ضاعت ... (قصه محزنه )

[شهلة]

السلام عليكم ...

هاذي القصه قريتها وشفت فيها عبره حلوه .. ووين يوصل مسمى الحب وكيف ياثرون رفيقات السوء .. اتمنى من كل اللي يقراها انه يستفيد منها ...




الجزء الاول ...



روضه بنت حلوه وبنت ناس وهلها ربوها احسن تربيه، لكن الايام غيرتها.. ؟؟؟
ألام : رويض فجي الباب يلا قومي وراج جامعه .. رويض رويض؟؟ يلا امايه نشي تعبت تراني منج ، ايديه عورتني من الدق على الباب .
روضه تتحرطم: أوف شو هل الحالة متى الله بيفكني واعرس ، وافتك من نشت الصبح ومن الجامعة
ألام: روضه بتقومين بأدبج ولا شو؟
روضه: انشااالله يامايه ، اوووف مب حاله، قلت لج يوزني و فكيني من الصدعه.
نشت روضه وغسلت ويها واتلبست بكل ضيج وقرف، وسارت الصالة عشان تتريق، دشت وسلمت على ابوها وامها واخوانها، وكلت لقمتين وركبت السيارة عشان اتسير الجامعه ...
في الجامعه
حصه: روضه شحالج ؟ شو بلاج جالبه ويهج
روضه: سكتي عني ياحصه ، الجامعه ملل ومب عارفه شو اسوي بعمري ؟
حصه: شو رايج ادشين الجات ؟؟!!!!
روضه: لالالا ياحصه؟ انا اخواني مانعين عني هالسووالف ؟
حصه : منو بيدري محد؟؟ جربي واتعرفي لج على كم ووواحد، قصي عليهم، واذا عيبج واحد عيشي معاه قصة حب احلى عن قصة قيس وليلي
روضه: انتي شو اتقولين ؟ اتعرف على كمن واحد، لا عيب البنت المتربية ما تسوي جي
حصه:ياروضه أي تربيه واي خرابيط، حبيبتي هذاك اول الي البنت عيب انه ترمس ريال غريب الحينه عادي ، لازم يكون فيه تعارف واختلاط ..هاذي الدنيا الحنيه .. دنيا التطور
روضه: التطورر مب يعني قلة أدب ؟؟
حصه: حبيبتي انتي شو بتسوين يعني الي بترمسنيه لا يعرفج ولا تعرفينه، عادي مجرد تسليه، انتي جربي بس هالمره .. صدقيني ما بتخسرين
روضه: ....مادري ياحصه؟؟؟
دشت روضه الجات بعد إلحاح حصه عليها ، وما كانت اتعرف انه اغلى صديقه عندها بتكون هيه السبب في ضياع مستقبلها ...
تكرر دخول روضه الجات، ادمنت شي اسمه جات،وبالذات عشان اترمس شخص نكه روح قلبي، اتعلقت فيه من دون ما اتحس صار حياتها..
روح قلبي : اتصدقين يا المزيونه أنا إذا أدش الجات وما القاج سيده اطلع.
المزيونه : والله صدق؟ لهاي الدرجه انته متعلق فيه.
روح قلبي : متعلق وبس، أنا هيمان فيج .
المزيونه : بس انته ما تعرفني ولا تعرف اسمي ولا شكلي حتى .
روح قلبي : من كلامج بس عرفت عنج كل شي؟؟ ممكن اطلب منج طلب؟
المزيونه : امررر ..
روح قلبي: ممكمن اتسووي لي أد على المسن ، عشان اقدر اكلمج على راحتي أنا و انتي وبس ؟
المزيونه : مادري ؟؟
روح قلبي: صدقيني صدقيني ما بتجاووز حدودي ، بس دام احنا اتعلقنا في بعض خلينا انعرف بعض اكثر .. ارررجوج لا اتكسرين بخاطري وقلبي.
المزيونه: خلاص ..
روضه ما كانت اتعرف انه روح قلبي ، هو ولد خالة حصة وكان شايف صوورتها عند حصه ، وعيبته واتفق مع حصه على هذا كله ..
روضه قامت ماتودر اللاب توب اربع وعشرين ساعه عليه في البيت في الجامعه ، حتى الحجره ماتطلع منها ، اهملت دراستها ونست وجود هلها ، حتى ربعها ماقامت تسال عنهم ، إدمانها على المسنجر وحبها لروح قلبي نساها كل شي ..
حصه: روضه ابا اقولج شي بس اخاف تزعلين ؟
روضه : لا قولي لااتخافين ؟
حصة: تراني اعرف منو روح قلبي ؟ هو ولد خالتي ؟
روضه : شووو؟ حصه: لحظه لحظه ياروضه ؟ هو سالني اتعرفين وحده نكها المزيونه قلت له هيه.. اتصدقين انه اتخبل يوم عرف اني اعرفج قام يسالني شقايل شكلج حشرني .
روضه وهيه مستحيه : صدق ؟؟؟
حصه : الصراحه هو اليوم بيمر عليه الجامعه ، بس عشان يشوفوج
روضه : لا ياحصه انتي شو اتقولين .
حصه : انا ماقلت رمسيه انتي اكيد في خاطرج اشوفين منو هذا روح قلبي الي يحبج
روضه : بس ياحصه انا احس جي اني اخون هلي ؟
حصه : سالم يارويض يحبج ، قال انه حب طريقة كلامج على المسن، وسبحان الله اذا حب شكلج بعد .. يمكن يخطبج .؟؟ و يستوي ريلج
روضه :هو اسمه سالم ؟؟ ويبغي يخطبني انااا ؟؟؟
حصه : هيه يخطبج انتي ، سمعي كلامي وما بتضعين يا رويـــض
روضه : تم يا حصيص.
تمت روضه على اعصابها لاخر الدوام وماصدقت يخلص الكلاس، وشلت بعمرها هيه وحصه عاد اونها بتوصل حصه عند الباب.. وطلعت برع وشافته ، شافت سالم انبهرت فيه وبوسامته وبسيارته الكروزر ورقمها السياره بو555
البنت راحت فيها وسالم يوم شافها ويا حصه عرف انها روضه ، ابتسم لها ابتسامه خلت روضه ماتعرف وين اتودي ويها
ردت روضه البيت وهيه هيمانه وسرحانه
الام : روضه ، روويض ، روضه .. امايه شو بلاج ، روضه وصمخ انشااالله
روضه: ها يااامي
الام : شو بلاج جي متخاديه، تراج هل الايام موول مب عايبتني لاترمسين ويانا ولاتيلسين الا يالسه في الحجره وصاكه على عمرج الباب
روضه : ما بلايه شي يامي،مشغوله شوي بالدارسه
الام : انزين يلا سيري بسرعه اتلبسي واتعدلي واكشخي
روضه : ليش بنسير مكان ؟؟ مافيه يامي ورايه شغل على الكمبيوتر
الام : لافديتج قوم عمج بيوون ، وبيي وياهم سعيد ولد عمج
روضه : عني بلا هالطاااري ، اووف مابا مابا بيلس في حجرتي احسن دام سعيد في السالفه
الام: انطمي طمج الله ، مب على هواج سعيد ولد عمج وانتوا محيرين لبعض ومن انتوا صغار ، سيري اتلبسي الحينه بسرعه ولا والله لو يوصل خبرج عند ابووج
روضه : ياااربي .. انزين انزين
دشت روضه الحجره وسيده على النت وفجت المسن ويالسه على نار تترايا روح قلبي.
دش روح قلبي: هلا والله بالمزيونه صدق انج مزيونه ، انا اليوم ما برقد فليل؟؟
روضه : استحي ، انتي ليش ماخبرتني انك ولد خالة حصه ؟؟
روح قلبي : انا والله روحي كنت ماادري بالصدفه جي يوم اتخبرتها عن النك والايميل قالت انج اعز ربيعه لها ، اتعرفين هذا من حظي والله انج طلعتي اتعرفين بنت خالتي حصوه.
روضه : صدق يا سالم ؟
روح قلبي: ياااووويلي انا على اسم سااالم اول مره ينكتب اسمي بهاي الطريقه الحلوه ياليتني لو اسمعه ؟؟
روضه : تسمعه ، لا ياسالم لهني وبس، خلنا على المسن وانشالله بتسمعه يوم بنكون من نصيب بعض.
روح قلبي : ارجوج ياروضه مره و حده بس مره وحده .
روضه : لا ياسالم اسمع انا بطلع الحينه ، لانه قوم عمي بيوون بدش عقب شويه .
روح قلبي: بتررراياج على احرر من الجمر .
اتلبست روضه وطلعت بتسلم ، اول مادشت الصاله جافت سعيد ، سعيد ولد عمها كان يحبها حب صادق وكان فعلا يتمناها اتكون زوجه له ويعد الايام والليالي لهذا اليوم ..
بو سعيد : هلا بنتي هلا شحالج ؟
روضه : الحمدالله ياعمي انته اشحالك .؟ يو سعيد : الحمدالله
ام سعيد : حيالله العرروس ، حيالله مرة ولدي . روضه بصوت واطي : تخسين انتي ولدج .
روضه : الحمدالله ياخالوا انتي شحالج . ابو روضه : ماسلمتي على سعيد.
روضه من ورا خشمها : هلا شحالك . سعيد :بخير والله متولهين شحالج وشو الدارسه .
روضه : بخير بخير .. اسمحولي انا بترخص عنكم ورايه دراسه .
سعيد : تو الناس ياروضه ، مايلسنا وياج . روضه : مره ثانيه .
ربعت رووضه على الكمبيوتر ودشت على المسن
المزيونه: هلا سالم، اتاخرت عليك .
روح قلبي: هيه وااايد ، لو مادشتي الحينه جان مت .
المزيونه : اسم الله عليك انا ولا ا نته .
روح قلبي : ياااويلي، ياويلي ، ياويلي ما اقدر استحمل هل الكلام شويه شويه عليه .
المزيونه : سالم أنا استحي ؟
روح قلبي : فديت الي يستحووون والله ؟؟ أووويلي أنا

 

[ساحر القلوب]

رد : ضاعت ... (قصه محزنه )

يعطيج العافيه شهله على هالقصه
وانشاالله دوم هالتواصل والجهد الطيب

ساحر القلوب

 

[شهلة]

رد : ضاعت ... (قصه محزنه )

هلا والله ...

عاش من شافك اخوي ساحر القلوب ..

تسلم على طلتك الحلوه ومرورك الكريم ..

اختك .. شهله ..

 

[شهلة]

رد : ضاعت ... (قصه محزنه )

الجزء الثاني ..

المزيونه : سالم تدري اني محيره لولد عمي ؟؟
روح قلبي : شو ياروضه ، لولد عمج ؟؟ شو يعني ..
المزيونه : هذا الشي مب مهم ، انا من عقب ماعرفتك وبالذات من عقب ماشفتك اليوم ما ابغيه صدقني.
روح قلبي : بس اكيد قبل كنتي اتفكرين فيه على اساس انه حبيب وزوج .
المزيونه : يمكن ، بس هالشي عادي لانهم دوم يقولون سعيد لروضه وروضه لسعيد ، بس صدقيني الحينه ما يهمني ، انته وبس .
روح قلبي : اسمه سعيد ، هب حلو اسمي احلي .؟!!!
المزيونه : اسمك احلي وانته الاحلي و الأغلى بعد .
روح قلبي : أووويلي ويلالالالالالاه .
المزيونه : اقولك باي اخوي يزقرني .. باي
ناصر: انتي وينج انبح صووتي وانا ازقرج .
روضه : ها لاماشي كنت ادرس . ناصر : كنتي تدرسين ولا على النت .روضه : لا ترا هو عندي بحث . ناصر : انزين يلا تعالي اتعشي ، بعدين تعالي بخبرج شو هالمذهب الي فيج سلمتي ودشيتي الحجره ، وخليتي بنات عمج .روضه : امم ترا الدارسه و .. ناصر : بس خلاص مادري شو من دراسه هاي الي يقول الحينه دكتوراه ؟
وسارت روضه بتعشا ولقت هلها كلهم يالسين ويتريونها . ام روضه : وينج حشا من يتي وانتي في الحجره ، لا اتعبين عمرج يا أمي بالدارسة مايسوي عليج .
ام سعيد : هيه فديتج مب زين جي ، وراج عرس انتي .
روضه اطالعهم وهيه ميته قهر، خربوا عليها فقيره الكلام مع حبيب القلب .ابو سعيد : روضه يابنتي انا وابوج نتشاور انه انخلي عرسج انتي وسعيد عقب شهر .
روضه : شوووه ، عرسي انا وسعيد ، لاياعمي ودراستي احنا تونا بادين السنه
ناصر : يوم الريايل يتفقون انتي مالج كلمه . ابو روضه : لاياناصر اختك من حقها تدرس ، سمعي ياروضه سعيد ما بيمنعج عن الدراسه عرسي وكملي ، ولا شو رايك ياسعيد
سعيد : أكيد يا عمي ، أنا مستعد وحاضر لأي شي تبغيه روضه .
روضه : اذا انته مستعد وحاضر اصبر لين هاي السنه ماتخلص وعقب يستوي خير .
سعيد : بس ياروضه لين متى التاجيل ، عموما انا ابغي راحتج ما بغصبج .
ناصر : سعيد ما عليك منها انته متى تبغي قرر وخبرنا . روضه : ناصر لو سمحت هاي حياتي .
ناصر : اشوف لسانج وايد طول.
ابو سعيد : بس احن مالنا حشيمه ، اسمعي ياروضه العرس بيكون عقب اسبوع من نهايه هاي السنه احنا الحينه في شهر 10 والدارسه بتخلص شهر 6 يعني العرس شهر6 ، اعتقد مالج حجه ثانيه .
روضه : ابـــويه؟؟ ابو سعيد : شو يا روضه؟؟ روضه: خلاص الي تبونه ، عن اذنكم بسير الحجره .
سعيد : عمي شو بلاها روضه ، يمكن هيه ماتباني لاتغصبونها على شي هيه ما تباه .
أبو روضه : لا يا سعيد لا تقول هالرمسه روضه لك و انتوا محيرين لبعض من زمان ، وما عندنا بنات يظهرون عن شور هلهم ، إلا أخاف انته غيرت رأيك .
سعيد : لا ياعمي والله انا ودي اليوم قبل باجر .
بو روضه : خلاص عيل بالبركه .
روضه دشت الحجره وهيه اتصيح ، خلاص حلمها بولد عمها انتهي ، قلبها الحينه لسالم الغاوي الي انبهرت بكلامه وبشكله بس هيه ما سالت نفسها هل هو فعلا جاد ؟؟ روضه نست اتكفر بوايد اشياء ..بس الشي الوحيد الي ما نسته سالم ..
يرن موبايل روضه .. حصه : الو .. روضه فين ؟؟
روضه : ......؟ ماترد .. حصه : رويض شو بلاج ردي عليه ؟
روضه : الحقيني يااحصه يبغون يزوجني لسعيد ، انا ابغي سالم ماقدر اعيش من دونه .
حصه : لاه افا ، انزين عادي ، خذي سعيد وحبي سالم ها ها ها
روضه : انتي وايد سخيفه تراج . حصه : الحينه هالساعه بخبر سالم انج زعلانه .
روضه : لا لا حرام مابغيه يزعل ويضايج . حصه : عيني على الحب. يلا يلا خليني اتصل بسالم باي.
حصه سكرت واتصلت بسالم .. حصه: الو سلملم .
سالم : سلملمين .. حيالله حصوه . حصه : شو اتسوي ؟
سالم : شو اسوي بعد اغاززل ؟ حصه : الحق روضه من صدقها حبتك ، وهلها يبغون يزوجونها لولد عمها وهيه ما تبا .
سالم : والله وطحتي ياروضه ، مسكينه اكيد انتي فرحانه ياحصوه ؟
حصه : اكيد .روضه طول عمرها الكل يمدحها ويمدح اخلاقها ، خلهم ايوون ايشووفونها الحينه .
سالم : حصه جنج اتغارين منها وايد وتبغينها تستوي شراتج في مستواج الاخلاقي ؟
حصه : عن الغلط ، انته مب شفتها وعيبتك وقلت انك تباها ، هكي عندك العب عليها وخذ الي تبا منها ويوم بتشبع فررها مثل الجلبه .
سالم : دام انج جي تبين انا حاضر ، الصراحه روضه وايد حلوه ، وانا الصراحه ....؟؟ اظني فاهمتني ، انتي عطيني رقم الموبايل ويوم بخلص من المغازل بتصل .
مسكينه روضه كانت تعتبر حصه اعز صديقه ، بس حصه كانت طول حياتها تكره روضه ، لانها حلوه ومِؤدبه وبنت ناس وايد بنات يتمون رضاها وحبها.
روضه يالسه على الشبريه وتترايا حصه تتصل، فجاه وصلها مسج من سعيد مكتوب فيه ( أذوب فيك وانته مهملني والعب على نفسي واقول الحينه بيكلمني )
روضه : وايد متفيج هالسخيف انا الحينه براويه . طرشت له مسج مكتوب فيه (ما يحرك ساكني مثلك بشر ...انته رمشه من عيوني لو تطيح ..وش ترى صاحبها لو طاحت خسر) لانه سعيد كان فعلا يحبها رد عليها : ( مهما جري منك وصار انا تراني في انتظار صابر على ماهو جرالي اطريك في ليل ونهار )
رن موبايل روضه وشافت رقم غريب ماردت ، عقب شويه وصل مسج مكتوب فيه : اتصل بي تسلم عيونك .. مايطيق القلب هجرانك .. الي انتي روح قلبه سالم .
نشت روضه من على الشبريه وقامت اتناقز من الفرحه ومن غير ما اتحس اتصلت ، ونست تربيه هلها لها ، نست امها وابوها ، نست سعيد ، واتصلت في سالم
روضه : سالم ,,
سالم : روورضه يااا بعد عمري انا ..
روضه : اتولهت عليك وووايد وايد وايد ، انته وين عني الحقني سالم هلي بيزوجوني لولد عمي .
سالم : خبرتني حصه ، بس ياروضه انا شو بأيدي أسوي .؟؟
روضه : تعالي اخطبني من ابويه .
سالم : بس انتي محيره لسعيد والعرس اتحدد .
روضه : انته تعال وانا ببيع الدنيا ومافيها على شانك .
سالم : بس ياروضه ..؟
روضه : الظاهر اني كنت مخدوعه فيك انته بس تبغي تتسلى ، كلكم جي نفس الشي بس تبون تلعبون .
سالم : لاه ياروضه ، انا احبج احبج احبج ، بس ظروفي ما اتساعدني الحينه ؟
روضه : انا مابغي أي شي لو نسكن في الشارع ، بس اكون لك وانته لي .
سالم : احنا خلينا الحينه نستانس مع بعض ، اعتبريني انا مثل ريلج وانتي حرمتي ، ولين يوم العرس الله بيحلها ، دام انه نحن انحب بعض ماشي بيفرقنا غير الموت .
روضه : صدق ياسالم انته عمرك ما راح تتركني ؟
سالم : اكيد وانتي شاكه بهالشي ؟؟
روضه : انا الحينه برقد وانا مرتاحه ، وسعيد انا بعرف كيف اطفشه ؟
سالم : وانا وياج ياروضه لو تبغين أي مساعده انا حاضر .
روضه : أنا ابغي بس حبك و إخلاصك .
سالم : ياااولد .. عيوني انتي لج كل الحب والإخلاص الي في هاي الدنيا .

روضه : يلا سالم بسكر عنك انا الحينه ، الوقت أتاخر.
سالم : افااا ، بعدني ما شبعت منج .
روضه : معاليه باجر انشالله .
سالم : باجر بمر على حصووه ، بترراياج براع يلا ياعمري مع السلامه .
ويا اليوم الثاني وسارت روضه الجامعه ، وهيه مول مسطله تبا ترقد مب من شي من السهر على التليفون ..
ريسه : ررروويض حبيبتي ، انتي وين قطعتي مره وحده .
عويش : هيه والله صدق ، إلا ويا حصووه السخيفه أربع وعشرين ساعة .
روضه : انا هني ، وبعدين ياعويش حصوه هب سخيفه .
عويش : بخبركم برايكم انا عندي كلاس اشوفكم بعدين .
ريسه : روضه اشوفج هل الايام وايد متغيره ولا تينا ولا تسالين عنا ، حصه خذتج منا .
روضه : شو خذتني بعد ؟؟ انتوا كلكم ربعي وغالين عليه .
ريسه : انتي متاكده انه حصه صدق ربيعتج ؟
روضه : شو قصدج يا ريسه ؟
ريسه : انتي اتعرفين انه حصة سمعتها موول هب زينه ، والكل يرمس عنها ؟
روضه : الناس شو وراهم غير الرمسه ، حصة ما بلاها شي ؟
ريسه : لا بلاها ، انتي اتعرفين انها اكبر مغازلجيه ، وانها وايد فري ، وهلها مخلينها على هواها ، ليش اتخربين سمعتج عشان وحده شراتها .
روضه : ريسه انتي اتغارين من حصوه عشانها ويايه ، حصه ما بلاها شي ، بعدين عشانها اتحب يعني مغازلجيه؟
ريسه : روضه شو هاي الرمسه ، شو تحب ما تحب ، من متى انتي تفكيرج بهاي الطريقة ، صدقني يا روضه ان ما ودرتيها لا اخبر امج .
روضه : شو يعني اتهددني ، انتي ما يخصج فيه انا كيفي ؟؟
ريسه : انا ما يخصني فيج ، انا ربيعتج وبستوي مرة اخوج مايخصني فيج؟
روضه : اكبر غلطه في حياتي اني اقنعت امي تاخذج لاخويه ، يالتني لو اقدر اصلح هالغلطه .
ريسه : انتي عمرج ما كنتي جي ، من متى ترمسين بهاي الطريقه .؟
روضه : اوه ، مستوتلي الداعووق ، فكيني من الصدعه يلا يلا برايج .
ريسه : ياالله ياروضه الحينه انا استويت صدعه ، الله يسامحج .
روضه : الله لا يسامحني اوكي .
ومشت روضه عن ريسه، وريسه واقفه اطالعها والدموع في عينها ، ليش روضه الانسانه الرائعه وصديقة الطفولة كلمتها بهاي الطريقه ، شو هالتغير العجيب الي صار فيها ، ياتري شو السبب ؟
سارت روضه كلاسها ولبست السير وايلست اترمس روح قلبها سالم
روح قلبي: انته الدنيا وكل شجوني .. واغلى شي بعيوني يا حبيبي
المزيونه : هذا كله حقي أنا ؟؟!!
روح قلبي : صدقيني الكلام مايعبر عن الي في خاطري .
المزيونه : اتصدق متوله عليك في خاطري اشوفك .
روح قلبي: شو رايج اليوم تتاخرين وتخلين الدرويل يسير،وعقب سووي لامج تليفون وقولليها انج بتردين ويا اربيعتج ؟؟
المزيونه : لالا اخاف ياسالم اذا رديت وياكم حد يشوفوني ؟
روح قلبي : لا اتخافين سيارتي مخفيه ، وبخلي حصه تيلس ورا ، وبيتحروني انا الدرويل
هندي مستعرب ههه
المزيونه : بس ياسالم ؟؟ ماعرف ماجد في حياتي سويتها وركبت ويا ريال غريب؟
روح قلبي : افا انا غريب، لو اتحبيني صدق بتيين اليوم ويا حصه ، واذا مايتي انسيني احسن لج
المزيونه : لا لا انا احبك وبثبتلك هالشي، اترياني اليوم ويا حصه
حصة: ها يا ياروضه مستعده ؟
روضة : والله ميته من الزياغ عن حد من خواني يشوفني وبالذات ناصر ، بس في نفس الوقت بتخبل عشان بشوف سالم وبنكون انا وهو في نفس السياره .
حصة : ها ها ها والله انتي ياروضه مسكينه ؟؟!!
روضه : انا مسكينه ليش ؟؟ شو قصدج يا حصه.
حصة : لا ، اقصد مسكينه لانج تحبين ، يلا نطلع قبل ما ايي سالم .
وصل سالم وركبت روضه وحصه، وكانت طايره من السعاده ، وطول الدرب وهيه عينها ما فارجت سالم ، شغل سالم الاف ام ..
والله وتحقق منايه ، شوفي حبيبي معايه ... سالم : اهداء لج ياروضه
حصه : اوه اوه انا جني داشه بالعرض من بينكم اقول سالم نزلني بعد احسن ؟
سالم :انطبي انتي ترا ان ما سكتي بفرج عند الزباله ؟؟
حصه وهيه مغيظه : اذا انا بتفرني عند الزباله ، روضه وين بتفرها ؟
سالم : روضه ما تنفر ، روضه اشلها واحطها في قلبي .
روضه كانت مستحيه وايد ومب مصدقه بعمرها ، وكانت تتمني انها ما توصل البيت.
المهم وصلت روضه جي على الساعه 5 ونص و اول ما نزلت من السياره شافها اخوها ناصر .

 

[قلب تيبات]

رد : ضاعت ... (قصه محزنه )

تسلمين اختي شهله


القصه عجيبه وحزييينه


وين التكمله

ابا اجوووف التكمله











أختكم الشحيه الصغيرونه

قلب تيباااات

 

[ذياب]

رد : ضاعت ... (قصه محزنه )

وعليكم السلام ورحمة الله وبركاته,,,


مشكوره اختي ع العرض الرائع...


رفاق السوء يلعبون دور في ضياع اصدقائهم ( المرء عاى دين خليله )...


ننتظر التكمله اختي ولا تبطي علينا...


مع اطيب التمنيات...


ذياب,,,

 

[قلب تيبات]

رد : ضاعت ... (قصه محزنه )

انشاء الله ما تطولين علينا الغاليه












أختكم الشحيه الصغيرونه

قلب تيبااات

 

[ظمـــــــاي إنت]

رد : ضاعت ... (قصه محزنه )

تسلميــــــــــن الغاليه

وانا قريت هالقصه قبل

وفعلاااااا محزنه

واله يعين الجميــــــع

بس هي تستاهل اللي بيهااااااااااااا

 

[شهلة]

رد : ضاعت ... (قصه محزنه )

ناصر : روضه ويا منو راده ها ؟
روضه : راده ويا ربيعتي ؟
ناصر : وجي ما ردتي ويا محي الدين هو قال انه مر عليج وانتي قلتي له رد
روضه : ترا كان عندي شغل
ناصر : سمعي هاي اخر مره اتردين ويا حد من ربيعاتج ، واخر مره بعد تتاخرين في الجامعه ، ولاصدقيني ترا ما اخليج اتشبرين براع البيت هذا .
روضه : يعني لو رديت ويا ريسه عادي ؟
ناصر : ريسه حرمتي ، انا مالج عليها يعني هب غريبه ؟
روضه : لا هب غريبه بس الي انته تباهم .
ناصر : روضه لا تراديدين وايد .
دشت روضه البيت وهيه محرجه ، زقرتها امها وقالت لها اتبدل وتي ..
روضه : نعم امي شي بغيتي .
ابو روضه : انا الي ابغيج يا بنتي .
روضه : نعم يا ابويه امر .
ابو روضه : شوفي يابنتي قوم عمج مستعيلين ويبوون يفرحون بولدهم ، عشان جي قررنا انه نملج الحينه ، والعرس مثل ما كنا محددين ، انشالله الملجه الخميس الياي .
روضه : لالالا يااا بويه ليش؟ العرس والملجه كانوا شهر 6 ، مابغي الحينه .
ام روضه : ليش يامايه .
روضه : بس مابغي بحب ايدك وريولك يا ببويه .
ابو روضه :روضه ما اقدر ارد بكلمتي ويا عمج ، وشو فرقت يعني العرس في نفس الوقت ، بس الا بنجدم الملجه ، انا خبرتج الحينه وبسير عند شغل، اتفاهمي ويا امج على طلباتج .
روضه وهيه ميته من الصياح : امي انتي جي تذبحوني ، حررام عليكم انا بعدني 18 سنه .
الام : انا يوم خذت ابوج كان عمري 12 سنه ، وبعدين شو الي اتغير فجاه انتي اتعرفين من زمان انج لسعيد ، وسعيد ريال والنعم فيه .
ودش ناصر في هاي اللحظه : شو بلاها هاي اتصيح بعد .
الام : ما تبا تملج ؟؟
ناصر : شو نعم هب على كيفها ، بتملج غصبن عنها .
روضه وهيه تصارخ : انته ليش جي ؟
ناصر : نشي بعد عطيني كف على ويهي احسن ، اخاف الا عينج على حد ثاني ؟
روضه : اكرهك انته واكره سعيد قوووله اني اكررره .
ونشت روضه وطرشت مسج لسعيد كتبت فيه ( انا اكرهك وانته لو ريال ما بتفكر انك تاخذ وحده غصبن عنها )
اتفاجا سعيد بالمسج وتم زعلان ومضايج وايد وفي نفس الوقت مب عارف شو يسوي لانه الملجه اتحددت ومايقدر يقول غيرت راي ؟؟
قرر سعيد انه يخلي الملجه وفي نفس الوقت وقال بتوكل على الله ، وعقب ما يملجون بيتفاهم وياها ، وكان عنده امل كبير انها بتحبه عقب الملجه ..
اليوم الخميس يوم الملجه وروضه ماهدت التليفون من ايديها يالسه ترمس سالم واتصيح
روضه : خلاص يا سالم انا الحينه زوجه لريال غيرك ؟
سالم : الي بينج وبينه ورقه ، والي بينج وبيني حب ، الحب اقوي عن الورقه.
روضه : انا ما اتخيل عمري يالسه عداله ، ما اتخيل عمري وهو يلبسني الشبكه ، اكره وجوده في حياتي .
سالم : معاليه ياروضه بتهون جريب انشالله .
روضه : سالم ، اتاكد من شي واحد اني احبك وبتم طول عمري احبك.
سالم : اكيد، اخاف سعيد يقدر ياخذج مني.
روضه : يخسي ويهبي سعيد مايسوي عندي بيزه ، وانته تسوي عندي الدنيا ومافيها .
سالم : الله ياروضه على كلامج ، انا الحينه برتاح.
روضه : انا الحينه لازم اسكر عشان اطلع من بين الحريم ، بس لاتنسي اني احبك، صدقني الثواني الي بكون فيها وياسعيد تفكيري فيها بيكون وياك .
سالم : ما اتخيلج وياه .
روضه : لا اتذكرني انا روحي يوم اذكر هالشي اضايج ، يلا يا عمري . باي .
سالم : باي يا حياتي كلها .
روضه : لاتنسي اني احبك. باي
دشت ام روضه على بنتها عشان اتبارك وتزفها ، كانت اتحس انها تمشي على جمر ، عقب ساعه ونص وصل سعيد المعرس، كان فرحان ومستانس الدنيا مب شايلتنه من الفرحه ، كان يبا يخبر الدنيا كلها عن السعاده الي هو فيها ..
دش وحب روضه على راسها ، وقال لها : مبروك يا احلى عروس في هاي الدنيا
روضه ماردت عليه وكانت اطالعه بكل احتقار ، سعيد قال في خاطره اكيد هيه مستحيه، وعقب ما سلموا عليهم ، طلعوا عنهم وخلوهم بروحهم عشان ياخذون راحتهم .
سعيد : شو بلاج يا روضه شكلج زعلان ؟
روضه : يعني ما تدري شو بلايه ، انتي لو كانت فيك ذره رجوله جان ماخذتني ، اعتقد وصلك المسج .
سعيد : انتي ليش تكرهيني ، انا شو سويت لج ، ذنبي الوحيد اني احبج.
روضه : والله انا ما قلت لك ، مشكلتك هاي .
سعيد : مشكلتي ؟؟ انزين شو المطلوب مني الحينه ؟
روضه : طلقني وفكني من ويهك .
سعيد : اطلقج واحنا اليوم مالجين ، شو تبين الناس يقولون عنا .
روضه : انا محد يهمني ، انا ابا راحتي وبس.
سعيد: يالله يا روضه لهاي الدرجه ، انا ما احيدج انانيه ، مب انتي روضه الي حبيتها.
روضه : انانيه ، انتي الاناني والمغرور ، خذتني بس عشان انا رفضتك وقلت لك لا ، صدق انه نص البنات يتمنون بس ابتسامه منك ، بس هب انا تسمعني هب انا ، دورلك على وحده من مستواك .
طلع سعيد من عند روضه، وكل السعاده الي كان حاس فيها طارت،وكان يسمع ..علمتني وشلون احب وشلون احب ..علمني كيف اقسي وسار عند اكثر مكان اتحبه روضه في الدنيا البحر ، ونزلت دمعه من خاطره ، ويلس يفكر ليش روضه تكرهه ؟ هو بشو غلط ؟ ليش الي يحب ماله حظ في هاي الدنيا؟
وانا اقول لسعيد : مايهم جفف دموعك..مايهم اضوي شموعك .. مابقي شي ياقلبي يسوي دمعه من دموعك .. لا ياقلبي لاتكلم لا ياقلبي لاتالم .. هذا هو الي تحبه لو نسيته كان ارحم .. يازمن قاسي عليه .. يازمن وش بايديه ..كنت انا اشكليك حبيبي من جروح الي فيه
روضه عقب الي سوته ولا افتكرت بسعيد ولا فكرت انها جرحت انسان لو لفت الدنيا هاي كلها ما بتحصل ظفره ، واتصلت بسالم
روضه : حبيبي والله اتولهت عليك .
سالم : روضه ؟؟ مسرع ما طلع عنج ريلج .
روضه : يخسي ويهبي ريلي، لا اتقول انه ريلي انته ريلي وحياتي وعمري ، ومابكون بنت خليفه اذا ما خليته يطلقني.
سالم كان يقول في خاطره : مسكينه تتحسب اني صدق احبها .
روضه : شو بلاك ساكت .
سالم : لا ياحبيبتي سرحان فيج .
روضه : فديت الي يسرحون فيه والله
وكملت روضه السهر وهي ترمس مع سالم ، مع انه المفروض الي ترمسه نسته ونسته وجوده .
مر اسبوعين وسعيد على نفس الحاله ، صاك على عمر باب الحجره .. ورن موبايل سعيد وهو يفكر بروضه ..
ناصر : الو ؟؟السلام عليكم
سعيد : وعليكم السلام
ناصر : شحالك يا بو الشباب ؟ وينك ياريال
سعيد : الحمدالله بخير انته شحالك
ناصر : بخير عساك بخير ، اشوفك من ملجت نسيتنا
سعيد : لا مشغول شويه .
ناصر : مشغول بشو ، اكيد ويا روضه .
سعيد : ....
ناصر : شو بلاك يا سعيد صوتك مول هب عايبني ، وامك اتقول انك ما تطلع من الحجره ، حتى الداوم ما تسيره ؟ خير انشالله .
سعيد : اخخخ يا ناصر تعبان .
ناصر : تعبان منو شو ؟
سعيد : قلبي يعورني .
ناصر : قلبك يعورك من شو ، روضه الي حشرتني بها خذتها تراك ، اخاف روضه قايلتلك شي ، خبرني انته بس وشوف اذا ما كسرت لك راسها .
سعيد : لا ياناصر كله ولا روضه ، عموما اليوم بيي اتعشي عندكم .
ناصر : يا مرحبا الساع ، والله امط روضه من كشتها واخليها اتسوويلك احلى عشا .
سعيد : ههه ، لا كله ولا الكشه الله يخليك .
ناصر : يالله من قلت روضه ضحك ، عموما بتراياك وبخبر ريسه بعد .
سعيد : ريسه ، ها نصووور، ريسه ها .
ناصر : ياريال عن الاحراج ، بعدين بتي ويا هلها ، يلا يلا برايك بتراياك مب ما تمر ، في مال الله .
سعيد : مع السلامه .
وسار ناصر بيخبر روضه انه سعيد بيي ..
ناصر : روضه فجي الباب ؟
روضه: سالم سالم بسكر عنك ناصر ناصر يلا باي .
ناصر : روضه فجي الباااب ؟
روضه : انشالله انشالله .
ناصر : انتي شحقه قافله الباب على عمرج 24 ساعه شو تسوين ها ؟
روضه : ماشي ادرس .
ناصر : والله انتي ذبحتني ادرس وادرس ، شو من دراسه هاي ، شوفي لا تتحسبين عشان ملجتي خلاص انا ما بقولج شي ، دام انج في هالبيت بعدج بتكونين تحت شوري ، سمعي سعيد وريسه وهلها بيوون للعشا ؟
روضه بكل قرف : سعيد وريسه ؟؟؟
ناصر : مب عايبنج ؟؟ اسمعي غدي حرمة ويا سعيد و ريسه والله صدقيني لو سووتي حركه جي ولا جي بتشوفين شي في حياتج ما شفتيه ، وتمين يالسه لين ما يسيرون

 

[شهلة]

رد : ضاعت ... (قصه محزنه )

روضه لاعت جبدها وتمت اتقول في خاطرها شو الحاله ، ويا وقت العشا ويت ريسه وعقب شويه وصل سعيد..
ام روضه : حيالله ريل بنتي ؟؟ شحالك .
سعيد : بخير وسهاله شحالج ياعموه ؟
ناصر : ها حيالله بو عسكور، روضه نشي سلمي على ريلج .
روضه : هلا شحالك .
سعيد : الحمدالله انتي شحالج وشو الدارسه .
روضه من ورا خاطرها : بخير.
ام روضه : انا بسير احط العشا، روضه .. سعيد سيروا يلسوا في الميلس انتوا وخذوا راحتكم .
روضه في خاطرها : الله ياخذ الساعه الي انته كنت فيها ولد عمي .
وساروا الميلس سعيد ساكت وروضه اتهز ريولها بكل قوه ..
سعيد : روضه ؟
روضه: نعم شو تبا .
سعيد : انتي مايهمج اني متعذب وتعبان ؟ شو شفتي مني عشان هذا كله ؟
روضه : ما احبك ياأخي ماحبك ، اكرهك .
سعيد : حرام عليج انتي ليش جي اتقولينها وبكل سهوله ، ليش يوم خطبتج ايام الثانويه وافقتي ، وكنتي فرحانه شو الي اتغير الحينه ؟
روضه : اتغير اني كنت هبله ومينونه ، ياهل ماصدقت قالولي معرس وقلت يلا .
سعيد : شوفي روضه بتمين تكرهيني ماعليه ، بس فكري في ابويه وابوج انتي تتحرين لو قلت لهم انج تبين الطلاق بيوافقون .
روضه : ما يهمني مشكلتك وانته حلها ، ولا اقولك قول انك انته عفتني ماتباني ، شايف لك شوفه ثانيه .
سعيد : اتعرفين روضه عقب كلامج هذا كله انا بعدني احبج ، ابا اكرهج ما اقدر .
روضه : وانته اتصدق عقب هذا كله ، انا كرهتك اكثر واكثر وبتم اكرهك لين ما اموت .
سعيد والدموع في عينه : انا ما اقدر اذل عمري اكثر عن جي ، بحاول امهد الموضوع ، والي تبينه بتحصلينه، المهم راحتج.
طلع سعيد وهو مب عارف وين يسير ، كان حاس انه ضايع .. تعبان ..متعذب ..محد حاس فيه، ياتري غلطته انه حب بنت عمه وفكر فيها بالحلال واتمناها زوجه ..
وقف سيارته عند البحر ، وروضه مب طايعه تخوز عن تفكيره، يبغي ينساها مب قادر، دموعه كانت تنزل من عينه دمعه ورا دمعه، طرش لها مسجين اول مسج مكتوب فيه .. هذاليه اخر مسجين بيوصلونج مني ، روضه طلب اخير ، اذا ما كنتي اتحبني الحب الي انا كنت اتمناه ، لاتكرهني حبيني اقل شي كاخ ، والسموحه واتمني لج كل خير .
المسج الثاني كان صوتي ( ..بودعك يالضنا انا وبخليك عسي عيونك ما تشوف النكاده .. انا لي الله وانته الله يخليك تسرح وتمرح وتشوف السعاده ، وان كان مالي في حبك حظ بعطيك بعطيك كل العمر بهديك وفوقه قلاده عساك تعود وتذكر حاضر ماضيك وتكون من ذكراي عندك شهاده).
رن موبايل سعيد .. كان ناصر ..
ناصر : سعيد وينك سرت من دون عشا .
سعيد : مابغي عشا.
ناصر : ليش جي صوتك شو بلاك ؟
سعيد : سلامتك تعبان شويه .
ناصر : لا ياسعيد حلفتك بالله تخبرني ؟ شو بلاك ياريال .
سعيد : .......
ناصر : روضه صح ؟ ماشي غيرها ، شو سوت لك ، صدقني ان ما خبرتني بجلب البيت على راسها.
سعيد : لا ياناصر ، روضه طلبت مني شي من حقها، وانا الي زعلت
ناصر : شو هو الي من حقها. سعيد : تبا الطلاق . ناصر: الطلاق ، انته شو تقول؟؟ ، سعيد برايك . سعيد : ناصر لحظه ؟؟
وسكر ناصر التليفون بويه سعيد ، سعيد تم يقول انا شو سوويت ، انا ليش قلت لناصر ، اكيد انا ابا انتقم منها عشان هيه ماتباني ، انا اعرف انه ناصر ما بيسكت عن هالشي.
سار ناصر عند روضه ، وكانت ترمس سالم حبيب القلب ، ناصر تم يدق الباب شويه وكان الباب بينكسر في ايديه ، فجت روضه : شو مستوي ؟؟
ومط ناصر روضه من شعرها : شو مستوي ؟ تسالين شو مستوي ؟؟ تبين تتطلقين من سعيد

روضه و هيه أتصيح : طلبت شي من حقي ، سعيد مثل أخويه ، ما أتخيله يكون ريلي.
ناصر : اخوج ، وين هالرمسه هاي من زمان؟؟ وشو تتخيلين وما تتخيلين .
روضه : هدني انته ما يخصك فيني ، أنا وسعيد كيفنا .
ناصر : الظاهر انه يبغيلج تربيه من أول ويديد و محد بيربيج غيري .
روضه وبكل وقاحة: رب عمرك و سنع حالك عقب تعال ربني ، انته أصلا لو ريال ما بتمد ايديك عليه.
ناصر : أربى عمري واسنع حالي أنا بعلمج شقايل الرياييل الحينه ؟
ضرب ناصر روضه ضرب من الخاطر سطرها من الطارقات ، أم روضه و ريسه سمعوا الصريخ وربعوا لحجرة روضه ..
أم روضه : ناصر هد أختك ذبحتها من الضرب.
ناصر: بنتج هاي ما تستاهل إلا الضرب .
أم روضه : و غلاتي عندك اتهدها ، استهدا بالله و أتعوذ من إبليس . و خذت ألام ناصر وطلعته من الحجرة . تمت ريسه ويا روضه ، والدم يصب من خشمها ..
ريسه : شو سويتي يا روضه ، أنتي أتعرفين انه ناصر عصبي ؟
روضه وهي أتصارخ : جب ، طلعي براع ، أنتي هني عشان تتشمتين فيه ، طلعي براع ؟؟
ريسه : أنا اشمت فيج .
روضه : أنتي حماره ما تفهمين طلعي براع..براع .
وطلعت ريسه وهيه مستغربه روضه وصل مستوى ألفاظها لهاي الدرجة ، وينها روضه الهادية الخجولة المؤدبة ، وين طار هذا كله .
أم روضه هدّت أعصاب ناصر عقب ما خلته يتوضي وشربته ماي.
أم روضه : ناصر انته شقايل أتمد ايديك على أختك ، محد من إخوانك جد سواها ، انته أتعرف لو أبوك عرف شو بيسوي؟؟ .
ناصر وهو محرج : أنتي أتعرفين بنتج مسودة الويه شو تبا ، بنتج تبغي تفضحنا .
أم روضه : بعيد الشر عن الفضايح ، شو مستوي زيغتني ؟
ناصر وبكل قهر وغيط : بنتج المحترمة تبا تطلق وتوها ما كملت شهر حتى من ملجت ، شو بلاه سعيد يامي والله إنها ما بتحصل حد يحبها شرات سعيد ، أنا اكثر شي قهرني حالة سعيد ، امايه حرام الي فيه سعيد بسبة بنتج حرام والله حرام .
روضه : تطلق ؟ وا فضيحتي من بين الحريم والعرب ، ينيتي يا روضه ويلستي ، محد جد أطلق من عايلتنا ، بعدين سعيد ما بلاه شي عشان تتطلق؟!!! .
ناصر : تقوليلي أنا سيري رمسي بنتج ، والله يا أمي على قص ارقبتي إذا أطلقت ، موتها على ايديه ، ولا تتحسب عشان خاطر عيونها هذا كله ، بس عشان خاطر سعيد لانه سعيد ما يستاهل .
أم روضه : ما عندي بنات يطلقون ، هكن خواتها عرسن وكل وحده في بيت ريلها معززة ومكرمه، أنا بعرف أتصرف وياها ، انته هد عمرك وما بيتسوي إلا كل خير ، وشوف لا تخبر أبوك ولا حرمتك حتى ، ووص سعيد وقوله انه ما يخبر هله تسمعني .
ناصر : انشالله يامي لا توصين حريص ، أنا الحينه بسير عند سعيد ، ويلسي انتي ويا هل ريسه.
ناصر سار بيتصل في سعيد ،شاف 10 مس كول من سعيد ..
ناصر : هلا سعيد وين انته ؟
سعيد وهو بيتخبل : أنا هني ، انته وين ، شو سويت بروضه يا ناصر ؟
ناصر : غسلت شراعها ، هذا ويها شوهته ، سويت لها اعاده تصنيع .
سعيد وهو يصارخ: ليش يا ناصر ، هاي أختك حرام أتمد ايديك عليها ، هاي روضه يا ناصر ؟
ناصر وهو محرج : سعيد لا تقهرني كثر ما أنا مقهور، عقب الي سوته فيك و أدافع عنها بعد .
سعيد : هاي مب أختك يا ناصر ؟؟ ناصر: أختي واحبها ، بس روضه دلوعه ، والدلع الزايد يفرط البنت ، يعني هاي سوي تبا أتسويها تتطلق ؟؟
سعيد : من حقها تتدلع ، وهيه ما طلبت إلا حقها ؟ . ناصر : يااالله منك ، انته وين ؟
سعيد : أنا على بحر جميرا . ناصر : رومانسي انته وايد تراك أنا الحينه ياينك .
ناصر كان من داخل إنسان وايد طيب وحنون ، وكان زعلان لانه هاي أول مره يمد ايديه على أخته ، بس في نفس الوقت ما قدر يتمالك نفسه يوم حس بالحزن الي كان في سعيد.
روضه يلست أتصيح ، ويوم هدّت اتصلت بسعيد ، سعيد كان على البحر يترايا ناصر ، ويوم شاف في الموبايل ( حبيبتي ) فز من مكانه وفز قلبه وياه ..
سعيد : روضه ؟؟
روضه : يالحقير ، ارتحت الحينه هذا الي كنت تباه استوي ، بس صدقني بعرف شقا آخذ حقي منك . سعيد : روضه عطيني فرصه أدافع عن نفسي ، أنا ؟؟
روضه : جب ولا كلمه ، وبعد مطرشلي مسج بودعك يالضنا ، مالت عليك وعلى مسجاتك ، أتعرف أنا شو ردي على المسج الي طرشته .( بخلي دمعتك دايم على خدك نهر جاري ) وسكرت التليفون بويه.

سعيد من الصدمة ما عرف شو يسوي ولا شو يقول ، وصل ناصر ونزل من سيارته ,,
ناصر : شو بلاه ويهك جي ؟
سعيد : ماشي يا ناصر ، اسمعني باجر لازم تيي ويايه عشان اقدر اخبر أبويه وعمي بالطلاق .
ناصر : سعيد انته ينيت ؟؟ تبغي أتخرب الدنيا انته ؟ روضه ياهل وباجر بتعقل عقب العرس.
سعيد وصوته مخنوق : لا يا ناصر ، بس حرام عليكم ما اقدر استحمل ما اقدر ، أنا أحس أني ضعيف و أحس اني تعبان ، أحس بضيج أبا اطلع الي في خاطري ما عرف شو أسوي؟
ناصر وهو زايغ على سعيد : سعيد قوم بوديك المستشفي ؟؟
سعيد : اخـــخ يا ليت لو دوايه في المستشفي ؟
ناصر : دواك عند الله ، اشكي لربك همك والله بيفرج عليك انشالله ، سعيد قوم ويايه أنا ما بخليك وانته بهل الحالة ؟
سعيد : خلني يا ناصر بهمي ؟
ناصر : الله يغربل عدوج يا روضه ؟؟ والله ما تستاهل هذا كله ، غيرها وايد الي يبوونك ، سعيد؟
سعيد الدموع ما كانت توقف من عينه ، ناصر ما عرف شو يسوي يرد يضرب روضه ، الضرب ما بيخلي روضه تحب سعيد .. ناصر : إذا الطلاق بيريحك أنا بساعدك وبقنعهم يوافقون .
سعيد هو يصيح : اااه يا ناصر، يا ليت لو الطلاق بيريحني ، وانته أتعرف انه أبوي وأبوك ما بيرضون نسيت تفكيرهم ؟، بعدين حب هاي الانسانه كان في قلبي من أول ما عرفت كلمه حب ، كنت دوم احلم إنها هيه زوجتي وأم عيالي ، من سنين وأنا اترايا اللحظة الي بتجمعني فيها، والحينه تطلع تكرهني ما تحبني.؟؟
ناصر وهو حاط أيده على ظهر سعيد : سعيد والله انته جي أتعذبني وياك ، انزين انته ابتعد عنها فتره وعقب رد لها يمكن تتغير مشاعرها .
سعيد وهو يبتسم ابتسامه باهته : مستحيل يا ناصر ، أختك تكرهني ؟؟
ناصر : وشو الحل ، الطلاق من سابع المستحيلات ، وانته صعب انك تنساها ، وروضه صعب إنها تحبك ، شو الحل .؟
سعيد : الحل بأيد رب العالمين ، خلها على الله يا ريال ، بستحمل الويع الي فيه والله بيهون عليه انشالله .ناصر : شو رايك انسير العمره ؟؟ شوف الكعبة واطلب ربك .
سعيد : هيه والله فكره يمكن ارتاح ، أنا أبا ارتاح ؟
ناصر فرح حس انه قدر يسوي شي : خلاص يا بو عسكور ، بس شوف السفر على حسابك ؟
سعيد : هه، ما طلبت شي ؟
ناصر : والله انه روضه اغبي انسانه في هاي الدنيا ، صدق إنها ما تعرف قيمتك ، ما تستاهل دمعة وحده من عيونك ، وما تستاهل حبك .
سعيد : لا أتقول جي يا ناصر ، مثل ما أنا حب روضه غصبن عني ، أكيد هيه تكرهني غصبن عنها .
ناصر : يمكن الحب يكون غصبن عن الإنسان ، لكن الكره لا يا سعيد ؟؟ الكره ينوجد في قلب الإنسان الحقود و الي يحب يحب كل الناس ، والي يكره يكره كل الناس .
سعيد : لا روضه ما تكره كل الناس ومب حقودة ، روضه شفافة وطيبه واتحب الناس، بس أكيد في شي غيّرها . ناصر : حبك عجيب !!!!لهاي اللحظة وانته أدافع عنها ؟؟
سعيد : لهاي اللحظة ولباجر وللي عقبه ولين ما موت .
ناصر : حبك لروضه بهاي الطريقة ، عماك عن وايد أشياء وبيضعيك آخر شي ؟
سعيد : ضعت وخلصت ، خلها على الله .
حجز ناصر التذاكر وسافر هو وسعيد ، روضه كأنها ما صدقت اتصالاتها بسالم ما توقف ، والمواعد ما يخلص عند باب الجامعة ، و حصوه ماشالله مب مقصرة ، روضه اختربت سمعتها وهيه مول مب هامنها بس الي كانت تبا سالم، ما فكرت إنها هيه على ذمة ريال ثاني عادي ، وهل روضه عاطينها الثقة ويا غافلين لكم الله ، وحصه أتمهد الدرب اكثر واكثر ، سالم صار حياة روضه يوم واحد إذا ما شافته خلاص أتموت ، سالم حس إنها امتلكها ولو طلب منها أي شي بيحصله .