عرض مشاركة واحدة
قديم 27-05-2010, 02:58 PM   المشاركة رقم : 24
 
الصورة الرمزية شيبه محتشر

شيبه محتشر

๑ . . عضو إمبراطوري . . ๑

شيبه محتشر غير متواجد حالياً










شيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثاليشيبه محتشر نشيط ومثالي

قولوا وراي سبحان الله وبحمده سبحان الله العظيم عدد خلقه ورضى نفسه وزنة

افتراضي

يلست ادور بالنت صور الاكلات
فمن جي اتمنى يسمحوا لي اصحاب الصور



نرجع للماضي القديم

نتكلم ليوم عن وجبة الفطور او الريوق
قبل الواحد مستحيل يطلع من البيت ما متريق والا ما ماكل شي لازم يسرط شي وبعدين يروح المدرسة
مافي شو بخاطرك اسوي لك تبي بيض والا خبز والا زيتون وووو
ويا ويلك لو قلت مو مشتهي تاكل او مالك نفس بالاكل
لي جدامك اسرطه وانت ساكت والا بتييك فره بطاسه والا ملاس والا صحن انت وحظك وشو اقرب شي عند امك
والا تعال لامك وهي متضايجه وتطبخ وياي تتبجبج حذالها
بالمحماس وهو حار على يدك والا ريولك
اختي واخوي لقوو لهم لسعه وحده بريلها وواحد بيده
اونه يتبجبجون لنا
عااااد روحها مالها خلق فيكم
يعني غصبا عليك تاكل
فديتك الغالي تعال على شاني كل ولو شوي
هذا بس سمعناه بالمسلسلات
حتى لو انت زعلان وماتبي تاكل
لازم تاكل والا ياويلك
وكانت فترة الريوق تتكون اكثر شي من الخبز بأنواعه بنتكلم عنه بعدين
وساعات بلاليط ويا بيض والا لقيمات
ويوم الجمعة هريس والا خبيض والا عصيده
الفريد او على قولة المتورطين الثريد ما يكون الا للعشاء


بنتكلم عن الريوق في البداية


خبز الفقارى
خبز كل واسكت
خبز سرعة سرعة
خبز مال كل وقت وكل حين
خبز ينفع بكل الاوقات وبكل المناسبات
خبز الماضي والحاضر والمستقبل

اكيد عرفتوه




خبز رقاق
ماشاء الله عليه احلى خبز واجمل مقرمش
لو حطيته باللبن صار كورن فليكس
لو حطيته بالمرق صار فريد
لو حطيته بالجبن صار سندويش
لو خمصته بالحليب صار بقسم ويا حليب
ينفع مع الشي وبدون شي
اكلة الفقارى والاغنياء
حتى لو شفته جدامك وماكان وياه شي بعد بتاكله

قبل امي الله يحفظها كانت تخبز اول الفجر
ومن نرد من المسيد نيلس حذالها هي تخبز ونحن بالبطن مانتريا الين ما يوصل للصحن من التاوه لليد للحليب للبطن
وبرمضان حليلها تيلس من الظهر للمغرب وهي تخبز حتى توزع للجيران لما يكون زام بيتنا فريد
لانه كل بيت لازم عشر حبات وانت طالع واحسب عدد الجيران


كان يعيبني فريد بيت جيران كانت ام جاسم الله يحفظها ويطول بعمرها احسن وحده تسوي صالونه فمن جي نتريا متى دورهم بالفريد حتى ناكله
ماشاء الله عليها لليوم لما تسوي فريد لازم اروح بيتهم لقافة تعرف انا شو ابي
فحليلها برمضان كل يوم تسوي لي شوي

خبز الرقاق لانه سهل الصنع والعجن والخبز فمن جي سهل كل حد يسويه بس في البداية لازم تكون العينيه وايد والا خبزه محروقة والا ولا
فما عليكم منها بس ما اتوقع حد ما احب هالخبزة










خبز المحلا
اخو خبز الرقاق الدلوع
او الخبز العجيب

مو كل يوم مر لازم في يوم يكون فيه يوم حلو
هني باليوم الحلو امي تسوي لنا محلى
طبعا زيادة على الرقاق شوية زعفران وهيل وشكر فمن جي ينعطي طعم حلو
ولازم ينأكل مع الجبن المالح شوي حتى يستوي طعمه ميه ميه
وما تنأكل الا وهي حاااره لانه طعمها ينفقد اذا بردت الخبزة بعد من التاوه لليد للبطن
يمكن كانت امي تسويه لنا بالمناسبات اكثر مثل يوم الجمعة والا نحن كلنا باجازة ويالسين بالبيت
والا حريم الفريج بييونا فتسويه
انما بصراحة طعم الخبزه عجيب مووول ما ينمل منه ولا يتفوت
اكلة الاغنياء ما تصلح الا اكله الا الصبح واول الصبح ماا ادري ليش بس كنا جي ناكلها الصبح ولازم مع جبن كاسات ومو اي جبن










خبز خمير


خبز الشتاء
خبز الدبس
خبز الدفوة لما نبي ننخش تحت الكوار ندفى
خبز العييينه لي كلها عيين من داخل

كانت تسويها لنا اغلب الاحيان بشتاء لانه طبعا الدبس ما ينحفظ الا للشتاء
ومايسوونها بالغاز لا
لازم كوار عليها ثلاث قواعد وسميت فوقه وتحته مثل الحفره يحطون بالحفرة صخام ويلبقونه ويحطون التاوة الصغيرة فوقه
ويخبزون
فمن جي نحن ننخش تحت الكوار بشتاء تلاقي دفوة عجيبة وكلنا بالمطبخ والكوار بنص المطبخ
وطبعا لازم يكون وياه دبس حااااااار مطبوخ على النار ومكسور فيه بيضتين او ثلاث والا مابتصير الاكلة عجيبة
كنا نغمس الخبزة بالدبس وهو حااار وناكله ولما يبرد الدبس نرد نحطه على الكوار ونحره ونرد نكمل
كانت الخبزة كلها عييين من داخل بس بشتاء كان لها طعم خاااص
ما ادري ماكنا ناكلها بالصيف
يمكن لانه ماشي دبس او لانهم تعودوا عليها بشتاء
لحين قاموا شوي يدلعونها يسونها على الكهربا ويحطون فوقها سمسم والا زعتر
والا يسونها كبر الفطاير












خبز جباب
اموت فيه احبه لما يكون حااار وهو ما مستوي وااايد
يعني بعدها يعينته فيه من داااخل
عججججيب ويا الدبس
ماكانت تكفيني خمس خبزات الصبح
هي يمكن الخبزه الوحيدة لي تخلص عييينهتا لانها لذيذة مثل الفطاير
نسوي لها دبس مثل خبز الخمير وناكله
وبعد كانت اغلبها بشتاء









اللقيمات
كل وشرد
كل تفنن
لقمة نتين ثلاث محد يحسب لك
احسن بيت يسوي لقيمات بيت جيرانا يسوونها عجيييب
والاعجب لما يطرشونها لنا ويا عسل
الله ربي محلااااها من اكله
كنا نلحس الطاسه من عقب العسسل كاننا ماشايفين خير
بس لانه طعمها كان لذيذ بشكل ما تتصورونه كنا ننتظهر اللحظة لي يطرشون لنا فيها ولما يقولون بيت الجيران ياييبن لقيمات
عيينته وطباخه سهل لابعد الحدود
حتى انا لما اكون متفيج اسوي
يمشي بوجبة الريوق
والعصر للفاله
والليل للعشاء
ماشي بكل الاوقات والمناسبات للتحلية
اتوقع اكثركم تمتع باكلها








العصيده
لازم تكون بالسمن والا مووول مابتنفع
محد يضبطها غير مرت ابوي
كانت امي تغااار لما مرت ابوي تطرش لنا وناكلها كلها
بصراحة عمتى احسن وحدة تسوي العصيدة تستوي مثل الكيكة
ماشاء الله عليها
طبعا هذي اكلة الاغنياء
يعني اما تكون في مناسبة او عيد او اجازة
والا مووول محد يسويها لنا
وطبعا مووول ما ناكل من حد لازم تكون من عمتي
والا ما بتنفع
حتى امي سمتها براون
مادري ليش
تعلمنا بالانجليزي انه براون بني
بس من وين يابت امي المسمى مادري











الساقوا
امك وابوك تلاقوا
مادري شو من الطبخه هذي بس جي كانوا يسونها لنا
ولما تكون حارة كنت اييب خبز رقاق واكلها وياها
ولازم يكون فوقها سمن حتى تكون حلوة ولذيذة
يمكن انقرضت شوي هالطبخه لاني مووول ما اشوف حد يسويها الا النادر
حتى قبل كنا ناكله ايام معدوده بس









البلاليط

وجبة كل يوم وكل ساعة
مرة ريوق ومرة عشاء ومرات بين العصر
طباخها مثل العيش ما يبي لها تعب
وكنا ما ناكلها الا فوقها بيض واذا ماشي بيض يعني ما نقرب صوبها
حتى لو كان البيض مقطع
لازم البلاليط ملحف ببيض والا مافي اكل
امي يوم مايكون لها خاطر تطبخ كانت تسويها لنا












بقسم او بقصم
كيف ماتنطقوه على كيفك
كانت وجبة كل وشرد لما مايكون عندك وقت غمص البقصم بالحليب وانت رايح وهذا ريوقك
والا امك متضاربه ويا ابوك وحالفه ماتطبخ
هذي وجبتك
والا مشرد من البيت وابوك والا امك ضاربنك هذي وجبتك
كنا نييبها من المخبز فيها شوية انتيبه او سنوت
طعمها لذيذ ويا الحليب
تعال لو كان الحليب حاااار وخر عنك نص البقسم بالحليب شو يطلعه
تيلس تتحيس
بس بصراحة كانت وجبة خفيفية الا انها عجيبة










الهريس
اكلة كل زمان ومكان
ما شاء الله على امي احسن وحدة تسوي هريس بالعالم الكل يمدح بهريسها يستوي مثل اللبان بحلجك
الجمعة ورمضان والاعياد والمناسبات لازم تكون هريسة امي
صارت وجبة الملوك والافراع والاعياد والاعراس
مايخلوا بيت والا مكان منها
صارت من الموروث الاجتماعي والتقليدي لنا
طعمها لذيذ بالسمن البلدي ولازم يكون معاها شكر والا مووول ما تقربها











الفريد او الثريد على قولة الخقاقين
اخو الهريس من بعيد
واخو الخبز رقاق من قريب
ما يخلو حفل ولا عيد منه
دام انه صحن هريس موجود لازم يكون صحن الفريد حذال
ام جاسم يارتنا الله يخليها احسن وحدة تضبط مقادير الفريد
لا تغرقه مرق ولا تخليه يابس موول مافيه شي
وبنكهة حاااارة وعجيبة
كنا ناكله اما العصر ك فالة والا بليل من مرق الظهر












الفندال

وجبة شتاء لما يطيح المطر ويطلع الفندال
وكل ما كان المطر وايد كل ما كان الفندال حلو
ولما ما يكون حلو كنا نحط بالماي لي ينطبخ فيه شوي شكر
مثل البطاطا بس حزة الريوق يكون فنتك





ردينا نصغر الخط لانه البعض اشتكى من انه الخط وايد كبير






سبحان الله وبحمده

عدد خلقه - ورضا نفسه - وزنة عرشه - ومداد كلماته

رد مع اقتباس