لكل من يتابع يومياتي ..
سواء برسالة خاصة او برسالة زوار أو بتقييم او بمشاهدة ..
شكرا ً .. :ax:
-----
أولا ً مبرووك عليكم الشهر ..
وينعاد علينا كل سنة وكل حول ..
وعسى الله يتقبل صيامنـا وقيامنــا ..:ax:
انزيين ونكمل لكم مأساتي مع ماليزيا ..
اول شي بخبركم عن اسباب كرهي لماليزيا
ولا حتى افكر اروح لها مرة ثانية بعد ..
1) ماشي أكل نفس اللي عندنا فالبلاد ما عدا الوجبات المشهورة
مثل ماكدونالدز و كنتاكي و ربعهم ..
2) ع بالهم ان الخليجي يوم كان
صغير يشرب بترول مايشرب حليب
يستغلونه استغلال فضييع .. وخاصة إذا كان توه يديد ع المنطقة
3) المنطقة اللي سكنـا فيها هي نفس
المنطقة اللي فيها الـ
Twin Towers و الظاهر ان
ماشي مسايد فها المنطقة .. شي مسيد واحد
بس اونه يسوون له صيانة ..
4) توقعتها مثل اوروبا .. مع اني ما سرت اوروبا
يعني توقعت اشوف حدايق حق العائلات و اليلسة
بس موووووول ..
5) بـلاد ابصراحة مب نظيفة ..
و شوارعها ذكرتني بشوارع راس الخيمة ..
المهم بخبركم بالأمـاكن اللي زرناهـا
فأول يوم ما سرنـا مكان محدد ..
كانت فترة جس نبض المنطقـة ..
ثاني يوم على طوول ع السوق ..ماشي ون توو
تعرفون بعد دام ان اللي وياي حريم
فمن عادات وتقاليد الحريم ان اول ما يسيرون بلاد لازم يشوفون سوقها
اليوم اللي عقبه بدأنـا المغامرة برحلة لحديقة الحيوان ..
Nagara Zoo
وانا ذاك اليوم بعدي معصب شويه .. قاعد اقوول شو اليديد اللي عندهم ؟
نفس حديقة حيوان الهيلي اللي فالعين .. لا يمكن هاييج بعد احسن ..
و باقـي الايــام كلها فالسووق ..
الأسـواق و المولات اللي رحنـا لها :
1 ) رحنـا مول
التايمز سكوير ..
من براا
من داخل
التايمز سكوير فيه 10 طوابق للتسوق
احنا بس سرنـا حق اول 3 طوابق ..:yaw:
2) السوق الصيني اعتقد اسمه شنغاهي سنجوي مدري شي جي
المهم ها السوق يقولون انه رخيص حسب كلام وحدة تعرفت عليها اختي فالطيارة
للأسف ما صورته ..!
3) بي بي بلازا BB Plaza
هـذا بعد نفس السوق الصيني
السوق الصيني و البي بي بلازا بيستانسون عليه الحريم
4) سوق الالكترونيات
انا اول ما سمعت فيه قلت اهني الالكترونياات ..
بروحه ولا طشه .. كأني داش كارفور ..
بس ها الاسواق اللي رحنا لها .. حسب ذاكرتي الضعيفة :yaw:
وعلى آخـر الايام زرنـا مصنع كاكاو اسمـه
Beryl's Chocolate Kingdom
اممم .. طول الاسبوع اللي قضيناه فماليزيا واحنا كنا اندور
فندق فيدرال .. ها الفندق طويل العمر سكن فيه
قبل 26 سنة هو وطويلة العمر ( حفظهما الله وراعهما )
وكل ما يتصل فينا الوالد يقول هـا حصلتوا الفندق
نقوله لا لا الفندق خلاص عفى عليه الزمن مب موجود ..
لكن وبالصدفة حصلناه
صورته عشان الوالد ..
وبعد تصورت عدال اسـد موجود عدال الفندق
لأن الوالد قبل 26 سنة تصور عداله ..
>> على خطى الوالد ..
[/IMG]
ومن اهـم الاحداث اللي صارت هناك لي انا لما كنا فمطار ماليزيا ولما كنا ننتظر يفتحون لنا باب العبور للطيارة
كنا يالسين ننتظر و إذ بفتـاة من الخليج تمـر عدالنـا
وكانت اطالعني واااايد ، بس انا اطالعتها شويه ..
وخواتي يقولون شو هااي تقهـاااااااااار ليش تتطالع
انا اقولهم خلوها ياخي يمكن تبى تحبني
ما علينا ، بـذاك الوقت انا خبرت اختي تعطيني حبة
بندول نايت عشان ارقد فالطيارة لأني كنت خايف
من المطبات الهوائيـة ..
المهم
ركبنا الطيارة ، وانا قاعد ادعي .. يالله يالله تكون عدالنا ها البنية
وسبحان الله .. وللمرة الثانية تصير لي .. البنية عدالنا يا محاسن الصدف
هي فالكرسي اللي جدام واحنا وراهم ..
وبعدين اختي تعرفت عليها هي و اهلها ..
فالطيارة اختي استغربت من شي واحد ، اني مارقدت
تقول لي انته كيف ما ياك الرقااد ..
ها الحبة ( بندول نايت ) تخدر الواحد ..
وانا أول مرة آخذها يعني لازم ع الاقل 8 ساعات ارقد ..
اقولها الحـب اقوى من حبة البندول .. P:
وصدقوني ما رقدت فالطيارة غير ساعتين ..
وبالغصب رقدت عمري بعد ..D:
وســلامتكم ..
وسحورا ً هنيئا ً يتمناه القاضي لكم ..:20:
elgadee © 2009