ويبكي القلب

[رهف]

رد: ويبكي القلب

اسميني فضيحة
اوعد الناس ولا اوفي

بس ان شاء الله بتكتمل القصة وبتشوفونها

ومشكوريين وااااااااااااايد ع المتابعة والاهتمام

 

[شحيه اصليه]

رد: ويبكي القلب

وابوووووووي..

والله اشوف اسم رهف على طول دشيت..قلت نزلت القصه..اهئ اهئ

انزين متى بتخلص عقب كم سنه..عسب ما اقدر كل يووم ادش واشوووف..تعبت

نترياا القصه

 

[رهف]

رد: ويبكي القلب

(( ويه مستحي ))


تبغون الجزئين الي كتبتهم والباجين ما ادري متى لاني للحين ما كتبتهم ؟؟
*_~

والسموحة

 

[شحيه اصليه]

رد: ويبكي القلب

هيه نبيهم..

المهم نقراهاا..

تسلميييييييين والله

 

[bent_alshohooh]

رد: ويبكي القلب

مشكوووووووووورة عالقصة الرووووعة بليز كمليها

 

[شحيه اصليه]

رد: ويبكي القلب

يالله وين..

نتريااا الباارت..^_^

 

[شحيه اصليه]

رد: ويبكي القلب

يالله وين..

 

[bent_alshohooh]

رد: ويبكي القلب

رهف بليييييييييييز كمليه والله انه قصتج عجيببببببببة بليز كمليها

 

[رهف]

رد: ويبكي القلب

فديتكم اناا محد يحمسني ع هالقصة غير متابعتكم

تفضلوا الجزء 15 والسموحة وااااااااااايد ع التأخير

بس اخبركم تراا القصة للحين ما خصلت ^^

السموحة

 

[رهف]

رد: ويبكي القلب

•
•

الجزء الخامس عشر




سيف .. حاط ايده ع راسه ومغمض عينه ..دخلت له ام حميد ..

ام حميد : سيف .. بلاك ولدي
سيف : هااااااه ،، - انتبه لنفسه - ماشي عموه
ام حميد : عيل شل ايدك عن راسك هب زين .. اتريقتوا اميه ولا ؟
سيف- يشل ايده عن راسه - : هييه عموه الحمد لله
ام حميد : لا تيلس روحك ادخل وعى الشباب بسهم رقاد عقب شوي بيأذن الظهر
سيف : ان شاء الله عموه بوعيهم عقب شوي
ام حميد : عيل خذ راحتك فديتك بروح اشوف بو حميد

طلعت ام حميد وقام سيف بثقل وهو حاس بصداع هب عارف كيف يفكر ،، عقد حياته واطالع الموبايل الي للحين باييده : مال منو هاا ؟!!
ظهر لليوان وشاف سنيتيا من بعيد ،، زقرها ويته وسألها عن صاحب الموبايل ..

سنيتيا : هدااا موبايل ماال ماما موزه ، هدااا يدوه ياخد تلفون يعطي حق ماما مال حميد ،، مدام سوي تلفون بيت قوم بو راشد ،، عسبة هداا علي وحليله سواا حاادس ،، هداا كله ......

سيف من سمع مال ماما موزه صخ وما عرف شو يقول ،،، اما سنيتيا فكانت للحين ترمس وتكمل سالفتها مد ايده لهااا وعطاها الموبايل وظهر بالحوي صوب الزرع ،، اما سنينا فيلست تتحرطم من تحت لتحت لانه ما خلاها تكمل سالفته

معقوله هالموبايل لموزة !! يعني موزة هي خلود ؟!! لا لا انا شو اقول هاي بنت عمتي ،، وعمتي مربيه بناتها احسن تربيه لا لا ما يسونها البنات

يلس يلعب بالرمل الي كان يدخل بين اصابعه ،، نقز وعق الرمل كله لما تذكر يوم كان راكب ويا حمد بسيارته واتصلت به الرضيعه تبغي تغير رقمهاا وحجتها شرات ما خبره حمد انها ملت منه

حمد ما خبرني منو المتصله به موزه ولا اسما ؟!!
اكيد موزه هييه موزه هو قال مخلصه دراسة !!
والاكيد ان حمد اشترى لها بطاقة يديده ،، بس كيف يشتري بطاقه خلود بالذات ليش ما شرالها من الاتصالات ؟!! يكون يعرف خلود وهي باعته له او يعرف أخوانها وهم باعوه له !!

تنهد بصعوبه : يااا الله يا خلود ،، خلود من القريه ما رمستني ،، اكيد باعته وحمد شراه وعطاه لموزه عسب جيه ما ترد ع الرقم ما تعرفه .. لا لاا انا شو يالس اقول اخرط ع عمري !! البارحه خلود متصله بي من هالرقم وطارق راد عليها ،، اتكون هب خلود وموزه مغلطه ؟!!
لا لا هي قالت خالد !! هيييه قالت خالد ،، وخلود اتعرفني باسم خالد ... لحظة لحظة لحظة بلاني انا غبي وادور اعذار ،، خلود قطعت علاقتها بي من يوم القريه صح صح صح .. وفج عيونه ع الاخير !!!!



+++++++++++


في غرفة البنات

ميثوه وعتهن غصبا عنهن
اسماا : خاطري بحليب بالهال والزعفران
ميثه : وحليلها عموه ميلسه دلال الحليب والقهوه والريوق في الصاله بس منو تريق ،، يلا نشن تريقن ،، حد يرقد بالعزبة للظهر !!
ريم وهي تمشط شعرها : كلكم ييتوا ولا شوو ؟
ميثا : لا ،، بس أنا وخالد وسيف
ريم اطالع موزه : سيف وخالد وينهم الحين ؟!
ميثا : اظني راحوا صوب اخوانكم ،، يلا قوموا نظهر من الغرفه حشاا كتمه

وانقفضن البنات وظهرن الصاله ،، الحمد لله محد هناا يلسن يتريقن ويسولفن ، دقايق ودخل لهن سيف الي ما توقع يشوف حد بالصاله ، من شافهن وقف مكانه طالعهن وهن استغربن منه ،، طالع اسما ع السريع وعقب ركز ع موزه الي من شافته تغشت على طول وتغشت وياها ريم

ميثه : بسم الله سيف بلاك داش ع يهود ،، سلم انزين
سيف : هاا ،، السلام عليكم ،، شحالكن؟
البنات : وعليكم السلام ،، الحمدلله
اسما : شحالك انت ؟!
سيف : بخير ....

سيف للحين واقف مكانه هب عارف يظهر ولا ييلس .. بالاخير قرر ييلس ويشوف رد فعل البنات ،، يلس ع الغنفه بعيد عنهن شوي
ميثاا : سيف بلاك اتيلست ؟ البنيات بيتريقن ويستحن منك
اسما : برايه الا هو ولد خالنا
سيف : ما علق ويلس يلعب بموبايله وبين فتره وفتره كان يطالعهن من تحت لتحت ، لاحظ من حركة ايد موزه واصابعها انها مرتبكه ويمكن مستحيه منه بس كل شوي تتساسر ويا ريم بلاهن !

سيف قرر يكتشف شو السالفه : هاا موزه ما اشتغلتي ؟
موزه ما توقعت سؤاله او انه يرمسها طالعت البنات عقب ردت بصوت واطي : لا بس قدمنا اوراقنا ونتريا دورنا
سيف ما انتبه للجواب كثر ما ركز ع الصوت هوو نفسه ولو اني ما امييز الاصوات بسرعه الا انه هو نفسه صوت خلود .. خلاهن وظهر من غير ما يقول أي شيء
ومن ظهر جيه موزوه خافت يكون عرفها شلت غشوتها وطالعت ريموه الي كانت تشرب حليب ولا على بالها
موزه تساسر ريم : ريموه والله احساسي يقول ان سيف عرفني ، ما شفتيه كيف سألني وعقبها ظهر ما كان مهتم للجواب شكله كان يبغي يتأكد ويا خوفي يكون شاك والحين تأكد ..
اسما : انتن بلاكن من يلستن تتساسرن ما عندنا بنات يتساسرن وحد يالس وياهن ،، وبعدين انتن ليش تغشيتوا حذال سيف شو بتمن على طول متغشيات بالعزبه ؟!!

ويلسن يسولفن


نرد لسيف
الي كان معصب ويرفس الرمل تحته .. هي محد غيرها هب اسما ولا وحده ثانيه ،، اسميني غبي .. هه هه اكلم بنت عمتي هههه
وفجأة سحب ضحكته : سيف ؟!!!!
في القريه زقرتني سيف ؟!! عرفت اسمي يعني كانت تعرفني وشكلها اعتفس من شافتني بالجناح الكويتي ،، وقطعت علاقتها بي من ساعتها ، حتى الحين اعتفست
هي ما استحت مني الي ما تستحي على ويهها .. هي خايفه اعرفها لاني خالد الي ترمسه ..

طالع السما آآآآآآه انزين يمكن هي مظلومه ،، لا لا كانت مرتبكه وزقرتني سيف بلاني ادور اعذار لهالوصخه

وبدون تردد ومن غير ما يهود دخل الصاله ويلس في نفس المكان الي يلس فيه قبل
شاف ان يدتهن يالسه وياهن رمسها ع الخفيف واستغرب ان موزه ما تغشت منه هالمره !
تعبل بموبايله وباستهبال اتصل على موزه – خلود – ويلس يطالعها

ريم : موزوه هب جنه هاا موبايلج ؟ شو يسوي هنا ؟!!
موزوه ادوره : سنيتيا شلته لامي الصبح ،، لمحته ع المكتبه ، راحت بتشله بس ما كانت ناويه ترد لان سيف يالس وياهن وتستحي ترمس حذاله وقفت النغمة قبل لا تشله وطالعت مكالمة لم يرد عليها ضغطت بتشوف من منو ،، فجت عينها وبلعت ريجها يوم شافت رقم سيف
تمت عاطيه سيف ظهرها وما حاسه بالي وياها ، رد الموبايل يرن ... شو تسوي وسيف الي يتصل بها يالس وراها ؟ ،، اذا ردت بيعرفها واذا حطته ع السايلنت او سكرته بويهه اكيد بيعرفها لانه اتصل على موبايل وياه بالصاله يعني رن بنفس الوقت وبيتسكر بنفس الوقت ؟!!

آه يا سيف مليون بالميه الحين لو بتعرف اني انا خلود .. ولو شاك بتتأكد
الله يغربل سنيتيا يوم شلت موبايلي

قررت تسكره بويهه وبحركه سريعه ضغطت ع المربع وحولته ع السايلنت وهي ترتجف واطالع الموبايل
سيف عنلاتها سكرت بويهي رد اتصل بس ما سمع صوت موبايلها الخايسه حطته ع السايلنت
تم سيف يطالعها ويدعي ربه انها اطالعه عسب يشوف ملامح ويهها كيف بتكون ..

ميثوه : مووزوه بلاج اصطنيتي هنااك ، منو متصل بج ؟
طالعتها موزه من غير ما ترد
ميثاا : بلاج ، شكلج يخووف ههههههه منو متصل بج ؟
موزه في داخلها : هااي هبله ولا تستهبل شو اقولها ؟؟؟ اقولها ان اخوج الي يالس ويانا هو المتصل ؟ ولا اقولج حد مغلط وما اعرف الرقم ؟! ولا شو اقولج يالهبله ليش تقولين شكلي يخوف اكيد الحين بيحس اني مرتبكه وان المتصل بي وااحد ولا ليش بخاف جيه

ريم من سكوت موزه واعتفاسها حست ان المتصل سيف بس خافت اطالع صوبه ،، قامت وسحبت موزه وراحن الحوي

سيف يطالعهن : ريم ؟!!! ريم ؟!! بنت عمهااا .. لو حمد غير رقم موزوه واشتراا لها بطاقه خلود ، ما اظني ريم بتشتري لها بطاقه يديده وبتظهر هي نفسها بطاقة ريم بنت عم خلود
دور ع رقم ريم بموبايله واتصل بس للاسف الموبايل مغلق .. الله يغربلها غالقته خلني اشوفهن شو يسون برع

قام بيظهر وراهن الا يسمع حمد يزقره
حمد : حيا الله ولد الخال ،، انا اشوف العزبه اليوم منوره قولوا بو الشباب هنا ..
سيف : الله يحييك ،، والعزبه منوره بوجودكم .. وخاشمه
حمد : متى ييتوا ؟؟ ،، وقبل لا يسمع رده طالع اسموه وحرن عليها لانها هب متغشيه بس اسما ابتسمت له ، ما قدر يهزبها الحين لان يدته وياهم واكيد بتهزبه .. خذ سيف وظهروا برع

سيف ولو ان ألف دليل ودليل انحط له ان خلود هي موزه بس هب قادر يقتنع كيف تسوي جذه ،، لو درت امها ولا ابوها ولا اخوانها بيجتلونها وبعدين هي مأدبه ومحترمه ومربايه عدل وما تسوي جيه ، ما عندي غير حمد وهو الي بياكد لي

ويلس يسولف وياه سوالف عاديه لين ما وصلوا لسالفة الموبايلات وعقبها سيف تجرأ وسال حمد اذا غير رقم اخته .. رد حمد عليه انه ما غيره ما عنده دلع البنات ، عاد الحين سيف كيف يتأكد ان هي موزه مب اسما ما ادري ليش ابغي ابري موزه عن السالفه انزين لو كانت اسما شو الي بيتغير حتى هااي بنت عمتي

سيف : انزين هي بلاها مستعيله من تتخرج من الثانويه عقب خل تغيره
ركز ع حمد الي رد : ثانوية ! لا لا ، الموز الي تبغي تغير رقمها
سيف : الموز!!! وسكت
تمشوا شوي وحمد حس ان سيف كل شوي يسرح عنه خبره سيف انه تعبان لانه واعي من الصبح والجو صار حار فخلنا ندخل داخل احسن

دخلوا الشبيبه داخل

•
•