رد: ~~!!~~ مغامرات رهف ومعاني ونورة ~~!!~~
~~!!~~ الجزء الثالث ~~!!~~
حصنا انا ونواري هالصيني ندور ست الحسن والدلال معاني اكثر من مره لا شفناها ولا شفنا التنين .. ظهرنا برع من البابين ندور التنين مالها او رسمه ادل عليه ما شفنا شيء،، جان نوقف واحد من الرسبشن وسألناه وين التنين ؟ جان يقول لنا :هيييه هذا الصيني.. هدااا التنين
قلناله انزين وين هاا التنين بالضبط نحن نشوف سفينة ما نشوف تنين جان يقول لنا تنين في صين .. وهو يخرط من صوب ونحن نخرط من صوب ولا عرفنا له وين هالتنين ..
كملنا ساعه على هالحاله عيزنا من كثر ما نتصل بها وهي تقول لنا بالصيني صوب هالتنين ونحن نلف الصيني كله ما نشوف هالتنين اللهم هالسفينه !!
صدق تغصصنا منها ع الاخير
نوره : اتصلي فيها هالثور شوفيها ووووين
رهف : خل تزول غصصت بي الله يغصص بها
نوره : الله يغربلها غربلتنا .. شوفيها وين ؟!!
وجان ارد واتصل بهالثور
رهف : انتي بعدج مرتزة بالكوفي ،، اقول اسألي حد من الي عندج انتي وين بالضبط ولا اسأليه وين السفينة وتعالي عندنا
معاني : رهوف وينكن انتن كملتن اكثر عن نص ساعة ما وصلتن
رهف : أأ....
توني برمس جان تنشع نورة الموبايل عني
نورة: ايه انتي نحن يايين نشرى ونغير جو ولا يايين ندورج ، قومي اسألي أي حد حذالج انتي بأي جناح ؟!
معاني : بلاج اقولج الصيني
نورة : لا تقولين لي .. اسألي أي حد حذالج
معاني : صبري انزين خلج وياي
نورة بالخط للحين ويا معاني
معاني سألت عايله سوريه وين اهي فقالوا لها بسوق الصين
معاني : هاا نواري يقولون بسوق الصين ،، انتي ورهف ما ادري وينكن عني ؟!
نورة: بعينج انتي بالصيني فوق اكثر عن 5 مرات درنا هالجناح ما حصلناج وما شفنا هالتنين مالج ؟!! – ترمس بصوت خفيف - اقول معاني لا يكون أخوج نزلج في مركز ثاني يمكن ما عرف هالمركز ؟!!
معاني – زاغت - : هاااااااااااااااا ،، لااااااا شو مركز ثاني ، لا تخوفيني
نورة : يمكن بعد هو ما اندل المركز شو انتو ييتوا ع شارع الامارات ولا دخلتوا المدينة ؟
معاني : هيييه ع شارع الامارات نوروه لا تخوفيني ،،وين رهووف
نورة : شو تبينها الحين يلا قومي اوقفي عند الباب نحن بنييج يلا باي
معاني : يلا لا تتحيرن ، باي
ظهرنا برع ندورها بعد ماشيء فايده ،، واتريينا فوق النص ساعة وماشيء أي اثر فاكيد ردينا اتصلنا بها .. وهي ما عندها غير انا بالصيني صوب التنين والحين واقفه صوب الباب من براا – جنها حافظه درس بالمدرسه انا بالصيني صوب التنين العود الي عند الباب –
المهم عقب انا ونورة اتفرقنا قلنا كل وحده تروح ادورها في مكان وقلنا بنلف كل الاجنحه يمكن يكون هناك شيء تنين
فراحت نواري من اليمين وانا من اليسار
والله اكثر عن ساعة ونحن ندور هالمعاني الي ما ندري وين زالت هييه وتنينها
دورناها بالصيني واللبناني والتونسي والمصري ما خلينا مكان وبعد مالها أي اثر
عقب اتصلت بي معاني
معاني معصبة شوي وبتصيح : رهف وينكم انتن والله بديت اخااف
رهف : شو يخوفج الحين
معاني : شو شو يخوفني الحين أخوي منزلني من اكثر من ساعتين وللحين ما شفتكن؟!
رهف : ان شاء الله بتشوفينا ، اقول اظهري برع
معاني بعصبيه : انزين الحين انااااا براا رهووف لا تحرقين لي اعصابي
رهف بيني وبين نفسي - خل تحترق عيل تحرقين اعصابنا نحن بس - :اقول اوصفي لي المكان من برع كيف شكله المركز وشو حذالكم
معاني : شو مركز عوود وحذاله تنين عود
رهف – احط ايدي ع راسي - : الله يخليج اوصفي المكان زين وهالتنين ما ابغيج تذكرينه لي
معاني : عيل شووو هو حذالي .. شيء مسيد وراه تقريبا وباركنات والمركز ياي هب ع الشارع الرئيسي يعني في دخله له
رهف – اطالع براا ادور واشوف – : هيه اشوف مسيد من وراا بعيد شوي صوب الدوار
معاني : رهوف أي دوار
رهف : الي صوب المسيد ،، اقول صبري نواري بالخط بشوفها
معاني : رهوف يلاا بتفضي البطاريه
رهف : لا شو تفضي خلينا نشوفج قبل يلا سكري بتصل بج عقب
ورديت لنواري : هاا شو عندج
نواري : رهوف وين انتي احس اني انا بعد ضعت
رهف : شووو،، جيه انا ناقصتنج انتي بعد الحين اضيعين خلينا نشوف معاني قبل
نواري : والله ما ادري وين انا الحين
رهف : بعينج ما تدرين اسألي أي حد حذالج
نواري : حذالي الحين عايله مواطنه
رهف : انزين اسأليهم
نواري : لا استحي
رهف : عيل زولي ، اسأليهم بلاج ، والا اقولج في خريطة في كل مكان شوفي انتي وين ،، انا براا صوب الباركنات بس لا اتيني اخافج اضيعين روحي صوب السفينه بالصين اهناك بييج
نواري : انزين خلاص ،، بسأل هالهندي بشوف خل يدليني
حشاا لعوزوني غربلوني فوق الثلاث ساعات بس الا اندور هالمعاني الحين اخاف اتصل بها وتفضي بطاريتها وعقب ما نشوفها وهاي نواري بعد الحين متتفيجة اضييع جني ناقصتنها هاي بعد ،، شو هالبلشه ؟!!
اتريونا اوكي *.^
رهف