رد: الردود والأسئلة والأستفسارات الخاصة بدورة التصوير
مبدعتنا غناتي..
هلا بج زوود..
زين يوم يبتي العذر الطبي..والا كنتي بتتعاقبين..
بالنسبة للعدسات بناخذ عنها شرح وافي في درس العدة والعتاد..
وأن شاء الله بتحصلين من الدرس فايدة كبيرة..وبتتعرفون على أنواع العدسات..وبقدم لكم أقتراحات ونصائح عن العدسات اللي تحتاجونها..
بالنسبة للعدسات فعلا ..
أحيانا تتجاوز قيمتها قيمة الكاميرا بوايد..
مرة خذت الكانون 400D كان سعرها بحدو 3000 وما أدري كم بالضبط..وخذت عدسة الوايد أنجل من 10-20 مم بـ3200 درهم..وعدسة التيليفوتو من 70-200مم بـ7000 وشويه..وعدسة الماكرو100مم بـ2500..
فسبحان الله.. المشكلة مب في الكاميرا..المشكلة العدسات..
بالنسبة للـ5D mark2 قيمتها بدي من غير عدسة بـ11000 درهم..ومع العدسة من 24-105مم بـ14500 درهم.. أنا كنت ماخذنها مع العدسة بـ16000 درهم..
بس الصراحة كاميرا الواحد من ياخذها مايرضى بغيرها أبد..
والسوني اللي كانت عندك وايد حلوة.. بس مشكلتها الحدة..بالرغم من أن العدسة المستخدمة فيها كارل زيس الألمانية ذات التاريخ العريق ..بس ماأدري ليش..
تدرين..وايد خذت من هالكاميرات..بس ماعيبني الا الكانون والنيكون كول بيكس.. أحسهم روعة ودقة الصور والألوان ماشاء الله..
ميلان خط الأفق ماعليج منه..مادام عندج الفوتوشوب.. وبتشوفين كيف يتعدل بكل بساطة..بس الأفضل تحاولين تضبطينه يوم تصورين..
أفضل شي أنك تخلصين شغلك كله في الكاميرا..وتحطين لمسات بسيطة في الفوتوشوب..لا تتسرعين وصوري بعد ماتتأكدين من كل شي..
تدرين أني ساعات أطلع من البيت الساعة 3 الفجر عشان اصور وقت الشروق..بس يوم أرجع أختار من 300 الى 500 صورة يمكن 5 والا بالكثير 8 صور بس..ساعات ممكن أتوفق في أكثر..لكن ماأحب آخذ الا اللي متأكد منهم..
التصوير هواية لذيذة جدا..وراقية..ولازم تحبينها عشان تبدعين..
سبحان الله في ناس مايكلفون نفسهم حتى يفتحون زجاج السيارة عشان ياخذون اللقطة..
أو يستخدمون حتى الترايبود..
وأنا أعرف ناس تطلع من بيتها الساعة 2 في الليل عشان بس يلحق يوصل للمكان اللي يبغيه ويختار الكادر المناسب وييلس يتريا الساعة 5.30 عشان ياخذ كم لقطة..
لو تمينا نرمس مابنخلص..
المهم ..
تابعوا الدروس..واسألوا..ولا تستحون ..
عادي..أنا عندي أستعداد أني أشرح الشي 1000 مرة عشان يستفيد ولو شخص واحد..
المهم أني أحس أني قدرت أوصل لكم شي مفيد..