• مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

ويبكي القلب

  • بادئ الموضوع رهف
  • تاريخ البدء
  • الردود: الردود 267
  • المشاهدات: المشاهدات 50K

رهف

♣ القلمـ الخجول ♣
التسجيل
27 نوفمبر 2004
رقم العضوية
2513
المشاركات
21,478
مستوى التفاعل
1,455
الجنس
الإقامة
ღ. راك .ღ.
♣ ويبكي القلب ♣

ويبكي القلب

للكاتبة : رهـــــف
- القلم الخجول -




السلام عليكم ورحمة الله وبركاته

بداية ً :
أحب أن أشكر أخواتي وأختي معاني
الاتي شجعنني على طرح قصتي هنا


وهذه أول قصة لي في البرزة
اتمنى أن تنال على اعجابكم ورضائكم



وارجوا كتابة آرائكم بكل وضوح وصراحة



رهـــــــــــــف
 

رهف

♣ القلمـ الخجول ♣
التسجيل
27 نوفمبر 2004
رقم العضوية
2513
المشاركات
21,478
مستوى التفاعل
1,455
الجنس
الإقامة
ღ. راك .ღ.
مشاركة: ويبكي القلب

ويبكي القلب
للكاتبة : رهــــــــف " القلم الخجول "
رأس الخيمة
12/3/2005م



شخصيات القصة :-

عائلة بو حميد

تتكون من 3 أولاد ، وبنتين ،، وأكيد معاهم الابو بو حميد ( عبدالله ) وأم حميد ( فاطمة ) واليدة ( شيخة ) ..
حميد : 28 سنة متزوج من بنت عمه مشاعل ، وعندهم بنت وولد ( هند : 3 سنوات ، وعلي سنة ) وحاليا هم في السعودية يعتمرون..
حمد : 24 سنة ، عازب ، مغازلجي ، وكله هوامه في السناتر يرقم البنات ،،و يشتغل في كلية الشرطة في بوظبي ..
موزة : 21 سنة ، في كلية التقنية تخصص Itec ،، حليوه ،، رقيقة ،، وطيبة وعلى نياتها ..
اسماء : 16 سنة ،، صف ثاني ثانوي ،، ملسونه بس حبوبه ..
سعود : 17 سنة ،، صف أول ثانوي – راسب سنتين - ،، نادراً ما حد يشوفه في البيت ،، كله هوامه في الشوارع والسناتر..




عائلة بو خليفة

أبوهم متوفي .. وتتكون من ولد واحد وبنتين
مشاعل : متزوجة من ولد عمها حميد ..
ريم : 22 سنة مع موزة في نفس الكلية ونفس التخصص ،، دفشه وفيها هفه .. ،،
خليفة: 20 سنة ، رقيب في الدفاع المدني ،، وسيم ، وخقاق ، ومحير لبنت عمه اسما..




عائلة بو يوسف
( وهم يصيرون عيال خالة موزة واخوانها )

تتكون من 4 أولاد ، وبنت
يوسف : متزوج من بنت خالته فاطمة ،، وعندهم ولد واحد اسمه سلطان ( عمره سنة و3 شهور )
عبد الله : 25 سنة ،،هادي وماله خص بحد ،، و متزوج من 3 شهور من بنت ييرانهم عايشة ..
سيف : 23 سنة ،، حليو ،، وكشخة ،، وما عليه كلام ،،ويشتغل مع حمد في كلية الشرطة في بوظبي ( وهو يكلم ريم على ان اسمه خالد )..
ميثه : 18 سنة ،، خلصت الثانوية ويلست في البيت ،، خجولة وهادية ،، وينقص عليها بسرعة..
خالد : 17 سنة ،، صف أول ثانوي – راسب سنتين - ،، طبجة سعوود ودوم وياه ..



رهف
 
التعديل الأخير:

رهف

♣ القلمـ الخجول ♣
التسجيل
27 نوفمبر 2004
رقم العضوية
2513
المشاركات
21,478
مستوى التفاعل
1,455
الجنس
الإقامة
ღ. راك .ღ.
مشاركة: ويبكي القلب




الجزء الأول


.. •..•° .. سلام العشق و اعماقه ،، يضم القلب و اشواقه .. •..•° ..

.. •..•° .. تجيك الروح مشتاقه ،، تهديك القصيد ألوان.. •..•° ..






في كلية التقنية العليا للبنات ،، وبالتحديد في كلاس Itec C8 ،، كان المدرس يشرح للطالبات ،، وتقريباً الكل كان مندمج مع المدرس ... وشوي ..
ريم : موزه ،، موزوه ،، موزوه وصمخ ..
موزة - تلتفت لريم - : هاا شعندج ؟!
ريم : اممممممممم ..
موزة : شووووو ؟
ريم : ( تمثل على ويها الحيا ) : ابيج تكلمين خالد ..
موزة : ( فاجه حلجها وعلامات الدهشة عليها ) : هااااااااا ..... شووووووووو ؟؟
ريم ( محرجة ) : شو فيج خفي صوتج ؟
موزة : شو تبغيني اسوي عيل ؟
ريم : اسكتي لااه ، عقب بخبرج السالفة ..
اطالعتهم ربيعتهم فاطمة : اصصصصص المدرس يطالعكن .. عن شوو ترمسن ؟
ريم : ماشي

ورجعن وركزن انتباهن مع المدرس مع بعض الشرود اللي صاحب موزة ..



في بريك الصلاة


ريم : موزوه .. شو قلتي ؟؟
موزة : ما قلت شيء ..
ريم ( تخف صوتها شوي ) : بتكلمين خالد ولا ؟
موزة : أنتي من صجج ترمسين ؟
ريم : هيه .. امزح وياج عيل ويا ويهج ..
موزة : ويا ويهي هاا .. روحي دوري غيري يتكلم وياج ..
ريم : موزوه بلا مصاخة .. تراني ارمس جد .. والله مضايجة ..
موزة : والمطلوب ؟ ...
ريم : تكلمين خالد .. والله بس مرة وحدة .. ابيج تعرفين اذا كان صاج معاي ،، وتسألينه اذا كلم اهله عني للحين ولا ؟؟
موزة : شو فيج انتي .. من قال اني بكلمه .. لا يكلمني ولا اكلمه ،، وبعدين يا حبيبتي انتي اللي تعرفينه وتكلمينه من اكثر من 10 شهور والحين بدشون بالسنة اكيد بتعرفين اذا كان يحبج وصاج معاج ولا لا ؟
ريم : افاا يا بنت العم ،، وانا اقول بعد اني غالية عليج وما بترديني ..
موزة :: تعرفين انج غالية .. بس هالموضوع ما اقدر عليه ..
ريم ( واونها بتصيح ) : قولي ما بتكلمينه وخلاص ،، يلا قومي نصلي ..
موزة ( حز بخاطرها انها ضيجت ببنت عمها ) : ريموه والله ما اقصد بس .. ..
وتقاطعها ريم : بس شو .... بتكلمينه ؟!..
موزة : .........
ريم :اصلا هو ما يعرفج ولا بيعرفج .. بس مرة وحده الله يخليج ...
موزة : .................
ريم : خلاص تم ؟ !
موزة : شو اللي تم .. ريموه اناا ما يخصني بهالسوالف .. ولوو حد من اهلي دري بيذبحوني ..
ريم : محد بيعرف صدقيني .. بس مره
موزه :.. لا ريمووه ما اقدر .. ما اقدر اخون ثقتهم
ريم : ما بتخونينها انتي ما بتسولفين وياه ولا بتتعرفين عليه .. انتي بتسوين لي خدمة .. اللهم بتسألينه وخلاص .. وهو الا يوم واحد وقولي كمن دقيقة بس
موزه : ما اعرف والله .. ما قط سويتها ...
ريم : دخيلج موزوه ..
موزه : امممم .. ما اعرف .. امممم .. خليني بفكر .. وقومي نصلي ترى ماشيء وقت ..

ويلسن يسولفن شوي وهن راايحات المسيد يصلن .


==========


في بيت بو حميد كانت اليدة وأم حميد يالسات في الصالة يسولفن .. شوي وتدخل عليهم اسماء - بعد ما رجعت من المدرسة وراحت غرفتها تغير ثيابها وردت نزلت لهم -..

اسماء : شو وين الغدى .. يلا يوعانه ..
ام حميد : صبري بلاج انتي ،، بعدها اختج ما يت ..
اسماء : ونحن كل يوم على نفس الحالة ،، لازم الانسة موزوه تشرف وعقب نتغدى ..
اليدة : اسموه ،، سود الله ويهج ،، شو بلاج ملتقعه ،، الغدى ما بيطير ،، صبري اختج الحين بتي ..
اسماء : اففففففففففف ،، خلاص ما ابى غداكم ،، بتصل الكافتيريا ..
اليدة : يا حرام لو اتصلتي الكفترا مالكم ما تلومين الا نفسج ،، هب جنج من شهرين مطلعه من المستشفى من اكلهم الوسخ .
اسما : اففففففففف .. والله حالة ..

شوي وتدخل موزة ..

موزة : السلام عليكم ..
الجميع : وعليكم السلام .
اسما : شرفت الليدي ..
اليدة : حي الله الغالية بنت الغالي ..
اسماا : الحين هذه الغالية ؟؟
موزة : اهلين يدوه شحالج ؟ .. شوفيج اسموه ؟
اليدة : يسرج الحال بنيتي ،، ماعليج منها هذي غياره ..
اسما : الحين انا الغيارة ،، وست الحسن الغالية ؟؟
ام حميد : اسموه عن اللسان الطويل ،، وقومي جهزي وياي الغداا ..
اسما ( حاطه ايدها ع خصرها ) : هذا اللي ناقص ،، على ما اعتقد في وحده مرتزة في المطبخ ،، وتقبض معاش اخر الشهر ..
اليدة : اسموه .. يلا قومي ويا امج جهزي الغداا ،، وعقب زقري ابوج واخوج سعود يتغدون ،،ولاّ تراا بالخيزرانة على ظهرج ..
اسما : وليش انا ؟ وموزوه ليش ما تروح ؟
موزة ( بنظرات تعالي لاسما ) : والله يا حبيبتي انا توني يايه من الكلية ، بروح ابدل ثيابي ،، يلا تشاو .

نشت موزة سايرة لحجرتها تبدل ثيابها ،، واسما راحت ويا امها يجهزن الغداا وهي تتحرطم..


===========


عقب المغرب .. في بيت بو خليفة
ريم : ( بصوت عالي ) : اميه ،، امييي ... اميه ،، .. وين راحت هذي بعد ؟ .. ايكا ،، ايكا ،، ايكوه وسم يسمج ..
ايكا – الشغالة - : نعم ؟
ريم : انتي ما تسمعين ،، وين امي ؟
ايكا : ماما يروح ويا ماما فاطمة بيت مال ماما عايشة ..
ريم : زين انا بروح بيت عمي ،، يوم بتي امي خبريها ..
ايكا : ماما انا بعد يروح ويا انتي..
ريم : نعم ما سمعت ..
ايكا : انا يروح بيت ماما فاطمة .
ريم : لا والله شعندج .
ايكا : انا يروح حق " سنيتيا " - شغالة بيت بو حميد - سوي تلفون حق شادي ..
ريم : لا تلفون لشادي ولا لماما ولا بابا ،، يلسي في البيت وخلصي شغلج ،، خليني اشوفج يايه وراي ..
ايكا : شو هدا ماما ،، انا لازم سوي تلفون حق هازبند ..
ريم ( معصبة ) : من اسبوع مطرشه له رسالة ،، يا الله بس ،، وان ما رحتي المطبخ ترى بتشوفين..
ايكا( تمشي رايحه المطبخ ) : انتي مافي زين ،، كله جنجال
ريم : شو فيج تتحرطمين ،، شو تقولين ؟؟
خلتها ايكا وراحت المطبخ ،، وهي طلعت وراحت بيت عمها




 
التعديل الأخير:

رهف

♣ القلمـ الخجول ♣
التسجيل
27 نوفمبر 2004
رقم العضوية
2513
المشاركات
21,478
مستوى التفاعل
1,455
الجنس
الإقامة
ღ. راك .ღ.
مشاركة: ويبكي القلب





دقايق ووصلت ريم بيت عمها ،،لان البيت عند البيت ،،وهي من عوايدها انها تدخل بيت عمها من غير ما ادق الجرس ..

في الصالة كانت يالسة اليدة اطالع مسلسل " طاش ما طاش " ووياها موزة ، واسما واونها اذاكر واهي اطالع المسلسل ..

ريم : السلام عليكم ..
الجميع : وعليكم السلام ..
ريم - تبوس راس يدتها - : شحالج يدوه ؟
اليدة : بخير عساج بخير ؟؟ الا شخبارج انتي وشخبار أمج واخوج ؟
ريم : يسرج حالهم ،، كلهم طيبيبن ،، شحالكن – واهي تاشر لموزة واسما - .
موزة واسما : الحمد لله ..
ريم : اسموه ،،، شحالج ويا الدراسة ؟
اسما : شو بعد والله هالمدرسات طايحات لنا بالانشطة ،، اونه ملف انجاز ،، الوزارة تطلب منهن اهم واهم يكلفونا احنا نكتب لهن ..
ريم : وانتي مجلفة تسوين لهن ،، خلن يسون بروحهن..
اسما : بعينهن ،، اونه له درجات
ريم : شو درجاته ،، خلهن يولن
موزة - اطالع ريم - : ايه انتي لا تخربين اختي ،، خليها تسوي وتحصل درجات تراا يمكن هالدرجات تنفعها وتنجحها .. وترى المدرسات روحهم من غير مطالبين بملفات انجاز وعفسة
اسما : لا والله ،،الحين 10 درجات بتنجحني
اليدة : سكتن لاه ،، حشرتني ،، خلني اتابع المسلسل عدل ،، وانتي اسموه قومي ذااكري ..
اسماا : مذاكره
اليدة : غربلاتج متى ذاكرتي ؟؟
اسماء : شو يدوه ،، من ييت وانا اذاكر
اليدة : وين ذاكرتي وانتي اطالعين التلفزيون
اسماا : يدووه ما اعرف اذاكر الا بالحشره
اليدة : عزالله فلحتي السنة ..
اسما : ان شاء الله بنحج

ريم : موزوه قومي ابيغيج ؟
اسما : شوو وين ،، اشوف تغبون عني اسراركن
ريم : لا اسرار ولا شيء ، عندنا بروجكت ، وابيها اطلع لي شيء من النت..
اسما : هي علينا ..
ريم : قومي لاه عني ،، موزوه يلا قومي

راحت موزة وريم حجرت موزة ،، وخلن اليدة واسموه يتناقرن ..


===========


في غرفة موزة ..

ريم كانت تبغي تفتح موضوع خالد بس هب عارفه كيف ، وموزة حاسه فيها بس ما حبت توضح لها
موزة : أقول ريموه ،، بالجمعة تعالي بيتنا ،، خالي وعياله بيون بيتعشون عندنا
ريم : ليش ومرت خالج ما بتي وياهم؟
موزة : ما ادري فيها ، تقول معزومه على عرس ،، اذا غيرت رايها بتي
ريم : الحين بتروح العرس وما بتيكم ، هذي ما ادري ليش شايفه عمرها عليكم
موزة : ما علينا منها ،، وبعدين هي هب عزيمة ،، بس خالي يبي ايينا ، الوالدة قالت له اييب الاهل وياه
ريم : وهم ما عزموكم ع بيتهم صار لهم شهر من تحولوا لفريجنا .. ما بيسون عزيمة ؟
موزة : غربلاتج خخخ .. يمكن بيسوون بس بعدهم ..
ريم : وحريم خوانهم فطوم وخلود ما بيون وياهم
موزه : لا .. ما اعتقد ..
ريم :انزين ما علينا منهم ( وبصوت خفيف ) أقول موزوه ..
موزة ( حست بالي بتقوله ) : خيرر
ريم : اممممممممم
موزة : شووووووو
ريم : موزوه حبيبتي ،،بتكلمينه ولاّ ؟
موزة : ..........
ريم : بتكلمينه ؟؟

تمت موزة ساكته وريم تلح عليها تكلم خالد وبعد شوي ..

موزة : أوكى ،، بس ترى هي مرة وحده وبس وعقب روحي دوري غيري
ريم ( تقوم من مكانها وتحضن موزة ) : فديت روحج
موزة : الحين فديت روحي ؟؟
ريم : الحين وباجر وعقب باجر ،، كم موزاني عندنا ،، ألا أقول انتي بتتصلين له ولاّ أقوله اهو يتصل لج؟؟
موزة ( تتكلم بشرود ) : بكلا الحالتين رقمي بيكون عنده .. ( شوي تتكلم بصوت عالي ) .: لا خلاص هونت ما أبي اكلمه
ريم : شو ما بتكلمينه ؟؟
موزة : شو تبين رقمي يظهر عنده ؟؟
ريم : شو بلاج انتي خبلة ،، بقوله يمسحه عقب
موزة : ( تضحك باستهزااء ) : واذا قلتيه يعني بيسمع كلامج ؟؟
ريم : أكيد خلودي حبيبي ما يرد لي طلب
موزة : مصدقه عمرها الحبيبه
ريم : خليني اصدق عمري
موزة ( شكلها رضت ) : زين بنشوف

قامت ريم وراحت عند موبايلها واتصلت بخالد – اقصد سيف - ،، وموزة ما توقعت إنها تتصل فيه

ريم : هلا حبيبي
سيف : اهلين حياتي
ريم : شخبارك عيوني؟
سيف : يسرج حالي ،، وشخبار حبيبي ؟
ريم : تمام التمام،، أقول حبيبي ،، ترى ربيعتي وافقت تكلمك

تمت ريم تسولف ويا سيف ( خالد ) وموزة تأشر لها إنها ما تبي تكلمه الحين ،، لأنها تخاف حد من أهلها يدخل عندهن ،، واتفقت ريم وسيف على إن سيف يتصل بموزة الساعة 12 بالليل..

==========




أ . هـ
الجزء الاول

رهووووفه


 
التعديل الأخير:

معاني

::أديبة البرزة ::
التسجيل
24 نوفمبر 2004
رقم العضوية
2489
المشاركات
7,525
مستوى التفاعل
39
الجنس
الإقامة
قلب زايـد
مشاركة: ويبكي القلب

:tongue: :tongue:
:tongue:

اخيـــــــــرا ما بغيتــــــــــي...

مشكوره عزيزتـي..

بس لا تتاخريـن ..علينا بالجزء الثانـي..

لا اتقولين بعد اسبوع...

مرفووووووووض..
 

مهرة بلا فارس

{ . .عَناقِيدَ الجِرُوحَ. . }
التسجيل
1 مارس 2005
رقم العضوية
3176
المشاركات
40,118
مستوى التفاعل
1,478
العمر
19
الجنس
الإقامة
[ فِي بِِطنِ الحُوت. . ♥
الموقع الالكتروني
مشاركة: ويبكي القلب

مشكووووووووووووورة عل القصة






رهيييييييييييييييبة


روووووووووووعة


اسلوووب فنااااااان


والفاظ روووووووعة



شو رووووعة الا مفهوومة


والله يخليها النا رهووووفة


زين شوي فتحة نفسنا حق برزة القصص

مب قصة للشحوح فقط


سايرة الكلية ادور مترجمين الها


( لاتفهموووووووني غلط)


ومبين من البدااااية ياااااااااا رهوووووووووووفة ان القصة بتكووووووووووون


رهييييييييييييييييييـــــــبة



ياالله نتريااااااااا الاجزااااء الياية






ولــــــــــــــــه
 

راعي الويلات

๑ . . عضو إمبراطوري . . ๑
التسجيل
5 فبراير 2005
رقم العضوية
3071
المشاركات
4,222
مستوى التفاعل
21
العمر
42
الجنس
الإقامة
بوظبي داري
مشاركة: ويبكي القلب

يسلمووووووو

يلاه نتريا البقيه ........ وبالتوفيق انشاء الله
 

خيماوية و النعم

๑ . . عضو ملكي . . ๑
التسجيل
7 ديسمبر 2004
رقم العضوية
2600
المشاركات
2,020
مستوى التفاعل
120
الجنس
الإقامة
عقب الأذان
مشاركة: ويبكي القلب

شووو هااااا رهف كاتبة هالقصة
لالالالالا ما صدق

:mf_boff: :mf_boff: :mf_boff:

شو خطييرة هب خطيرة بس الا اكثر من روعة



مسكتة :tongue:


فناااااااااااااااااااااانة


يسلمووووووووووووووو رهووووفة





نتريا البقية









خيماوية :cool: و النعم
 

بو هزاع

๑ . . زائر . . ๑
التسجيل
9 أغسطس 2004
رقم العضوية
2059
المشاركات
7,494
مستوى التفاعل
45
الجنس
الإقامة
دبي
مشاركة: ويبكي القلب

ممممممممممممممم

القصة عجيبة لكن تنقصج بعض الموهبة في الكتابة يعني يبالج اشوية يعني بعدج ما وصلتي لخبرتنا انا ومعاني فشدي حيلج وحاولي تحتكي معانا وان شاء الله توصلين شراتنا يعني نتمنى ان نشوف قصص زيادة بكتاباتج وتكون زينة يعني


بالتوفيق
خخخخخخخ


بوهزاع
 

رهف

♣ القلمـ الخجول ♣
التسجيل
27 نوفمبر 2004
رقم العضوية
2513
المشاركات
21,478
مستوى التفاعل
1,455
الجنس
الإقامة
ღ. راك .ღ.
مشاركة: ويبكي القلب

معاني
=====
اسعدني تواجدج حبوبة
وبالنسبه على الاجزااء
حسب الظرووف




ولــــــــــــــــه
==========
مشكووووورة يالغلا

كلامج وااايد مشجع





راعي الويلات
=========
الله يسلمك




خيماوية والنعم
==========
هي انا كاتبتنها
وردج الاخطر




بو هزااع
=======
ومنكم نستفبد
بذمتك البداية مب زينة ؟؟





رهوووووووف
 
عودة
أعلى