برزة الشحوح - Barzat alshohooh

برزة الشحوح - Barzat alshohooh (https://www.alshohooh.ws/vb/index.php)
-   برزة التاريخ والحضارات (https://www.alshohooh.ws/vb/forumdisplay.php?f=84)
-   -   البـلـوش و الشـحوح (https://www.alshohooh.ws/vb/showthread.php?t=104761)

عبدالله البلوشي 17-12-2013 02:49 PM

البـلـوش و الشـحوح
 

الــسلآم عـليـكم ورحـمـة الله وبـركـآته عـمـوم اعضـآء وزوآر منتـدى بــرزة الشـحـوح

اسأل الله ان يمدكم بالصحه والعآفيـه , أمآ بعد ..

كثر الحديث اللي اسمعه هالأيآم من بعض رجال البلوش والشحوح عن رجوعهم لنسبٍ واحد و على قولة رجال القبيلتين " نحن عيآل عم "

لهذا انا تأكدت من هذا الشيء عندما رجعت لموقع ويكيبيديا وهو الاسهل للجميع ان يبحث فيه ووجدت كما يلي ولكم الحكم :

تنتسب البلوش إلى : سليمة بن مالك بن فهم بن غنم بن دوس بن عدنان بن عبد الله بن زهران ابن كعب بن الحارث بن عبد الله بن مالك بن نصر بن الأزد بن الغوث بن نبت بن مالك بن زيد بن كهلان بن سبأ بن يشجب بن يعرب بن قحطان ( ويكبيديا )

تنتسب الشحوح إلى : اللقيط بن مالك بن فهم بن غنم بن دوس بن عدنان بن عبدالله بن زهران بن كعب بن عبدالله بن مالك بن نصر (وهو شنوءة) بن الأزد ) ( ويكبيديا )

والادله كثيره ووافيه والاغلبيه من البلوش والشحوح يعلمون انهم يرجعون الى مالك بن فهم الازدي ..

ونعم فيكم يالشحوح فخر وعز ورجال يشهد لكم القريب والبعيد


_________________________________
تنبيه : اقصد البلوش اللي يرجعون الى سليمة بن مالك فقط وليس المنتسبين لهذه القبيله وشكرا .

عبدالله البلوشي 20-12-2013 03:36 PM

شاكرلك اخوي دبا الشيمات عالمشآركه الطيبه , ,

بخصوص ان البلوش في الامارات مشكوك بنسبهم وبلوش عمان عرب : يطولي بعمرك البلوش منهم قبآيل معروفه وافخاذ ولهم عادات وتقآليد يعني من السهل تعرفهم , وكلامك بمتمه ان في من الميناويه والبشكرد يقولون انهم بلوش وهذيل منتسبين للقبيله سواء كانوا في الامارات ولا ف عمان مثل ماهو الحال ف بعض القبآيل الثآنيه , وانا نبهت بنهاية الموضوع ان الموضوع يخص البلوش الاصل ( احفاد سليمه بن مالك بن فهم الأزدي ) ..

طحنون زيد 20-12-2013 03:47 PM

أول مره اسمع بهاي المعلومات العاريه عن الصحه أسمح لي أخوي عبدالله البلوشي ونعم فيكم وفي قبيلتكم لأكن الشحوح شي والبلوش شي أخر مع أحترامي الكبير لك
وماشي مقارنه بين قبيلة الشحوح العريقه وبين قبائل البلوش عاداتهم وتقاليدهم وأماكن تواجدهم في أختلاف الشحوح سكان مضيق هرمز منذ القدم والبلوش سكان مكران وبكستان
حقيقه تاريخيه وراجع التاريخ جيدا يالنشمي
تم فيه بلوش أصل البلوش في كل مكان ميناب ومكران وبكستان وأيران وجميع دول الخليج فمن هم الاصل

عبدالله البلوشي 21-12-2013 01:33 AM

اخوي طحنون زيد , اي شخص مابيحط موضوع بمنتدى او بأي مكان الا وهو واثق من كلامه وعنده الادله , وانا الحمدلله عندي الادله الكآفيه بأذن الله واعتقد اني ما تكلمت عبث وحطيتلك دليل بسيط ووافي ..

والشي الثاني بتقولي قبيلة الشحوح عريقه ومن سكان هرمز منذ القدم بقولك ونعم فيهم ومحد يستنقص منهم , بس ارجع للتاريخ انت وشوف عن البلوش القبيله العريقه الساميه او اذا بتسهل على نفسك اقرا سيرة سليمة بن مالك بن فهم الازدي

هنا الشيخ الدكتور سلطان بن محمد القاسمي حاكم الشارقة يتحدث في إذاعة الشارقة في حلقة عن جلفار حول مملكة هرمز العربية التي أسسها محمد الدرامكة (البلوشي) ..


http://youtu.be/KfpzWwsZbGw

طحنون زيد 21-12-2013 02:17 AM

الاخ عبدالله البلوشي انته جيت وجزافا ونسبت وقلت أن الشحوح والبلوش قبائل مشتركه بالنسب وأحين أيش جاب طاري مملكة هرمز وملوك هرمز كانو بلوش ولا عجم ولا عرب ها ترا بزعلوو عليك الظهوريين لأنهم يقولون أنهم من نسل سلاطين هرمز
وبخصوص ملوك هرمز ماعدنا معلومه الكافيه عنهم لأن محد تتطرق لنسبهم أما بخصوص البلوش من سليمه بن مالك محد من المؤرخين القدامى أثبت هذا الشي
وأما بخصوص مقطع الصوت للشيخ سلطان القاسمي فالشيخ مع الاسف دائما يخالف المشهور ونسب قبيلة الشحوح الـى الانباط ونسب جزيرة قيس الى شخص ففير يمتلك قطه والمعروف أن جزيرة قيس كانت لبني عبد قيس
مصادر لايعتمد عليها أن أبحث عن كتب الرحاله والمؤرخون القدامى أم بخصوص مملكة هرمز فمن نسبهم لبني عدنان ومن نسبهم للترك ومن نسبهم الى عجم السنه ومن نسبهم للظهوريين ومن نسبهم الى بني معين وأخيرا أصبح للبلوش
وبالنهايه والنعم وسبعة أنعام بالبلوش بس ليس هناك شي مشترك بين البلوش والشحوح الا الاسلام والدين وراية الحق وكلنا من أدم وأدم من تراب بس حاليا اللهجه والعادات والتقاليد واللابس يختلف وكل شي يختلف أن الله جعل النبوة في قريش لأنها أصح البطائن وأنقاها وأصفاها
والشحوح قبيله يمنيه تسكن قديما اليمن مثل مانقل ولم نعرف يوما مايسمى الحجاز سكنو دبا وثم أنتقلو الى عدة أماكن وكانو هم أقرب القبائل التي تسكن مضيق هرمز

طحنون زيد 21-12-2013 02:28 AM

[quote=عبدالله البلوشي;2252045]اخوي طحنون زيد ,
والشي الثاني بتقولي قبيلة الشحوح عريقه ومن سكان هرمز منذ القدم بقولك ونعم فيهم ومحد يستنقص منهم ..


أنا قلت سكان المضيق لأن منطقتهم تقع في مضيق هرمز ولا ماعندك خلفيه عن مناطق سكن الشحوح راجع الخرائط وبتشوف الشحوح وين يسكنو بالتحديد مره أقرب قبيله للمضيق وهم أسياد المضيق قديما ولهذا السبب أرتكب البرتغال مجازر في حق هذي القبيله وثاني شي لهذا السبب هاجم الانجليز المنطقه وأخذت ممتلكات القبيله بالقوه وأدخلو بينهم عناصر لاتمد للشحوح صله
التاريخ محفوظ عندنا وبوثائق تاريخيه قديمه بخصوص سيادة المضيق وتاريخ تنقل القبائل ومراتعهم وهناك مناطق كثيره سلبت من القبيله بمعاونة الفرس والانجليز وبعض العرب الجبناء

عبدالله البلوشي 21-12-2013 02:27 PM

اخوي طحنون زيد انا ماجيت جزافا ونسبت الشحوح والبلوش قبائل مشتركه بالنسب مثل ماتقول لاني يبتلك سلالة كل قبيلة منهم وانهم يرجعون الى مالك بن فهم الازدي واذا انت تشوف ان الشحوح مايرجعون لـ مالك بن فهم الازدي شي رآجعلك , وعلى فكرة مب انا وييت نسبت البلوش مع الشحوح لان هذا شي الشحوح تكلمو فيه معانا ومستعد اخلي رجال من الشحوح يدخلون ويشاركون ونحن اعزنا ربنا والحمدلله ولنا تاريخ عظيم يشهد له القريب والبعيد , اما بخصوص مقطع الشيخ سلطان القاسمي تقولي شو ياب طاري مملكة هرمز وملوكها البلوش اقولك لو سمعت المقطع كامل كان عرفت ليش حطيت المقطع لان الشيخ تطرق لهرمز وملوكها البلوش وتطرق ايضا لمن ينتسبون , من قال عن ابن مالك بن فهم , ولما تقولي بخصوص البلوش انهم من سليمه بن مالك محد من المؤرخين القدامى أثبت هذا الشي اقولك غلطان وايد من المؤلفين لهم كتب تخص البلوش وانا ان شاء الله بحط مواضيع فالمنتدى تخصهم عشان تكون المعلومات التاريخيه كافيه لكم , ,

ومن قلت مافي شي مشترك بينا الا الاسلام والدين وراية الحق الحمدلله كلنا لنا الفخر بهالشي , لكن اخوي الهجرات والاختلاط وفرض اللغه واللهجه عليك يأثر وخصوصا لما تمتد سنين وسنين وهالشي لعامة القبآيل ما نخص فيه حد , اللباس اعتقد واحد والعادات تختلف من قبيلة لـ قبيلة ولو انه في بعض العادات متشابهَ ..

بالنهايه اقول والنعم بكل القبآيل العربيه الاصيله ..

عبدالله البلوشي 21-12-2013 02:41 PM

اخوي دبا الشيمات ماقصرت بالردود ..

انا حاط نسب البلوش كامل ف بداية الموضوع مادري ليش البعض احسه يرد عالموضوع لانه قرا العنوان بس !

وتسلم دبا الشيمات ونعم ب يدك والنقبيين وفيكم يالشحوح رجال ومعروفين ومحد يزايد عليكم احفاد مالك بن فهم الازدي ..

طحنون زيد 21-12-2013 08:02 PM

دبا الشيمات بالبدايه أوجه لك تحيه ونشكرك على حسن المشاركه وطيبة روحك في التحاور والنقاش
وقد كثر الجدل مؤخرا بخصوص أنساب القبائل ونسبها الى عير أمهات بطونها وافرعها وأيضا حديث الدكتور سلطان القاسمي بخصوص الانساب أذ أوضح في عدة مداخلات وتطرق الى نسب الشحوح وثم البلوش
قد أذن الدكتور القاسمي بأن يترك لكل شخص فرصه بأن يرد على ماتقدم به من ناحية نسب القبائل فمثلا أعترف أن قبيلة الشحوح كانو ملوكا وأحفاد ملوكا أذ نسبهم الى الانباط الذين أتسعت أمارتهم الى جميع أنحاء بلاد الشام وفيها الحجاز
وأيضا أعترف أن البلوش أنهم كانو ملوكا على أراضي مثل جزيرة هرمز مملكة هرمز الكل عرف عنها وعن جود حكامها وأتساع نفوذهم في حوض الخليج العربي وبحر عمان
ولاكن مالا ختلاف في تلك الوجهات النظر أذ لمن نسمع بتاتا أي مؤرخ أو أي كاتب نسب تلك القبائل الى مايسمى أنباط أو هرامزه هناك حقيقه مخفيه وراء تلك المعطيات فالاعتراف بأن قبيلة الشحوح كانت على ملك عظيم يوم ما هذا بحد ذاته دليل
ولاكن نختلف في أنهم كانو ملوك الانباط فأي ملوك هم لابد أنهم الازد أذ صح المعنى ...
وأما قبائل البلوش فهم هجرات مختلفه من جزيرة العرب منها الشام واليمن بالتحديد وسكنو أرض البلوش كانت تسمى قديما أرض البلوش وهم قبائل عربيه لأكنهم مع مرور الزمن أستعجمو وذالك بسبب أختلاطهم مع الجاليات التي هيا أصل أرض البلوش في مكران أو بلوشستان اليوم
لانستطيع اليوم أن نقول البلوش عرب لأكن نقول من هاجر الى ارض البلوش من جزيرة العرب هم العرب ولاكنهم أستجعمو مع سكان المنطقه الاصليه وعلى حساب المعطيات كانت تسمى قبيله هناك بالبلوص ومن هنا جأئت تسمية البلوش مع التفخيم الصاد أصبحت لحرف الشين
وتحالفت القبائل التي على ارض البلوش لطرد الاعداء وتصاهرو وتزاوجو ونشات معهم لهجتهم التي اليوم يتحدثون فيها وورثو عادات تلك القبائل الاصليه التي سكنو معها ولاكن السؤال كم عدد السنوات التي هاجر فيها العرب من حلب السوريه ومأرب اليمنيه الى أرض البلوش
ربما تقدر بألف سنه أو أكثر لأن تعدادهم يسمح بأن يتجاوز الف السنه عكس قبيلة الشحوح التي لم تنتشر مثل أنتشار قبائل البلوش وبالنهايه هناك كثير من العرب من فلسطين والاردن والحجاز واليمن يسكنون اليوم بكستان وأيران والسند والهند لأكن مع مرور الوقت أصبحو رعايا لتلك الدول
ونلتمس العذر من الاخوه البلوش لم تكن يوما من ممالك هرمز مملكة هرمز أول من أسسها العرب ثم تدحجرت الية الحكم لكي تصبح عند عجم السنه ولأن مملكة هرمز يسكنها شتى الجنسيات من جميع الدول أكتسبت أهميتها وراح الناس يتقاطرون اليها لأن حكامها يشهد عليهم بالكرم والجود
واسباب ضعف المملكه في الفتره الاخيره هيا طمع وشجع أخر سلالة حكام هرمز من سلالة شاه وتورام شاه هم من أدى الى أسقاط تلك المملكه وبمعاونة العرب تم اسقاطها لأنه أنتشر الفساد والظلم والفقر بعدما كان حكامها الذين أسسوها العرب قد أحيلو عن الحكم لأسباب كثيره منها أنقطاع النسل وورث الحكم أبناء بناتهم وهذا مايحدث كثيرا في أمور السلطه والحكم في العالم جميع أذ مانقطع نسل الحاكم يورثه أبناء بناته سوا كانو من الافارقه أو الهنود أو العرب وانتهى ونشكر كل من دبا الشيمات وعبدالله البلوشي
كتبه طحنون بني زيد

عبدالله البلوشي 22-12-2013 11:47 PM

تسلم يا زيد طحنون ودبا الشيمات عالمشاركات الطيبه ..

بعيد لكم الكلمه يا جماعة الخير كل قبيله ولها عاداتها وانا مادخلت موضوع العادات من الاساس نحن مب من نفس القبيله ولكن عيال عم بالنسب حسب ماقالو الشحوح لنا وحسب ماشفنا من السلاله , ولا قصور بالشحوح الاكرام ترا البلوش مب ناقصين الحمدلله لهم تاريخ عظيم بذكره ف عدة مواضيع ان شاء الله فالمنتدى من افضى , لكن بختصار جميع القبائل البلوشيه الرئيسيه عرب بدون استثناء مثل ( الهوتي , آل طاهر , المازم الخ..) ونتآئج الحمض النووي كلها طلعت وتبين انهم عرب قح والحمدلله وتاريخنا محفوظ ومعروف الحمدلله بفارس مع البرتغال الانجليز والخليج العربي وقلاع البلوش موجوده فالخليج مثل ف عمان و البحرين وكانوا يسمون الحرس السويسري في حوض الخليج العربي وفي مستندات رسمية , اما الدخلاء خلهم على صوب لأن من البداية قلت الموضوع يخص احفاد سليمة بن مالك الازدي فقط ..


الساعة الآن 12:16 PM.

Powered by vBulletin® Version 3.8.11 - Copyright ©2002 - 2022, Jelsoft Enterprises Ltd.
لا تتحمل برزة الشحوح أي مسئولية حول المواضيع المنشورة لأنها تعبر عن رأي كاتبها