soooooooooomh
๑ . . مراقبة البرزات العامة . . ๑
- التسجيل
- 17 نوفمبر 2008
- رقم العضوية
- 9815
- المشاركات
- 16,974
- مستوى التفاعل
- 3,068
- الجنس
في هذا الموضوع سنتحدث عن اشكال الميادير ومقاستها وأستخداماتها
الميادير بنظر بعض الحداقة ما تختلف كثيرا .. يعني اما يستخدم ميدار من المقاس الكبير او المقاس الصغير و خلاص على حسب السمكة اللي يبي يصيدها ..
قد يخفى على البعض انه الميادير ما تختلف باحجامها فقط.. و لكن بانواعها ايضا
اختيار الميدار المناسب أثناء الحداق يعتمد على عوامل وايد طبعا .. انا رايح اصيد شعم استخدم ميدار صغير و اذا رايح اصيد بواليل و يذاعيه استخدم ميدار اكبر
ولكن مو بس حجم السمكة الشي الوحيد اللي اعتمد عليه باختيار ميداري
حجم السمكة و قياس الخيط اللي استخدمه و نوع السمكه و نوع الييم و نظام الحداق اللي راح احدق فيه سماري او سيف او اقواع او ارياق او دردور او رق ..
وانا اتكلم عن هالامور ليش؟ .. هل سبق و شفت الطراد اللي طارح يمك يحمل صيد و مبين عليه الصيد اكثر منك؟
اهو يصيد اربع خمس حبات وانت غصب تصيد حبه و تفلت ثلاث اربع عقبها؟
خيوطك قاعده تشير و خيوطه شغاله صيد؟!
هذي طبعا مو مسأله حظ 100% .. و الرزق من رب العالمين
لكن سبب ذلك يرجع غالبا لسوء اختيارك لنوعيه مياديرك و رداعك و خيطك ..
قياس الميادير هو اول ما تفكر فيه عند شرائك الميادير .. أغلب الشباب يعرفون القياسات المعروفه للشعم و المزيزي و السبيطي و السمك المعروف و مو صعبه السالفه
طبعا ماكو معيار عالمي موحد لأرقام قياسات الميادير للأسف
الدارج عندنا قياسات امريكية .. وتبدي الارقام من أصغر قياس اللي اهو 32 الى اكبر قياس اللي اهو 0\19
رقم 32 كل ما صغر كل ما كبر قياس الميدار الى قياس رقم 1 .. و تالي يبلش القياس اللي يبدي بصفر .. 0\1 تالى 0\2 تالي 0\3 وانت صاعد لي 0\19
وهذا التسلسل الكامل من الميدار الأصغر الى الأكبر
32, 30, 28, 26, 24, 22, 20, 18, 16, 14, 12, 11, 10, 8, 6, 4, 2, 1, 1/0, 2/0, 3/0, 4/0, 5/0, 6/0, 7/0, 8/0, 9/0, 10/0, 11/0, 12/0, 13/0, 14/0, 15/0, 16/0, 17/0, 18/0, 19/0
طبعا أغلب هالقياسات يصنع منها ساق قصير او ساق متوسط او ساق طويل
أنواع الميادير:
- الميدار التقليدي العادي اللي كلنا نعرفه و نستخدمه كثيرا:
وهذا ميدار عادي بوصده و يمتاز بقوته و صلابته وخصوصا صلابة المنحنى او اللفه و صعب ينفهق .. و الاحتمال انه ينكسر اكبر من احتمال انه ينفهق
ويعتبر ميدار عريض مقارنة مع انواع الميادير المتوفره
- الميدار الناعم او الميدار القابل للانثناء:
ميدار من اسمه واضح انه مصنوع من سيم قابل للانثناء .. يعني ينفهق و ترد تعدله بكل سهوله لكن ميزته صياد لأنه بكل سهوله يخترق فك الاسماك
طبعا ينفهق و ترد تعدله كذا مره فقط تالي تحتاج تبدله
ويعتبر ميدار ضعيف او رقيق و هذي ميزة تسهل عملية اختراقه لجسم الاسماك خصوصا الصغيره
- الميدار الدائري الشكل:
يعتبر من افضل المبتكرات الحديثة في طرق الصيد السريع .. ممتاز اذا السمكة حاضرة بكثافة بقطعتك او المحدق اللي انت فيه والسبب صعب على السمكه بلعه
واذا السمك يبلع يأخرك بالتبريز و العالم يمك تصيد وانت تعابل!
طبعا بالاستخدام الصحيح لهذا الميدار فقط تستفيد منه .. عيبه الوحيد انه ما يصير تلشط فيه هاهاه .. و هذي طريقة استخدامه الصحيحه .. ما تلشط! اذا لشطت يطلع الميدار بكل سهوله من السمكه
تصميمه الغريب هذا يضمنلك انه يلشط بروحه! مجرد ما السمكة تعض الييمه وتحاول تطير فيها راح يلتف و يركب نفسه باحكام تام بجسم السمكة من داخل الشفايف او الفك
من تحس السمكه وقفت بالخيط تسحب على راحتك بالبداية و تالي تجيب عليه مثل ما تبي و خذها مني و عن تجربة انت كاسر خشم نقرورك كاسره ما فيها روح و تعال
- ميدار خاص بالمحاياة:
هالميادير ساقها قصير يفضل و عن تجربه بالمحاياه ادائها ممتاز جدا .. والسبب ساقها القصير يخلي سمكة المحاياة تاخذ راحتها اكثر بالسباحه وكذلك مخشوش و ما تهابه السمكه
طبعا مو شرط استخدام الميدار الدائري بهالحالة و يفضل التقليدي .. لكن اللي يحب يبرز بسرعه و مو فاضي حق تصوير او معابل يستخدم الدائري الساق القصير
- ميدار المحاياة بالاماكن الصخريه او الشيره:
ميدار مخصص للمحاياة و ميزته انحناءه الزايد هذا مصمم خصيصا للمحاياة و غاليا مصنوع من السيم يعني قابل للطي والاسترجاع مثل النوع الثاني الناعم .. ينفهق و ترجع تعدل وضعه بسهوله
وطبعا انا اتكلم عن الشيره .. اذا شار ينفهق بسهوله لكن اذا داخل بفك السمكه صعب جدا انه ينفهق وهذا سر تصميمه .. و اللي ما جربه بمحاياة الزورية الحية بالحيشان لازم يجربه و يتأكد بنفسه
نكمل التفاصيل ...
شو أفضل ميدار استخدمه و وين استخدمه؟!
حاليا عرفنا انواع كثيرة و الاختيار صار متعدد .. وافضل طريقة انك تقول "شو الميدار اللي ما احتاجه"..
احكم على اختيارك للميدار عن طريق السمكة اللي بتروح تحدق لها .. مثلا الشعم..فك صغير و لكن قوي وفيه صفين اسنان قويه! لذلك صعب جدا انك تستخدم اي ميدار
واذا سمكة كبيرة و فكها كبير. محتاج ميدار خشن و قوي و يتحمل مثل الميدار التقليدي العادي لأن النوع الناعم ما راح يتحمل.. نهاش والا ثور عندق او نقارير و بواليل و هالاحجام تبي ميدار قوي و عريض
واسماك مثل البواليل و اليذاعيه لها فك كبير مقارنة مع بقية الاسماك .. عاد ما احط ميدار 0\1 حق يذاعيه .. صغير وايد و يضيع داخل فك اليذاعي
هل احتاج الميدار الدائري هذا بالحداق؟
جواب هالسؤال يحدده كذا عامل .. منها المكان اللي بتروح تحدق فيه هذا حاضره السمكه فيه بكثافه و عادي تصيد كمية كبيره.. اذا انتكلم عن كميات كبيره الميدار الدائري هذا اختيار طيب عشان تفتك من المعابل و التبريز يكون سريع
الخلاصة:
* بكل سهوله خل المنطق يفرض نفسه باختيارك للميدار المناسب لك .. وايد انشوف ناس تستخدم ميادير باحجام تضحك بالطلعات البحرية و تجاربهم ما تخلص .. خلك منطقي .. سمكة كبيرة صعب تنصاد بميدار زريطي ( اصغر انواع الميادير ) مقاسه صغير جدا .
* التجربه أفضل معلم .. اغلط و حاول و جرب توصل للخبره المطلوبه.. ما صار احد قبلك خبير بيوم و ليله .. الكل جرب و تعلم من غلطاته وياما فلتنا و قصينا و شرمنا و عفسنا الدنيا و خربنا طلعات.. وكل الخبراء متعلمين من من سبقهم او عن طريق التجارب .
منقول من منتديات أسماك الامآرات :00100: