متى بتكمل هالقصة والله استوالي أكثر من 10 شهور قاريتنها وألحين بكمل سنة وماكملت هالقصة شوفو حد يكملها والا غلقوها حرام الكل يدش يقراها والقصة هب كاملة .. الله يهديج يا تلع الأعناق
اتعرفي مستحيل في حياتي اقراء لج شي لانج بمعنى المذله اتذلييييين قرائج بعد ماحبينا الفصه وعلقتينا فيها اطنشي ولا تردين يوم مافي بالج اتكمليها ليش كتبتيهااا
من مشن ..افتر حمد براسه صوب مزنه بس مزنه ماسوت له سالفه مشت ..وهو من دخل سلم السامان ليدوته .. وسار تحت شيره اللوز .. وتم يوايج في المكان اللي يحط فيه الأشياءات اللي يعطيها حقها .. حط ورده حمره .. وتم يالس ف المكان حول ربع ساعه ..وعقب راح البحر عند شوابه .. بهالوقت سعيد وخليفه من خلصو شغلهم خذو لهم استراحه وكانو يالسين وسط مجموعه من الشياب والشبيبه .. سعيد كان سرحان ويشخط بصبعه السباب عالرمل الابيض ونظره الحزن ماخازت من اعيونه .. وكل اشوي يلقط من تعليقات الشباب ويضحك عليهم .. ومن بين هالجموع كان قايد يراقب تصرفاته .. بلحظه طاحت نظرة عينه بعين سعيد .. سعيد تحاشى النظره كعادته .. بعكس قايد اللي يالس على نار هاديه وهو كاره نظرة سعيد وسرحانه طول الوقت ماتقول الا واحد عاشق .. ومب أي عاشق الا عاشق ومنتهي ومخلص عليه .. وخاطره يقطع هالشك اللي فقلبه .. بس كيف ؟؟؟؟ بهاللحظه تم يحرك صبوع يديه بتوتر .. ويتذكر ميثه .. أي حركه يسويها سعيد يربطها بميثه .. ليش هو جي يفكر !!!و هو يطالع سعيد اللي نش ونشو وراه ربعه خليفه وعقاب ..
غيث يعدل سفرته: بسير المسيد .. بتوضأ هناك ..
قايد افتر صوبه بنظره ولا رد عليه .. ونظراته ضايعه بويه غيث .. وغيث حاسبه مب طبيعي ..
غيث افتر صوبه ودقه عصدره وبكل اهتمام: رب ماشر ؟ شو فيك ؟
قايد بنظره حاده: الا الشر بعينه .. ونش ..
ومن أذن الظهر نشو كل العرب ..وهم يكبرون ويهللون .. وتفقو انهم يتيمعون عقب صلاه العصر ..
واحد من الشواب: الصلاه الصلاه ياعباد الله .. الصلاه ..
الشيبه: الله أكبر وأعظم ..
وعقب الغدى بو سعيد وحرمته يالسين في الليوان ويشربون الشاهي .. بهالوقت مزنه كانت تلعب بالماي بالطشت وتتامل الورده اللي حطها حمد .. كانت ذبلانه وقلب مزنوه عورها وايد على شوفت الورده جذه وبهالحاله تمت تحبها اشوي اشوي وكل اشوي تمشيها عخدها .. لين مايتها امها ..
ام سعيد توخي لعندها وتشل الاغراض والعطور: نشي نشي بسج لعبان ..
مزنه ترفع شعرها: امايه اريد العب بالماي .. !!! بعدني ماخلصت من العطورات ..
ام سعيد: عبرتي المئ كله .. نشي قبل لايشوفج ابوج ويهزبج ..
مزنه وهيه طفرانه من شعرها: امااااااااايه .. تعالي ارفعي شعريه لعوزه ..(وتحاول ترفع خصله بظهر كفها) وهيه متغصصه من شعرها السايح عيبهتها ..
ام سعيد بخطواتها الثجيله: جان ربطيه وعاينتي رويلاتج ..(وتمت ترفعه لها أي كلام وماشاء الله من طوله كانت نازله خصلات على ويها ورقبتها ) مزنوه انقفضي .. هيا هيا ..
مزنه تمشي يديها لعند ريولها: انزين فدييتج بس دقايق ..
وتمت تحط العطورات ع ايدها وتمسحهم بريولها وكل اشوي تمشي يديها اليمين عيبهتها ترفع خصلاتها ..
ومزنوه ماكانت تعرف انه في شخص يناظرها الا من رفعت راسها صوب الييدار وتمت ادقق بالمكان اللي يحطون فيه اغراضهم .. تمت منصدمه ويالسه مكانها تتطالعه .. محتاره هذا شخص ولا ظل .. شو السالفه !!! حركت يديها كنها تسوي بيباي .. بس ماتحرك .. نشت .. بهاللحظه طاح شعرها كله وتناثر حولها .. هيه مانتبهت لشعرها لبست نعالها ومشت صوب المكان لين ماتاكدت ..وعيونها بعيونه .. مب مصدقه .. بهاللحظه وهيه واقفه على بعد مسافه قصيره .. غمضت عيونها ثواني .. تريد تستوعب اللي تشوفه .. وعقب بطلت عيونها .. شافت محد .. تمت صاخه .. معقوله تتوهم حمد ..!! اتجدمت صوب الييدار وتمت توايج .. متاكده شفته بعيونيه !!!!! تمت ادوره بعيونها ..بهاللحظه شافت ويهه ونظراته الخجوله .. كانت عيونه تتكلم .. تمت تتطالعه .. هو من حس بنظراتها نزل راسه مستحي .. هي من استوعبت نزلت نظراتها ع الارض .. جان تفترعنه وعضت عشفاتها عالخفيف .. وخذت لها طرف عند الييدار ..
حمد مستحي وااايد وماقدر يتكلم وعينه اخجلت .. بقلبه وااااااايد كلام بس المشاعر والاحاسيس اللي اجتاحته بهاللحظات هزت كيانه .. وضاع الكلام منه .. خاطره بس يقولها وهو بهاللحظه شكثر يريد يسولف وياها بس مب اكثر عن جذيه ..
حمد رفع عيونه بنظره حول المكان : شو فيج ..؟
مزنه صاخه ..
حس بارتباكها وشاف نظره عيونها العذوبه .. وعقب نزلتها عالارض ..
بهاللحظه لزت عطرف وهيه تتنصخ بصعوبه .. اول مره تحس بهالاحساس ..!
حمد: اندوج لوزه .. وحطها ..
ام سعيد : شو وداج هناك تحت الشير هالقايله ؟
مزنه افترت لصوت امها بخوف وعقب ربعت وشعرها يتناثر حولها وحمد شرد وهو زايغ ..ومن سكرت الباب وراها تمت واقفه ورا الباب و هيه مغمضه عيونها ويديها الثنتين ورا ظهرها .. احساس غير !!! آاااه ..
واشوي وسعيد حادر عليهم ومن شافه ابوه افتر بطرف راسه الصوب الثاني كنه كاره شوفه ..
سعيد من عند الباب وهو حاس بنظرات ابوه: اشحالك ابويه ؟
بو سعيد تم ساكت ومارد عليه ..
اتجدم سعيد صوبه ومسك ايد ابوه عشان يحبها شرات ماهو متعود.. بس ابوه نشعها ابسرعه وهو بعده مفتر براسه الطرف الثاني ..
ومزنه تشوفهم من دريشتها وملامحها بدت تتغير .. ابوها وايد طيب بس مرات له قلب قاسي وهيه تناظره وتتخبره بعيونها من وين له هالقلب ..؟
مشى سعيد صوب حجرته من بعد ماسلم على امه.. من وين بيلاقيها من الدنيا اللي تعتمت بويهه ولا من اقرب الناس ابوه اللي يقسى عليه برمسته ..؟؟؟
ام سعيد : ياراشد بلاك عولديه .. ترا مب زين اللي تسويه .. مب زيين ..
ظهرت مزنه من حجرتها وسارت عند سعيد اللي شافته منزل راسه ومحطي يديه الثنتين عراسه .. رفع راسه صوب مزنه ..
سعيد عيونه غارجه بهموم: تعبت مزنه ..
مزنه تتطالعه وغامضنها مووت ..
سعيد رفع راسه لسقف: آاااااه ..
مزنه من اتنهد اخوها يلست جداه ومسكت مرفق ايده.. تمت تناظره وبدت عيونها تتيمع فيها ماي ونظراتها كنها تواسيه ..
سعيد نش: ابوج يغصبني على شي انا مااروم اسويه .. مااقدر .. مااقدر اني اكون وياها فحجره وحده .. تكلمنيه وانا مب حاسبها .. تحسبي وانا ماحسبها .. ولا وحده تقدر تملي عيونيه من عقب ....(وسكت ..ومن القهر و الحسره ضرب بايده عالييدار) الله ياخذها من عيشه عايشها.. (وبصوت عالي )بذمتج هاي عيشه عايشها انا !!!
واشوي ويسمعون صراخ بو سعيد ..
بو سعيد : الليله تروح وياي نخطب لك .. الليله .. تبا تسود ويهيه جدام الشيخ انته ..؟من معيشنك انته من مشربنك وماكلنك ..؟؟؟تتحراه من خير ابوك ..؟
سعيد يظهر من حجرته : انا عايف طاريه البنيات .. كيف تباني اجابلها صبح ومسي .. ابويه اللي بتربطون مصيرها بي هذي انسانه .. مب جماد ..!!!
مزنه تلحقه ووسط دموعها: سعيد هذا ابوك ..دخيلك لاتعصب عليه ..
بوسعيد : جااااب ..عايف طاريه البنيات .. عايف طاريه البنيات .. هن اللي يموتن عالثرى اللي تخطه ريولك!!! .. الا يزيدك شرف كنك بتناسب آل علي .. هيه اللي بتوقفك عريولك وبترفع راسك بين العربان ..
سعيد رفع حياته وبغيض : ايخسي الا هيه .. مب بنت اللي بترفع راسي ! .. بترفع راسي بنسبها !!..(وافتر عن ابوه) .. اذا جيه مالي نصيب فيها !!! وماريد أناسب شيوخ ..
بو سعيد : خاست عظامك عسى .. واذا الشور شوري الليله تدخل عليها ..!!
سعيد بصوت قوي: ابويه .. مااريد اظلم بنت العرب وياي .. شو ذنبها بتنربط بانسان مب حاس بوجودها .. انا مااريييدها ..
بوسعيد نش وهو معصب: الليله فميالسهم .. وغير هالرمسه ماشي .. هالسالفه نعديبها من شهور نحن مب الا اليووم..
سعيد بحزم وهو منزل راسه وبصوت واطي ويرتجف: ابويه مب ساير ..
افتر ابوه صوبه وهو ومعصب حده وتم ساكت ويطالعه بنظرات تعور القلب .. نظرات من ابو لولده ..
بوسعيد: شقلت ؟..تعصي ابوك يا سعيد ..!!!
سعيد منزل راسه: السموحه ..
واتجدم ابوه صوبه ودفره بالقو: عيل فارج .. فارج ..ظهر من البيت ..(ويأشر بصبعه عالباب) ظهر ..
ام سعيد: لااا راشد وين تباه يسير .. دخيلك لاتقول جذه هذا ولدك قطعه منك ..
بوسعيد وهو معصب: الولد يندفن حي ياعوشه ..ولا انه يمشي كلمته على ابوه ..
سعيد يطالع ابوه: أأأأ .. ابويه فديتك اسمعني..
بو سعيد يقاطعه وافتر عنه: هالبيت لاطبه مووووليه .. ودخل حجرته وهو يتنافض من الغيض ودخلت وراه حرمته عشان تهديه ..
ومزنه يلست عالارض وانهدت صياح ..
سعيد سار صوبها :لا حبيبي لا .. لا تصحين ..خلاص فديتج ..( مسك يديها الثنتين) لالا مزنوه لاتصحين مزنوه ..
مزنه تهز راسها: مابا .. لاتروح مابا ..ماعندي اخو غيرك ..(ولوت ع رقبته ) لا سعيد لاتروووح ..
بهاللحظه سعيد خنقته العبره وتم لاوي عليها: غناتي .. انا وين ساير ؟ الا هنيه بيت واحد من الربع ..
مزنه : والله لو ادري جيه بيستوي .. بخليك تاخذ حصووه .. ولا اني انحرم من شوفك ..
سعيد لوى عليها ماتهون عليه اخته ..
من ظهر سار المسيد يصلي العصر ومن عقب سار المزرعه وهو يمشي جدا الحوض شاف بنيه واقفه عند الطوي تسحب منه ماي ومن انتبهت لسعيد افترت عنه ومشت داخل العريش ..هو متعود يشوف بنتين بالعاده ..مشى صوب النخل ..وهو يمشي رفع راسه صوب العريش وشاف البنيه ترمس عقاب .. عرفها .. اشوي والا يدخل خليفه والشبيبه اللي وياه من الباب الكبير ..
عقاب من انتبه للرياييل: دشي دشي داخل .. ومن تخلصين شغلج ابسرعه روحي البيت.. ونزل من الدريات ..
حصه من عند الباب تناظر خليفه: اااه ..فديتج لطووف شو تسوين اللحين؟ اشتقتلج مووت ..
عقاب افتر صوبها:شووو؟
حصه : لا ماشي اكلم روحي ..
عقاب وهو يفتر عنها براسه: ههههههههه تخبلتي شووو!!
حصه تشل السامان اللي يابته وياها ..وبحسره: شكلي جيه ..
وهيه تعابل الفواله وترتبها بالحرارات تمنت لو لطيفه وياها وتساعدها .. كانت بتتفنن وياها بالترتيب وبتضحك على تعليقاتها اللي اشتاقت لها ..بلحظه سمعت حد من الشبيبه يزقر باسم سعيد وعقب ضحك بصوت عالي .. نشت وتمت تتطالعهم .. ماحصلته .. تمت ادوره بعيونها .. بعد لحظات .. شافته يالس ويه خليفه وملامحه حزينه وبنفس الوقت غضوبه .. غصبن عنها نزلت دمعه من عيونها بذيج اللحظه ..جان تفتر عنهم..
حصه بحرقه: أكييد يرمس عنها .. لهدرجه يحبها !!! من حلاته هالسبال احرق يوفي بسبته .. الله بلانيه بحبه ..!!! أكرهه ماحبه .. ماحبه (رفعت راسها تتطالعه) أحبه .. أحبه والله أحببببببه .. مب بس احبه الا اموت عنظره منه ..
بهاللحظه رفع سعيد راسه صوب خليفه وهو مندمج بكلام خليفه اللي يالس يرمسه بكل اهتمام .. هني حصه حست سعيد غير ..مب سعيد اللي متعوده تشوفه دوم .. سعيد هذا شال هموم الكون كله فوق راسه ..
حصه : منوه متعبنك هالكثر !!! وايد تحبها ..؟
اشوي والا يدخل عقاب يشل الفواله .. وهو يوخي عشان يشل الصينيه: خلصتي ولا بعدج ..؟(وفج اعيونه) شووهااااا الرقاق غامستنه بالدبس امره !!!
حصه صوتها متغير: لطوووف كانت تدهن الرقاق ..
عقاب وهويرتب الفواله : وين الدهن انزين ..
حصه: لطوف كانت تحطه ..
عقاب: بلاج كله تهاذين ب لطوف لطوف ..!!
حصه: لطوووف كانت تسوي هالشغلااات ..
شافها اخوها وهيه تمسح دمعتها: شو فيج؟
حصه بهمس: ماشي .. (وتمت ترتب الفواله )
عقاب: اربيعتج لطفووه ..
حصه:لا .. اشعره دخلت بعيني ..
عقاب طرت عباله ميثه:اشعره تخلي ارموش اعيونج ذابله.. ومن اثنيناتهم بعد !!!
حصه ساكته ..
تم يطالعها وهو يتذكر ميثه و حصه مستغربه من نظراته الهايمه: شو بلاك؟ لاتتطالعني جذه ..!!
عقاب حط الصينيه فوق راسه ونش: يالله روحي البيت .. ولااقولج لا تروحين بروحج بزقر واحد من اليهال اللي يلعبون ف السكه وبخليه يوصلج ..
وهو طالع تمت حصه تشوفه لين ماسار عند ربعه وتمت تتطالعهم وهم يمشون ويتيمعون حول السفره ..
حصه: ليتك تدري بلي فقلب اختك يا عقاب ..آاااااه ..
لطيفه : ودووووووووم .. شو رايج تساعديني بهالرغيفاات ..
وديمه وخت عالارض: ماطلبتي الساع ..
واشوي والا وحده منهن تباغم .. وكلهن افترن صوبها ..
الريم تربع: والللله والعظيييييييييييييم شفت ريال راقد في العريش الثاني .. والله ..(وتاشر صوب العريش )..
وديمه: لامنوه ..مااعتقد حد يرقد هنيه ..!
..
حصه : والله ..!! وراحت عشان تتاكد .. والبنات يتوعدون فيها ..
وديمه : لااا حصووه عن ياكلج .. قصدي يشوفج ..
الريم اتير طرف ثوب حصه : اييييه لاتروحين ..مافينا عالفضايح ..
من وايجت حصه شافت سعيد يالس يتسفر وهو بعده عالفراش ..
حصه باستغراب: سعيد ..!!!!
سعيد اطالع البنت بنظره وعقب نزل راسه وكمل ربط سفرته وهو بعده منزل راسه ..
حصه ردت صوب البنيات وهي مستغربه وبنفس الوقت عيونها ادمع ..
حصه: اتغطن بنات شكله بيظهر اللحين ..
وكل وحده ترابعت تلبس عباتها وبوسط هالربشه طاحت نظره من عيون لطيفه بعيون حصه وتلاقت النظرات ..كانت نظرات شوق ووله .. حصه خذت لها طرف اما البنات كل وحده مسكت شغلها ..
سعيد بصوت كله ارقاد: درب ..
سعيد وهو متردد و مار من عندهم: احمحم .. صبحكم الله بالخييير ..
البنيات: صبحك الله بالنور والسرور ..
وديمه بعد ما شافته راح ابعيد: الريم شو مودينج العريش الثاني ..؟
الريم: والله سرت اشرب يغمه ماي ابلي ريجي .. وماشي الا باغمت من ريته .. حليله هههههههههههههههههههههههههه ..
لطيفه: ممكن تسكتن لانه ورانا شغل واايد ..
الريم: وليش شو فيها إن رمسنا واشتغلنا بنفس الوقت ..!!
وديمه: بالعكس جذيه مابتحسين بالوقت وبتلاقين روحج مخلصه شغلج ..
لطيفه: ماشاء الله عليكن حافظات دروسكن .. يالله يالله بسكن هذربه ..
واشوي ويسمعون صياح حصه .. راحن صوبها حتى لطيفه فلخت من شافت حصه مكوره على روحها وتصيح بصوت عالي ..
لطيفه: حصه اشفيج ..؟
حصه صاحت أكثر ..
وديمه : حصووه شي قرصج .. ؟
الريم : لاااااا مب وقته صياحج الخبز بينحرق ..
لطيفه مسكتها وودتها العريش الثاني ويلست تكلمها بصوت واطي ..
لطيفه: غناتي شو فيج ؟
حصه تتطالعها بعيون كسيره: ريت سعيد ..!!
لطيفه : هذا اللي ظهر سعيد ..؟
حصه تهز راسها وهي تمسح دموعها بظهر كفها ..
بهاللحظه مسكت لطيفه راس حصه وحطته عجتفها ..
لطيفه : حصووه خلج قويه ..
حصه: مااقدر احبه .. وتمت تصييح .. كنه ربج كاتب لي الشقا والسعاده محرومه لي ..الموت اهون من هالاحساس ..
لطيفه : لاتقولين جيه .. اذا انتي ماتبين روحج نحن مانصبر دونج .. كنج نسيتي انتي شو بالنسبه لي ؟؟ حصووه الحياه ماتوقف .. الدنيا مب بس حبيتي شخص ماقدرتي توصلين لقلبه .. الحياه فيها عباده .. حبج لربج وعبادتج له هالشي يخليج أسعد انسانه فهالدنيا .. وحبج لهلج لبوج وامج واخوانج وخواتج .. حتى ربعج ..
حصه وعيونها متروسه دمع وتلمع لمعان حاد: بس أنا ..
لطيفه قاطعتها : لا بس ولا شي .. اذكري الله ..
وعالضحى ردن بيوتهن .. ولطيفه من ردت البيت شافت امها محتشره عند ابوها وهي تفتر بالليوان وادخنه ..
ام لطيفه: ماشي فايده منها ماشي ..
مشت لطيفه صوبهم .. وسلمت عليهم ..
ام لطيفه تتطالعها بنظرات: وعليج السلام ورحمة الله هاه يتي .. ماشاء الله علييج ..
بو لطيفه يطالع حرمته بنظرات: وعلييج السلام ورحمة الله .. ها بنيتي كل شي تمام خلصتن شغلكن .. مابقى شي ..
لطيفه مستحيه وهيه تعدل شيلتها: هيه الغالي.. خلصنا ..
ام لطيفه: رمسها شو تتريا بعد ..
لطيفه: خير ابويه شو مستوي عليكم ..؟
بو لطيفه أشر بايده ع التكيه اللي جداه :تعالي بنتي يلسي ..
تحركت لطيفه ويلست حذاه ابوها ..وبهاللحظه طرا عبالها خليفه ..
بو لطيفه يناظر حرمته : الخير بويهج يابنتي .. بوخليفه رد رمس عليج ..
ورفعت راسها صوب ابوها .. وهيه ساكته وتتمعن بكل كلمه ينطقبها ابوها ..
بولطيفه: يقول ولده شاريج ويبيج .. بنتي والله متلوم من بوخليفه ..ماادري بشو أتعذرلهم هالمره..؟
ام لطيفه تناظر لطوف بنظرات:وينه السانج .. رمسي ابوج قوليله ماتبينه !! بس حاشرتني انا ..!!
بولطيفه : لا حول ولاقوة الا بالله ..ياحرمه.. العرس مب غصب .. هذي عيشه عمر .. والبنيه جانها مرتاحه بترضى فيه .. وجانها ماتبيه بعد هذا هو حقها .. اشفيج انتي اشفيج ماتقولين ..
ام لطيفه تقاطعه:شله ماتبيه ولد محمد !! ..وين بتلقى اخير عنه ؟.. واحد متعلق قلبه بالمسيد وين بتلقين احسن منه ..!!
ولطوف منقهره من تعليقات امها .. تراها ماسمعت الرمسه اللي قالها بحقها ..!!!!!
بو لطيفه : لا اله الا الله .. بلاج ..!!!!
ام لطيفه مغيضه وتاشر بايدها : ثري شو قلت هذي هيه بنتك وتخبرها روحك .. وراحت عنهم ..
ام لطيفه تحب خليفه وايد وما تبا تفرط به .. وعشان جيه هي قلبها معورنها وتباه لبنتها ..
بو لطيفه يطالع حرمته وهو يضحك:ماعليج من رمستها .. خبله امج ..
لطيفه وهي تضحك: ابويه لاتقول عن امايه جذه ..
بهاللحظه بو لطيفه حس بويه بنته يشع نور وفرح وحسها جذه انها موافقه وما حرجت مثل كل مره ..
بولطيفه: خلينا من امج اللحين ..هاه شو الراي ..؟؟؟
..
والعصير ومن بعد صلاه العصر .. طش مطر على الفريج .. والكل يحوم خاري الفريج ..من شبيبه ويهال ..والحرمه اللي تقضي حايتها مع يارتها .. وقوم ميثه .. يلعبون في الحوي ..وحمد كان راكب شيره اللوز عشان اييب لليهال منها .. وهو يقطع اللوز جاف مزنه تمشي في الممر .. سوالها حركه عشان يلفت انتباها ..
حمد وهو يخوز الاغصان : تسسسس ..(وبدى يعلى حسه) .. حووووووه ..
مزنه من لمحته بين الاغصان ..ربعت حجرتها .. وهو يجوفها وهي تربع الحجره ضحك من خاطره ..جان يستحي على ويهه واطالع عيال خواته وهم مرتبشين ومب حاسين به ..بهاللحظه يلس عالجذع عشان ينزل .. بس جافها وهي تناظره من دريشه الحجره .. وتبتسمله .. هو من جافها وهي محطيه الشيله عراسها وماده بوزها عطرف ابتسملها من خاطره .. هي من جافت ابتسامته .. صخت من اللي تشوفه ..فديت صنعته يااربيه .. هو من انتبه لحركتها انها واقفتله عند الدريشه وتجوفه بهالنظرات..حس فيها بهاللحظه غير .. ااااه ليتج الا قربي .. وتم يبتسملها وهي تبتسمله ..
راشد: خاااااااااااااااااااالي ..
حمد فز من صوت راشد: ويعوووووووووووه ..
مزنه: ههههههههههههههههههههههه ..
افتر حمد صوبها ومن جاف ضحكتها ..ضحك من خاطره .. فديتها والله ..
حمد: رشوود اسكت..
بهاللحظه دشت امها ووياها حرمه ..ومزنه سييده شردت ..وحمد نزل ابسرعه ..
بهاللحظه سعيد وخليفه في المزرعه..
سعيد: والله اني متلوم فعقاب .. مااقدر احط عيني بعينه ..
خليفه: والله ماادري شاقولك الله يكون فالعون ..
سعيد: مارييدها يا خليفه .. حصه بنت الشيخ علي ماااريييدها ..ليش مايفهموني ..
بهاللحظه حصه حطت يديها اليمين عثمها وهي تصيح بصمت .. سعيد يالس يجرح فيها وهو مايعرف بوجودها في العريش ..
سعيد: ليتهم بس يقولون سعيد بن راشد مات عشان مايرمسون بهالسالفه ..
خليفه: اعوذ بالله ..قل لا اله الا الله .. وخل عنك رمسة اليهال هذي ..
وفجاه خليفه سكت ..انصدم من البنت اللي فجاه طلعت وراهم .. وهو ساكت ومنزل راسه وكل اشوي يطالع سعيد .. اللي مب حاس بشي ..
خليفه: انا اترخص ..
سعيد مستغرب من ردة فعل خليفه: تعال وين ..بنسير رباعه ؟
حصه وسط دموعها: اذا انته ماتريد الشيخه حصه بنت علي فانا ماريدك مليوون الف مره ..
سعيد افتر صوبها ولا اراديا: حصه ..!!!
حصه بهاللحظه نزلت غشوتها: هيه حصه اللي حبتك سنين ..
سعيد استغرب من هالرمسه ..حبتك سنين ..!!! تحبني ..!!
سعيد وهو بعده مب مستوعب: اختي ..
حصه تصرخ: لا تقول اختي ..
بهاللحظه سعيد افتر صوبها وهالمره ومن لمح ويها نزل راسه على طول وهو يرتجف من الموقف ..
سعيد : حطي الغطاه انا محرم عليه شوفتج ..
حصه : لااااا مب كيفك ..
سعيد : لا اله الا الله ..
حصه تمسح دموعها: تصدق .. بهاللحظه شعوري غريب ..احبك واكرهك بنفس اللحظه .. اذا انته ماتبيني انا بعد ماابيييييييييييييييييييييييييك ..
سعيد نش وافتر عنها: مالها داعي هالرمسه ..
حصه بصوت اقوى: لااااا .. سعيد انا حبيتك من كل قلبي .. حبيت من قلب وضمير واصدق الاحساس ..
بهاللحظه سعيد قطع رمستها وبصوت اقوى عن صوتها: الشيخه ..ماريييد اغدر باربيعي وانا نيتي نظيفه ..الشيمه جوفي طريقج ..
حصه منزله راسها: الظاهر اخطيت في ظني وصارحتك..
سعيد : السموحه ..
حصه: لحظه ..
سعيد وقف ..
حصه: علم غرورك عزتّي مالها حد ..
ومن الغيض اللي فيه مشى عنها وراح وميت غيض بسبب سالفه ابوه واللحين ظهرت له حصه وكان معصب منها واايد هاذي كيف تتجرا وترمس أي واحد جذه .. انا اربيع اخوها ..ومن كثر ماهو معصب حط حرته بخليفه ..
سعيد بعصبيه: شهالحركه اللي سويتها ؟؟
خليفه : اشفيييك أي حركه ..
سعيد: ليش ماقلت في بنيه في العريش شردت بعمرك يالنذل يالخوان ..!!
خليفه: ههههههه شسوي والله احس بعمري رزه من بينكم ..
سعيد: لا صدق ! .. عيل وقسمبلاااه النذاله تسري بعروقك .. وراح ..
خليفه : ههههههههه تعااال شو قالت لك ..؟
وطلع من المزرعه بكبرها وخلا خليفه يزقره عند النخل ..
ويومين بالتحديد وانتشر الخبر انه خليفه خطب وبنت علي وافقت .. والكل الحرمات يرمسن بهالسالفه وماعندهم غيرها .. وعقب اسبوعين بيكون عرسهم يعني قبل موسم الغوص وهذا كان شرط خليفه ..وخليفه من عرف بموافقه لطيفه .. اول شي سواه ركض ركيييض وخلا الدنيا مغبره وراه.. وراح يبشر سعيد اول الناس ..
خليفه :واخيييرا ياسعيد .. واخيييرا .. والله لأندمها واخليها تذوق اللي ذقته منها .. هههههههههههههههههه لا مب مصدق ..
سعيد مستانس : والله تستاهل .. تستاهل ياخليفه ..
خليفه يحرك يديه بطريقه مرحه ويوصف مشاعره بكل احساس: خاطري اتييني بنيه صغيرونه وبسميها رويّه ..هيه رويّه.. خلااص من اللحين اقولك بسميها رويّه .. والله لادلعها دلع ما دلعته بنت قبلها هههههههههههههههههه ..
سعيد : ههههههههههههههههههههههههههههههه اشتغل الخبال وجدام العرب تسوي روحك رزييييين ..هههههههههههههههههههههه ..
بهاللحظه اتغيرت ملامح خليفه : لا عاد هذي الحرمه .. الفال لك إن شاء الله ..(ويغمز له) ..
سعيد وبدت تتلاشى البسمه من وييهه وبصوت حزين: من عقب ميثه .. لا ماظنتيه ياخليفه ..
خليفه يدزه: لا إن شاء الله بنت الشيخ علي ..(ويرد يغمز له بطريقه حلوه ) ..
سعيد ونظراته عالسما حزينه وروحه جنها تناجي ميثه : مجروح من راسي لساسي مجروح .. كلي على بعضي الجروح دفينا ..اقوم واقعد مااعرف وين ابا اروح ..ظايق وظاقت بي ليالي حزينه ..ابكي ولو ابكي مافادني النوح ..جرح البحر هايم وقلبي سفينه ..
سعيد وخليفه من عقب ماصلو صلاة العشى سارو البحر يتمشون .. ومن عقب كل واحد سار بيته والبقعه خاليه من الماره وهدوء وظلمه وهو ساير درب المزرعه لمح واحد يمشي صوبه وكان متلثم .. ووضعه غريب ومريب ..
فلان: السلام عليكم ..
سعيد مستغرب من وضعه: وعليكم السلام ..
فلان: انته سعيد بن راشد صاحب دكان القراقير ..
سعيد : هيه نعم ..انا سعيد ولد راشد .. مامن شر يالطيب ..؟
بهاللحظه وبدون سابق انذار هالريال دز سعيد بقوه وطيحه عالارض رغم بنية سعيد القويه الا انه مارام عليه وطاح ..
سعيد وهو طايح وبصوت حااد: اتخبلت !!!!!!!!! انته منوه ؟؟
والريال خايف حد يجوفه تم يتلفت يساره ويمينه.. وعقب ربط السفره بقوه عشان مااطيح .. وطلع شي من مخباه ..سعيد بعده مانتبه لهالشي اللي ظهره من مخباه ..
سعيد معصب : بتخبرك انته منوه ؟؟ وشو تريد ؟؟
بهاللحظه استغل سعيد هالثواني ومسك اريول الريال وحاول طيحه بس الريال مسك سعيد وتمو دقايق وكل واحد منهم يحاول يغلب الثاني ..وسعيد من شاف وانتبه لسجين اللي بايد الريال .. عرف انه ناوي ياذيه ..
سعيد بوسط المعركه وهو مستغرب: شو لك حق عندي ..؟
فلان : انا لازم اذبحك لااااااازم الليله انته تنقتل .. لازم اجتلك ..
بهاللحظه حاول سعيد يسحب السفره عن ويهه ..عشان يعرف من هذا اللي ناوي ياذيه ..!!وقدر عليها .. بس الريال افتر براسه عطرف الثاني عشان ماينكشف وهو يضرب بالسجين وتعمد تكون الخاصره مكان الضربه ..بهاللحظه سعيد صرخ صرخه اهتز الفريج كله من صداها ..وماقدر يسيطر على عمره ..
سعيد مغمض عيونه:آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه ..
والريال شل سفرته ومن الخوف نسى السجينه وهو يركض ويطالع وراه بخوف مب طبيعي ..ركض صوب البحر واختفى فجاه ..
سعيد حاط ايده عخصرته ويتالم ويجوف الدم ..فجاه صارت كندورته لونها حمره .. وين يروح بهاللحظه وين ؟ ..!!ماله مكان ..غير المزرعه ..
وباجرها الصبح حصه ولطيفه سبقو البنيات من وقت .. وحصه تفتر داخل العريش جافت عطرف خرس الماي فيه دم حتى الحصير ..
حصه: لطفووه جوفي بقع دم .. شو السالفه ؟؟
لطيفه: اكيد هذا اللي ذابح الذبايح ..
مشت لطيفه مكان اللي يودي العريش الثاني ولمحت طبع يد فيها دم ..
لطيفه خايفه: حصووه والله انا خايفه جوفي الدم بكل مكان .. جوفي هالطبعه ..
حصه ماتفاهمت سيده دشت العريش ولقت واحد راقد وهو ينافخ بصوت عالي واشعه الشمس ضاربه على ويهه ومن الاشعه بينت العرق فويهه .. وكندورته حمره عطرف بطنه..وجداه قطعه فيها دم وااايد .. ركضن صوب الشبيبه .. وتفازعو العربان وسعيد ودوه بيت هله وماتم حد بالفريج مادرى بالسالفه.. والكل يصيح وميثه من درت صاحت بصمت فحجرتها بعيد عن العيون ..
مرن يومين ع سالفه سعيد والكل يحاول يستجوب سعيد بس سعيد يقولهم مايعرفه مب من فريجنا .. ومرات يهاذي بكلام مايعرفوله .. ومن هالكلام مزنه ميزت اسم ميثه ..والشيخ علي حلف يمين مايطوف هالسالفه و طرش عربه الفرجان اللي حواليهم يتخبرون عن هالسالفه ..
مره من المرات الحزينه ..ميثه ظهرت من حجرتها ..وهي طايفه في الممر مسكتها يدوتها ..
يدوه: اشفيج من يومين ملازمه حجرتج ولا ظهرتي تتخبرين عن احوالي..؟
ميثه بصوت واطي : ماادري ..
يدوه تتفحص ميثه : عيونج غاديه حمر .. بلاهن بنتي ..عسى ماشر ؟
هني ميثه ماقدرت تستحمل لوت عليها وهي تصيح بالقو..
ميثه: يدووه مااعرف ..
يدوه فالخه: شو فيج ؟
ميثه وسط دموعها: والله مااعرف ..
يدوه وايهتها: بنتي شعنه الصياح تشكين من شي .. شي يعورج؟
ميثه محطيه يديها الثنتين عويها: يدووه احس اني بمووت ..
يدوه يودت راس ميثه بيديها: بسم الله عليج .. انا قلت لابوج اييب لج المقراي بس هو هامنه شغله يراكض عليه .. وقامت عيونها ادمع ..
ميثه: مارييد المطوع ..
يدوه وصوتها بدى يتغير: عني ماذوق حزنج عسى .. اشفيييج عيل !!!!!!!!!
ميثه من جافت دموع يودتها: يدوه فدييتج ليش تصحين والله تزيدين عليه جذيه ..لا تصحيين الله يخليج ..
يدوه تمسح دموعها بطرف شيلتها: بنتي مب عايبني حالج ..انتي كله اروحج وتهاذين بهالرمسات ..
ميثه: بس انتي لاتصحين فديتج ..
يدوه صوتها متغير من الصياح: وانا من لي غيركم .. انتو عيالي ووناستي بهالدنيا ..
ومسكت ايد ميثه وقادتها الليوان وعزرت عليها تاكل من الفواله ..
ميثه متردده: امممممم يدوه ..
يدوه اطالعتها بنظره وهي تمسح عراسها: عونج غناتي؟
ميثه منزله راسها: يدوه بتخبرج سعيد بن راشد شو الحال عليه ؟
يدوه: لا اهون الحمدلله ..اليوم الضحى انا وامج سرنا صوبهم ..
وسكتت .. وبعد دقايق ..
ميثه: يدوه انتي دشيتي عنده سلمتي عليه تخبرتيه عن حاله روحه ..؟
يدوه ترتب فوالتها وقهوتها: مزنه حرمة حمد تقول راقد .. ولا انا سايره اسلم عليه واجوفه ..
ميثه تنهدت: يالله تشافيه يالله .. يدوه ادعيله دعوتج مستجابه إن شاء الله ..
..
ومر اسبوعين وسعيد تشافى بس العوار يلازمه بين فتره وفتره .. وسالفته تمت مجهوله وهل الفريج بدو ينسونها اشوي اشوي .. بس خليفه وعقاب مستحيل ينسونها .. لازم يعرفون من هو ؟؟؟؟؟؟؟؟؟؟؟؟؟؟؟؟؟
اليوم عرس خليفه ولطيفه وكانت طقوس العرس خفيفه .. هاليوم اللي ما تم حد من ربع خليفه ما ارتبش خاصه سعيد كانت الفرحه امبينه بعيونه ..ولطيفه مب مصدقه انه خليفه خلاص صار ريلها .. حتى خليفه نفسه مب مصدق لطيفه واخيرا وافقت عليه واليوم عرسهم .. بس في اثنينه كانو يجفون بعض .. حصه من جافتها وتتذكر سعيد وماتريد ترمس وياها .. اسمحيلي ميثه بس شو اسوي غصب عني ..!!!وحتى ميثه نفس الشي .. وميثه من شافت حصه وخواتها يدخنن الحريم اللي صوبهم ..نشت ..
ميثه: يدووه بسير عند العروس ..
يدوه: ماعليه سيري ..
وسارت وف دربها جافت خت حصه وسلمت عليها ولمحت حصه تتطالعها ..وهذا اول حديث استوا بينهم فالعرس ..واضطرت حصه تسلم ..
حصه:اشحالج ..؟
ميثه: الحمدلله ..امباركن عليييج الخطبه ..
حصه مستغربه: الله يبارك فيج وفحياتج ..
ميثه: السموحه .. بروح عند لطوووف ..
ودخلت ميثه عند لطيفه ورمست وياها اشوي وعقب ظهرت خاري وجافت مزنه وحصه يرمسن عند الممر .. تاملتها ثواني هذي بتكون حليله سعيد ..نزلت راسها بحزن فظييييع وعقب خطفت من جداهم ولا عبرتهم ..ومن وصلت عند يدوتها..
ميثه: يدووه اريييد اروح بيتنا ..
يدوه تتطالعها: بنتي روحي هاتي برقعي نسيته فوق درام الماي ..
وسارت ميثه اتييب البرقع .. ووسط ربشه الحريم واليهال اللي يلعبن فالماي ..ماقدرت تحصله .. بهاللحظه جافت بنت صغيره يالسه تلعب ببرقع بس هالياهل مشت وركضت ورى ربعها جان تفتر ميثه وراها والا تجوف شبيبه يدشون ويحطون القشار في العريش .. وضاعت البنيه من عيون ميثه وتمت تتطالعها لين مادشت الحجره ولحقتها ميثه ..
ميثه توخي لعندها: حبيبي عطيني البرقع ..
الياهل: لا مابعطيج .. وتركض ورى ربعها .. والميث متغصصه منها خاطرها تمط كشتها ..
ميثه تمشي وراها وهي مب حاسه بعمرها لين ماوصلت عند الباب ..
بهاللحظه سعيد واقف عند الباب ويرمس اليهال ومن جاف هالبنت واقفه بهيبتها وتتطالعه ..
سعيد منزل راسه: اختي إذا ماعليج امر بغيتج تزقرين مزنه بنت راشد ..
وميثه صااخه من اللي تشوفه .. سعييد !!!!! هذا سعيد ..قال اختي ..!!!!!!! ليش قالي اختي ..!! تمت ساكته تناظره بكل شوق ولهفه .. فدييت هالويه ..
خشمه .. هالعيون ..
الياهل: مابعطيج برقع امايه هذا ..
ميثه صوتها يرتجف: هاتي البرقع ..
بهاللحظه سعيد ميز الحس هالصوت مب غريب عليه ..!!! .. رفع راسه يطالعها .. لزيم الروح .. روحي الغراميه ..يبا يروي عطشه من شوفها .. ااه اشتقتلها .. يبا يقولها انتي ميثه ولا انا مشبه على حسج ..؟ انا اشتقتلج .. وينج عني ..؟؟؟ جفتي اللي صار فيني ..؟؟ميثه عرفت انه عرفها ..وعقب نزل راسه .. هذي غناتي .. فدييييت هالصوت .. بعدج تحبيني ولا بديتي تنسيني ..؟ ليش هذا كله يستويبي لييييش ..!! احس بعمريه امووت من اجوفها ..
ميثه: اقولج هاتيه ..
بهاللحظه حاول سعيد ياخذ البرقع ومن عقب ضرابه ودز ورفس خذ عنها البرقع وناوله لميثه .. والعبره خانقتنها مووت ..وهي تاخذ البرقع مشت ابسرعه داخل ..
ميثه ترفع غشوتها: ااه .. وتمت مغمضه عيونها واشوي تبطلهن وهي تتذكر شكله .. وقفته .. نظرات عيونه .. حطت ايدها اليمين على طرف يبهتها وتحاول قد ماتقدر انها تنسي هالصوره ..وبنفس هاللحظه تذكرت قايد حست بلوعه مب طبيعيه ..
أنا نفسي بديت انسى ملامح هذي الصوره دخيلك لاتخليني في البوم الصور تذكار ..
بهاللحظه جافت يدوتها ويا مزنه وحصه ويرمسن ..
ميثه: اندوج يدووه ..( وافترت صوب مزنه) مزنووه اخوج يترياج خاري ..
مزنه: والله ..!!
حصه بعفويه: سعيد ..
اطالعتها ميثه بنظره : اخوها ..؟
حصه ناظرت مزنه: ميثووه اشفييج ..؟
مزنه حست الوضع غير ماعرفت كيف تتصرف وياهم بهاللحظه ..يالسين ينغزون بعض ..
ميثه: سلاامت روحج مافيني شي ..
وبهاللحظه سمعت الحريم اللي جدا يدوتها يرمسن هذي حرمة قايد ومن هالرمسه ..
ومزنه سلمت عليهم وسارت ..
يدوه ترد على الحرمه: هيه هذي حرمته ..
البنات افترن صوب يدوه ميثه وهي ترد على الحرمه ..
الحرمه: ماشاء الله تبارك الرحمن ..
حصه تحب يدوه عراسها: فديتج يدتيه .. تمو يالسين اشوي..
ميثه: لا مشكوره .. ورانا درب .. فداعة الله والله يوفقج ويهنيج ..
حصه: من قلبج ..؟
ميثه: من قلبي .. (جان تنزل عيونها )ارجوج حطيه بعيونج ..
حصه حست بدموعها: ميثه ..
كانت حصه بتقولها انا ماارييييد سعيد .. بس ميثه ماوقفت مشت ورى يدوتها ..وخلص العرس على خير..
من دخلت لطيفه حجرتها وخليفه بعده يالس يعابل ف الليوان ..
لطيفه من عند باب حجرتهم مستحيه : اممم اريد اصلي ..؟
خليفه افتر صوبها وهو مستحي: بنصلي رباعه ..شورايج ..؟
لطيفه سكتت وماعلقت ..
عالضحى حريم الفريج فبيت بوخليفه عند لطيفه .. وحتى حصه يالسه تعاون لطيفه بالفواله والدخون.. وامها عزرت عليها من يسيرون الحرمات تروح تسوي الغدى الزين لريلها وتعاون عمتها فكل شي .. وادخن البيت قبل لاايي .. ولا تنسى ثيابه ترتبها وادخنها بالطيب .. وبعد ماخلصت لطيفه من الطباخ والسبوح راحت تكشخ لبست ثوب حلو وفرقت شعرها وادهنت من ذاك العود الغاوي هديه من حصه.. وحطت اشوي منه عخشمها .. ورتبت نفسها وطلعت وااايد حلوه .. وتمت تترياه وكانت يالسه ويه عمتها يسولفن .. واشوي والا تجوف عمتها غفت عالتكيه.. وعقب دخلتها حجرتها عشان ترتاح .. وتمت تترياه روحها ..ياربي وين ساااااااااااااار حشى يا هالشغل اللي مايخلص ..لهدرجه يحب الشغل ..؟؟ وكل اشوي تروح وتوايج عند الممر .. ملت كثر ماتترياه في الليوان راحت عند الممر وهيه توايج لا اراديا جافته يسكر باب البيت .. وهو جافها .. ضحك على حركتها هي من جافت ضحكته ..جان تربع داخل .. من الفشله دخلت حجرتها و لا اراديا قفلت الباب ..
خليفه يضحك بصوت عالي: هههههههاااي تعالي وينج ؟ افتحي الباب ابسرعه يالله (وبخبث)..ههههههههههههه ..
لطيفه يالسه عالشبريه وهي متفشله: مب اللحين ..
خليفه: لا والله مب اللحين !!.. كيفج هو ماتفتحين الباب..
لطيفه: مااريد ..
خليفه بصوت واطي ويطالع الحجر اللي صوبهم وابتسامه ساحره: بضربج بالخيزرانه .. (وسكت ثواني وبصوت هادي).. لطيفه صدقيني انا عاني هالشي ..
لطيفه ساكته وتحاول تكون قويه ..
خليفه يوايج من طرف الباب: يعني مابتفتحين ..؟
لطيفه ماتبا تكسر كلمتها: لا ..
خليفه راح عند الدريشه: بخبر عليج اميه .. (ويفتر يمينه ويساره عن اتجوفه امه ويتفشل وبنظره حاده ).. والله بالخيزرانه عظهرج ..
لطيفه بهاللحظه خافت بس ماتبا تكسر كلمتها تمت معانده فيه ..
خليفه بصوت واطي: مب كيفج .. بابي قبل لا ليكون باب حجرتج وبيتي قبل ليكون بيتج .. يالله اسمعي الرمسه ..ترا بكسره وبخليه حطامى جدامج اللحين ..
لطيفه من سمعت رمسته الاخيره فتحت الباب .. وخليفه من جاف نظره عيونها بهاللحظه استحي و فخاطره يقولها" اللحين بذبحج ..ماعليه ".. بس سكت من حس انها قريبه منه بعده مب متعود ياخذ ويعطي وياها ..
خليفه وهو يتخطاها: تستقوين عليه ..؟
لطيفه اقشعر يمبها من مر جداها وتمت صااااااخه ..
خليفه: وين اميه عنج ؟
لطيفه يلست عالشبريه: فحجرتها ..
خليفه يطالعها بنظرات خبيثه: اشحالج؟
لطيفه نشت: الحمدلله ..
خليفه يطالع خطواتها وهي تمشي: لاتظهرين ..
لطيفه افترت له بس مارمست وعيونها عالارض ..
خليفه وهو يطلع ثيابه: هههههههههههههههههههههه خلاص روحي برحم بحالج ههههههههههه ..
ولطيفه ساكته ماتعرف كيف ترد عليه .. !!ممفففف مالت عليه ..
خليفه وهو يتخطاها بيظهر: اغرفي الغدى وانا بسبح وبصلي ركعتين وبنتغدى يميع .. وظهر ..
اشوي والا خليفه يرد الحجره ولطيفه بتظهر عشان تغرف الغدى ويندق بلطيفه بطرف جتفه..
وتلاقت نظراتهم مره ثانيه بس هالمره وااااااااااااااايد غير .. تمو ثواني يتاملون فبعض .. بهاللمسه حركت المشاعر والاحاسيس بكلا الطرفين .. لطيفه حاولت قد ماتقدر انها ماتبين انها تأثرت بهاللمسه بعكس خليفه اللي اطالعها بنظرات خلتها تنزل راسها .. كان يبا يقولها "عيونج وااايد حلوه" بس ظهرت امه وقطعت لحظه التجاسم اللي بينهم..
ام خليفه: عيل ابوك مايا ..؟
لطيفه نزلت راسها ومشت .. وخليفه تم يطالع مقفاها وهي تروح عنه ..
خليفه افتر صوب امه: هاه ؟
ام خليفه تمشي ف الممر: اشبلاااك .. انشد عن ابوك مايا وياك ..؟
خليفه يحك راسه: لا اميه ابويه ويا العرب ..
وعقب دخل وشل ثيابه وطلع وهو فرحااان ..
وباجرها الضحى قايد سار بيت عمه يسلم على يدوته ماخذنها حجه عشان يجوف ميثه .. وعيال عفره ومريم يلعبون جداه البيت ومسويين حشره وربشه والباب مخلينه مفتوح .. وقايد وهو واقف عند عتبه باب بيت عمه سمع حس وااايد حلو ..
قايد: بطووي .. امايه العوده داخل ..؟
بطي: ماعرف ..
راشد:لا ظهرت ويا يدووه ..
وتم قايد يسمع هالحس الحلو .. ويدندن وياها ومستانس ..
راشد: عمي شو تسوي عندك ؟
ميثه تغني :صباحك صباحين ..صباح الكحل بالعين ..صباح يطرد الفقر ..صباح يوفي الدين ..صباحك الصباحي..والورد والتفاحي ..وعوينتك هالزينة .. سلابة الارواحي ..
قايد: رشوود فديتك هذي اللي تغني خالتك ميثه صح ..
راشد : هيه .. بس عمي عيب هذي مب حركات ريال ..
قايد: جب رشوود .. وتم يدندن .. اااه فدييييييييييييت هالصوووت ياعني ماخلااا ..
واشوي والا اليهال يربعون وبطي محطي ايده اليسار عطرف عيونه والدم يصب منه .. ويمشي واليهال يقدونه وهو يصيح ..
بطي وهو يصييح بالقو: عميييييييييي بمووووووت ..يعورنيه ارييييد امايه ..
قايد وهو فالخ: بلاااك ..؟ وعطول شله ودخله بيت عمه ..والكل اليهال لحقو قايد ودخلو بيت قوم ميثه .. وميثه كانت يالسه ويه سلامه وولدها سعيد ومن سمعت الحشره اللي صايره عند الباب نشت ميثه توايج .. اشوي والا قايد يصرخ.. والكل وراه ومسويين زحمه ..
قايد من جاف ميثه : ابسرعه تفازعي بالقهوه ..
ميثه وسلامه ترابعن من كل صوب .. واخر شي يابت ميثه القهوه بيديها وهي متغشيه .. وشل قايد القهوه وهو بعده ماجاف ميثه وهي حاطه الغشوه وحط اشوي منه عراس بطي..والكل ملتم حول بطي ..
سلامه تمسح الدم بقطعه: يا ويييلي على مريووم ..
قايد انتبه لميثه: انتي شعنه متغشيه !! .. عقي الغشوه اللحين..؟
ميثه ماردت عليه ..
قايد: اقولج عقيها .. وحاول يمسك طرف شيلتها ..
ميثه: اييييييه ..
قايد يرمس سلامه: عيل وراسي تعق الغشوه ..
ميثه : مابا .. وراحت الحجره ..
سلامه: بسم الله شو فيكم ..
قايد : جفتي اختج ..! مغتره بعمرها وايد ..اخ بس اخ ..
سلامه: والله حاله ولد اخوك متعور وانته تتواجع وياها .. خلاص شله البيت ..
احمد يرمس سلامه: اقولج .. ولد يمعه طر راسه بالنشابه ..
محمد يدز احمد: لا تواشي على اخويه ..
وعقب راغهم راشد خاري البيت ..
قايد يطالع الحجره: والله اراويها( وبصوت عالي) السبالاااااااااااه ..
ميثه داخل الحجره وبصوت عالي: محد غيرك السبال ..
قايد: ماعليه .. ماعليه ياميثه ..ليله العرس ..
ميثه منقهره حدها: غدى ريال احسن لك ..
قايد يغلس عليها: هههههههههههههههههههههههههههه والله اني ريال .. فدييييت روحج انااا ..فديت ويهج من يعصب ..
وميثه منقهره منه ..مفففففففففف وتمت ساكته ولا ردت عليه ..
سلامه: والله متفيجييييييييين ..يالله عاده وده عند امه ..
قايد ميت ضحك: هههههههههههههههههههههههههه فديت اللي يتطابخووون اللحين هههههههههههههههههههههههههههههه ..
سلامه تروغه : يالله يالله خاري ..
..
..
مر هالاسبوع حزين على هل الفريج .. واللحين بهاللحظه اهل وسكان جلفار يودعون اهاليهم .. والكل متيمع عالرمل الابيض ويودع الجالبوت * سفينه اماراتيه تصنع محليا وكثيرا ماتستعمل في رحلات الغوص والبحث عن اللؤلؤ " ..الرياييل يقودون السامان للجالبوت وحريمهم يصيحونهم .. الام واليده تصيح ريلها وعيالها ..حتى البنت الصغيره تصيح ماتعرف إذا ابوها بيرد لها ولا مابيرد ..؟ واخوها اللي كان يلعب وياها بيرد ولا لا ؟؟مايندرى بمصيرهم المجهول ؟
قايد يناظر لمه الحريم: حمد اريد ارمس ميثه ..دخييلك ..
حمد وهو يشل الصندوق عظهره: ميثه مايت ..وسار ..
قايد : مايت !! ليش هي مب ويا يدووه وعمتيه ..
حمد: لا اقولك مايت ..
بهاللحظه قايد افتر صوب الحريم ومن عقب الفريج واطالع العرب وهم يتحركون من كل صوب ومشغولين .. وربع ابسرعه ..
خليفه: قاايد .. وين ساير ؟
قايد مانتبه له ..
غيث مستغرب: وين سار؟
خليفه يطالع خطواته: انا ادري ..!!
واحد من الشواب وهو يصرخ: غلامييييييييييييين ..
خليفه وغيث يربعون: إن شاء الله إن شاء الله ..
وقايد من وصل بيت عمه ..جاف الباب مفتوح .. ودخل بدون تردد .. وهو في الليوان ..
قايد ينافخ وبصعوبه: ميثه ..ميثااااااا ..
ميثه طلعتله وما ميزت الصوت عبالها حمد اخوها ..ومن جافته ..سكتت ..
قايد يناظرها وهو صاخ .. يحس هاللقى غيييير ..
بهاللحظه ميثه تغشت وهي مرتبكه..
قايد منزل راسه وبصوت مبحوح: بغيت اسلم عليج قبل مااروح .. (ورفع راسه) مايندرى يمكن بتحقق امنيتج وما بتجوفيني مره ثانيه ..
ميثه نزلت راسها وهي متغصصه من هالرمسه ..لهدرجه قلبي جاسي ..!!
بهاللحظه قايد بدى يتقرب منها .. وميثه حدها مرتبكه بتموت من الخوف ..
قايد بصوت واطي: غناتي ..
ميثه بعدها منزله راسها..
قايد: لاتخافين انا قلت لحمد اني بجوفج ..
بهاللحظه ميثه رفعت راسها تتطالعه ..
قايد بصوت حنون: انا ريلج .. وتم متردد وعقب سحب الغشوه من على ويها .. وبان ويها وجاف الدموع ..
قايد بتاثر واضح: ميثه لا تصحين ..
ميثه تدمع: كيف ماتباني اصيح وابويه بيروح عنا ..
قايد يتاملها .. ااااه احبها والله ..
ومن بعد ثواني تحركت ميثه ولزت عطرف .. وقايد ميت فيها وتنهد من خاطره ..وماقدر يتم أكثر عن جذه ..
قايد: اتحملي من روحج .. مااوصيج ..
ومشى ومن سار ميثه افترت صوبه ..وزقرته .. وهو من بعد ماسمع اسمه عثمها ماصدق عمره ..ابتسم من خاطره وبنفس الوقت جاسه حزن ..
قايد : لبيه فديت رووحج ..
دخلت ميثه حجرتها ويابت قرآن الكريم ولفته بقطعه حمره .. وعطته ..
ميثه مستحيه: اقراه كل يوم ..
قايد : شو ها ؟
ميثه: كتاب الله ..
قايد بهاللحظه اتغير ويهه..من متى ماقرى هالكتاب .. لا وهديه من ميثه ..حس بغصه تسري بجسمه كله .. حس انه مقصر اتجاه ربه واايد .. مب بس بالقرايه الكتاب بوايد اشيا مقصر فيها ..
قايد وعيونه عالقطعه: إن شاء الله ..
ميثه: جنك بطيت عليهم ..
قايد مب مصدق اللي يجوفه: بس مب مصدق ماادري انا بعلم ولا حلم ..
ميثه بصوت حزين: مااوصييك على ابويه ..
قايد مبهت واشوي وبيغمى عليه: لا توصين عليه .. عمي من ريحت الغاليين.. بس انتي لا تصحين (وقالها وهو يناظر عيونها لثواني ) ..فداعه الله .. وحط القرآن الكريم عصدره وظهر وهو مستانس ومب مصدق لا مستحيل ..وهو يطالع القرآن الكريم خاطره يصيح ويصييييييح لين مايطلع اللي بقلبه كله ..هالقرآن الكريم اغلى شي يمتلكه من ميثه ..
وسط ربشه الرياييل والاوامر اللي تنعطى لكل شخص موجود عالجالبوت وهزاب كبار الرياييل انهم يخلصون ابسرعه عشان يتحركون ماشي وقت ..وقف سعيد من بعد ماخلص من شغله على الجالبوت يطالع الفريج بنظره غير .. عيونه كانت ترمس وتقول كلام ..
يا ميثه بشرحلج من القلب الوجيل حالت غريم بعد فرقاج عبر صاب الحشا رجاف ساعات الرحيل والقلب جنه طود بألغام انفجر له من السفر ما طابلي صبح ومجيل من حيرتي تميت مشغول الفكر يا كم انا اون من اليرح المليل الي اصيب افؤادي من ايام الصغر ..
جافه خليفه وصيحبه بس مارد عليه ..
خليفه يمشي صوبه: النوخذا من اللحين ميتيمعبنا ..
اخر شي بدو يتحركون والكل سوا التحيه .. ودعوات الحريم ما انقطعت .. الله يحفظهم ويردهم لاهلهم سالمين غانمين ..
وهم عالجالبوت قايد فرحان بالقرآن الكريم وقاعد يتامل به لانه من ميثه ..
غيث يحط ايده عالقطعه: شوها القطعه الغاويه ؟ شو داخلها ؟؟
قايد: لااااااا تيودها ..
غيث: ليش ؟؟
قايد: والله ما حطيت ايدك ..
غيث مستغرب:شو داخلها ..؟ بيزات ..!
قايد يضم القرآن عصدره: أأأأه .. اغلى عن البيزات ..
غيث: شو السالفه .. اريد اجوف شو داخلها .. ( ويطالعه بطرف عينه ) شكلها صّرة بيزات ..
قايد بنبره غير حسبها غيث: فديتهم ..
غيث يحاول يسحب القطعه: هاااته ..
قايد: يا ريال اقولك لا تيوده ..
غيث منقهر منه: لييييييييييييييييييييش ..؟؟
قايد راح عنه: اغااااااااااااااار ..
غيث لحقه: هههههههههههههههههههه الله لابليتنا .. انزين بتخبرك شو عطتك؟
