشر عليها .. وحصه تضحكلها: سلامن عليج ..
لطيفه ميوده غشوتها : وين بها ؟
حصه تاشر عليها:مايخصج .. وتسير صوبها ..
لطيفه : حصيص شو اللي ظهرج بهالمهب ..؟
حصه محطيه يديها اليمين بخصرها:والله مايخصج فيني ..
لطيفه تحاول تنشع غشوتها : ايييييييه ارمسي ؟؟؟؟
حصه ادزها : لزي .. بدش .. انتي شو موقفنج هنيه ..؟
لطيفه تتطالع البقشه: شوها ..لمنوه ؟
حصه تسحب البقشه: مب لج .. بس لاتنبشين (وضربت ايدها) عيب عيب .. ماعندنا بنات ينبشون فقشار الناس ..ام خليفه من يومين تتخبر عن مونتها ..واميه عزرت عليه أوديها اليوم وبيتهم الا هنيه خطوتين .. يالله جانج بتخاويني ..!
لطيفه عيونها تلمع: لا والله .. وانا شو حايتي هناك .. سيري روحج ..
حصه :سوده الويه .. نشي ولاتكابرين .. يايتنج من بيتنا لين بيتكم بس عشان تشوفين مزيونج وآخر شي ترديني ..!!
لطيفه مشت ووقفت جدا الشيره وقلبها عورها من نطقت مزيونج : آآآااه يا خليفه .. دخلت القلب ومارفجت بالحال ...
حصه :مالت عليه ..
لطيفه : ايييييه لاتقوليله جذه ..
حصه بنظره هايمه : فديييييت قلبي ..(وتحط ايدها اليسار ع صدرها)
لطيفه تتطالعها: مالت عليج وعقلبج ..
حصه ادزها:ايييييه لاتغلطين هالقلب ملك ناس .. ناس غاليين عليه .. انزين يالله انا بترخص ..!!
لطيفه تسحبها:وين وين .. ؟
حصه : شو وين وين ؟؟.. بيت محمد بوديلهم قشارهم .. يالله فداعه الله ..(وتحط غشوتها)
لطيفه تيرها من طرف عباتها : فديييييييييييييييييتج دقيقه.. بروح وياج ..
وسارن ومن دخلن مالقن حد ..
حصه : هود ..هود .. خالتيه .. وووه محد .. البيت فاضي لطوف ..
تمت لطيفه توايج حجره خليفه من بعيد والشوق مقطع فوادها .. ومن افترن بينزلن من الليوان ظهر لهم خليفه توا داش البيت .. استغرب .. بنتين ووحده منهن شاله بقشه .. صلبن عمارهن من بعد ماكانن يدزن بعض ..
حصه تصاصرها :لطووف ريال .. لحقي ..
لطيفه ساكته .. كنه اول مره تشوفه .. كان لابس قحفيه وسفرته محطينها عجتفه ..تمت تتامل فعيونه .. وتناظره من راسه لساسه ..
حصه :هاه .. وينه السانج اللحين ..!! مااسمع نصخج حتى ..
لطيفه بصوت واطي : حصوه يالله نظهر .. مافيني اخاف امووت..
خليفه : محد ف البيت ..؟؟
حصه تتطالع اربيعتها:هيه .. يمكن خاري الوالده ..
خليفه : اظنيه سارت عند وحده من خواتها .. أقدر اخدمكن بشي .. ( وتم مستغرب من البنت اللي تطالعه ) تراني حاضر ..
حصه : لاالشيخ مشكور .. (وهيه مرتبكه وكل اشوي تتطالع لطيفه) ..اااا .. اذا ماعليك أمر خبرها هالبقشه من طرف ام عقاب ..
خليفه ناظر البقشه .. تغيرت حنايا ويهه .. وعرف انه هذي اخت عقاب .. واللي وياها تظهر لطيفه .. تم ثواني ساكت ومارد عليهن .. هذي اكيد لطيفه .. رفع راسه ثانيه يطالعها .. و لطيفه نفس الشي .. ترفع راسها وتنزله .. وحصه ضايعه من بين نظراتهم .. مشت ولحقتها لطيفه ميوده طرف عباة حصه .. وخطفن من جداه .. بلحظه اللي مشت لطوف من جداه ..افتر بطرف راسه صوبها لااراديا .. يريد يعرف السبب ..! ولطيفه حست بحركته .. وهيه غصبن عنها افترت وراها تتطالعه .. هو ليش يطالعني جذه !! من تلاقت نظراتهم .. نزل ويهه .. بهالثانيه وهيه تتامل بعيونه قرت بها كلام كنه يبي يقول شي ! .. لمحت لمعه حاده بعيونه .. جان تنزل ويها و سحبتها حصه من ايدها ومشن .. ولطوف ماودها خاطرها تتخبره شو بلاه ؟ من شو يشكي ؟ يريد حد يسمعه ..؟
خليفه منزل راسه :بنت علي .. ممكن ..(وسكت ..وهن افترن صوبه لانهن من ثنيناتهن بنات علي .. هو من بعد ما انتبه لهالشي وبصوت عذب) .. لطيفه بغيتج برمسه .. (وتم مرتبك ومب عارف يركب جمله وحده وحصه تتطالعهم وحست انه اللي واقف جداهم مب خليفه اللي يعرفونه ..بنظره اعيونه وبحركاته العفويه )
لطيفه بهاللحظه دارت الدنيا فيها وانقلب كيانها كله .. يزقرني باسمي !!.. حست بصوته المخنوق .. اللي حرك مشاعرها من يديد وهيه مرتبكه :لبيه ..
خليفه منزل راسه ويتردد صوتها ف باله من قالت لبيه .. : ( اطالع عيونها ) ليش ماتبينيه .. ( نزل ويهه ) .. عاني ليش رديتونيه .. ؟
لطيفه تمت امبهته .. العبره خانقتنها .. تمت ساكته ماعرفت بشو ترد عليه !!! بلحظه سكوت لطيفه وخليفه يتريا جوابها امه دشت عليهم وحلفت الا تفاولهم ومايظهرون من غيرها .. وخليفه من حس بدخلت امه دخل حجرته يغير ثيابه .. والبنات حالتهم محد يعلمبها غير رب العالمين ..
وهن يالسات ف الليوان وام خليفه تاخذ علومهن .. وخليفه بحجرته يتحرقص .. ياااااربيه ليش قلبي يدق جذه من ريتها ..!! وعقب ظهر وهو يعدل فروخته ..ويلبس نعاله ويحاول قد مايقدر انه مايحطي عينه عليها ..
خليفه :اميه ..
ام خليفه :اييك العون ..
ولطيفه تتطالعه ودمعتها متيمعه في محجر عيونها ومتعذبه بشوفته .. آأأه .. غير ..
خليفه يعدل فروخته: عانج الرحمن .. (وسكت اشوي ) ..الا بغيت اتخبر بنت علي شعنه ماتبانيه ..؟
حصه ساكته .. ولطيفه قلبها معورنها واااايد ..
ام خليفه : فديتك .. نصيب ..
خليفه بألم: لالالا صدق ارمس ؟أريد سبب ؟
ام خليفه تتطالع لطيفه وهيه تبتسم :مستحيه بنت علي ..
خليفه : الشيخه سامعه عني شي ولا شايفه بي عيب ولا نقص ..؟
ام خليفه تحول نظراتها مابين البنات وولدها: اشهالرمسه اللي ترمسبها جدا البنيات .. عن التحرطيمات قم اقبظلك مونه .. يالله نش نش..
خليفه ومن عقب مالقى الجواب ظهر وهو مكسور الخاطر ..
ومن ظهر وعيون لطوف عليه دخييييييلك لاتروح ..!! .. لمحت بعيونه نظره الحزن .. تموت لطوف ولاتكون سبب حزنه .. وحصه كانت حاسه فيها .. وبصوتها المخنوق ..
وخليفه من ظهر وهو متكدر .. ليش رفضتني فيني شي غلط وانا مااشوفه ؟؟؟ سار يدور سعيد ولقاه يالس عند البحر .. وكلن يشكي حاله .. ولطيفه من ظهرت سييده راحت بيتهم وحصه وياها وتهديها وتسكتها .. تمت تصيح وتصيح بطريقه مب طبيعيه .. خلاص يعني كل شي انتهى !!.. خليفه راح !!

شمه ومن عقب ماحطت الجاهي .. يلست جدا ابوها وصبتله جاهي وصبتلها وتمت تشرب فيه وهيه تسمع سوالفهم .. وهيه تسمع رمستهم ظهرت من عندهم تربع صوب اخوها حمد اللي كان يعدل باب من بيبان بيتهم ..
شمه تربع صوبه: حمد .. حمد ..
حمد يدق المسمار: شو فيج ياشمه تزاعقين ؟
شمه محطيه طرف صبعها عثمها : ماسمعت شو سمعت !!! .. يدوه وامايه يرمسون عنك ..!
حمد يمسح يبهته بطرف الازديري ومب مهتم : وشو يقولون ..؟
شمه : يبون يخطبولك عليا ..
حمد اطالعها :يخطبولي !!! تعالي تعالي شو سمعتي ..؟
وخبرته كل شي ..
شمه:هيه .. لانهم كانو يرمسون عن خطبة ولد خالي.. و عقبها امايه شاورت يدوه وأبويه تخطبلك بنت اختها .. هذا اللي سمعته وفهمته من السالفه ..
حمد يتم يطالع حجره قوم يدوته دقايق .. وعقب عادي كمل شغله ..
شمه تحط ايدها عيبهتها من الشمس :حمد انته بتعرس بعليا ..؟ أنا مااريد عليا تكون ويانا ف بيتنا ..
حمد اطالعها : انتي شعرفج بهالسوالف !! وبعدين مب زين ترمسين عن بنت خالتج جذه ..
شمه بحزن: ومزنه ..
حمد استغرب : شوه بلاها مزنه ؟
شمه منزله راسها: أنا أريد مزنه تكون حرمتك ..
حمد: شو هالرمسه !! شو حرمتك ماحرمتك .. انتي من وين متعلمه هالرمسه ..!!
شمه نزلت راسها وسكتت ..
حمد يطالعها :يالله فارجي أشوف..!وروحي درسيلج فكتاب ابركلج ..
ومشت شمه وهيه ساكته ..
حمد:شمووووه ..
شمه افترت صوبه:لبيه ؟
حمد يطرق المسمار:هاتيلي ماي شرب ..
وسارت شمه وهيه حزينه الملامح ويابتله الماي ومن عقبها سارت بيت مزنه .. وهيه داخله شافت سعيد يالس يسقي النخل .. وهو يطالعها اتذكر ميثه ..آاااه كنه ربي يعاقبني ..!! خطفت من عنده بدون لاتسلم .. وهيه تركب الدري ..شافت بوسعيد يتوضأ لانه اللحين بياذن العصر ..وهو من شافها تم يرحببها ويبتسملها ..
بوسعيد :مرحبا الساع ببنت سعيد .. مرحبا ب الشيخه شمه .. شيخة البنيات ..
شمه تبتسمله وهيه مستحيه ودخلت حجره مزنه ولقتها ترتب اغراضها ..
مزنه وهيه تضحك ع شكلها :هههههههههههههه شو بلاج ؟
شمه انسدحت عالفراش : ماشي ..
مزنه : شكلج اتلاسنتي ويه مانع .. ولا تضاربتي ويه الدماني ..
شمه تتذكر مانع: هههههههههههههههههههههه اصلا مانع من هزبوه عيال عمي ماريته ..
مزنه :عيل ..؟
شمه : اليوم سمعت امايه تخبر يدوه عن اخويه حمد .. تصدقين مزنوه تبا تخطبله عليا ..!!
مزنه رفعت راسها صوبها من بعد ماكانت ترتب اغراضها: عليا بنت سيف .. !!
شمه بحزن :هيه ..
مزنه :انزين ...
شمه :ماادري .. بس اللي اعرفه انه عليا منزمان تامه فخاطر امايه وتباها لاخويه حمد .. سمعت اختيه عفره تقول هالرمسه ..
مزنه حست بغصه وسط قلبها :وحمد شو رايه ..؟
شمه تصلب عمرها : ماعرف .. بس انا وميثه محطيين فبالنا انتي لاخويه حمد مب عليا .. وميثه من قريب رمست خواتي بهالسالفه .. بس شكلهن ماشاورن هليه ..
ومزنه ساكته ..
شمه : مزنوه .. احس انه حمد اخويه ..يبيج انتي حتى دوم يتخبرنيه عنج .. وكله من اطريج يتم يتخبرنيه ومايفج عني ..
بهاللحظه نشت مزنه تخاف لا تفضحها دمعتها اللي متيمعه بعيونها .. وتمت تشغل عمرها باشيا .. وشمه ترمس وتقول اللي بخاطرها .. ومن خلصت انتبهت انه مزنه مارمست ..
شمه : مزنه أنا يالسه أرمس وانتي ماقلتي ولا كلمه ؟
مزنه تكابر: ماعندي شي اقوله ..
شمه :انا ادري انج منجذبه لخويه حمد وايد ..
مزنه رافعه حيّاتها: لا .. من قال ..؟
شمه :عيل هو وايد يتخبر عنج !!
مزنه اطالعتها بنظره شموخ : يبيها .. ياخذها ..
شمه : هو مايتخبر عنها !! .. بس انتي ..من ميثه تنطق باسمج يستحي ومايقدر يرفع راسه صوبنا نحن البنات ..
مزنه بصوت عالي اشوي: شمه .. دخيلج خلاص ..
شمه استغربت منها وتمت ساكته هذي اول مره تحرج عليها مزنه .. تمت ساكته ومويمه عن خاااااطر ..
مزنه حست بسكوتها :شماني حبيبتي مب كل سر من اسرار بيتكم تظهرينه برع البيت ..
شمه اطالعتها بنظره : لاوالله ..!!
مزنه تبتسم وتسير صوبها :حبيبي والله .. بس هذي اسرار الاهل المفروض منج انج ماتخبرينها لحد .. حتى انا لازم ماتخبرينيه ..
بهاللحظه نشت شمه مغيضه وهيه تعدل شيلتها .. ومزنه ترمسها وشمه تجفيها ..
مزنه مغيضه من دلع هالياهل :شمه حرام عليج ..!! يالسه أرمسج أنا ..
شمه وهيه تلبس نعالها :قوليها .. قولي انه شمه وشايه وتخبر كل حد ..
مزنه حطت يديها اليمين عخصرها: لاء .. الشيخه شمه مب ع كيفج تفسرين رمستيه..!!
و شمه لابستنها عن خاطر وظهرت .. ومزنه ماتعرف شو استوابها من قالت شمه ذيج الرمسه وحطت حرتها كلها بشمه .. وهيه تسكر الباب بقوه ..
مزنه وهيه تمشي: بزواله هو واللي بتظويه.. من حلاته ..باااااااااااااارد ..
وشمه وهيه داشه البيت شافت ابوها واخوها حمد سايرين المسيد .. دخلت وسارت تتشكى ويه ميثه ..

في مره من المرات .. الروّاح .. وعقب ما خف الغيث .. ظهرو اليهال والبنات الصغاريه وعيال الفريج صوب البحر كالعاده .. وكانت من بين هالبنات .. شمه .. كانت تلعب بالرمل الابيض ويه ربيعاتها اللي استوا طين رطب عشان المطر اللي تم يصب ثلاث تيام متواصله .. بلحظه .. كلهم افتروا صوب الاولاد اللي كانوا يلعبون ف البحر ..
مانع يزاعق: أحماااااد ..أحماااااااااد البحر بيشله ..
وباجي الاولاد يزاعقون وياه وينادون كل حد ..ويربعون من كل صوب ..
وشمه من شافت أحمد وهو يبتعد عنهم .. تمت تزاعق .. وصريخها يصم الاذون .. والصغاريه يهدون فيها .. بس هيه دقايق وشافت كل حد ملتم عند البحر .. سواء من الشبيبه و الشواب .. واليهال .. وحرمتين كانو يقضن حايتهم ومن عقب قربن صوب اللمة وهن يتصايحن .. بس ولا واحد منهم قدر انه يسووله شي .. لان البحر بدى يثور أكثر واكثر .. و احمد بدى يبتعد ومره يبين ومره لا .. والتعليقات ماتوقف .. راح الولد .. ولد من هوه ؟؟ لا اله الا الله .. ان لله وانه اليه راجعون .. ومن بين هالشبيبه كان قايد .. راحتله شمه وهيه تمسح دمعاتها تتخطا لمة الناس ..
شمه تيود ايده: دخيلك سو شي ..
قايد اطالعها ومارد عليها .. كان يطالع الوضع وشمه ترمسه وهو لابسنها ..
شمه : حرام امه تترياه ف البيت حتى اخوانه وخواته .. حرام ..
قايد :خلاص ..راح ..
شمه وهيه تتطالع البحر: لا دخيلك لاتقول جذه ..
واشوي سعيد وخليفه يجبلون صوبهم .. ويدخلون ف البحر .. ومن عقبهم عقاب ..
واحد من الشواب: بتنفذون روحكم .. البحر غير مساره ياعيالي ..
الثاني :برايهم برايهم .. هاذيلا هم مخوة شما .. ظهروا اللحين .. سعيد بن راشد .. واربيعه خليفه بن محمد ..
واحد من الشباب وهو يراقب: كنه الولد ظهرت روحه ..!!
الثالث وهو يرمس الشبيبه: وانتو شو حايتكم هنه !.. يالله اشتلو ماتنفعون بشي ..
قايد : عمي جان كنت أخير عنا و فريت بعمرك ..
الشيبه بعصبيه: يوم انته بشبابك مافازعت .. تباني انا اليهد هد حيلي ..وقد ابوك افر بعمريه ف البحر .. أبوك مادرابك ولابرمستك ؟؟؟
الثاني بعصبيه وهو يطالع قايد بنظرات: حشم ..
وظهر قايد عنهم ..
وشمه ربعت بيتهم وهيه تصيح ..
يدوه ظبيه: بنتي عيني من الله خير .. الولد ماعليه شر ان شاء الله .. شعندج شاله البيت بصياحج ..!!
شمه تصيح: يدوه انتي ماشفتيه شقى يزاعق .. والله قلبج بيتقطع عليه ..
مريم: شموه توا راشد يخبرنا الولد طلعوه و حي يرزق قولي الحمدلله ..
شمه تصيح : المنظر يروع وهو يروح عنا .. والله يخوف ..أنا مره ثانيه مابروح البحر .. مابروح ..
يدوه : بتخبركن ولد من هوه ؟

ومن وصل الخبر لشيخ الفريج .. امر عليهم بمكافاه ماليه .. والشيخ علي كان مفتخر برجوله وشهامة سعيد وخليفه خص سعيد ..

وعقب يومين ..

وفي ميالس الشيخ علي ووسط الرياييل ..
الشيخ علي: تدري يابو سعيد .. فخاطري رمسه تخص ولدك سعيد ..
بوسعيد مستغرب: تخص ولديه !! خير يالشيخ .. سعيد مسوي شي ..
بهاللحظه ضحك الشيخ علي : بلاك ياراشد .. استهدي بالله .. انته تشك بولدك .. سعيد ولدك ماشاء الله عليه مامنه ثنين لا باخلاقه و لا بمعانيه.. هيه والله ريال ينشد به الظهر سعيد بن راشد ..
بوسعيد متشقق من الفرحه: عيل شو اللي فخاطرك من صوبه يالشيخ .. تراني حاضر بلي تامرنا به ؟
الشيخ علي : طالب نسبكم وقربكم .. أريد ولدك سعيد لبنتي حصه ..

..

مرت الايام والشهور ..

ميثه تعافت وملج عليها قايد .. وسعيد تغير حاله للأسوأ .. انهارت نفسيته من عقب ما ملجت حبيبته .. وقام سعيد ثاني .. وخليفه ولطيفه يكابرون .. وحصه تعيش على الأمل .. وعقاب عايش ع بقايا ذكريات ميثه .. وحمد خطبوله مزنه ..

ميثه تربع وتحط المدخن ع طرف الدريشه وتدخل الحجره: سلاااااااااامه .. ياويلي من حمد .. دخيييييييييلج لحقي عليه ..
سلامه ترضع سعيد: شوه فيييييييييج ؟فلختي ولديه ..
ميثه بنظره خوف وتيلس عالزوليه:ريت نعال ريال ف الميلس .. !!
سلامه : ميثه .. قصري حسج سعيد اضايج ؟
ميثه ترفع قصتها وتريد تستوعب: سلامه ريت نعال ريال أقولج .. نعال بوصقف ..!
سلامه : انزين والمشكلة ؟
ميثه مب مستوعبه وهيه تتطالع شعرها و بخوف ..بصوت واطي ..: كنت ادخن صوب الميلس وانا جذه ..!!(وأشرت على شعرها) ..
سلامه : حلااااااااااتج والله وانتي فاله شعرج .. اكييد فلختي الريال !!!
ميثه :حرام عليج لاتزيدين عليه .. روحي متفشله .. مففف (وتلم شعرها) ..
سلامه :يمكن حمد ولا ابويه .. ولا جان يدوه خبرتنا مانظهر خاري ..
ميثه تنش وتروح صوب الدريشه وتوايج: ماحيد حد منهم عنده من هالنعله .. يااااااربييييه .. الغريب شافنيه .. يالله تغفر لي وتسامحني ..يالله والله ماقصدت ..
بهاللحظه دخلت عليهم شمه: ميثوووه .. يدوه تزقرج ؟
ميثه :شموه منوه يالس عند يدوه ؟
شمه توها بتظهر: ريلج !!
سلامه شافت الجمود باختها : والله..!!! هههههههههههههههههههههههههههه ..
ميثه صخت و وملامحها تغيرت ..شمه تيلس حذاه سلامه : روحيله ..يتخبر عنج ..
ميثه تناظرها: لمي ثمج ..
شمه بغيض : .. من زينج عاد .. بطره ع الفاضي ..
سلامه تضحك : الغلا الغلا ..والله يديم الغلا .. الله يهنيك بي والله يهنيني .. والله يديم الغلا مابيني وبينك ..
ميثه تفتر عنهم وتروح صوب الدريشه وتوايج ع الحوي ..
سلامه :ساعة اشوفك يزين الكون في عيني .. واشوف كل المحبه تنطق بعينك ..
ميثه افترت صوبها:قااايد !!! والله ماطرالي هالشيفه ..
شمه تيود صبع سعيد : ماتقصدج انتي وقايد .. تقصد سعيد ..
ميثه من سمعت اسم سعيد تمت تتطالعهم وهيه ساكته ..ذكروها باللي مضى ..آاااه يالله ارحمني ..
سلامه تاشر بصبعها ع الميلس ..:ان غبت عنك دقايق تشتكي بيني .. وان غبت عني يصيح الشوق بي .. وينك؟ مااقوى فراقك دخيلك لاتخليني .. مادام قلبي أمانه بس في يدينك ..
ميثه تلم شعرها ع طرف: أنااااا !!!! ايخسي والله ..فقدتج انتي وهو ..
يدوه ظبيه :ميثه ..
ميثه اطل من الدريشه:لبيه يدووه ..
يدوه ظبيه تأشر عليها:اندوك !!! .. ارفعي كشتج عن تصب فعيونج ولحفي شعرج ..
ميثه تضحك وتنعش بشعرها يمين ومره يسار ..
يدوه ظبيه :ريلج بالميلس .. لحقيني ..
ميثه ميوده الحدايد : شوه شوه ..؟
اطالعتها يدوه بنظره ..
ميثه تظهر من الباب: مففففف .. يدووه من قريب ظهرت له !!.. شو صدق عمره هو كل مره يعفد بيتنا و يباني اسلم .. مفف عاد مب كل مره ..
سلامه شاله ولدها سعيد : أي قريب .. حرام عليج ميثوه حسيبه اشوي ..ريلج من ثلاث اسابيع سار اييب السمان .. لازم تتحمدين له بالسلامه ..
ميثه : ثلاث اسابيع مب وطر مففف!!(ويلست عالتكيه ) قولوله ميثه راقده ..
شمه: عن التحرطيمات يالله نشي ..
ميثه تتطالع اختها بنظره: عاشو اطاع منوه يتأمر .. ما بقى غيرج يأمر عليه ..ياهل ..
شمه ترد لها النظره: امره مطيحتني من عينج ..
ميثه : جب جب ترا والله ان مااتسنعتي برمستج لأخبر بج ابويه ..
سلامه يالسه تتطالعهم والضرابه بدت تشب من بعد ماكانت سوالف :اييييييييييييييييييه بس ..
يدوه ظبيه واونها بتضربها : حسبيه الله عليكن من بنات ماحشمتن الساع ..ميثوه ..نشي نشي اقولج ..
ميثه تنش بسرعه وتروح ابعيد عنها :انزين ..انزين ..
وتدخل الحجره وتسحب لها شيله .. ومن دخلت ميثه الميلس تعمدت انها تسلم بدون لاتمد ايدها .. تخطته وهيه تمشي بكبرياء وخيلاء وغرور واضح ..وسارت يلست ف آخر زاويه في الميلس ابعيد عنه .. وقايد يطالعها وبياكلها بنظراته .. ومنقهر من حركاتها .. هذي شو مشكلتها على شو شايفه نفسها !!!
قايد : اشحالج .. ؟
ميثه من غير نفس: نحمد الله على كل حال ..
قايد وهو يطالع الفنيال اللي بايده: أمسات وصلت الدار ..
ميثه :هيه .. الحمدلله ع السلامه ..
قايد:ربي يسلم روحج و اعروق قلبج من كل شر ..

وهيه كارهه المكان اللي يالسه فيه وتمت تتافف .. والدقايق تمر بطيئه كنها دهور مب الا دقايق .. وميثوه مافترت صوبه ولا بنظره حتى ..وهالشي حسبه قايد وتم متغيض منها .. ويدته ترمس وياه وقايد عقله وتفكيره كله ويه ميثه .. وخاطره يعطيها من ذيج النظرات اللي تقهربها ..
قايد وهو ينش: يالله الغاليه انا اترخص تامريني بحايه ..؟
يدوه نشت من نش قايد وحتى ميثه صلبت عمرها ..يدوه: مايامر عليك عدو فديتك ..الا رد السلام لهلك ..
قايد افتر صوب ميثه : بنت عمي تامريني بشي ؟
ميثه انتبهتله .. متغيره لون بشرته وهيه مرتبكه: شوفتك سالم ..
قايد: ومن قال سالم عسى .. يالله فمان الله
وظهر ومشت وياه يدوه .. وميثه ظهرت وراحت حجرتها ..
ميثه تعق شيلتها : مفف قاهرني بنظراته..
سلامه : ماظن شي حبيبي عنك يغنيني ..كل يوم يكبر بعيني حسنك وزينك .. مزيون وصفك وسيد في المزاييني .. واحب طبعك وطيبه قلبك ولينك ..
ميثه : مب ميثه اللي تهمها الاشكال .. أونه شو ؟؟؟ أمسات وصلت الدار ... انزين والعافيه !!!!
شمه تركب دري الليوان: ميثووه هذي صوغتج ..
ميثه : شووووووو ..
*للتنويه:كلمات الشاعره الجوري الناعس ..

ووقايد من ظهر سار يتشكى عند اخوه عبدالله .. تقهر بنت عمك تقهررررررر .. وسلامه سارت تعاون امها ف العريش وشمه ظهرت من الحجره وهيه تمشي لقت حمد يالس تحت شيره اللوز .. وتمت تراقبه ..شو يسوي ؟؟؟ وسارت تخبر ميثه وتمن يراقبنه من الدريشه ..
حمد كان محطي خشبة عود وغرشه عطر في المكان اللي تعودو يراسلون فيه بعضهم .. ومن بعد ماأمن المكان سار الليوان .. ولقى شمه تضحك اما ميثه فكانت ساكته وهيه تلاعب سعيد بس نظراتها كانت غير ..
حمد مستغرب: شو فيكن .. تظاحكن ..؟
شمه وهيه تضحك: ماشي ..
ميثه تذكرت سعيد وتمت ساكته وتفكر ..
حمد يطالع شمه : والله بهالنعال عيبهتج !!!
شمه : ههههههههههههههههههههههههههه ..
حمد واقف عند الباب ويعدل سفرته:عدال .. عدال .. عن اطيح ضريساتج وتتناثر عالزوليه ..
وسعيد كان يالس عند البحر .. وخليفه كان وياه ..
سعيد : كل اللي استوالها بسببي .. انا تخليت عنها ..
خليفه يطالعه: سعيد .. انته ماتخليت عنها الا لسبب واحد .. عشان هلها .. عشان ترضي هلها .. رضا الوالدين من بعد رضى الله سبحانه وتعالى .. ربك بيعوضك فيها ان شاء الله ..
سعيد :خليفه .. القلب يبي ميثه ومايشوف غيرها ..
خليفه بحزم:انته نادم انك خليتها تسمع رمسة ابوها ؟
سعيد :ما دام ضاع الأهم .. وش لي بقى أندم عليه .. !!!!! ليتني مت قبل مااشوفها تنزف لغيري ..
خليفه : وسالفه الشيخ علي ؟
سعيد : أنا بنت الشيخ علي ما أريدها .. حرام أظلم البنت وياي .. وأنا عقلي وتفكيري بميثه .. ومب أي بنت .. اريعتها ..
خليفه : ميثه ماخذنها ولد عمها ..
سعيد اطالعه بنظره: مب لازم تذكرنيه ..
خليفه :لا بذكرك دام هذي رمستك ..
سعيد بحزم :خليفه دخيلك ..(وافتر براسه عنه )
خليفه : شو خليفه دخيلك ؟؟؟ خل ايمانك بالله قوي .. ماحيدك جذه .. وين سعيد اللي اعرفه !.. اللي كانت الضحكه دوم ماتفارق محياه ..! بنيّه تهزك !! بنيّه ..!! الله يعينك اذا وصلت لهالحال ..
بهاللحظه نش سعيد وهو متغيض من اربيعه اللي مايحس ..
خليفه ينش: وين ابها ؟
سعيد : بحفر قبري بايدي..
خليفه بغيض: شو هالرمسه !!!!!!!!!! ..
سعيد مفتر عنه وبحزم: انته ما جربت الاحساس ياخليفه .. وماظنك بتحس بي ..و انا عاذرنك ..
خليفه : مب لازم اجربه .. و لو جربته ..ايخسي ومليون ألف مره بنّيه توصلني لحالتك .. نفسي عزيزه وماارخصها لاي بشر فهالدنيا ..
سعيد يطالعه: وبنت علي يوم خطبتها فوق ثلاث مرات وهيه تصدك .. ماذقت الذل منها ..؟؟
خليفه وهو منجرح من رمسه سعيد : كنت اريدها حليله.. نصيبها ويه غيري .. الله يوفقها
سعيد : وقدرت تخطبها اكثر عن مره وهيه تردك ؟؟
خليفه : وشو لها هالرمسه اللحينه !!!!!!!!!!!!
سعيد : أريدك تحس بي ..
خليفه : الوضع مختلف .. وضعك غير عن وضعي ..
سعيد : خل عنك .. كلن يرثي حاله ..
خليفه : تعرف .. مرات احسبك انسان ثاني مب اربيعي اللي اعرفه ..
سعيد : مااعتقد سعيد اللي تعرفه بيرد لك مثل ماهو .. !!
خليفه باصرار: سعيد بن راشد عمره مابيضعف بهالسهوله لو شو ماصار بهالدنيا .. انا اعرفك زين ..
وسعيد يالس يتعذب بصمت .. ويحس بعمره تايهه محد له بهالدنيا من عقب ما خسر معشوقته ..

تسأل الروح فجاه عنك وينك ؟وجاوبها بدمع من عيوني ..

يالبعيد وشوفتك صارت محال ودي اشوفك ودي اندهلك تعال .. حاولت اصبر واداري بالدمع طفيت ناري حاولت انساك لكن هذاا اخر احتماالي .. يالبعيد وقلبي بعدك ماعرف طعم الهنا لوغبت لحظه اعاني كيف لوغبت سنه .. وين ادورك يالبعيد حرت من هذا السؤال .. والله ماغمضت عيني من رحت لليوم ساهر عايش بحيره عذابي تلعب بحالي الخواطر .. مره اشوفك مره تبعد حرت من هذا السؤال ..حاولت اصبر واداري بالدمع طفيت ناري حاولت انساك لكن هذاا اخر احتمااااااالي
*للتنويه :مب عارفه كلمات منوه بس تغنابها ميحد حمد ..
سعيد كنه يرمس روحه ..وبصوت واطي ومبحوح :مشتاقلها ..والله ماتتخيلون شو عنت لي هالانسانه وشو تعنيلي وبتعنيلي ..
خليفه مستهم على اربيعه وحط ايده ع جتفه : نروح المسيد ونصلي ركعتين ..
لين ما مر عليهم عبيد اللي يحرس الحدود والفريج ..
عبيد وهو شال الفنر: من هناك ..؟
خليفه بصوت عالي: هذا نحن ياعبيد .. لاتخاف لاتخاف من هل الفريج..
عبيد : شو تسوون عندكم ..!! ردوا بيوتكم الدنيا ظلمت .. وسار ..

باجرها عالضحى يتهن البياعه اللي تبيع مخورات وشيل بانواعها وبراقع وكل اللي يحتاينه الحريم .. والبياعه يالسه تستعرض اغراضها وكل بنات بو حمد ملتفين حولها حتى يدوه وام حمد ..
يدوه ترمس البياعه: بنتي انتي شو من القبايل ؟ووين دارج سارحه بمونتج اروحج ؟
البياعه تضحك: خالتيه انا من فريج الشيخ حارب وسارحه ويه ابويه امبونه يبيع ويبادل بسامانه هنيه عندكم ف الدكاكين ..
يدوه: هيه والنعم بج بنتي ..
ام حمد : بنات من عقب ما تخلصن طرشوها صوب اختكم مزنه .. يمكن محتايه ..
سلامه : لاتحاتين امايه حرمة ولدج بيوصلها كل شي ماعليها قاصر ..
شمه : هيه تراها مزنه بنت راشد ..مب أي وحده ..
ميثه: ماعليج امايه هيه روحها تحوط كل بيت ..مب الا بيتنا ..
مريم : ع طاريه مزنوه .. ماسمعتن اخوها خطب ..
سلامه افترت صوبها: سعيد !!
عفره : فديتج ميثووه .. اندوج هالثوب الثريا ..
افترت ميثه صوبها واختفت البسمه من شفاتها ..
عفره تمد بالثوب: ميثانه ..
ومسكت الثوب دون ماتنتبه له وتمت تتطالع مريم شو بتزيد على رمستها .. ؟ سعيد بيعرس !!! .. كيف ؟؟؟
يدوه : هالرمسه استوالها اسبوعين وازيد عن اسبوعين .. الا أي وحده من بناته خبري فيهن معرسات كلهن ..؟
ام حمد: مابجت الا الصغيره بعمر بنتي ميثه ..
يدوه ظبيه: لا عيل هذي هيه ..
شمه : هههههههههه الطفس ولاخبرنيه ..!! يستحي اونه ..أنا اشوفه ذاك اليوم يالس يكتب قصيييد .. ثره للخطيبه ..
وميثه ..صاخه وما علقت .. بياخذ حصه اربيعتيه !! لالا هم مايعرفون انهم يالسين يذبحونيه بهالرمسه .. السالفه اكثر عن اسبوعين ..!!! نشت عنهم .. ومحد لاحظ هالشي .. كل وحده مرتبشه بالاغراض اللي بتاخذها .. حتى شمه كانت عايبتنها شيله البخنق ..تمت تستعرض فيها وتراويها لامها ويدوتها ..
ميثه تمت فحجرتها منصدمه من كلام هلها .. سارت شبريتها وانسدحت و تلحفت وهيه فاجه اعيونها على وسعهن .. تريد تصيح بس مب قادره .. و ليش اصيح ؟؟.. هو ليش يريد يعذبني ؟ ليش حصه بالذات ؟ حتى انا بعرس وبكون لغييره ..! ليش هالأنانيه اللي فقلبي .. يعني بيتم بلا عرس !! .. وين الوفى ياناس ؟ كل الرياييل جذه ولا في ناس تحب بصدق ..! أريد أكرهه أكرهههههه..؟ ليتني ماحبيته ولا عرفته ليييتني .. ليتني مت قبل مااعرف انك بتكون حليل اربيعتيه .. !! بيمسك ايدها .. بيضمها لصدره .. بيقولها كلام .. حست بعمرها محتااايه لمزنه واااايد بهاللحظه ..
وعقب رقدت ع طول ..

..

ومزنه من رمس فيها حمد ماقامت اطب بيت قوم ميثه حتى ميثه من ملجت ما قامت تظهر الا بوجود امها او يدوتها .. حتى فوق السطح ماقامن يتشاوفن .. وشمه توصل اخبارهن لبعض ..وميثه من سمعت بخبر سعيد قامت تتحاشى قعدات خواتها .. وتكابر بشكل مب طبيعي ..لانها لين اللحين ماصاحت وهيه مستغربه من روحها ..
باجرها ميثه ساكته وماترمس .. تمر عليها ايام وهيه ساكته .. بس محد لاحظ عليها لانها من مرضت وميثه غييير وهالشي اللي حسته يدوه ظبيه ودوم تتشكى عند ولدها لكنها تعودت .. وحتى ام حمد تقول ضحكه ميثه مب الضحكه الاوليه .. ميثه عقب الغدى سارت السطح عشان اتييب تبّ المالح اللي مسويينه يدوه وام حمد من ثلاث شهور ..وهيه تشل التّب افترت بتنزل .. سعيد شافها .. بهاللحظه بس طاحت عينها ب سعيد .. جان تحط التّب مكانه من الصدمه بشوفته .. وسعيد اطالعها ومن عقب نزل ويهه ومشى واختفى فجأه عن عيونها .. وميثه واقفه مكانها .. لانها اول مره تشوفه من عقب شهور من مرضت وهاليوم اللي شافته فيه فما قدرت تمنع عيونها من شوفته .. تذكرت الماضي .. تذكرت حصه .. كرهت هاللحظه ..كرهت نظرتها له أكثر .. لانها ملك لقايد .. يعني مب حره .. بمجرد ما تفكر به تحس بعمرها خاينه .. تخون بتفكيرها وبنظراتها .. ولانه لحصه ملك اربيعتها .. وسعيد وهو ينزل من الدريات دق بمزنه اللي كانت تمشي ف الممر ..
سعيد : السموحه ..
مزنه تتطالعه: شو فيك ..؟
سعيد ما رد عليها ودخل حجرته ع طول ..
..تنهدت بألم وشلت التّب .. وهيه تنزل من الدريات ..
ماقدرت تمنع عمرها من التفكير بسعيد .. من سمعت بخطبته ولحد اليوم وهيه متكدره ومب قادره تتغلب على هالاحاسيس اللي تتضارب فيها .. وعالمغرب .. محد كان ف البيت غير ميثه .. وشمه كانت ويه مزنه .. ويدوه وام حمد سارن يفازعن الحرمات لانه وحده منهن بتربي .. وقايد توا مخلص من صلاته وهو يمشي ف السكه شاف سعيد يمر بسكه قوم ميثه .. تم يطالعه لين مااختفى .. وهو منقهر سار بيت عمه سعيد .. وميثه توها مخلصه من صلاتها .. وسمعت دق عالباب .. سارتله ..
قايد : السلام عليكم ..
ميثه فتحت الباب: وعليكم السلام .. مرحبا الساع ..
قايد : انتي ليش تفتحين البيبان .. وين شمه عنج ..؟
ميثه مستغربه: شوه ؟؟
قايد : لاوالله !!! بكل برود تقولين شوه ؟؟ (ودفر الباب بقوه ودخل) ..
ميثه لزت ع طرف: انته شو مشكلتك ؟؟؟
قايد : روحي ازقري عمتيه ولا يدوه .. وحده منهن ..(ومب قادر مايناظر عيونها الذبوحيه) ..
ميثه : محد كلهم خاري ..
قايد بنظره حاده : توا حد دق عليج الباب ..
ميثه تتطالعه: انته شو تقول !!!!
قايد بصوت عالي: ارمسي ..
ميثه بعصبيه: ليش تصرخ فويهي ..!!
قايد بعصبيه: بترمسين ولا ....!
ميثه محطيه ايدها اليمين ع خصرها: شو شايفني مضيعه المذهب ..!!
قايد بصوت تحذيري وواطي: ميثه تراني مااشوف حد جدامي من اعصب ..الشيييمه ارمسي عدل ..
ميثه تتطالع فعيونه: لا ..
قايد تنهد بصوت مسموع: اسمعي مااريدج تقربين صوب هالباب موليه .. تسمعين ..
ميثه افترت عنه وهيه مغيضه: لا الشيخ .. أوامرك مب عليه .. بعدك ماخذيتنيه عشان تحطني عبيده لك ..
قايد بهاللحظه اتجدم صوبها ومسك يديها بقوه وبطريقه عورت يد ميثه وايد ..
قايد :انتي ليش تتلذذين فعذابي ..!! ليش ؟؟؟؟
ميثه: ايدي تعورنييه .. قايد لا .. ايدييييييييييييييي .. لااااا .. هد ايديه ..
قايد يسأل عيونها: خاطرج تشوفينيه بنعشي ..
ميثه وعيونها انترسن دموع: انته تعورنيه ..
قايد من شاف نظره عيونها الذابله .. ثواني وعقب هدها .. وبدى قلبه يضعف جدامها ..
ميثه تيود ايدها: اكرههههههك ..
قايد يطالعها: فديتج والله .. ليتج تحسين بي ولو اشوي .. والله أحبج ..
ميثه ودمعه ساخنه طاحت من عينها اليمين: وانا مااحبك .. ماحبك ..(وافترت عنه وتمد بطرف صبوعها وتمسح دمعتها )
قايد بحنيه: انتي تصحين ؟
ميثه افترت صوبه: دخيييلك طلقني ..
قايد انصعق من هالكلمه .. تم يطالعها بنظرات .. ومب عارف شقى يتعامل وياها ..
ميثه وهيه تمسح دمعتها: مااقدر اعيش وياك ..
قايد منقهر: هيه عشان تتفيجين لخليلج !!!
بهاللحظه ميثه رفعت راسها .. خليلي !!!!!!!!!!!! .. وقايد تم يطالع بعيونها اللي كانت تنطق باكثر من أكرهك .. نزل راسه وظهر ..
وميثه لحقته لين الباب : تعااال طلقني اللحيييين ..!!
وهو طالع دخلن ام حمد ويدوه .. شافو ميثه يالسه ف الليوان وتصيح ..وهيه من شافت امهاتها .. مشت صوب يدوه ولوت عليها ..
يدوه فالخه :شو بلاج ؟
وميثه ماشي مب قادره ترمس .. بس لاويه على يدوه ..
واشوي حمد وشمه دخلن وشافن ميثه محتشره ..
ميثه : طلقوني منه .. ماريييييييييده .. اليوم خله يطلقني ..
ام حمد : حمد رح ازقر ابوك ..!
ميثه وهيه تصيح : داش البيت يهازب ويفر رمسه وعقبها ظهر ..


..


تلع لعناق
 
عودة
أعلى