غنَاتْيـے
مُصورَه فُوتُوغرَافيه ♥
- التسجيل
- 1 أغسطس 2005
- رقم العضوية
- 3845
- المشاركات
- 14,841
- مستوى التفاعل
- 4,076
- الجنس
- الإقامة
- بــوظَبيـے . . *~
.
.
.
.
الجزء الأول...!
๑ صباح الخير من بدري أحبك وأنت ماتدري وكيف أصبر على حبك وحبك نار في صدري ๑
بوظبي .. بيت أم راشد
الصبح ..الساعه 7 ونص..!
أم راشد : تريزا تريزا ويهد إن شاءالله شوفوي قوم حمده نشن ولا..!
تريزا : OK مدام اللحينه أنـا يشوف..!
* تريزا بشكارة العايلة من 15 سنة وتعرف طبايع وشخصية كل واحد فيهم وتكره فيصل لانه مطفر ابها دوم يسوي مقالب لها أول مالها تالي ودايما تقول انها بعد ماترد بلادها " الفلبين "
بتألف كتاب اسمه (تريزا ومعاناة 15 سنه ) *
حمده وفطيم وهن نازلات تحت يلاقيهن سهيل وهو ظاهر من حجرته ..!
سهيل : صباح الخير عفانا شو هالويوه وكل وحده الكشه تقول غاف..!
فطيم : مالي خلقك من صباح الله خير..!
حمده : صباح النور سهيل بتوصلنا ولا نسير ويا الدريول..!
سهيل : I'm Sorry أنا متأخر ع دوامي..!
فطيم : دومي اقول مامنك فايده ..!
حمده+ فطيم + سهيل ..يدخلون الصاله ع أمهم " أم راشد " ويحبونها ع راسها ويصبحون عليها..!
أم راشد : انتن بخبر عليكن راشد تسهرن لين نصايص الليل شرات السكنيات والصبح امره محد يروم يوعيكن ..!
فطيم : لالا دخيلج كله ولا راشد عيل وين فيصل ..!
أم راشد : سرح مدرسته ربج تتحرينه شراتج ..!
سهيل وهو يعدل سفرته في جامة المكتبه : أمايه فديتج صبي لي حليب ..!
أم راشد : وانت بعد متى البارحه ياي البيت ..!
سهيل : أمايه البارحه ضويت من وقت الساعه 11...!
فطيم : ياالجذب انا امس في الصاله اللي تحت يالسه ماشفت حد حدر ..!
سهيل يفر عليها قوطي الكلينكس : جب انتي يا الوشايه..!
أم راشد : يوز عن اختك ويالله فارقو..!
سهيل : خلاص يا الغاليه باجر من 10 بشوفيني منزرع في البيت..!
فطيم : ليش الأخ صرمــه..!
سهيل : يا الطويله حد قالج من قبل دمج ثجيــل..!
حمده لا تعليق تاكل كورن فليكس بكل هدوء وتبتسم ع مناقرة سهيل وفطيم اللي تكون بشكل يومي تقريبا ...!
حمده : يالله فطيم انقفضي اتخرنا اتلاقين البنات حدرن الصفوف وانا كلاساتي بدت..!
أم راشد : خلاف خلن الدريول يرد بسرعه هني أبى اسير المزرعه ..!
ويظهرون العيال كل واحد صوب شغله ..!
بعرفكم ع عايلة بوراشد " الله يرحمه " بشكل عام وسريع ..!
البكر : راشد عمره 26 يشتغل في شركته الخاصه ماخذ بنت عمه " عوشه" وعنده من العيال خليفه 3 سنين ونص في ال " " kj و سارة عمرها سنه ونص ...هو اللي اهتم بخوانه بعد ماتوفا ابوه عقب مانولد فيصل بسنه ..وماقصر عليهم بشي قد المسؤولية وله هيبه واحترام في البيت..!
عبدالله : عمره 23 سنه ملازم أول شغله شكل زامات بالنادر ماشوفه اسبوع في سويحان وشهر في دلما ومني ومناك.. حبوب وطيب ماخذ من ملامح أبوه الله يرحمه وحتى من شخصيته..!
من خلال القصه بتتعرفون عليه اكثـر..!
سهيل : يشتغل في الحرس الأميري عمره 22 سنه ماكمل ثنويه عامه لانه فاشل في الدراسه فأصر عليه أخوه العود راشد انه يسجل في الحرس الأميري بدل الهياته والمغازله ومب دايما يتحصل لانه بعد شغله ع شكل شفتات .. وهو نكته العايله ماتمل من سوالفه مشجع قوي ومتعصب لنادي العين على الرغم من خباله وسوالفه الا انه له شخصيه ثانيه شفافه بتبين مع الأيام..!
حمدة : 20 سنه ثالث سنه في الكليه رقيقه وجميله حساسه طبجتها بنت خالتها " اليازيه " ويوم يلتمون يسوون بلاوي ..!
فطيم : 18 سنه العدو اللدود لسهيل مايتصافون 5 دقايق جان الا في السالفه مصلحه شاطره في دراستها ماترضى تطلع الا الأولى دايما واثقه من نفسها شخصيتها قويه عكس حمده الخوافه
نوعا ما..!
فيصل : صف اول ثنوي هذا شيطان بشكل فضيع ومسوي أزمه لـ " تريزا " مع انه في البيت بشكارتين غيرها يحب راشد حب فظيع ويعتبره ابوه لانه هو اللي رباه ويحاول يقلده بكل شي حكمته السخيفه في الحياه ( الغبي غبي لو غسل شعره من النعناع )
مراهق بيمر بمواقف ومشاكل بنعرفها من خلال القـصـه..!
في الكلية ..الساعه 12 ونص
اليازية : حمدووه فقدج ياالدبه انزين منصور خاري بيوصلنا ليش انتي جيه نحيسه..!
حمده : لا والله عسب اذا درا سهيل يقصبني ..!
اليازيه : ياكثر ما أكره هالإنسان متحكم في كل شي وانتي بتركبين مع منو يعني الا ولد خالتج ..!
حمده : الله يسامحج يا امايه كل هذا في المزرعه تلاقينها سايره صوب عرب السمحه كلهم ..!
اليازيه : يالله عاده تأخرت عليه خلاف بيهزبني ..!
* اشل حمده كتبها وفايلاتها وهي تتأفف اذا حد درا من خوانها خاصه سهيل ياويلها تغشن وظهرن وشافو نيسان منصور واقف ويترياهن *
اليازية : السلام عليك
منصور : وعليج السلام الأميره ديانا من 7 دقايق اترياج شو تتعازمن ع الييه معايا..!
اليازيه : عفانا الله حاسبنهن انزين وكم ثانيه ...! لا بس هـذي ..! ولفت صوب حمده وحست انها بتتكفخ لو قالت شي ..!
منصور : شو بلاج قطعتي الحس هاذي منو ..شو رايكن مره ثانيه صلن استخاره قبل ماتركبن معايا..!
منصور يتحرطم عليهن وهو يحاول يطالع حمده من المنظره اللي جدام بس هي متغشيه ومن ركبت ما نطقت ولا بكلمة ..!
وقف منصور عند ادنوك " شييشة البترول "
منصور : حد يبى شي تغديتن ولا يواعا ..!
اليازيه : لا مانبى متريقات ..!
منصور : بنت خالوه ماحيدج بلما الله يرحم يوم تلعلعين وتضاربين معايه يوم كنا صغار ..!
*منصور شايف حمده يوم كانو صف ثاني عدادي ومايحيد شكلها وكان دووم يزلع ابها يوم تكون في بيتهم ..سرح بتفكيره دقيقه وقطع تفكيره صوت اليازيه *
اليازيه : هي صرصور نبى حلاوه
" منصور ايود اليازيه من ايديها ويعويها شو قلتي "
اليازيه : اي اي فجني اقصد منصور ..!
منصور : جان حمده بغت شي بنزل وباخذ لها ..!
حمده ساكته لا تعليق ..وفي خاطرها " شو بلاه مستخف هذا انا من كم سنه مارمسته واليوم يطالع من المنظره ويزلع بي شرات ماكنت يامنصور بعدك زلع وابتسمت حمده يوم اذكرت ذكرى حزينه واضحك في نفس الوقت "
نزل منصور ياخذ لهم حلاوه بعد مافقد الأمل في انه حمده ترمس شو بلاك يا منصور مابغيت تفكر الا بحمدوه ام كشه وسار خذ لهن ارونامين سي وجلكسي وشويه خرابيط ..!
منصور : دوكن هالحلاوه ماعرف عاده شو يعجبكن ع ذوقي هذا..!
اليازيه : كل شي منك حلو بس بدل هالشريط لوع بجبودنا ..!
منصور : يالله انطمي انتي شو دراج بالفن ..بتخبركن اخطف ع فطيم وغايه ولا ماخلصن دوام ..!
اليازيه : لا المدارس بعدهم ع 1 ونص تقريبا لين هذاك الوقت قده الدريول راد مع خالوه ..!
منصور : حليلج ياخالوه متعبله مع هالمزرعه وانتن كل يوم تخلصن 12 ونص..!
اليازيه : هي كل يوم الا انتو الشباب مقصه ..!
منصور : اي مقصه يلعن شكله الاستاذ اليوم كنت بصنه بكس اونه تسليم البروجكت باكر وايد يباله شغل ساعدّني ..!
اليازيه : ها حمدووه نساعده ولا شو ..!
حمده : إن شاءالله..!
*منصور في خاطره يعلني افدا هالصوت واخيرا تنطقت ذاب من صوتها اللي في بحه مميزه والكل يميزها منه...منصور انتبه لعمرك شو يعلني افدا هالصوت *
وصلو بيت حمده وفجت الباب بتنزل ...!
اليازيه : حووووو لا تنسين بخطف عليج العصر عسب نسوي حق منصور البروجت..!
حمده بخجل ماينسمع حسها : ان شاءالله اترياج
منصور : الرب حافنظج ..سكرت حمده باب السياره بدون ماترد عليه ..!
تم يراقبها منصور وهي تمشي لين وصلت باب الصاله وماشاءالله ع حمده وطولها وعايلة بوراشد كلهم طواال خاصه شبابهم عليهم طول رهيب ..!
وحرك منصور وتوه بيظهر من الدروازه شاف سيارة سهيل نزل وسلم عليه ..!
تخاشمو واليازيه متغشيه واشوف سهيل بنظرات من داخل السيارة سوت له اسكان من فوق لين تحت..!
اليازيه .. هـذا سهيل والله والأيام دواره احلو زياده هاذي سمارته ويوم نسير صوب بخا واليادي تزداد ويغدي خال وحياته المقارين اللي دوم معذبتني ومحطي تقويم من متى حمده الخامه ماقالت لي عسب اعيب عليه والله زايدنه حلاوه بس بعد اكرهه هالديج دوم متسلط ومتشدد وأخ اذكر كان دوم يمط شعريه السبال ..!
سهيل : اقرب انزين تغدا عندنا ..!
منصور : لا فديت خشمك وديه ثانيه معايه اليازيه بسير البيت اكيد العيوز تتريانا اللحينه بطينا عليها..!
سهيل : خلاص عيل بشوفك اليوم في الكوفي ..!
منصور : خلاص تم نتلاقى المسا في المارينا ..!
سهيل : الرب حافظنكم سلم سلم ع خالوه ..!
منصور : سلامن يبلغ فمان الله
حمده يوم وصلت الطابق اللي فوق وايقت من الدريشه تمت تتنافض يوم شافت سهيل يرمس منصور قالت اكيد الحينه خبره انه كان هني عسب يوصلني ياويلج ويلاه ياحمده انزين انا شو لي خص هاي امايه الله يهداها..!
بدلت ثيابها وغسلت وصلت الظهر وقعدت ع كرسيها الهزاز مغمضه عيونها وتهزر بالكرسي وتعيد شريط ذكرياتها يوم كانو صغار وكانو دوم في بيت خالوتهم الوحيده تلعب مع منصور واليازيه وغايه ومايد وماتنسى حميد اللي مسافر تبع المشروع البريطاني والكل ينتظر رجعته خاصه ( ...... ) ..أيام حلوه ..كنت وايد متعلقه بمنصور بس ماكان يخليني العب معاهم وخاصه يوم يلعبون " قبه " ويدور اي سبه عسب يصارخ عليه..!
وبعد ربع ساعه يندق الباب بقو ويدق قلبها معاه ..الله يستر هذا سهيل ..ادخل..!
كسميني : حمده انزل غدا كلو تحت حتى بابا راشد ..!
حمده : لله يخسج يا الدفشه حد يدق الباب جيه مره ثانيه خلي تريزا ولا ميري يجي انتي تخوفين..!
كسميني : انتي شو يقول كله جنجال سيم سيم بابا سهيل..!
حمده : اووه سيري سيري فارجي ..!
شو رايكم في الجزء الأول ..ادري مافيه احداث بس استمر ولا..!
أحب أقرا القصص بشكل كبير ولكن هذي أول بدايه لي في الكتابه..!
أنتظر آرائكـــم..!
ولا تحرموني من ردودكم الطيبــه..!
.
.
التعديل الأخير بواسطة المشرف:
