أم صويلح: وإنت تتحرى السالفة كلها في شوفة المباراة؟! لا بوي،، بعدك صغير، السالفة إني ما بسمع شبابنا الإماراتيين وهم يعلقون على مباريات منتخبنا الوطني، ولا يوم يفرحون بأجوالنا!
صالح: أونج أحين تركزين مع المعلق!
أم صويلح: عيل مثلك يالطبل .. حلات الجول الإماراتي يوم يعلق عليه عدنان حمد وفارس عوض وعلي حميد وعامر عبدالله .. و ..
سلامة: قم عنه يدووووو
أم صويلح: الأمل الباقي في الإماراتي "سعيد الكعبي" المعلق بقناة الجزيرة الرياضية، أنه كا يترك مباريات منتخبنا يعلق عليها حد غيره..[/align]
[align=center]اصـبـروا لاااا تردووون . . . بعدنـي ما خلصت ...[/align]
أم صويلح: وأنا وين اقدر استغنى عنها، منو بيسويلي قهوتي.
زليخة: باغنش تخلصين أوراقها من وقت، عشان ما تتورطين عقب.
أم صويلح: اليوم بخبر "صلوح" وغن شاء الله ما يتناحس عليي.
زليخة: خبري بعد "أم عبدالله" جارتش اليمنية، وترا بيتنا يوسع كل أحبابش يا أم صالح.
أم صويلح: جي خبلة! ما بخبر حد، حتى "أمون" ز"أمول"،، ولو دروا بيحتشرون علي، خلهم جي أحسن.
زليخة: أبغي الكل يحضر فرحتنا بالكأس.
أم صويلح: اسميج يا زلوخ،، تبغينا نيي عندج نشجع منتخب عمان، مسكين حالج، أبوي،، ان شاء الله بنرد الكأس ويانا.
زليخة: خلني أقولش، حامل اللقب هالمرة، منتخب جديد، وبعد ما وصل "السويق" و"الننهضة" لنهائي كأس السلطان لأول مرة في تاريخه، زاد عندي الأمل، وأنا أقول، الكأس لنا أو للبحرين.
أم صويلح: وتبغيني بعد أييبلج ربيعاتي؟ لو دروا باللي تقولينه بيذبحونج، متعصبات وايد، "أمون" تشجع الأخضر السعودي، و"أمولة" بغت تموت علينا يوم منعوا الكويت من اللعب، ووزعت هريس على الجيران يوم ردهم "بلاتر"، و"أم عبدالله" تعفينها، ما يحتاي.
زليخة: مع هذا البرد، حلو التعصب،، بيدفينا، الأهم عقب كل المباريات نرد ارباعه، ولا كأنه استوى شي.[/align]
ما فـيــــكم صـــبـــر ... قــلـتكم بعدنـي مـا خلصت !!.
أم صويلح: يلي ما تستحين عويهج .. شو بعد "زلوخ"؟ أصغر عيالج هي! حرمة عاقلة اشكبرها تقوليلها "زلوخ" .. قولي خالتي "زليخة".
فطوم: زين لا تعصبين،، الحين بتغيرين رايج فيها يوم تقرين المسج.
أم صويلح: وإنتي أصلا ليش تفتحين تليفوني .. ما تقولين هالأشياء اعتداء على الحرية الشخصية!
فطوم: زين خلاص،، آخر مرة، بس بقراه لج، وعقب ما بلمس تلفونج.
أم صويلح: قولي يا "فطوم" .. تقلقلت ضلوعج.
فطوم (بصوت عالي): "اصرخ بعالي الصوت والعلانية .. الكورة خليجية أو حتى اسبانية .. لو تفكر وتاخذ الأمور بعقلانية .. مهما يصير ترا البطولة عمانية".
أم صويلح: ينت "زلوخ" .. أكييييد استخفت!!
فطوم: عييييب خالتي .. ما يصير جي، شو بعد "زلوخ"؟ أصغر عيالج هي! حرمة عاقلة اشكبرها تقوليلها "زلوخ" .. قولي خالتي "زليخة".
أم صويلح: قومي من هني .. قامت قيامتج.
فطوم: أنا ما أدري كيف تحبين الرياضة، وانتي مووووووول ما عندج روح رياضية.
أم صويلح: أنا بلاقيها منج ولا من "زلوخ" ،، أول أمس تغيضني يوم انهم فازوا على منتخبنا لكرة الطائرة ،، صارت "صحار"، هذا وماشي مكان للحريم، وبعد كل شوط تتصل تسمعني أصوات الناس المستانسة، وفي الشوط الأخير ما رديت عليها، قامت طرشت مسج تقولي "إنتي ماعندش روح رياضية".
فطوم: وهاي "أم عبدالله" يت .. ما ضنب ان لها راي غير، وبتقول انج "ما عندج روح رياضية".
أم صويلح: مرحب ملاايين،، هلا "أم عبدالله" حياج الله، شخبارج؟
أم عبدالله (جارة أم صويلح اليمنية): الحمدلله، كل حاجة بخير.
أم صويلح: اشفيج جي ،، مب مرتاحة.
أم عبدالله: يعني ما سمعتي إيش حصل مع منتخبنا اليمني في مطار مسقط، تأخروا الجماعة أكثر من تـــلات ساعات عشان التأشيرة، وزعلوا وكانوا بينسحبوا، ولكن الله سترن لكنهم قالوا: "ستكون المعاملة بالمثل".
أم صويلح: أفااااااا، شو هالرمسة اللي مالها طعم يا أم عبدالله، لا تصدقين كلام الصحافة، ياحبهم لتضخيم الأمور، ومهما صار، أنا ماصدق إن منبع الكرم العربي يقول أرد بالمثل،هايول عرب، والعرب مب جي عوايدهم .. وبعدين خل عندج روح رياضية.
أم عبدالله: أتمنى أشوف هذي الروح الرياضية في مباراة الكرة معكم.
أم صويلح: أكيد بتشوفينها ،، مو نحن بنفوز عليكم ،، أكيد بتكون روحنا الرياضية عالية... انتي بس قولي آمين.[/align]
فطوم: هذا اللي بتاخذونه من الكوورة.. الحرمة أمسات بغت تموت.
سلامة: أي حرمة.. أمي.. عن منو ترمسين؟
أم صويلح: أمج ترمس عن ''زليخة'' ربيعتي.. أمسات نتصل موبايلها ما ترد.. وآخر الليل ردت بنتها مريوم وقالت إن ''أمها'' مسكينة ارتفع ضغط دمها.. وطاحت عليهم في الملعب.
فطوم: هييي نعم.. ارتفع (عقبال دم بعض الناس) وكانت شرايينها بتنفجر بسبب الجول اللي دخله الكويتي مساعد في الشبكة العمانية.
أم صويلح: احترمي نفسج.. المباراة انتهت بالتعادل.. ما احتسبوا الجـــول.. انتي شـــــو فهمج!
فطوم: المهم ارتفع ضغطها من الجول.. (اللي ما احتسب) عشان ما تزعلين.. وهذا يا سلامة يا بنتي.. قدر كل العيايز اللي يتابعون الكورة.
أم صويلح: انتي ليس نحيسة.. قومي لفررج بشي وخليج تربين أحين.
سلامة: حرام عليج يدوو.. أمي تسولف وياج.
فطوم: خالتي هدي أعصابج.. بتحتاجينها وايد اليوم.
(بعد المغرب.. أم صويلح وربيعاتها قبل المباراة)
أمونة: عيل وين أم عبدالله؟
أم صويلح: ويييي.. تبغينها تشوف المباراة ويانا.. هذا المستحيل بعينه.
