غناتي..سلوشتر

بسم الله الرحمن الرحيم..

السلام عليكم ورحمة الله وبركاته..

بما أن الأخت غناتي طلبت درس عن السلوشتر.. وعشان نوفي الدرس حقه من الشرح.. مانقدر نخليه من ضمن دروس الدورة..لأنه يباله تفصيل.. والدورة مختصرة نوعا ما تجنبا للأطالة..
فقلت أخصص درس مستقل يقدر الجميع يستفيد منه..والإستفادة الكامله بتكون إن شاء الله بعد متابعتكم للدورة عشان في مصطلحات بسيطة لازم تكونون ملمين فيها..

السلوشتر..أو التعريض الطويل.. تقنية في التصوير تستخدم أساسا لتعويض النقص في الإضاءة .. ويستخدمها المصورون أيضا لإضافة لمسة جمالية على صورهم لجعلها نابضة بالحياة.. وأحيانا لإبراز حركة الكادر المراد تصويره..
بعيد عن المصطلحات المعقدة بشرحها لكم ببساطة..
يوم تضغط على زر التصوير شو تسمع..كليك..صح..
هذا الصوت ناجم عن حركة الغالق..أحيانا تضغط على زر التصوير وخاصة في ظروف الإضاءة المنخفضة يعني الوقت مظلم شوي تسمع أن صوت الكليك تأخر خاصة في الكاميرات البسيطة من نوع صوب وصور واللي يستخدمها أغلبكم..يعني مب كاميرات الأس أل آر..خاصة إذا كان اللي يصور مخلنها على الوضع الأوتوماتيكي..
ويوم تستعرض الصورة في الكمبيوتر تشوفها مهتزة ومافيها وضوح نهائيا خاصة أن أغلبكم مايستخدم الحامل الثلاثي..طيب ليش..!!!!
الجواب بكل بساطة أن الكاميرا تعوض النقص الحاصل في الإضاءة بإستخدام غالق بطيء أو سلو شتر..

فهمنا شو يعني السلو شتر.. طيب كيف أستخدم السلوشتر لإضافة لمسة جمالية على صوري..

هناك أشياء يجب توفرها للحصول على لقطة سلوشتر مميزة..
أول شي الحامل الثلاثي..أو الترايبود..ماعندك لا تتعب نفسك..لأنك لو مااستخدمته بتحصل أفضل صورة مهتزة وغير واضحة المعالم على مستوى العالم..أستويت شاعر..:^^:



ثاني شي مايصلح تاخذ هذا النوع من اللقطات في حالات الإضاءة الجيدة ..لكن لا تفقد الأمل هناك حيلة بسيطة تقدر تفوز بواسطتها بلقطة سلو شتر في عز الظهر..بكل بساطة أستخدم فلتر N-D وهذي صورته..



للي مايعرف هو عبارة عن غطاء زجاجي قيمة النوعية الجيدة منه ماتتجاوز 200درهم في المحلات الكبرى أو أي محل يبيع مستلزمات التصوير..وشغلته أنه يقلل الإضاءة الداخلة للكاميرا مما يعطيك الحرية لأستخدام سرعة غالق بطيئة نوعا ما..
وتختلف درجاته يعني في الغامق والفاتح شوي ويتقسم كالتالي..2x - 4x - 8x..( من فوائد فلتر الـــN.D آيضا تركيز الألوان - يعني تشوف السماء أكثر زرقة والأشجار أكثر أخضرار..وخاصة للي يصورون الظهر أو في جو الإمارات في الصيف والغبار - نصيحة من القلب لاتفوتونه..واخذوا ( 4x ) وبتشكروني بعدين)
بعد فلتر البولرايزر يقوم بنفس المهمة وإن بدرجة أقل ..ولكن فائدته في تقليل الأنعكاس عن سطح الماء أو الزجاج ( هالفلترين تقريبا لازم يكونون أهم شي في عدتك بعد الكاميرا والعدسات)



ثالث شي في ظروف الإضاءة المتوسطة تقدر تستخدم أصغر فتحة عدسة تسمح فيها عدستك يعني إذا كانت أكبر فتحة عدسة عندك f-2.8 وأصغر فتحة f-22 تخليها f-22 وتخلي الآيزو على أقل قيمة تسمح بها الكاميرا وتعوض النقص بإستخدام السلوشتر..

ماعرفت تضبط.. لا تتعب نفسك.. أختر وضعية أولوية الغالق رمزها TV في الكانون و خل سرعة الغالق 3ث مثلا يعني ثلاث ثواني أو 2ث أو أكثر لو شفت أن مؤشر ضبط الإضاءة مب في النص ..والكاميرا بتضبط الباقي..



يستخدم السلو شتر لإضافة مظهر حريري يوحي بالحركة للشلالات وأمواج البحر والأودية الناتجة عن هطول الأمطار..



أيضا يستخدم عندما تود أن تظهر حركة جسم ما بإستخدام تقنية الملاحقة (تطويق الحركة ) أو (panning)..



أيضا يستخدم لإضافة لمسة فنية على حركة السحب والنجوم بإستخدام غالق بطيء قد يستمر ساعات..



وهناك أستخدامات أخرى كثيرة نقتصر على ما ذكرناه منها..

أتمنى أكون قدرت أوصل لكم الفكرة..
وأي أستفسار أنا حاضر..

والسموحة على القصور..

رد: غناتي..سلوشتر

والله الدرس جميل وحلوو


واستمتعت ف قرايته واستفدت الصراااحه الكثير



عندي سؤال لك يا ولد العم ~


بالنسبه للفلاتر انا ما اعرف عنها شي بس خذيت فلتر واحد واحس ما منه فايده

تعرف ليش لانه عادي شفاف ما عليه مخفي ولا لون ~ بشو اقدر استفيد منهـ ؟




والسموحه



امرؤ القيس

رد: غناتي..سلوشتر

حياك بن عمي..

بالنسبة للفلاتر مثل ما قلت في الشرح..

أهم فلترين لازم يكونون في عدتك .. فلتر الــnd وفلتر الــ بولاريزر ..

الأول يفيدك وايد في تركيز الألوان وإظهار التباين.. والثاني يفيدك في تقليل الأنعكاس من سطح الماء والواجهات الزجاجية للبنايات والمحلات والسيارات حتى..

بالنسبة للفلتر الشفاف اللي عندك مهم جدا.. حيث أنه يقوم بحماية زجاج العدسة من الخدش والكسر ..

كانت عندي عدسة الكانون من 70-200مم تيليفوتو..قيمتها بحدود 7000 وشوية وكنت مركب عليها فلتر الحماية.. وسبحان الله مرة كنت مركب الكاميرا على الترايبود وانشغلت شوي.. وطاحت الكاميرا مع العدسة ..بس الحمد لله أنكسر الفلتر وماصار شي للعدسة.. تخيل لو فلتر الحماية مب مركب عليها شو ممكن يصير..
بعد فايدته يقلل من الأشعة البنفسجية واللي تأثر على العين..

إن شاء الله أكون قدرت أفيدك بشي..

رد: غناتي..سلوشتر

الله يحيك ~

الصراحه استفيد منك الكثير ~ بالنسبه للفلترين المهمين باخذ وبجربهم ~


والشفاف للحمايه زين خبرتني توني ركبته على العدسه ككك ~



مشكور وما قصرت ~ وربي يحفظك ~



امرؤ

رد: غناتي..سلوشتر


♥
♥
♥
♥

مشرفنا الفاضل / غيث ..^_^

ما شاء الله عليك ..
دكتور تصوير..
و الصراحة استفدنا منك..
يبالنا نشتري كيمرا مال المحترفين شراتكم ...
بس مب احين ..
لما افضي ان شاء الله
^_^

و الله يعطيك العافية..♥
♥
♥
♥
♥

رد: غناتي..سلوشتر

امرؤ القيسے قال:

الله يحيك ~

الصراحه استفيد منك الكثير ~ بالنسبه للفلترين المهمين باخذ وبجربهم ~


والشفاف للحمايه زين خبرتني توني ركبته على العدسه ككك ~



مشكور وما قصرت ~ وربي يحفظك ~



امرؤ

أنقر للتوسيع...

بالتوفيق إن شاء الله بن عمي..

رد: غناتي..سلوشتر

•●Ł7n๑ДŁm6r●•

مشكورة أختي على الكلام الطيب..وحسن الظن..

إن شاء الله تتوفقين في كاميرا زينه..

الله يعافيج..

رد: غناتي..سلوشتر

رد: غناتي..سلوشتر

,

أستاذ أبومحمد
.
الله يعطيك الصحه و العافيه
مساء النور و السرور~
.
درس جميل الصراحه و شرحك للدرس
مفهووم مب معقد نفس الاخرين . و ان شاء
الله بتشوف تطبيق للدرس قريبا . بالتوفيق

رد: غناتي..سلوشتر

الرائعة رهف..
منورة الموضوع..

ياصبرج الصراحة.. يعني لين ألحين ماعرفتي لأزرار الكاميرا اللي عندك..
كملت سنه على ماأظن ألحين..
متى ناويه تتعلمين إن شاء الله..

الظاهر أني بنزل درس خاص في الــg9

ومشكورة على المرور..