• مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

قــــصة حــــب مــــــــــره حلووووه.... انشاء الله تعجبكم

دلع بنوتة

๑ . . عضو مخضرم . . ๑
التسجيل
3 ديسمبر 2007
رقم العضوية
8117
المشاركات
6,155
مستوى التفاعل
391
العمر
28
الجنس
بسم الله الرحمن الرحيم
ياليت تعجبكم القصه..؟
كانت خلود قاعده جدام دريشتها وفي ايدها صورة حبيبها محمد وقاعده تغني في اسم محمد
وهي سرحانه تسمع صوت من دريشه الشقه الي جدامها

جاسم : الله صوتج وايد حلو .. ويفتح الدريشه و يطالعها

خلود : ويعه وانت شكو .. تسمع على بنات خلق الله

جاسم : انا اسف انا كنت يم الدريشه ابي افتحها وجذبني صوتج وانتي تغنين

خلود : مو انا كنت متوقعه انا شقه الي جدامنا مافيها احد فاضيه

جاسم : أي لانه تونا ساكنين اليوم

خلود : زين خلاص لا تطولها .. يالله سكر دريشتك

جاسم : وليش تسكرين علي حياتي

خلود : شكو دريشه في حياتك ؟؟

جاسم : لانه منها القى ما بقى من حياتي

خلود : اوووووه شكلك مينون .. انا ابي اسكر دريشتي وارتاح منك

)وتسكر الدريشه )

ويبقى جاسم عند دريشته يطالع لي سماء وهو سرحان ..

وتمت خلود تتابع جاسم من ورا ستارة دريشتها وهو ما يدري عنها وتستغرب سرحان

جاسم الطويل ونظراته لي السماء وهو جالس يكتب في دفتر كان ما يفارق ايده ..

وبعد اربع ايام فتحت خلود الدريشه قصدت منه تهويت الغرفه وفي ايدها الثانيه تليفونها النقال تكلم فيه حبيبها محمد

خلود : محمد شفيك صار لك مده ما تكلمني شنو لي مغيرك علي

محمد : ( بدون نفس ) مافي شي

خلود : شنو مافيه شي انا مزعلتك يا محمد

محمد : اوووه تراج اذيتيني وياج ما عندي غيرج يعني

خلود : محمد انت شنو قاعد تقول ؟؟

محمد : اقول خلود انا مشغول مع السلامه

خلود (بصوت عالي ): بس محمد

(ويسكر التليفون )

ويفتح جاسم الدريشه وهو حاط على ظهره بطانيه صوف وبايده المرتعشه ماسك دفتره

ويطالع لي سماء ويكتب في دفتر وملامح ويهه تبين عليه التعب

و خلود ) ماسكه في ايدها التليفون وفي ايد ثاني حطتها على راسها وتفكر )

جاسم : ( يطالع لي خلود وبصوت ضعيف ) صباح الخير

خلود : (تطالعه ) نعم

جاسم : اسف على الازعاج بس حسيت من المفروض علي اصبح على جارتنا

خلود : هذا انتم يا الشباب ما تشوفون بنت الا

ويقاطعها صوت مسج من محمد وتفتحه بسرعه

(خلود خلاص انسيني انا لقيت غيرج مع السلامه)

وتنصدم خلود من محمد وتحاول تدق عليه

ويقاطعها صوت مسج ثاني

(خلود تراني عطيت خطي حق ولد خالتي لا تحاولين تدقين علي)

ومن هول ما شافت يطيح التليفون من ايدها الى ارض العماره ويتكسر .. وتنزل الدمعه من عين خلود

وهي ساكته ما تعرف شنو تسوي ؟؟؟

جاسم : عسى ما شر شنو السالفه ؟؟

خلود : ( بنظرات حقد ) انتم كلكم نفس بعض الله ياخذكم ويحرقكم مثل ما حرقتوا قلبي

جاسم : بس انا

) وتسكر دريشة غرفتها بقوه )

زاد تعب جاسم لما شاف خلود جي .. وحس انه يضايقها وعزم انه ما يفتح دريشته لما يشوفها ..

علشان ما يضايقها .. وتم على هذا مده مو قصيره ..

ومن ناحيه ثانيه كانت خلود حزينه على الي سواه محمد فيها وكانت تفكر

وتراجع كلامها خافت انه في كلمه قالتها له ضايقته فيها ..

بس ما لقت شي ما عمره طلب منها شي غير انه عطته بدون حدود ولا كانت تنطر منه كلمة شكر

وبعد فتره حست ان جاسم له مده ما طلع من دريشته الي كان متعود عليها وكانت تنطره فتره على اقل تتاسف له على سوته بس ما شافته

وصارت تنطره عند الدريشه فترات طويله من النهار بس ما طلع ولا اقترب من دريشته


وفي يوم كانت مستعجله تبي تلحق على باص المدرسه فتحت دريشتها ولقته توه فاتح

دريشته ولما شافها كان يبي يسكرها

خلود : لحظه لحظه

جاسم : يفتح الدريشه .. هلا ؟

خلود : شوف في كلام ودي اقوله لك بس انا مستعيله الحين اكلمك العصر اوكي الساعه 5

يالله مع السلامه لانه باص المدرسه ينطرني تحت

جاسم : ان شاء الله اذا قدرت مع السلامه

خلود : لا تكفى حاول

جاسم : ان شاء الله

وتروح خلود لي مدرسه وتعد الساعات علشان تطلع ولما طلعت تمت في غرفتها تطالع الساعه

لين تي الساعه 5 ولما يت ركضت لي دريشتها وفتحتها بس ما شافت جاسم عند الدريشه ..

جلست قدام الدريشه تنطر وتمر الدقيقه ورا الدقيقه وتجري الساعه وراى الساعه وينزل

ظلام الليل على سماء الكويت وتزيد ظلمة غرفة جاسم ظلمه لين يت الساعه 10 بليل وقالت

خلود حق نفسها اكيد هو زعلان ولا منحرج مني ولا راح يجي ابي اسكر الدريشه وانطره بكره

وتسكر دريشتها وتحس بنور من غرفة جاسم وترد وتوخر الستاره عن الدريشه وتشوف ام جاسم

تفتح الدريشه ويدخل جاسم لي غرفته على كرسيه المتحرك ويقترب من الدريشه

وتحط بطانيه صوف على كتف جاسم وترسم على جبهته قبله من شفات امه وتطلع من الغرفه ويقترب

جاسم لي دريشه وعينه الى سماء ويتمتم بكلمات وتنزل من عينه دمعه ..

وتفتح خلود الدريشه
خلود : ( بصوت خفيف ) قوه

جاسم : ولا يحس فيها

خلود : ( تعلي في صوتها ) قوووه

جاسم : يلتفت لها ويمسح ما نزل من خده من دموع .. هلا اسف ما انتبهت عليج ..

واعذريني لما تاخرت عليج بس ما كان في ايدي توني ياي

خلود : لالا مو مهم اهم شي انك رديت .. بس انت شنو قاعد تقول حق روحك .. اشوف شفاتك تتحرك

وتنزل دمعه من عينك

جاسم : اقول (ابتسم واضحك تره الدنيا حلوه )

خلود : الله وايد حلو كلامك

جاسم : مشكوره هذا كلام اقص على روحي فيه

خلود : وليش تقص على روحك

جاسم : مو مهم تعرفين .. ولا ودي اقوله لانه وايد يعذبني

خلود : على راحتك وعلى العموم انا كان ودي اتاسف لك على الي صار هذاك اليوم

جاسم : يعني انا ما كنت مضايقج

خلود : هي مو سالفت مضايقني بس كنت ....

جاسم : كنتي متزاعله مع محمد

خلود (باستغراب):شلون عرفت؟؟

جاسم: سمعتج وانتي تكلمينه .. صوتج كان عالي

خلود: لا حنا خلاص افترقنا .. وانا مو متحسفه عليه لانه هو الخسران خسر قلب كان يحبه

جاسم : واليوم

خلود : اكرهه .. اكرهه على كثر ما حبيته .. اكرهه.. والله اكرهه ..

جاسم : لا تحلفين الي يحب ما عمره يكره

خلود : والله كرهته .. كرهته يـــا ..... ؟؟

جاسم : جاسم ..اسمي جاسم

خلود : عاشت الاسامي يا جاسم .. وانا اسمي خلود

جاسم : عاشت ايامج .. وعاشت الاسامي يا خلود

خلود : تسلم .. خلاص يا جاسم لو سمحت لا تذكرني فيه .. زين ابي اسئلك سؤالين ممكن ؟

جاسم : أي حاضر

خلود : انا كل مره اشوفك اشوف وياك هالكتاب ماسكه وياك وتقعد تكتب فيه شنو تكتب ؟؟؟

جاسم : اكتب قصص .. هوايه من انا صغير نسيتها فتره ورديت لها من سنتين

خلود : وشنو تكتب وليش رديت لي الكتابه ؟؟

جاسم : اكتب اشياء وايد كل شي يخطر على بالي ورديت له من سنتين بسبت مرضي

خلود : سؤال ثاني ودي اقوله لك بس مستحيه

جاسم : لا قولي لا تخشين في قلبج

خلود : انت من متى على ......

جاسم : على الكرسي .. انتي شفتيني ؟؟

خلود : أي مو انا كنت انطر ولما سكيت دريشتي امك دشت غرفتك وانت دشيت وراها وشفتك

جاسم : انا قبل ما كان فيني شي لين سنتين حاشني مرض قعدني على الكرسي هذا ما اقدر
امشي منه الا بصعوبه

خلود : الله يشفيك ان شاء الله

جاسم : ان شاء الله

خلود : ممكن اشوف الي انت تكتبه

جاسم : أي حاظر بس لحظه ابي اسمي الكتاب .. وكتب عليه اسم ( فاقد الشي لا يعطيه ) ..

زين شلون اعطيك ايها

خلود : حنا قريبين يم بعض حذفه علي وانا امسكه

جاسم : اخاف ما يوصل لج

خلود : ما عليك انت حذفه وانا امسكه


ويحذفه جاسم كتابه على خلود وتمسكه في ايدينها الثنتين وتضمه على صدرها

جاسم : اشوفه وصل لج

خلود : حمدالله والله كنت خايفه اني ما امسكه

جاسم : ايل اخليج تقرينه لاني لزم اخذ دواي وانام الحين وبكره عندي مراجعه لي المستشفى

خلود : طمني عليك .. وانا ابي اسهر عليه

جاسم اوكي خلاص ايل تصبحين على خير

خلود : تلقى كل خير في ويهك

جاسم : هذه يديده

خلود : أي هذه علشانك بس ) ويحمر خدها خجل وتسكر الدريشه )
وتجلس على طرف سريرها وتفتح الكتاب واستغربت من عنوان فاقد الشي لا يعطيه

وافتحت الكتاب ومن اول سطر لقت روحها تمشي صفحه ورا صفحه وقصه ورا قصه

ودموعها من غير شعور تنزل من عينها وعلى خدها تجري لين ما طلع الصبح

ولقت روحها انتهت من اخر قصه وهي تنصدم من روحها لانه تاثرت وايد

بالقصص ولا توقعت انها راح تبجي هالكثر .. كل القصص نهايتها حزينه

وحست من عنوان الكتاب ان قصد جاسم انه فاقد الفرحه ولا قدر يعطيها لي ابطال القصه الي يكتبها ..

وحست انه انسان وايد طيب وحساس ومرضه اثر عليه وايد ..

وبدلت ملابسها وراحت لي المدرسه .. ولما ردت من المدرسه وهي نعسانه ودها تنام

قالت حق روحها خني اشوف جاسم رد ولا لين الحين .. وفتحت الدريشه وشافت جاسم ينطرها

جاسم : انا حاس كنتي تبين تفتحين الدريشه الحين

خلود : شلون عرفت؟؟

جاسم : احساس

خلود : تدري انك مسهرني من امس ما نمت تميت اقرا القصص كلها ولا خليت ولا سطر ..

كلامك وايد حلو ومشاعرك صادقه .. ماشاء الله عليك والله موهوب

جاسم : لا شدعوا هي مجرد قصص اكتبها القصد منها تضيعت الوقت

خلود : جاسم عمرك حبيت ؟؟؟

جاسم : أي حبيبت ساره ولميس وهند . وبعد حبيت نوف وعشقت نوره و مريم .

خلود : بس هذيل ابطال قصتك

جاسم : انتي ما لاحظتي بكل القصص اسم بطل واحد

خلود : قصدق ناصر .. أي صح

جاسم : انا حبيت هذيل كلهم وعشت في ناصر

تصدقين كان ودي انهي كل قصه منها بشي سعيد بس ما اقدر امنح السعاده وانا بنفسي فاقدها

خلود : بس يا جاسم

جاسم : لا بس ولا شي لا تحاولين تقنعيني

خلود : ما ادري شنو اقولك بس انا بخليك الحين واشوفك بالليل لاني وايد نعسانه

جاسم : على خير

خلود : تصك الدريشه وترد تفتحه بسرعه .. جاسم ...جاسم

جاسم : يفتح الدريشه .. نعم

خلود : نسيت اسئلك شنو سويت في المستشفى ؟؟

جاسم : ما سويت شي فحصوني مثل كل مره وصفوني مسكنات وقالوا راجعنا بعد شهر ..

خلود : الله بشفيك ان شالله

جاسم : ان شاء الله

خلود : أوكي أشوفك بالليل مع السلامه

جاسم مع السلامه

وتقوم خلود الساعه 9 ونص بالليل وتركض لي دريشتها وتفتحها

ولا تشوف جاسم قدامها ينطرها

خلود : من متى انت هني ؟؟

جاسم : انا هني من اول ما خليتني

خلود : شنووو ؟!!

جاسم : أي والله تميت عند الدريشه من اول ما خليتيني وانا انطرج

خلود : بينها وبين نفسها (يا بعد عمري )

ماادري شنو اقولك
جاسم : لا تقولين شي كلميني عن روحج ... انا لين الحين ما اعرف عنج شي

خلود : انا يا جاسم انسانه مثل أي انسانه في الدنيا حبيت واحد لكن للاسف طلع خاين

جاسم : بس هذا مو آخر العالم .. والحمدالله انج في الأخير كشفتيه على حقيقته

خلود : حمدالله على كل خير وان شاء الله .. الله يعوضني في الي احسن منه

جاسم : ( يسكت وينزل راسه ) لا يكون عبالج انا راح اكون ..........

خلود (يحمر خدها خجل )

ومن قال (وترتبك )

انا اصلا ما فكرت فيك ولا اهتميت لك وهي كله مجرد سوالف واذا تبي اسكر دريشتي ولا راح

تسمع صوتي مره ثانيه

جاسم : ( يلف راسه لي اتجه ثاني عن خلود ) يكون احسن

خلود : انصدمت ولا قدرت تقول شي

جاسم : يلتفت لها والدموع على عينه .. انا اسف ...مع السلامه

خلود : جاسم لا تروح ابيك

جاسم : نعم

خلود : جاسم ممكن نكون اصدقاء .. ولا يكون غير هذا بينا .. انا محتاجه لك يا جاسم

جاسم : بس .........

خلود : هالمره لا بس ولا شي اقولها لك اسكت وخني اكمل لا اهفك بكس في ويهك

) وتمسح دمعه من خدها وتضحك )

جاسم : يضحك .. ويقول لها الله يقطع ابليسج وهم انا بعد محتاج لج

خلود : خلاص كل واحد فينا محتاج حق الثاني انتهت المشكله

جاسم : ايل خلاص .. اصدقاء

خلود : زين انت ما كلمتني على روحك ؟؟

جاسم : انا يا خلود وحيد امي.. ابوي مات من زمان انا ما شفته.. مات وانا توني صغير

خلود : الله يغمد روحه الينه

جاسم :آآآمين وكنت وايد متفوق في الدراسه لين تخرجت من الثانوي

ولما دشيت جامعه ما خلصت غير كورس واحد وياني مرض .. وانا الحين على هالحاله .. صار لي سنتين

خلود : الله يشفيك

جاسم : زين انتي صج عندج اخوان ولا خوات ؟؟

خلود : أي عندي اخت وحده وامي منفصله من ابوي صار لهم اربع اسنين

جاسم : ايل وين اختج ما اشوفها

خلود : والله اختي من ربع الانترنت اربع وعشرين ساعه في غرفتها مقابلته

جاسم : وانتي ما تدشين النت ؟؟

خلود : ولا اواطنه

جاسم : ( يضحك ( ليش؟؟؟

خلود : بس جي

جاسم : زين شلونك ويا الدراسه؟؟

خلود : والله كل شي اوكي ما عاده ما ده وحده ملعوزتني مكرهتني الدراسه

جاسم : شنو هي ؟

خلود : مادة الفلسفه

جاسم : الله يعينج والله .. شنو رايج اساعدج

خلود : تساعدني؟؟؟ شلون؟

جاسم : انتي باجر عليج هالماده

خلود : لا

جاسم : ايل حذفي علي كتابج .. ولا عليج

خلود : لا يا جاسم ما ودي اعقدك ويها

جاسم : لا تعقيد ولا شي

خلود : شلون مو تعقيد وهي ام التعقيد كله

جاسم : انا اصلا كنت ادبي وكانت هالماده أفضل ماده عندي ..

عطينياه واذا ييتي من الدوام اعطيج كتابج وانا ملخصه لج .. ومخطط عليه بعد

خلود : اوكي ابي اعطيك اياه

وتحذف كتاب خلود لي جاسم ويمسكه جاسم

خلود : ايل اخليك الحين ابي انام الحين

جاسم : اوكي تصبحين على خير ايل أشوفج باجر

خلود : اوكي مع السلامه

جاسم : مع السلامه

وقعد جاسم الصبح وجلس يقرا كتاب الفلسفه ويحاول يلخصه لكن شاف

اول حرف من اسم محمد مكتوب في كل صفحه تقريبا ..

وبدون شعور مسك القلم ومسح كل حرف لي محمد من الكتاب ..

وتم يلخص الكتاب لي الساعه 5 العصر لين انهى المنهج كله ..

وبعد التعب مسك جاسم الكتاب وضمه على صدره وتمدد على السرير ..

وبعد لحظات سمع صوت دريشة خلود تنفتح .. ويقوم ويحاول انه يمشي بصعوبه الى

كرسيه المتحرك ويتجه لدريشته ويفتحها ولقى خلود ماسكه في ايدها ورده حمراء

جاسم )يطالع خلود ولا قدر يفرق من احلى الورده ولا خلود ) مساء الخير

خلود : هلا مساء النوير .. شلونك جاسم

جاسم : حمدالله طيب .. وانا توني الحين خلصت من تلخيص المنهج ما عليج الا تحفضين التلخيص .. وادعيلي بعدها

خلود : خني اشوف ايل حذفه علي

جاسم : ( يحذف كتاب الى خلود ) ديري بالج لا تطيحين

خلود : ( تمسكه ) ما عليك تراني احسن وحده في الكويت تسد كتب ولا كتاب قدر يفلت مني

جاسم : ( يضحك ) ايل خوش .. تصلحين حارس مرمه

خلود : ( تفتح الكتاب ) أووووووووو أف عليك... والله ما ادري شنو اقولك

جاسم : شنو لايكون ما قدرت الخص عدل اعذريني صار لي فتره ..

والله سويت الي قدرت عليه انا اسف

خلود : لالالا انت فهمتني غلط .. ما شاء الله عليك تلخيصك وايد حلو وهم خطك واضح حيل

جاسم : ( يحط ايده على قلبه ) أي أشوه الحمدالله اني قدرت الخص لج عدل

خلود : واحسن شي سويته

جاسم : شنو ؟

خلود : انك مستح اسم الزفت محمد

جاسم يسكت وينزل راسه ويطالع لي الجهه الثانيه )

خلود : تعرف شنو ابي احط بداله؟؟

جاسم : ( يلتفت لها ) شنو؟؟

خلود : لحظه .. وتكتب بخط عريض اسم جاسم على اول صفحه .. وتوريه له

جاسم : شنو هذا ؟؟

خلود : هذا اسمك .. هو يستاهل انه ينكتب

) وتقول حق روحها والله اول ما كتبته كتبه على قلبي يا بعد قلبي )

جاسم : مشكوره و (يضحك لما دمعت عينه)

خلود : اللــــه ضحكتك وايد حلوه

جاسم : بس مو احلى من صوتج .. انا اول ما سمعته مدري شنو صار فيني

خلود : ( تستحي ) لا شدعوا

جاسم : أي والله يا خلود

خلود : تسلم وخلاص تراني مافيني بعد تراني الحين اصدق عمري

جاسم : ( يضحك ) .. بس صدقيني بدون شعور لقيت روحي امسح حرف محمد

خلود : صج ليش مسحته ؟؟

جاسم : لانه ما يستاهل وحده مثلج

خلود : أي والله .. وانا اتحسف على كل لحظه مضيتها وياه

جاسم : خلاص انسيه ولا تذكرينه لانه ما يستاهل حتى تذكرينه

خلود : اوكي
جاسم : أي صج متى عيد الحب

خلود : بسرعه.. باجر .. و ليش تسال؟؟

جاسم : لاني ما عمري في حياتي ما عيدت فيه حق أحد

خلود : ومنو ودك تعايد فيه ؟؟

جاسم : أي .. ودي

خلود : ( وهي تبتسم ) وحق منو الهديه راح تيب

جاسم : حق امي

خلود : ( تبدلت ابتسامتها الى خيبت رجى ) اهاااا زين تسوي تستاهل امك

جاسم : وانتي راح تعطين هديتج حق منو؟؟

خلود : ( بزعل ) طبعا حق امي .. يالله جاسم اشوفك على خير ( وتسكر الدريشه ) وتجلس على

الارض وهي معصبه .. وتقول شنو فيها لو دز لي هديه

وفي الناحيه الثانيه يجلس جاسم يفكر شنو يجيب هديه وجت على باله انه يجيب دبدوب وباقة ورد

صناعي ..

وينزل من الشقه وهو يمشي وحط ايده على طوف العماره وبكل صعوبه يجر خطواته

والتعب يبين عليه .. لين وصل محل الهدايه كان قريب العماره ولما دخل المحل شاف خلود

واقفه محتاره شنو تشتري مدت ايدها على دبدوب لونه احمر وبين ايدينها قلب مكتوب فيه

(((ILOVE yOu)))

وسرحت يد جاسم لها وقال لو سمحتي هذا لي ولما التفتت خلود انصدمت و ارتبكت ولا

قدرت تقول شي

جاسم : وهذه بعد باقة ورد صناعي ابي اخذه

خلود : وكل هذا حق امك

جاسم : انا اكتشفت انه امي ما تحب هالسوالف وتقول انها خرابيط وانا على هذا راح اهديه

لج انتي

خلود : حست روحها تطير من فرحه .. وحتى انا بعد امي ما تحب عيد الحب وعلى هذا انا راح

اهديك هذا القلب الكرستالي ومكتوب اول حرف من اسمي ((K ))

يالله انا ابي اروح واشوفك باجر بالليل

جاسم : ان شاء الله

وتطلع خلود بعد ما حاسبت على اغراضها

ويصعد جاسم الدرج لانه كان الاصنصير مسكر وبعد ما وصل لي غرفته حس انه ما يقدر يمشي

خطوه وحده .. وسقط على باب غرفته وبعد صعوبه قدرت امه تشيله وتحطه على افراشه وهي

تعاتبه ليش نزل .. وهو ولا يقدر ياخذ نفس قال كان ودي ايب هديه يا يمه لي شخص عزيز علي

وتطلع امه والدمعه على خدها حزن على ولدها ...

(((اليوم الثاني الساعه 10 بالليل )))

جاسم (يفتح دريشته وفي نفس الوقت تفتح خلود دريشتها )

خلود : جاسم وينك العصر ماشفتك ؟؟

جاسم : والله يا خلود ما قدرت اقوم من فراشي كله من التعب الي تعبته بسبت الدرج وروحتي لي المحل

خلود : انا اسفه يا جاسم

جاسم : لا يبه ما صار الا كل خير .. على فكره.. وايد عاجبني القلب مشكوره عليه

خلود : وهم الدبدوب وايد حلو .. نومته وياي امس حظنته على صدري .. وباقة الورد حطيتها يم راسي

علشان كل يوم اجدد يومي فيها

جاسم : وحتى قلب الكرستال مالج حطيته يم راسي .. بس صج ما سئلتي روحج ليش شريت لج ورود

صناعي مو طبيعي ؟؟

خلود : مو مهم صناعي ولا طبيعي المهم منك

جاسم : لا مهم .. لان الطبيعي يذبل بسرعه اما الصناعي يدوم ولو جاء يوم وذبل

الي في قلبي لج ما يذبل وحبي لج ما عمره يذبل

خلود : ( تسكت وتبتسم ) توك قدرت تقوله وانا هم احبك يا جاسم .. وكل عام وانت بخير يا حبيب عمري

جاسم : وانتي بخير يا عمري

كانت هالليله اسعد ليله لي جاسم وحس انه الدنيا صج حلوه وصار يتغنى ويه خلود في

) ابتسم واضحك تره الدنيا حلوه )

وتموا ويا بعض لين الفجر لين ما حرم بعضهم سلطان النوم

(((اليوم الثاني المغرب)))

خلود : ( بصوت خفيف ) تنادي جاسم .. جاسم جاسم ...جاسم ..

جاسم : يفتح الدريشه . هلا خلود اعذريني كنت بره الغرفه

خلود : هلا بعمري شنو رايك فيني وانا متزينه ولابسه احلى ملابسي

جاسم : رووعه والله .. ما شاء الله عليج

خلود : مشكوره بس انا لابسه لاني ابي اروح لي عرس بنت خالي ..

وقلت اول واحد راح يشوفني هو جاسم واترخص منه اني اروح ..

والحين بعد اذنك ممكن اروح؟؟

جاسم : طبعا لا...خلج وياي

خلود : خلاص ايل ابي اغسل ويهي واسكر الباب واقعد وياك لين الفجر

جاسم : تعالي وين رايحه اضحك وياج

خلود : جاسم والله لو بغيت اني اقعد اقعد هو بيني وبينك القعده وياك تسوى الدنيا ومافيها

جاسم : بس هذه بنت خالتج

خلود : ويعني .. انت لا تعتبر انه في احد في الدنيا احبه اكثر منك ..

والله الي خلقني وخلقك اني احبك انت اكثر شخص عندي في دنيا خلود

ولو حطوا ميزان ووزنوا حب الناس كله لبعضهم ووزنوا حبي لك لي صار حبي هو اثقل ..

انت ما تعرف شكثر احبك .. شنو اسوي علشان اثبت اني احبك

جاسم : انج تروحين عرس بنت خالتك .. وتديرين بالج من عمرج وتقرين المعوذات قبل لا تدشين

العرس .. تره عيون الناس ما ترحم يا حياتي

خلود : ان شاء الله .. وحاضره .. وما طلبت شي ..يالله باي .. اشوفك بالليل
جاسم : ان شاء الله بس لا تطولين علي انا راح اتم انطرج .. ولا راح ارتاح لين اشوفج

خلود : وانا ما راح اطول الساعه 10 ان شاء الله اكون هني

جاسم : ان شاء الله

وتروح خلود ويتم جاسم ينطرها عند الدريشه

ولما يت ساعه 10 قالت خلود حق امها انها راح ترد ويه السايق .. لكن امها رفضت لانه خايفه

ترد خلود ويه السايق بروحها في لليل .. لكن خلود اصرت وراحت بدون لا تدري امها وردت ويه السايق ..

وكان جاسم ينطرها عند الدريشه كان يروح ويرد في كرسيه وكانت خلود لحظتها تركض

على الدرج لين توصل الى الشقه .. لكن كان جاسم مل من كثر ما نطر وقال حق روحه أكيد ما

راح تي وقام بصعوبه من كرسيه علشان يطفي ليت الغرفه .. ولا خلود تدش غرفتها بسرعه وتركض

الى دريشتها وتفتحها .. وتشوف جاسم يبي يسكر الليت

خلود : جاســــــــــــم انا رديت

جاسم : التفت بسرعه وما قدر يوزن روحه ويطيح عالارض

خلود : جاسم جاسم

جاسم : بصعوبه يقترب من الكرسي المتحرك وهو يزحف لين ما ارتكز على حافت السرير

وحلس على الكرسي سوري بس انتي فاجئتيني

خلود : وهي حاطه ايدها على قلبها .. الله ياخذك قطعت قلبي .. لحظه خلني اقعد والله احس

روحي طلعت وريولي ما تشيلني

جاسم : لا سلامة قلبج يا يا بعد قلبي انتي

خلود : وانا ناقصه تخرع بروحي انا متخرعه ؟

جاسم : عسى ما شر حياتي شنو فيج

خلود : يا عمري انا طلعت من العرس وامي ما تدري علشان هي كانت رافضه ردتي بروحي ويه السايق
جاسم : زين ليش ما سمعتي كلام امج؟

خلود : ( وهي مبتسمه ومستحيه ) اول شي انا وعدتك اني أي الساعه 10 ولا اقدر اخلف وعدي

جاسم : لا والله .. قولي صج

خلود : صج صج

جاسم : أي صج صج

خلود : لاني كنت مشتاقه لك موت والله تولهت عليك ولا قدرت حسيت روحي انه الدقيقه مثل

الساعه والساعه مثل السنه عنك يا حياتي

.. ماادري شنو سويت فيني خليتني احبك جي .. جاسم

جاسم : هلا

خلود : لو في كلمه اكبر من احبك جان قلتها لك بس يا حسافه ما فيه ...

جاسم ترض في كلمة احبك من كل قلبي ويا ليت تبين كثر حبي لك

جاسم : ساكت

خلود : جاسم .. شفيك ساكت

جاسم : خلود والله احبـــــــــــــج

خلود : يا بعد عمر خلود والله .. فديت عمرك والله

جاسم : وعمرك يا حياتي .. لحظه ابي اوريج شي ويورح لي زاوية الغرفه ويجيب في ايده قفص

ذهبي اللون وفيه عصفورين من عصافير الحب واحد لونه احمر والثاني لونه اخضر

حياتي شوفي

خلود : الله روعه شحلاتهم

جاسم : هذه امي يابته لي اليوم بعد ما طلعتي على طول

خلود : وايد حلوين يا حياتي

جاسم : ولا وسميتهم بعد .. الي لونه احمر هي

انتي خلود والي لونه اخضر انا جاسم

خلود : بعد عمري انت والله ..وان شاء الله والي جمع عصفورين في قفص ذهبي ..

يجمعنا في قفص حياتنا .. وتكون لي حقي بروحي واكون لك انت ..

بس متى يارب

جاسم : حياتي عن قريب ان شاء الله وان شاء الله بعد ما ارجع من السفر

خلود : ( تقاطعه ) أي سفر ومتى راح تسافر

جاسم : هذه السفره لي لندن راح اتعالج هناك وصفوني دكتور هناك متخصص مثل هالامراض النادره ..

وراح اسافر بعد اسبوع

خلود : ( تسكت وتنزل الدمعه من عينها ) راح اشتاق لك وايد

جاسم : لا تبجين يا حياتي راح ارجع لج ان شاء الله

خلود : ان شاء الله

وتمشي ايام ثقال على خلود وهي تتحسف على كل لحظه تبتعد عنها عن جاسم

لي درجه انها ما تنام غير ساعات قليله .. وكانت طول اليوم بقرب جاسم تكلمه ..

وهو يواسيها ويوعدها انه راح يرجع لها


((ليــــــــــــــلة السفر))


خلود : ( وهي تبجي ) راح تسافر يا جاسم

جاسم : والله يعز علي نفسي اني اخليج وراح اشتاق لج وايد .. بس شنو اسوي

خلود : بس راح اشتاق لك وايد وما ادري شنو راح يصبرني على افراقك

جاسم : شوفي اذا اشتقي لي اقري من الكتب الي عطيتج اياه .. وراح تهون عليج

خلود : والله ما يهون علي احد غير شوفتك

جاسم : يا بعد عمري لا تخافين ما راح اطول بس حياتي عندي طلب ..

من زمان كان ودي اقولها لج بس مستحي

خلود : يا عمري والله .. عيوني لك والله امرني

جاسم : ابيج تغني لي

خلود : يا عمري بس هذا .. شنو تبين اغني لك

جاسم : أي شي تبينه


خلود : يا عمري .. راح اغني لك اغنيه حقت نوال

غالي غالي

) وتغني )

غالي غالي لو يبعد مها يطول الصد :: شوفت جاسم ساعات عقب البطه تسعد

خلود : جاسم والله انك غالي .. علي وراح اشتاق لك وايد .. اعذرني ما اقدر اكمل

)وتبجي )

جاسم:

( يغني ويحاول ان دمعته ما تنزل )

غاليه غاليه لو تبعد مها يطول الصد :: شوفة خلود ساعات عقب البطه تسعد

خلود : ياعمري والله

) ويغنونها لي ساعات طويله لين ما انتصف الليل .. )

ورتاحت خلود شويه .. من الحزن

جاسم : حياتي انا اسف بس لازم انام انا الحين

خلود : خلاص نام الحين وانا الصبح اقومك بس خل دريشتك فاتحه

جاسم : خلاص عمري لو قدرتي الساعه 8 الصبح قوميني علشان اقعد وياج شويه وبعدين اسافر

الساعه 10 الصبح لازم اكون في المطار

خلود : يعني تقعد وياي بس ساعتين

جاسم : خلاص الساعه ست قوميني

خلود : يا عمري خلاص راح اتم سهرانه لين

الساعه 6 الصبح

جاسم : لا عمري لا لازم تنامين


خلود : لا حياتي .. ابي اقعد اقره كتابك الي كاتبه .. واقعد اتخيل روحي انا بطلة القصه

واحاول في عقلي اني اعدل في النهايه وتكون سعيده

جاسم : اذا جي اوكي .. يالله تصبحين على خير

خلود : وانت من اهل الخير

وتجلس خلود تحت الدريشه وتمسك الكتاب وتقرا فيه .. لين ما نامت وهي جالسه

وتقوم الساعه 7 على صوت العصافير الي في قفص جاسم وهي مفزوعه ..

وتوقف على الدريشه .. ويطيح عينها على قفص العصافير والا العصفور الاخضر ميت والعصفوره

الحمره تغرد في صوت عالي وحزين ..

.. وتصيح خلود على جاسم الي متمدد على الفراش

خلود : جـــــــــاسم جــــــــــــــاسم

جــــــــاسم يا حياتي رد علي .. جــــــــاسم شفيك جــــــــــاسم يا عمري .. رد روحي تكلم ..

يا جـــــــاسم .. جــــــاسم وينك . جاسم حياتي امانه رد علي ..

جاسم .. جاسم

ليش ساكت ما ترد علي .. شفيك ..

جـــاسم جـــاسم جـــاسم

جـــاسم .. وتدخل ام جاسم على صوت صراخ خلود

وتحرك جاسم من فراشه ولا يتحرك تحاول تكلمه

ما يرد عليها .. لانه قبل ساعات قليله اطلعت روحه الطيبه من جسمه .. قبل لايسافر ويتعالج ..

وتصارخ خلود وبغير شعور تطيح خلود من دريشتها من الدور الثالث..

وتركض امها على صوت الصراخ وتشوف بنتها طايحه بارض العماره وتحاول تشيلها وتسعفها الى اقرب مستشفى

((في غرفة العناية المركزه))


الدكتور : ام خلود .. الحمدالله بنتج تعدت مرحلة الخطر .. والرضوض الي فيها ممكن تتعالج وتروح مع الايام .. بس

ام خلود : بس شنو يا دكتور

الدكتور : بس خلود ما تقدر تمشي بعد هالمره.. انا اسف حاولنا على قد ما نقدر بس ما في امل

تمشي على ريولها مره ثانيه

وتجلس تبجي ام خلود على حض بنتها الي تدمرت حياتها وهي في عمر الزهور

وبعد عدة اسابيع ترد خلود لي شقته وفي نفس اللحظه تسكر ام جاسم دريشة المرحوم جاسم

وتعزل من الشقه .

تدخل خلود غرفتها وتقول حق اختها و امها ان يخلونها بروحها ..

وتحرك كرسيها المتحرك الى دريشتها وتفتحها وملامح الحزن باينه عليها ..

وتجلس تناظر دريشة جاسم .. وتمسك في يدها كتابه ويدها

الثانيه على خدها.. تنطر اليوم الي يفتح فيه اسير النافذه نافذته

**انتـــــــــــــــــــــــــــــــــهـــــــــــ ـــــــــــــــت**
 

مهرة بلا فارس

{ . .عَناقِيدَ الجِرُوحَ. . }
التسجيل
1 مارس 2005
رقم العضوية
3176
المشاركات
40,118
مستوى التفاعل
1,478
العمر
19
الجنس
الإقامة
[ فِي بِِطنِ الحُوت. . ♥
الموقع الالكتروني
رد: قــــصة حــــب مــــــــــره حلووووه.... انشاء الله تعجبكم






تسلمي على القصة



 

دلع بنوتة

๑ . . عضو مخضرم . . ๑
التسجيل
3 ديسمبر 2007
رقم العضوية
8117
المشاركات
6,155
مستوى التفاعل
391
العمر
28
الجنس
رد: قــــصة حــــب مــــــــــره حلووووه.... انشاء الله تعجبكم

تسلمي ع المرور
 

.+[ وهـج ]+.

๑ . . عضو ماسي . . ๑
التسجيل
21 يونيو 2008
رقم العضوية
9139
المشاركات
1,258
مستوى التفاعل
5
الجنس
الإقامة
باريس ..!*
رد: قــــصة حــــب مــــــــــره حلووووه.... انشاء الله تعجبكم

يسلموووو ع القصه
 

RAK Queen

๑ . . عضو ملكي . . ๑
التسجيل
23 نوفمبر 2007
رقم العضوية
8073
المشاركات
2,800
مستوى التفاعل
551
العمر
29
الجنس
الإقامة
رااك
الموقع الالكتروني
رد: قــــصة حــــب مــــــــــره حلووووه.... انشاء الله تعجبكم

تسلميييييييي بنوته ع القصة الغاوية
 

¯`•شاهيــטּ قدى•._

๑ . . عضو إمبراطوري . . ๑
التسجيل
27 سبتمبر 2008
رقم العضوية
9603
المشاركات
4,275
مستوى التفاعل
306
العمر
30
الجنس
الإقامة
قلب الحرات
رد: قــــصة حــــب مــــــــــره حلووووه.... انشاء الله تعجبكم

يسلموووووو ع القصه
 

دلع بنوتة

๑ . . عضو مخضرم . . ๑
التسجيل
3 ديسمبر 2007
رقم العضوية
8117
المشاركات
6,155
مستوى التفاعل
391
العمر
28
الجنس
رد: قــــصة حــــب مــــــــــره حلووووه.... انشاء الله تعجبكم

شيخة البنات

دمعة الحزن

شاهين قدى

تسلموووو ع المرور الغاوي

وربي يعطيكم العافية
 

»بدوي«

๑ . . عضو ماسي . . ๑
التسجيل
25 أغسطس 2008
رقم العضوية
9422
المشاركات
1,281
مستوى التفاعل
6
العمر
28
الجنس
الإقامة
الامارات - رأس الخيمه ..
رد: قــــصة حــــب مــــــــــره حلووووه.... انشاء الله تعجبكم

تسلمي ع الطرحـــ

شحيـ راكـ
 

فراشة ماماتي

๑ . . حبوب البرزة . . ๑
التسجيل
29 مارس 2009
رقم العضوية
10236
المشاركات
94
مستوى التفاعل
0
الجنس
رد: قــــصة حــــب مــــــــــره حلووووه.... انشاء الله تعجبكم

القصة وايييييييييييييييد حلوة
 

@الفيصل@

๑ . . حبوب البرزة . . ๑
التسجيل
27 مارس 2009
رقم العضوية
10231
المشاركات
121
مستوى التفاعل
0
الجنس
رد: قــــصة حــــب مــــــــــره حلووووه.... انشاء الله تعجبكم

مشكورة دلع
 
عودة
أعلى