السلام عليكم ورحمة الله وبركاته
حبيت اطرح رايي من بعد ما شفت راي اخوي العوسج واخوي رفيع الشان
صداقة الانترنت،، سلبياتها وايجابيتها ؟
الصداقه شي عظيم ومفهوم كبير وطبعا مافي انسان يقدر يعيش بدون صديق او صديقه في حياته علشان يواسيه ويفرح لفرحه ويزعل لزعله,,,
وبخصوص صداقه الانترنت فانا مش من المؤيدات لهذه الصداقه بشكل واسع
يعني يمكن اقبل بنسبه ضئيله جدا لكن مااقتنع بهذه الصداقه دائما ,,,
صداقة الانترنت هو سلاح ذو حدين
السلبيات كالتالي:-
صداقة الانترنت انه الطرف الثاني اللي تعرفت عليه عن طريق النت ما تعرف جوهره او مضمونه وشو يكن لك ، يعني يمكن يكون هدفه الشخصي لمصلحة او للوصول لغرض معين فيحاول انه يبين لك الجانب الجيد فيه ويخفي الجوانب السيئة ، وبس ينال او يحصل اللي بغاه ما يعرفك بعدها، شي ثاني الشخص هذا ممكن انه يمتلك صفات سيئة او غير جيدة ويعلمك هالصفات او انت لا شعوريا تحصل نفسك اكتسبت هالصفات منه ،، بس في النهاية يعتمد عليك انت اذا حاولت تاخذ الزين وتترك الشي.
ومثلا اكون انا بنت واصادف باني اصادق بنت مثلي وبعد فتره بسيطه اكتشف بانها ولد ومش بنت لاني وثقت فيها وطبعا اللوم علي اولآ لأني المفروض ماأثق في الناس اللي ماشوفهم ومااعرفهم عدل واحتمال اعطيها بعض الامور الخاصه فيني مثل الاسم ومعلومات شخصيه ثانيه وغيره وغيره ,,
وهاي كلها راح اتكون ضدي لو اكتشفت بانها ولد ومش بنت
وهاي سلبيه بسيطه بلنسبه للي اشوفه ,,
وطبعا بعض البنات يرابعن بنات حقيقيات
لكن شي بنات مش متربيات اخلاقيا يعني ياما سمعنا بلاوي وسوالف بان وحده اربيعتها سحبت كل صورها اللي في النت او سرقت ايملها وقامت تهددها او او او
واصابع الايد مب سوا ياجماعه ,,,,
يعني شي ناس اوكي وشي ناس مب متربين ومنحطين اخلاقيا,,,
وياماا تصير مشاكل بعد بخصوص الصور مثلا اصادق بنت في النت واقولها كل شي عني واتاكد بانها بنت واراويها صورتي والاخت في الصوب الثاني تاخذ الصوره وتوزعها على ربعها الشباب او على الاقل بين اخوانها واهلها !!!!!!
والله كل شي حاصل في هالدنيا ومحد يقول هاي نسبه ضعيفه
لان يمكن نحن انشوف اعمارنا بان مايخصنا في حد وقلبنا ابيض وماعلينا من هالامور
لكن شي بنات وناس وشباب مايخافون على سمعه حد ومايهمهم العرض ولا السمعه ولا الشرف ,,,,
والشيطان شاطر بعد في هالمواقف...
مالنا غير ندعي لهم بالهدايه..
على ماظن باني حطيت كم سلبيه وطبعا الصداقه سلاح ذو حدين يعني لها
اما الايجابيات:-
بان هاي الصداقه الانترنتيه تنفع في بعض المرات بان كل وحده مثلا تنفع الثانيه بمعلومات ثقافيه او حتى اي بنتين يقدرون يطورون هالصداقه بالموبايل والزيارات المنزليه من بعد ماتتاكد من اخلاقها وحسن ادبها وشوي شوي تتطور هالعلاقه وتصبح حميمه وكل وحده تفيد الثانيه باللي عندها واكبر مثال الاخت غزالة الجبال مستحيل احصل شراتها
ونفس الكلام للشباب ايضا
يعني الشاب يقدر يصادق شاب يكون ملتزم ويعرف ربه على اساس كل واحد منهم يوجه الثاني في حاله الغلط وبعد يتجمعون على لمات الخير ويتعرفون على شباب مثلهم وتتكون مجموعه طيبه ان شاء الله ,,,
وبجيه هاي الصداقه انا ماعارضها بل اشجعها كثيرا
يعني كل حد يفيد الثاني مب يضره لمجرد انه وثق فيه وعطاه كل شي عنه واعتبره صديق ويطلع عدو وخاين ,,,,,
تجارب شخصية مررت بها ؟
والله عن نفسي انا مامريت بمواقف كثيره لاني سبق وقلت باني ماثق ابسرعه في الناس عن طريق النت
ولكني بذكر لكم هالموقف اعوذ بالله منه صادقت بنت عزيتها والله ووثقت فيها وقلت لها كل شي عني وفي الاخير تفاجات بها تتهرب ومب حابه اتكلمني وايد وكانت مرابعتني لمصلحه خاصه والله ماقدرت اذكرها في الموضوع هنا
ويوم ماحصلت هالمصلحه طنشتني بس الحمدلله بانها خازت من طريجي لاني ماحبيت انها ترابعني لمجرد مصلحه شخصيه وبس
وهالموقف اللي يحضرني حاليا ,,,,,
مقارنة بين صداقة الانترنت والصداقة في الحياة الواقعية ،،، وأيهما أفضل ؟
_مابتتاكد من الشخص ومن جنسه الا بعد مرور فتره طويله واما في الواقع طبعا بتشوف الشخص وبتكلمه ومع مرور الايام بتصادقه على راحتك
وفي النت
2_الشخص اطباعه ماتعرفها من خلف الشاشه يعني تحكم عليه بمجرد الكتابه
واما في الواقع بتفهم الشخص وبتعرف اسلوبه من خلال كلامه وحديثه وتصرفاته
3_في النت مابتعرف الحاله النفسيه للصديق اللي معاك يعني مابتعرف لو هو مضايق منك او مستعيل وماوده يرمس او حزين الا لو هو قالك بنفسه.
اما في الواقع تقدر تخفف على صديقك لمجرد اتشوفه بتعرف حالته النفسيه لو كان فرحان او زعلان او مضايق ومهموم وتقدر تخفف عنه اكثر من الكتابه على الكيبورد..
4_في النت الصديق يمكن تحتاج له في حاجه ضروريه وعندك سالفه مهمه وفجاه ينقطع الخط او الكهربا وتضيع السالفه
اما في الواقع لاء طبعا, لو كلمته طبعا تقدر تتكلم على راحتك
وايد وايد بعد من المقارنات,,
لكن ماحب اطول عليكم اكثر عن جذه لان مثل ماقلت هالشي سلاح ذو حدين ولو وقفنا عند سلبياته وايجابياته بنوقف عند امور كثيره جدا وكل شخص له وجهه نظره طبعا
وفي الاخير في ظني ورايي الشخصي بان صداقه الواقع اجمل وانقى واسهل واحلى واطهر من صداقه الانترنت
وهذا مجرد راي شخصي اعمل به
اختكم
عاشقة التراث
