برزة الشحوح - Barzat alshohooh

برزة الشحوح - Barzat alshohooh (https://www.alshohooh.ws/vb/index.php)
-   مدونات اعضاء برزة الشحوح (https://www.alshohooh.ws/vb/forumdisplay.php?f=78)
-   -   مدوناتي في ذكرياتي (https://www.alshohooh.ws/vb/showthread.php?t=79990)

شيبه محتشر 31-01-2010 09:13 PM

رد: مودوناتي في ذكرياتي
 
بعد المعاناة لي شفتوها وعرفتوها وقاسيتها بحياتي لا تتوقعون انه مافيه شي حلو بالعكس في اشياء جميله وايام سعيدة عشتها مع ربعي واصدقائي

نمشي بلي كان متعارف عندنا

طبعا مع العشرة ويا الربع لازم لكل منا نطلع له لقب

ولاتنابزوا بالالقاب

بس شو نسوي بيكون لكل منا اسم حركي ولقب نبدا بالالقاب ومابقولكم لقبي لانه واحد من الالقاب كان لي

وبقول لكم سبب تسمية هاللقب



( عزمر ) هذا كان له صديقين عزيزين واحد اسمه عبد العزيز والثاني اسمه عمر وكان يرابعهم فمن كثر ما متعلق فيهم ومتعلقين فيه ماعرفنا شو نزقره وحتى مايزعل الاول والا يبوز الثاني الفنا له هالاسم المبسط والاختصار بين عبدالعزيز وعمر



( ام الجلي ) طبعا بتعرفون ليش هالاسم ركب عليه بهدل حياتنا نحن كنا ناكل الجلي برمضان بس ومحد يسووويه الا برمضان يطلع لنا هالبني ادم طلعات ويبي جلي بنص الصيف والا لما نروح الدكان كان يبيعون داخل اكواب صغار مثل الجلي فنحن نطلب عصير او كولا وهو يطلب هالجلي كان هالاعبرقم 3 بفريقنا



( هلباوي ) كان ولا يزال صديقنا الخدوم كان طمه بالانجليزي يصفعه مدرس الانجليزي لين مايقول بسسسس بس مافي فايده فمن جي لما كنا نروح اي مكان او نطلع كشته يحاول يتكلم انجليزي مع اي هندي والا رفيق والا اي عامل لمهم يتعلم هالانجليزي ومن اكثر الكلمات لي يرددها هلب help بكل جملة ينطقها بمعنى ساعدوني بكلم الريال انجليزي والا لما يبي فزعه من احد يقوله هالكلمة
او يسوي اي شي يخطر بباله بركبنا له هالاسم



( جخه ) طبعا هالكلمة كانت تدل على الهندام الحسن والموضة لي صايره بهاك الزمان وكانت تعني انك انسان مميز حلو جميل البهية والطلعه كان هالبني ادم اعز اصدقائي بكل ماتعني الكلمة بكل سيراتي ورداتي وياه فكان هاالانسان يحب الدلع والموضة وشو يطلع على السوق يسوويه ويلبسه وكان طيبته غير طبيعيه وكان اللاعب رقم واحد بنادي ولكن بعد ماكبرنا صار مطوع وكبر لحيته وفترقنا الا انه علاقتنا الاخوية تمت بمعنى لما يرد لنا نذكر له كل سوالفنا الاولية بدون حواجز رغم طوووعه



( كلاشو ) هذين بصوب وهذا روحه بصوب تتوقعوا هالاسم من شو والا من وين طلع والا كيف طلعوه له هالربع صدق ربع ماينبلع منهم والا فيهم شي تبون تعرفون هالاسم كان بالصيف نروح دورات عسكرية بلواء بدر لي بعد خت ب15 كيلو وكنا نتم بالشهر ونص هناك وكان من ضمن الاسلحة لي نتدر عليها سلاح الكلاشنكوف
فالحبيب زقره المدرب وقاله روح يبي سلاحك رد عليه قاله الكلاشو عندي سيدي
يبي يقول الكلاشنكوف عندي
غلط
وعااااد ماغلط الا جدااامنا وياويله



( بخش ) اسم على مسمى بهدل حياتنا هالربيع من كثر مايرابع قوووم بخش كان ابوه عندنا دكان يبيع حطب ولما نروح له كان عندهم باكستاني يسمونه بخش فلما نوصل عنده يقول لبخش انا بروح قول لابوي واذا بخش ما موجود يتم ربيعنا بالدكان يساعد ابوه فلما نروح له الدكان بناخذه ويانا يقول محد بخش انا ليوم بداله فتم هالاسم عليه



( اللمبه ) من عرفناه وهم يزقرونه اللمبه يعني مو نحن لي سميناه من صغره والشعر الابيض براسه مشيب وهو صغير بسسس لو تكلمه لحين بالتيلفون تقول هذا ماكمل ال 18 سنه حبوب قلبه كبير الكل يحبه مسمين قلبه وكالة من كثر لي يرابعهم ماشاء الله عليه عمره مازعل منا لو نعلق والا نقول عنه اي شي مايزعل قلبه كبير بكل تصرفاته حتى ضحكته ويانا تنسينا همومنا لما نشوفه ونسولف وياه نحن عنده سواسيه محد منا له معزة اكثر عن الثاني وسبب تسمينته باللمبة انه طالع لها بجبهته مثل العظم بارز فمسمينه باللمبه لها البروز


( ختي ) اللاعب رقم 2 بفريقنا مثل ما يقولون عنه المصاروة كان حتى النملة يحاورها المدرب يلعبه احتياط واخر ربع ساعة يدخله الملعب لو كنا مغلوبين يدخل اما يسوي بلنتي لنا او يحاور عن لي جدامه ويب جووول كل فريق نروح له يخاااف منه مع انه اغلب المباريات يكون احتياط بس لما يدخل يسوي لهم فيلم رعب كان يخبل فينا بين فترة والثانية يقول لنا يالله قووموا نروح خت نسبح زين وياليت خت قريبه منا خطوتين الا بعييييده بس اذا مارحنا ياويلنا منه



( بق ) كان امتن واحد فينا وكان يلعب ويانا بالفريق جناااح كيف مادري رغم متن جسمه الا ان كنتروله على الكرة عجيب اول مرة نلعب فيها بالنادي لما رحنا نلعب مع فريق لما شافوه الفريق الثاني دخل الملعب قالوا له دخلت الدبابة فزعل الريال وانتفخ وحرم من بهدها يلعب كرة فقلنا له ونحن راجعين للبيت عن تنبق علينا يعني عن تنفجر علينا ومن عقبها مشى عليه هالاسم وكان كل مايزعل ينتفخ وويهه وتقولوا قنبلة وبتنفجر فسميناه بق وكان واحد من ربعنا صديقه الصدووق مايحب حد يقول له شي فمرة من كثر ما معصب علينا قال انت جنود وهذا قايدكم وركض ورانا



وبنكمل لك باقي المراهقة

شيبه محتشر 04-02-2010 10:05 AM

رد: مودوناتي في ذكرياتي
 
نتابع مع الربع خلال هالفترة :


بعد ماتكونت هالعلاقة الحميمه بين الربع كانت نظرة الناس الي لاعبي النادي انه الفئة الفاشلة في المجتمع او انهم ادنى افراد المجتمع تعليما وربما ان اهتمامهم بالكرة يجعلهم في نظر الناس هكذا

ولكن تعاهدنا على تغيير نظرة الناس لهذه الصورة
صحيح كنا في فترة الناشئين كان الجيل القديم ومايسموون بالفريق الاول للنادي اغلبهم من اصحاب الوظائف الصغيرة او انه لم يكملوا دراستهم بسبب انتسابهم لانديتهم

وهذي النظرة التي كانت سائدة هي نفس النظرة التي كان اهلي ينظرون اليها عن النادي ومتاعبه وانه ليس الا للفاشلين
بعد خمس سنين من انتسابنا للنادي وصعودنا لمستوى الفريق الاول كان عددنا بالفرق 18 لاعب اساسيين واحتياط
6 لاعبين ضباط
5 لاعبين خريجي جامعة
3 لاعبين دراسة خارجية
3 لاعبين بهدلوا حياتنا مارضوا يكملوا لانهم مافلحوا بالدراسة وراحوا الجيش
لاعب واحد لارضى يشتغل ولا رضى يكمل دراسته وتم بطالي
هذا توزيع اللاعبين عندنا بعد ماكملنا دراستنا ورجعنا النادي نكمل المشوار وسبحان مغير الاحول بعد هالفترة كل شي تغيير بحياتي وخاصة لما كل منا تخرج وعاد يمارس حياته الشخصية
صرنا اكثر تقاربا كان يعجبنا تجمع الناس حوالينا واسلوبهم التشجيعي لنا الحمدلله من طلعنا ماكان حد يذم فينا رغم نظرة الناس لهذي المؤسسة
نرجع لحياتي الشخصية وكيف تحولت

علاقتي مع امي الحنون

مع الايام الجديمة اذا تذكرونها كانت حليلها تحرق ثيابي مال النادي ويكون مصيرها التنور علا وعسى ارجع واتوب واعود عن النادي لكن مافي فايدة
بعد سنين من العذاب وحرق الثياب والضرب لي مالقى له عندي اذان صاغية ماقامت تحرق الثياب وبنفس الوقت ماتغسلها بس تخلي الشغالة تغسلها
بعد سنه قامت ترتب لي اغراضي قبل لا اروح المباريات او التدريب ( امي الله الشاهد كم احبـــــــــــــــــــــــــــــــــــــــك )خلال هالفترة كان الفريق بدأ يتكون وكانوا حريم الفريج كلهم يسألون عن نتايج الفريق ويتكلمون عنه وتعرفون الحريم يتدخلون بكل صغيرة وكبيرة بعدها عرفت مكانة النادي عندها وعرف انه ولدها فيه وانه انعرف عن طريج النادي
السنة لي بعدها كانت تدعي لي الله يوفقني بالمباراة ولما ارجع من المباراة كانت تحط لي ماي حار وقوطي ملح بالبانيو حتى اسبح فيه مادري شو من الحكمة بس اتوقع اني لما ارجع وارقد احسسس براحة عجيبة وبنفس الوقت تسالني شو سويتوا بالمباراة وكما لنتيجة
يمكن لانها تبي تتخقق جدام الحريم انها تعرف بالكرة وكبرنا ومشت الايام وتغيرت نظرة امي عن النادي


علاقتي مع ابوي الطيب

شكثر عانيت منه حتى لما توظفت ماراضي يغير نظرته عني يعتبرني الولد الشاذ بالعايلة ومن جي كنت ابتعد نوعا ما عن مواجهته ويه لويه الا بايام اكون فيها مضطر اني اكون معاه
مادري هل اني وارث العناد منه او انه كان يبيني انا ابادر مادري لمهم انه علاقتي بابوي منقطعه مع انه توصله اخباري وكيف اعتدل مسار حياتي بس ماراضي يغير نظرته عني وعن عدم طاعته
اتذكر المرة لي غيرت مجرى حياتي مع ابوي هذي اللحظة بقولها لكم لاني عمري ما انساها ويمكن لاني طوول الليل تميت اصيح مادري كان ندم مني والا حنين لحضن ابوي
بهاك اليوم كنا نلعب مباراة ودخل علي واحد جاااامد على ركبتي قطع لي فيها الرباط الصليبي لمهم طلعت من المباراة للاسعاف سووا لي اشعة مقطعية قالوا لي انه الرباط الصليبي بالركبة انقطع عندك ويبي لك عملية
ليوم الثاني اتصلت لامي قلت لها السالفة واني بدش المستشفى اسوي عملية وقعت لعمري ودخلت دخلوني غرفة العمليات الساعة 2 الظهر عمري ماشفت غرفة العمليات الا بالتلفزيون ولما شفتها على الطبيعية قلت اتوقع اني احلم ياني دكتور سوداني قالي وشفيك خايف اقوله بالله عليك تشوفني داخل مدينة ملاهي تبيني افرح فيها
قال لاتخافي تشوف الكشاف لي فوقك قلت له اي
قال لي تشوف ويهي قلت له اي
قالي لحين الكشاف بيصير مثل ويهي توني بضحك
الا وانا في سبات عميق اثاريه الحبيب يبي يلهيني عن ابرة البنج وحليله بعد ماسويت العملية يلست اضحك على سالفته
لمهم خلصت العملية وانتبهت الساعة وحدة بالليل
هناااك حصلت الفاجعة والمفاجئة لي خلتني اصيح طوووول الليل
الصياح لي فيني اكبر من صياح جرح العملية
كان ودي ازقر الممرض يبي لي شي يخفف عني الويع بس الموقف لي كان بالغرفة منعني من اني اهمس بس همس
تمت عيوني تزرف دموووع ماراضيه تتوقف
تبون تدرون ليييش
لما صحيت من البنج ومن الويع لي فيني تفاجأت انه ابوي ( الله يحفظه ويخليه ويطول بعمره) راقد تحت
ابوي لي شبعني ضرب وكان مايداني يشوفني جدامه ويمكن ماكان يتمنى اكون انا ولده
راقد تحت السرير يجابلني ويحاتيني
تارك كل شغله واعماله وياي يبات وياي ابوي لي كنت اعتبره متحجر القلب ماكان يتعامل الا بالضرب التفاهم عنده عصا او واير او قب ابوي لي اقول انه الرحمة انتزعت من حياته وكاان يعاملني كاني مجرم
فرجعت بذاكرتي لورا بكل بأدق تفاصيلها صغيرها وكبيرها وخاصة مع ابوي وكيف كنت معذبنه بحياته بدأتالدموع تنزل من عيوني ماقادر اوقفها هي دموع متشابكه بين دموع الندم ودموع الالم
وتميت طوول الليل على هالوضعية الي ان سمعت اذان الفجر اذن بعدها حسيت انه ابوي قاام من رقاااده جان اتلحف حتى مايشوفني اني صاحي وحليله حتى ما يسوي لي ازعاج شفته يتسحبب شوي شوي ويدخل يتمسح وراح للممرض يوصيه علي وراح لشغله
كل هذا وهو على باله اني ماادري انه كان راقد ويااي
ومن عقبها قرررت اغير علاقتي مع ابوي بكل مناحيه حتى لو انه طلب مني اترك النادي او انه اسوي اشياء ما كان يبيني اسويها
بعد مارجعت من المستشفى من دخلت البيت رحت لابوي وحبيته على راسه وماتكلمت وعرف من نظرتي شو اعني وعن شو ابي اتكلم وماتوقعت هالقلب لي كنت اعتبره حجر يحضني
ومن عقبها تغيرت حياتي مع ابوي ماكان يتغدى الا يتصل لي وين انت تعال بنتغدى طبعا لانه اغلب اخواني يشتغلون بابوظبي واخوي الصغير وانا لي هني فما يهنى له الاكل الا بوجودنا بتحسننت العلاقة بكل صور حياتها حتى ما صرت اسوي شي الا لما اشاوره بكل صغيرة وكبيرة حتى ولو ماله خص فيها ولا تعنيه بس حتى احسسه اني مو انا لي كنت انا
انا خادمك وعبدك لي بين يدك متى ماقلت لااا يعني لااا
حتى لو احبه ومتعلق فيه والحمدلله ردت علاقتي بابوي علاقة صداقة حتى لما ابي امزح ويااها ازقره بلقبه وخاصة جدام امي لانه امي تزقره بهالاسم
يستانسسس واستانس لوناسته
وعادة علاقتنا لي ماكنت اتصور انها تعوود بس هذي الحادثة رجعتني لابوي
ومن بعدها قام ابوي يسالني عن النادي وعن النتايج ويمكن لانه اهل المنطقة كان يثنون ويمدحون فينا كفريق وكون اني واحد من الفريق فلازم انشمل وياهم فعرف ولده انه ما اخترب ولا خرج عن طوعه انما كون شخصيته مثل ماهو يبي
لكن في حدود الاخلاق والادب والمعاملة مع الناس
واقول الحمدلله والف الحمدلله انه ما كان احد يشتكي من تصرفاتنا ويقول انه ولد فلان كان او سوا شي
ومن بعده هالافكار تغيرت نظرة الناس للنادي وصار النادي مضرب للمثل مثل ماكانت جمعية الاصلاح مضرب للامثال في تكوين النشأ وتبيتهم
حتى كانت اغلب الاندية تمدح نادينا لانه اللاعبين لي تخرجوا من تحت يده ماكانوا حثالة المجتمع او المنفايين من المجتمع
انما تخرجوا في مناصب ورتب حلوة
وبصراحة كان الفضل لشخص بالنادي بعد فضل رب العالمين علينا انه يلس يتابعنا من كنا صغار الي ان كبرنا وتخرجنا ماكان يرضى انه حد يكون مقصر في دراسته او تعليمه وكان يتابعنا بالمدرسة
والحمدلله على كل حاااال انه وصلنا لها المرحلة



والبقية تأتي

شيبه محتشر 09-02-2010 09:54 PM

رد: مودوناتي في ذكرياتي
 

صور مال اول




بعد هالمدونه الطويله كتابتا لي مللتكم يلست ليوم ادور لكم صور عن الماضي وبحط على كل منها تعليق بسيط تحكي عن ماضي عشته وحسيته وكان له طعم ولون عندي


نبدأ بالتلفزيون لانه كانت اغلب حياتنا عليه
وخاصة العصر وهي فترة الرسوم المتحركة والا المغرب وهي فترة المسلسلات

تعالوا نشوووف شو لي صاير



http://blogs.fayobserver.com/livewir.../01/old-tv.jpg



هذا تقريبا شكل تلفزيونا بس نحن كان لها مثل الباب ينسحب من صوبين بس لو تلاحظون كانت له موجتين موجة كلها ارقام من ا - 12
والموجة الثانية على حرف U
الموجة بالارقام تذيع القنوات العربية وياكثرها كلها رقمين كنت اذكر منها رقم 6 ورقم 10 والباجي بالقوة تصفى
اما موجة U فهي تذيع القنوات الاجنبية والافلام الهندية
وكان بينهم مثل الحيس لما تششششوش القناة نحيسها اونه تصفى اكثر


http://upload.traidnt.net/upfiles/8bn91510.bmp


هذا شكل الاريل من بعيد ممدود بحديده طووويله للارض ومربوط بسنطوانه البيت حتى يسهل لفه لما تشوش القناة او تخترب طبعا قلت لكم سالفته وكيف قبل نلفه وكل يوم لوحد منا دووور طبعا البنات مايسلمون صح مايحيسون الاريل بس يزاعقون كنا لما يزيد الخبال نتسلق فوقه لين مانوصل لفوق السطح وننزل وياويلنا لو هبة ريح قوية تشوفه مايل يمين والا يسار وتعال رده حتى تصفى القنوات


http://maxtoons.com/cap641.jpg


نيي للرسوم المتحركة احب هالخبيل يموتني ضحك وكنا نقلده بكل شي ولي مرابعنه روحه اهبل بس بصرااحة كان احلى رسوم متحركة نشووفها
حشااا حد ينط من فوق برج وهو شال بنت ومايستوي له شي
والا يغووص نص ساعة بالبحر بدون نفس
والا يركب لك على جناح الطيارة ومتيود باطراف صبوع ريوله
والا ينقعون فيه قنبله ومايصير له شي
والا يركض بين الرصاص وماتجيسه رصاصة

رغم هالخبال الا انه كنا نصدقه لا ونقلده بعد
كلهم صوب وعبسي بصوب
والا نامق الاهبل
والا يد لينا
كم بنرقع فيها
بسسسس بصراااااحة عججججججججججججججيب
:ax:
شوفوا الصورة وكيف الحركة بتعرفون انا لي اتكلم عنه ونحن مبققين عيونا ومندمجين
لانه كلها اكشششششششششششن

http://img254.imageshack.us/img254/8268/99609612ui3.png




هذا العبيط الثاني بصراااحة اتفهه منه مافي
بس مجبورين نشوفه لانه مايطلع غيره
الرسوم مووول مامنها فايده لافيها اكشن ولا مغامرات ولا خرابيط

http://www.alhsa.com/forum/imgcache/295960.imgcache




غرنيدايز انطلق
هيكاروا وكوجي ودامبي
عجيييبين بصراحة كان هالرسوم تشدنا مع حرب الفضاء
كل يوم يقاتل وحش ويكسر راسهم ويحطمه
ولما نيي باخر الحلقة نقول هالسفية الام ليش تشرد ليش ما تضارب ويا غراندايزر وتغلبه
اثاريهم يبونا نكمل الحلقات وكل مابيي يلحققهم يرد
اونه سوف ننتظرهم الي ان يأتوا
ونحن مصدقين



http://www.tbeeb.com/ph/files/1/anime/majed.jpg



هذا مادري منو مألف هالرسوم
ماجد لعبة خشبية
انا اسمي ماجد ماجد
لعبة خشبية ماجد
هو ويده خبلوا فينا
بعد مجبورين نطالعه لانه مافيه غيره
بس مبققين عيونا ونطالعه




نييي للمسلسلات لي كانت تنعرض

http://www.77d.com/vb/attachment.php...2&d=1241718284




الي ابي وامي مع التحية مسلسل بصراحة هادف كانا كلنا اكبار وصغار نتابعه الاسرة كلها والجاره اللغاية
وراعي الدكان وولده الطمه الولد لي مخرب احمد
وكل مايصير شي
تقول امي شوفوا شو يستوي فيهم لي مايسمع الحجي
وعاااد خذ تعليقات علينا


http://i89.servimg.com/u/f89/11/99/45/48/115.jpg




كنت اشرد من المدرسه حتى اتابع حلقاتها
مريم الغضبان هي حبابة وجودر هو بطل المسلسل
كلهم بصوب ولما دخل المغارة ونقطع راسه وشله بيده ويتمشى بصوووب
بايامنا كان مثل فيلم الرعب
خيفانيييين
حتى مدرس الفنية كان يعايرني يقول خل تنفعك حبابة لما ارسبك
خخخخخخخخخخخخخخخخ
من زووود الرسمات لي ارسمها عااااد
بس كانت حلقاتها تشد الواحد وخاصة مريم الغضبان لما تقول كان يامكان في قديم الزمان

http://up.g4z4.com/uploads/e296069d87.bmp



هذي كانت نوع من المسابقات شخصين ضد شخصين
لون الاحمر والاخضر وكل واحد يقطع على الثاني حتى مايوصل خط كامل
وكل رقم او حرف بسؤال
وكنا مندمجين ويااااهم لانه برنامج ثقافي مفيد




وطبعا في مسلسلات ثانية مثل دليله والزئبق وغيرها تنعرض وكنا نشوفها هذا جزء منه


http://www.youtube.com/watch?v=rMlmP4ttxz8


اما المسلسلات الاجنبية فكان مسلسلين
http://www.q8hp.com/Knight%20Rider.jpg


السيارة العجيبة ولي قاصين علينا فيها وطبعا لي لحق عليها وكان في زمانها يعرف شو معنى السيارة العجيبة
حتى صارت موضة انه كل واحد عنده سيارة يركب ليتات حمرا جدام تتحرك
والا اول ماطاحت سيارة نيسان سيدريك وتتكلم قالوا هذه هي السيارة العجيبة
وبصراحة كان مسلسل مغامراته عجيييب




والمسلسل الثاني لي اذكره مسلسل شرطيان ثنينه يسوقون دراجات نارية ويكتشفون الجرايم بس نسيت اسمه
وبنتابع صور مال اول

شيبه محتشر 14-02-2010 10:51 AM

رد: مودوناتي في ذكرياتي
 
ألعاب اول





http://www.alshohooh-upload.com/up/u...db80f6613e.jpg

مروحة بلاستيك قابله للسحب لما تيرها تطيير كنا نتنافس منو يوصلها لابعد مكان المراوح االكبيرة تطير اكثر وكنا نوقف تحت اي سقف ونطريها حتى تلسق بالقف وكل ما كانت السحبة قوووية كل ماتعلقت بالسقف اكثر







http://www.carrom-rcs.de/boardsese.jpg



الكيرم لعبة معررروفة ومخبله فينا قبل وخاصه بالبودرة اونه حتى القيس يمشي بسرعة فيها لما يضيع عنا القيس لي يضربوون فيه كنا نجلع العلامة مال جينرال الكتريك للمكيفات ونلعب فيها من جي بتشششوفون اغلب المكيفات مشلول علاماتها اعرفوا انها صارت قيس للكيرم كان الفريق المغلوب يستوي لونه ابييييض من كثر ما متسبح بالبودرة ونحن نزيده

http://file8.9q9q.net/img/51294841/147279c298.jpg


طيارات من البوووه كانت سحلة التركيب نشتريها بنص ونربكبها ونيلس نطيرها والسباق منو يطيرها اكبر مسااافه
مال مقصه



http://photos-f.ak.fbcdn.net/hphotos..._7167916_n.jpg


رشاااش الماي ياما حصلنا ضرب من وراااه خشششاه بكل مكان بس عمرنا مالعبنا فيه الا تصفعنا طفاستنا غير طفااسه والمشكلة انه كنا لما نبي نغصص بواحد نشششوفه راقد نروح لخشمه والا لعيونه ونرشه بهالرشاش والا ترسناه ماي وحبر وخيسسسنا الا متضاربين وياااه



http://www.majalisna.com/gallery/55/...1249752385.jpg



هالكور كانت مشسششهورة شهرة عجيبة قابله للنفخ وماتكسسر شي بالبيت فمن جي كنا نشتريها ونلعب فيها بالبيت فما كنا ننضرب من ورااها



http://www.majalisna.com/gallery/55/...1249752355.jpg


هاللعبة كانت موجودة تعيبنا كانت تطلع لنا بالحظ يانصيب والا نشتريها ريال بلاستيك ومربوط ببرشوط نفره لفوق وينفتح البرشوط والا ركبنا الدري وفريناه من فوق ومرات كان الخبال يشتغل فكنا نتط من فوق الدري ونفره ويانا نشووف من يوصل قبل هذا المخ لي وصل لنا هاك الايام



http://www.3adany.com/up/uploads/cd1611c581.bmp



هاللعبة لعبة تركيبة نيييلس نتحدى ببعض كل واحد منا يخرب لعبة الثاني والذكي يرتبها اسرع




http://mexat.com/vb/attachment.php?a...1&d=1172089381




صلصال لين ماله مزه ولا خرابيط بس كنا نحب ريحته يقولون محششين ننفخه ولي ينفخ اكبر نفاااخه منه
بس ريحته عججججججججججججيبه




http://img211.imageshack.us/img211/8...80aebboit6.jpg


التيل لعبتنا المفضله ياما تضاربنا على شان عيونها
وياما نترس وانت بكرامه الحمام منها لانه امي لما ماتشوفنا نراجع عقت تيلنا بالحمام
اتذكر من اللعب عدنيه واورطه


http://mexat.com/vb/attachment.php?a...1&d=1172089822



خراخيش يهال يطلع مثل البلونات ولما تخلص نروح نصف فيها ماي وفودر مال الغسيل
من جي امي الله يذكرها بالخير تخش عن الفودر ونيييل ندوره لما مانلاقي



http://i90.photobucket.com/albums/k2...48416_8935.jpg




لما تطورنا شوي ونزلت هالالعاب كنا نيمع فلوس العيد ونشتري هاللعبة كان سعرها 50 درهم بس الخمسين مو مثل الحين كان يبي لها شهور حتى تتيمع وكانت تعيبني لعبة مصنع البيبسي لي ييمع الكراتين واتذكر اني احطم فيها الارقام القياسية



http://www.waraqat.net/2008/04/swar_zman2.jpg




وتطورنا شوي ونزلت هالالعاب كانت الافلام لي فيها مثل العلة وياما كثر مانفخنا فيها اونه حتى تشتغل اثاري النفاخ كلها رواوين





وهذي شوي العاب من الحجاج لما ييونا من الحج




http://www.majalisna.com/gallery/40/...1249952768.jpg



http://www.3otag.com/wp-content/uplo...ct_raygun1.jpg



http://group.eqla3.com/1/pic/1/th19.jpg



http://mexat.com/vb/attachment.php?a...1&d=1172092611




http://members.abunawaf.com/balot/GRD10/2/153.jpg


ونتابع

شيبه محتشر 21-02-2010 12:34 PM

رد: مودوناتي في ذكرياتي
 
نترك الصور شوي ونرجع للكتابة وذكريات اول
بس هالمرة على شكل مقتطفات بعنوان





اتذكر






1 - اتذكر تيلفون البيت بو حيس لما كان يرن يصمخ الفريج كله ولي يمشي بالشارع يسمعه يصيح والا لما نيي نتصل لمكان ونبي ندق رقم صفر والا تسعه ونحسيه ياويلنا لو ماكملنا الحيسه يطلع الرقم ناقص فيطلع لنا رقم غير الرقم لي طالبينه والا لما يزن ويزن ويزن نضغغط على الفصين مال السماعة اونه حتى تيينا الحرارة ولازم يكون التيلفون معلج فووق وومايكون على الارض حتى اليهال امثالنا والقصار ما يجيسونه والا حتى يفكرون يلمسونه والواير مخشش ورا المساند حتى مانيره نحن معشر القصار لانه كان بهاك الزمان شي ثمين وغالي


2 - اتذكر لما نغسل الحوي لانه بيتنا كان كله كاشي وخاصة قبل العيد بيوم اونه نساعد امي بتنظيف البيت ونحن خرطي الا كان يعيبنا التزحليق على الكاشي لما نترس الكاشي كله ماي ونييب لنا فودر ونرشه على الكاشي ونفصخ ثيابنا ونتم بهاف وفانيلة ونيلس من اول الحوي لاخره ونحن نتزحلق ومنو يوصل قبل كم واحد اندبغ على راسه وكم واحد دعم السنطوانه وكم وااحد طلع منه الدمان وهيا بنا الي المستشفى وتقول نتوووب ابد ولا شي فايده منا


3 - اتذكر لما اول مرة طلع لنا مسلسل سوبر مان كنا نركب فوق الكبت ونربط رقبتنا بوقاية امي والا بشراشف الصغار والا نربط ايدات الكندورة برقبتنا وننط من فوق الكبت بعد مانحط الفراشات تحت الكبت حتى مانكسر


4 - اول ماعلمونا الجمباز بالمدارس صارت الشباري هي محطات تعليم الجمباز وتعال للتجمبيس فوقها والتنطيط وياما تكسر الحبط مال الشباري ولما تيي امي وكنا نرقعها على السريع ولما يي ابوي ويرقد فوقها تخر فيه وتعال للاتهام منو مسوي هالشي كلنا مالنا خص عيل منو لي له خص ياحظي


5 -اتذكر لما اول مانزلت موضة الحديد او مايسمونه بحمل الاثقال كنا نتابع المصارعة كل اسبوع وكان اونه هولك هوقن هو البوس ومناك خرطي كنا نروح المطبخ وندور قواطي النيدو الكبار ونترياها تخلص واذا ماخلصت بسسسرعة حنينا فوق راس امي صبح وظهر وبليل نبغي حليب حشااا حتى تقول مرات ليش لايكون انا مافطميتكم وانا مادري ماتدري من وراها شو بنسوي بعد ماتخلص روح نييب حديده طويلة ونترس القواطي اسمنت ونحطي بكل طرف حديده قوطي ونسسويها ولازن نحطها فوق السطح والا ياويلنا لو شافتها امي ونروح نشلها وندرب فيها



6 - اتذكر لما ابوي يودينا رحلة كنا نركب بالسيارة حمود فوق عبود ولما يقولون بنروح رحلة كلنا نراكض للسيارة حتى نحجز المكان لي ورا ولي هو بين الجامه لي ورا والكرسي لي وراا لازم يكون هناك واحد منسدح منا اونه يشششوف كل شي ويسوي باباي للسيارات لي وراه اونه انا طايفنهم مع انه الشمس راقعتنه فوق ويهه ومستوي طماطه من الشمس الا انه عايبنه هالمكان ومن سبق لبق


7 - اتذكر لما كنا نطالع التلفزيون كان يعيبنا نرفع ريولنا على شاشة التلفزيون حتى نستمتع بالمطالعة ويعيبنا نشوف افتح ياسمسم يعجيا هالخوخوش كعكي لما ياكل البسكويت يم يم يم ونروح نشتري بسكويت يم يم نص ثلاث البسكويت برا بسيعبنا نقلده والا يوم الجمعة لما تطلع لنا القصص العالمية في قصص الشعوب غرائب لاتنتهي وعالم حلو نقي يسكن في القلوب


8 - اتذكر كنا لما نسبح ماكان كل واحد بروحه لا بالعكس كلنا مرة وحدة بمكان نسميه القطعه وكل واحد له دور ييلس بطشت كبير وكعد تجب فوق راسنا امي الماي وياويلنا لو كان بااارد النفضه محد لها وتعال لما تبي تغسل راسك بشامبو هناك بس مسموح لك تطلع من البانيو قصدي الطشت حتى ماتوصخ الماي بشامبو شفتوا كيف الاهتمام بعدم التبذير والاسراف بالماي والدور بالدور وعااد كلنا ماكنا نداني السبوح يالله بالجمعة مجبورين لانه صلاة الجمعة والا الباقي مانمشي الا بالضرب


9 - اتذكر كانت عندنا موضة والا عصر يسمونه عصر القمل كان شعرنا كله قمل وكانت الموضة كل واحد بجيبه مشط من الضعاف وين ما راح وياه لما يكون فاضي وماعنده شغله طلع المشط من جيبه ويلس على اقرب مكان ويلس يمشط شعره ويطيح القمل ويحطها بين صبوعه ويجتلها والا على طاولة المدرسة لما يكون الدرس ممل ييلس يجتل قمل من الملل ومادري انا امي كانت تحب هالهواية والا تبي تنظفنا لما مايكون عندها شغله قبضت راس واحد منا ويلست تجتل القمل لي براسه واتذكر لما خلاص ملوا من القمل لي فينا رشوا فليت بف باف والا يابت كاز ورشته فوق راسنا مادري شو من الحكمة والا ضختنا وودتنا الحلاق وقالت له قرعه وافهمها يافهيم وهناك القرعة مو ماكينة الا القرعة مووووووووووس مثل قحطه


10 - اتذكر الشلق كان مثل اللف نحط بالمسدس ماله ساعات المسدس يخترب فنبطل الشلق ونروح ندور حصاه والا نعال بو كعب ونييلس ننقعه مانبي تضيع فلوسنا هدر والا الصواريخ لما نبي نخبل فيها كنا نكسر الحطب مالها ونلبق فيها ماتعرف هي بتروح سيده والا بتلف عليك والا لبقنا فيه وقبل لاتوصل الفتيله للاخر فريناه وشردنا ماندري وين يروح وياما رد على راسنا


11 - اتذكر لما كنا بالمدرسة ونوقف طابور ويقولون لنا تفتيش على الاظافر كل منا يطالع يده ويقول لربيعه بشوف يدك ولي يحس انه ظفوره كبار يرد ورا والا يتسحب كنا نمد يدنا للاستاذ واذا كانت ظفورنا كبار يضربنا فوقها


12 - اتذكر حصة الفنية وحصة الموسيقى لي ملعوزينا فيها ومادري شو بنستفيد منها الفنية كانت يعيبني لما يقولون صلصال وسووو اشكال منها نحب نخيس يدنا فيها ونسوي اشكال بس ماكنت فالح بالرسم وماعرف ارسم للحين ام الفنية بحدث ولا حرج المدرس مانفع ويااي ماخلى اله ماقبضها لي وماشاف مني فايدة من اول الاكسيلفون الا اخر الطبل واخر شي لما ماشاف مني فايده قبضني المثل وياه حديده قالي لما اااشر لك دق عليه بعد مانفعت عيل تفا تفي تفا تفي تااا
هذا علم نتعلم


13 - اتذكر التغذية لي كانوا ييبونها لنا قبل لاتنتهي الحصة الثالثة ويوزعونها علينا سندويشه وكاكا وتفاحه والا موز والا برتقال كانت احلى حصه لنا نترك كل شي وناكل الكاكاو والباقي ييون الفراشين ييمعونه مادري هو للهوش والا يودونه البيت والا لما يعطونا اخر السنه طاقة ثياب و200 درهم نفصل فيها ثياب لشتاء هذا جميل من الكويت ما ننساه لهم



14 - اتذكر لما كنا بالصف اول السنة يينا المدرس يقول لنا الصفحة الفلانية والا المقرر الفلان ملغي الشطار يروحون للفهرس ويكتبون له ملغي والنص نص يروحون يشطبون عليه بقلم والا الوان والطميم يشقوون الاورااق اونه حتى يكون الكتاب ضعيف ونقدر نستوعب انتوا بالاساس ماتهبشوونه



15 - اتذكر لما كنا نرجع من المدرسة فرينا الكتب من عند الباب هي والنعله وفصخنا الكنادير ولبسنا كنادير ووصخه ورحنا نلعب كرة بالفريج وماشاء الله علينا نلعب اي مركز من اول الحارس الا المهاجم ويعيبنا لما يكون القانون اخر واحد حارس والا حارس دغاش لين اذان المغرب تعبنا رجعنا البيت تعشينا وصلينا العشا وردينا رقدنا


والي اللقاء مع الصور في المدونة القادمة

شيبه محتشر 24-02-2010 02:16 PM

رد: مودوناتي في ذكرياتي
 
اموووووووووووووووووووووت ضحك لما كنت اششششوف هالحلقة من القصص العالمية




شششششوفووووا الحلقة للاخير



:h015:



تمثيلهم ودبلجتهم عججججججججججججيبة



الله يرحم ايام العراقييييين ودبجاتهم


مو مكسيكي وهندي وتركي




http://www.youtube.com/watch?v=ZHa695hdL7A

شيبه محتشر 01-03-2010 01:55 PM

رد: مودوناتي في ذكرياتي
 
صور ايام المدرسة









برايات اول ماشي غيرها جي براياتنا اول مانزلت كانت الحصة كلها تخصل ونحن نبري الاقلام


http://www.majalisna.com/gallery/40/...1249952727.jpg




قلم الرصاص ياحظنا وياااه نيلس نبري القلم الي ان يخلص تتحسبون الاقلام قبل مثل لحين قبل يا الله نحصل قلم والشاطر لي يبريه ويوصل جي هو والمساحه ماله



http://www.webdesignideas.org/wp-con...encil-logo.jpg




مساحة تمسح بالصوبين الازرق يمسح الكتابة الرصاص والاحمر يمسح الكتابة بالقلم الجاف وتعال لما تبي تمسح المكتوب حتى ترد الصفحه نظيفه تمسح الورقة الي ان تنشق واخرتها اما ضربه باليد والا الدموع اربع اربع



http://www.majalisna.com/gallery/40/...1249952687.jpg




ضمغنا مو لحين اهو وامو وخربطان ماشي غيره تلزق الصفحة بعد ثواني والا متبطله مادري ليش بس يسمونه صمغ هذا لي اعرفه



http://www.majalisna.com/gallery/40/...1249952757.jpg




مسطرتنا ياويلي على لي ماحافظ جدول الضرب تكون احسن مسطره عنده هذي كنا ندخلها ويانا الامتحان لين ماجكونا ومنعوها




http://www.3adany.com/up/uploads/67bf1306a3.bmp




والا هذي المسطرة مال اللعبان الا طووول الحصه نيلس نطالع فيها اونه اختراع يديد



http://up.f7up.com/uploads/images/f7up-220d2efda5.jpg




ادوات الهندسة الفرجار والمنقله والمسطرة ووالمثلث لمادة الحساب واول ماطاحت




http://www.majalisna.com/gallery/40/...1249952707.jpg



نيي لحصة الفنية وتوابعها اول ماعلمونا لي احيده الاكسيلفون والاكرديون والطبله والتفتيف تفتفي تا والخرابيط لي ماكنت ادانيها مدرس الموسيقي لكل الادوات واخر شي قالي ماينفع لك المثلث كل ما ااشر لك دق عليه دقه وبعد مانفعت




http://www.alshohooh-upload.com/up/u...617b79f962.jpg




http://www.crystalshiloh.com/images/...0Xylophone.jpg




وهذا المثلث ربيعي لي اخر شي عطوني اياه



http://st-takla.org/Pix/Church-Tools...-Coptic-01.gif






ويوم الاربعاء بعد ما اطلع من المدرسة لازم اشتري هالمجلة وللحين اقراها مادري ليش
لي رافع ضغطي للحين هالنقيب والمساعد ماله خلفان وفهمان لليوم ماترقوا لي هذين من دفعة ضاحي خلفان وربعه وهم بهالرتب



http://www.alshohooh-upload.com/up/u...3c989093a3.jpg



الي اللقاء[/SIZE]

شيبه محتشر 01-03-2010 08:49 PM

رد: مودوناتي في ذكرياتي
 
نسيت احط اجمل ذكرياتي في المدرسة
اللغة العربية اول ابتدائي
اول ماعلمونا العربي
كانت اول صفحة بالكتاب لا احرف ولا خرابيط
بالويه كلمات
ونكتبها مليون مرة
ولي درسها اكيد كتبها






http://www.mnq8.com/mybox/getimg.php?image=5436







وبنتابع

شيبه محتشر 07-03-2010 10:56 AM

رد: مودوناتي في ذكرياتي
 
تم اغلاق المدونة
بعد تلقي الانتقادات اللا_عة ( مادري هي ذ والا ز ) والانتقادات المحبطة
والسموحة من المتابعين
:cry:

شيبه محتشر 12-05-2010 11:53 AM

مشكلة الواحد لما يرجع عن قراره


يمكن تصحيح لخطأ


تغيير رأي


بس ساعات الواحد يغير قراره بين لحظة وثانية


وعلشان خاطر بعض الاعضاء لي طلبوا مني ارجع اكتب المدونة


فناوي ارجع اكتبها لهم بسسسس



يعني لي ماعاجبتنه رجااااءاااا لا يدخل ويتحفنا بتعليقاته



والسموحة منك



وانا عارف اول تعليق من منو بييني وبحطه لكم



وانتظروني في القريب العاجل


لنكمل بقية المدونة

:ax:


الساعة الآن 11:47 AM.

Powered by vBulletin® Version 3.8.11 - Copyright ©2002 - 2022, Jelsoft Enterprises Ltd.
لا تتحمل برزة الشحوح أي مسئولية حول المواضيع المنشورة لأنها تعبر عن رأي كاتبها