ذكرت الود وايام التصابي

[برووق]

🕊️

*شكرا عبيد المعمري بوحمد* 🕊️
منسق منصة فواصل شعريه

حبيت أقدم لك شكـر يابوحمـد
إنت ومعك كل شعرانا المخلصين

والشـاعـرات الـي عليهــن نعتمـد
الــي معانا في المنصــه مشاركين

نتعلــم الجــزله ومنكـــم نستمــد
وإنتـو كفـو والشاهـد الله وافيين

إنتو دواء عينـي إذا ياها الرمـد
ع الخير دايم نلتقي ومتفائلين

يحفظكم الله الخالق الفرد الصمد
وإتحملـونا لــو بشـي مقصـرين

إلكم سلامي هذي🤝🏻 إيديي أمد
عساكم بصحـه ودايـم سالمين

يا خالق الأرض وسماها بلا عمد
يارب🤲🏻إحفظنا وكل المسلمين

وأرجو العذر المعمـري يابوحمـد
منك ومن لي ع المنصــه قائمين

*## للشاعر / صالح الحصن الشحي

[برووق]

أسـتغفـرك مــن كـل ذنــب عملته
يارب جيتك شايل ذنـوب وذنـوب

يـارب ذكـرنــي إذا حــد ظلـمتــه
ياليتني طالـب ولا أكون مطلـوب

مـاحيـدني شــيء حــرام كسبتـه
ماحـد في الدنيا وخالـي م لعيوب

متـاعهــا الـزائـل ورايـــه تـركتـه
والعبـد تقبـل توبتـه يـوم بيتـوب

رسمــت لــي درب جديـد رسمته
لابــد للإنســان غـالــب ومغلـوب

يارب وقـت المـوت خايف سكرته
وقدامي الأعمال كل شي مكتوب

مـاحــد غـيـرك يا إلاهــي طلبـتـه
وقت إستجابه والشمس مالت غروب

أستغفـرك مــن كـل ذنـب إرتكبته
ويارب صبرني مثـل صبــر أيـوب

للشاعر / صالح عبدالله الحصن الشحي

[برووق]

أمـنتك سنين قـلبـي💔 اليـوم رده لـي
اللـــه يـوفقـك فـــي حلك وتــرحـالك

مبروك ومسموح وإنت أرجوك تسمحلي
وإن شاءالله آشوف جنبك يمشو عيالك

حبيـت أبـارك ولـو عنـك أبــد ماسـلي
عسـاك تهنــى بحياتـك والسعــد فـالك

نسيان عمـر قضيتــه وياك مــب سهـلي
إذكرنـي بالخيـر مــن أطـري علـى بالك

🥺 ما راح أرجــع لك ولا راح ترجعلي
وإمسـح قديــم الرســايل لـي بجـوالك

وأوعدك ما حب غيـرك غيـر حب أهلي
وعساك وين ما تروح الدرب لك سالك

ودعتــك اللــه يـامضنــونـي وخــلي
ولو بالسنــه بــس طمنـي عـن أحـوالك

🤲🏻 يـارب تغفــر لك وياللـــه تغفـرلي
فــي يــوم لا ينفعــك ولـدك ولا مـالك

*## للشاعر / صالح عبدالله الحصن الشحي
*25\9\2020*

[برووق]

🚣‍♂️ 🏊‍♀️ *ساحـــل شعــــم* 🏊‍♀️ 🚣‍♂️

آآه ياساحل شعــم كل يوم جيتك
الوحيــد الـي أكَشَّــف لك مغاطي

لا تظـن يـوم أبتعــد عنـك نسيتك
بيني وبينـك مـن الصغـر إرتباطي

أول إمـــا فَتَّحَـــتْ عينــي لقيتـك
يوم أنا بعدي صغير في قماطي

كلمـا ضــاق الصــدر عانــي لفيتك
ينجلي ضيقــي ويتجــدد نشاطي

ليتك تخفــف عنــاي اليــوم ليتك
من سنين وياك أنا ماخـذ وعاطي

يا بحـر لشـواق خفف لي رجيتك
مبحـرٍ بك ليت لك مينــا وشاطي

## للشاعر صالح عبدالله الحصن الشحي

[برووق]

يا قلب إفرح فرفش وعيش مسرور
خل معنويتـك فــوق عالي السحابه

لو صفن همومك على الصدر طابور
ربـي 🤲🏻 يفــرج ضيقتك والكآبه

محجـور ما تنلام من سبعـة شهـور
يــوم الطــرب والغـي قـد صـك بابه

الحمـــد للـــه دامـــه الحـال مستور
حـــدٍ درى بالضيـق وحــد مــا درابه

## صالح عبدالله الحصن الشحي

[برووق]

صار لك سنتين يا شاطر
أنتظــر يتغيــــر إسلوبك

إنتهينــا وعافــك الخاطر
وأدعي الله يسهل دروبك

كــم تواعدنــي وأنا ناطر
ومن ورايـه تلعب لعـوبك

لين مـره عافك الشـــاعر
عفتك ولا بلتفـت صوبك

كــل يــوم تقولــي باكـــر
إنتهى ولا عدت محبوبك

بشطبـك من وارد وصادر
مثـل ما تلعــب يلعبــوبك

في آمــان اللـــه ومغادر
خذ نصيحه غير إسلوبك

## للشاعر / صالح الحصن الشحي

[برووق]

إهداء الى الشاعر جمال اليماحي

ع العوق يتنــي شلــة اليماحي
وردت بي الذكـرى لوقـت راحي

كنــه رمانـي رميـة فــي مقتـــل
أقوى ع قلبي من طعن لرماحي

من تخلـــص الشلـه أعيـد الشله
ومن قبل كنت آسبح بمسباحي

ذكرتني بــو محمــد الـــي أوده
خليتني صاحي ولانـي بصاحي

أتـذكـره كلمـــا أمـــر ديـــاره
وإن يات من صوبه تهب أرياحي

عشرة عمـر لا ما قـدرت أنساها
يوم إني أذكرها أصيح صياحي

لكـن نــدري لكــل شــي نهايـــه
ماشي دايــم ولا حـــد مرتاحي

بـاقــي تواصلنــا ولــو تفارقنــا
تبقي الصداقه والحطب قد طاحي

##الشاعر/ صالح الحصن الشحي

[برووق]

🤲🏻 اللــه يرحمـــه الـذي رباني
يتعــب لراحتنــا أنــا وخـوانــي

رغم الظروف القاسيه بالماضي
من وين مـا يمشـي معـه وداني

أتعلم إمن رجال وأكسب خبره
ويقولو هـذا فـلان ولـــد فلاني

🤲🏻يارب تجعل دار أبوي الجنه
الأب ما يعوضـه أبـد حـد ثاني

## صالح عبدالله الحصن الشحي

[برووق]

مـــن ويـن لافـي ياالهبوب
نسنست من صوب الجنوب
بسألك عــن حــال إعربــي

لــو تعلــم بشوقــي لهـــم
ليــش القطاعـــه منهــم
حايـــر وفكــري إيـــدور بي

ك الراعبـي🕊️ أمسي أنوح
وأهــوم في هاذي السيــوح
لــي مــن ذكــرت إحبيبــي

ودي أوصـل لـه ســلام
وأقــوله الفرقـا حــرام
يانــور عينــي والصبــي

أعرفــه مــن يـوم الصغــر
شــرح ولا يعــرف الكــدر
صليـــت بـــه علـــى النبــي

ياليــت يعطينــي السبــب
وإن كـان لــه عنــدي طلب
يأمــر وياخـــذ لـــي يبــي

عسـاه فـي راحـه وهنا
وإن كــان يسـأل عننا
شوفتـــه عنــدي مطلبـي

يكفـي منــه لو يتصل
لا يقطــع حبـال الوصــل
والعـذر❓عنــد الغايبـي

## للشاعر / صالح الحصن الشحي

5/12/2020

---

التعديل الأخير تم بواسطة برووق ; 05-12-2020 الساعة 08:40 AM

[برووق]

حبهــا شعــم مـا يوصفــه أي تعبيـر
فيهــا الطفولــه وذكريـات الشبـابـي

أذكـر إسمهـا وأفتخـر ويـن ما سيـر
إذا إسألـونـي يالحصــن ويـن رابـي

ولي إخوةٍ من هل غليله وهل الجير وبالرمس وخور خوير أهلي وصحابي

إخـوان شمــا إلهــم معـــزه وتقديـر
والكـل قــدره فـوق عالــي السحابـي

## للشاعر / صالح الحصن الشحي