رد : لين متى
شحالج يا حلوه ؟؟ موضوعج الصراحه حلو .. بس قبل ما أبدأ أحب أقول شي لج و لبعض الأعضاء
أجمل الخالات .. المتحدث الرسمي ما يتفلسف .. بالعكس كلامه عقلاني .. انتي شو بيدج تسوين !!! اذا تبين تعرسين جدامج طريقين !! يا الصبر و اييج ولد الحلال و الا الطريق الثاني .. و اعتقد انج عاقله و تعرفين الصح من الغلط ..
القناص.. موضوع اختنا حلو .. و ما نقدر نقول انه ماله معنى .. و بعدين يا خوي ترا بنت بلادك سترك .. و محد بيعرف يربي عيالك كثر بنت بلادك .. و بعدين سيدي .. المهر مجرد سبب انكم ما تبون تتزوجون مواطنه .. في وايد ناس يزوجون ب 20 الف .. وينك عنهم !!! و نحن ما فينا بطره يا سيدي.. بس المجتمع جييه و انته عشت في مجتمع فرض هذا الشي .. و الشاب اذا ما كان يلعب بفلوسه بيقدر ياخذله بدال الوحده أربع .. و بعدين ما حيد هذي ردودك !!! خلك عقلاني و هادي ما نبي تقاش حاد بليز
أجمل الخالات .. الحين بيي عند موضوعج حبيبتي
أولا .. صحيح كلامج .. مافي وحده ما تتمنى تكون عروس و عندها الظهر اللي يسندها و تحصل الحنان اللي تباه .. و مافي وحده ما تحلم بالفستان الأبيض و الكوشه .. بس حبيبتي المسأله مسألة وقت .. ربج كاتبلج اللي بياخذج و اللي بيستر عليج قبل ما تنولدين .. يعني انتي ما بيدج تسوين شي .. و توج بنوته و حلوه عمرج 18 سنه .. يعني الدرب جدامج .. و يمكن تكونين اصغر وحده في البرزه .. و اغلب الموجودات في البرزه آنسات .. يعني انتي مب روحج ...
و عن موضوع العنوسه .. لا تحاتين .. ترا صندوق الزواج سووا سالفه يديده " قاهرني " يقولج القرار اليديد حق صندوق الزواج هووه انه الريال اذا يبا يعرس على حرمته " أو حريمه " يعني إذا يبا ياخذ الثانيه أو الثالثه أو الرابعه و تكون " عانس " بيعطونه علاوه و بيزااات ،، و كنك يا بو زيد ما غزيت .. الريال بيتزوج الثانيه و بيطلق الأولى .. يعني ريلي يعرس عليه عشان ياخذله همجة بيزات !!! هذا اللي قاصر .. التنور أقرب له منها
ما علينا من الكلام اللي قلته .. عن موضوع غلاء المهور .. ترا الشاعر يقول " ومن طلب الحسناء لم يغلها المهر " يعني المهر مب سبب .. ما شاء الله اقل شاب ياخذله فوق ال 10000 يعني لو يوفر بيقدر يعرس .. لكن اسيادنا الشباب مدلعين .. واحد يبا بو دمعه و الثاني لكزس فوروييل و الثالث كل ما نزل نوكيا تلقونه رابع المحل !! و يقولون ما عندنا بيزات !!!
أما عن موضوع البنات و اللي يشوفن الشباب فأنا أشوف انه هذيل ما عندهن حيا و لا مستحا .. شو يعني تشوف الريال و عطره و كندورته و شكله !!!! تراها دمرانه ... حبيبتي .. البنت اللي تشوف الريال من هذا المنظور تراها غلطانه .. و أستر على البنت انها تستر نظرها بدال ما تشوف فلان و علان و البدون و العربي و غيره !!! والله البنات اختربن الصراحه .. حسافه !! نادر ما تحصل بنات اوكي هذي الايام !!!
حبوبتي .. طولت علييج .. بس على قولتج تبين الحل !! تعرفين شو الحل !!! جابلي كتابج و مذاكرتج جان كنتي ثانويه عامه و هاتي نسبه .. و اذا كنتي في الجامعه سيري شوفي العلل الدكاتره شو يبون منج .. الفاينال قرب و سيري ذاكري و خلي الريل بعديين .. تراه يترياج تخلصين و بيي و يمكن يكون يقرا موضوعج هذا
تحياتي لج ..
و دمتم سالمين
المهـــــــا