امممممم يعني جي السالفة
زين والله ومشكورة حبيبتي قلب تيبات ع التوضيح
وراح اكمل لخاطر عيونج
لجزء السادس ..
بعد ما رجعن البنات البيت .. ما طاعت روضه انها ترجع عند شمامي بيتهم ... كانت وايد مفتظحه من الموقف الي استوى ... رجعت روضه بيتهم .. و كل فكرها بمبارك .. يالله يالفضيحه .. اللحين لو اموني و العاش قالن له اني انا هي نفسها الي تواجعت معاه ؟؟!!!... يالله .. الله يسامحج يا مريووم .. دوومه لسانحا يحجها .. يالله .. لو مبارك قال لسلطان و الا محمد خويه عن السالفه ... يا ويلي ... شو اسوي اللحين ؟؟!!!.. تمت روضه تهويس بهالسالفه .. هي تفكر في مبارك و شو ممكن يسوي ان عرف انها هي نفسها البنت الي تواجع معاها ... و مبارك يفكر في روضه و في حلاتها ... كل ٍ يغني على ليلالاه ... بالباجر الصبح دخلت يدت مبارك عليه و عسالم و وعتهم الساعه 5 الصبح ... مبارك مب متعود ان حد يوعيه الفير ..
يدت مبارك : حشى مب رقاد ... نشووو نشووو ...
سالم : يدوووه شعندج ..؟؟؟..
يدت مبارك : نش ابااك تسرحني صوب عزبتيه .. مستهمه عحلالي ما اعرف شو الحال عليه من يومين ما سيرت صوبهن ....
سالم : حرااام عليج يدووه .. امس الصبح انتي سارحه صوب عزبتج .. شو هو الطرووق كل يووم ؟؟..
يدت مبارك : عن التحرطيمات نش اقولك نش .. لا و الله ارقعك بهالعيره عراسك مسود الويه .. بسك من الرقاد القايله اللحين ..
سالم : يدوووه مبارك بيسرحج ..
مبارك : شووووو ؟؟؟!!!... اسرح منوه ؟؟ لا بويه انا ظيف عندكم لا اسرح و الا اعطن ...
سالم : ليش هي مب يدتك انت بعد ؟؟!!.. يله حس بمعاناتي لو يوم واحد ...
مبارك : بو غنيم .. نش ود عيوزك ..
يدت مبارك : برووووووووك ... نش نش ..
مبارك : يدووووه ..
يدت مبارك و هي تقطع رمسته : دامك عحشمه نش ...
مبارك : انا شالله بلاني بييت الوثبه حشى ...
سالم : ههههههههههههههههه ...
مبارك : ظرس ..
سالم : يظرسك قبلي ههههههههههههه
مبارك و هو ناش دهمان : خلني ارد بس و بتعرف شغل الله عدل ...
سالم : برووووووووك ...
مبارك : شووو ..
سالم : سلم عالهووووش ...
مبارك : عنلالات صداك ...
يدت مبارك و هي تسحب مبارك من فانيلته : فديتك انا يدتك واجب عليك تنفعني ..
مبارك : انزين يدووه .. بس خليني اغسل ويهي اول ..
يدت مبارك : انقفظ هبابنا ما عندنا وقت ..
مبارك : توها خمس و نص ...
طلعت يدت مبارك من الحجره ... دخل مبارك الحمام و تسبح و تلبس و طلع عند يدته و كانت الساعه 6 و شوي .. لقى امه و خالته و ريل خالته كلهم واعين و يتريقووون .... سلم مبارك عليهم و يلس يتريق ..
يدت مبارك : بروووك نش نش بسك ورانا مسراااح ...
ام مبارك : يالله يا امايه .. خليه يكمل كوووب الحليب .. لاحجه عحلالالج ..
يدت مبارك : لا بعدني بخطف ع عوشه ختيه .. و مناك بخطف عزبتيه ...
مبارك يقول في خاطره ... لا حول بعدني بستحمل لمت العيايز ... الله ينطب الوثبه و الي ايي الوثبه .. راح مبارك بيدته صوب ختها عوشه ... ما انتبه مبارك ان بيت يدته عوشه هو نفسه بيت روضه .. لانه قد شاف بيتهم بس من ورى من السكه .. و وايد بيووت هناك .. و لا طراله انه بيرووح بيت روضه ... وقف مبارك جدام بيت روضه و نزل يدته و نزل معاها ... دخلو البيت و شافو ان حد يالس في الصاله .. كانت يدته عوشه و معاها وحده .. هالبنت كانت عاطيه ظهرها للباب ... يدتهم عوشه يوم شافت ختها يايه صوبها يلست ترحبها ..
يدت روضه : مرحبا الساع مرحبا الساع ... قربي ..
يدت مبارك : السلام عليكم ..
افترت روضه يوم سمعت التراحيب تريد تشوف يدتها بمنوه ترحب ... اول ما افترك شافت مبارك و هو يقود يدته .. هي شافت مبارك بس هو ما شافها لانه كان موخي تحت يشووف يدته و هي تركب الدري .. تغشت روضه و نشت صوب يدت مبارك تسلم عليه ..
روضه : مرحبا الساع .. فديتج يدووه شوي شوي ...
اول ما سمع مبارك صوت روضه عرفها فرفع عينه عليها و هي تظهر من الصاله تسير صوب يدته .. وصلت روضه عندهم و مسكت يدت مبارك من ايدها الثانيه .. و قادتها الين ما وصلن الصاله و مبارك يتحرقص .. افففففففف شو هالصبااح و الله ... دخل مبارك الصاله عقب روضه و يدته و راح صوب يدت روضه و وايها و حبها عراسها ..
يدت روضه : من ولده هذا ؟؟؟...
يدت مبارك : هذا بروووك ولد سلامه بنتي ..
يدت روضه : انا قلت رحامته مب من عيال فاطمه ..
مبارك : وين بروووك الله يهديج .. ريال بلحيتيه و تسميني بروووك ؟؟..
يدت مبارك : شوووو ؟؟؟!!.. الا انت برووك ...
مبارك : هههههههههههه عهواج يدوووه ...
روضه : هههههههههههه ... فديتها يدووه تبى تصغرك ..
مبارك و قلبه يدق : هههههه امبوني صغير ... ما تعديت العشرين بعدني ...
روضه : هههههههههه و انا ما تعديت العشر بعدني
مبارك : ههههههههههه ...
يلست يدت مبارك عند ختها يدت روضه و يسولفن و يتقهوين ... نشت روضه و صبت حق مبارك حليب ..
مبارك : تسلمين الغاليه ..
روضه و هي مستحيه : ربي يسلمك ..
يدت روضه : ودي .. رويض شعندج متقبعه بالشيله ... ما تقولين غير ساحره بتطير ...
نقع مبارك من الظحك و بغى يغص بالحليب يوم سمع تعليق يدت روضه ...
روضه : حراام عليج يدوووه ...
يدت مبارك : عووشه خاويني صوب العزبه بتقصرين الدوب عليه هناك ...
يدت روضه : امبوني بخاويج .. حتى روضه امبونها بتخاوينا ...
مبارك فرحان .... و روضه مرتبشه .. ما كانت تدري ان مبارك هو الي بيسرحهم العزبه ..
روضه : لا خلالاص يدوووه ... انا كنت اتحسب الدريول هو بيوديكن ... خلاص
مبارك : لا ارجوج ما فيني استحملهن برووحي ... انا وحده و يالله يالله امشي عمري معاها ...
روضه : هههههههههههههههه ... شو تقصد ؟؟!!..
مبارك : لالالالالالا .. ما اقصد شي سلامتج هههههههههههه
و في النهايه سرحو العزبه العيايز و روضه و مبارك ... ركبت روضه و يدتها ورى .. و يدت مبارك جدام ..
و في الدرب شغل مبارك المسجل ..
يدت مبارك : بروووك .. شو هذا ما عندك شي عدل ؟؟!!.. عنبوه حاطلنا هذا العله .. ما تقول غير عنز تطرب ..
مبارك : هههههههههههه ... انزين شو تبيني احطلج ..؟؟
يدت روضه : .. عليك بميحد ..
مبارك : ههههههههههههههههه .. هب هينات العيايز ... انشالله يدووووه ...
و حط مبارك مقاطع لميحد حمد ..( احبك يا نظر عيني غناتي .. و احب الارض لي تمشي عليها .. و احبك حتى اكثر من حياتي ... و اسوم الروح لجلك و اشتريها ..)... يلست يدت مبارك و يدت روضه يسولفن الين ما وصلووو العزب .. طول الطريج و روضه ميته عشكل مبارك ... اول مره تشووفه و هو طاوي السفره .. عان لا بس كندووره لا هي بيضى و لا هي بنيه .. كان شكله يذبح ... مره كان مبارك يكلم يدته و مفتر صوبها ... شافت روضه شعره تحت السفره .. يالله .. تمت ماسكه عمرها ... كانت تحس ان اديها بتخونه ... خاطرها تلمس شعره ... يا ويلي .. افففففففف ... انا ليش ركبت وراه ؟؟!!.. عسى هالوقت يمظي عخير .. و اول ما وصلووو العزب نزلت روضه بسرعه .. و من عقب التهت مع يداتها .. و لا انتبهت لمبارك .. في العزبه كانت هناك غافه متعودات يداتها ييلسن تحتها .. و كانن يالسات .. ياهن مبارك و يلس عندهن ... و يلس يسوولف عن يداته .. و شوي روضه تشاركهم في السوالف و مرات كانت تسكت و تسمع بس ... حس مبارك ان روضه فيها شي .. امممممم ... ممكن تكون معجبه ؟؟؟!!!... اوكي بشووف .. شوي و يرن تيلفون مبارك ...
مبارك : مرحبا ..
...: مرحبا مليار و زووود ...
مبارك :ههههههههه شحالك ؟؟..
.... : اول اول شي ... صباح الخير ..
مبارك : ههههههه صباح النور و السروور ..
... : شحالك حبيبي ؟؟..
مبارك : بخير و سهاله ... و من صوبكم الغالييين ؟؟؟..
... : مب اوكيه ..
مبارك : افا ليش عاد ..؟؟.
.... : ليش ما كلمتني امس ؟؟..
مبارك : السمووحه منكم و الله ... بايت عند قوم خالتيه و لا فظيت ..
.... : اها ... شو تسوي اللحين ؟؟..
مبارك : شوي مشغول ..
... : و شو شاغلنك انشالله ؟؟..
مبارك : ههههههههههههه .. مودي يدتيه العزبه ..
.... : اها ..
مبارك : اقول بدلك بعدين ..
... : اوكي بستناك ..
مبارك : في وداعت الرحمن ..
كانت روضه شاكه انه يكلم وحده بس بعدين تأكدت ان الي يكلمها وحده مب واحد .... وايد حز في خاطرها هالشي ... مب من عادت مبارك انه يرد عحد من ربيعاته جدام هله بس هو كان يريد يشوف ردت فعل روضه .. بس طبعا روضه مب مهتمه .... و الله لا ايييب راسها هالمنصوريه ... تمت روضه بالنسبه لمبارك مثل التحدي .. خاطره في هالبنت ... نشت روضه عنهم بترووح الخيمه تيب شي ليدتها ... تعلث مبارك انه بيرووح السياره .. و لحق روضه فالخيمه .. انتبهت روضه ان مبارك وراها ..
مبارك : اممممممم .. السموحه منج بس بغيتج في سالفه .. و لا بغيت اكلمج جدام يداتي ..
روضه و قلبها يدق طبووول : عونك ..
مبارك : عانج الرب الغاليه ... امممممم ... ما ادري اذا عرفتيني و الا لا ؟؟..
روضه و هي مستحيه من الخاطر : ... هيه عرفتك ..
مبارك : و الله ؟؟؟..
روضه : انا اااسفه اذا كانت السالفه وصلت لخاواتك بس و الله مب انا الي ...
مبارك : لحظه لحظه ... شو الي وصل لخاواتي ..
روضه : ترى امس يوم كنا نتمشى و انت خطفت عدالنا .. البنات الي كانن عندي ذاك اليوم هن الي عرفنك و قالن انك انت نفس الشخص الي ... المهم و خا واتك كانن عندنا و عرفن بالسالفه ...
مبارك و هو ما كان مستعد لهالشي : اممممممم ... يعني انتي يوم شفتيني في بيت خالتيه ما عرفتيني ؟؟؟.
روضه : لا .. و السموووحه منك عالكلالالام و عالسالفه الي استوت ذاك اليوووم ..
مبارك : ما حصل الا كل خير .. و بعدين طلعتي من هلنا .. يعني عادي ... هههههههههه و ان بغيتي ترى الفرد موجود ..
روضه و هي مستحيه : هههههههههههههه .. و الله السموحه منك
مبارك : لا عادي افا عليج .... بس يالريم ..
روضه و هي حاز في خاطرها ان مبارك نعتها بالريم : الريم ؟؟!!!!... لا الشيخ انا روضه مب الريم ..
مبارك : لا .. انا اعرف انج رووضه .. بس انتي فاهمه الموضوع غلط ...
روضه : لا عادي يا فلالالان ... انت من كثر ما تكلم البنات ما تعرف اسمائهن حتى ..
مبارك : و انتي شدراج اني اكلم بنات وايد ؟؟؟!!!!..
ما عرفت روضه شو تقوله ... سكتت و طلعت تربع عنه صوب يداتها .. مات مبارك .. يعني روضه سألت عني ... يعني مهتمه بي ... امممممممم ... فاتحت خير انشالله ... راح مبارك السياره و استنا يداته الين ما خلصن و ركبن السياره و روضه معاهن .. اول ما ركبن تحرك مبارك و تم يسمع الاغاني مالت ميحد ... و يوم يت هالغنيه طول عليها ( ااه وا ويلاه من خل ٍ ظلووم ..ظالمني و الظلم نهجه حرااام .. ) عرفت روضه انها المعنايه بهالغنيه و طنشته ... بس تم قلبها يدق بالقووو .... نزل مبارك روضه و يدتها و راح هو ويدته بيت خالته .. كان يتوقع مبارك ان روضه بتيهم في بيت خالتها بس هي ما راحت صوبهم ... تم يحوط بسيارته جدام بيتهم .. على امل انه يشوفها .. بس امله خاب و لا قدر انه يعرف أي شي عن روضه .. و رجعووو رماح باليمعه العصر ... مره هالاسبووع كئيب على مبارك .. خاطره يعرف أي شي عن روضه .. اففففففففف يالله شو هالحاله ؟؟.. يوم الاثنين الساعه 2 الصبح كتب مبارك قصيده عانبها روضه ..
كان مبارك يريد يوصل هالقصيده صوب روضه .. بس ما عرف كيف ممكن يوصلها لها .. ما قدر يوقل لخاواته لانهن بيفضحنه في العايله كلها .... يالله كيف ...
مبارك : خليفه .. اللحين شو اسوي ؟؟..
خليفه : اففففففف ... يا بويه حشرتنا حشى ..
مبارك : خلوووف دخيلك قولي ..
خليفه : مبارك .. انت تحبها .؟؟.
مبارك : شوووووو ؟؟؟!!... احبها !!!... لا طبعا ..
خليفه : عيل شعندك عليها ..
مبارك : ياخي ذابحتني هالبنت ... الا اكلمها ..
خليفه : لك الي تباه مني ان كلمته ...
مبارك : و عليه رفجه انها بتكلمني ..
خليفه : بروووك هالمنصوريه هب هينه ..
مبارك : و رفجه اني اظوي راسها ... و رفجت بوخليفه ..
خليفه : يا ريال ..
مبارك : ما عليه ... انا و انت و الزمن ..
خليفه : خلاص تم ...
تم مبارك يفكر في طريقه يوصل بها الرساله صوب روضه و لا هب عارف كيف ... خلالاص انا برووح الوثبه و ربي يساعدني .. و انشالله اقدر اوصلها لها .... يوم الثلاثا راح مبارك الوثبه و سلم عخالته و يدته ...
مبارك : هاه يدووه ما تبيني اوديج بقعه ؟؟..
يدت مبارك : لا استريح ما اريدك توديني بقعه ..
مبارك : ليش عاد ؟؟..
يدت مبارك : عوشه ختيه بتيني اللحين ...
تفاءل مبارك .. اكيد روضه بتي مع يدتها .. و تم مبارك مرتز يستنا روضه ... بس يت يدت روضه بدون روضه .. يالله يا هالحظ النحس ... افففففففففف ... شو اسوي اللحين ... يلست يدت روضه وايد عند ختها ..
يدت روضه : عاد انا بترخص منكم اللحين ..
يدت مبارك : وين تبين ؟؟..
يدت روضه : فديتها روضوه برووحها في البيت برووح عندها ...
استغل مبارك الوضع : خلاص يدووه انا بوديج بيتج ...
يدت روضه : اسميك بتتيمل فيني و الله ... حليله رزاق تعبان ما يرووم يرد عليه مره ثانيه ..
مبارك : لا افا عليج يدووه واجبج علينا ..
ودى مبارك يدت روضه البيت .. اول ما دخلوو زقرت يدت روضه روضه عشان تقرب بمبارك ..
روضه : مرحبا السااع ..
مبارك : مرحبابج زووود ... شحالج .. روضه ؟؟..
روضه و هي منتبه لحركت مبارك : بخير ربي يسلمك ...
دخلت يدت روضه حجرتها عشان تعق عباتها .. يلس مبارك عند المخدات و تقهوي .. و قبل لا ينش خش الورقه تحت صنية القهوه ... انتبهت روضه لحركته .. بس ما عرفت هو شو حط .. نش مبارك بسرعه و ركب سيارته و راح عنهم ... نشت روضه و شافت هو شو حط تحت الصنيه .... لقتها ورقه .. فتحتها و لقت فيها هالقصيده :
انشدج يا لغلا ثواني بس في حظورج ... قــاصـد ٍ لطفـج طـــالب ٍ باقي احقوقي
والسموحه بزلت اللسان والعذر منج ... و لكن حبج غزى ذا النفس و عروقي
و صرت اليوم في هالـدرب معبـودج ... ابفصح عن شعوري و اعترف بعشقي
انا إنسان ذايـب ٍ ذا اليـوم في حبـج ... و انـهدر عـمـري بالصبـر و عـز نفسي
مـانـي بهيـن فـي ديـرتي مثـل دارج ... و يـامـا ميـالـس بــالريـايـيـل اتـفـز لــي
و لكنه ما انـكـتـبـلي العز في ديارج ... و انـا قصـدتـج و حـيـلـتـي قـلبي و حبي
ارتــجي من المولى يرزقـني بحبـج ... منـيـتي حبـج منـيـتي شوفـتج و اعذريني
من غزاني حبج السامي و شووقج ... اخـتـلط دمـي بـشـوقـي و اشـتـعـل حــبي
وأصبحت في هاليوم غارقة ٍ في حظورج ... ألـتمس حبل أنجى لي منه ينجـيـني
رجوتـي رجـوة المظـلـوم في حـبـج ... يـالله دخيلج ارحمي ذا النفس و ارحميني
ارحمي خل ٍ عايش الليل في عيونج ... ارحميني يا من ملكتي العين و أحلامي
أنتي منـاة النـفس و اليـوم عانـلج ... اطـلب احـظـورج بـالمحبـة فـي حـيـاتـــي
طلبتج فيها .. مبارك الخييلي
انصدمت روضه من القصيده تمت تقراها مية ألف مره ... في هالوقت كان مبارك عالخط رايح صوب رماح .. و قلبه يدق .. يالله شو بيكون رد فعلها ؟؟..!!... يالله ..
كان خاطر روضه انها تصدق مبارك .. و تصدق اها هي المعنايه بهالقصيده .. بس هي تعرف ان مبارك يريد ياخذ شمامي بنت خالته .... كيف ممكن تخون ربيعتها عشان واحد .. و هي متأكده ان هالواحد ما يريد الا يتسلابها .. مثل أي وحده مرت في حياته ... ما عرفت روضه شو تسوي او حق منوه تقول ... اكيد ما بقول حق شمامي ... يالله شو هالحاله ؟؟!!!.. تمت روضه مرتبشه ... مبارك بيكون ريل اعز ربيعاتي ... انا لازم احط هالانسان عند حد ... عشان شمامي .. و الله ما تستاهل ان الله يبلاها واحد مثل مبارك ... تمت روضه تقرى قصيدة مبارك ثلاث ايام .. و مبارك مب عارف الي سواه صح و الا لا ؟؟.. اول مره فحياة مبارك ان تبدر منه الخطوه الاولى صوب أي بنت ... بس هالمنصوريه تستاهل ... و ترخص النفس و الروح فدوى عيونها ... شو ممكن روضه تسوي ؟؟؟.. لو قالت حق بنات خالته فاطمه ؟؟؟.. ..
بعد ما تعبت روضه من كثر ما تفكر في مبارك ... ردن على قصيدته بقصيده ... بس تمت محتاره كيف ممكن توصلها له ..
وايد تعبت نفسية روضه .. حتى ما كلمت شمامي .. خلاص ظاجت من هالوضع ... اول من خطر في بالها كنت ميثه بنت عمها ... ما في غير ميثه هي الي بتساعدني ...راحت روضه صوب ميثه و قالتلها كل السالفه ..
ميثه : فدييييييت قلبج و الله .. و ليش ما قلتيلي اول ما استوت السالفه ؟؟؟..
روضه : ياويلي يا ميثوه شو اسوي الحين ...؟؟؟!!!..
ميثه : لا رويض هو من ردج بيفهم ان ماله مجال معاج ..
روضه : ظنج ؟؟..
ميثه : هيه ..
روضه : اوكي ... بس كيف بوصل الرد لمبارك ؟؟..
ميثه : الي خلاه ايوصلج القصيده .. صدقيني اكيد بيرجع عشان يعرف الرد .. و بيوصلج هو ... بس انتي لا تسوين شي تندمين عليه ...
روضه : شو تقصدين ؟؟؟..
ميثه : اقصد .. لا تتهورين و تتصليله ...
روضه : يخسي الا هو ... هذا الي قاصر بعد ... ميثوه انتي تتوقعين اني ممكن انزل نفسي لهالمستوى عشان واحد ؟؟؟.
ميثه : لا انا اعرفج زين ... بس رويض الريال من يحط وحده في باله .. يسوي المستحيل عشانها ... و انتي بروحج قلتي انه بياخذ شمامي ... يعني مالج امل معاه ... لا تقولين ان كلمني بياخذني ..
روضه : ميثوه صح انا صغيره ... بس حشمة هليه فووق لكل ريال .. و ما في واحد يكلم وحده وياخذها .. انا اعرف هالشي ... بس انا الي مسبوي لو عرفت شمامي ان مبارك يسوي هالحركات معايه .. شو بتكون نظرتها لي ؟؟!!.. و الله انها بتكرهني ..
ميثه : شوف روضه .. كلنا نعرف ان ميثوه تحب راشد خو مبارك .. بس ما عليج من البنات .. صدقيني ان خطبها مبارك رسمي و الله بطب راشد و حبها له ... البنات في هالزمان يدورن الريال .. عادي وحده تبيع هلها عشان واحد .. تذكرين سالفة شموووس يوم شردت مع الهاملي ... شو فظحت هلها .. خذها شهرين و ردها بيت هلها مطلقه ..
روضه : مب الا شموس وايد الي هذي سواياهن .. بس انا مب منهن ... انا حاشمه هليه في غيابهم زوود عن حظورهم ... يالله خاواتي قبلي ما نزلن راس هليه ايي اليوم انا و انزله عشان واحد لعاب .. لا و الله ما طرالي ..
واايد فرحت ميثه لكلام روضه ... ميثه مب صغيره بس ما الله كتبلها نصيب اللين اللحين ... روضه وايد ارتاحت من كلمت ميثه .. الحمدلله لقيت حد يفهمني و ارتاح بالكلالام معاه ..
كان مبارك يريد يعرف ردت فعل روضه ... مستحيل بعد هالقصيده ما تحن ...اففففففففف ... الله يصبرني اللين ما اعرف ردها ... مرت الايام و مبارك مب عارف كيف ممكن يعرف رد روضه له ... بعد اسبووع تعبت يدته ... و ودوها مستشفى خليفه ... اول ما عرفت ام مبارك روحت صوب امها هي و راشد ولدها .. لقو هناك فاطمه خت سلامه ام مبارك و شمامي و وديمه ختها و علي خوهن ... اول ما رجع مبارك من الدوام قالن له خاواته عن يدته .. اول ما عرف مبارك رووح سيده صوبهم المستشفى ... و لقى غير هله عرب ما يعرفهم .. مسكينه يدت مبارك .. يتها جلطت سكر .. كانت ممكن انها تذبحها او حتى تشلها .. بس الحمدلله الله ستر و مرة هالمره عخير .. تمت يدت مبارك مرقده في المستشفى ... تمت ام مبارك و ام شمامي يتناوبن عالميت عندها .... كان مبارك كل يوم عندهم .. و في هالفتره تعلق مبارك بيدته واااايد ... عمره ما فكر انه ممكن يكون جريب من يدته بهالطريقه ... في يوم يت ام روضه صوب ختها في المستشفى و معاها ام روضه و روضه و كان مودنهن سلطان خو روضه ... كان مبارك موجود .. عرف روضه من اول ما دخلت عليهم الحجره ... سلموووو عالموجودين .. روضه ما كانت تتوقع انها ممكن تلاقي مبارك في المستشفى .. تشاوف مبارك مع سلطان خو روضه .. و كانت هذي بداية صداقه بينهم .. لان وايد من طباع سلطان نفس طباع مبارك .. و هم يالسين اتصل الشغل بسلطان .. كانوو يريدونه في الدواام ... سلطان متخرج من سنه من كلية الشرطه ... و كان يشتغل في العمليات في بوظبي ...
سلطان : لا حووووول ...
ام روضه : شو بلاك فديتك ؟؟..!!
سلطان : اتصلوبي يبوني في الدوام ...
ام روضه : واقع يبونك ضروري ... روووح صوبهم ..
سلطان : انزين و انتن منوه بيردكن الوثبه ؟؟..
ام روضه : ودي اتصل بواحد من خوانك .. و الا خلهم يطرشوون رزاق و الا يمعه صوبنا ...
مبارك : لا عنبوه بتعنون العرب من الوثبه .. انا بديكن خالتيه ..
سلطان : لا وين اتدق خط الوثبه و ترد بعد .. لا بتصل بالدريول ايي و يشلهن ..
مبارك : و الله ما تعنيها يالسياره .. انا بهن و بلاهن بروووح الوثبه ..
سلطان : صدق و الا ؟؟..
مبارك : لا و الله امبوني برووح الوثبه .... يبون قشار من هناك .. و ياخي اريد اتسبح .. حشى احس عمري ميعف ..هههه
سلطان : ههههههههههه ...
روضه .. يا ويل حالي ... يوم انت ميعف جذيه .. عيل يوم ما تكون ميعف كيف تكون ..؟؟!!.... كانت روضه تحاول انها ما تفكر بمبارك ... عشان شمامي ... كل ما يخطر مبارك على بالها تتذكر شمامي ... تذكرت روضه القصيده و ردها عمبارك ..... اوكي هذي فرصتيه عشان اوصله الرد ... كانت روضه حافظه القصيده بس ما كان عندها ورقه عشان تكتب عليها الرد ... و هم طالعين من حجرة يدت مبارك .. راحت روضه صوب الممرضه و خذت من عندها ورقه ... اوكي في الدرب بكتبها له و بخليها في السياره عشان يعرف ردي ... اول ما ركبن السياره هي و امها و يدتها .. فتحت روضه شنطتها ادور على القلم ... انا متأكده ان في قلم في الشنطه ... بس ما لقت روضه قلم ... اففففففف شوو هالنحاسه ... بس لقت قلم تحديد مال الرووج الي حاطتنه ... يالله ماشي الا انت ... و بقلم التحديد كتبت روضه حق مبارك الرد عالورقه الي خذتها من الممرضه ... طول الدرب كان مبارك منتبه لروضه .. كل شوي كان يشوفها من المنظره الي جدامه .. كان يشوفها تكتب شي .. عرف انها تكتبه الرد كان قلبه يقوله انها تكتبله الرد ... يالله متى بوصل الوثبه عشان اعرف الرد .. كتبت روضه الرد و تمت محتاره ما تعرف وين تحط الورقه ... ... اول ما وصلهم مبارك البيت نزلت امها و يدتها .. تأخرت روضه و هي تنزل .. و هي نازله فرت الورقه عالسيت .. تم قلبها يدق بالقو .. و الي ذبحها انها عرفت ان مبارك انتبه لها ... حست ان عينها طاحت ععين مبارك ... حست بشي غير ... اول مره تحس هالشي ... انتبه مبارك لحركة روضه ... ههههههه هالبنت ما تعرف تخرب ... هههههههه ... أي حد ممكن ينتبه انها فرت ورقه .. بس الحمدلله ان عيايزها ما انتبهن ...
ام روضه : قرب فديتك بتتقهوي عندنا ...
مبارك : جريب خالتيه .. هبابني لروووح اشل قشارهم و ارد المستشفى ...
ام روضه : يالله عسى ربي يحفظك الغالي ...
مبارك : انشالله امييين ... هاه شي في الخاطر من جدانا ..؟؟..
يدت روضه : سلالامت راسك ولديه .. رد السلالالام ععربانك ..
مبارك : سلامن يبلغ يدوووه .. خالفتني العافيه عليكم ..
ركب مبارك سيارته و اول ما تحرك افتر صوب السيت الوراني و شل الورقه الي فرتها روضه .... لقاها كاتبتله قصيده بقلم التحديد
مبارك : هههههههههههههه ... اسميكن صدق بنات ... ما لقت قلم كتبت بالروووج ...
قرى مبارك القصيده و انصدم ...
يا من قصدني ما ودي اهينك ... قدرك عال و حشمتك فوق راسي
وبالحل في كل منطوق ٍبدر منك ... واحترم شعورك و لانك اليوم معبودي
انا انسانة ٍمالي علم بشعورك .... و العذر ما انهدر عمرك من اسباب
لان مالي علم بحبك و مكنونك .... و علم الغيب امر ٍانكتب عند ربي
واشهد ان قلوب العذارى اتفزلك ... ماهي الميالس بالرياييل في ذمتي
والكل عايش ٍفي العز في دارك ... و لدارك اليوم فضل ٍعلى دياري
ترتجي من المولى يلطف بحبك ... و منيتك شوفت الحب من صوبي
و التمني ما فاد انسان من قبلك ... عيش ذا الواقع و ارحم فوادي
ترتجي رجوة المظلوم في حبك ... و انا الظالم في الامر وماهو بعلمي
تشتكي من اسباب الهوى و حبك ... غزاك الحب بس ماني الغازي
و بالمحبه تطلب احظوري في حياتك ... و لكن امر الفواد ما هو بايدي
و في الختام انسى ذا الحب و احلامك .. لان الامل منعدم في حب من صوبي
طلبتك فيها .... المنصوريه ..
انصدم مبارك من رد روضه ... مستحيل ... ما اصدق .. انا تردني وحده ؟؟؟!!!... وايد حزت في خاطر مبارك قصيدت روضه .. ما كان يتوقع هالرد ... جن حد يطعنه بسجين ... انزين ليش ؟؟.. شوو مب عايبنها ؟؟.. انا الغلطان اني عبرت وحده شراتها .. زوالها .. حرام لا اتعرف على شيخة شيختها بعد ...
مرت الايام و طلعت يدت مبارك من المستشفى .. كان مبارك كل ما يقدر يرووح صوبها في الوثبه .. كان كل ما يوصل الوثبه يتذكر روضه .. كان يتعمد انه ما يخطف من جدام بيتهم و الا حتى انه يرووح بيتهم ... كانت الورقه الي كاتبتنها روضه له اللين اليوم عنده .. كان حاطنها في السياره عنده ... ما كان يحس بعمره الا هو يطلعها و يقراها ... و تم عهالحال شهر و عشر ايام من ااخر مره شاف فيها روضه ... و في نفس الوقت .. كانت روضه تفكر في مبارك ... يالله .. مبارك من وصلتله الرد ما يانا .. و لا حاول انه يشوفها ... هي كانت تدري انه ايي الوثبه لان شمامي كانت تقولها ... و اكثر من مره تكلم سلطان خوها عنه .. و في مره كانت روضه عند سلطان في الصاله و كان مبارك متصل بسلطان .. تم قلبها يدق .. معقول تكون تعلقت بمبارك ؟؟!!.. اممممممم ... هو هالحاله و الله .. عسى ربي يهديني انشالله .... . في يوم اتصل سلطان خو روضه بمبارك الي تم من ربع مبارك و دوومهم يتلاقون في بوظبي و الا في العزب و الافي العين .. كانووو كل ما يقدروون يتشاوفوون ... اتصل سلطان بمبارك و عزمه عالعشى .. كانوو مسوين عزيمه عردت خو روضه عبدالله .. كان في دووره برى البلالاد.. حاول مبارك انه يتعلث بأي شي عشان ما ايي .. و خاصة انه عرف سلطان و تم من ربعه .. و لا يريد انه يغلط عليه ... بس هو ما يضمن نفسه شووو ممكن يسوي او يستوي به لو شاف روضه .. بينه و بين نفسه هو ندم على موقفه مع روضه ... بس هو يريدها و في نفس الوقت ما يريد يعرس بها .... صدق هالبنت مسويه شي مب طبيعي فيني ... في النهايه وافق مبارك انه اييهم يوم الخميس عشان العزيمه ... كان يوم الاثنين و الكل يالس في بيت هل مبارك ...
ام مبارك : مبارك قالولك ان عمك خطب حق يمعه ولده ..؟؟
مبارك : هيه قالولي ... خطب وحده ظاهريه صح ؟؟..
ام مبارك : هيه ... الفال لك ..
مبارك و هو يتهبل عأمه : الفال لي عشووه ؟؟؟..
ام مبارك : العرس بعد عشووه ..؟؟
امنه : لا امايه غسلي ايدج من بروووك ....
مبارك : ليش عاد ؟؟.. قالولج بتم عازب طول حياتي ..؟؟؟
امنه : اكيد لا ... بس انت بعدك ما فججت راسك ... بعدهن البنات قاطعات قلبك ..
مبارك : شووووووووو ؟؟؟... شووو هالرمسه بعد .. قطع الله لسانج ..
امنه : يالله عليك ... ليش انا ما قلت الا الحقيقه ... الكل يعرف انك ما تصبر عن البنات .. و مغازلجي درجه اولى بعد ..
اول مره مبارك يسمع راي خته فيه عمره ما كان يتوقع انه طايح من عينها لهالدرجه ...
مبارك : و منوووه هيلا الكل الي يعرفوون ؟؟؟..
عوشه : قوول منوه ما يعرف .... حشى يسد موقف مع بنات الوثبه ... و الله انحرقت ويوهنا يوم يقوللنا عن السالفه ..
ام مبارك : شوو سالفة بنات الوثبه بعد ... يا ويلي يا مبارك بنات الوثبه كلهن من هليه و فظحتني عندهن بعد ؟؟؟!!!...
مبارك : اول شي انا لا فظحتج و لا شي ... بعدين غلامتين و الله ان ما لميتن ثميتكن حرااام يا بالعقااال عجبوودكن ...
امنه : يالله يا عوافتك ...
مبارك : جب جب ...
راشد و هو توه داخل الصاله ... سلم عليهم و يلس ..
راشد : زين يوم اني لقيتك هنيه ... حشى مغير كل ارقامك .. من يومين و انا ادورك ..
مبارك : عونك بو سنيده ... رب ما شر ؟؟..
راشد : الشر ما يصيبك .. الا انا بغيتك انت و امي في سالفه ..
امنه : يا سلالام و احنا شوو يعني ..؟؟؟؟ ما لنا رب في هالبيت ..
راشد : بتعرفين بالسالفه ... لا تاكلين قرصج نيّ ..
امنه : شوو شوو .. يله قوول ...
راشد : امممممممممم ... اريد اعرس ..
الكل انصدم من راشد و قراره المفاجأ ..
مبارك و هو فرحان من الخاطر : عاشوووو ... بوسنيده يريد يعرس ..
راشد : انا رمست بويه بس هو قالي لازم اترخص منك اول ...
مبارك : ليش عاااد ؟؟؟...
راشد : لانك البجر ... قال الوالد جاد انك تبى تعرس و الا شي ... قال ان جنك بتعرس انت امبداي قبلي ..
مبارك : لا افا عليك بو سنيد و لو كنت اريد اعرس حراام يا عرسك يستوي قبل عرسي
راشد : يعني انت خاطرك في العرس و الا ناوله ..؟؟!!!!..
مبارك : لا مره ما طرالي لا العرس و لا طاريه ...
ام مبارك : بتخبركم ... ترمسون جنه مره العرس باجر ... عيب عليكم .. حد يعطيني ويه ..
امنه : لالالالالا ... خلوني استوعب ... رشووود بتعرس ..
راشد : الله لا بليتنا ..
مبارك : هههههههههههه ... طبهن طبهن عنك ..... الانويت عالعرووس و الا بتخلي عيوزك تتنقالك ؟؟..
راشد : اممممممم ... لا نويت عليها ... و اريد اشاور امي عليها .. انا شاورت بويه عليها و وافق
ام مبارك : الحين تشاور امك ... و ليش معور راسك بعد ... يوم انك ظويت وحده من هالخايسات و تباها شعنه تشاورني بعد ...؟؟!!!... عندك خوك و بوك خلهم يخطبونها لك يوم انك شاورتهم ...
ما كان يتوقع راشد ان امه بتزعل لهالدرجه و هي حتى بعدها ما عرفت هو منوه بيخطب ... نشت ام مبارك و هي حاز في خاطرها ... نش راشد و راها و لوى عليها ...
راشد : فديييييييييتج امايه و الله السمووحه منج .... ما دريتبج انج بتزعلين ... فديييييت روووحج نفاد الحرمه كله و لا ام مبارك ... و الله ما تحطين في خاطر و الله ...
ام مبارك : ظك عني ... لالالالالالالا .. ظك ظك ظك هنه
مبارك : و رفجه انج تردين و رفجه ..
ام مبارك : بروووك لم ثمك .. محد خرب عيالي الا انت ..
مبارك و هو حاز في خاطره رمست امه : ههههههههههههههه ... ما عليه .. بس رفجت عليج انج تردين و تيلسين عندنا
ام مبارك : ما اريد .. رشووود ظك عني ...
مبارك : و رفجت بوخليفه انج تيلسين ..
يوم رفج مبارك ببو خليفه رجعت امه و يلست و يلس راشد عدالها ..
راشد : انزين انتي ما تنشدتيني عن الحرمه ...
ام مبارك : و منيه هذي الي تبى تظويها ؟؟..
راشد : امممممممممممم ..... وديمه ..
ام مبارك : شو وديمه ؟؟؟..
راشد : بنت خالتيه فاطمه ....
الكل انصدم بقرار راشد ... خاواته من صدمتهن ما قدرن يقولن شي و قبلهن مبارك ... حتى امه انصدمت ... وديمه هي خت شمامي ... عمرها 18 توها ثنويه عامه السنه ... هاااديه وايد و رقيقه .. عظمتها شوي عوده .. بس كلها على بعظها حلوه ... فيها عذووبه ما شافها راشد في حد ... كان راشد متعلق في شمامي ... بس كان يعرف ان مبارك يوم بيعزم عالعرس بيختارها ... عمره راشد ما شاف وديمه ... ما كانت متخالطه معاهم شرات شمامي ... شافها بس في المستشفى يوم ترقدت يدتهم .. و من ذاك اليووم و وديمه فخاطر راشد ...
ام مبارك : هذي الساعه المبارك ...
العاش : اسميك عرفت تنقي ... ودووم مره تنفعلك ..
راشد : اممممممم ... بس امايه ظنج قوم خالتيه بيوافقووون ؟؟؟!!..
مبارك : غصبا عنهم بيوافقوون ... بيظوون بوسنيد .. بس عليهم ..
امنه : ليش هم بيلقوون احسن منك حق وديمه ؟؟..
ام مبارك : لا فديتها فاطمه ما بتردني ...
و اتفقت ام مبارك انها يوم الخميس بترووح هي و مبارك الوثبه و بيرمسونهم في الخطبه ...
*********
سبحان الله .. منوه كان يتوقع ان راشد يريد وديمه خت شمامي ... شووو تتوقعن بتكووون ردت فعل شمامي ... و الا وديمه نفسها بتوافق على راشد ؟؟؟
اممممممممم ... شووو ممكن يستوي يوم الخميس ؟؟..
ظنكن مبارك بيشووووف روضه ...؟؟؟
في نفس اليوم الي قال فيه راشد انه يريد وديمه بنت خالته ... محد من هل البيت ياه نوووم الكل يفكر بهالشي ... عدى عبيد الي كان مب مهتم ... عبيد هذا اصغر الاولاد في عايله مبارك ... عمره 19 سنه السنه الماضيه خلص الثانويه .. رقيب دارس تبع كلية الشرطه و يدرس في التقنيه ... عبيد راعي دراسه لا له دخل لا بالبنات و لا بالحواطه .. بس راعي نت درجه اولى ... يبات و يصبح عالكمبيوتر ... مب متخالط مع الناس واايد ... شكله وااايد حلووو ... وايد ياخذ من شكل مبارك يوم كان مبارك في نفس سنه ... كان عبيد اقرب واحد من خوانه لخاواته .. لانه دوووم في البيت و كانن وايد يرتاحن معاه
دخلت امنه و عوشه على عبيد حجرته ... و كان عبيد يالس عالنت
امنه : عبوووود عبووود ...
عبيد : عيوون عبووود و الله
عوشه : عندي لك خبر يسوى ملاييييييييين ...
امنه : ايه عويش مالج دخل انا بقوووله .....
عوشه : لا و الله ؟؟؟.. و ليش عاد ؟؟..
امنه : لاني العووود و اكبر منج .. و بس و انجبي ..
عوشه و هي تشوف عبيد عاطنهن بولابس و لا مهتم منهم و لا من حشرتهن ... : طاعي خوج انتي .. و لا مبمهتم ..
امنه : بيموت ان ما طرقع صوبعه ...
عبيد : لا حوووول ... شو فيكن ؟؟؟
عوشه : رشوووود بيعرس ...
امنه : اااييييييه يالدبه ... و تظرب عوشه عظهرها ...
عبيد : منو رشود ؟؟؟
امنه : راشد خويه منو بعد ...
عبيد : و الله ..؟؟؟ .. و منو بياخذ انشالله ...؟؟؟
عوشه : انت منو تتوقع ؟؟؟... و تظحك ظحكه خبيثه .. هههههههههههه
عبيد : و ليش هالخبث بعد ..؟؟؟!!!...
امنه : شووف ان عرفتها لك الي تباه ...
عبيد : امممممممممممم .... وحده اعرفها ؟؟..
عوشه : هيه تعرفها ..
امنه : ايييييه عنلاتج لا تقوليله ... انا ما اريده يعرفها ...
عوشه : ليييش عاد ؟؟؟؟!!!!...
امنه : عشان اتشرط عليه على كيفي ...
عبيد : اممممممم ... اعتقد وحده من بنات عمي علي صح ؟؟؟
امنه : لالالالالالا ... خلالالاص خلصن محاولاتك ...
عبيد : ههههههههههههههه .... لا و الله ؟؟؟
عوشه : اما اقدر استحمل ... بيخطب ودوووم بنت خالوه فاطمه ...
عبيد : منوووه ؟؟؟؟ .. ودوووم هالياهل شو يباها ؟؟؟..
امنه : وين ياهل .. غدت قمر من حلاتها ما شالله عليها كبرت و حلوت و الله ..
عبيد : اللله يهنيهم انشالله ...
عوشه : باااااااااااااارد ..... حشى انا ما شفت واحد ابرد منك ....
امنه : لا بس انا شفت ... ما ابرد من عبيد غيرج انتي ... و تظهر لسانها للعوشه و تظهر تربع من حجرة عبيد و عبيد يضحك عليهن .... الله لا يحرمنا من بعض انشالله ...
كان مبارك يفكر في كلالالام هله له .... لهالدرجه هو طايح من عيون الناس ؟؟؟... اذا هذا راي خاواته فيه شوو راي الغرب فيه ؟؟؟... واااايد حزت في خاطر مبارك رمسة امه .... اول مره مبارك يحس انه كبر و اول مره يحس ان ناقصنه شي ... اول شي طرى عباله هي لطيفه .... لطيفه بنت ييرانهم ... كان مبارك وااايد يحبها ... كانت اول انسانه شافتها عينه .. لطيفه ارق انسانه عرفها مبارك .... كانت مب بس تحبه الا كانت تموووت عالتراب الي يدوووسه .... حبووو بعض و هم صغار ... لطيفه اصغر من مبارك بثلاث سنوات يعني اللحين عمرها تقريبا 24 .... كان مبارك دوووم يرقبها و هي راده من المدرسه مشي هي و بنات ييرانها ... كان يطول عالمسجل كل ما طاف من عدالهن .... و كل البنات ييلسن يتظاحكن لنهن يعرفن انه يعني لطوووف بهالغنيه .... كانت اول مره مبارك يتجرأ و يطول عالمسجل و كانت توها نازله غنية اصيل .. (اعجبك في كل شي الا الزعل ... لو يطول العمر عايش في سلالالام ... لو تخاصمني اخاصمك بغزل .. و لو تراظيني اجاذبك الغرام .... ) ... كان مبارك احلا واحد في رماح و كل البنات يتمنن انه يفتر صوب وحده منهن ... و من بين هالبنات كانت لطيفه ... بس حظ لطيفه ان مبارك كان ولد ييرانها ... كانت تشووفه كل يووم و هو ظاهر و الا داخل البيت ... كانت ترووح بيتهم و تشوووف حجرته ... كانت قربه منه بكل شي ... كان عند لطيفه اسلووب يجذب كل من يعرفها ... انسانه حبوبه و عفويه بحركاتها ... و هذا الشي الي جذب مبارك لها ... كانت تذبحه بحركاتها .... كانت غنوووج ... غير فيها دلع يذبح .... اول علاقة لطوف بمبارك كانت بالاغاني ... كان مبارك كل ما يشووف لطوووف يطولها عالمسجل على مقطع معين ... و هي تفهم هو شوو يقصد ... و استمروو عهالحال مده طويله ... و في يوم حط مبارك حق لطوووف ...( اتصلبي تسلم اعيونك .. ما يطيق القلب هجرانك ... لتصلت و قلت يا عونك ... ينتفض قلبي على شانك ...).... فهمت لطوف قصد مبارك بهالغنيه ... اول شي ترددت لطوف .. بس كانت بعدها صغيره في السن و غرمبها مبارك و حركاته .. ما قدرت انها تقاوم انها تكلم مبارك .... و في النهاية اتطورت العلاقه بينهم لتيلفونات ... كانوو وايد متعلقين في بعض ... مبارك حب لطيفه من قلبه و لا جذب عليها بشي و كان مخلص لها بكل جوارحه ... بس ما كان هالشي متبادل فيما بينهم ... كانت لطيفه همها الوحيد انها تعرس .. هي صح كانت تحب مبارك و تتمناه .. بس مبارك كان بعده ما خذ الثنويه حتى كان وايد مستهتر و لا مهتم لا بدراسه و لا بشي ... كان العود و البجر و بوه ما قصر فيه بشي و كانووو وايد مدلعينه .... في يوم كلمت لطوف مبارك بهالسالفه ...
لطيفه : يالله عليك يا مبارك ... الي من سناك يدرسوون في الجامعه و الا تخرجوو من الكليات و الا حتى اشتغلوو و انت مره الثنويه ما خذتها اللين اللحين ...
مبارك : اووووه فكينا فكينا الله يخليج ..
لطيفه : لين متى بتم عهالحال ؟؟؟...
مبارك : لطووف انا بعدني في اول شبابي .. شو تبيني اكد من اللحين ؟؟!!!!... و بويه الله يطولي بعمره مب مقصر بشي ..
لطيفه : و باجر ان عرست بوووك بيكد عليك و عحرمتك ...
مبارك : اعرس ؟؟؟!!!!!... شوو هالفال ... يابويه انا ما افكر في العرس .. حشى جني من اليوم بربط عمري بحرمه و عيال ....
لطيفه : و الله ؟؟!!... و متى انشالله ناوي عالعرس ؟؟؟..
مبارك : بصراحه انا ما قد فكرة في السالفه مره ....
لطيفه : يعني انا ما ييت على بالك مره .
مبارك : ليييييش ...؟؟؟؟..
لطيفه : لاني لو يت عبالك اكيد بتفكر في العرس ...
مبارك : .......
لطيفه : مبارك من متى و احنا نعرف بعض اللحين ؟؟؟..
مبارك : ما ادري بس من زمان ..
لطيفه : انزين و شووو نهايتها بينا ... بنتم عهالحال واايد ؟؟؟..
و كانت هذي اخر مره تكلم فيها لطيفه مبارك ..... بعدها بسبع شهووور و صلهم خبر خطبة لطيفه ... خطبها واحد من هلهم من المنطقه الغربيه ... و بين يوم و ليله عرست لطيفه و تم مبارك وحيد في حبه ... و من ذاك اليوم خذ مبارك الثنويه و اشتغل .. هو نسى حبه للطيفه .. بس اللين اللحين ما يحس ان في وحده ممكن تكوون حنونه عليه مثل لطيفه ... كانت وايد تحاتيه .... هي صح خلته و عرست .. بس هذا حقها لانها كانت تعرف ان مبارك ما بياخذها و هو نفسه يعرف هالشي مستحيل انه يثق في وحده كلمته و لو كان اول واحد تكلمه .... ااااااااه من ظلم القدر ...
عافت عيوني نظرة الحزن ... و آهات خوف ٍ تسكن البدر
تملكني حنين ماضي الزمن ... من همسه و ذكرى سالف العمر
تناشدنا عن الدنيا و المحن ... عرفنا كلمة الفرقى و الكدر
سلبني الحب نشوات الذهن ... و قلب ٍ مالك الفرحه و المكر
تصابينا على الدمعه و الحزن ... و ما نلنا سوى هم ٍ و الكسر
ترافجنا و طلبنا باقي الاذن ... ترامينا على اوهام العصر
عنيت اليوم آهاتي و اللحن ... كفاني الصمت في قلبي و العذر
اتصلت ام مبارك بختها و قالتلها انها و مبارك بيوونهم بالخميس بس ما قالتلها عن شي ...
و يوم الخميس
كان مبارك مرتبش بروووح ..... يالله بشوفها ؟؟؟... امممممممم .... شو سوتبي هالبنت ؟؟؟ افففففففففف من عرفتها و هي ملعوزتني ... يالله عسى ربي ما يبلي لا عدوو و لا صديق بشوووق منصوريه .... كان مبارك وايد يحشم رباعته يعني مستحيل انه يغلط على وحده من خاوات ربعه ... و اليوم سلطان خو روضه من اعز ربعي و امني و دخلني بيته .. كيف ممكن اخونه في عرضه ؟؟؟!!!... استغر الله العظيم ...
وصل مبارك و امه بيت خالته عقب المغرب ... كلمة ام مبارك ختها فاطمه عن سالفة راشد و قالتلها عشان تشاور ريلها و عيالها و تشاور وديمه ان كانت تبى راشد ... و بعد ما نزل مبارك امه و يلس عند سعيد و علي و سالم عيال خالته .. راح هو و سعيد صووب بيت روضه عشان العزيمه الي مسوينها .... كانووو العرب مرتبشين واايد ... كان مبارك يعتقد ان الي بيحظروون العزيمه ما يتعدوون العشر و ان كثروو بيكونون عشرين ... بس ماشالله كان البيت متروووووس و نص الشباب يلسووو برى ... و مر الوقت و انحط العشى و تعشووو الريايييل ... تموو الشباب يالسين عقب العشى يسولفوون الي يالس في المايلس و الي يالس عالفراش برى و كان الجوو واايد حلوووو ... فجأه سمعووو صووت مسجل شااال الدنيا .. كان واحد من الشباب مشغل مسجل سيارته و مطول عليه ... كل الشباب ظهرووو يشوفونه ..
قال : هاه شباب الي فيه هبه يله يا حياه في الميدان ...
اشتلووو الشباب و كل شوي ينشوون مجموعه و ايولن ... يوم شافت روضه هالربشه طرشت لبنات عمها اييبن كيمرت الفيديوو عشان يصوروون ... و اتصلت بسلطان و عطته الكيمره عشان يصور ... كان كل شوي واحد يحط شريط و ينشووون ايولون و ايبسوون الشبيبه كان جووو رهييييب .... راح مبارك و حط غنيه لميحد ..
مبارك : شباب هاليوووله و هالغنيه اهدااااء خاااص مني لعرب غاليييييييين عقلبي ..
واحد من الشباب : هههههههه ... منوه منوووه هالعرب ..؟؟؟؟
واحد ثاني : اكيييييييييد وحده من غراشيب رماح ...
مبارك و هو يضحك : ههههههههههههههههه .... لا من غراشييب الوثبه ...
كان مبارك قاصد هالشي بس الشباب اعتقدووو انه يسولف ...
و اول ما بدت الغنيه نزل مبارك من سيارته و الكلالالاشن في يده و يلس ايووول ..
( حد مثلي بات مشجنه ... حلم طيف ٍ مر خطافي ...و اغتنم من وجدي الونه .... يوم كل ٍ بالكرى غافي ..جرح في جاشي مخفنه ... و الخوافي ضربهم خافي ... لي محب ٍ مني و منه ... حب مثل الجوهر الصافي ..) ...
و اشتلوو الشباب مع مبارك في اليوله .... بس مبارك يال من الخاطر..... اول مره يحس بان لليوله طعم ثاني
و يوم وصل هالمقطع من الغنيه ... تم مبارك يغني و هو ايوول و ايسوي حركات جدام الكيمره جنه يعني حد بهالحركات ..
( حيث لان بالعرب سنه ... خص عند الناس لشرافي ... يا نديمي وصلكم جنه ... و البخت الي هب مسعافي ... حاليه يا زين مدعنه ... من ودادك منقل الحافي ... لا تخيب فيك من ظنه ... خير و انتو حق و انصافي ..)...
قال واحد من الشباب : مسكيييين حالك يالخييلي ...
مبارك و هو يسوي حركه ايأشر على قلبه و من عقب ينزلها : لا تتخبر يالخوي ...
عقب اليوله و الربشه الي عاشوووها الشباب .. سرى كلن لداره ... تم مبارك هو و سعيد عند سلطان عقب ما سرووو الشباب ... و كل شوي تتصل ام مبارك محتشره عليه عشان يسرووون رماح ..
مبارك : فدييييييييتج العيوز شوي و بيييج ..
ام مبارك : يالله عليك يامبارك .. يوم ان خاطرك في اليلسه الين نصايف الليل جان قلتلي جان خليت سراج و الا واحد من خوانك اييبني ...
مبارك : امايه امايه .. اسمع خالوه تزقرج توايبيلها ...
ام مبارك : تزقرني .. عنلاتك مسود الويه ....
مبارك : ههههههههههه ... فديتج فديتج و الله شوي و بييج ..
ام مبارك : ما عليه بشوف هالشوي هذي ..
تم سلطان و سعيد و مبارك يسووولفون ..
سلطان : بو عسكور .
سعيد : عونك ..
سلطان : طلبتك قل تم ..
سعيد : تم ..
سلطان : اباك اتشللي شلة العامري احب صوتك ...
مبارك : افا بو عسكوور تشل و انا ما عندي علم ...
سعيد : هههههههههه .. هب من زين الصوت ربي يطولي في عمرك ..
سلطان : لا خل عنك .. حرااام يا صوووت ما فيه حيله ..
مبارك : يالله يالله ..
سلطان و بعد ما شغل الكيمره ..: يالله بو عسكوور ..
سعيد : ههههههههههه ... و ليش مشغل الكيمره بعد ؟؟..
سلطان : جاد ربك وحده من الغراشييب تشوووف الشريط و الا شي .. و يذبحها صوتك ههههههههه
سعيد : هههههههههه ...
احب صوتك و محلا رنت الهاتف ... لي من جداكم حبيبي صدق تسعدني
و محلا حديثك معايه يوم تتعاطف ... كل متى حبك من الخاطر تفرحني
همسات صوتك و نار الشوق بي عاصف ... متى حبيبي بك الايام تجمعني
اكف دمعي و دمع العين بي ذارف ... اخفي دموعي و دمع العين يفظحني
احبك انت حبيبي و انت بي عارف ... من غيرك انت بهمساته يسامرني
اخذت قلبي و ليتك بالقلب رايف ... انت مريحن و انا عيني تسهرني
احب صوتك و محلا رنت الهاتف ... لي من جداكم حبيبي صدق تسعدني
مبارك : ما فيك حيله بو عسكووور ..
و عقب ما يلسو شوي سرى مبارك و سعيد عن سلطان ... دخل سلطان البيت و كانت روضه بعدها واعيه ..
روضه : وين كنت ؟؟؟
سلطان : يالس عند الشباب ...
روضه : يالفضايح و خوانك ترهم يوم دخلو البيت كان حد باقي من الشباب ؟؟!!..
سلطان : هيه لا ربعي ..
روضه : ازين هات الكيمره ...
سلطان : شو تبنها ...
روضه : بشوووف .. ظنك بايته ارقبك تحدر عسواد عيووون .. الا عشان ان الكيمره عندك ..
سلطان : و الله ؟؟.. ما عليه عيل ماشي كيمره و لا بتشوفينه الفلم
روضه : سلطان فديييييييييييتك ....
سلطان : ههههههههههههه .. ترجيني اكثر ..
روضه : بتبطي ... يالله عطني الكيمره ...
سلطان و هو يمد الكيمره لروضه : ههههههههههه ... لو مب تعبان جان راويتج ..
روضه : ههههههههههه و اهون عليك سلطووون ..
سلطان : و هو رايح صوب حجرته : لا ما تهونين .. بس يله رقاد خلي عنج السهر ..
روضه : انشالله باباتي ...
دخلت روضه حجرتها و الكيمره في يدها ... يلست عشبريتها و هادت الفلم الي في الكيمره و فتحت الشاشه الصغيره الي في الكيمره و يلست تشوووف الفلم ... و طلع مبارك في الفلم وااايد و كانت كل ما تشووفه تعيد اللقطه .. الين ما وصلت عند الاهداء يوم نزل مبارك بالكلاشن من سيارته ... كنت الصوره مب وايد واضحه و الصوب مب زين ... بس من لغثت روضه ما قدرت تستنا اللين ما يودون الفلم للاستيديو عشان ينسخونه عشريط فيديوو ... كانت تشووف مبارك و هو ايووول ... ذبحتها حركات ... منوه المعنايه بهاليوله ... شمامي ؟؟.. الي اتصلتبه و احنا في العزبه ؟؟.. و الا وحده غير ؟؟.. و الا انا ؟؟؟.. احتارت روضه بافكارها ... في شي في مبارك يجذب روضه صوبه .. و هي ما تقدر تجذب و تقول ان مافي مشاعر في قلبها صوب هالانسان ... بس هي خايفه من مشاعرها .. خايفه من مبارك اكثر ... هو شوو يريد منها ؟؟. ليش يعذبني .؟؟!!... روضه تفكر في مبارك .. و مبارك اول مره فحياته يحس بشي غريب هالليله .. شي مب عارف شو هو .. ليش اهديتها الغنيه و اليوله ؟؟.. كيف تحق نفسي لبنت عايفتني و لا هي بحاسه بشي ... انزين انا ما احبها .. يالله و الله كرهت عمري و الله ... حشى انا شالله بلاني بهالبنت ... حتى يوم حب لطيفه ما عاش هالشي معاها .. شمعنا روضه هي الي تحرك هالشي فيه ... تم مبارك يفكر في روضه طووول الليل .. كان يتخيلها و هي تمشي.... و هي تتكلم .. كان يتخيلها و هي معاه ... نش مبارك و طلع من حجرته صوب سيارته هو لابس الا الفالينه و الوزار .. ركب سيارته و ظهر قصيدة روضه و يلس يقراها ... مستحيل وحده كتبت هالقصيده يكون شي في قلبها صوبي ... شغل مبارك سيارته و تم يحوووط في الشعبيه ... و بعدين رجع البيت و نام ...
يوم اليمعه بعد صلاة اليمعه ....
الكل في بيت قوم شمامي يالسين عقب الغدا يسولفون ... كانت خالة مبارك قد قالت لريلها ان ختهال سلامه تريد وديمه لراشد ولدها .. و هم يالسين
ام شمامي : شمامي تعالي اباج ...
شمامي : عووونج الغاليه ..
ما تم في الصاله الا بو شمامي و علي و سعيد و سالم و وديمه .... نشت وديمه بترووح حجرتها
بوشمامي : هاه وديمه وين بها ؟؟..
وديمه : سلامتك الغالي .. برووح الحجره بذاكر شوي ..
بوشمامي : صبري لاحجه عالمذاكره اباج في سالفه .. انتي و خوانج ..
وديمه : انشالله ... و رجعت وديمه و يلست ..
بوشمامي : امس خالتكم سلامه يت ورمست امكم ...
سعيد : رب ما شر ؟؟..
بوشمامي : ما شر يعني افداك ... الا بغوو وديمه لراشد ولد خالتك ...
تم ويه وديمه احمر من المستحتى .. ما كانت تتوقع هالشي .. و تمت ساكته ...
سعيد : و الله يا راشد انه ما ينعاب ...
سالم : ريال ما عليه رمسه ان بغيت الشوور .. ما بتلقون حد اخير عنه لوديمه ...
بو شمامي : و هذا شوري انا بعد .. الا ما رمت اقول شي قبل لا اشاوركم ... و ترى الشور كله لوديمه .. و التفت صوب وديمه .. هاه وديمه شو رايج ..
وديمه و هي مستحيه : ... ما ادري ..
بو شمامي : كيف ما تدرين بعد ؟؟.. تبينه و الا لا ؟؟..
علي : يابويه هذا عرس مب لعبه .. عطوها فرصه تفكر ..
سعيد : عاد بخبرك لو هو واحد غريب بنقوول الا يوم هو ولد خالتها شعنه تفكر بعد ؟؟..
نشت وديمه عنهم و خلتهم برووحهم يكملون الرمسه ... دخلت وديمه حجرتها و يلست تصيح ...
في هالوقت شمامي و امها في المطبخ ..
شمامي : الحين ساحبتني من البراد صوب المطبخ عشان ما ادري شوو هالدله الي ادورينها القايله .؟؟؟!!!!!!..
ام شمامي : لا .. في سالفه بين بوج و خوانج و سحبتج عنهم ..
شمامي : سالفة شووووووو ؟؟؟؟؟...
ام شمامي : انشالله بنشووف عالشووه بيتفقوون و عقب بقولج ...
شمامي : حرااام عليج .. و الله لتقولين شوو السالفه شووو مستوي ؟؟؟...
ام شمامي : سلامتج .. خالتج سلامه امس يتني تخطب وديمه ...
شمامي و هي فرحانه : و الله ؟؟؟؟... لمنوه ؟؟..
ام شمامي : لراشد ...
انصدمت شمامي بهالشي ... رااااشد بياخذ وديمه ختيه ؟؟؟.. راشد من بد الشباب بياخذ ختيه ؟؟؟؟ .. طلعت شمامي عن امها و راحت حجرتها و يلست تصيييييح و تصيح من الخاطر ... من بد البنات يوم بغى ياخذ خذ ختيه ؟؟؟... شووو هو ما يحس ؟؟.. تمت شمامي حابسه عمرها في حجرتها و تصيح اللين المغرب .. جن روضه كانت حاسه ان شمامي فيها شي .. اتصلت روضه بشمامي و شله سالم ..
روضه : السلام عليكو ..
سالم : و عليكو السلام
روضه : شمامي موجوده ..
سالم : هيه نعم .. لحظه ..
راح سالم و دق عشمامي ..
سالم : شما ... تعالي تيلفون ...
شمامي : منوه ؟؟؟..
سالم : شدراني وحده من ربيعاتج ...
شمامي : اوكي ... نشت شمامي و طلعت من حجرتها و شلت التيلفون عندها في الحجره ..
شمامي : الوو ..
روضه : هلا و الله ..
شمامي : روضووووووووه ... يلست شما تصيح
روضه : شمامي شو فيج ؟؟؟..
شما : روضوه بموووت ..
روضه : بسم الله عليج .. شعندج ؟؟؟..
شما : رااااااشد ..
روضه : شوو بلاه راشد؟؟..
شما : بياخذ وديمه ختيه ...
من الصدمه ما عرفت روضه شو تقول و الا تسوي ...
روضه : خلاص شمامي انا بييج اللحين ..
سكرت روضه عن شما و راحت و تلبست و راحت صوب شمامي و يلست عندها تحاول انها تهديها .. بس يلست روضه تصيح فطرفها .. كان عند روضه امل ان راشد ياخذ شما .. و يمكن يكون لها امل مع مبارك ... بس بهالشي انعدم أي امل الها مع مبارك ...
روضه : ازين يمكن وديمه ما توافق عليه .. و الا بوج ما يوافق
شما : مستحيل بوويه يرفض حد من عيال خالوه سلالالامه ... بعدين لو رفضوو امي ما بترفض و انتي تعرفين امايه اذا عزمت عالشي لازم تسويه ...
ما عرفت روضه شو تسوي و الا شو تقول لشما عشان تهديها ... طلعت روضه من حجرة شما و راحت صوب وديمه تشووف شو الوضع عندها ... كانت وديمه يالسه تذاكر ...
روضه : شوو تسوين ؟؟؟..
وديمه : هههههههههه ... اوين اذاكر ...
روضه : ههههههه ..
وديمه : من متى و انتي عندنا محد قالي انج يتي ...
روضه : تلقفتني ختج الله يهديها من عند البنات ... حشى ما خلتني اسلم عحد .. ههههههههههه
وديمه : ههههههههههه ... و منوه هالحد ؟؟؟..
روضه : ههههههههههههه ... الا قوليلي صدق الرمسه الي قالولي عنها ..
وديمه و هي مستحيه : أي رمسه ؟؟..
روضه : خلي عنج .. اوين انج ما ترفين يعني ؟؟؟..
وديمه : تصدقين روضوه و الله انصدمت ...
روضه : ليش عاد ..؟؟؟!!!..
وديمه : ما ادري بس صدمني ان راشد يباني ... تعرفين امايه عقب ما دخلت عن قوم بويه .. دخلت عليه الحجره و قالتلي ان خالوه سلامه قالتلها ان راشد هو الي ياها و قالها انه يريدني ... انا بصراحه كنت متردده .. لاني ما اعرف شي عن قووم خالوه عن طباعهم و الا عن حياتهم .. تعرفيني مالي دخل بحد ... بس يلست امايه تقول انه بغاني و انه لو مب شارني ما راح و طلبني من امه بالاسم ... ما ادري روضوه و الله خايفه ...
روضه بعد ما سمعت هالشي عرفت ان ما في امل لشما مع راشد لان راشد يريد وديمه و مب هله الي خطبوها له ..
روضه : ودوووم هذا عرس ... و تراج بتعيشين حياتج كلها مع هالانسان و لازم انج يووم تاخذين واحد تكونين واثقه انج بترتاحين معاه و بيسعدج و بتسعدينه ...
وديمه : ادري و الله ...
رجعت روضه بيتهم و هي مب عارفه شو تسوي .. محتاره .. حب شما لراشد كان من طرف واحد ... مسكينه شما جن الانسان الي تحبه بياخذ ختها و بتم طول حياتها تشووفهم جدامها ... و في هالاثناء كانت شما ميته مب عارفه شو تسوي .. اول شي خطر في بالها انها تتصل براشد ... و صدق اتصلت شما براشد ..
راشد : الوو ..
شما : ... الو .
راشد : مرحبا ...
شما : راشد ؟؟..
راشد و هو مستغرب : هي راشد ...
شما : .. شحالك ؟..
راشد : بخير و نعمه ..
تم راشد ساكت مب عارف منوه هذي الي متصلتله الساعه 12 فليل ..
راشد : نعم ختيه رب ما شر ..؟؟
شما : راشد انت ما عرفتني ..
راشد : ليش الشيخه المفروض اني اعرفج يعني ؟؟..
شما : راشد انا شما ..
عرف راشد انها شما بنت خالته فاطمه بس ما حب انه يتمادا معاها في الكلالالام ..
راشد : شما ؟؟؟
شما : شما بنت خالتك فاطمه ..
راشد : مرحبا شما شحالج ؟
شما : يهمك تعرف حالي ..
راشد :.......
شما : راشد انت ما تحس ؟؟؟..
راشد : شوووو ؟؟؟
شما : حرام عليك انا شو سويتبك عشان تعذبني ... حرام عليك راشد انت شو جنسك ؟؟..
راشد : لحظه لحظه ... انا شو سويت عشان كل هذا ؟؟..
شما : ما سويت شي سلامتك .. بس بكل بساطه تريد تاخذ ختيه ... حراام عليك يووم انت عايفني .. تاخذ ختيه عشان تنتقم مني يعني ؟؟؟..
راشد : شما ما كان من بيننا شي .. و انتي شرات ختيه و...
شما : ختك ؟؟؟؟؟ اللحين تقولي ختك ؟؟.. حرام عليك سنين و انا عايشه عشانك .. سنين و انا اتخيل اليوم الي بتكون فيه ملكي و اليوم بكل بساطه تقولي ختك ؟؟؟؟..
راشد : شما ..
شما : شوو بتقول ؟؟؟.. راشد شووو ما تذكر يوم قلتلي مستحيل تكونين لريال غيري .. شووو ما تذكر .؟؟؟..
راشد : شما هالسالفه مر عليها سنين ..
شما : بس انا بعدني عايشه على هالرمسه .. بعدني اذكر شكلك و انت تقولي هالرمسه ...
راشد : شما ممكن تسكتين شوي ...
شما : .....
راشد : شما الي كان من بيننا كان لعب مراهقه و مر عليه سنين اللحين ... الله مب كاتبلنا نصيب .. شما مبارك بياخذج .. و من فكر فيج مبارك تحرمين عليه ...
شما : مبارك ما رمس ..
راشد : و منو قال انه ما رمس ... شما مبارك من سنه طافت .. في نفس اليوم الي قلتلج فيه هالرمسه .. ياني مبارك و قالي انا اذا فكرة اعرس في يووم ترى شما هي الي باخذها ... تعرفين شو معناة هالشي ...؟؟!!!... يعني انتي في خاطر مبارك .. و مبارك يريدج ..
شما : عشان جذيه انت كنت تصدني كل هالفتره ؟؟؟... ليش ما قلتلي راشد .. مب حرام عليك ..؟؟؟.. راشد حراام عليك تذبحني و انا مالي ذنب .... راشد لو كنت تباني و قد كلامك لي كان المفروض تخطبني انا مب وديمه ...
راشد : شما صاحيه انتي ؟؟؟.. شو ما تفهمين ؟؟؟. .. اقولج خويه خاطره فيج كيف تبيني ااخذج ؟؟؟...
شما : و انا خاطريه فيك .. كيف تباني ااخذ خوووك ؟؟؟؟...
سكت راشد ما عرف شو يرد عشما ...
راشد : ارجوج شمامي لا ...
شما و هي تصيح : تعرف انك من زمان ما قلتلي شمامي ..؟؟!!!..
في هاللحظه ما قدر راشد يمسك عمره ... صدق هو حب شما و هي كانت الانسنه الوحيده الي في حياته .. ما قد كلم بنت و لا قد طرت عالبال أي وحده من البنات كانت شمامي ماليه عليه كل دنياه ... كان يعرف انها تحبه ... كان يشووف الحب في عيونها .. كان يسمع الشوووق في همسها ... كان الحب من بينهم حب عذري حب ما مسه حب هالايام .. كانوو يحبون بعض بصمت .. كانت شمامي دوووم عندهم في الاجازات .. كانت عادي تيلس عنه و يسولفون .. بس في كلام كانو يقولونه بالرسايل .. بس من سنه اعترف مبارك انه يريد شمامي ... بس هو مأجل ستافة العرس شوي .. و من ذاك اليوم وراشد يدوووس عحبه لشما و يكابر على حبها ... سوى المستحيل عشان يبعدها عنه ... و شما حست بهالشي .. بس ما كانت تدري انها ممكن تهون على راشد و يقدر انه يعذبها بهالطريقه ...
راشد : شما .. ارجوووج ...
شما : انت الي ارجوووك ... راشد .. انت ما لقيت حد تخطبه غير وديمه ختيه ؟؟.. ليييش ؟؟؟ اذا عايفني خطب الي تباها بس ليش تخطب ختيه ؟؟؟.. انا صنتك و ربي عكلامي شاهد ... و تجازيني انك تخطب ختيه ؟؟؟...
راشد : شما ... انا ما خطبت وديمه عشان انتقم منج ... انا خطبت وديمه لاني من شفتها و انا معجب بها...
شما : شوووووووووو ؟؟!!!!!!؟؟!؟!؟!...
راشد : هذي هي الحقيقه ... انا ما احب وديمه ختج ... بس انا معجب بها من الخاطر ... و يوم عزمت عالعرس هي الي طرت عبالي ...
شما : حراااااام عليك راشد .. انت تذبحني بكلالامك هذا ...
راشد : شما ...
شما : و الله اهون عليه انك تقولي انا بعتج عشان خويه و لا انك تقولي انا بعتج عشان ختج عيبتني .... حراااااااام علييييك و الله حرااااام ....
سكرت شما عن راشد و هي ميته من كلالالام راشد ... حتى راشد حز في خاطره هالموقف ... هو تعمد انه يقولها هالرمسه عشان ما تفكر فيه ... هو صح عيبته وديمه بس مب لدرجة انه يعاف شما عشانها ... بس لازم شما تنسى راشد عشان مبارك ... كان هالحال على شما و راشد ... و مبارك ما يدري عن الي مستوي ... ما كان يدري ان كلمه نطقها في يووم ممكن انها ادمر حياة غيره .. قد قال مبارك لراشد انه ايريد شما بس هالكلالام كان من زمان و مبارك نسى هالسالفه و لا طرت عباله حتى .. و لو راشد رجع و كلم مبارك في السالفه جان عرف هالشي ... بس راشد ما كان يقدر انه يكلم أي انسان عن شما ... لانه ما يريد حد يمسها بشي ...
بعدها بيومين اتصلت ام شما بختها و قالتلها انهم موافقين و حددو يوووم عشان يروحون الريالييل و يخطبوون رسمي ... و تحدد اليوم و كان الخميس الياي ... تلايموو قوم بالخيل كلهم و راحووو صوب الوثبه و كانو المناصير عمومة شما و خاوالها يستنونهم .. و بعد هاليوم الكل عرف ان وديمه تم خطيبة راشد ... في هاليوم تموو الشباب يالسين يسولفون و مبارك عندهم ....
سعيد : مبارك ...
مبارك : عوونك بو عسكوور ...
سعيد : اباك في رمسه ..
عبيد : يالله يالله ... و ما ينفع هالرمسه تنقال جدامنا .؟؟...
علي : هههههههههه ... لا ما ظني ..
مبارك : ههههههههه ... نش نش خلنا نروحلنا في بقعه عدله بدل ما نرتز في نص هاليهااااااال
سعيد : ههههههههههههه ...
عبيد : برووووووك اشووف فيك شعر ابيض ...
سالم : يمدحونها الصبغه ...
مبارك : عنلالالاتكم .. الشيب هيبه ...
علي : خل عنك اللواته ... اوين الشيب هيبه ...
راح مبارك هو و سعيد ولد خالته في سيارة سعيد و تموو يحوطون في الشعبيه ... خطف سعيد من جدام بيت هل رووضه ... مبارك لا اراديا افتر براسه صوب الباب جنه يتوقع ان روضه واقفه اتطالعه ... انتبه سعيد لحركت مبارك ..
سعيد : خييبه افترت الرقبه ...
مبارك : شووو ؟؟؟...
سعيد : سلامت قلبك ... الا رقبتك افترت و انت توايج ...
مبارك : لا كنت اشووف جن سلطان في البيت و الا لا ..؟؟
سعيد : سلطان ؟؟.. ههههههههههههه
مبارك : هههههههههههههههه ... المهم .. علومك انت ؟؟؟
سعيد : علوم الخير يالخوي ...
مبارك : عساك دووم انشالله ...
سعيد : يمييع انشالله ...
مبارك : انزين ...
سعيد : انزين ....
مبارك : لا و الله ؟؟؟؟...
سعيد : هههههههههههههه ...
مبارك : شو فخاطرك بو عسكوور ؟؟؟...
سعيد : اممممممم ... ياخي ما اعرف شو اقولك ..
مبارك : قول الي في خاطرك و لا تستحي ...
سعيد : انشالله ... بس ما اباك تفهمني غلط ...
مبارك : .....
سعيد : انا ... اريد امنه ختك ...
انصدم مبارك بهالشي .... عمره ما توقع ان سعيد يريد ااامنه ... تم مبارك ساكة مب عارف شووو يرد عليه ..
سعيد : و الله اني اباها من زمان و الله .. الا انت تعرف كيف كانت ظروفي و لا قدرت اني اتقدملها الا و انا ريال ساد عمري ...
مبارك : افا عليك يا بو عسكوور انت تنشرى بفلوووس و الله ..
سعيد : لا و الله بس حتى ... بس انا ما قدرت ارمس حد الا يوم شفت عمري ارووم اسد عمري و اسد حرمتيه ... بس استوت خطبت راشد و وديمه ..
مبارك : و انت شو عليك منهم ..
سعيد : مبارك ... انا اريد ختك .. بس ما ادري اذا هي تباني و الا لا ... يمكن البنت ما تباني و خالتيه تتلوم و تقول هم قربونا و احنا ما قربنابهم ... تعرف الحرمات عاد ... و انا ما اريد اظلم ختك معايه ... ان ما كانت تباني انا ما بخطبها رسمي ...
مبارك : اها فهمت عليك .... يعني انت تبى تعرف رد امنه عليك قبل لا تخطب رسمي ..؟؟..
سعيد : هيه ... بس و الله و الله و الله يشهد عهالشي اني ما قد غلطت على ختك و لا فكرت بها أي تفكير شين و اني اباها عشرع الله ...
مبارك : و انا اعرف هالشي فيك يا بو عسكووور و انشالله فالك طيب انشالله ... عطني يومين و بردلك خبر انشالله ....
مسكييين حالج يا شما ...
ظنكن امنه بتوافق على سعيد ...؟؟؟
امممممم ... القدر بيجمع روضه و مبارك .... شو هالموقف الي بيجمعهم ..؟؟؟... كيف روضه بتتصرف مع مبارك ؟؟؟..
كيف مبارك بيتصرف مع روضه ؟؟؟...
ثنينتهم يكابرون في حبهم لبعض ... منو الي بيتنازل و بيعترف لثاني ؟؟؟
اممممممم ... تقريبا دشينا في الاحداث الرئيسيه للقصه ... تابعوو الباقي لان الياي احلا من الي طاف ..
