• رؤيتنا : أن تكون برزتنا قلما حرا صادقا مبدعا
    رسالتنا : أن تكون برزتنا مثالا لمصداقية وموضوعية الكلمة وممثلة خير تمثيل للاسم الذي تحمله وتسعى دائما للم شتات القبيله المترامية الأطراف وحسب الامكانيات والسبل المتاحة لدينا مستعينين بما نملك من أقلام قادره على التغيير والابداع
  • مرحبا ٬ في حال تعتذر تسجيل الدخول ، يرجى عمل استرجاع كلمه المرور هنا

ويبكي القلب

  • بادئ الموضوع بادئ الموضوع رهف
  • تاريخ البدء تاريخ البدء
مشاركة: ويبكي القلب

رهــــــــف ..

صج صج من غير مجامــــــــلات..

روعه ..اسلوبج بالقصـــــــــــه يشوق....

ابا اعرف احينــــــــــه ..شو موزه بتقول لـ ريم..

و اظن تتطور علاقه موزه و سيف ...مدري تخميـن..

بس لا اطولين عليـــــــنا...

و مشكوره يا الـغلا ع هـا الجزء...
 
مشاركة: ويبكي القلب

معاني
=====
مشكوورة يالغلا
اسعدني تواجدج
وعن الاسلوب تراا طالعه عليج
ولا تخمنين شيء :tongue:
ولا تسبقين الاحداث



رهووووفه
 
مشاركة: ويبكي القلب

ما شااااااااااااااء الله عليج ,,,,,

اسلوبج في كتابه القصه وايد حلو حتى الاحداث مترابطه مع بعضها .....

اقول لمعاني طلع لج منافس قوي....... وبالبركه

اتمنالج التوفيق,,,,,,
ويسلمووووووووووووو

( لا طولين عاااااااااااااااد)
 
مشاركة: ويبكي القلب

راااعي الويلاات
===========
الله يسلمك أخوي
ومشكور على كلامك المشجع

وتراا معااني محد يقدر يناافسهاا :tongue:



رهووووووووفه
 
مشاركة: ويبكي القلب

الجزء الثاني احلى من الجزء الاول







وانا وايد متشوقة حق الجزء الثالث
 
مشاركة: ويبكي القلب

ولــــ النعيمي ــــه

مشكوورة حبووبه


اسعدني تواجدج



والجزء الثالث بعده مطول شوي

للحين ما كتبته




رهوووووفه
 
مشاركة: ويبكي القلب

رهـف..

وين الجزء الثالث...؟؟؟
 
مشاركة: ويبكي القلب

اختي رهف وين تكملة القصه .......... طولتي علينا

راعي الويلات
 
مشاركة: ويبكي القلب

الجزء الثالث


اليوم الثاني راحت اسما وسعود مدارسهم ،، اما موزة فما راحت الكلية ،، وريم استغربت لما ركبت ويا الدريول وقال لها ان موزة ما بتروح ،، وتمت تتصل فيها بس كله مغلق ،، ولما وصلت الكلية بعد تمت كل شوي تتصل فيها وكله يطلع مغلق بالأخير طرشت مسج ..


في بيت بو حميد

الساعة 11 سينيتيا ادق بااب حجرة موزة
سنيتيا : ماما موزة يلا قومي
ما ردت عليها موزة ،، وقامت تسبحت وتكشخت ،، وفتحت الموبايل وشافت مسجين واحد من ربيعتها فاطمة ( تسألها فيه عن احوالها وسبب غيابها ) ،، والثاني من ريم كاتبه لها : ( مسودة الويه شو مغيبنج يالخاينة ،، تدرين بي من البارحة اتحرقص ،، وابي اعرف شو صار،،لا انتي تردين ولا خالد .. يوم بتنشين اتصلي بي)
ضحكت موزة وخلت الموبايل،، ونزلت تحت الصالة ..

في الصالة كانت يالسة اليدة وأم حميد وأم خليفة

موزة : صبااح الخير
الجميع : صباح النور
مشت موزة تبوس يدتها على راسها وعقب راس امها وعقب راس أم خليفة - مرت عمها – ..

اليدة : حيا الله الموز ،، شفيج بنيتي ما رحتي الكلية اليوم ؟
موزة : راسي كان يعورني يدووه ،، ما رقدت عدل ..
اليدة : سلامات حبوبه ..
أم خليفة : فديت بنتي ريم ،، عيل اليوم بروحها في الكلية
أم حميد : ويديه ،، شقايل بعد بروحها ،، وياها ربيعاتها
أم خليفة ( هامتها بنتها ) : هيه بس هي متعودة ع الموز
اليدة : شو بعد متعودة ،، تقولج وياها بنات ،، ليش بياكلونها ،، والله حاله

اضايقت ام خليفة اكثر من رمسة اليدة
موزة وتحط ايدها على جتف ام خليفة : عموه ،، شو فيج ،، والله ريموه ما ينخاف عليها ،، ما شاء الله كل بنات الكلية مصادقتنهن
اليدة : ويدية ،، حشرتونا ويا ريموه ،، الموز بنيتي قومي تريقي احسن لج..
موزة : إن شاء الله يدوووه

شوي ورن التلفون ،، وقامت موزة وردت عليه
موزة : الوو
حميد : السلام عليكم ،، حيا الله الموز
موزة : وعليكم السلام ،، حيا الله بو علي
حميد: شحالج ،، وشحال اهلي
موزة : كلهم بخير ،، وناقصهم شوفتكم يالغالي
أم حميد من رمست موزة عرفت انه ولدها حميد المتصل : فديته ها حميد المتصل ،، عطيني بكلمه
موزة : ها حميد ،، امي تبغي تكلمك

تعطي سماعة التيلفون لامها
أم حميد : هلا بولدي ،، شخبارك أمي ،، وشحال حرمتك وعيالك
بدر : يسرج الحال امي ،، شخباركم انتوا
أم حميد : الحمد لله ،، متى بتون ان شاء الله
حميد : ان شاء الله بداية الاسبوع الياي

يلست أم حميد تسولف ويا ولدها وعقب كلمته يدته ،، اما موزة فخلتهن وراحت تتريق


================


بعد العصر في بيت بو حميد
في الصالة يالسة اليدة وبو حميد وام حميد وسعود وموزة يشربون شاي وقهوة ،، ويطالعون التلفزيون ..

بو حميد : ليش وين اسماء عنكم ؟
موزة : تغدت ورقدت
اليدة : هالبنت كله بس تاكل وترقد واطالع التلفزيون ،، ما ادري كيف بتنجح
أم حميد : اذاكر بعد عموه ،، وحليلها امس سهرانه تكتب على الكمبيوتر
اليدة : شو بعد اذاكر في الكمبوتر ،، قولي يالسة تلعب فيه
موزة : يدوووه الحين الواجبات كلها في الكمبيوتر ..
اليدة : كل يوم تطلعون لنا بمنكر ،، قومي وعيها بتخيس من هالارقااد
بو حميد: انزين اميه خليها شوي بااجر اجازة
اليدة : تشوف العرب عقب العصر يتجمعون ليش ما تيلس وياهم ،، ( اطالع موزة ) :موزووه يلا قومي وعيها بسها رقااد
موزة : ان شاء الله يدووه

قامت موزة توعي اسما

بو حميد يطالع سعود : ما شاء الله اليوم اشوفك في البيت
سعود : كل يوم انا في البيت طال عمرك
اليدة : منو كل يوم في البيت ما سمعت
سعود : انا يدوووه - يبتسم لها -
ام حميد : سعود باجر عيال خالك بيونا على الغدى لا تطلع
سعود : انزين ادري

شوي ويرن موبايل سعود
سعود : هلا ،، وينك ،، انزين الحين بييك
يقوم سعود يبي يطلع : يالله من رخصتكم
يو حميد : ها على وين ؟
سعود : خالد يترياني في السيارة
اليدة : ووين بتروح انت وخالد
سعود : بنتمشى في السيارة
اليدة : شقايل بعد تتمشون في السيارة ،، قول الا بترووحون السوق ادورون لكم غراشيب مسوديين الويه
سعود ويضحك : انا كبرت عن هالسوالف يدووه ،، وياالله تاخرت تشاااو
اليدة : شو بعد هاي شاو

تم الكل يضحك عليها ،، خلاهم سعود وطلع
 
التعديل الأخير:
مشاركة: ويبكي القلب

تم الكل يضحك عليها ،، خلاهم سعود وطلع ،،بطلعته من البيت شاف ريم داخله
سعود : حيالله الريم
ريم : حيا الله المغازلجي
سعود : شو بعد مغازلجي
ريم : عبالك ما اعرف سوالفك ،، المهم اختك الهبلة دااخل ؟
سعود : منو فيهن ؟؟ الهبلة الصغيرة راقده والهبلة الكبيرة راحت توعيها ..
المووهيم كل الاهل دااخل ويالله بااي

يطلع سعود وتدخل ريم الصالة
ريم : السلام عليكم
الجميع : وعليكم السلام
ريم تبوس راس يدتها : شحالج يدووه ؟
اليدة : الحمد لله بخير ،، وشحالج انتي وشحال اهلج
ريم : الحمد لله كلهم بصحة وعافيه ،،اطالع عمها وحرمته : شخبااركم ؟ - تنش تبوسهم وعقب تيلس صوب يدتها -
بو حميد وام حميد : الحمد لله
اليدة : ريموه اشوف البنات ما كلوج
ريم : مستغربه : أي بنات ؟؟!!
اليدة : هاي امج سوت لنا مناحة الصبح ،، عسب الموز غايبة
ريم : هههه فديتها اميه تحاتيني
بو حميد : اكيد تحاتيج بنتها
اليدة : عنبوه ودية ثانية جان بتغيب الموز غيبي وياها مافيني ع امج
ريم : فديتها والله ،، الا الموز وينها ما اشوفها
ام حميد : رااحت توعي اختها وللحين ما نزلن
ريم : عيل بروح لهن


=============


راحت ريم غرفة موزة وفتحتها على طول بدفاشة ،، موزة وحليلها استغربت من طريقة فتح الباب
موزة : بسم الله الرحمن الرحيم ،، شو فيج اهلج ما علموج كيف تفتحين الباب ،، ولا اول مرة تشوفين بااب بحياتج ؟
ريم تضحك على تعليق موزة وترد عليها باستهبال : موزوه ليش هذا هو الباب ،، تصدقين اميه قالت لي عنه بس ما عرفته الا الحين
موزة : تستهبلين بعد
ريم تفر موزة بالمخدة : يوم ما تردين على الموبايل شو تسوين مخليته عندج ،، بيعيه احسن لج
موزة تضحك عليها : احسن ابيج تتحرقصين اكثر
ريم واطلع لسانها : باااااااااااااايخة ،، شو صار بينكم ،، يالله قولي ،، والله ما خذني رقاد الظهر ،، وكنت بييكم
موزة : ،، جان ييتي ،، و شو اقول ؟؟
ريم : عن الاستهبال ياللا شو قالج
موزة : اطالع عمرها في المنظرة : قال لي خلاص ما يبيج بيكلمني انا
ريم توقف واهي معصبة : نعم ،، ما سمعت ؟؟؟
موزة بدلع : يقول انه ما يحبج وانه يحبني انا
ريم : هه هه هه ضحكتيني ،، اصلاً هو يحبني ويموت فينيّ ،، يالله موزووه قولي الصج
موزة : ليش هو ما قالج ؟
ريم : لا ما كلمته
موزة : اشك ،، ( جنها تذكرت شيء وقالت بعصبية ) : ريموه يالبايخة ليش عاطتنه اسمي؟!!
ريم : متى عطيته اسمج ؟!!
موزة : لا والله صدفه عيل عرف اسميه
ريم تجاوب بلا مبالاة : يمكن قلت له ونسيت هههه ،، المهم شو صار
موزة : لا والله نسيتي ،، تضحك بعد ،، تراا قلت له اسمي خلود لا تغلطين وتقولين له اني موزة
ريم : ان شاء الله ،، يالله قولي شو قالج والله ذليتيني
موزة : والله ما ادري ،، ما عرفت اكلمه ،، بس قال انه يحبج ،، وانه بيتزوجج بس هب الحين ،، وانه بيخليج تكلمين اخته ،، وبس
ريم : لا والله ،، عيل متى بنتزوج
موزوة : شو فيح انتي عاقه عمرج على الريال ،، خليه يولي وانتبهي لنفسج
ريم ( بحزن ) : شو يولي ،، انا احبه واهو يحبني
موزة : انزين ،، ولو حد عرف انج تكلمينه ؟
ريم : ومنو بيعرف ؟؟ الا اقول شو رايج فيه ؟
موزة : ما ادري
ريم : شو ما تدرين
موزة : يعني ما ادري ،، الا انتوا من صجكم الحين يوم ترمسون اونكم بتتزوجون ؟
ريم : هييه ... جيه هوو قال لج العكس ؟؟
موزه : لاا .. بس احس الريال يلعب وعقب يودر ولو فكر يتزوج ما يتزوج وحده يرمسها ..
ريم : لاا اناا غير عن كل البنات ..*.^
موزه – تطنز - : هييه غيرر .. وبسج سوالف عن خلوّد لا حد يسمعنا
ريم : اففففففففف ،، اقول افتحي النت ما جيكت على ايميلي اليوم
موزة : عندج الاب افتحيه بروحج

قامت ريم فتحت الكمبيوتر والنت والمسن وشافت ( شبيه الريح ) اون لاين

شبيه الريح : هلا والله
ريووف – النك نيم مال ريم في المسن - : اهلين ،، اشحالك ؟
شبيه الريح : الحمد لله ،، شحالج انتي ، وينج محد يشوفج ؟
ريوووف : والله في الدنيا
شبيه الريح : شو حتى الجات ما تدخلينه الحين
ريووف : والله مشغوولة في الكلية
شبيه الريح : الله ينجحج ويوفقج
ريوووف : جميعا ان شاء الله
شبيه الريح : كم باقيلج على التخرج ؟
ريووف : هالكورس بس ،، وعقبها بطلق الدراسة بالثلاث
شبيه الريح : خخخخخخخخخخخ بطلقينها مرة وحدة
ريوووووف : شو هالضحكة ،، اضحك عدل


يلست ريم تسولف ويا شبيه الريح وموزة اطالعها ،، ومستغربه منها ؟؟



أ . هـ
الجزء الثالث


رهف
 
التعديل الأخير:
يجب تسجيل الدخول أو التسجيل كي تتمكن من الرد هنا.
عودة
أعلى