المهم انا بدش بالموضوع سيده لابلف ولابدور لاني ماحب اللف والدوران
المهم انا كنت اليوم قاعده ويى ربيعتي (s) وبين السوالف دخلنا بموضوع جان اسئلها (s) انتي ابوج من راس الخيمه صح؟ جان تقول(s):هي ابوي من راس الخيمه000000جان اقولها وامج من وين؟ تغيرت ملامح ويها واصفرت واحمرت واخضرت <<<<<<حشا موويه اشاره مرور خخخخخ، المهم جان تغير الموضوع انا قلت يمكن سبحان الله امها متوفيه ؟جان اسالها واقولها ردي ع سؤالي امج من وين؟ جان تقول اسكتي اسكتي لازم تفظيحيني جان اقولها شوتفظحيني 0وانا شوقلت؟؟000جان تقول : لاحول ولاقوه،جان اقول شوسالفتج انتي؟جان تقول امي هنديه ارتحتي؟؟ انا انصدمت موعلشان امها هنديه انا انصدمت انها تقول امي هنديه زين ارتحتي؟؟ 0ليش شوفيها والله مافيها شي دام الام الهنديه مسلمه وماعليها كلام ليش الانسان يتفشل انه يقول انه امه هنديه او مصرية والا امها هنديه او مصريه اذا حد سأله؟؟ بعدين قلتها شويعني امج هنديه ؟امج مش انسانه؟جان تسكت وتقول انا ماعترف بامي ولاافتخر فيها0انا هذيك الساعه قمت وقلت لها والله تفال امج انتي ماتسوينه وجان اطنشها ورحت عنها0المهم اهي تزول انا ماقلت هالموقف علشان اقولكم شلون اراظيها لأ؟اناابى اعرف ليمتى الانسان مابيعترف بامه والا ببوه والا بيده اذا كان من جنسيه اخرى0يعني
الصراحه احتقرتها يوم قالت انا ماافتخر فيها وانامتبريه؟؟؟؟؟؟
"وكل انسان موب احسن عن الثاني الا بالتقوى"
*** كيف افهمها انها لازم تفتخر بامها لوكانت هنديه او مصرية لازم تفتخر فيها دامها مسلمه؟
***وابى اعرف ليش الانسان مايبى يعترف باصل امه وابوه اذا كان من جنسيه ثانيه وخاصه (هنديه) ؟لاني لاحظت هالشي00
حرااااام اللي يسونه العيال في أهلهم جيه الحين كلنا أبونا آدم وأمنا حواء شو ختلفوا الهنود ولا غيرهم لأنهم مساكين يعني والله حاله
مشاركة: ..::+::..مشكلتي امي هنديه او مصريه..::+::..
تدرين ياعاشقة التراث
لانك ماعاشتي حياتها من الطفولة
فمن جذي حكمتي عليها
ان يدي الله يرحمه ماخذ هنديه وطبعا خوالي لي هو صغار هم من الهندية
فما تعرفين
شلون يعانون من صغرهم
سواء من الفريج او المدرسة او حتى المجتمع
معظم لي ينادونهم ماينادونهم باساميهم
اغلبهم يقولون ياعيال الهندية
فمن جذي يتولد عندهم شعور بالنقص وعدم الراحة للوضع لي هم فيه
حتى باوقات كثيرة اشوفهم ينزلون راسهم لما ينادونهم
وباوقات كثير لما يركبون معاي
بالسيارة ويسالني احد من ربعي او احد من الناس
يقلون لي من هذا
اقول لهم خالي مع اني اكبر منه بعشرين سنه
بس لما اقول لهم خالي اشوفه يبتسم ويرفع راسه
فتبين الصراحة ما بي احط اللوم على ربيعتج
وبتكبر ان شاء الله وبتفهم الوضع وبتتفهم الوضع كيف عايش
لحين مب الواحد يقول من ابوي
لحين لازم يثبت وجوده ويقول
انا هني موجود ويصنع اسمه بيده
وقولي له يكفيك فخر انه ابوك مواطن
لو كان ابوك وامك هنود شنو بتسوين
ماكانك يالسه لحين بين رفيجاتك
فقولي لها
قولي الحمدلله
الف الف الف مرة على هالحال
:mf_chegue
مشاركة: ..::+::..مشكلتي امي هنديه او مصريه..::+::..
السلام عليكم
انا الصراحه اتفق ويا اخوي احبكم دوت نت
انتو ما تدرون ولا بتحسون بالي شافوه وهم اضغار من تعليقات
انا وحده من ربعي كانت امها مصريه انتو ما تتخيلون كيف يوم كنا اصغار نحتقرها وما نحب انكلمها وانقولها سيري يا بنت المصريه ومن ها الرمسه فقبل ما نلوم البنت تنذكر نحن او غيركم شو سوو بها البنت يوم كانت اصغيره
وانتو اتعرفون ان الواحد يبدا يتشكل وتتكون فيه العقد يوم يكون اصغير فطبيعي بيكون فيهم خجل من التحقير الي حصلوه يوم هم صغار بس كل واحد وشخصيته
مشاركة: ..::+::..مشكلتي امي هنديه او مصريه..::+::..
السلام عليكم ورحمة الله وبركاته..
لا أعتقد بأن قلب تلك الفتاه قاسيا تجاه أمها الى هذه الدرجه... ذلك الكنز الثمين والحنان الفياض والحس المرهف..ولا أعتقد بأنها تعبر بصدق عما بقلبها فحب الأم فطره جبلنا عليها وصقلها فينا الاسلام والعادات والتقاليد والمثل..
هي في الواقع ترتدي قناعا!! تتنكر به!! كي تواجه هذا المجتمع القاسي تجاهها وتجبره على القبول بهذا الوضع..نظرة المجتمع وكل من حولها أجبر تلك الفتاه على ذلك القول واظهار غير باطنها المحب لأمها ..
فالمشكله باعتقادي تطال أفراد المجتمع وأي حل جذري لهذه المشكله يجب أن ينبع من المجتمع نفسه..