• مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

مدوناتي في ذكرياتي

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
السلام عليكم ورحمة الله وبركاته



من لحين وساير بكتب مذكراتي


حتى تستفيد منها الاجيال القادمة


وتكون عبرة لمن لا يعتبر


لانها فيها مطارق وخيازرين وتكفيخ



حياة حلوة بحلوها ومرها



مادري بوصل لا ادق تفاصيلها والا بنساها



وبحاول باقرب فرصة احط الباب الاول منه


بحاول اكتب كل لي اعرف ولي ماعرفه


حتى اعرفه انا


ونشوفكم على خير

:wrd:
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

السلام عليكم ورحمة الله وبركاته


مذكراتي ومدوناتي تتكون من فصول وابواب منها مكسرة ومنها مجلعه



الفصل الاول




من يابتني امي الي سن عشر سنين




الفصل الثاني





من عشر سنين الي عشرين سنه يعني فترة المراهقة
وياويلها ويل






الفصل الثالث




من عشرين سنه الي ثلاثين سنه





الفصل الرابع




من عقب الثلاثين
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

الفصل الاول


بنسميه

ابيض واسود

ووياه الابواب كلها باقفولها ومساميرها




اتوقع هذي مجمل حياتي للعشر سنين
ولي بتلوع جبده لا ييلس يقرأ



بسم الله الرحمن الرحيم


بدأت الحياة بصياح ومباغر من صاحب الصوت الشجي :ah:
ماتوقع حد طلع من بطن امه وهو يضحك :1577_1186768770:

لمهم بدت اول البلاوي ببداية المولود لي يااا على وجه الارض

مادري امي كانت فرحانه والا تبي تفقصني ماسالتها

بعد ولادتي والكلام بلسان عمي الله يحفظه


يقول عمي انا لما خلصت الجامعة من بغداد رجعت البلاد وكان هذا اليوم يوم يابتك امك

فسالني ابوك شو نسميك

فقلت له سميه فلان ( وطبعا هو اسم غريب وعجيب بس اسم صحابي جليل )

انما كتقليد للاسامي لي كانت موجودة كان عجيب وغريب


فكبرت وكبر معاي الاسم ومع كل سنة ومع كل مرحلة كنت اتوهق بالاسم لما اقول لهم اسمي وبتييكم سوالفه جدااام


لمهم كبرت مثل ما يكبرون اليهال
يعني مالحقت على المرضعة وسيريلاك
لي شفته ولمسته لهاية مربوطبة بقبتي يقصون علي فيها
والا الحمدلله رضاعة طبيعية من امي الحنون لي كفختني :a040:


خلال الفترة من سنة الي ست سنوات قاسيت المأسي على يد اخواني الاكفاء طبعا بهدف المنافسة على كل شي
بتم التفليع بكل مكان بالراس والجسم


حتى تم تكوين فريقين اخوي الكبير ولي اصغر منه
ضد اخوي لي اكبر مني واختي
والتفليع ماله محل باي شي قابل للفر والرفس والتنطيط


كان البيت مكون من غرفتين ومطبخ وحوووش وميلس وبخار ( مستودع لحطب التنور)
دروازه مال اول وبيت كله درايش وكان يخر ايام المطر
بخبركم شو يصير بهالبيت السعيد


- كنا كلنا اخوان وخوات في غرفة وحدة والتلفزيون بو حيس جدامنا وكبت ابوابها نصها طايح الكل منا ينسدح لما يشتغل التلفزيون
ولازم تكون الريل مرفوعة على الكبت لي محطاي فوقه التلفزيون والا مابتكون المشاهدة حلوة
ومن زين عاد التفلزيون محطتين والا ثلاث ماشي غيرهم ابوظبي ودبي ومرات يلقط ايران
افتح ياسمسم عدنان ولينا سندباد
وياويلي اذا شوشت المحطة الحق على الضرابة لازم واحد يركب فوق الدري والثاني بالحوش والثالث عند التلفزيون
هاااااااااااااااااااااا اعتدلت الصورة لي فوق يصيح ولي بالحوش يستقبل ولي عند التلفزيون يجاوب
وياويلك لو كان عند التلفزيون ثنينه بينجلع مصرطهم من المزاعق والصريخ وخاصة اذا كانت الحلقة مالازم تتطوف


- الفيران وملاحقتهم



هاك الايام كانت عندنا فيران مو مثل هالفيران لي موجودة لحين رغم القحط والفقر الا انه الفيران راهيات ومربربات
ماشاء الله على اخواني كانوا تخصص قتل الفيران
اول شي ندرس خط سير الفيران
من البخار لي هو المستودع الي تحت درام الماي ومن ثم المطبخ
الحل كيف واحد ينقع شلق بالبخار الفايران تشرد لتحت درام الماي وتنخش وهذا هو المطلوب
ثلاث من المسار لي يودي من المطبخ لدرام الماي
وثنينه من المسار لي يودي من درام الماي للمطبخ
وواحد ييبي عصى طويل ويحركها تحت درام الماي وكل وكلا الجهتين عندها قب كبير والا مخمة بو عصايه وتعال للمراكض والصياح
ثنينه من اخواني حصلوا عضة بصبوع ريولهم من الفيران
بس كانت ايام حلوة لانها كلها اكشن وخاصة اذا الفار مالقى مكان ودار بالحوي



- ايام المطر السعيد



محلااها من ايام كان لما يطيح المطر كل واحد يروح ييب له طاسه ويلسها بالحوي وييلس يطالعها وهي تنترس وبعدها يشربها
والا يوقف تحت المرزاب ويتسبح اونه ماي حلو بس طبعا في غياب الوالدة والا جان تكفخ تكفيك مايحلم فيه
والا طلعنا بالفريج نخاوض بالمياة مع انه مايخلونا
الا انه حزة الصلاة هي الفرصة المناسبة وياويلي على المخاوض في المياة
تطلع من البيت محد احسن عنك ترجع البيت وانت الزبالة وحدة من كثر الملاغة ( الطين المبلل )
لما كنا نرقد بالحجرة كانت كلها تخر وهذا ويهي اذا حد رقد نص اخواني يرقدون بالحوش ويطالعون المطر بس ياويلك اذا فار طالع من مكانه ويبي يتعنطز عليك انت وحظك
كنا نحب نروح فوق اليبل بعد مايبدا الشتاء باسبوع وخاصة لما يطيح المطر نركب اليبل ونشرب الماي لي متيمع في الحصى ونقطع حميض ونرجع طبعا حمود فوق عبود




- الحياة البسيطة

كانت حياتنا جدا بسيطة البيوت حذالها بعضها حتى لو واحد يزقر الثاني ينسمع ببيت الجيران
رمضانا كان عجيب قبل لا نتعلم الصيام كانت امي تسوي خبز رقاق للفريد ومحلبية
فلي يتم منها بالجدر كنت اكله واخواني الكبار كانوا صيام فاروح الغرفة عندهم واكل جدامهم طفاسه ما ارد الا والجدر فوق راسي ومتخيس كله محلبية والا اييب خبز رقاق وهي حاره وجخ وجخ جدامهم والا مفلوع بشي لعانة صغارية
واول ماتعلمت الصيام خذ وخل الشهر 30 يوم 29 يوم فاطر ويوم واحد بالغصب يعني كنت راقد
هذي هي العزيمة والا بلاش
طبعا الحجج موجودة
امي تسوي رقاق الصبح وانا يالس حذالها اقطع وياها الخبز نص الخبز مقصوص والنص بالبطن اونه هذيك الحزة خبرونا انه من نسى واكل وهو صايم فصيامه صحيح وانا ماشاء الله علي كل يوم ناس الا يوم واحد نسيت عن النسيان ورقدت
العابنا الحلوة كنا اكثر شي نلعب تيله حتى الفريج كله يعلن التحدي بعد المدرسة وبالاجازة كل واحد وتيله
اذكرر منها اسامي ( عدنية واورطه ) تشوف كل عيال الفريج يايب قواطي التيل وياي يتيمع والحيلة محد عليها هنااك
وخاصة للي عنده تيله فيها شي مميز والا دحلة ( اكبر من التيلة ) وتستوي المزايد واللعب وكل واحد يطلع مهاراته العيال الراهيين ماعليهم كلام لو انهزموا بس عيال الفقارى ينقع البوكس لو انهزموا بمعنى اما ترد لهم تيلهم والا تتصفع

لعبتنا المفضلة وخاصة برمضان يسمونها غزولة ( استغماية )
نرسم مربع جدام بيت ونقسم الفريج الي مجموعتين وحدة بعد التراويح نبدأ اللعبة يقولون غزولة بالفريج ونحن نهايت بالبلاد كلها نروح نسأل اي واحد بالفريج شفت واحد لابس كندورة مطرطرة مني ويركض
تبدا اللعبة من التراويح وتنتهي للسحور

والا لعبنا قبة ومسطاع
دواارة وواحد ماسك قب وواحد وعنده حطبه صغيرة يضربها لابعد مكان والفريق الثاني يمسكها



- حياة الفريج



الصبح الكل قايم من الفجر شياب وكبار وصغار وحريم ورايحين السوق وكلنا الي شغله
الظهر الناس راجعه من اشغالها
من الظهر ولا تشوووف ظل شخص يمشي وخاصة لما قالوا لنا حمارة القايلة الكل منخش ببيت ولي كان يطلع الظهر مشبوه
العصر بعد الصلاة ييلسون الشياب عند المسيد وييبون الفالة ويتقهويون ونحن نلعب بالفريج
بعد المغرب طاح العشى ونيلس بالبيت
بعد العشاء تنحش ريل اي واحد يقرب من باب البيت


- المدرسة

طبعا الصياح اول يوم بالمدرسة محد له والدموع اربع اربع والمخاخيط محد لها مانبغي اروح ويهي مو ويه مدارس
اول مرة اسير فيها المدرسة لبسوني بنطلون بني وقميص بوني وكرافته :eh_s(6):
اول يوم الصف كله يبجي شو عندكم
قالوا لنا لما تروحون المدرسة ابجوا حتى يطردونكم طبعا اخواني الكبار موجودين هناااك بنروح ننخش عندهم ويسحبونا بالغصب
كشه واظافر طوال والرقبة مزغودة والشنطه تلق والجوتي يديد وقلب مبراي ويالس بالصف تقول اتكلم بحرف مافي اوني مؤدب
اسبوع الا انجلب الحال جان يالسين بالفريج
كنت احب ايلس ورا يقولون الطميم ييلسون ورا بس صفنا اثبت العكس :a040:
انه لي ييلس ورا دومه شاطر
ماشاء الله علي كنت شاطر بالمدرسة المدرس يشرح وانا احل الواجب مال باجر مابي احل شي بالبيت ولا ايلس على الكتب
كان جدامي مصري وفلسطيني وانا ثالثهم كنت اطلع الثالث عليهم
حشااا ماينغلبون
مرة بالغلط طلعت عليهم الاول جان الصياح محد له :bad:
جان اقول بخاطري التوبة مابي خلوني الثالث احسن شي
الحمدلله كان الحساب مادتي المفضلة وكنت انافس الاستاذ بالحل حتى اني احل دروس مال جدام
بالمدرسة مؤدب ماشاء الله علي
لين صف ثالث لاني توني يديد على هالشي اليديد في حياتي
كانت ايام المدرسة تعيبنا وخاصة لما يوزعون لنا التغذية بعد الحصة الثالثة كاكاو وسندويشة وموز
ويصرفون لنا قطع ثياب ايام الشتاء ويعطونا فلوس
هذا دين للكويت علينا ماننساه


- ايام العيد السعيد


ايام كااانت حلوة بكل المعاني
قبل العيد بيومين كنا نيمع فلوس المدرسة حتى نشتري شلق وصورايخ للعيد
اوبي يودينا السوق نشتري الثياب للعيد كلها كندورة وشلش بعدنا مالحقنا للوزرة وفانيلة ونعال يديدة
لازم ننظف البيت قبل وكيف يتنظف البيت
ماي وفودر وكاشي وخلقه
صب الماي على الكاشي كله وحط الفودر وروح افصخ ثيابك وتم بفانيلة وهاف
وييلس تزحلق على طول الحوي اونه ننظف وتعال للتفليع وتكسير الراس من كثر ماتزحلق بهالكاشي
ليلة العيد كل واحد مجهز ثيابه وميلسنه وامي الله يحفظها تسبحنا بالدور ولي فيه خير خل يتحرك
شلط بالليفه على ظهره ولا كفااااخ على راسه بس كل شي يهون لليلة العيد
اي واحد يطلع من الحمام فقد نجى من التكفيخ ويضحك على لي بيدخل :eh_s(6):
وسيده للفراش يناخر حتى ينش قبل الفجر ويلبس جانه يالس بطابور عسكري
من يأذن الفجر قلنا بالمسيد من نخلص الصلاة رحنا لبسنا ثيابنا وطلعنا عند باب البيت ويلسنا ننقع شلق ونلبق الصواريخ
حتى نكون اول ناس يعلنون العيد :a040:
وياويلك لو ياك صاروخ من الفريج الثاني وحرق كندورتك وهي يديده فيك خير ارجع البيت وانت جي
والا ارجع البيت وثيابك متوصخه مافي تفاهم
مو مثل لحين يحطونها بالغسالة ويغسلونها
لااااااااااااااا
هذا لحين
اول يغسلووونك انت ويغسلون شراعك وشراع شراعك وبعدها يفكرون يغسلون ثيابك ويا ويلك لو ماعندك كندورة ثانية نظيفة يعني العيد طااافك وروح عليك
كنا ندور الفريج كله والفريج لي حذالنا والفريج لي حذال فريجنا
يعطونا ريال والراهي يعطونا ريالين طبعا هذا لي يعرف اهلك
محد يرجع البيت الا اذان الظهر
ويلسنا بالغرفة نحسب البيزات لي حصلناها الاخوان الكبار يخططون لشي جايد ونحن الضحية
وطبعا كبرنا وقمنا نحن نخطط على اخوننا الاصغر
واخرتها امي تاخذها عنا اونها بتيمعها لنا ومانشوفها
الا لما نروح المدرسة تعطيها لنا :a050:





- حياتي الطبيعية الي العشر سنين


الي ان كملت ست سنين ماكنت اطلع من البيت
الا قريب البيت ويا اخواني
بعد الست سنين طلعت شوي رحت الدينية بعد الرجوع من المدرسة
نحفظ القران بعد المدرسة
والا نروح جمعية الاصلاح يعني كنا مطاوعة تعيبنا رحلاتهم
بس مشكلة ما طاع الطوع يطلع فيني
كان ابوي الله يحفظه يودينا كل جمعة دبا ونركب حمود فوق عبود بسيارة وحدة مرتصين وامي تسوي لنا غدا وناخذه ويانا
مشكلني شلتين في بيت ابوي كل شلة تدافع عن مبادئها
بالصيف نروح المزرعة طبعا نحن نسميها النخل نييد النخل
ونشل يراب السح فوق راسنا نوديه المسطاح واحسن مانسويه نروح الحيضان نسبح والا نركب على اللوزة نقطع اللوز بس وين وانت وراك مراقبين بقب فوق راسك لو ماشتغلت
ماكانت لي هواية محددة لهاك السن







لي عودة للفصل الثاني
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

تابع للباب الاول ابيض واسود


هذي صورتين لايام ابيض واسود

ماتوقع حد شافها لانها ممنوعة من التداول


لاتخافون حتى اخواني مايعرفون منو هذا :^^:



هذي الصورة ليلة العيد توني طالع ومخلصين من السبوح وجاني مكفخ ومصور غصب
كشختي بفانيلتي
لاني لازم ارقد جي بس فانيلة وهاف
مالحقنا على البيجامات

الويه كله اجراااام



687127499.jpg







وهذي الصورة توني داااش المدرسة وقالوا لي يبون صورة شخصية
انا لي اتذكره انه هالغترة والعقال كانوا موجودين عند المصور فلبستهم اونه حتى اكشخ
وطلعت كاشخ جاني ياي من البصرة
غطينا عيون هالمجرم حتى ماينعرف



325439444.jpg
 
التعديل الأخير:

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

الفصل الثاني




ايام المراهقة والتحدي واثبات الذات



في البداية اود ان اقدم اعتذاري الشديد والندم على السنوات العجاف
لامي الحنون وابي الطيب
فكلما تذكرت ماعانا من ومني ومشاكل ابكي ندما واحاول اني انسيهما ماكان مني
امي الحنون ادعوا الله العلي العظيم اني يغفر لك ذنوبك ويجعلك في عليين
فارجو اني تسمحيني زلاتي وعيوبي التي كانت مني
ابي الطيب لكم احبك حبا لا يعدله حدود فكم قاسيت وتحملت من اجلي
فلك مني كل تقدير واحترام





الباب الاول


العمر من عشر سنوات الي 15 سنه
المدرسة من صف سادس الي ثالث اعدادي



الحمدلله كانت الامور تمشي على مايرام كبرنا وتعلمنا من اساتذه افاضل كان لهم الاثر الكبير في صقل حياتنا الثقافية والعلمية حببونا بالعلم
كان المدرس له هيبة مثل هيبة الابو نعم كان وافد بس لما يدخل كان الكل يوقف احتراما له سواءا خوف والا احترام لكبر سنه
اتذكر منهم استاذ عزت الديب مدرس لغة انجليزية كان يقول بتتعلم الانجليزي طيب او غصب ولي فيه خير مايحفظ لي اقوله له كانت عصى الخيزران قبل كتبه ودفاتره
الكل يخاف منه مع انه انسان قلبه طيب لابعد الحدود الا انه يضرب الشاطر والغبي بهذيك الفترة كنا نبجي بجي اليد من قوة الضرب لي ننضرب منه ولي فيه خير لما يرجع البيت يخبر ابوه والا يقول لها الاستاذ ضربني
الا اذا كان بعد يبي ينرغ بالبيت مرة ثانية والكلمة لي بيسمعها
اكيد يالهيس مسوي شي غلط والا ماكان بيضربك الاستاذ فالافضل انه ينطم ويسكت
اتذكر في يوم من الاسبوع لازم اشرد فيها من المدرسة لانه فيها عندنا حصتين تربية فنية ورا بعض لانه بهاك اليوم يطلع مسلسل ( حبابة ) وكنت اتابعه حتى انه الاستاذ رسبني بالفنية لاني ماكنت احضر حصصه ولا اداني الرسم ولولا الرياضة كنت رسبت بالمعدل العام
اتذكر مرة كنت مابي اروح المدرسة بسويت عمري مريض وخشيت عمري تحت الشبريه وغصيت عمري بلحافين ورقدت وامي على بالها بعد ماسوت الريوق اني رحت المدرسة وماتريقت ويت حليلها تنظف الغرفة الا تشوفني اناخر مافي واحد ثنين ولا تفاهم
بعد ماسالت ليش مارحت المدرسة
والا شوفيك فديتك عسى ماشر مسخن والا شي
لااااااااااااااااااااااااااا
اطلع اطلع طبعا وانا مسحوب
اكفاااااااااااااااااااخ فوق الصماخ وسيده الحمام
طراااااااااااااااخ وهي تفصخ ثيابي ماتبي تروح المدرسة ياهيس
طراااااااااااااااااخ ثاني بالطش مال السبوح
تبي تهايت هاااااااااااااااااااا
طرااااااااااااااااخ على خشتي
تبي تيلس يلست الحريم
خلص السبوح تقول بتخليني اروح المدرسة لاااااااااااااااا
الثقة معدومة
لبست عباتها والعسو بيدها
ومن البيت للمدرسة والتكفيخ ماله حد وانا الدموع اربع اربع والمخاخيط مخيس الكندورة مافكتني الا لما قبضتني للمدرس ورجعت البيت
وهي منتشيه بالنصر الذي تحقق
وكملها المدرس افتح يدك ليش متأخر
اقول بخاطري لا والله ماتشوف شكلي كيف صاير وتسال هالسؤال
و اقول بخاطري انا ناقص كفاني لي ياني ومع عقبها حرمت اتمارض .
تمت تمشي المدرسة على ماهي عليها والحمدلله كنت من المتميزين في الدراسة
تعرفنا على ربع واصدقاء وتكونت صداقاتنا وكبرت معانا
كنا نييلس بالصف ورااا اخر شي
المدرسين الطيبين ويانا ولي مايشيلون خيزران وياهم نخلص حصتهم مهرجان مو ثقافي الا مهرجان ضحك ولعب
يعني يخرط لي يقول فهم شي
والا يلسنا نحل واجبات مال باجر والا للي طايفنه واجب
ويافرحتنا لو قالوا لنا استاذ غايب مابيي وانه محد بيمسك حصته يافرحتنننا
رحنا سيده لمدرس الرياضة ويلسنا نلعب كره كنا نحب المدرسة لشيئين الرياضة والتغذية لي كانت تتوزع علينا
خلال هالفترة ماصار شي يذكر عن المدرسة لانه بصراحة كنا مؤدبين
طبعا ادب بخيزران مو ادب من الله
مانشرد مانشاغب مانتضارب




البيت ووضعيته




كبروا شوي اخواننا وكبرنا وياهم وظلت حياتنا مثل ماهي الا في شي كان يصير ما اكتشفته الا متأخر
لمهم كانت اختي الكبيرة هي اكبرنا وبصراحة تعتبر بمثابة امنا رغم انها كانت دلوعة الماما والبابا الا انها ما شاء الله عليه قمة الادب والاحترام والمساعدة ويا امي وويانا عمرنا ما قلنا لها شي وقالت لا
كلها تدافع عنا جدام ابونا وامنا وتغطي علينا
شوفوا شو كنت اسوي فيها طبعا لانها كانت الكبيرة والمدلله ولي طلباتها مجابه كان كل شي ينعطى لها وخاصة البيزات
وطبعا هاك الايام مافي شنط ولا محافظ فكانت تخششها بين الكتب في مكتبتها وطبعا مكتبته مليون كتاب فيها تقول مكتبة جرير من كل حدب وصوب
مرات لما احتاج بيزات وامي معطنزة وابوي ضارب بوز عني ماشي غير الاخت طبعا هي تعرف انه ابوي وامي ماعطوني لسبب فمن جي ماتبي تزعلهم وتعطيني
لحين ياااا دوري للتخطيط ويالله قوووم فتش كل الكتب الموجود بمكتبتها يمكن تحصل خمس ريال والا عشر بعد عاااد شو بعد تعب وكد
فهالشي احصل بعد مجهود وتعب مادري حلال والا حرام
ولما تفقد شي من فلوسها حليلها تقول اكيد نسيته في كتاب والا مجلد ونسيته
فمن جي ماتشك
حراااامي نمبر ون
واذكر مرة لما تحولنا من البيت انا الوحيد لي شليت كتبها اونه اساعدها وقلت لها اي فلس احصله بيكون لي
وافقت
فمادري هاااليوم كم ريال حصلت ماشي ببلاش هالايام
بس تدرون هالبنت احبها مثل امي مع انها اكبر عني باربع سنين الا اني لما اشوفها لازم احبها فوق راسها طيبتها وياي بالذات ماله حدود فمن جي اعتبرها امي الثانية
كانت طيبة طول عمرها الاولى متدينة يعني مطوعة درجة اولى



اخوي الكبير


كان طمه من صف اول لصف اول اعدادي
بعدها مادري شو استوى فيه صار من الاوائل فسبحان مغير الاحول
وخرج مهندس
انا اسميه دلوع الماما
امي واااااااااااااااااايد تحبه حتى كاتب اسمه بتيلفوني دلوع الماما
الا انه حبوب واااااايد واحترامي له مثل احترام ابوي





اخوي رقم ثنين




نفس الشي كان طمه لين ثاني اعدادي وبعدها استطوع وراح جمعية الاصلاح وطلع الاول على صفه من عقب للدواويح الحمر
دوم يعتبر نفسه المظلوم بالعايلة لليوم بعد ماكبر وياب عيل لما تقول له امي شي والا تنازعه يقول لها انت ماتحبيني وتحبي عيالك ويتم شهر مايكلم امي ولا ييها البيت في عررررره غريبة مع انه مطوع
بس بعدهاااا هالعرررره فيه
كنا نسميه التاجر يشتري نفافيخ بو حظك يانصيب لي فيها ارقام مغطايه والرقم لي يطلع لك هو حظك وطبعا في نفافيخ كبار وصغار وكنا ندور بحظنا ولي تطلع له النفاخه الكبيرة
والمشكلة انه اربع ارقام بريال ويا ويلك اذا طلعوا كل النفافيخ صغار
كنا لما تصير لنا نفس السالفة نروح نترسها ماي ونفره فيها
طبعا الصغير منا يتصفع والكبير ينجو لمكانته
غير الكاكاو والنمكي لي شتريه ويبيعه لنا
وطبعا اغلبه صبر ( سلف )
وبالعيد اكثر واحد يحصل بيزات لانه طيب غصب يحصل فلوسه
وبدل لا يطلع تاجر طلع مدرس
وتخرج مدرس

اخوي رقم ثلاثة

مصري من صغره حفيييظ من دخل المدرسة الا ان تخرج من الجامعة وهو الاول وبدرجة امتياز مع انه كانوا معاه مصريين وزلمات الا انه ماشاء الله عليه كان ابوي يحبه وااايد وكله شوفوا اخوك فلان وشوفو اخوكم فلان
اعتبره صديقي العزيز شكوااي كله عنده احب اسلوبه الهادي في التعامل انسان كتوم يحب يخفف عني وااايد مع انه بعيد عني بالسكن بس وااايد متعلق فيه يمكن لانه كان قريب مني
ماشاء الله عليه من صغره كان نبيه حتى ولده طالع عليه نفس مسكة القلم وبعد يطلع الاول الله يحفظه
وبعد تخرج مهندس



انا رقم اربعه




والخامس اخوي





لي اصغر مني هذا صديقي يقولون انه يشبهني حتى انه مرة يايب لي السيارة الدوام جان يفتحون له الباب ويدخلونه على بالهم انا زين ياحظي انا داخل الدوام كيف طلعت ودخلت وانتوا رقود قالوا ماندري على بالنا انت
الدنيا فنااااااااااااااااتك
ولد خدوووم حبوب لو اقول شو اقول فيه اعتبره صديقي اكثر منه اخوي


ترى للحين ماخلصنا ولو كتبت عنهم مابتكفي السطور لانه عندي 21 اخ واخت ( قولوا ماشاء الله )
طبعا امي مو قطوه هذين من امهات مختلفات
والله يزيدهم وينعم عليه




الفريج





كان فريجنا صغير وحلو ولي يبتعد عنه سبع بيوت يكون طلع من فريجنا ودخل الفريج الثاني فمعنى طلع من حماية عيال الفريج ودخل في الفريج المنافس
لكل فريج تقاليد وطقوس وخاصة في التنافس حتى بالتيل والغزولة وكرة القدم اذا في تحدي لازم اعيال الفريج كله يروح للفريج الثاني حتى ينافسه وخل حد منهم يخسر ينقع البوكس فاغلب المباريات تنتهي بالتعادل للحين ماعرفت ليييييش
كنا نقوم من الفجر نلحق راعي الذباب ( سيارة تابعة للبلدية ترش دخان ) كنا مدمنين على الركيض ورااه وياحظه للي عنده سيكل يدور ورا راعي الذباب كل الفرجان مادري كنا خبال والا مدمنين دخاااان بس تقول جااانا ذباب يعاوووي وراااه ياليت وااحد والا ثنينه كل بالفريج يطلعون لما يسمعون صوته ويشوفون الدخنه حليله هو يمشي واليهال كلهم وراااه
والا طلعنا من الصبح رحنا البحر لي يصيد نغارة والا يحدق ووبالاجازة يوم الجمعة جهزنا غراضنا وكل واحد ييب شي من بيتهم طبعا كله بالخش والدس وياويله لي تطلع عليه القرعة وييب الدياي
طبعا الدياي قبل مو مثل لحين متوفر لااااااااااااااا
قبل بالقوة نحصل دياية ومرة طلع دورنا وطرشوني اخواني اييب دياي من ثلاجة بييتنا وامي من الفجر تقوم والثلاجة بالمطبخ وامي مجابلتنها وانا مثل الذيب واقف بس تغفل والله يهداااها حست انه وراي شي فتمت يالسه وماعندي طريقة شو الحل وياااها
مافي غير اني اهد الهوش واخليهم يراكضون بالحوي ادري بحصل لي كم من ضربه بس بحصل بعدها لي ابيه وصدق كلامي اونه بحط الاكل للهوش جان اهد الباب وتهد امي خبزها وتقول لي سكر الباب جان اربع اسكر الباب وهي تراكض وراهم وانا رحت للثلاجة وخذيت دياية وفريتها على السطح ويلست اراكض ورا الهوش ويا امي ومن دخلتهم ماشافت رقعة ويهي
لمهم ركبت على الدري يبت الديايه ونطيت والا اخواني ابقيني فلما شافوني وشافوا ديايه وحدة قالوا بسسسسسسسسس
قلت لهم صبروا على لي بييكم من امكم بس ارجعوا البيت انتوا
وصدق حدثي من رجعنا البيت الا والمخمه واقفتنا من شفناها تقول حد وقف مثل الفيران كل واحد انخش بمكان
عااااد لحين بنقص لامي ماينقص عليها خلتنا براحتنا من رجعنا البيت ورقدنا قفلت الباب علينا وطرااااااااااااااااااااخ
المهم انه الضرب كان جماعي فخف علينا العبء

بتسألون وين الابو بمدونتك
لاااا انا ماغافل عن ابوي الحبيب بالعكس ابوي دوره بيبدأ من الباب الثاني
لانه من عرفناه وطلعنا على وبه الدنيا من بعد صلاة الفجر يتريق ويروح يشتغل الي الظهر يتغدى ويريح ونحن طبعا بالمدرسة وقبل العصر هو طالع للغشل مايي الا قبل العشاء بشوي يتعشى ويرقد
فكنا وياه ايام الاجازة لي هي يوم الجمعة
اما التربية ككل كلها كانت على راس امي الحنونة لي قاست الامرين وخاصة مني انا والحمدلله انها خرجت عيالها من المدارس وبوظايف نفتخر فيها


وبنشوفكم بالباب الثاني
لما نفتحه
 
التعديل الأخير:

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

الباب الثاني



ايام المراهقة والشقاء




مادري كيف ابدا هالباب يمكن تكون اسوء لحظات حياتي وخاصة على اهلي لانهم تعبوا وشقوا في من مشاكلي وحياتي لي كانت بنظرهم خارج عن طاعة الاسرة
انما كانت بنظري تكوين لشخصيتي ونضوج الجسم وتكوين الشخصية الحقيقية لهذا الانسان
ابدأها في البيت
بعد ماخلصت الشهادة الاعدادية ( كانت الشهادة الاعدادية تعادل الشهادة الثانوية ولها ترتيب ومجموع مو مثل لحين ماتسوى شي )
رحت درست بالثانوية وطبعا المدرسة الثانوية ماكانت في منطقتنا انما في منطقة بعيدة عن منطقتنا كانت كل الامور تمشي على مايرام لاول يوم دخلت فيه المدرسة اتعرفت على شباب غير اخواني وربعي بالفريج اتعرفت عليهم بالصف ومع الايام كبرت علاقتنا مع الايام لمهم هالربع كانوا يشاركون في فريق بالنادي ويلعبون فيه ومع الوقت خبروني عنه وتعال شوفنا فقلت لهم انه اهلي مايرضون وانه من المحظورات علينا انه نترك جمعية الاصلاح وانه النادي كان يعتبر مكان للشيطان وانه اي واحد يسير له مشبوه
فقالوا تعال انت شوف لا تلعب لمهم رحت معاهم وطبعا يلست اشوت بالكرة وانا حافي ولابس كندورتي وكانوا ربعي معدودين على الاصابع يلست العب وياهم ورجعت البيت متأخر
اول سؤال انسأل عنه واخر جواب اقوله
من وين ياي
ويا ربعي
ليش متاخر
رحنا نلعب كرة
طرااااااااااااااااااااااااااااااااااااااااااااااااااااااخ فوق صماخي
داش النادي يالهيس
وينك يالشردة حطيت كندورتي بحلجي وسيده شرده والريول واليد ترتجف
لمهم يلست برا البيت للعشاء قريب البيت ولما يت حزة الرقاد رحت فوق السطح واستويت مثل القطو اراقب اهلي حتى يرقدون وانزل ارقد
الا انه امي فديتها الله يحفظها ويخليها مارقدت يلست تراقبني ليش ماييت للحين
لمهم دخلت الغرفة تبي تسوي لي ( ون تو ) انا من شفتها دخلت الغرفة خمس دقايق والا انا نازل من فوق السطح توني بمر من صوب غرفتها الا هي طالعه لي
هاااااااااااااااااااا يالهيس بوين كنت طرااااااااااااااااااااااااااااااااااااااااااااااخ
شفتوا كيف حنانها
لمهم سيده للفراش وانا اتكفخ واحسابك وياااااي بعدين
اقول بخاطري للحين ماخلص افاااااااااااااااااااااا
خلصي من لحين وراي مدرسة
لمهم
تتحسبون الولد خلاص بيتوب ومابيروح النادي لاااااااااااااااااا
العناد والخبال كله عندي
رجعت المدرسة ليوم الثاني والا اقول لربعي انه اهلي كفخوني وعرفوا اني رحت النادي وصفعوني
طبعا كله من وراااا اخواني الشجعاااان
قالوا ليوم ماحد بيتكفخ خلوا اخوكم يتكفخ فخبروا امي
رجعنا لليوم الثاني مارحت ويا ربعي ويلست بالفريج ملااان
ماعيبني الوضع وانا احب العب كرة من صغري
وقررت الاسبوع لي عقبه اروووح ولي فيها فيها بتصفع تراني متعود
بتكفخ شو فيها مو اول مرة
لمهم رحت بعدها النادي وبدت حياة النادي وامي عرفت ويلست كل يوم تضرب وانا لاحياة لمن تنادي
حتى اذكر انه النادي يعطينا لبس هاف وفانيله وجوتي وانتوا بكرامه لما نروح المباريات
ولما ارجع البيت واقول للشغالة تغسلها
ما ارجع من المدرسة الا وامي عاقه الفانيله والهاف والجوتي بالتنور وحارقتنه
هي تشوي السمج وماتلقى حطب تولع فيه التنور غير فانيلتي والهاف لانهم بصراااحة كان يكرهون شي اسمه نادي
ليوم لي بعدها رحت النادي بكندوره قالوا لي وين لبسك فقلت لهم امي حرقته
لمهم ماقصروا وعطوني لبس ثاني ولبسته ولبست فوقه الكندوره حتى مايبين فلما رجعت البيت فريت الجواتي فوق السطح ورحت فصخت الهاف والفانيلة وغسلته وعلجته فوق الكبت طبعا في غياب امي
وليوم الثاني رحت المدرسة ولما رجعت من المدرسة وكنت بروح النادي الا اركب فوق الكبت ادور اللبس والا مختفي رحت للشغالة اسالها
جان تجابلني امي شووو تدور
ماشي امي
يالهيس تدور الهاف والفانيلة روح شوفهم بالتنور
خخخخخخخخخخخخخ
وانا ماصدقت رحت االتنور مادري ليش يمكن حتى اسكب دموع الحزن والعزاء
لمهم طلعت من البيت اتحرطم وامي ايا نعال جدامها تفرني فيها لين ماوصلت باب الحوي
ورحت النادي وقلت لهم امي حرقت اللبس
طبعا كان الاداري من اهلنا وكلنا قراب لبعض
ماقصروا وعطوني لبس
هني طلعت من سيطرة امي الغالية وبدت الشكوى للراس العود
ابوي الله يحفظه ويخليه ويطول بعمره
بدأ الصراع بين تكوين شخصيتي المستقلة وبين الشخصية لي اهلي يبوني اكون فيها
الشخصية لي كانوا يتمنونها اهلي فيني
ولد مصلي اخلاقه عاليه محد يشتكي منه ولا يسبب مشاكل متفوق في دراسته متدين يعني مطوع (جمعية الاصلاح )
شخصيتي انا المتمردة
الصلاة شي انغرس فينا من صغر فالحمدلله المستوى الدراسي بدا ينزل طبعا بسبب المشاكل لي كانت تصير بيني وبين اهلي بسبب النادي والنظرة التشائمية لي كانت تنظر لنادي على انه مكان للفساد وتخريب الاخلاق (بوجهة نظر اهلي )



المواجهة الاولى :



المهم بعد ما اشتكت امي لابوي وانها ماقادره علي وسوت كل تقدر عليه ولكن مافي فايدة وانا بطبعي عنيد وراسي يابس بلي انا مقتنع فيه حتى سالوا ( بوحمده )
كنت راجع بالليل من عند ربعي بحسن نية وماكان اي في شي انما ماتوقع اني سويت شي هاك ليوم لمهم دخلت وانتوا بكرامة الحمام اسبح وطلعت بروح الغرفة ويااا اخواني برقد الا ابوي معترضني
اول سؤال من وين ياي
من عند ربعي
مسكني من يدي ودخلني الغرفة ( لاتفهمون غلط ماكان يبي يتفاهم ويناقش الموضوع وياي لااااااااااااااااااا مخكم راح بعيد )
كنت اتذكر اني لابس هاف مال الرياضة وبعدي كنت بلبس فانيلتي
قفل علي الباب وحط المفتاح بجيبه وياب العقال ويلس يمرغ فيني مرااااغ مال سنة ويقول كلاام انا ماتذكره لانه الضرب كان اكبر من اني افهم
اتوقع اني كنت اتلوى حتى الضرب مايجيس اكبر مكان بجسمي وتعرفون واحد مفصخ وتوه طالع سابح ولما تعب من الضرب وانا اصيح واخواني يشوفوني من الدريشة بس محد قادر يسوي شي لانه قافل الغرفة علي
وييلسون يصيحون علي حتى اختي الكبيرة الله يحفظها كانت تصيح واسمع صياحها
وبعد ماتعب من ضرب العقال تتوقعون تركني لااا دااا كااان زماااان
ياب واير مال المسجل ولفه اربع لفااات وكمل ضربه الا ان تعب وانا خلاااص خلصت دموعي وماتم شي اقدر ابجي فيه
حتى اتذكر انه الدموع كلها جفت والصوت راح من الصياح لانه ماكان بيدي حل غيره
حتى من فتح الباب مادري كيف طلعت من البيت بانصاف الليالي مادري وين اروح ولا وين اعطي بويهي ماكان الضرب هامني بقد ماكان الخوف من مادري
دارت في نفسي وتفكيري افكار واااايد هاااك ليوم رحت على البحر ورقدت على الياخ البحر ( شباك الصيد ) لليوم الثاني من التعب ومن المجهول لي كان ينتظرني
امي الحنون حليله مارقدت طول اليوم تدور علي بالفرجان على بالها مسوي في نفسي شي

وبدأ فترة التحدي بين اني اسمع كلام ابوي وارجع للي يبيه او اني اتم على شخصيتي لي طلعت وبكونها واثبت لهم العكس
لمهم ليوم الثاني الصبح رحت البيت من الباب الخلفي وانا ادري انه ابوي يطلع الفجر غسلت ويهي وشفت اخوي الصغير طرشته ييب لي ثيابي وكتبي ورحت المدرسة ومن عقب المدرسة عقيت الكتب ورحت النادي
هذا كان اول تصادم عنيف بيني وبين ابوي الله يخليه ويحفظه
وبعد اسبوع رجعنا على نفس الموال حتى اني اتحاشى اشوف ابوي وامي كنت ادخل من الباب الخلفي اعق ثيابي وكتبي وابدلها واروح النادي
امي تعبت مني وغسلت يدها مني
وابوي كان كل مايشوفني يضربني حتى اني كنت اتحاشى اشوفه باي مكان
اخواني بعد لما شافوا علاقتي مع ابوي وامي متكهربة فضلوا الابتعاد عني حتى مايزعلوا الوالدين
وطبعا انمنع مني كل شي
بما معناااه حصاااار اقتصادي واجتماعي



المواجهة الثانية :


من طياشة المراهقين لي اذكره انه ثلاثة من ربعي عندهم سيارات ونروح ونرجع وياهم فيها يوم من الايام حبيت اتخقق بالليل شليت مفتاح ابوي ورحت الكراج وحتى مايسمع السيارة وهي تشتغل فتحت بابها وحطيتها بالخالي ودزيت السيارة انا وواحد من ربعي لمسافة 200 متر عن البيت وهي ماتشتغل ومن هناااك شغلتها لمهم رحنا نتحوط فيها لوقت متاخر وانا على بالي انه الكل راقدين ومحد يدري ومادريت انه حد من اخواني وواعي ولما ماشاف سيارة ابوي بالكراج استغرب والمشكلة انه شيك على نعال ابوي وكانت موجوده فراح صحاه وخبره بالموضوع
لمهم ابوي شك فيني وانا رجعت البيت دخلت السيارة الكراج ورحت حطيت مفتاح السيارة مكانه ورحت اتسحب للغرفة ودخلت وقفلت الباب و ياليتني ماقفلت ترى من خدايتي ابوي كان فيها
يعني روحي سجنت عمري وياليت هالمرة عقال ماشفت الا مربعه فوق راسي كرااااااااااااااخ حتى راسي نقع منها ماستعوبت السالفة ولاني ادري اني كنت غلطان بس ماتوقعت جي العقاب
وضربة ثانية على يدي وثالثة على ريولي وانا ناشب بالباب ابغي ابطل قفله وهو يضرب ومن الخوف طاح المفتاح والمكان مظلم وابوي مايشوفني الا من نور تحت الباب فشردت لداخل حتى مايشوفني
فمن شغل الليتات شفت المفتاح ركضت له وهي بالقب على ظهري حسيت بشي يتكسر لمهم طلعت اركض
وابوي ورااي بوزاره وفانيلته اركض بكل قوتي وهو وراي اتوقع انه ركضنا 700 متر وانا ياهل وهو ريال
انا اركض من الخوف وهو يركض يبي يبرد حرته
اقول بخاطري لحين بيتعب لحين بيهلك وبيرجع عني
ولا طششششششششششششششه
لين مايودني من كندورتي وطول الرجعة وهو يكفخ بيده لانه الحمدلله طاح عنه القب
ترفيس وتكفيخ وكل شي
دخلني داخل غرفة ويلس يمرغني لين ما تعب مني
حتى الجيران سمعوا صريخي والله يرحمها ويغفر لها جارتنا يت تدخل وتفججني من ابوي
وليوم الثاني حسيت بويع بيدي وريولي فرحت وشفت الانتفاخ فيها طبعا من حرة الضربة ماحسيت بها طول الليل
بس من رحت المستشف طلع عندي كسر باليد وجبسوها وكدمه قوووية بالريل فقلت لهم اني طايح تجبست ولا خبرت حد
وكانت نهاية الصراع بيني وبين ابوي
طبعا هذي الواقعتين كانت الاخص بفكري وثابته بمخي لانها كانت الاشرس
طبعا بينهم مناوشات بس لاتذكر لانها كانت بنظري خفيفة



الربع



كانوا ربعي وللحين ربعي من فريجنا والفريج لي يمنا كلنا بنفس السن وكلنا نروح المدرسة ونرجع نروح النادي
محد منهم كان عنده مشاكل ويا اهله الا انا
يمكن لانه كانت نظرة اهلي عن النادي نظرة سلبية
بصراااحة كانوا يساعدوني باشياء وايد وكنا اكثر من الاخوان وكان واحد اكبر من يرابعنا ويتمشى وياانا ويمكن لانه شبابي كان يروح ويانا
وتعرفون الشباب كنا نحب الطياشه والمهايت والمراكض بكل مكان نحب نشخط ويلات بالسيارات ونروح الحداق ونركب اليبااال ونروح دبي باي سيارة خربة
بس كانت شلتنا وااايد حلوة عمرها ماحد اشتكى منها لاي سبب من الاسباب
حتى مرة من طياشة المراهقين كنا نبي نجرب ندوخ سجاير ولي كان وياانا واكبرنا دوويخ عوود
فخذينا عنه وهو مايدري وتونا بندوخ والا ييب لنا مطرق ويراكض وراانا و صفعنا تصفيع
جزاااه الله خير كنا واااايد نعزه ونحترمه مع انه شليتي وكبير بالسن بس لما كنا نسوي شي غلط كان يصفعنا وياليت يهزبنا بس الا طرااقات ولي فيه خير يزعل منه
المهم هالشلة مشت على ماهي عليه وسارت النادي ومشت الايام
ومحد بهدل ادارة النادي مثل ما انا بهدليتهم بس مشاكلي ويا اهلي
لاتمت ثياب ماتنحرق ولا تم سب ما انسبوا فيه من اهلي
الا ان وقف واحد من الادارة وكان كبير بالسن وراح لابوي واتذكر اني كنت بثاني ثانوي وسحبني وياااه لمكان شغله
وقال له بالحرف وانا كنت ويااه ومنخش ورااه لا اتصفع من ابوي
قاله ( بلسان الادراي )
هذا الولد ولدي ومثل ما اربي اولادي بربيه بس خله ويانا بالنادي
ومن عقبها ابوي هدت سريرته وخفت حدته يمكن لانه ييا ريال عود وضمني عنده
اول سنة كنت ادخل فيها النادي لعبنا اماراة اتذكر
مع اتحاد كلبا غلبونا 13 – 0
ومع الشارجة 11 – 0
السنة لي بعدها لعبنا معاهم
غلبونا اتحاد كلبا 5 -2
ومع الشارجة 3-1
السنة لي بعدها
فزنا على كلبا 2 -0
وعلى الشارجة 4 – 1
وبداااا التحدي في مابيينا واتذكر كانت الفرق قوووية لابعد الحدود في خلااال هالفترة خلص الثانوية بس مو بالمعدل لي كان مطلوب لانه النادي ماخذ كل تفكيري لمهم اني عديت يمكن بعدها هدأ بال امي وابوي عني بعد انقطاع دام سنتين والحمدلله ربعي كلهم نجحوا بالثانوية وبهاك الايام كان لي عنده ثانوية جانه عنده دكتورااااه
بعد ماخلصنا الثانوية رحنا نجمع اوراقنا حتى نسجل بالكليات والجامعة لمهم ثلاث من ربعني انقبلوا بكلية الشرطة وثنينه حصلوا بعثات خارجية وثلاثه في الكليات الحربية وانا وثنينه من ربعي في الجامعة
دخلنا الجامعة اول كورس يطبقون في التعليم الاساسي وتوني بكمل دراستي الا واتصلوا لي مكان كنت مسجل فيه
وطلعت من الجامعة دخلت المجال العملي ومن عقبها اتغييرت النظرة من اهلي على اني انسان منحرف فاشل طالع عن طاعة الاهل
الي انسان ثاني



نكمله لكم بالفصل الثالث
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

صور من ذكريات الماضي



albarzah-9fd13925cd.jpg





غرفتنا لي كنا نرقد فيه وكل حياة الطفولة قضيناها هني
رغم انها كانت صغيرة الا انه كانوا سبع اشخاص يرقدون فيها
مع كبت للثياب ومكتبة للتلفزيون ومكان لكوي الثياب وكتبنا واغراضنا
الا اننا كنا نشووووفها كبيييرة وااايد
وهالايام الواحد يرقد بغرفة لوحدة ويقوول المكان ضيج





albarzah-243db52c4a.jpg




مدخل الدري لي وياااه ذكريات جميلة
كان السبيل الوحيد للشردة اذا تقفلت البيبان
وكان المكان الوحيد لنا لما يطيح مطر نروح نلعب بالفدر ( طين على السطح ) ونشوف الدنيا كلها من برا
وكنا اتذكر لما يقفلون عن الباب كنا نتسلق اريل التلفزيون حتى نركب فوق





albarzah-1faf35549f.jpg





اخر غرفة كانت غرفة البخار ( مستودع لحطب التنور والهوش ) كانوا الفيران يتيمعون فيه وكان حذاله درام الماي من حديد وهذا هو الحوووش بس لحين يسووون بالبيت ترميم والا كان اكبر





albarzah-3b8bf183a3.jpg




هذي صورة فريجنا من فوق السطح للحين ماتغيرت جي كانت وللحين
مظهره يرد الرووح كان نركب فوق ونتيلس اما نيلس نفرفر فدر والا راكضنا فوق السطح




albarzah-1a4c57607e.jpg





هذا المكان كنا نلعب فيه تيله والا غزووولة لانه مكاان تلاقي الفرجان فمن كل فريج يونا ناس
وفي مراات نحن نروح لهم نلعب وياهم
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

albarzah-2334c5cf3b.jpg




السكه لي كانت تودينا السوق لو تلاحظون السيارة بالقوة تدخل بس قبل كنااا نعتبرها كبيييييرة
وهي السكة الوحيد لي تدخل وتطلع من السوق

albarzah-9541c91d5f.jpg




بهالسكه كانوا اهل المزارع ولي عندهم نخيل واي واحد يبي يعرض بضاعته ييلس هني
كنا قبل لا نروح المدرسة لازم نمر على العيايز كانت كل وحده عندها جفير وتارستنه نبق وتبيع
فكنا نشتري عنهم
والا كانوا ييبون الجزر لي لونه اسود نحب ناكله مع انه لازم تتخيس ثيابنا ويدينا


albarzah-86921b967a.jpg




هذا الدكان من طلعنا على الدنيا وهو مفتوح والباب للحين ماتغير


albarzah-8e43669bb9.jpg




صورة السوق ككل كانت المحلات مفتوحه
محل البضايع الكبيرة لي يونها الشياب وحل يسوي حلوى ومحل لنا خصيصا نحن اليهال
ومححل للحطب ومحل للغليون ومحل للسح ومحل للصفافير ودجه للسمج وغيرها
يوم الجمعة تشوف هالمكااان متروووس من كثر الناس لي يايه تتشرى

ونكمل البقية بالقريب العاجل باذن الله
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

لاتدوووررووون شي



كنت مكمل المدونه ويالس اكتب


وفجأة سوا الجهاز ريستاااار لوحده :a050::a050::a050:



وطااااح بجبدي لي كتبته كله ولاعت جبدي ولحين بيأذن العصر يعني مافي فايدة



:1577_1186768770::1577_1186768770::1577_1186768770:


واصبرووووا لين ماتلوع جبودكم


هذا بس للي يتابع


:ax:
 

شيبه محتشر

๑ . . عضو إمبراطوري . . ๑
التسجيل
3 يونيو 2006
رقم العضوية
4822
المشاركات
4,172
مستوى التفاعل
2,064
العمر
49
الجنس
الإقامة
مرة بالبيت ومرة ببيت ابوي ومرة على البحر
رد: مودوناتي في ذكرياتي

طفاستنا





* كنا نترس النفافيخ الصغار ماي ونطلع ننخش بالسكيك واي سيارة والا هندي والا صفقناه فيه ولي في حيل يربع كنا ندور لي معصقلين حتى لو ضخ واحد منا تعاونا عليه وصفعناه ( لحين غلطانين وبعد نضارب ياقوة عيونا ) والا قوم خان او سيارة يديده مانفرها لانه نعرف شو بيصير الا اذا كان واحد منا متفيج ويبينا نتصفع



* كنا نعتبر النخيل لي تبعد عن جلفار 4 كيلو وعن الرمس 10 كيلو وعن شعم 25 كيلو كنا نعتبرها ( غاردن سيتي ) فيها مطعم السلطان لي يقول مطعم جميرا بيتش حد فلافل وناشف وكبده وكلاوي بس عاد بهاك الزمان محد ينافسه كنا نركب تاكسي نطلع من بيوتنا لها مؤدبين خلوقين نمشط المكان رايح راد واخرتها نمر شويترام ناخذ ماثقل حجمه وقل سعره تعال للرد عااد هذي هي المشكلة نوقف عند اخر النخيل وكل واحد يطلع لي بجيبه لي باجي عنده نص ولي باجي ربع ولي باجي ريال لمهم يبناه ويمعناه ويطوفون لنا التاكسيات طبعا نختار اضعف واحد والا واحد شيبه حتى ما نتلعوز لمهم نوقفه اخر كم كم اخر وكم اخر واخر كم لين مانوصل لي نبيه ويوصلنا حليله لانه هو رايح رايح ولما نوصل للمكان لي نبيه نوديه لاضيج سكه ونقول لهم هني طبعا ننزل كلنا ويتم اخرنا وبالقرعة لي عليه الدور يتصرف فيطلع من السيارة وييلس يحسب ويا راعي التاكسي
ربع وربع يساوي نص ونص وربع يساوي ريال وربع ويعطيه ربع مرة ثانية يقوله هذا ريال ونص وييلس يحسب وياه الي ان يقول خان جيب كله فلوس وروخ واذا كان الخان عصبي طلع برا السيارة وركض ورا ربيعنا ونحن نطالع من بعيد اذا ضخه ردينا له واذا نفد بيلده نفد مرات كنا نتصفع وخاصة من قوووم خااان والا تصافعنا ويااهم الي ان يحايزونا عنا
فمن جي استوى لنا حصار تاكسيات وعرفونا نحن وماقاموا يوقفون لنا لما نبي نرجع البيت فنمشي خمسه كيلو مشي الي ان تطيح ريولنا والا ركبنا اي بيك اب او تريلا وهي راده تقول عمال بناء واذكر كم مرة رجعنا لبيوتنا مشي مرة سوالف ومرة ضحك ونخلص الطريج




كانت عندنا ام سجبه ( سلاح صغير في رصاص صغير ) كنا لما نحصل كم بيزه نروح نشتري قوطي رصاص وننقع فيها والا نصيد حمام واذا اشتغلت طفاستنا يلسنا نشبح على لمبات البيوت وكانت لمبات تتدلل من وايرات فنشبح لها ونكسرها وياويلنا لو صاحب البيت طلع اركض ماتركض ولي يلحقه راعي البيت يزخه ويغسل شراعه والا يبنا قواطي بيبسي ويلسناها فوق بعض وشبحنا عليها واذكر مرة كنا طالعين نلعب فيها ويا ربعي فكسرت الام سجبه حتى احطي الرصاصة داخلها والا واحد من ربعي يسولف وياي جان يضغط على الزناد ويرتد على صبعي جان ينقص ربع الصبع من قوة الضربة والدم بدا يخر مثل النافورة لانه الشريان بين وانقطع واركض ماتركض للبيت والصراخ محد له لمهم اتذكر امي اونه بتقول شو فيني والدمان تارس ثيابي جان تكفخني طراااخ على صماخي زين انا متعور وتشوفي الدم يطلع اول سوي شي راحت حليلها يابت لي قهوة وبتسد فيه وربطته بوقاية جان يخر الدم منه الا صفق طراااااااااااخ ثاني من وين ياي تراكض كم مرة قلت لك لاتلعب والا ماعارف الا ابجي لين ما اشفتقت علي وودتني العيادة قالوا له هذا مايبي له خياطية يبي له عملية ترقيع جان تشلني بتاكسي لمستشفى صقر وسدحوني وماوعيت الا وصبعي مربوووط جالعين قطعه من ريولي وملصقينها بصبعي صرت قطع غيار لعمري




اتوقع محد عذب الهنود كثرنا تخبلوا منا لما كانوا يمرون قريب فريجنا وخاصه اصحاب السياكل جانه داشين مغارة الوحوش مايدرون شو يلاقفهم لي يفرهم بعنقاش لوز ولي يلبق له صورايخ وتلاحقهم ولي يفرفرهم بنفافيخ
عااد نحن كنا من كل ورا بيت منخش واحد والا ثنينه ومحد يركب فوق السطح الا لي يبي يندبغ دباااغ فمن جي بس بالفرجان وتعال عااد للركيض او ماتفر وينزل الهندي من سيكله ويلاحق واحد منا من يلاحقه نروح نحن ناخذ سيكله فالهندي فيرون يفكر بسيكله والا بحرته فما يهون عليه سيكله فيرجع لنا وعااد سمعوا للتشتيم الهندي مانفهم له بس لمهم يشتمنا شووو ماندري




ايام حلوة لما نروح البحر ونسمع حد ضاغي والا محلق على السمج شلينا عمرنا ورحنا على الساحل كانت عند الصيادين عاده للي يسحب وياهم الليخ ويساعدهم يعطونه من السمج فنروح كلنا نسبح ويا الشياب والهنود الليخ لين مانوصله البر وتعال على شكل السمج وهو توه طالع على السيفه كانت الفرحه ماالها حدود وخاصة اذا كان الخير وااايد راعي الليخ مايحاتي السمج فيقول لنا اخذوا قد ماتبون وحليلنا سمجتين ويالله نشلهم بس لما نرجع البيت نرجع مستانسين وثيابنا حدث ولا حرج من تشوفنا امي عيونها تلبق حمر بس لما تشوف السمج بيدنا ترد تلبق خضر فنرتاح




هذي بعض طفاستنا ايام المراهقة الصغرى
بنرد على المراهقة الكبرى في الموضوع الياي



مع تحياتي قوس قزح للديكور والتصميم
 
عودة
أعلى