شخصيات القصة:
مريم: عمرها 22 سنة طالبة جامعية، مزيونه وطيوووبه وايد والكل يحبها.
سيف: أخو مريم الكبير، ريال متزوج وعنده ولد عمره 3 سنوات اسمه محمد ويسكن في بوظبي..وهو مسؤول في الإتصالات.
سلامة: أخت مريم إلي أصغر منها بسنة، طالبة جامعة.
حميد: ولد عم مريم، عمره 26 يحبها وايد ونفسه لو تكون من نصيبه، وهو مهندس معماري، شاب طموح، ووسيم وايد.
ميثا: أعز وأقرب صديقه بالنسبة لمريم، طيوووبه وايد وتحب مريم وتعتبرها مثل أختها.
راشد: عمره 23 سنة توه مخلص جامعة، أدارة أعمال، ويشتغل ويا أبوه في شركته.
اليازيه: أخت مريم، عمرها 19 سنة، وهي سنة أولى جامعة.
شما: أخت مريم، عمرها 15، أول ثانوي.
علي: أخو مريم الصغير، عمره 17 سنة ، ثانويه عامة.
علياء: أخت حميد..عمرها 20 سنة..مع مريم في الجامعة.
وهناك الكثير من الشخصيات في القصة كلاً على حسب أهمية دوره.
الساعة 8 المسا مريم متسدحه في الصالة تجلب في القنوات من الجزيرة للعربية لأبوظبي... تدخل عليها سلامة أختها...
سلامة: حشى ماعندج شغلة غير هالأخبار! ماتملي
مريم: شو أسوي والله من الضيجه...كل الأخبار تكدر بالواحد
سلامة: إنزين منوه قالج تتابعين الأخبار... في مسلسلات أفلام موب شرط أخبار
مريم: الله يهديج منوه في هالفترة له نفس يتابع مسلسلات ولا أفلام
سلامة: أنا
مريم: هيه طبعاً... لأنج موب هامنج أصلا إلي يستوي في العالم.
سلامة: هامني... بس مافيني على عوار الرأس...إلي قاصين له رأسه ولا بطنه وإلي بيته طايح ... والله مافيني "عاد تعرفيني أنا إنسانه حساسه ماأستحمل"
مريم:ههههههههههههههههههه بسم الله منوه حساس إنتي!
سلامة: ريموووه شرايج نتحايل على أبويه علشان يودينا المول ولا كارفور...والله مليت من البيت محبوسين مانظهر مكان.
مريم: لا مافيني...تعبانه والله من الجامعة
سلامة: حشى يالكسوله...هب مشكلة بروح أشوف شمووه ويزوي جان بيروحن ويايا.
مريم: لا مايحتاي هن جاهزات ... حبهن الأول والأخير الحواطه برع البيت
سلامة: على الأقل أحسن منج...24 ساعة ياعلى الأخبار ولا النت
مريم: زين أحسن من الهياته برع البيت
سلامة: ويا رأسج هياتة شو...جى بس مرات المول نشتري أشياء ... يعني مانروح نلعب
مريم: زين فارجي... خليني أتابع الأخبار... روحي من وين ماتبي
سلامة: طبعا ... عيل بيلس أشاورج
مريم: أوووووووووف
سلامة: تشاووووووووو
مريم: باي
.................
في حجرة اليازيه، يزوي يالسه تكتب واجبها، وشما يالسه تكتب قصيدة "أونها محسبه عمرها شاعره"...تدش عليهن سلامة...
سلامة: بنات
اليازيه: ها شوفيج؟
شما: شو عندج
سلامة: شرااااااااااااايكن
شما: شو؟
سلامة: نروووووووووح المول
اليازيه: هيه هيه أبى أروح والله مليت من هالواجب الأرف
سلامة : وأنتي شموووووه شرايج؟
شما: وريموووه بتروح ويانا؟
سلامة: لا... هالدبه ماعندها غير الأخبار ولا النت ... لاشغله ولا مشغله
اليازيه: برايها... يالله نروح نحن
شما: انزين أبويه وافق يودينا؟
سلامة: هيه رمسته ووافق
اليازيه: زين والله
يدخل عليهن علي ...
علي: ماشاء الله متيمعات أشوفكن
شما: حرااااااااااااام
علي: هيه حرام....لأني أعرف أجتماعكن وراه إن
اليازيه: إن ولا لكن ولا لعل ...أنت شعليك
علي: أخوكن وريال البيت بعد أبويه
شما: روح لاه
علي: زين شو يالست تسون ويا بعض ...أكيد تخططن على شيء
اليازيه: هيه عندك مانع
علي: لا عندي سيف ههههههههههههههه
شما: سخيييييييييييييف
علي: شموووووووه ستحي على ويهج تراني أكبر منج بسنتين
شما: ويعني شو المشكلة
علي: يعني إحترميني
شما: يوم مابترز بعمرك في كل شيء ... بحترمك
سلامة: بنات خلن علي بحاله وتجهزن...تراه أبوه قال بعد نص ساعة
علي: وليش تتجهزن .. وعلشان شو .. ووين .. وشو نص ساعة
اليازيه: حشى عاد اللقافة جيه موب زينه
علي: لازينه... وين رايحات
شما: أوووووف منك... بنروح المول عندك مانع
علي: هيه عندي مانع...شو ها ... نحن ماعندنا بنات كل يوم في السوق
سلامة: سكت الله يخليك...شو كل يوم في السوق يحليلنا محبوسات...حشى ولا سجن جوانتيناموا...الناس تظهر ... إلا نحن
علي: زين بروح وياكن
شما: وليش إن شاء الله
علي: كيفي أخوكن
اليازيه: يالله شو هالرزه
علي: كيفي
سلامة: زين خلاص بسكن... برايه يروح... وتجهزن بسرعه
................
في الصالة من وين يالسه مريم يرن التلفون...وتروح مريم بسرعة علشان ترد عليه
مريم: ألو
حميد: السلام عليكم
مريم: وعليكم السلام والرحمه
حميد: هلا والله
مريم: هلابك
حميد: شحالج مريامي
مريم: يسرك الحال...بخير ولله الحمد
حميد: دوم إن شاء الله
مريم: تسلم
حميد: الله يسلمج الغالية
مريم: شحال عمي وعموووه شيخة
حميد: بخير يعلج الخير
مريم: وشخبار الدوام وياك
حميد: والله زين
مريم: هااا أزقر لك أبويه
حميد: هيه زقريه بنسلم عليه
مريم: الحين...
وبالصدفة أبو سيف يدش الصالة...
مريم: أبويه حميد يبي يسلم عليك
ودش أم سيف الصالة
أم سيف: ريموووه منوه على التلفون
مريم: حميد يبى أبويه
أم سيف: عيل سلم عليه
بو سيف: إن شاء الله يوصل
ودش سلامة،شما،اليازيه،وعلي الصالة جاهزين للطلعه
أم سيف: وين إن شاء الله
علي: بنروح المول
أم سيف: ليش
سلامة: أبى أشتري أشياء
أم سيف: حشى موب شيء هذا إلي كل يوم رايحين المول...تراه عيب البنات كل يوم ناطات السوق
شما: يالله إلي يسمعج أمايه يقول أبد مانيلس في البيت
أم سيف: انزين روحن بس لاتبطن وايد ... خذن الحايه إلي تبنها وردنا البيت بسرعة لأنه خالتكن فطيم بتيي هي وبناتها
شما: يوووووه يعني بتيي موزة
أم سيف: شمووووه عيب هذي بنت خالتج
شما: دلوعة وخقاقه ماأعرف منوه تحسب نفسها.
أم سيف: حتى لو بنت خالتج
شما: زين أمايه خلاص مابقول شيء عن الكونتيسا موزة
أم سيف: كنكسا كنسيسا شو هاي الكلمة بعد إلي قلتيها عن بنت خالتج
مريم: ماعليج أمايه منها
شما: صح ريموووه مابتظهري ويانا
مريم: لا مشكوره ... ورايه بحث بروح أكمله
سلامة: بحث ولا...
أم سيف: ولا شوووو؟
مريم: ولا شيء أمايه ماعليج منها هذي
اليازيه: يابوي خلصن ... يالله نروح
...........
مريم في حجرتها يالسه على النت ... مدمنة على المنتديات ... ماخلت منتدى إلا وسجلت فيه.... تفتح الماسنجر محد أون لاين غير راشد ... وهذا مراقب في منتدى مريم مسجلة فيه وهي مراقبة وياه في نفس القسم ... وضافته وياها علشان هالشيء ... ومعظم الكلام إلي من بينهم جاد... وهو مايعرف إسمها ... ويزقرها بالنيك نيم مالها في المنتدى "الجنيه"
مريم: السلام عليكم
راشد: وعليكم السلام.... هلا والله
مريم: هلا بك
راشد: شحالج
مريم: يسرك الحال
راشد: دوم مو يوم
مريم: وأنت شحالك
راشد: الحمد لله بنعمه
مريم: شخبار المنتدى وياك اليوم؟
راشد: ممشي حاله... مادشيتي المنتدى أنتي
مريم: الحين بدش
راشد: الينيه أريد أقول لج شيء وأخاف
مريم: تخاف شوووو؟
راشد: أخافج تزعلي
مريم: إذا كان الشيء مايزعل ليش أزعل... المهم قول أنا أسمعك
راشد: شرايج فيني؟
مريم: ونعم الرجل
راشد: صدج
مريم: بصراحة أنا الحين أعرفك من سنة تقريبا...وماشفت عليك شيء...وهذا موب كلامي أنا بس الكل يعرفك ويحترمك في المنتدى
راشد: ينيه وإذا قلت لج إني معجب فيج وايد
مريم:.......
راشد: أعرف إنج بتزعلي...لأني أعرف أخلاقج زين...ويمكن أنا أكثر واحد في النت يعرفج زين...في البداية جذبني أسلوبج الحلو ... وعيبني فيج أدبج وطيبة قلبج ... وكنتي أكثر وحده أحترمها وأقدرها
مريم: زين حتى أنا أحترمك...ومن البداية أعتبرتك كأخ عزيز
راشد: بس أنا ماأريدج تعتبريني كأخ...أريد أكثر من جيه... أرجوج لا تزعلي ... بس أنا ماأقدر أخبي إلي في نفسي أكثر
مريم: انزين وشو تريدني أسوي بعد هالكلام إلي قلته؟؟؟؟
راشد: تبادليني نفس الشعور
مريم:!
راشد: مريم أنا أحبج...ووالله العظيم إنه شعور صادق...أعرف بتقولي إني ماأعرفج إلا من خلال النت...بس أنا شعوري عمره مايخيب...وأنا مايهمني شكلج...يهمني إلي لمسته فيج من أخلاق وصفات تميزج عن غيرج.....وأرجوج يوم تشوفي هالكلام لا تظهري
مريم:.....
بندت الماسنجر بسرعة من الصدمة...
مريم في بالها: يالله شو هذا إلي صار ... ماتوقعت راشد يقول هالكلام ... طول سنة ونص وأنا أرمسه ... ورتحت له لدرجة إنه مرات يشاركني أفكاري ... ماتصورت أبداً إنه ممكن يقول هالكلام إلي قاله اليوم ....
دقات خفيفة على الباب...
مريم: منوه؟
البشكارة: أنا ماما مريم
مريم: شو تبى؟
البشكارة: ماما كبير يقول إنزل تحت ... خاله مال إنتي يجي
مريم: زين الحين بنزل
..............
في ميلس الحريم أم سيف واختها فطيم وبناتها موزة وشيخة يالسات .... وينفتح الباب وتدش عليهن مريم...
فطيم: هلا والله بالريم شيخة الحريم
مريم: هلا فيج الغالية ... شحالج خالوووه
فطيم: بخير يعلج الخير... شحالج ريموووه وشخبار الدراسة وياج
مريم: يسرج الحال خالووه...والدراسة ترانا ممشينها
فطيم: شو ها مشينها ... شدي حيلج بتتخرجي وبنيوزج حميد تراه يحليله تعب من كثر مايتريا...
مريم محمره من المستحى: ولا يهمج خالوووه أنا الريم حبيبتج بتشوفي يوم أتخرج بذاك المعدل إلي يرفع الرأس
فطيم: جيه أباج
شيخة: أحم أحم
مريم: هلا والله ببنات خالوووه...شحالج شيخة وأنتي موزان
شيخة: بخير الحمد لله ونعمة
موزة: الحمد لله تمام التمام
مريم: الحمد لله
ويلست مريم تتخبر بنات خالتها وخالتها ... وأذن عليهن أذان المغرب...
أم سيف: نشي فطيم وياي نروح حجرتيه ونتيدد ونصلي ... وخلي البنات بروحن
فطيم: يالله
وقامن كلهن علشان يصلن المغرب... وفي حجرة مريم رن تلفونها...عرفت على طول المتصل
مريم: ألو
ميثا:ألو.. السلام عليكم
مريم: وعليكم السلام...ياهلا والله
ميثا: هلابج الغالية...شحالج
مريم: يسرج الحال ... شحالج أنتي
ميثا: الحمد لله بنعمة...أقول
مريم: قولي
ميثا: باجر بشوفج
مريم: طبعا ... إنتي كل يوم تشوفيني ... شمعنى باجر يعني مابتشوفيني؟
ميثا: لا بس كنت أباج باجر في موضوع مهم
مريم: خير
ميثا: خير...باجر برمسج...الحين بخليج
مريم: أوكى الغالية...أشوفج باجر في نفس المكان المسرح الجديم
ميثا: أوكى...فمان الله
مريم: فمان الكريم
بعد مابندت عن ميثا...
موزة: منوه ميثا
مريم: هيه
موزة: في شو تباج
مريم: وإنت شو لج
موزة: فضول بس
شيخة: عاد لاتلومينها مريامي هذي رزه
مريم: مايحتاي أعرفها
موزة: يحليلي...هيه صح وين شمووه ويزوي وسلامة ماشفتهن
مريم: راحن السوق
موزة: ليش
مريم: بس يالرزه...يعني لازم تعرفي كل شيء
شيخة: بسكن نروح نصلي أبركلنا
مريم: هيه والله عاد صلاة المغرب تفوت بسرعة
.....................
في اليوم الثاني يوم السبت الكل في دوامه...مريم وسلامة واليازية في الجامعة...شما وعلي في المدرسة... وبوسيف عنده إجازة كماً يوم من الشغل ... وهو عسكري ويداوم في السويحان ... وكالعادة يوم يكون في إجازة يا يعابل مزارعه ولا في العزبة
في الجامعة
مريم: ها ميثان شو الموضوع المهم ... رمسي أسمعج
ميثا: ريموووه أنا والله في ضيج
مريم: أفا والله ميثان في ضيج وأنا موجودة...شوفيج الغالية
ميثا: أبويه
مريم: شبلاه؟
ميثا: يبى يوزني ولد عمي سعيد
مريم: ونعم الرجل
ميثا: بس أنا ماباه
مريم: انزين هب مشكلة رفضيه
ميثا: ياريت والله الرفض سهل جيه
مريم: ليش ... شو بيغصبوج عليه
ميثا: أبويه عطاهم كلمة من دون مايشاورني
مريم: زين ليش جيه
ميثا: مريامي أنتي تعرفي أبويه عصبي ومايتفاهم...على طول يوا وخطبوني وهو وافق من دون مايسئلني...وأنا أخاف أرفض
مريم: ميثان حبيبتي هذا مهما يكون مستقبلج هب لعبه...المفروض ترمسيه وتخبريه إنج ماتبي ولد عمج...لاتمين جيه ساكته أونه خايفه
ميثا: والله ماأعرف شو أقول ... لو كان عندي أم شرات كل البنات جان وقفت وياي
مريم: ماعليج الغالية...إن شاء الله مابيصير إلا لتبيه...بس أنت رمسي أبوج
ميثا: بحاول إن شاء الله
مريم: يالله ميثان ورانا محاضره في المخج
ميثا: هيه والله نسيت...
............
على طول من وصلت مريم البيت راحت حجيرتها وفتحت MSN بس مالقت حد أون لاين حتى راشد إلي داشه مخصوص علشانه... لأنها ندمت على إلي سوته أمس...كان المفروض تناقشه في الموضوع ماتبند في ويهه...ودخلت المنتدى ويلست ترد على المواضيع من دون نفس...وبعد ربع ساعة دخل راشد...
مريم: السلام عليكم
راشد: وعليكم السلام والرحمه...ياهلا والله
مريم: هلابك....شحالك
راشد: بخير ونعمه...شحالج أنتي
مريم: يسرك الحال...بخصوص أمس
راشد: تصدقي أنا متلوم لحد اليوم...أعرفج زين ماتحبي ترمسي في هالمواضيع
مريم: بس كان من المفروض إني ماأبند في ويهك...بس والله من الصدمة
راشد: أعرف... الجنية الحين مرعلينا تقريبا سنة ونص ولحد الحين ماأعرف إسمج غير الينيه...وماقد سئلتج عنه...بس الحين والله نفسي أعرفه
مريم: انزين ليش الحين بالذات؟
راشد: أنت ماتثقين فيه
مريم: طبعا أثق فيك
راشد: عيل ليش ماتبى تعلميني عن أسمج...الأسم مابيضرج في شيء...أنا لا أعرف هلج ولا قبيلتج....فمابيضرج في شيء إذا قلتي لي إسمج
مريم: بس أنا سئلتك ليش الحين بالذات تريد تعرف إسمي
راشد: لأني طلعت إلي في يوفي وصارحتج...وأبى أعرف أسمج...نفسي أزقرج بإسمج الحقيقي
مريم: انزين وشو بتستفيد
راشد: بس أبي أعرف إسمج..
مريم:.........
راشد: أنت مثلا تعرفي عني كل شيء...وأنا صريح معج في كل شيء...
مريم: انزين عادي بخبرك بإسمي الأول بس لاغير
راشد: والله راضي
مريم: أسمي مريم
راشد: عاشت الأسامي .... سبحان الله مناسب لج .... وأنا كنت حاس قلت يا فاطمة ولا مريم
مريم: انزين راشد أنا بظهر الحين
راشد: حرام عليج توه الناس...خليني شوي أزقرج بإسمج
مريم: حلف أنت بس
راشد: فديت مريم أنا
مريم:مع السلامة
راشد: مريم مريم مريم مريامي مريوم فديت هالأسم وصاحبته
مريم: باي
بندت مريم الماسنجر وراشد يالس يرمس...موب متعوده هالشيء...ياترى إلي سوته صح ولا غلط...هي بعد معجبه في راشد وايد...بس مايوصل لدرجة الحب...تعتبره شرات أخوها سيف لا أكثر...وهي من الأساس ضد الحب عن طريق الإنترنت "أونه حب بلا حب بلا بطيخ لو الحين يسمعني عمي مانع جان قبرني وأنا حيه"......فجأه سمعت تلفونها ... وراحت ترد عليه
مريم: السلام عليكم
ميثا: وعليكم السلام...شحالج مريامي
مريم: ياهلا والله...يسرج الحال ... شحالج أنتي حبيبتي
ميثا: بخير ونعمة
مريم: ها ماخبرتيني عن سالفة ولد عمج ... شو سويتي
ميثا: الحمد لله إنحلت المشكلة...رمسة ولد عمي وهو بعد موب لين هناك يبيني...ويوم عرف إني بعد مابيه راح ورمس أبوه وأقنعه...عاد تعرفيه محامي محد يعرف يقنع شراته...أبويه يوم رمسه عمي أقتنع...وقال كل شيء بالقوة إلا الزواج
مريم: مبروووك الغالية
ميثا: الله يبارك في عمرج حبيبتي
مريم: أنا كنت متأكدة إنه عمي خليفة مابيغصبج على شيء أنتي ماتبيه
ميثا: فديت روحه والله..
مريم: انزين حبيبتي ميثان برايج الحين بخليج
ميثا: أوكى غناتي...أشوفج في الجامعة باجر
مريم: أوكي...فمان الله
ميثا: فمان الكريم
...........
نزلت تحت في الصالة لقت أبوها وأمها يالسين يطالعوا التلفزيون ويرمسوا...
مريم: السلام عليكم
أم وأبو سيف: وعليكم السلام
مريم: شحالكم إن شاء الله بخير وعافية
بوسيف: الحمد لله بخير يعلج الخير
أم سيف: يسرج الحال ... ها وين خواتج
مريم: سلامة ويزوي راقدات... وشموووه يالسه تهذرب هي وربيعتها في التلفون كالعادة
بوسيف: حشى ماعندها شغله غير هالتلفون
أم سيف: أبد
مريم: أمايه ماشفتي علووه
أم سيف: تعرفيه أخوج في هالوقت ماييلس في البيت... بوسيف الله يهديك لاتعطه السيارة وهو ماعنده ليسن...تعرف ولدك زين
بوسيف: ماعليج منه... أنا محذرنه
أم سيف: الله يستر بس
مريم: أبويه اليوم مابتروح العزبه
بوسيف: أكيد بروح...ليش شو ناويه تيي وياي
مريم: هيه من زمان مارحت العزبة
بوسيف: عيل يلا
مريم: زين أبويه صبر لي شوي بيب عبايتيه
.................
في حجرة مريم في الليل الساعة 9 كل خواتها متيمعات ...
شما: بنات شرايكن تسمعن هالقصيدة
مريم: سمعينا
شما:أحم أحم... يالظنى لاتظن إن يوم راح افترق عنك... يبقى القلب يذكرك في كل لحظه من حياتي.. طالع البحر وتذكر حبي لك كثر قياسه... واسأل الأمواج عن قصيدة تربط حبنا... يامن تركت وضحيت وتعبة بس للقياك...
اليازيه: بس بس حرام عليج
سلامة: إن سمع علي الخور هالقصيدة بينتحر حرام عليج
مريم: ههههههههههههههههههههههههه يحليلج شمووووه
شما: أنتن أصلا ماتقدرن المواهب زين...هذا إلي يعطيكن ويه
اليازية: سمعوا هذي ههههههههههههههههههههههه
شما: ماعليه براويكن...بروح أسمع أبويه قصيدتي أحسن منكن يقدر المواهب
سلامة: حلفي أنتي بس ... روحي علشان اليوم يكسر فيج عصى
شما: وليش يافالحه
سلامة: ليش ... لأنه بيقول ليش تكتب قصيدة غزليه السالفه فيها إن....يافالحه
شما: انزين خلاص ... باجر بسمعها فطامي فديتها الوحيده إلي تقدرني ... تصبحن على خير
مريم: هههههههههههه حشى عاد أونها زعلت
شما: .....
تظهر شما من حجرة مريم...وتبند الباب بقوه...
اليازية: ههههههههههههههه بالله عليها هاي قصيدة
مريم: حرام عليج يزوي دايماً تكسرين خاطرها...على الأقل جامليها
اليازية: أنا ماعرف أجامل...زين
مريم: انزين يالله أوووووووت كل وحده تروح حجرتها
سلامة: ليش أنا مافيني رقاد
مريم: كيفج مايخصني...أنا باجر ورايه دوام من صباحية الله خير
سلامة: متأكدة إنج تبي ترقدي
مريم: هييييييييييييه
اليازية: سلامة تعرفي شيء أنا شاكه في أختج
سلامة: حتى أنا والله
مريم: والله برايكن شكن على كيف كيفكن مايهمني... ورتاحن أنا مابدش النت احين..أبى أرقد
اليازية: أونها
مريم: المهم يالله تصبحن على خير
سلامة و اليازية: وأنتي من هله
وتظهر سلامة واليازية من حجرة مريم... وتروح كل وحده منهن لحجرتها...ومريم في هالوقت مالها نفس تدش النت...مافيها تشوف راشد وييلس يحشرها...أحسن شيء تسويه إنها ترقد...وفعلا انسدحت على الشبريه ويلست تفكر وبعد ربع ساعة إلا والحبيبة راقد...
في الجامعة
ميثا ومريم يالسات في المسرح الجديم فوق...يكملن بحث مشتركات فيه...
ميثا: أووووف...والله كرهتها الجامعه من هالأبحاث والتقارير
مريم: ماعليج...مابقى لنا إلا القليل
ميثا: هيه والله وبنفتك...مريامي
مريم: لبيه
ميثا: بخبرج بسالفة بس والله مستحية
مريم: أفا تستحي من أختج
ميثا: مممممم أمس أنخطبت
مريم: قولي والله
ميثا: والله
مريم: ألف ألف ألف مبرووووووووك...وطبعا مبين من ويهج إنه إلي خاطبنج تبيه...صح
ميثا: يعني
مريم: شو يعني...يلا أعترفي...والله إنج...أونه أنا أقرب ربيعاتج وأخر من يعلم...الله يسامحج بس
ميثا: لا والله مريامي كنت بخبرج...بس تعرفي أستحي
مريم: أونها تستحي ههههههههههههههه
ميثا: وياويهج بس عاد
مريم: فديت إلي يستحون والله هههههههههههه
..........
بعد شهرين تحدد موعد عرس ميثا...بإنه يكون في الإجازة الصيفية...وطبعا بعد هالسنة بيبقى حق مريم وميثا كورس واحد وبيتخرجن...
بعد شهر...مريم يالسه في الصالة تتصفح مجلة زهرة الخليج...ويدش عليها أبوها
بوسيف: السلام عليكم
مريم: وعليكم السلام والرحمه...هلا أبويه شحالك
بوسيف: الحمد لله بنعمه ... ها شو يالسه تسوي
مريم: يالسه اقرأ تحقيق في المجلة وعايبني موضوعه
بوسيف: زين والله
مريم: أبويه
بوسيف: هلا
مريم: ربيعتيه بتعرس الأسبوع الياي...وأبي أروح السوق علشان أشتري لها هدية
بوسيف: انزين بنيتي وشو فيه روحي وشلي وياج علوه
مريم: وبتروح وياي سلامة...ويمكن شموووه ويزوي
بوسيف: حشى هذيلا مرافقات في كل مكان
مريم: هههههههههههه عاد أبويه هذيلا بناتك وتعرفهن زين
بوسيف: ههههههههههه
...........
في العين مول...وبالتحديد في الكافية... كان هناك حميد ولد عم مريم هو وربيعه سالم...
سالم: وين أنت ياريال محد يشوفك
حميد: مشاغل...موب شرات بعض الناس لاشغلة ولا مشغلة...كله إلا حواطه في المولات وملاحقة بنات الناس
سالم: ههههههههههههههه الله يرحم أيام زمان...ولا نسيت نفسك يوم كنت ترقم...تتذكر هاك اليوم يوم كنا في كارفور...ويوم سوتلك فضيحه هههههههههههه الحين أونه مستقيم
حميد: هههههههههههه هذا زمان...ياخي عقلنا
سالم: ولا من ورى لورى
حميد: لا ورى ولا جدام ... مالنا في هالشغلات الحين
سالم: ياويل حالي
حميد: شبلاك؟؟؟؟!!
سالم: طالع طالع
حميد: شووو
سالم: فديت المزاين أنا
حميد طالع وين سالم يأشر ... شاف 4 بنات متغشيات ووراهن فلبينيه... يوم شاف حميد الفلبينية قام...وعرفها إنها دريولية قوم عمه بوسيف...
حميد: أنا ولدك يامانع
سالم مستغرب...
سالم: شبلاك
راح حميد صوب البنات...ويوم وصل عدالهن ... ناداهن وينعرف من صوته إنه معصب
حميد: بنات العم!
لتفتت صوبه وحده منهن وردت عليه
مريم: حميد
حميد: هيه حميد ... شو غريبة ... شو تسون في المول الحين؟
مريم: أبى أشتري حايه
حميد: وبروحكن!
مريم: لا لا موب بروحن...ويانا علاوي
حميد: عيل وينه
مريم: كان يمشي ويانا وشاف ربعه وراح يسلم عليهم...ونحن مافينا نيلس نترياه...قلنا بنخلص شغلنا بسرعة علشان نرد البيت..
حميد: اها...على بالي بروحكن
شما: لا أرتاح...أصلا مايخلونا نظهر من البيت بروحن
حميد: شحالج شموووه
شما: بخير "تقولها من دون نفس"
حميد: إن شاء الله دوم...عيل برايكن...أشوفكن على خير
سلامة: سلم على الأهل
حميد: إن شاء الله يوصل
خلاهن حميد...وراح صوب ربيعه سالم...
شما: أوف...إلي يسمعه كنا يايين هنيه نغازل
مريم: شموووه
شما: شووو صدج...يعني هو مايشوفنا متغشيات ومحتشمات
مريم: حتى لو ولد عمنا ويخاف علينا
اليازية: هيه معروف المحامية
مريم: يالله بسكن من الهذربه الزايده...ومشن نخلص شغلنا
...........
رجع حميد من وين يالس سالم ...
سالم: السموحه منك حميد...ماكنت أعرف إنهن من الأهل
حميد: سالم أنت لو ماربيعي من زمان...ولـ كنت رأويتك شغلك...ياخي هذيلا سوء من الأهل ولا لا موب بنات ناس...ترضاها أنت على أهلك
سالم: أسفين والله
حميد: أدلك ماتوب أبد...بسئلك متى أهلك بيوزوك وتفك بنات العرب
سالم: ياخي بعدنا...مافيني من الحين يربطوني بوحده تيلس لي مثل العظم في البلعوم
حميد: والله أنت مابتيوز عن سوالفك إلا إن يوزوك
سالم: خلك مني أنا الحين...أنت ليش لين الحين ماعرست؟؟هااا ونحن في نفس العمر مستعيل عليه علشان أعرس...ياخي عرس أنت بالأول
حميد: إن شاء الله جريب...بتوصلك بطاقة عرسي
سالم: بنشووووووف
في بيت بوحميد...في ميلس الريال بالتحديد... كان يالس بوحميد "مانع" هو وجارهم بوسلطان...يدش عليهم حميد...ويحب أبوه على راسه ويسلم على بوسلطان
بوحميد: حيالله ولدي...زين شفناك
حميد: السموحه أبويه والله مشغول
بوحميد: حشى هالشغل مايخلص
حميد: عاد شو أسوي
بوسلطان: ها ولدي حميد متى بنشوفك معرس
حميد: جريب إن شاء الله ياعمي
بوسلطان: إن شاء الله...بس من زمان وأنتوا تقولوا هالرمسه
حميد: لا إن شاء الله جريب
بوسلطان: عيل أنا بخليكم الحين
حميد: يالسين عمي
بوسلطان: لا ياولدي أنا من ساعتين هنيه ويا أبوك...وليل بروح أرقد
بوحميد: أشوفك باجر يابوسلطان
بوسلطان: على خير
حميد: شو ناوين تروحوا مكان؟
بوحميد: هيه بنروح صوب المزارع أنا وبوسلطان باذن الله
بوسلطان: يالله فمان الله...وتصبحوا على خير
بوحميد وحميد: وأنت من هله
بعد ماظهر بوسلطان من الميلس وراح بيته...
حميد: أبويه
بوحميد: هلا
حميد: أبويه تراني أنا الحين موب صغير عمري 26 سنة ولحد الحين ماعرست
بوحميد: هههههههههههههههه لا بعدك صغير...بنت عمك بعدها ماخلصت دراستها
حميد: انزين متى يابويه...ليش مانملج الحين...وبعد ماتتخرج نعرس
بوحميد: أنت تعرفني إني خبرت عمك محمد...بس البنت ماتبى الحين
حميد: انزين حاول معهم مرة ثانية
بوحميد: انزين باجر بشوف عمك في المزرعة وبرمسه بالسالفة يصير خير إن شاء الله
حميد: عيل أنا الحين أترخص أبويه منك بروح أرقد
بوحميد: حشى مايلست
حميد: تعرف يابويه الشغل...وأنا تعبان وفيني رقاد
بوحميد: الله يوفقك ياولدي
حميد: تصبح على خير
بوحميد: وأنت من هله
ويحب أبوه على رأسه ... ويظهر من الميلس
...............
بعد يومين...يوم الأربعاء...في بيت بوسيف...في الصالة بوسيف وأم سيف وسيف وحرمته موزة وسلامة...وشما يالسه تلاعب محمد الصغير ولد سيف
حمووود: عموووه سما
يضحك الجميع على طريقة نطقه لشما...
شما: هههههههههههه فديت إلي يزقر عمووه شما
حمووود: تيي معانا بودبي
شما: جريب فديت روحك بروح وياكم بودبي
حمووود: ماماه أنا مابلوح معتم بودبي ... بيلس مع عموووه سما
موزة: هههههههه لا حبيبي بتروح...بعدين عموووه شما بتيي عندنا
حمووود: لا مابى...مابلوح...تيفي
بوسيف: هههههههههههه شو ها بعد تيفي...من وين تعلمها
سيف: ههههههه هذي موزوه يلقط منها كل شيء
موزة: عاد أنا إلي معلمتنه " كيفي"
سيف: هيه أنتي
بوسيف: فديت أنا سميي...تعال شرايك نروح العزبه
حمووود: هيه هيه بلوح العذبه مع يديد
الكل يضحك على حمووود وهو يالس يناقز
تدش عليهم مريم وعلي...
مريم: وأنا أقول منوه مسوي هالحشره...تراه حمووودي هنيه
ويركض حموود صوب عمته...وتشله وتحبه على خده
حمووود: أحبس عموووه
مريم: فديت حمووودي يعلني ماخلى منك
علي: وأنا مالي رب
يضحك الكل على علي...تسلم مريم على أخوها سيف وعلى موزة حرمته...وتتنشدهم عن أخبارهم ... وبعد العشا نادى بوسيف مريم في حجرته...
مريم: ها أبويه أمر
بوسيف: بنيتي عمج بوحميد رمسني أمس عن سالفتج أنتي وحميد...وتراه حميد مستعيل...وأنتي يابنيتي موب ياهل...
مريم: بس ياأبويه نحن من قبل أتفقنا إنه بعد ماأتخرج
بوسيف: هيه أتفقنا على هالشيء...بس الريال مستعيل...وإذا ماتبي العرس الحين تملجوا بس...وبعد التخرج تعرسوا
مريم: بس يابويه
بوسيف: لا تيلسي تبسبسي...الحين بنسوي الملجة...وبعد ماتتخرجي يصير خير
مريم: إلي تشوفه يابويه
بوسيف: جيه أباج بنيتي...
..........
بعد ماعرفن خوات مريم بالملجه فرحن وايد...لأنه الكل يتريا هاليوم...المهم بدت التجهيزات حق الملجة...ومريم كان نفسها لو تتأجل شوي"ماتعرف ليش بس جيه نفسها لو تتأجل" بس الحين ماينفع لأنه كل شيء تحدد وبدت التجهيزات...
في يوم دشت مريم النت وفتحت الــMSN ولقت ربيعتها ميثا وراشد أون لاين...ويلست ترمس الأثنين في نفس الوقت...لأنها ماتقدر تطنش أي واحد منهم
راشد: ها مريم...حشى محد يشوفج
مريم: مشاغل الدنيا
راشد: حتى عنا
مريم: عاد شو أسوي
راشد: حتى في المنتدى هالأيام ماتنشافين
مريم: مشغوله شوي
راشد: في شوووو؟
مريم: بملج جريب
راشد: شووووووووووووو!
مريم: بملج
راشد: ليش
مريم: وليش بعد ليش؟ شو مايحق لي إني أعرس
راشد: والله صدمتيني...عاد منوه هذا سعيد الحظ
مريم: ولد عمي
راشد: ياحظه....
مريم:........
راشد: مريم أنتي تعرفي مشاعري إتجاهج...والله جرحتيني بهالخبر
مريم: وأنت تعرف مشاعري إتجاهك
راشد: عيل ليش وافقتي إنج تتيوزي غيري
مريم: راشد لا تفهمني غلط...أنا عمري ماكانت مشاعري إتجاهك أكثر من أخ...حتى معاملتي لك ماتتعدى الأخوه
راشد: .............
مريم: أرجوك لاتزعل من رمستيه....بس صدج أنا أعتبرك أخ عزيز...وأحترمك وأقدرك
راشد: ماأقدر أقول شيء ثاني غير الله يوفقج...فمان الله
ويظهر راشد...وهو متضايج...لأنه بالفعل حب مريم...لأنه حس إنها غير عن كل البنات...بنت محترمه أسلوبها غير مميز...انخدع من قبل في بنات وايد...وكلهن يضحكن عليه...فقرر إنه البنت إلي بتكون شريكة حياته أهم شيء فيها أخلاقها وتصرفاتها وأسلوب تعاملها أكثر من جمالها...فختار مريم...مع إنه ماشافها ولا يعرف شكلها...ومع هذا فقدها...وبتصير من نصيب غيره...شغل أغنيه حزينه ويلس يسمعها ويداوي جراحه...يمكن محد يعرف يمكن في يوم يلقى البنت إلي تمناها ... يمكن كل شيء جايز...
بعد ماظهر راشد...حزنت من الخاطر عليه...لأنه أقرب شخص بالنسبة لمريم في النت...وتعلمت منه الكثير من التصاميم وغيره...وهي تعتبره أخوها الكبير في النت...وحست إنها بعد اليوم فقدته...
باقي على ملجة مريم اسبوع...طبعا هي فصلت فستان الملجة في بوظبي...وحجزوا لها في صالون بعد في بوظبي .... طبعا ربيعتها ميثا عرسة وسافرة سويسرا هي وريلها...وبترد من سويسرا قبل ملجة مريم بيومين...طبعا مستحيل ماتحضر ملجة أعز ربيعاتها...
في حجرة مريم
تدش النت لأنها من فترة مادشت...دشت المنتدى وردت على بعض المواضيع...بعدين فتحت الــMSN تلاقي راشد أون لاين
راشد: هلا والله
مريم: السلام عليكم
راشد: وعليكم السلام...هلا مريامي شحالج ووين أيامج ملجتي ولا بعدج
مريم: بخير ونعمه...جريب إن شاء الله
راشد: وبتودعي العذوبية
مريم: لا بعدنا هي بس ملجة
راشد: عيل متى بتعرسي
مريم: بعد ماأتخرج
راشد: مريم بسئلج
مريم: أسئل
راشد: هذا إلي بيأخذج تحبيه ولا بس جيه محيرنج من يوم صغيره...وأنتي الحين مجبره على هالشيء
مريم: لا راشد...هذا ولد عمي وطول عمري ماحبيت غيره...وعمري مافكرة إني أكون لشخص ثاني غيره..
راشد: ول لهدرجة تحبيه
مريم: هيه وأكثر
راشد: هو يعرف إنج تدشين النت
مريم: هيه
راشد: ويعرف إنج ترمسيني؟؟؟؟
مريم: .......
راشد: ها شوفيج سكتي ... ردي على سؤالي
مريم: لامايعرف...بس أكيد برمسه في هالموضوع
راشد: هههههههههههه خبريه وبتشوفي إن خلاج تدش النت في حياتج
مريم: حرام عليك...حميد موب جيه...وبعدين أنا ماأسوي شيء غلط
راشد: عريس الغفلة أسمه حميد هههههههههههههه
مريم: من فضلك أحترم نفسك...شوبلاك وليش ترمسني جيه
راشد: ولا شيء... أسف والله مريم موب قصدي...بس والله من الضيجة
مريم: راشد موب ذنبي إذا أنت أعجبت فيني...لأني من البداية بينت لك كل شيء...وماعاملتك أكثر من أخ
راشد: والله يامريم أنتي عزيزه عندي وغالية...وأتمنالج من كل قلبي السعادة...والله يوفقج في حياتج اليايه...
مريم: وهذا عشمي فيك
راشد: أقول
مريم: قول
راشد: ماعندج توأم
مريم: ليش يعني؟؟؟!!!
راشد: علشان أتيوزها...ولا حلال عليج وحرام على غيرج
مريم: هههههههههههههههههه ياريت والله...لو كانت عندي أخت توأم مابتلقى زوج أحسن منك
راشد: تسلمي الغالية
مريم: انزين أنا الحين بخليك...تأمر بشيء
راشد: سلامتج...أعرف مابدشي جريب...فألف ألف ألف مبروووووووك
مريم: الله يبارك في عمرك...وعقبالك إن شاء الله
ظهرت مريم من النت...وغرق راشد مرة ثانية في أحزانه... وياريت لهالأحزان أخر... بس " ليس كل مايتمناه المرء يدركه" فقال في نفسه أحسن شيء أشغل شريط قرآن "والله أشتقنا لصوت العجمي"..شغل الأستيريو وبدأ صوت الشيخ أحمد العجمي بصوته الحزين الجميل يملئ حجرة راشد...وهو يستمع له أرتاحت نفسيته...وتمنى في نفسه لمريم بالتوفيق...وإن شاء الله يبدله فيها خير ....
يوم الملجة
في بيت بوسيف...مسوين خيمة حق الريال برع البيت...وخيمة ثانية حق الحريم في الجهه الثانية من البيت...وطبعا المعازيم وايد...يكفي عائلة مريم من عمامها مانع ويمعه وعيالهم وعمتها حصة وعيالها وعيال عيالها...وخوالها إلي من بوظبي وخالتها...
فهاليوم كانت مريم وايد روعه...الفستان طبعا بنفسجي فاتح "موف" لأنها تموووت في هاللون...أما خواتها ماقصرن في الرقص...بالذات شموووه مستانسه وايد "كيفها اختها"... على الساعة 10 ونص دخلوا حميد وكان متشقق من الوناسه... يوم شاف مريم ماقدر يشل عينه عنها...وكأنه مايشوف أي حد غيرها .... يوم وصل عدالها....
حميد: شحالج "يقولها بصوت واطي
مريم منزله رأسها من المستحى: بخير يعلك الخير " بصوت أوطى"
حميد: يابويه رقبتج بتعورج رفعيها
مريم تضحك بصوت واطي
حميد: فديت الضحكة أنا
بعد شوي إلي حمووود ييي صوبهم ويمسك فستان مريم...ويحاول يسحبه...
مريم: حبيبي بس عيب
حمووود: ليس تيلسي عداله ها
مريم: بس
حمووود: سو بس ... يلا حميد نس من عدال عموووه مريوم أنا بيلس
حميد: لا والله
مريم: ههههههههههه
حميد: بوي هذي حرمتيه الحين...وبعد جم شهر بتظهر من بيتكم بأخذها معي
حمووود شوي وبيصيح: ماتلوم أنا بلاويك...عموووه بتيي معنا بودبي
مريم: فديت حمودي تعال صور ويانا
حمووود: مابى...أول يقوم حميد...أبا أيلس عدالس
حميد ومريم يضحكوا على رمسة حمووود
............
بعد شهر من الملجة...في بيت بوسيف كل العايلة مجتمعه في الصالة...
بوسيف: ها ولدي ليمتى بتم في بوظبي
سيف: يابويه تعرف شغلي وبيتي وكل شيء هناك
بوسيف: بس ياولدي فلتكم الحين ياهزه...وإذا على شغلك فيه فرع في العين
سيف: بس عاد يابويه تعودنا
بوسيف: والله ياولدي أنا موب مضيجبي شيء غير هالخطوط إلي تضربها من بوظبي للعين كل أسبوع...
سيف: بنشوف يابويه...تراه والله لو الشور شوري ماسكنة غير في دار الزين...
أم سيف: هيه والله وليدي سكن عدالنا أحسن لك...وبيرتاح قلبي
سيف: فديت قلبج أمايه...مابيصير إلا كل خير إن شاء الله
شما: هيه هيه أخيراً بيسكن حموودي ويانا على طول
سيف: نحن بعدنا ماقررنا
شما: سواف ريح والديك...تراه رضى الله من رضى الوالدين
سيف: هههههههههه وأنا تشوفيني حضرتج عاق والديني ولا مغضبهم
شما: لا بس أسكنوا عدالنا...والله يوم مانشوفكم أسبوع عن شهر
سيف: بنشاور أم العيال
اليازية: هههههههههههههههه إلي يسمعك تقول أم لعيال تقول عندكم قطيع عيال
سيف: ليش لا...عندنا حمووودي وواحد في الطريج
شما: حلف!
سيف: والله
اليازية: ياسلام ونحن أخر من يعلم
أم سيف: هههههههههههه الكل يعرف إلا أنتي وياها
شما: هيه لازم نحن المنبوذين في العايلة
سيف: والله أنتي وياها 24 ساعة راقدات...يوم نحن مجتمعين اليوم على الغدى أنتن راقدات "أونهن تعبانات مايبن غدى
بوسيف: هذا كله من السهر...بس ماعليه أنا بسوي صرفه حق هالشيء
شما: لا يابويه لاتقول تمنعنا عن السهر
بوسيف: هيه
اليازية: بس يابويه نحن في إجازة الحين...حرام نرقد بوقت شرات الدياي
بوسيف: بترقدن بوقت شرات الدياي...وسهر مافيه
شما واليازية: حرااااااااااااااااام
مريم: ههههههههههه دواكن
شما: دوانا...زين يامريوموووه ... أبويه عيل ليش ماتمنع مريم عن السهر على النت
بوسيف: مريم حتى لو سهرت على الإنترنت تنش بوقت...ماتيلس راقده طوال اليوم
أم سيف: حشى عظامتكن ماترم من الرقاد...عاد نوم من نوم
بوسيف: صح وين سلامة؟
:mf_jumpon
مريم: يالسه ترمس ربيعتها
سيف: أبويه يلا نروح العزبة ومن يرغب من القبايل
مريم: صبروا شوي بروح أزقر سلامة
بوسيف: روحي زقريها بس عاد لا تبطي علينا
مريم: إن شاء الله
...........
في الليل الساعة تسع ونص مريم تتصل بحميد...
مريم: السلام عليكم
حميد: وعليكم السلام والرحمه...ياهلا والله
مريم: هلا بك...شحالك
حميد: دامج بخير أنا بخير
مريم: دوم إن شاء الله...وينك فيه الحين؟
حميد: في طريج المطار...رايح السليمات عند ربيعي سالم
مريم: اها...شحال عمي وعموووه
حميد: يسرج حالهم...وليش حضرتج يالسه تتخبريني عنهم ليش ماتتصلي فيهم بروحج
مريم: انت تعرفني ماأحب أرمس في التلفون...يالله يالله أكلمك
حميد: والله زين...إلا أقول ريموووه متى بنعرس هههههههه
مريم: حلف أنت بس
حميد: ريموووه حياتي والله أتريا هاليوم إلي بييمعنا بيت واحد...حرام يعني أكون جيه مستعيل
مريم: انزين مابقى إلا القليل
حميد: متى بس
مريم: الكورس الياي وبخلص...يعني تقريبا بعد 7 شهور يعني موب وايد
حميد: والله وايد
مريم: حميد
حميد: لبيه
مريم: بس عاد صبر مابقى إلا القليل
حميد: انزين حبيبتي برايج الحين...وصلت بيت ربيعي ... برمسج الساعة 12 أوكى
مريم: أوكى...فمان الله
حميد: فمان الكريم
تبند التلفون...وهي تفكر بكلام حميد...وتأخذ لها كتاب وتيلس تقرأه..
في السليمات في بيت سالم..
سالم: مرحبا الساااع...يالقاطع
حميد: يعني أنت إلي متعب نفسك وتتصل
سالم: والله مشاغل ياريال
حميد: هيه لو ماأعرفك زين...مشاغل شو الله يهديك...إلا إذا كانت المشاغل الحواطه في المولات والشوارع
سالم: هههههههههههههههه خلها على الله ياريال...إلا أقول شحال عمي مانع
حميد: بخير ونعمه
سالم: الله يخليه لكم ويطول بعمره...حميد شرايك نركب سيارتيه ونروح نتحوط حول السليمات وضواحيها ههههههههههههههه
حميد: ههههههههههههه يلا عاد شو ضواحيها
في السيارة...سالم يسوق ويدخن سيجارة...
حميد: تراه خنقتنا..نفسي أعرف شو استفدت من هالدوخه
سالم: يالله عاد بدينا نصايح...تعرفني كله ولا الدوخه
حميد: الله يهديك بس
ووقفوا في جانب من الشارع...ويلسوا يسولفوا وكانوا منزلين جامات السيارة...فجأة وقفت عدالهم سيارة أودي سبورت...فيها 3 شباب ... طلع واحد منهم رأسه من السيارة
راعي الأودي: هيى أنت
سالم: شبلاك...شو تبى
راعي الأودي: بقول لك شيء
سالم: رمس أسمعك
راعي الأودي: لو كنت ريال صدج لحقني "وشخط السيارة"
عصب سالم...
سالم: براويه هالحيوان " شغل السيارة وورى الأودي"
حميد: ستهدي بالله ياريال ماعليك منه لبسه
سالم: لا خلني براويه منوه الريال
وحميد يحاول في سالم بس موب ماقدر عليه...وكانت السرعة كل شوي تزيد يحاول يلحق بالأودي...وسالم كانت عنده نيسان ...
بعد مامرت عشر دقايق إلا ويسمعوا تاير النيسان ينفجر... وحاول سالم يسيطر على السيارة بس ماقدر...وتنجلب أكثر من مرة...ولاحظ راعي الأودي إن النيسان إنجلبت...وتضايج وندم على إلي سواه...بس خاف يرجع ورى ويشوف شو صار لهم...فأتصل بالشرطة وخبرهم عن الحادث والمكان...
من وين النيسان منجلبه تجمعوا الناس...من جدام تقريبا أنعدمت...حاولوا الناس تظهر حميد إلي كان فاقد الوعي و رأسه ينزف...ومن الجهه الثانية يحاولوا أثنين يفتحوا الباب علشان يظهروا سالم إلي كان يتأوه ويصارخ من الألم...بعد ماظهروهم من السيارة...وصلت الأسعاف
الساعة 11 ونص في بيت بوسيف يرن التلفون يشله سيف إلي كان يالس في الصالة هو وحرمته واليازية يطالعوا فيلم أجنبي...
سيف: السلام عليكم
بوحميد: وعليكم السلام...وين أبوك
سيف: في حجرته دخل يرقد...خير عمي
بوحميد: حميد سوى حادث وهو في العمليات الحين...خبر أبوك
سيف وهو متضايج: الحين بروح أخبره
بند التلفون ومن ويهه ينعرف إنه متضايج...
موزة: خير شو فيه؟؟؟
اليازية: شو فيه سيف...شو صار
سيف: حميد ولد عمي مسوي حادث...وحالته خطيره
في هذاك الوقت بالضبط...في حجرة مريم...يالسه تكتب مسج " لي روح وأنفاس..لي قلب واحساس..لي كلمة بين اقواس..احبك ياأغلى الناس " وطرشته حق حميد...فجأة تسمع ضربات قوية على بابها وصوت ختها اليازية...
اليازية: ريموووه فتحي الباب
تفتح الباب...
مريم: ها خير شو فيه...شو هالأزعاج
بس يوم شافت ملامح ختها عرفت إنه شيء كبير صاير...لأنه ختها اليازية تصيح...
مريم: شوفيج يزوي...وليش تصيحي بعيد الشر
اليازية: حميد..
مريم: شووووووفيه حميد!
اليازية: سوى حادث وهو الحين العمليات
مريم: شوووووووووووووووووو
..........
في المستشفى...كل عايلة حميد موجودة أبوه إلي كان يحاول يهدي أم حميد وبنته علياء... وبعد نص ساعة وصل بوسيف وسيف وعلي ومريم وأم سيف ... وتجمعوا كلهم عدال غرفة العمليات...وكل واحد يالس يواسي الثاني ويدعي الله إن يشفي حميد...وكانت مريم تحاول تتمالك نفسها...وتصيح بصوت منخفض وتدعي ربها .... بعد ساعة يظهر الدكتور...
بوحميد: بشر دكتور
الدكتور: الحمد لله ... نجحت العملية ...
بوحميد والجميع بفرح ودموع: الحمد لله الحمد لله
الدكتور: هو الحين بخير...بس...
..............
بعد أسبوع من العملية...رد لوعيه...وبالصدفه كانت وياه في الغرفة مريم يالسه تطالعه وفي عيونها دموع...يوم شافته فتح عيونه...مسحت عيونها بسرعة...تلتفت مريم بسرعة صوب عمها وعمتها وأبوها إلي كانوا يالسين بعيد شوي
مريم: عمي حميد فتح عيونه
قام بوحميد وأم حميد وبوسيف بسرعة صوب حميد...
أم حميد: فديت روحك يالغالي...مابغيت تقوم
حميد بصوت واطي: وين أنا ... أخ راسي يعورني
بوحميد: سلامت رأسك يالغالي
بوسيف: سلامتك ولدي
حميد: الله يسلمكم...شووو صار؟ ووين سالم؟
بوحميد: سالم كل يوم يي يشوفك...
حميد: الحمد لله إنه بخير
بوحميد: الحمد لله...هو تعور شوي في ريله
أم حميد: هو ماياه شيء ... أنت يالغالي إلي ياك
بوحميد: أم حميد!
يلتفت حميد من وين مريم واقفه...
حميد: شحالج يالغالية
مريم: أنا بخير دامك بخير
حميد: أسف إني مااتصلت فيج هذيج الليله
يوم قال هالكلمه ماقدرت تتمالك نفسها ... نزلت دموعها... لأنه يوم ذكرها في ذاك اليوم ... تذكرت شعورها كيف كان يوم سمعت إنه سوى حادث ... شعورها بإنها في إحتمال تفقد حميد ... حياتها وحبها الوحيد ...
حميد: ريموووه ليش تصيحي...ماأحب أشوفج جيه...مسحي دموعج
مريم وهي تمسح دموعها: إن شاء الله
حميد: لاتخافي عليه أنا بخير
أم حميد: إن شاء الله دوم بخير يالغالي
.........
في ميلس أبوحميد
يالسين بوحميد وولاده سعيد وعلي وأحمد...وبوسيف وولده سيف وعلي...وبوضاعن أخو بوسيف وبوحميد...ومعه ولده ضاعن...
بوحميد: والله ماأعرف شقوله
بوسيف: مصيره بيعرف...وحميد ريال
بوحميد: يوم اليوم قال أنا بخير...حسيت بنغزه في يوفي
بوضاعن: ماعليك ياخوي...حميد ريال وبيصبر...وبيتعالج...وإذا مانفع هنيه بنسفره
بوسيف: قوي إيمانك بالله ياخوي وصبر...وإن شاء الله بيصح وبيرد شرات أول وأحسن
بوحميد: الله يسمع منك
ضاعن: اليوم شفت سالم ربيعه والله ماأعرف كيف ولد عمي يرابع واحد شرات هذا...واحد صايع ضايع
أحمد: بعد عنده ويه ايي المستشفى
بوحميد: موب زين ترمسون جيه عن الريال...إلي حصل قضاء وقدر
بوسيف: ونعم بالله
سعيد: بس يابويه حتى لو...هو إلي كان السبب بالي صار لأخويه
بوضاعن: هذا سبب من الأسباب ياولدي...وهذا قدر ومقدر
سيف: الله يعين حميد يوم يعرف
...........
في بيت بوسيف...في حجرة مريم يرن تلفونها تشوف أسم ميثان ظاهر على شاشة التلفون...
مريم: السلام عليكم
ميثا: وعليكم السلام ... شحالج مريامي الحين
مريم: بخير الحمد لله
ميثا: وشخبار حميد...عرف
مريم وبدت الدموع تنزل من عيونها: لا بعده ماعرف شيء.....
ميثا: الله يعينه...وشو قال الدكتور
مريم: قال بيحاول يسوي إلي يقدر عليه...وقال بعد لا تفقدوا الأمل في شفائه
ميثا: صدج مريامي لاتفقدي الأمل...ودعي وإن شاء الله بيقوم شرات أول وأحسن
مريم وهي تصيح: ياريت والله ياميثان...ماأتصور أشوف حميد ذاك الريال القوي إلي له هيبه...على كرسي متحرك...والله ماأستحمل
ميثا: خلي إيمانج بالله قوي يالغالية...
مريم: ونعم بالله...انزين ميثان بخليج الحين بروح المستشفى
ميثا: أوكى الغالية سلمي على عموووه وعلى البنات
مريم: إن شاء الله يوصل
ميثا: فمان الله
مريم: فمان الكريم
.............
