๑ لا تلــــــوم المغــرم الهــاوي..قصتيه الأولى.. ๑

[المدى]

رد : ๑ لا تلــــــوم المغــرم الهــاوي..قصتيه الأولى.. ๑

[SH11][/SH11]

:mf_zippy:

يلا غناتي نزلي الجزء اليديد

من زمان نترياج

 

[غنَاتْيـے]

.
.
๑.. صاحبي من دونك العالم صعيب ... يسكنه حزن ويغشاه السكون.. الفرح عن دنيتي أصبح غريب ... والسعاده صاحبي صارت شجون.. ๑

بعد ماخلصو الفطور نشن الحريم يصلن والرياييل سارو المسيد ..!
في غرفة فطيم ..


غايه : فطيم شغلي شغلي لاب توبج بحدر المنتدى..
فطيم : تحلمين اللحينه الكل بيتجمع تحت وانتي ان يلستي ع المنتدى مابتنشين..
غايه : والله خمس دقايق بشوف مطرش لي رساله ولا ..
فطيم : غاايو خبله انتي ترمسين جد ..صدق تحبينه ..
غايه : مادري يا فطيم مادري ..كل اللي اعرفه اللي اسولف له عن كل شي افهمه ويفهمني ومايرتاح قلبي الا اذا شفت منه رساله ..

فطيم : بنشوف آخرتها مع هالبطي ..

سجلت غايه تسجيل دخول وأول ماحدر طلع لها بكس الرسايل الخاصه ..

" لقد تلقيت رساله خاصه من ( الطويل النايف ) "

غايه تناقز : فديته فديته يافطيم هاذوه مطرش لي رساله ..
فطيم واقفه عند التسريحه تتجحل وتعدل شيلتها بتنزل تحت ..
فطيم : يا السخيفه برايج انا بنزل خلج هني
غايه : والله ماببطي برد ع رسالته وبحول وراج ع طول..

نزلت فطيم تحت وهي مضايقه ..لانه مايد مايا العزيمه شافت الحريم متيلسات
ومالها بارض تيلس معاهن واليازيه وحمده وشما بعدهن ماحولن ..
طلعت برع يلست في الحوي ع الكرسي اللي مجابل الزراعه ..اللي يحدر من باب الحوش ماتشوفه ..

تمت يالسه وتفكر ..ماتحس إلا بحد محطي ايده ع عينها ..وع طول قالت بدلع اووه غايوه شلي يدج..
وحطت ايدها ع الايد اللي مصكره ع عينها وتمت متيبسه..هذي مب ايد بنت اصلا ..
تم مايد راص ع ايدها ومب طايع يفجها ..فطيم تتنافض ..

مايد قرب من اذنها ..وهمس لها..

مايد : انا ميود ..
فطيم تنهدت بصوت عالي وارتاحت شويهـ ..ومايد بعده راص ع ايدها..
فطيم : مايد فجني عورت ايدي..

مايد : شو غناتيه زغتي مني ..
فطيم بضيق وبعدها خايفه : هي زغت ممكن ماترمسني ..ونشت تبى ترد الفيلا..

مايد قبضها من يدها ويلسها ع الكرسي فطيم غاديه حمرا من الغيض والمستحى..
سحبت ايدها بسرعه من بين ايده ..طالعها مايد بنظره ..

فطيم : نعم ..شو في خاطرك بسير داخل بيفقدوني..
مايد : فطيم انتي قهرتيني امس يوم رديتي بيتكم كان خاطريه تسهرين فيانا والله اليلسه بدونج ماتسوى ..
فطيم ساكته ماتعلق ..ماتعرف شو تقول اصلا ..

غايه طالعه من باب الفيلا رايحه ادور ع فطيم شافتها من بعيد يالسه مع مايد ماحبت تخرب عليهم
وسارت صوب المطبخ..

سهيل : بوووووووووووووو
غايه : اووف يا السخيف طيحت قلبي في بطني ..
سهيل : ههههههه شو تسوين ..
غايه : ماشي ابى بيبسي ..
سهيل : ماشي توه شالينه كله ميلس الرياييل سيري حجرتيه داخل ثلاجيته بتحصلين ..امممم بتخبرج غايه وين يزووي ..؟
غايه تخزه بعين : في حجره حمده ..
سهيل طلع يربع : ثانكيووو جااو ..


سهيل دخل البيت يربع وسيده حجرة حمده ..
طق..طق ..طق ..

حمده فجت الباب ..اول ماشافت سهيل قالت له يصبر شويه البنات بيتحجبن..
خلاف فجت له الباب ..
وقف سهيل ببتسامه عريضه يطالع شما ويزوي تخزه بعينها من فوق لين تحت ..
سهيل : ليش ماتنزلن تيلسن تحت مع الحريم ..
حمده : اللحينه بننزل ..انت بس اظهر شو يايبنك هني ملقوف..
سهيل مطنشها : شما امس خذت متووه " ببغاء " يديد تبين اشوفينه ..

ويزووي بتموت من القهر ولا كأنها موجوده ..
شما : ماعليه خلاف بسير مع حمده بشوفه ..
حمده اطالعه بنص عين : سهيل اخلص شو تبى ..
سهيل شرات الغبي : لا ماشي يالله جــاو..

تمت اليازيه مغيضه ليش جيه يسوي شو قصده هالسخيف..
ونزلن البنات تحت وشما فرحــانه انه سهيل رمسها ..وعطاها ويه..


برع في الحديقه ..

مايد : فطيم بتمين ساكته والله آسف خلاص لا تزعلين ..
فطيم : مب زعلانه خلاص خلني اسير ..
مايد : عيني بعينج ..ولف صوبها يطالعها ...
فطيم لفت صوبه وابتسمت له ابتسامه حلوه ذاب منها مايد ..

ساند مايد راسه ع الكرسي : آه فطيم بقى شويه واخلص ثنويه واخطبج ع طول ..
وقف مايد ومد ايده حق فطيم ..وتمشو رباعه لين باب الفيلا ..

طلع من مخباه كت كت وعطاها اياه ..ضحكت فطيم لانها تحب الكت كات وايد ..

مايد : يعلني ماخليت من هالضحكه ..يالله سيري داخل خلاف بلحقج ..
دخلت عليهم فطيم ويها احمر ..

ام راشد + عوشه + ام حامد + ام حميد + اليازيه + شما + حمده وخليفه وساره ..

اليازيه : ويه بسم الله شوبلاج جيه غاديه لهالدرجه حر خاري..
فطيم تبتسم : وين غايه ..؟
حمده : سارت حجرة سهيل تييب لها بيبسي ..

سارت فطيم حجرة سهيل وشافت غايه هناك..

غايه : هاتراضيتو ..؟
فطيم : وي وي كيف عرفتي ليكون شفتينا..!
غايه : هي شفتكم من بعيد ..زين انه محد شافكم ..!
فطيم : فديت روحه والله .. هاشوكاتب لج بطووي عيل ..؟
غايه : ماشي تدرين هو من يومين عنده اجازه فراد بيتهم العين فاليوم مطرش لي يقولي شو سوا في العين ويبارك لي بالشهر ..
فطيم : غاايوه تدرين اجازه نص السنه بنسير صوب بخا وخصب..
غايه : هي ونااسه والكل بيرووح احلى شي.. اممم يوم قلت حق بطي عن البقعه قالي يعرفها ويسير لها فيا ربعه دووم ..وي وي وي فطيم تخيلي اشوفه ..!
فطيم : ادزها من جتفها اطلعي اطلعي الله يهداج ..


يوم اذن العشا نشن الحريم والبنات سارن صلاة التراويح
ويوم خلصو الحريم كلهن سارن بيت " ام علي " اللي هم ام عفرا جيران " ام حميد " ..


البنات كلهن متيلسات في الصاله ويسولفن ..

اليازيه : اوووف ملل لازم نسوي شي مفيد ..
شما : ههههه مثل شو انزين ..
حمده : مادري انزين لو نبى نظهر وين بروح مثلا ..؟
غايه : سرنا المارينا ..
حمده : اقتراحج وايد حلو تبين يذبحونا تعرفين كيف زحمه هالوقت ..
غايه : نشن ظهرنا بنسير المطبخ بنسوي كيك وحلويات ..
شما : هي ودووني اشوف المتوه مال سهيل ..
فطيم : افاا عليج متووه وعصافير وأرانب وهمستر مال فيصل ..

ظهرن البنات خاري فطيم ودت شما تشوف القفص اللي مسونه سهيل ورا البيت ..
ومعاهن غايه ..واليازيه وحمده سارن المطبخ ..

يرت اليازيه لها كرسي من كراسي الطاوله اللي في المطبخ ويلست ..
وحمده تجلب في الدفتر وادور شو تسوي من انواع الكيك ..

حمده صدت صوب اليازيه : يزووي شو بلاج ضايقهـ ..؟
اليازيه : ماشي حمده ماشي ..
حمده : كيف ماشي شوفي ويهج كيف منجلب ..سكتت دقيقه وكملت... مضايقه من سهيل ..
اليازيه وطت راسها ع الطاوله : هي يا حمده ليش جيه يسوي بي..مابى منه شي بس لا يغايضني ..
حمده تمسح ع شعر يزووي : فديتج يزووي انتي تعرفين كيف طبع سهيل بس صديقيني انا حاسه انه يحبج ..ومايسوي بج جيه الا عسب تتحركين وترمسينه باي طريقه..

نشت اليازيه غسلت ويها ..وتمت تساعد حمده يسووون كيكة السنيكرز..

الشباب ظاهرين من الميلس ..سايرين بيت فاهم ربيعهم ..

سهيل + عبدالله + منصور + مايد + حامد ..

مايد : انا بسير مع حامد ..
عبدالله : انا بعد بيي فياكم ..منصور وسهيل الحقونا لا تبطون ..
سهيل : تعال تعال شوف البنات في المطبخ خل نطفرهنـ ..

منصور : السلام عليكن ..
حمده + اليازيه : وعليك السلام ..
سهيل فتح الثلاجه وظهر دبة عصير البرتقال واقف يصب له : شو تسووون ..؟
حمده : كيكة سنيكرز بعدها مازهبت تونا مسوينها ..!
منصور : انا ابى منها ..
حمده : يوم بتردون من خاري بحط لكم منها ..
سهيل : يزووي ناويلي من الفطاير اللي عدالج..
منصور : اوووه سهيل بعدك بتاكل انا بشغل السياره اللحقني بسرعه ..وغمز حق حمده وظهـر ..

اليازيه واقفه عدال الثلاجه الثانيه وتعابل بغرشه الكولا ماتروم تفجها ..
سهيل : عصه ..هاتي بفجها لج ..
مدت اليازيه ايدها وبالعمد سهيل دق ايدها وايده كانت دااااااااااافيه وحاره عكس يزووي اللي ايدها بارده من غرشة الكولا ..

فجها سهيل وشرب منها بكل بروود واليازيه اطالعها فاجه عينها تقول بقره شايفه حريجه..
حمده مطنشتنهم وتعابل الكيكه ..

مد سهيل ايده : دوج فجيتها ..
اليازيه مبهته واطالعه ..
سهيل : شو اتجزين مني يزووي ..

شلت اليازيه بعمرها وطلعت خاري..وحمده مستغربه شو صار..؟
حمده : الله يغربلك يا السخيف ..
سهيل : شو سويت ابها ..
حمده : لا تغايضها الله يخليك وايد مضايقه منك...
سهيل : والله انه مكانها هنــي..ويأشر ع قلبه..

وطلع سهيل سار صوب سيارة منصور وهو يفكر في اليازيه..وكيف يكسبها ..!!
.
.

 

[معاني]

رد : ๑ لا تلــــــوم المغــرم الهــاوي..قصتيه الأولى.. ๑

غناتي ..

يعطيج الف عافييييييييييييييييه ..

الجزء وايد حلـــــــــــــــــــوو ..بس للاسف خلص ابسرعه ..

عيبتني لمت البنات .. و الشباب ...رومانسية مايد و هدوء فطيم ...و خباااااااااال غايه اونهاا تبا اتجوف بطوي اتنكت هذي ..؟؟

موقف سهيل و مغايضته لليازي كان سيد الموااقف بها الجزء...

سهيل يبا يكسب اليازي بس حركاته للاسف تخرق حاجز كبير بينه و بين اليازي و غير قلب شمااا ..


ننتظر جديدج يا الغلالا ..

معاني..​

 

[سما الوفى]

رد : ๑ لا تلــــــوم المغــرم الهــاوي..قصتيه الأولى.. ๑

مشكورة غناتي على الجزء

وننتظر الجزء الجاي بفارغ الصبر ولا تتاخري

سلاااااااااااااام

اختك ومتابعتك

زهرة الشحوح

 

[المزيونه11]

رد : ๑ لا تلــــــوم المغــرم الهــاوي..قصتيه الأولى.. ๑

تسلمين غناتي على الجزء


وفي انتظار الجزء اليديد

 

[بن قوبع]

رد : ๑ لا تلــــــوم المغــرم الهــاوي..قصتيه الأولى.. ๑

نفس قصه حما وفوطمي
يا سبحان الله

 

[غنَاتْيـے]

رد: ๑ لا تلــــــوم المغــرم الهــاوي..قصتيه الأولى.. ๑

.
.
يعطيكم العافيه ع متابعتكم..!
والسموحه ع القصور..لاهنتو..!
.
.
الجزء الثامن ..!
.
.
×.. كل زين أشاهده وانتم بعيد..منيتي ليتك معي..وان سهرت الليل اهوجس بك وأعيد هلّ لاجلك مدمعي ..انت هاجس خاطري..وانت فرحة ناظري ..×

السبت ..

الساعه 2 ونص في بيت أم راشد .. حمده + فطيم مسدحات في الصاله يشوفن التلفزيون ..من قناه لين قناه ..


حمده : غايوه باجر بنسير الخياط بنييب ثياب العيد وخلاف بنسير المول بناخذ نعول وجيه بنخلص مابقى شي ع العيد ..

فطيم : والله زين ابى اخذ لي بدله من انوتــا حق ثاني عيد .. اكيد قوم غايوه بين فيانا..!

حمده : اكيد ..بنودي رشود وساره بعـد..عوشه تقول ماخذت لهن نعول..وتدرين هي تعبانه ..
فطيم : هي فديتها بعدها ماخبرت رشوود بيطير من الوناسه ..

حمده : هي تقولي باجر بتخبره ..ياحليها عووشه..اممم انزين بنقول حق عبدالله يويدنا..

فطيم : صدق وينه .. الوقت وايد تأخر فجأه الساعه 1 طلع من البيت ..هب من عادته .. بتصل عليه صبري..


.. إن الهاتف اللذي طلبته مغلق أو خارج نطاق التغطيه يرجو الإتصال فيما بعد ..

فطيم : مغلق حمدوه ..
حمده : قولي والله..قلبي قبضني .. هاتي انا بتصل فيه ..

تليفون عبدالله يرن ويـرن ويــرن بس مايرد عليه .. حمده يايه بتصكر ..

عبدالله بصوت تعبااان ومضااااااااااايج : ألو
حمده : عبادي فديت روحك شوفيك ..
عبدالله : مافيني شي ..
حمده : عبادي الساعه 2 ونص وين انت شو مضايقنك..؟
عبدالله : انا في جميرا ..
حمده تمت مبهته دقايق : عبدالله رد البيت بنتكلم ..
عبدلله : انزين بتم شويه ع البحر وبرد ..
حمده : لا تسرع اتـرياك انا مابرقد الله الله بعمرك ..
عبدالله : فمان الله..


فطيم : ها حمدوه وينه عبود ..
حمده : في جميرا ..
فطيم اجمعت الدموع في عينها : شو هذا اخوج ماينسى خلاص السالفه من سنه..
هي مابغته هي اختارت واحد ثاني ..هي باعته..
حمده : خلاص فديتج صلي ع النبي..فطيم اللي يحب ماينسى في يوم وليله ..


فطيم : خل امايه تخطب له وحده ثانيه يمكن ينسى ..
حمده : امايه كم مره قالت له هو هب راضي..


عبدالله كان يحب مهره وحده من بنات دبي ..وسوا المستحيل عشان امه توافق تخطبها له ..
لانها هب من عربهم ..يوم سار خبطها ردته لانه واحد ثاني من تجّار دبي متقدم لها..
تغير عبدالله 180 درجه ..صار مايرمس وايد ومايظهر مع ربعه كله في حجرته بس مع الأيام تحسنت حالته .. اليوم طرت ع باله وماحس بعمره إلا إن عند بيتهم في جميــرا ..


في غرفة عبدالله الساعه 3 ونص ..يسولف مع حمده ..

حمده : عبدالله انزين شو رايك امايه تخطب لك وحده ثانيه ماشاءالله بنات بوظبي مكثرهن وماعليهن قصور ..
عبدالله : انتو ماتفهمون مابى غيرهــا ..قلبي ماختار الا مهره ..
حمده : عبدالله اسمحلي يعني بس هي اللي ردتك هي باعتك ماقدرت حبكم وارخصت به ..
عبدالله ساكت ..

عبدالله : ولو امايه خطبت لي وحده ثانيه ماريد اظلمها معايه..بكون جسد معاها بس بالي في دبي..
حمده : عبدالله بتنساها صدقني خاصه اذا البنت اللي بيخطبونها لك بتكون بنت حلال وبتنسيك كل شي..وبتحاول تغيرك..


عبدالله : يصير خير ..
حمده : خلاص فديتك ارتاح اللحينه .. تصبح ع خير ..

وظهرت حمده وخلت عبدالله يفكر .. مابين قلبه وعقله.. لين متى بيحب مهره وهي اختارت غيره يكون شريك حياتها..وهل اذا خطب غيرها بينسى ..؟



الأحد .. بعد صلاة المغرب ..


حمده ترمس اليازيه بالتليفون .. والكل يالس في الصاله يشوفون حاير طاير ..

حمده : انزين يزووي عقب صلاة التراويح ع طول كونن زاهبات بنخطف عليكن ..
اليازيه : منو بيودينــا ..
حمده : عبدالله ..
اليازيه : خلاص عيل اجلبي ويهج..
حمده : انزين يا الهرمه فارقي ..

نقز سهيل عدال حمده : وين سايرات ..؟
حمده : بنسير الخياط والمول ..
سهيل : انزين انا بوديكم عبدالله مشغول شوي اليوم ..صح عبدالله ..
عبدالله : منو قال .. ؟ لا تيلس تألف..
سهيل : عبدالله والشيمه ورفقه انا بوديهم ..
عبدالله يضحك عليه : انزين ودهم برايك اسميك الا تبى تشتغل دريول .. ريحتني بعد..

سهيل : فديت خشمك بوحميد ..وسار يخاشمه ..
الكل ميت من الضحك .. شو بلاه سهيل مستخف ..


في بيت راشد يالسه يتغـتـر وعوشه تحط له عود .. ادخنه قبل مايسير المسيد ..

عوشه : راشد ..
راشد : لبيه ..
عوشه : لبيه حاي .. غلايه اليوم قوم حمده بيسيرون المول طرشت معاهم راشد وساره وبشكارتهم ماخذت لهم نعول حق العيد ..
راشد : برايه دام فيا عماتهم ..قاصرنج بيزات ..سيري انتي جان تبين..
عوشه : لا فديتك ..مافيه حيل ..تعبانه شويه..
راشد : شوفيج غناتيه ..
عوشه موخيه راسها : راشد .. انا .. حامل ..

راشد ماعرف شو يسوي من الفرحه .. حضنها بقوه .. وباسها ع راسها ..

راشد : فديتج يا ام خليفه .. مبروك غناتيه..الله يحفظج لي..
عوشه مستحيه : ويحفظك لي ..

راشد: باجر بنسير نفتح لج ملف في الكورنيش ..انزين ..
عوشه : ان شاءالله فديتك يالله خلني ادخنك عن تبطي..

عوشه تموت ع راشد .. حياتها ودنيتــها.. وعت ع حبه في هالدنـيا..لو يبى روحها ترخصها له..
وراشد مايشوف جدامه إلا عوشه .. ام عياله وغناته ..


حدر راشد فيلا بيت امه ومعاه خليفه وساره ..
شاف امه يالسه مع عبدالله ..

راشد : امايه وين حمده وفطيم ..
ام راشد : فوق فديتك شو تبى ابهن ..
راشد : هاذيلا خلوف وساره بيسيرون معاهم المول ..
ام راشد : خلاص خلهم هني يالسين فيايه لين يصلن البنات وبينزل..

راشد : يحب امه ع ايديها.. امايه باركيلي..عوشه حامل..
ام راشد : يعلني افداك مبروك الف مبروك..اشعنه ماتقولي ..
راشد : مادري امايه توها خبرتني..
عبدالله : مبروك بو خليفه ..
راشد : الله يبارك فيك بو حميد عقبالك ونشوف عيالك..

عبدالله صخ دقيقه وكمل : يالله بو خليفه بنتـأخر ع التراويح ..

ام راشد : خلوف نش فديتك دق الباب على هالهرم سهيل ..قوله روح المسيد ..
نش خلوف ويرفس الباب بريوله : عمي سهيل .. عمي سهيل..

فتح سهيل الباب سوا عمره مغيض..خليفه زاع منه يعرف حركات سهيل تم يربع قبضه سهيل من قميصه ورفعه ع فوق تم يباغم ..
خليفه : ماما العوده .. يطري ام راشد ..
ام راشد : الله يغربلك يا سهيل فج الصبي بيصيح .. روح المسيد ..
سهيل ميت من الضحك ع شكل خليفه : ان شاءالله امايه قولي حق بناتج يزهبن لانه المول خلاف يستوي زحمه ..

ردو الرياييل من الصلاه .. راشد يلس عند حرمته اليوم مايبى يخليها بروحها ويسير عن الرياييل..!
عبدالله طلع عند ربعه ..!

سهيل حدر الفيلا : امايه انا باخذ موتر البيت .. وين سامياه ..؟!
ام راشد : من شويه سار يوصل فيصل عنده موعد اسنان ..!
سهيل : ياسلام والمرسيدس كيف بضم البنات كلهن ..!؟
ام راشد : شل موتر راشد ..!
سهيل : اوكي بسير اشوفه خل ينزلن البنات..!

شل سهيل موتر راشد وشل البنات وخليفه وساره وبشكارتهم وسارو صوب بيت خالتهم ..!

سهيل عند الباب يضرب هرن ..ظهر له منصور ..حوّل سهيل يسلم عليه..!
منصور : انزين اقرب شويه ..
سهيل : لا ماشي وقت فديت خشمك ..
منصور : وين ابها المارينا ولا بوظبي مول
سهيل : وين يا بنات..
فطيم : بوظبي ..
منصور : خلاص انا بلحقك خلاف .. وسار يزقر البنات..

غايه نزلت قبل يزووي .. خطفت يزوي ع امها وشلت منها بيزات ويوم قربت صوب السياره..
انصدمت انه هذا سهيل واقف برع يعدل عقاله مب عبدالله ..

ردت خطوتين ع ورا .. انتبه لها سهيل..
سهيل : مرحبا اليازيه .. يالله اركبي تأخرنـا..

اليازيه : لا خلاص هب سايره ..
سهيل هني غيّض وهو من النوع العصبي ..

سهيل : برايج بتيين تعالي .. مابتين ع راحتج .. وركب السياره وصك الباب بقوو..!!
نزلت حمده ترمس اليازيه وشويه يت اليازيه ركبت ..!


هدوء .. ماحد يتكلم يدرون انه سهيل معصب ..!
شغل سهيل شريط وحط محمد عبده ..


الحب كله لو جمع عشر ذره ..واللي بقلبي لك ملاييين ذرات ..
احساسي لك كوكب تعدا المجره ..في هالفضا شيد لنفسه مجرات ..



وصلو المــول .. اول شي حدرن البنــات انوتــا لانه عندهن بدلات وايد حلوه وراقيه..
شل سهيل خليفه وداه المندوس عسب ياخذ له نعال حق العيد ..

في المحل..

حمده : يزووي يالله عاد شو بلاج طاعي ويهج كيف غادي ..
اليازيه : منو يتحرا عمره عشان يباغم عليه ..
حمده : الصراحه حركتج تقهـر .. لازم بيضايق..تقول بتركبين مع جني هب سهيل..
اليازيه : انزين انا لو أدري انه هو ماييت ..
حمده : تدرين والله وايد استانس يوم عبدالله قال له برايك انت ودهم المول ..

قاطعتهم فطيم ..

فطيم : حمده تعالي شوفي هذا ..
حمده : وايد حلو بس شوفي تنورته قصيره شويه .. .. شو بتلبسين ..
غايه : فطيم خذي عليه بوت وايد حلو بيظهر ..
فطيم : اممم مادري بعدني بشووف ..

اليازيه واقفه تتطالع قميص ومحتاره بين الألوان واحد عنابي والثاني برتغالي ..
شويه وصل سهيل معاه خليفه ..

سار صوبها ..
سهيل : اممممم اقولج العنابي احلى .. انتي بيضا بيظهر عليج غاوي ..
اليازيه ماردت عليه حست عمرها مستحيه وماتروم ترمس ..
سهيل : صديقني خذيه مابتندمين ..


شلت اليازيه العنابي وسارت .. سهيل استانس انها خذت ع شوره ..

سهيل : هاتي كيستج بشلها ..
اليازيه : لا برايه اروحي بشلها..
سهيل : قلت لج هاتي .. وشل الكيسه من ايديها ..!!

فطيم : سهيل انا بعد شل مالتيه ..
سهيل : يالله مناك .. شو قالو لج حمّالي انا ..!

ضحكت عليه اليازيه ..
قرب منها سهيل : فديت هالضحكه ..
هني ملامح يزووي تغيرت وجلبت ..

سهيل : ماعليه يا اليازيه .. بشوفين جريب شو بيستوي ..

ظهرو خلاف وكل شويه من محل لين محل ..


سهيل : ألو مرحبا الساع بو طحنون وين انت ..!
منصور : توني حادر انتو وين ..!
سهيل : صبر مادري البنات وين يبن يسيرن .. وين تبن تسيرن ..!؟
حمده : نبى مانجو وخلاص .. خلاف بنسير الخياط ..
سهيل : منصور سايرين صوب مانجو ..
منصور : مانجو ولا همبــا ..
سهيل : ياخي انت وايد ظريــف ..
منصور : ههههه طالع عليك يالله بييكم هنـاك ..


لحق منصور ابهم ويلسو البنات يتنقون ومنصور وسهيل واقفين صوب واحد معاهم خلووف ..
رن تليفون منصور .. وصكره .. رد ورن مره ثانيه ..

" البالوعه يتصل بك "

وصكره ..حمده انتبهت على الحركه .. تمت اطالعه بنص عين ..
رن مره ثالثه ..ترخص شويه منصور وظهر خاري المحل ..


منصور : نعم ..
مــي : هلا فديتك ..
منصور : تفداج الند ..انتي ماتستحين ..
مي : شو بلاك كله مغيض عليــه .. وتصك في ويهــي ..
منصور : شو عندج خلصي انا مع هليه ..
مـي : ادري انك مع اهلك .. يوم بتحدر المحل لف صوب اليمين ..


صك منصور في ويهــا وحمده تشوفه بنظرة عتــاب ..
اول مادخل لا إراديا لف صوب اليمين ..
.
.
.

​

 

[القيصر]

رد: ๑ لا تلــــــوم المغــرم الهــاوي..قصتيه الأولى.. ๑

لي عوده




القيصر

 

[قناص الآريام]

رد: ๑ لا تلــــــوم المغــرم الهــاوي..قصتيه الأولى.. ๑

السلام عليكم ورحمة الله وبركاته

الا يامرحبا حي بنفيحه = نسيم الشرق لي يابا لجوابي
هلا بالي عرف قاضي النصيحه = كريم الاصل واجداد نجابي
تمثل لي ابتماثيل صحيحه = وكل ماقال لي فيها صوابي
تري في الناس اجناس شحيحه = اتخيل لك غدير من سرابي

الله يرحمك يالشيخ زايد رحمة واسعة .. ويدخلك الجنة ويلحقك بالشهداء والصديقين

حبيت أقول أني متابع

عبدالله ...
...............................
مابين قلبي وعقلي محتار .. منشغل في لوعة أفكاري
الحب ماعاد لي به مسار ... من وين وين اخلق له مساري ؟!

حالة عبدالله ياغناتي ................................... التعبير عنها يظل ناقص..

يعطيج العافيه

عشنا جو التماسك الاسري

والمحبه وخوف كلاً على الثاني

اتمنى لج التوفيق

دمتي بحفظ الله

أخوج قناص الأريام​

 

[الفاتنة الشحوح]

رد: ๑ لا تلــــــوم المغــرم الهــاوي..قصتيه الأولى.. ๑

رووووووعة يا غناتي

بس وين التكملة


؟؟؟؟؟؟؟