عيوب الشباب

[عيوز مشتطه]

السلام عليكم والرحمه .

الله حيكم والحيايين اللي تحيونهم يحيونكم .. يا مرحبا الساااع ..

شحالكم ؟ عساكم الا بخير ؟؟ وشحال عربكم وعربانكم ؟؟

كل يوم والثاني هالشبيبه مطلعين علوم وسوالف علينا .. الحين دورنا ..

يوم لك ويوم عليك ..

في شي يقهرررررررررني فالشباب .. ألا وهو "الخقه ع الفاضي" ... :mf_tongue

وخاصة هذيلا اللي كافخين بالرنج .. "مواصفاتهم"

اللي عنده رنج يخسي يرقعه بمخفي ليش ؟؟ شوفوني انا فلان الفلاني ترى عندي رنج هاا شوفوا .. لو عندك مايباخ ما ادري شو بتسوي ..(مب شايفين خير ) .. ولو عنده سياره عاديه والا من ها الدونيات بيرقعها مخفي 70% ويوم بيركبها بيتلثم بعد .. شو كالفنك يا اخي .. ؟؟

وعمممممممري ما شفت رنج يسرع .. كل حد عنده هالسياره يسوق 20 .. حتى 20 وايد عليه اظني يسوق 5 يحكونها حك على هالشارع .. قسم بالله يبطون الجبد .. يوم انتوا ما وراكم شغله خلوا الشارع لغيركم .. ولو عنده نيسان والا ستيشن اقل شي بيسوق 160 هذا ومن غير انه خاطف على خلق الله ومدعمنهم ..

ولو كان فليل بيشغل ليت السياره عشان يشوفونه زين ما زين .. وعاد ليته ماخذنه كاش .. طبعا بالدين .. والا داق على ظهره سلفيه .. شو كالفنك ؟؟

كشخه ورزه والعطر من بعد كيلو والحاله حاله والمخبى ما فيه الا خرده ريالات واغلبهن نصوص حق الكرك ... يا بويه ادفع دينك وخق وانته مرتاح ..

مدوا ريولكم على قد لحافكم والله يعينكم جانكم بتمون على هالحاله ...

سلملم

:m_ydakhen

 

[بو هزاع]

رد: عيوب الشباب

خذو الشباب تويوتا قالو هيه عندك نيسان انته خذ نيسان قالو هيه عندك مرسيدس انته خذ مرسيدس قالو هيه عندك بي ام انته خذ بي ام قالو هيه عندك رنج انته خذ رنج قالو هيه عندك فراري انته خذ فراري قالو هيه عندك مايباخ انته خذ ما يباخ قالو هيه عندك طياره انته
خخخخخخخخخخخخخ







بس انا انصح الشباب لا تتدين عسبة تتزين احسب حسبه لبيزاتك وقيس الامور على شي زين ترى لو عساك تركب طياره بوينج بتم انته شرات ما كنت لا بتزيد ولا بتنقص


خلك محبوب وحبوب مع الناس وخلك زين ورزين وفنان وطيب وما عليك من رمسة الناس الناس احين تمشي على المظاهر تشوف هاي العالم لو تنفضها نص ما بيطلع منها الا على الراتب يالسين ما عليك منهم احفظ دينك ووربيتك وخلك واعي وفاهم ومثقف وخل لك قرش لليوم الاسود


لا تبسط يدك ولا تقبضها

خل وسط






بوهزاااع

 

[يتيمة زايد]

رد: عيوب الشباب

ههههههههههههههه مو شايفين خيييير وخقه عالفاضي

مشكوووووووووره خيتووووو

 

[شيبه محتشر]

رد: عيوب الشباب

من راااااقب الناس مات هاااااماااا

الحمدلله انه عندي بيك اب بوشنب وضاربنه مخفي فوووووووول
والمشكلة كل افتح الدرايش
تقولين بالسيارة جنيه
لما اكون بالبلاد يشتغل المكيف
بس من يشم ريحة الخط والطريج الطويل يعاند ومايشتغل
خبل فيني

اما عن الفئة لي تتكلمي عنها
فحدثي ولاحرج
بعد انا لاحظت هالشئ ولما يصد صوبك
يصد بشكل استهجااان يقول لك شوف انا راكب رنج
زين راجب رنج ان شسوي فيك
ربي يحفظك
ولما يوقف عند الاشارة يطالع يمين ويسااار
هااااا بشروا تطالعوني والا لا
ولو دققتي على يلسته تقولين يالس بالفريج
مرة وحدة بط جبدي راااعي رنج يمشي ستين
وانا ورااه مستعيل واضرب له هرن ولا طايع يخوووز
الا لما شاااف شنب البيك مالي عند مدعميته
خااااف على سيارته وخااااز
لا وبعد يحتشر
جااااان اوقفه وقلت له ليسن ومليكة لو سمحت زااااغ الريااااال
اتصلت للدورياااات
وصكووووه بمخاااالفة وهو صااااخ
زين عندك رنج بس ماملكت الطريج
خذ اليمين وسوووق على اقل من مهلك حتى لو تنزل وتدز السيارة

واذا ييتي على صاحب الرنج وسالتي عن حالته يطلع لك شرطي والا جندي
وامه وابوه مالقين بيت عدل يسكنونه
وصااااام عمره 300 الف من البنك حتى يكشخ
ولا فلس رااااح لامه
امي عطيني 50 ريااال بصب بترول
والا بااااعه بنص جيمته حتى ماينسجن


وتسلمين عيوزتنا على هالموضوع الحلو لي يبط الجبد

 

[سحروتـــه]

رد: عيوب الشباب

خخخخخخخخخخخخخخخخخخخخخخخخخخخخخخخخ

زين والله يوم انكم اعترفتووووو

الشباب متخبلين على السيارات...ماشين على المظاهر وبس

لا عاد... خقه.... خقه......عاد كله بصوب وراعي الهمر الأحمر بصوووب
أنا يوم اشوف الهمر اتخبل خخخخخخخخخخخخ

خاطري فيه بس يالله كع كع كع

ان شاء الله اخوي بيشتريه وبركبه....كشخه

لا يعني يوم اروح الدوام كل يوم لازم نشوفه وفي الليل الي يقول بس مهيت الأخ بالشارع ماعنده بيت
مسوي عرض بالموتر شو انزين..........مب سياره هذي

عاد كله وللا هذيج السياره الورديه وااااااااااو عجيبه ما ادري مكسيما يمكن خخخخخخخخخخ

بس السؤال ليش كل ها..هل غرضك جذب أنظار البنات وللا شو بالضبط هالخقه...محد بينفعك ابوووي
ديوووووووون على راسك وتمر السنين وانته ماسويت شي.بحياتك....ولللا حاسبت لمستقبلك....ولبيزات بتنفعك بعدين...

اشتري شي على قدك سياره تمشي وياك المهم توصلك للمكان الي تبيه.....

بطره شو بنقول.....

وللا كل شي بصوب وحركاتهم البهلوانيه بصوووب جنه شمبانزي يتنطط على الشارع عنبوووو هب حاله

والحوادث لاعبه لعوبهـا.....سرعه ومصخره واستهبال على الشارع....جنه شارع ابوهم مافي ارواح ثانيه في الشارع...بس سواقه بستهتار.....

وصايره أكثر نسبة حوادث في راس الخيمه...

الله المستعان...

وتسلمين خيتو العيووووز على الموضوع الفنتك...ماقصرتي فيهم...^_^

 

[عيوز مشتطه]

رد: عيوب الشباب

بوهزاع .. راعي الرنج شي ثاني خل عنك رواعي التويوتا والمرسدس .. هذيلا ارحم بوايد عن الشباب اللي عندهم رنج .. بس مره وحده تفيج وراقب الرياييل اللي راكبين رنج .. جنهم يالسين على قصر الملك .. نافخ عمره ع الاخر ومكييييييييييف وكافخ بالنظاره الشمسيه حتى لو كان فليل .. ههه موضه يديده .. مشكور ع النصيحه يا بوهزاع والله يهدي شبابنا ويصلحهم ..

=================

يتيمه زايد .. قلتيها "مب شايفين خير" ومشكوره خويتي على الرد .. بس ليتج زدتيهم شوي بعد من الكلام الحلو خخخ ..

=================

الشيبه .. الله يخلي لك هالبيك اب العجيب .. والا داقنه بمخفي ههه خطير انته بعد .. (الحمدلله اول مره ما يتهندق) .. زين يوم انك وقفت ويا الحق .. حد ما يشوف شنب البيك اب مالك ولا يخوز عن الدرب .. لا لا مستحيل .. مشكور خويي على الرد ..

=================

سحروته .. مبروك ع الهمر مقدما .. ويوم بتاخذونها اخطفي عليه باخذ لفه وياج خخخخ .. والله يبعد عنا هالمخترشين ويفكنا من شر الحوادث ..

 

[سحروتـــه]

رد: عيوب الشباب

ان شاء الله يارب ....والله يبارك فيج
أفاااا عليج يدوتي ولايهمج وبخطف صوبج وباخذج وياي
وبنشخط ويلات جدام بيوت الأعضاء وبنغبرهم خخخخخخخخخ

توني يالسه انصح كع كع كع....

بس تحملي عن أجلب فيج خخخخخخخخخخخخ ترى روحي اخاف من السواقه
نيهههاهاهاااااااااهاههاااااااااا

 

[عيوز مشتطه]

رد: عيوب الشباب

نيهاهاهاهاهاهاااااا ما عليج انا اعرف اسوق وبشخط بج تشخيييييييييييييييييط خخخخ ..

عاد اخاف اتخبل واسوي حركات شرات رواعي الرنج .. خخخخخ

 

[بنت الدكتور]

رد: عيوب الشباب

هي و الله بردتي لي قلبي.........




صدق راعي الرنج بالذات نافخ عمرة على الفاضي روحة داق سلفية ....خخخخخخ




الله يعينا على هذيل الشباب...

 

[مواطن]

رد: عيوب الشباب

خخخخخ

حالتهم حالة هذيلا شو كالفنكم يا بوي مب زين هيدوو

بس شو تقولين

منهم ياخذونها منظر يعني ما يصير أشتغل في أدنوك و لا أكون مهندس طيران و أركب كروزر أو نيسان منقود عند العرب

والله حالة


والكشخة مطلوبة لكن بعقل يعني

ولا اسمع كلام فلان و علان و أشوف هذا شو راكب و شو لابس


ومثل ما قال الشيبة تلقين الواحد لابس و سامت و رزة و غيره و من هناك ديون الدنيا فوق راسه

هذا اذا ما بايع بيته و أملاك أهله و ساكن باجار

ومب قادر لا يصب بترول و لا ياكل مثل الناس

الله يهديهم


ويعطيج العافية حبتي ع الموضوع