خل العذول موطـي الراس منكوس..* معاني..*

[معاني]

رد: خل العذول موطـي الراس منكوس..* معاني..*

نواري..

من اعيوني ..

بس ادري انج بتقرينها ..ما فيج صبر خخخخخخخخ

معاني..

 

[معاني]

رد: خل العذول موطـي الراس منكوس..* معاني..*

اواشي..

موحولش باد ..

غير سهار و منوووم ...

بس فديتج ما طلبتي ..

بنزل لج كم جزء نرضيج ..

و شاكره لج ع المتابعه ..

معاني..

 

[معاني]

رد: خل العذول موطـي الراس منكوس..* معاني..*

:: الجــــــــــزء الثالـــــــث عشـــر ::




اتصلت له ابسرعه لاني حسيت اني فقدته للابد خـلاص ...بس صكر التلفون ابويهي ..زخيت المخده ابكل غيض و يلست اصيح و اضرب المخده و كأني اطلع حرتي فيها ...ابد راشد ما منه فايده ..كيف اصلا يتوقع مني اسوي هالشي ..شو بيكون موقف اهلي مني ...كيف احط راس اخواني بالتراب ...

كيف بعدين بجابل ندى و الي سويته بخالها ...نشيت من مكـاني ورحت صوب الدريشه فجيت الستاره ...خذت نفس طويل ..ماشي فايده ..حتى لو رفضت ذياب ..او وافقت انا خسرت راشد و للابد ..زخيت الستاره و يلست عالارض اصيح...معقوله كل شي حـلو بيني و بين راشد انهد ابلحظه ...

احلى عالم رسمته و عشته مع راشد بحـلوه و مره ..خلاص راح و اختفى ..بسهوله...هذا كله ابسبب منوه ..لالا انا مالي ذنب ..حتى راشد ماله ذنب الذنب الوحيد ذنب سعيد الي رده يوم خطبني ولا راشد ما قصر ياه و دق الباب ...خذت نفس طويل يا ربي شسوي ساعدني ...

كيف اكمل حياتي من دون ..راشد كيف ...انسدحت عالارض و يلست اصيـح ...منهاره ..كنت انتظر متى ايرد راشد علشان يخلصني من الهم الي انا فيه ...حاربت اهلي و قاطعت اخواني ..سجنت نفسي بحجرتي لي ما ايي راشد يصلح كل شي ..بس للاسف ...راشد ما يقدر يسوي شيء ...

شسوي الحينه شسوي !! ..حسيت ان حزني مب ع سالفه خطبتي من ذياب حزني لاني خسرت راشد خـلاص ..خسرت حبي الوحيد ..سمعت دقت ع الباب ...

غطيت ويهي بايدي ما ابا حد يزعجني ...سمعت دقت الباب مره ثانيه..صرخت: خلوووووووووووني ابروحي

بس الباب انفج يلست اصيح ابصوت عالي منهاره .. و كاني ابا اخبرهم اني انا خلاص انتهيت ..ما كنت اعرف منو الي كان يدق الباب ..بس سمعت صوت سعيد :شوق شوق ..

رفعني و ضمني لصدره ..حضنته بقوه و كأنـي محتاجه حد يكون معاي ..
رفع راسي خلني اطالعه : شو فيج ..ليش اتسوين ابروحج جذا ..
تميت اصيح ..و رصيت ايدي ع كندورته ...

حاول يوقفني بس ما رمت و كنت اصيح بشكل هستيري ...

عصب علي : شووووووووق اصطلبي ..
قعد يعطيني طراقات ع باله مب حاسه فيه بس انا كنت مستوعبه كل شي حولي الا اني مب قادره ..اتحرك ..و كاني مشلوله ...غمضت اعيوني ورجعت فتحتها ..جفت حصه و امايه اتصيح ...

امايه: حسبي الله و نعم الوكيل خلاص ما بنزوجج بس لا اتسوين ابروحج جذا ..

خلاص انتوا قضيتوا علي رفضتوا راشد ..الحينه شو حياتي مالها معنى ..ولا طعم من عقب ضوى عيني ..محد كان يصبرني و يونسني غيره ..

كنت اسمع صوت سعيد و اصوات و اصوات بس حسيت اني غبت و تهت بدوامه ما اجوف غير ظلمه سوده ..فجيت عيني ..كنت احس بالتعب فضيع ..
اول ما طاحت عيني ع ابرة المغدي الي كانت بيدي ..رجعت و غمضت اعيوني انا فالمستشفى ...ليش شو استوا ما اذكر غير سعيد يوم حضني ...رجعت فتحت عيني يوم سمعت اصوات في الحجره ..

جفت سعيد واقف يطالع الدنيا برع من الدريشه همست: سعيد..
التفت صوبي و ابتسم لي : صح النوووووووووم ..

زخ ايدي و كمل : اول مره اعرف انج دلوعه ...

قلته بضعف: انا اسفـه ..
رد علي : ع شوه ..

صديت الصوب الثاني ما عرفت شو ارد ...هز ايدي : شوقاني ..
طالعته و دموعي انسابت ع خدي : مدري ليش انجلبت حياتي جذا ..

سعيد يلعب بشعري و يرمس بحنان : لا ما انجلبت ..جان ما تبين ذياب ..بنخبره و كملي حياتي عادي ..
سكت ما عرفت شو ارد عليه ..
سعيد: امايه و كلهم فـ البيت يحاتونج ...بطلي حركات الدلع و ردي شرات قبل كلي .. و شربي ولا تحرمين نفسج و الي تبينه انا حاضر ..

كنت بقوله انا ابا راشد بس راشد ...ليش سويت جي ..ليش رفضته ليش ...؟؟؟
طالعته يوم قال: حتى ابوي تعب حبتين يوم جافج شرات الميته انشيلج ..
شهقت: وين باباتيه ..انا احس من زمان ما جفته ..؟؟
سعيد: كلهم كانوا هني بس ردوا البيت .. يمكن باجر بييون ..

قلته ابسرعه: ليش باجر انا بروح البيت ما فيني شي و الله ..

حاولت اقعد علشان اثبت له بس سعيد ما خلاني و اصر ع كلامه: باجر شوقاني بظهرج لا تستعيلين ..
قلته مستسلمه: ما احب المستشفى ..

ابتسم وقرصني ع خدي: محد قالج ما تاكلين ..عقاب لج..

ابتسم لي و رديت الابتسامه تم معاي حوالي ساعه يسولف عن اشياء اتصير له بدوامه علشان انسى ..الي فيني .. و بالفعل قدر ينسيني و قعد يضحك و اضحك ع كلامه ...عقب فتره ..يت الممرضة و فجت عني ابرة المغدي .. و حطوا لي عشى ..فـ البدايه حسيت جبدي لايعه...بس عقب كلت بشهيه ...

اتصلت حصه حق سعيد علشان تطمن علي .. و كلمتها و كلمة امايه ...و حمودي بس شيخاني قالوا لي كانت فـ حجرتها ..اتراجع دروسها ... وقف سعيد ع الساعه 10 يبا يروح البيت ..سلم علي و وصاني انتبه لروحي ..
قلته: باجر من الصبح تعال ظهرني من هني بترياك..

ابتسم لي و قال : من عيوني ..تبين حايه..
رديت الابتسامه: سلامتك ..."قلته" لا اترد خبر حق ذياب اصبر شويه ..
فاجاتني ابتسامته: ان شاء الله ..

عقب ما ظهر سعيد يلست ابروحي اتامل السقف ..شو الي سويته ابروحي انا ..كل ها علشان ما اخسر راشد ..ما بغيت اتعب نفسي و افكر زياده ..غمضت اعيوني اريح ..و رقدت و اول مره ارقد و انا مرتاحه من اسبوعين ..

ع الساعه 10 فجيت اعيوني جفت امايه و حصه و باباتيه ..صرخت: باباتيه..

نقزت امايه متروعه من صوتي : بسم الله ع بالي صار فيج شي ..

و يت صوبي لوت علي و باست راسي ضحكت: ههههههههههههه تولهت عليكم ..
حصه اتسلم علي: الحمدلله ع السلامه ..

امايه: بنات اخر زمن ...

مديت ذراعي حق ابوي الي ياه و لوى عليه يلست ابوسه: فديتك و الله اني افتقدتك ..حبيبي انته ..
يلست يبوسني ع راسي و وملامح ويهه مرتاحه قلته: سامحني .."دمعت عيوني "

امايه: مسامحنج بس لا اتعيدنها ..خبلت فينا تراج ..
قلتهم: ههههههههههه وين شيخاني ؟؟

حصه: عندها مراجعه ..شخبارج الحينه شو اتحسين..
قلتهم: ابخير .. بس متى بظهر سعيد قال بيي ياخذني الصبح..
امايه: صبري لين الظهر ..بيظهر من دوامه و بمر عليج ..

قلتهم بخيبه: بعد بتريا ..
حصه: ما عليه تحملي ..ساعات ..

عقب ساعه ظهروا من عندي ...نزلت من الشبريه حسيت بالوحده ..يلست اطالع برع .انفج الباب ع بالي الممرضه بس فاجأتني ندى و بدور ..و موزي ..

مدري ليش يوم جفت ندى طرت من الوناسه يمكن لان زمان مب جايفتنها ..ربعت صوبها \لوت علي و جنها تبادلني نفس المشاعر : اشتقت لج شوقاني حمدلله ع سلامتج..

ابتسمت لها: الله يسلمج..
بدور اتفجج من بينا : خوووز ودروا عنكم الفلم الهندي ..

الكل: هههههههههههههههههههههه

موزري: اجر و عافية ..بلاج ..شي صابج ..مب خطبه هاي ..
ابتسمت لها لاني ما عرفت شو ارد عليها ..رديت ابمكاني و انسدحت ع الشبريه ..طالعت الباقه الي كانت شايلتنها بدور ..قلتها: حـلوه ..
بدور: عيونج الاحلى بس هاي مب مني من احم احم تاشر لندى" خالها بس انا قلت اشيلها خقه جدام الرايح و الراد..


ندى: ههههههههههههه انتي حركات..

فهمت من كلام بدور ان ذياب يايبنهم ..موزي: وايد ضعفتي اخ لااه مب حلو عليج الضعف مره انقرضتي ..
ندى: ليش شوقاني من شوه ..

شو اقولها هزيت جتفي مب محصله رد ع سؤالها ..
بدور: متى بظهرونج ..؟؟
قلتها: الظهر بيي سعيد ياخذني ..

بدور: يعني مب سوااافي

موزي: بس عاد استحي و خيلي ..
ابتسمتت لها الله يعينج بدور كيف جي صابره و متحملله ..انا ما تحملت الي صار بيني و بين راشد ع طول وصلت المستشفى صج احسدج ع قوتج ..و ثقتج بنفسج..

وقفت موزي: يلا راشد يتريانا ..

طار قلبي : راشد يايبنكم ..؟؟
بدور: هي زين منه ..
موزي: لازم بييبج ..لو قلنا ندى ما بتيي جان مابفكر يوصلنا مكان..
بلعت ريجي اطالع ندى الي احمرت ..و قالت: موزي لا اتبالغين ..

راشد يااه حتى ما فكر يسال عني او يسلم علي ..؟؟ يالله كيف قلبك قاسي ...شو يعني خلاص ما يباني ..؟؟يبا ندى..سلمت علي ندى و موزي و تغشت ندى ...قبل ما تظهر من حجرتي ..
موزي: يلا بدور ..راشد حرق موبايلي ..

لها الدرجه مستعيل بعد ..الله يسامحك كيف طاوعك قلبي ..حتى ما تسال عني ..
بدور: زين طلعوا برمس شوق شويه ..برع بررع

موزي: لا اتاخرين..
عقب ما طلعوا سالتها: راشد وينه برع ..؟؟
بدور يلست جريب مني ..مب مهتمه بسؤالي: مدري عنه ..المهم اقولج شخباره بو عيون
طالعتها باستغراب : بو عيوون ..؟؟

بدور: اخوج الدب لااه ..يا ربي وحشني كيف قدرت اصبر هالفتره كلها ...بعد باجي امتحاناتنا عقب برد الصق فيه ..بس شكله عادي عنده بغى الفكاك..

كانت بدور ترمس و انا سرحانه بعالم غير ..راشد ليش ماا يااه سلم علي ..ع الاقل اتصل ...طالعت موبايلي ع الكمدينو ..

بدور تهزني: حو ارمسج..
قلتها: مدري بدور انا حتى سيفاني من فتره ما جفته..

انفج باب حجرتي ..نقزت بدور يوم جافت سيفاني داش الي نزل راسه
و قال: السلام عليكم ..

قلته: عليكم السلام ..
طالعت بدور ..الي ابتسمت لي حتى انها ما ردت سلام سيفاني حشى قلنا طنشي بس مب لها الدرجه ..
بدور: يلا شوق اجر و عافيه ما اتجوفين شر.ان شاء الله بغيرج ولا فيج..
ابتسمت يوم جفت شبه ابتسامه انرسمت ع شفايف سيفاني ...طلعت بدور برع حجرتي حتى من غير ما تسمع رد مني ...احسدج ع قوة قلبج ...

سيفاني: شخبارها هاي الخبله ..
استهبلت عليه: منوه ..

اشر: بنت خالتج الي توها ظهرت
ضحكت: هههههههههههههه ابخير ..

سيفاني قعد عالكرسي: اتصدقين يا شوق احس هم و انزااح عني من اسبوعين يوم هاي الياهل ما قمت اجوفها..

استغربت ان سيفاني يرمسني بها الاسلوب ولالالا بعد يحكي عن مشاعره ..يحليها بدور مدري شو بتسوي لو سمعت كلام سيفاني ..رن موبايلي ..
طالعت سيفاني فقال : ردي يمكن امايه..

رديت / الوو
فجيت عيني يوم سمعت بدور: شو قالج ..؟؟ يحبني اشتاق لي قولي ابسرعه..ما توله علي ؟؟

ضحكت: هههههههههههههه لحقنا ما وحى نسولف..؟؟
بدور: خبريني دخيلج شو قاعد يسوي الحينه فديته احبه..

طالعت سيفاني الي قاعد يطالعني ..بلعت ريجي ما عرفت شو ارد ع بدور صدق ما جذب ها السيف يوم قال خبله ..
.قلتها: زين اخوي عندي ..؟الحين..؟؟عقب برمسج..
بدور:اووووووووف زين خلاص حبيه لي ..

شوق: هههههههههه مع السلامه..
سيفاني يطالع متشكك : منوه عندج..؟؟
قلته: اربيعتي تطمن علي ..

خذ نفس طويل: زين بظهرين ..
يلست ع طول: بتاخذني البيت يلالا انروح..

سيف/: ههههههههه لبسي عبايتج لي ما اوقع خروجج من المستشفى ..

طلع من حجرتي و بدلت ثيابي و لبست عبايتي و شيلتي ..بس بداخلي حزن كبير ابسبب تجاهل راشد لي ..ما توقعت قلبه حصى ..او حتى انه ما بسوي حساب حق علاقتنا الي كانت اكثر عن سنة ...

وصلت البيت عقب الغدا ..الي كان فـ الصاله ..سلمت عليهم..حسيت ان حياتي ردت لـ طبيعتها ..لصق فيني حمودي قعدته فوقي ..

حصه: توه ما نور البيت..
ابتسمت لها: بوجودج يا الغاليه ..

شيخاني: يلا باجر انا بعد بتدلع و بطيح غشيانه يمكن احسن حد يدلعنا ..
امايه: فديتج عاد انتي عنقود البيت ..

سعيد: شوق تغديتي ..
هزيت راسي بمعنى هيه ..سالتهم: وين ابوي ..؟؟
امايه: ابوج بحجرته راقد تدرين به لازم بها الحزه يرقد..
جفت سيفاني قاعد جريب منا بس شكله فـ عالم ثاني ...الظاهر يفكر ابدور يوم لبسته ..عل و عسى يفيد به ..

فاجأنا يوم سال شيخاني: متى بتخلص امتحاناتكم..

شيخاني: بالاول خلينا انخلص ..؟؟

سيفاني طفران: متىىىىىىىىىىى
شيخاني اتروعت : بنبدأ بعد اسبوع و اسبوعين بنخلص ..
امايه: شدي حيلج بدور بنت خالتج ما شاء الله عليها ما قمنا انجوفها ..

حصه: الله يوفجهم ..

استغربت ليش سيفاني يسال عن امتحانات بدور ...؟؟ يمكن يفكر يخطبها عقب ما ااتخلص ..؟؟ بس مره قال لي يبا يخطب ندى !! و هو يعرف ان ندى امحيره لــ .......... فديتك و الله يا راشد تولهت عليك يا عذابـي ..
سعيد : شوق..؟؟

رفعت راسي اطالعه سالني : بلاج متضايجه !!
ابتسمت: مب متضايجه بس كنت افكر شويه ..

سيفاني : انا اليوم بخبر الريال انج غيرتي رايج شو قلتي ..؟؟
سعيد: صبر ..خلها اتفكر شويه ..

تميت ساكته مالي قرار ..بس صدقه سعيد ..بعطني نفسي فرصه افكر بس مب قرار خطبتي بـ خال ندى ..لا بفكر باقتراح راشد ...و اتجوف هل اقدر انفذه اول لاء ..

 

[معاني]

رد: خل العذول موطـي الراس منكوس..* معاني..*

حصه: الظاهر شوق مب عايبنها رايك سعيد..

قلت ابسرعه: لا انا موافقه ..عقب اسبوع بردلكم الخبر الاكيد ...
كنت اشك اني بوافق ع اقتراح راشد لان تربيتي و اهلي ما علموني هالشيء ابد حتى و لو كان راشد ولد خالتي ,...طالعت سعيد و سيفاني حرام ..أًٌٌسٌٌود ويوهم جدام الناس و العربااان ... و ندى و حصه مستحيل افقد ثقتهم فيني ..حتى ماماتيه و باباتيه ...

خذت نفس طويل ..بس بجوف خلال هالاسبوع احتمال راشد يغير رايه ..بس اتمنى انه ما يطنش السالفه و يلبسني و يقتنع إنا نحن مب لـ بعض ..

وقفت رايحه حجرتي ..صعدت الدري سمعت امايه اتقول : مدري شو صابها بنتي ..
ابتسمت يوم سمعت رد شيخاني: يمكن حسدوها ع ذياب كل وحده تتمنااه مال و مركز و سفر و جاه و كل شي بعد شو تبا هاي الغبيه..

سيفاني : نحن وافقنا لانه ريال و النعم في و الاشياء الماديه عقب ...
ما سمعت الكلام الي يدور عقب لاني خلاص وصلت حجرتي .. وطيت راسي ع المخده ..شلت موبايلي اجوف يمكن وصلتني مكالمه او رساله من راشد بس للاسف ما في شي .

.مع انه يعرف اني كنت فـ المستشفى و هو الشخص الوحيد يعرف ليش انا تعبت ووصلت المستشفى ...تنهدت هذا هو طبع راشد جاسي شرات الصخر ..حتى يوم كنا نتزاعل اذا انا ما رضيته خلاص بتم حاقرني ..غفلت شويه ..فتحت عيني ع رنة الموبايل..كانت المتصله ندى

رديت عليها ابكسل : السلام عليكم
ندى : عليكم السلام ..اجر و عافيه حياتي

قلتها: الله يعافيج ...

ندى: شو اخبارج الحينه احسن شويه..
قلتها: الحمدلله ابخير ..
ندى: امممممممممم خالي يسلم عليج و كان يبا يتطمن عليج..
طنشت كلامها و قلتها: شخبارها مهره..

ندى: ابخير ..بس بعدها شيطانه ...ابا ازورج اذا مب اليوم باجر بكون عندج ولا بظهرين..
قلتها: لا حياج الله و جان طلعت بخبرج ...

ندى: خلاص ما يخالف ...اكلي زين ما زين وراج عرس يا عروستنا..

قلتها بضيج: ندى مالي بارض ع هالسوالف ..
ندى: هههههههههههههه الا متلومه ..جان زين عرسي و عرسج بيوم واحد..

يلست انافخ شو يعني تبا تزوج راشد ..راشد مالي انا و بس ..

قلتها : الله كريم ..

ندى: خلاص حبيبتي بخليج في امان الله..
قلتها: مع السلامه ..و تحملي بعمرج..

فريت الموبايل عني بعيد ندى بعدها حاطه في بالها انها بتزوج راشد..غمضت اعيوني بس انا ما اقدر اسوي الي يطلبه مني راشد ما اقدر ..حسيت بصدااااااااع شديد..نشيت رحت الحمام تغسلت و صليت العصر ...عقب ما خلصت صلاة ..جفت حصه داشه علي الحجره ..
حصه: شوق بظهرين معاي ..

قلتها: مالي نفس ..
ردت علي : بنروح المنار شويه غيري جـو ..

يلست امشط شعري: ما اقدر حصه سمحيلي جوفي يوم ثاني ولا خذي وياج شيخاني ..
حصه: لا كنت ابا اخذج علشان انغير جـو انا بعد احس بعمري مخنوقه..

طالعتها :شو فيج..
ابتسمت : لا اتخافين مافيني شي بس مضايجه من ها الحمله احسها ثجيله ابا اطلع من البيت شويه ..

قلتها: خلاص علشان خاطرج بسير معاج ..
حصه مبتسمه: مشكوره ..بس بنروح نشرب تركش كوفي و بناكل كيك ...لا اتخافين ع حسابي ..

ضحكت عليها: هههههههههههههه ما قلت شي زين ..
حصه :بروح ابدل ملابسي ...انتي بعد اجهزي ..

عقب نص ساعه كنا في سياره سعيد كان ودي حمودي ايي معانا بس حصه طرشته بيت امها ...ما تبا يخبل فيها في المركز بعد اتعرفون حمودي و سوالفه ما يحتاي اخبركم ...نزلنا سعيد و روح دخلنا المنار ..يلسنا صوب العايله قبلها طلبنا لنا كوفي و كيك ..

شوق: الناس لو يعرفون جان قالوا هاي توها ظاهره من المستشفى ..

حصه: هههههههههههههه الله اكبر عليهم ..
شوق : جربت امتحانات الثانويه العامه ..

حصه تاكل كيكه: هممممم ..لذيذه ..
طالعتها : حصه متى بتربين ..؟؟

حصه مطنشتني: بعدني توه الناس ..بس قولي الله يسهل علي الولاده..

قلتها ابسرعه: آآآآآمين يا رب العالمين و اتييبن بنوته زين العسل
حصه: اباها تشبهج.
شوق: و جان استحي ..

حصه: ههههههههههههه بس لانج تشبهين سعيد..

قلتها: وانا اقول بعد ...

عقب ما خلصنا سرنا برع صوب البحر نتمشى كان الجـو بديع ووايد حـلو ..زخت حصه ايدي ..و تجربت مني ..

حصه: شوق ..
طالعتها من غير ما ارد عليها ...
حصه: انتي من شوه متضايجه من الخطوبه ولا من الي خاطبنج..؟؟

سكت ما عرفت شو اقولها ..
حصه: ترا الكل ملاحظ عليج انج متغيره مب شوق الي البيت بوجوده له طعم غير ..
قلتها: انتي اتبالغين ..

حصه: و الله العظيم اتكلم جد ...مستويه عصبيه مدري شو صار بج ..
قلتها : اتفقنا افكـر و عقب اسبوع بردلكم خبر يعني محد بجبرني ع شيء لا سعيد ولا سيف صح..؟؟

حصه: صح..بس خفي ع روحج شويه دخيلج لا اتسوين ابروحج جذا ..
قلتها بصوت مبحوح: احاول ..ما يهمج ..

حصه اترص ع ايدي : شو رايج بالطلعه..

قلتها بصدق: و الله فنان ...بس اتصدقين لو مع حمودي بتكون لها طعم خاص..

حصه: اكيد ملح الطلعه حمودي
شوق: هههههههههههههههههههههههه

حصه: يلا بجوف سعيد جان بيينا ...ع فكره موزي امسويه حفله باجر ..

طالعتها : ليش ..؟؟

حصه: لانها خذت اللسين..
قلتها: اخيييييييييييييييرا ما بغت ها السقوطه ..

حصه: هههههههههههههه هي و الله ..المهم بتيين اباج تطلعين من ها الجو ..

فكرت لو باجر رحت يمكن اجوف راشد ...مدري اتشاور في خاطري اروح اولا ..ونحن داشين المنار دعمت بنيه رفعت راسي ..

حصه: ندىىىىىىى !!

ندى: شوق !! ههههههههه توني مرمستنج اتقولين ما بظهرين ..
ابتسمت لها: حرمة اخوي اصرت الا اطلعني معاها ..

حصه: منوه يابنج ..؟؟

ندى: فديت روحه منو غير خالي
حسيت بربكه طالعت حصه الي جفت بعيونها نظرات ما فهمت لها ..

ندى: يلا كنت بسوي لج مفاجأه ..
شوق: انا !!

ندى : هي بس ما بقول شي بصخ ...يلا بروح ..
حصه: انتي ليش ابروحج ..

ندى "اشرت مكان واقف خالها" لا اتريا خالي يطلب لي عصير ..
مدري ردت فعل طبيعيه خلتني اطالع مكان ما كانت اتأشر طاحت عيني بعينه .". يا عيون الكون غضي بالنظر
إتركينا إثنين عين تحكي لعين..إتركينا الشوق ما خلى حذر..بلا خوف بنلتقي و بلا حيرة بنلتقي
بألتقي في عيونها و عيونها أحلى وطن و كل الأمان...و يا فرحتي الحظ الليلة كريم"

حسيت بقشعريره رجعت لورا ورا حصه و كأني ابا احمي نفسي من المشاعر الي دوم اتهيج فيني من اجوف هالانسان ..

ما اتخيله في يوم برتبط فيه مستحيييييييييييييييييل ..

ندى: انوصلكم ..
قلتها ابسرعه : لا طبعا سعيد بيينا ..

حصه: سعيد بيينا عقب ساعه بتترين ..

قلتها : ان شاء الله الدهر كله ..
ندى: خيبه ؟.؟ ليش كل ها شوق ..يالله اشكثر خالي يسوي لج رعب ..
قلتها و كان كلامها مب عايبني بس كانت الحقيقه: لا بس فضيحه ..

حصه: شوق خلينا انروح معاهم دام حصلنا حد يوصلنا..
شوق : انروح بتاكسي

ندى: و الله ازعل عليج..
سكت شويه قلتها: خلاص عاد كل شي ولا زعل ندووي ..

حصه: يا ويل حالي ..
ندى: ههههههههههههه يلا ..بسير ارمس خالي شكله متضايج لابستنه من متى يترياني ..
سارت ندى صوب خالها راقبتها ..يلست اتامله اول مره اجوف ملامحه واضح لي .

.". مانته حلو انته فظيع ... طيرت عقلي من حلاك يا حي هالوجه المليح ... ويا حي هالطبع الصريح انظر بعينك واستريح ... لو شفت في عيونك هلاك مادري أسميك الدلع ... والا أسميك الولع

والا القمر لي من طلع ... أحسن أسميك الملاك "

كانت ندى اترمسه رفع راسه صوبنا ... وتجدمنا ..يتنا ندى :يلا خالي بييب السياره ...

بلعت ريجي : حصه مره ثانيه ما بظهر معاج ..شكلكن متفقات ..علي
حصه و ندى: هههههههههههههه

حصه: و الله العظيم تفاجـأت بوجود ندى ..
ندى: حتى انا ما ادري انج هني ..خالي يقول هذي مب توها ظاهره من المستشفى ..

طالعت حصه: ما قلتج ...؟؟
حصه: هههههههههه ندى قوليله صل ع النبي يابتنها حرمة اخوها اتغير جـو ..

ندى: زين يلا انروح ..
و نحن نمشى سالتها: حق شوه يايه انتي ..
ندى: خالي كـان وده يشتري شي ..يابني معاه اونه يعيبه ذوقي ..

حصه: يالله بالستر ..

طلعنا من المنار كانت عرفت سيارته هذي هي نفسها الي مره كفخني اباب سيارته ...زخيت ايد حصه و بدورها رصت ع ايدي و جنها اتعرف بشو قاعده احسن ...يلست ندى جدام و انا بالسيت الي ورا ه و حصه ورا ندى ..يلست اطالع برع ...كانت ريحة عطره اداعب خشمي ..وايد حلـوه ...تمنيت اوصل البيت ابسرعه و كأني اهرب من شي ...

سالتنا ندى: حصه بتروحين بيت عمج ولا بيت عمي ...

حصه: لا بسير بيت عمي ترا شوق معاي ..
بلعت ريجي يوم انطر اسمي رفعت راسي بالمنظره جفت عيونه بعيونه نزلت راسي ابسرعه . سلَّم اعيوني من اعيونك .... الثمن يا صاحبي غالي..ليش فكر يخطبني ..؟؟ شو يبا مني ...؟؟؟ ممكن ندى اقترحت له عني ..؟؟؟
ع هالافكار وصلنا البيت ..نزلت ابسرعه من السياره و ربعت داخل البيت ...لحقتني حصه ..
حصه: شووق شوق ..

وقفت اطالعها ..
سالتني: شو فيج..

بلعت ريجي: انا مستحيل ارتبط بها الانسان ..
عقدت حصه حياتها مستغربه: ليش سوا شي غلط !!؟؟

سكت ما عرفت شو ارد عليها ...هالانسان وايد يثير فيني مشاعر اتخوفني ...كملت طريجي داخل الصاله ...و عقبها رحت حجرتي ...حسبت حصه بتلحقني بس اجوفها ما دشت و هالشيء ريحنـي ...عقب ما تغسلت و صليت المغرب ,..فتحت الكمبيوتر اكمل القصه الي اقراهااا ...دمعت عيوني ..

راشد ما كان يحبني اقرا قصص يغار ...منوه الحينه بيغار عليه.. منوه بحسسني اني انسانه احب ..اتنهدت ,...نشيت من مكاني كارهه كل شيء يذكرنـي بـ راشد...الظاهر راشد ما بغير رايه ابد .. و انا غبيه عطيت نفسي و عطيته فرصه مدة اسبوع انقرر بس الظاهر مب مهتم ..

انسدحت ع الشبريه باجر ما بسير بيت خالوه ..يمكن تزعل موزي ..بس ما احب شي يذكرني براشـد ..غمضت اعيوني انجلبت الصوب الثاني اكيد ندى بتكون موجوده ..غطيت اعيوني و يلست اصيح بصمت ..متالمه ..
صدق من قال علاقات التلفون ابد ما تستمر ..لا هي استمرت معاي ولا مع بدور و سيفاني ...غفلت ..وعيت يوم حسيت بثجل فوق شبريتي ..جفت باباتيه ..مدري حسيت اني صار لي زمان ما جفته ..يلست و لويت عليه..

قلته: وحشتـني موت ..احس من زمان ما جفتك ..
حضن ويهي بيده و ابتسم لي تأملته حسيت بـ عيونه كلام وايد... اول مره اجوف هالنظرات بعيون باباتيه ..
سالته: باباتيه انا ابخير و الله "وابتسمت له ابين له اني مرتاحه .."

رد لي الابتسامه رفعت راسي صوب باب حجرتي يوم انفج دشت امايه سالتني: شحالج الحينه..

قلتها مبتسمه: ابخير .."وبست راس باباتيه" و يوم جفت باباتيه صار حالي احسن بوايد ..
حسيت ان باباتيه فهم لي فيلس يربت ع جتفي مستانس مني ..

امايه: زين يمه روحي اتلبسي .
سالتها ابسرعه: ليش ..؟؟

امايه: اخت خطيبج بتينا تبا تطمن عليج..
شهقت : منوووووووه خاله العوده..

امايه: ههههههههههههههه لا مب خالتج خالة ندى ..
طنشت ضحكت امايه و قلتها: انا مب مستعده قوليها باجر اتيي مع ندى ...
امايه: عيب شو اقول باجر تعالي مع ندى..استحي و خيلي الحرمه يايه اتزورنا ..

مديت براطمي متضايجه: ما ابا ما بظهر لها ..

امايه: يعني فيها الخير يايه تطمن عليج..
قلتها: ندى ما قالت لي ..
امايه: و شدراها ندى ..يلا يمه اذا مب عشان خاطري علشان خاطر ابوج..
طاحت اعيوني بعيون باباتيه ...لويت عليه و رجعت اصيح: يا ليتني طلعت شرات لا اسمع ولا ارمس كنت مرتاحه من الدنيا و همها ..

عصبت عليه امايه: شوق شهالرمسه اخر مره اسمع منج هالكلام و الله جان مره ثانيه تنطقين بها الجلام يا ويلج مني ..

يلس ابوي يمسح راسي ..ظهرت امايه من حجرتي و صكرت الباب ابعصبيه .. رفعت راسي اطالع باباتيه و اقوله : انا وايد متعذبه محد حاس فيني ..

يلس يمسح دموع عيوني ...دشت علينا حصه: شوق بلاج اتصيحـيين ...

وقفت ووقف ابوي معاي ..قلتها: ماشي ..
رحت الحمام اغسل ويهي ..يوم ظهرت جفت باباتيه ظهر من حجرتي و حصه قاعده ع الشبريه ...
سالتني : علشان ام فتون بتيي اتصيحين..

فريت الفوده بعصبيه : من كل شي ...محد حاس فيني "كنت بقولها اولهم اخوج بس سكت "
حصه: هدي شوقاني ما فيها شيء ..يعني انتي ظاهره من المستشفة و يايه تطمن عليج شو فيهااا ..

يلست امشط شعري و قلتها بغيض: ابدن ما فيها شي ..

حصه اتنهدت: الله يعينج ...ندى ما تدري لانها ما قالت ..
قلتها : امبينه السالفه ..

حصه و هي ظاهره: زين لبسي و نزلي سلمي ع الاقل بس سلمي عقب ردي حجرتج ...
ما علقت ع كلامها ..بس يبوني اسمع كلامهم ...الكل قاعد يحدد مصيري شو اسوي و اشو اقول ...فجيت باب الكبت بعصبيه و انا انافخ ...سمعت دقه ع بابا حجرتي

قلت بعصبيه: لحظه ..

لبست بدله و سرت صوب الباب افجه شهقت يوم جفت باقه عوده تميت واقفه اتريا ابا اعرف منو شايل هالباقه ...

ندى: ادخل ..
ابتسمت: ندووووووووي شو هااا

وسعت ودشت ندى حطت الباقه ع الطاوله الجريب و كانت تنافخ: هلكت ..قاص علي خالي و الله ..
من سمعتها اتقول خالي اختفت ابتسامتي ..رحت صوبهاا و قرصتها من ذرااعها
و قلتها اوني اتغشمر بس كنت اقصد كلامي: جذابه قلتي باجر بتيين و الحينه يابه معاج خالتج العوده..

ندى : آآآآآآآآآآي قرصتج اتعور فجي عني ..

ابتعدت عنها و رحت لصقت بالتسريحه اطالعها جفتها تفرك ذراعها مكان قرصتي و اطالعني بغيض
قالت: مستويه شريره و عنيفه.."يلست ع شبريتي "

قلتها: و انتي جذابه ..

ندى: و الله كنت محطيه فـ بالي ازورج باجر ...بس عرفت ان خالوه العوده تبا اتييج فقررت اني ايي معاها .. و باجر بنروح بيت عمي علشان موزه تبا تاكلنا كيكة نجاحها في التراااي ..

خذت نفس طاحت عيني ع الباقه: مشكوره شكلها حـلو ..

ابتسمت ندى: ذوق خالي و اصلا هي من خالي ..."واشرت " شي بطاقه طبعا بخط ايده..
قلتها :ما احب الرسميات..
ندى: ههههههههههههه الا قولي متلومه ..

جافتني ساكه ما ارد عليها طالعتني : بلاج ..؟؟ متغيره وايد انتي مليتي من قعدت البيت..
رحت و يلست جريبه منها : مدري ندوي كارهه حياتي و الله ..
ندى: عيشي حياتج ترا اليوم الي يمر عليج ..خلاص ما بيرجع و لا اتضيعين عمرج ع الفاضي ..و بعدين باجر بتعرسين و بتتغير حياتج..

 

[معاني]

رد: خل العذول موطـي الراس منكوس..* معاني..*

كنت برد عليها بس سمعت دقه ع الباب ...شويه و دشت سيتي ..عقدت حياتي يوم جفتها شايله جيس و بكس ..متوسط حجمه ..
ندى اشرت ع الجيس: ترا هاي صوغتي مني لج ..و ها البكس من اممممممممممم
طالعتها بنظرات و كأني فهمت من منوه فقالت اتوطي صوتها: خالي ذياب ..

قلتها من دون نفس: شكرا ..
ندى : يلا تعالي انسلم ع خالوه ..

قلتها: ما بنطول اليلسه معاها زين..

ندى: فالج طيب من عيوني ادريبج تستحين ..

نزلنا تحت ..وقفت يوم جافتني ..مديت ايدي لها بس هي يرتني و لوت علي ..مدرى الي يجوفها يقول هذي ام ذياب مب اخته فارق السن من بينهم وايد وايد كبير ...يلستني جريب منها ..و جني حرمة ولدها مب اخوها ..

سمعتها اتقول: هلا هلا بعروستنا الغاويه..

رفعت راسي اطالع امايه الي ابتسمت و شكلها مرتاحه لاني عيبت خالة ندى ..
سالتني: شحالج؟؟
قلتها بصوت واطي: ابخير الحمدلله شحالج انتي ..

خالة ندى: ابخير الله يسلمج..ليش يمه جذا انتي ضعيفونه اكلي .. لا تستوين شرات هالبناات ريجيم و ريجيم و اخرتها يطيحون بالمستشفى..

امايه: تراها من جذا البارحه بايته بالمستشفى..

يلست اطالع ندى بنظرات كانت تضحك علي ..لانها تدري اني متلومه من خالتها ..لازم لاني ما كنت اتوقع زيارتها ...

شويه و دشت علينا حصه ..و حطوا العشى..ما توقعت انهم بتعشون ..ع بالي بس بيون يسلمون و يرحون ...حسيت ان خالة ندى كانت وايد اتبالغ في تدلعي.. حتى تعليقاتها ما عيبتني ...حسستني اني مخطوبه لاخوها ...

عقب العشى ..يلسنا نشرب الشاي ...بس هالمره قدرت ابتعد عنها و اقعد حذال ندى ..ز
ندى تساسرني: الظاهر دشيتي خاطر خالوه العوده وايد ادلعج..
رديت لها بنفس نبرة الصوت: لاحظتي .. وايد احرجتني ..

ندى: افرحي و استانسي ..ترا صعب تراضين خالتي العزيزه ..زين انها راضيه عنج..
قلتها: لا و الله ..

ندى: ههههههههههه
قلتها: عيل فتون طالعها عليها..

ضربتني بجتوفي: اششششششششششششش
يتني الضحكه بس اختفت يوم قالت ندى: خالي يتصل بي اكيد برع .."طالعتني اتغيض فيني" اقوله شوق اتسلم عليك..
قلتها ابسرعه: يا ويلج و الله يا ويلج...

ندى: هههههههههههههههههه خالوه يلا خالي ذياب برع ..
ربعت صوب الدري بعد ما سلمت عليهم..لاني ياني احساس اني اطلع معاهم علشان اجوفه او ع الاقل اجوف عيونه الي دوم اتناظرني في جامه سيارته ..

.خفت وايد من هاي الافكار علشان جذا طرت ابسرعه فوق حجرتي ...يلست اطالع البكس و الباقه ..شويه كلهم دشوا حجرتي يبون يجوف الاغراض الي يايبتنها ندى لي و خالها بس انا رفضت ع بالهم اني متلومه بس انا حلفت اني ما افتح هدية ذياب لان ما بينا أي صله ...

فتحت جيس ندى..جفت قطعه و بدله و شنطه ...و خاتم ذهب ...طلبت من حصه تاخذ الباقه معاها بحجرتها ..في البدايه رفضت بس عقب قلتها ترا بفرها بالزباله ..فاضطرت تاخذها ...قفلت علي باب حجرتي خايفه لا ايي سيفاني او سعيد يقنعوني بـ ذياب و خاصة عقب ما يت خاله ندى العوده ...اكيد امايه قعدت اتخبرهم كيف استانست مني ...

بها الليله ابد ما جفت الرقاد بعيوني افكار وايد كانت تشغلني .. و تلعب بخيالي منها راشد و منها ذياب و منها زياره خالة ندى و اشياء كثيره ..مرتبطه بـ مستقبلي و حياتي .....اخرتها صليت الفير و رقدت ...

ييت حصه اتقومني العصر ..حصه: نششششششششي يلا انروح بيت بيت امايه موزي تترياني ..
يلست اتجلب ع الفراش: ما ابا اروح تعبانه ..

دشت شيخاني: يلا ابا ارجع سرعه اذاكر
رفعت راسي قلتها: منوه سمح لج ادشين حجرتي ..

شيخاني: من زينها يلا نشي جان بتروحين..
قلتهم بعصبيه: ما بسير مب راقده البارحه تعبااااااااااااااااااااانه ..
ششيخاني: لا اتخليني اخذ ها البكس ..

كانت تقصد البكس الي يابه لي ذياب قلتها ابرود: خذيه ..
حصه: مب وقته يلا بتروحين ولا لاء ..

قلتهم بعناد : لالالالالالالالالالالالالالالالالاع ..

عقبها ظهروا من حجرتي ما ابا شي يذكرني براشد..ابد ما ابا شي ...و اذا رحت هناك اكيد بتعذب ..عقب ما صليت المغرب رن موبايلي و كانت المتصله ندى رديت عليها: هلا ..

عاتبتني: ليش ما ييتي ..
قلتها: مالي خاطر و الله ..

ندى: افاا تمنيت اتكونين معاي
قلتها : شو الحفله..

ندى: حلوه و خفيفه بس الكيكه لذيذه ..

قلتها: يمكن حصه اتفكر فيني و اتيب لي قطعه ..
ندى: ههههههههههه كانت بتيب بس شيخاني ما طاعت قالت محد قالها ما اتيي ..اسكتي شوق ما قلتلج شو صار ..

عقدت حياتي: شوه ..؟؟
ندى: راشد جافني شوقاني بتخبل ..

حسيت ان الدم اتيمع بعروقي : راشد جافج..
ندى: هي اول مره اجوفه جذا عن قرب
قلتها ابسرعه: كيف كيف ..؟؟ انتي وين الحينه !
ردت ندى و كانت طايره من الوناسه : في بيتنا هوه وصلنـي بعد...بس خالي احتشر عليه ...ابد ما شال عينه من الجامه ..

كانت دموعي تنزل من عيوني دموع قهر و غيض و غيره على راشد ..

ندى: تدرين ! اول شي جافني في بيت عمي كنت اسلم ع عمي و هو دش و زقره عمي و خلاه يسلم فيني انا ما وحاني اتغشى ..فجافني ..عقبها اصر انه يوصلني ..اتعرفين حركات الشباب انتي ..

صكرت التلفون بويه ندى ..ندمت اني ما سرت بيت خالوه حليمه علشان امنع ندى انها اتجوف راشد حتى و لو بالصدفه راشد مالي انا ..هوه يحبني و انا احبه ..ندى اتبالغ بوصفها ...حسيت اني مخنوقه يوم تذكرت قالت لي ما شال عينه من الجامه ..و كأنها تتكلم عني و عن ذياب ..ذياب !!

لالالالا ..ابسرعه فتحت لسته الموبايل ادور ع "روحي تحبك" بس ابد ماشي رد يلست اصيح..مستحيل تتخلى عني بها السهوله ..اتصلت كذا مره ..ما رد علي ..اخرتها طرشت له مسج" رد علي ضروري حتى لو كانت هذي أخر مره اترمسني"

مجرد ما تم التسليم رن موبايلي ..ما خليته يكمل رنه ع طويل رديت ...سكت .....................
راشد..................................."ماشي رد"

تمينا ساكتين الين ما سمعت حسه : خير ..
قلته و انا اصيح: معقوله ما ولهت علي ..؟؟
راشد........................"ماشي رد"

قلته: انت قلبك صخر ..
راشد: انتي متصله علشان اتعاتبيني ..؟؟

شوق ..........................."اصيح بصمت"
راشد بحنيه: لا اتصيحين ..
قلته: انا احبك ..

راشد: ادري ..
قلته: تدري اني اشكثر تعبانه ابسببك..
راشد: ادري حتى انا تعبان ابسببج بس انتي الي ما بغيتيني ..

غمضت اعيوني قلته : خلاص راشد انا موافقه ..
كأنه مب مصدق: موافقه ع شوه ..؟؟

قلته بصوت يرتجف: بوافق ع ذياب و مجرد ما استلم مهري بسافر معاك علشان نتزوج ..




يتبـــــــــــــــــع >>>>>>>>>

 

[معاني]

رد: خل العذول موطـي الراس منكوس..* معاني..*

:: الجـــــــــــــزء الرابــــــــــــــع عشـــــر ::





أريـــــدك لي واعلنها على كل الملا كلمه ...أريدك لو ذبحني ظرفي القاسي وحطمني ...أريدك أكثر وأكثر من الضيقه إلى البـــسمه ...من المعنى إلى الاحساس من الصوره إلى فني ..اريدك والذي أوفى قياس الـنــــور والظلمه ..اريدك لو ذبحني الشوق من بعدك وحطمني ..



راشد و كأنه مب مصدق شو قلته : شو قلتي .؟؟

كررت كلامي بسرعه ..: بوافق ع ذياب و مجرد ما استلم مهري بسافر معاك علشان نتزوج

وصكرت التلفون بويهه و يلست اصيييح ما كان ودي يكون ارتباطي ابـ راشد يكون بها الطريقه ...

بس انا احبه ..رفعت راسي يوم وصلتني رنة المسج فتحت المسج و كان من راشد ..روحي تحبك" فديتج و الله اني احبج و كنت متاكد انج ما بتخذليني" ..

حسيت بالراحه لان راشد و انا رجعنا لـ بعض ..قبل ما تاخذه ندى مني ..ليش تظلم نفسها ...راشد ما يحبها ولا يفكر فيها اصلا. و لو تزوجها بيعشون بجحيم ..بدلت ملابسي و نزلت تحت الصاله ..جفت باباتيه قاعد يطالع التلفزيون .. و امايه يالسه تتعشى ...

يلست ع الصفره: باباتيه ليش ما ايي يتعشى..
امايه: ابوج تعشى

يلست اكل لقمه ..حسيت اني من زمان ما كلت ...

امايه: صحه ع قلبج فديتج ...شكلج ميته يوعااااااان
ابتسمت لها: واااااااااااااايد ..احس توه ردت الروح لي ...
امايه: يمكن يوم زارتج حميتج البارحه..

عقدت حياتي: اووونج..

امايه: هههههههههههههه
سالتها: وين شيخاني و حصه ..ما اجوفهن ..؟؟

امايه: بعدهن في بيت خالتج حليمه ..

قلتها: طولن ..."خطرت في بالي فكره"ماماتيه خلينا انروح لهن ..

امايه : وين اتروحين يمه ..ابوج بتم ابروحه ...
طالعت باباتيه جفت مندمج يطالع التلفزيون و مندمج...مع انه ما يسمع .ولا يعرف شو يدور حوليه ..بس من خلال الشاشه الظاهر انه فاهم ...

عقب ما شبعت نشيت من ع الصفره .. و يلست عدال ابوي ...زقرت امايه سيتي الي يت شلت الصفره ..
امايه اتزخ ايد ابويه : يلا موعد دواه عقب بيرقد..

قلتها: حرام عليج خليه يجوف التلفزيون شكله مندمج..
امايه: ابرايه بشغله هناك ..في حجرتنا

وقف باباتيه و راح مع امايه فوق الطابق الاول حجرتهم ..يلست اجلب بقنوات التلفزيون ...متملله و انا خاطري اروح بيت خالوه حليمه يمكن اجوف راشد هناك ...نقزت ابمكاني يوم انفج باب الصاله بقوه ..حطيت ايدي ..ع حلجي اكتم شهق كانت بتظهر مني من الصدمه ...يوم طاحت اعيوني ع سيفاني و ثوبه كلها متخيسه
كيك ...

طالعني بنظرات و قال بعصبيه : يوم واحد بجتلها بنت خالتج الله يغربلها ...ان شاء الله

ما رديت عليه لاني كنت متروعه منه ..بس فهمت انه يقصد بدور ..الله يهداها قلتها طنشيه ..الحينه وين جافته ..فسخ سيفاني كندورته و فرها بالارض و ربع فوق الدري ...

شويه و دشن حصه و شيخاني..طالعتهن ابا اعرف شو مستوي ...؟؟كانت كل وحده كاتم ضحكتها .. و اول ما اختفى سيفاني من ع الدري يلسن يضحكن شرات الخبال ...حمودي كان يضحك بس مب فاهم شي ..بس قاعد يقلد امه و شيخاني ..

سالتهم باستغراب : شو السالفه ..

حصه شلت حمودي و كانت تضحك :بروح ارقد ولدي قبل ما ايي سيفاني و يطلع حرته فيني .

طالعتها ربعت فوق الدري ..و معاها حمودي ..يلست شيخاني ع الكنبه: ههههههههههههههههههههههههههههههههههههه

يلست جريب منها : شو مستوي ..بدور سوت شي بسيفاني ..

شيخاني اتزخ بطنها: وااااااههههههههههه لا اتذكريني

قلتها : صخي سيفاني ترا بيظهر الحينه..

طالعت شيخاني الساعه .. ووقفت بروح انخمد علشان.. من باجر انش من وقت ارااجع دروسي ...وربعت فوقها...فكرت اتريا سيفاني لي ما ينزل علشان اخبره اني خلاص وافقت ع ذياب .. و طبعا سالفه شرط انهم يحطون مهري بحساب خاص لي ف البنك بخبر سعيد بهااا ...

بس غيرت رايي باخر لحظه ...اخاف سيفاني مب متفيج اجوفه محرج...فكرت اروح اتصل ابدوور علشان اتخبرني شو السالفه و اضاربها حبتين لانها خلفت اتفاقنا ...ربعت حجرتي و قفلت علي الباب ...خذت نفس طويل يوم طاحت اعيوني ع البكس الي يابه ذياب ...حسيت انه غمضني ..لاني بخدعه .. و باخذ بيزاته و هاي الشيء مب من حقي ....بس محد قاله يخطبني ... انا ما اريده .. و خل يتحمل هو الثمن ...

شلت البكس و حطيته تحت الشبريه علشان ما اجوفه موليه او انسى وجوده ولا يذكرني بـ ذياب المهم ما تطيح اعيوني عليه ...

ورحت اتصل بـ بدور ...
ردت علي بصوت مرح: هــــــــــــلا و اللــــــــــــــه ..

قلتها: عسى دوم شكلج مرتاحه ..

بدور : الحمدلله ...موزي اتقولج ما بتركبج سيارتها لانج ما حضرتي حفلتها ..

شوق: قوليها و الله اسفه بس صج كنت تعبانه ...

بدور: زين بخبرها ..جفتي اخوج .
سالتها: هيييييي كان وايد محرج و قال لي هاي بنت خالتج بجتلها يوم واحد و دعى عليج ..

بدور: ههههههههههههههههههههه فديته ..
ذكرتها: بدور نحن شو اتفجنا ..

بدور : قهرني ما تحملته ..

قلتها: كيف كيف جدام شيخاني و حصه..

بدور: لا ما عليج اوني من دون قصد..
قلتها: كييييييف ..؟

بدور : ولا شي ...عرفت ان سعيد امطرش سيفاني ايي ياخذ حصه و شيخاني...فأوني قصيت كيكه علشان اعطيها حق سعيد ...

قلتها: زين ..؟؟

كملت بدور: ولا شي ..ركبت حصه و شيخاني السياره و انا متاخره اوني احط الكيك في الصحن اتفاجات ان سيفاني نازل يبا يسلم ع امايه..

قلتها: يعني كلمج..

بدور: اتجاوفنا بالحوي ما تحملت شوق اطنشه ..
قلتها: هوه شو سوا ..؟؟

بدور: نزل راسه طنشني انقهرت ..اترييت بالحوي ..لي ما ظهر من الصاله .بعد ما سلم فـ امايه..لحقته قلتله معقوله ما وحشتني...؟

طنشني ولا كأني ارمسه ..

وقفت ابوييهه و قلته: احلف انك ما افتقدتني..

سيفاني يرفع راسه : و ليش افتقدج اصلا شو بيني و بينج علشان افتقدج ...
رصيت ع شفايفي امنع نفسي من اكفخه و قلتله: انتي جاسي ...

كمل طريجه ناوي يطلع : شكرا ..

لحقته وفتح باب سيارته و قبل ما يركب سويت روحي مستعيله ...ازقر حصه علشان تاخذ الصحن مني .. و سويت روحي اتعثر فطيحت الكيك ع كندورته ..اتصدقين شوق اول مره سيفاني غمضني ..

شوق: هههههههههههههههههههههه شو قالج ..؟؟

حرج علي و طالعني بنظراته قلته ابكل برود: سوري ..وربعت داخل البيت و صكرت الباب بقوه اغايضه..

شوق: ههههههههههههههههههههههههه و الله انج قويه ..يا الطفسه ...
بدور بحسره : ما يحبني ما افتقدني ..
شوق: ابرايه ..المهم اهتمي بدروسج ..ترا سال عن امتحاناتكم متى بتخلص ..اكيد يفكر بشي..
بدور طايره من الوناسه: ان شاء الله ..الله يسمع منج ...يوم بخطبني برفضه..

عاتبت بدور: بـــــــــــــــــــــــــــــدوووووووور !!

بدور: ههههههههههههههههه اسولف ..يلا حبوبه بروح انخمد..
قلتها: ابرايج تصبحين ع خير ..

بدور: و انتي من هل الخير مع السلامه ...


انسدحت ع الشبريه اضحك جني خبله ...ع بدور و سيفـاني ... ابصراحه ...سيفاني بحياته ما بيلاقي وحده اتحبه شرات بــــــــــدور حسيت انهم مناسبين ...لـ بعض مثل ما انا مناسبة حق راشد ..فديته و الله ..و ع هالافكـاار انخمدت ....نشيت ع دقت باب حجرتي ابتسمت هذي امايه صار لها فتره ما ازعجتني .

سمعت حسها: شوووووووووق قومي..

ابتسمت لها: خلاص قمت امايه .

نشيت اتغسلت و عقبها صليت الفير ..ورديت ارقد..نشيت وقت الضحى ...ع رنة مويابلي ..
رديت بكسل: الووو

فجيت عيوني مب مصدقه اسمع صوت را\شد: حبيبي بعده راقد..
ضحكت بدلع: ههههههههه ازعجتني ...

راشد: لا اتلوميني وحشتيني ترا ...ودرتيني اسبوع ..
قلته: و انت ودرتني اسبوعين..

راشد: بحكم دوامي و انتي ع اي اساس ..
يلست و قلته مبتسمه: علشان اتعرف اني احب موت ..
همس :ادري و علشان جذا احس اني مشتاق لج ... وايد احبج ...

قلته بصوت ناعم: يا حلاتك يوم اتكون رايق ..

راشد يضحك ضحكه حسيت ان نبض عروقي تضارب ويا بعض : هههههههههههههه قلتيهم انج موافقه ..
قلته و جني افكر : اممممممممممم بعدني ..

راشد: شو تترين ..؟؟

قلتها: ترا كنت برمس سيفاني بس البارحه كان محرج ما فيني اليوم بجوف سعيد ..
راشد: لا تنسين مهرج خليه معاج ..

قلته ابسرعه: طبعا ها شرطي الاول ..

سالني : متى تبيني احجز سفرنا ..

قلتها و انا ميته من الخوف : مدري ..بس شيخاني مره قالت لي عقب امتحاناتها ..
راشد ........................................."ماشي رد و كأنه يفكر :
قلته بصوت واطي: انا خايفه راشد..
رد : مني ..؟

قلته : لا طبعا من الي بيصير ..

راشد: اذا اتحبيني صج خل شعور الشوق يسيطر عليج و ابعدي شعور الخوف زين حبي ...
قلته ابسرعه : من عيوني ..

راشد: سمعي حبي انا بروح الحينه و يوم بحجز لنا التذاكـر بخبرج وين خاطرج انروح..
قلتها و انا طايره من الوناسه: حياتي انت قرر المهم اكون معاك ..

راشد: خلاص فديتج بخليج الحينه ..بشتاق لج ...

شوق: و انا اكثر ..

راشد: في أمان الله .........

شوق : مع السلامه ..حبي

تنهدت تنهيده راااااااحه ..نشيت رحت اتغسل ..عقبها ...نزلت تحت جفت حمودي قاعد يلاعب باباتيه يضحك و يصرخ ابصوت عالي ...رحت صوبهم بست راس باباتيه عقب رحت المطبخ ..سويت لي حليب ..كنت افكر كيف افتح السالفه ..كنت عارفه الي اسويه غلط بحق الكل ..بس بعد هم غلطوا بحقي يوم ما خبروني ان راشد خطبني...و اختارواا ذياب دوااااااااهم..لانهم قرروا عني ..

ظهرت من المطبخ ..رديت الصاله ..جفت حصه يالسه فـ الصاله مع بابااتيه ..

حصه: صح النوم ..

ابتسمت لها: وينه سعيد ..؟؟

ردت الابتسامه: الظاهر عندج اخبار حلوه ..
يلست ابسرعه لاني حسيت ابرجفه و قلتها ابرود: هيه ..

قالت لي: سعيد رمسته من شويه كان مع سيفاني و ذياب مدري شو عندهم..
بلعت ريجي: ليش شو استوا ..

حصه: لا اتخافين ما صار شيء بس ...دوم ويا بعض شو فيج..؟؟ تروعتي..

همست : لا ماشيء ..شيخاني مالها حس..
حمودي: تيخاني تقرا كتاب في بيت اعمي عادل

حصه: قصده الملاحق ..

هزيت راسي اني عارفه شو كان يقصد ...و قلتها: يومين ع امتحاناتهم ...

حصه: الله يوفجهن .نش حمودي تعال بسبحك بابا بيي الحينه خل يجوفك عسول .
حمودي يحضن باباتيه: مااااا ابىىىىىى

حصه اونها اتعصب عليه : يلالالالالالالالالالا قم ..

قلتها: حرام عليج لا اتعصبين عليه ..
حصه: من حملت احسه قام وايد يتدلع علي..

ضحكت: ههههههههههه الله يعينج ..
يلست مع باابتيه الي كان مندمج بالبرنامج ثقافي عن الحيوانات يا حبه لهاي البرامج ...اما حصه خذت ولده اتسبحه ..شويه دشوا سيفاني و سعيد ...

سلموا ع ابوي سالني سعيد: شحالج اليوم زينه ..
ابتسمت له: الحمدلله ...

سيفاني: ذياب ترا يبا يملج ع نهاية الاسبوع الياي .

شهقت:شوه ليش مستعيل ..شو عنده شي امتحانات الثانوية ..
سيفاني: و انتي شو شلج ما تمتحنين وياهم..
سعيد: سيف خف عليها شويه ..هي قالت بتفكر و بترد خبر يمكن ما تبااه ..

وطيت صوتي و انا خايفه : لا انا موافقه بس عندي شرط..
ما حطيت عيني بعين سيفاني لاني اعرف انه بيحرج علي ...

بس سعيداني قال : شو بخاطرج ..؟؟امري

طالعتهم متردده .كنت بغير رايي بس تذكرت راشد . و اتذكر اني قلتهم موافقه خلاص ...

سيفاني طفران: غردي شو تبين ..
سعيد : سيف رمسها بالزين ..شو بلاك انته ...ها زواج مب لعبان

قلتهم : ابا مهري يكون بحسابي الخاص ..

سيفاني وقف فانا اندسيت بحضن ابوي و كأني احتمي منه قال محرج: ليش منوه بيسرق مهرج .انا ولا سعيد .

سعيد زخ سيفاني و يلسه : شوق !! ليش ..؟؟

كنت شويه و بصيح : بس انا اشتري و اتزهب ع راحتي ..
سعيد: زين شو تبين بعد ..؟؟

قلتهم : ماشي ..

كنت ابا افتك و اخلص من السالفه ..بس فاجأني سيفاني يوم قال: و الملجه الاسبوع الييااي ..
قلته: انتوا قلتوا عقب اسبوعين يعني بعد امتحانات شيخاني ليش جدمتوا اسبوع ..

سعيد: الريال يبا .. و العرس عقب الامتحانات ...شو قلتي ..
طالعت سيفاني الي شكله كان مقهور مني فقلت : زين زين انا راضيه بس قبلها مهري يكون بحسابي الخاص .

وقف سيفاني : ابد ما توقعتج جذا ..بس ع قولت سعيد حقج ..

و طلع من الصاله ...
سعيد: شوق شو الغرض ..

قلته بعد ما بلعت ريجي : بس ابا اتزهب ع راحتي و خاصه مااشي وقت ..

سعيد يطالعني متشكك فـ خفت انه يمكن عرف شيء من الي قاعده اخطط له ..بس ارتحت يوم ..
قال مبتسم : يعني مب عشان اتغايضينا ..

ابتسمت: لا و الله ..
سعيد : مب مشكله انا برمس الريال و خلال ايام بيييييييييب لج بطاقة البنك صار ..بس انتي تبينه اكيد

هزيت راسي و ربعت حجرتي ...صكرت علي الباب رفعت راسي فوق ..يلست اصيح الي اسويه يا ربي غلط ..بس انا ادور سعادتي ..و عقب كلهم بتفهمون موقفي و موقف راشد... راشد بكون سند لي و بيحميني من سيفاني ... و غيره ..

اتصلت ابراشد ..ابسرعه .. ابشره و اخبره بالي صار من شويه بيني و بين سعيد ...و سيفااني ..
صكر عني ما قالي ع شو ناوي... بس اكيد بيرد علي عقب خبر ...

بدت امتحاناات شيخاني و بدور .. و بدور ما كان لها حس ابد..حتى شيخاني ما كانت تنجاف ...بس يوم ترد من المدرسه او تاكل معانا ...بالنسبه لي ..كنت وايد مرتبكه ..و عصبيه...الكل كان يتساهل معاي و يعذرني ..لانهم في بالهم متوتره من الملجه الي بتكون نهاية الاسبوع ..بس انا كنت خايفه و خاصه .. بعد ما اتصل لي راشد بهذيج الليله ...

رديت عليه : انت ما سويت شي ما بجى شي ع الملجه و انا خايفه وايد ..

سالني ابرود: لا اتخافيني ..انا معاج..
قلته: باجي ثلاث تيام ..انا متروعه من السالفه...

فاجاني: حبيبي انا خلاص حجزت التذاكر ..
ع الرغم كنت احس بالخوف من الخطوه الي كنت بسويها الا اني ما صدقت و طرت من الوناسه ..قلته ابصوت مرح : يعني متى السفر ..

راشد : ورا باجر يعني قبل يوم من ملجتج..
سالته: بس بس انا ما صرفت شي من مهري ..كيف حجزت لنا ..

راشد: ابرايه التذاكر ع حسابي ...امسوين خصومات ع حظنا ..
قلته : راشد اخيرا بنكون مع بعض ..
راشد: هي حبي ...مستانسه..

ضحكت: واااااااايد ...دخيلك تم ع اتصال معاي علشان احس بالراحه..
راشد: فديتج و الله...شوقاني اسمعيني زين ..
خفت يوم اتغيرت نبرة صوته: شوه ..؟؟

راشد: زهبي لج شنطه صغيره ..حطي فيها ملابسج مال يومين ثلاث تياام ..
قلته مستغربه: بس !!

راشد: هههههههه هي بس علشان برع بندلعج و بنشتري لج اغراض يديده يا العروس ..
اتلومت و بنفس الوقت ضحكت: ههههههههه انت اتامر حبي ..

كمل كلامه : الحينه التذاكر عندي ..ابا اعطيج تذكرتج كيف ..؟؟
سالته: خلها معاك زين ...فـ المطار بنتلاقى ..منوه بياخذني المطار ..
راشد: انا ..؟؟

شوق: لا لا اخاف حد يجوفني معاك ..انا بخلي الدريول يوصلني

راشد: لا اذا دريولكم بتنكشفين انا بطرش لج الدريول مالنا ..زين ..
قلته: زين خلي بطاقتي عندك..

راشد: خليها عندج ..و ان شاء الله حبي في الطياره بنتفاهم ع كل شي زين عمري ...
قلته بنبره خوف: راشد..

قاطعني: لا اتاخافين انا معاج ..عقب ما نتزوج محد يقدر يمس شعره من راسج..
قلته ابسرعه: ولا سيفاني ..؟؟

راشد: ايخسي الا هوه ...بس انتي لا تتوترين زين حبي ..

قلته : ان شاء الله ..بس وين بنسافر ..
راشد: خليها مفاجاه المهم دوله اوربيه..

تنهدت: و الله انا وايد مستانسه ع رغم اني خايفه..

راشد: انا معاج ..خلاص ارقدي الحينه ..باجر بيمر وورا باجر بنجوااف في المطار ..
همست زين ..
و قبل ما اصكر سمعته يسالني: جوازج وين ..؟؟

قلته : عندي

راشد : زهبي شنطتج الحينه و حطي الجواز ..
مدري ليش قلته: زين باجر اذا ييت بيتكم ..عطني تذكر
راشد: ليش شاكه فيني .

سكت ما عرفت شو ارد ................................

راشد: ما عليه شوق ...اذا باجر ييتي بعطيج او بدبرها لج كيف توصل عندج ..ارتحتي
ابتسمت له: مب شاكه فيك بس علشان اتشجع و اروح المطار و ما اغير رايي

راشد: زين ما عليه ...روحي ارقدي زين..
قلته: تصبح ع خير .

صكرت عنه ..و انا احس ان عقلي مب معاي ..و الي قاعده اسويه غلط ..فوق هاه ..كله حضنت الممخده و يلست اصيح..ليش حياتي انكتب لها ها الطريج..؟؟ ليش ما اتزوج الي اباه مثل باجي البنات ..؟؟ رقدت و انا اصيح من غير ما احس ابعمري ..

اليوم نشيت قبل ما اتيي امايه ادق علي الباب ...سرت الحمام ..اتغسلت و صليت الفير ... مدري ليش و انا ساجده حسيت بالضيجه فانفجرت اصيييييييييح ..و دعيت بسري ربي اتسامحني ...سرت صوب شبريتي طلعت شنطه اصغيره ..سرحت انا و اتامل الشنطه ..الحينه ماشي فايده من التراجع خلاص ...

حطيت لي جلابيتين و بدلتين .. و اغراض شخصيه و فتحت الدرج طاحت عيني ع الخاتم الي هداه لي راشد..شلته و شلت الجواز و حطيتهم في الشنطه و صكرت الشنطه و دسيت الشنطه تحت الشبرية ..و اتاكدت ان ممكن محد ينتبه لها .. و خاصه سيتي اذا فكرت اتنظف ها المكان ..

رجعت رقدت ..ما قمت الا صوت الموبايل ...فتحت اعيوني جفت المتصله ندى ...مديت يدي ع الموبايل و صكرت ابويهها ..مدري ليش سويت هالحركه..هل هو خجل من صديقة عمري من بسويه فيها ..أو اني خايفه ترمسني عن خالها .. او سوالفها مع راشد ...

غلقت موبايلي و قررت ما افتحه غير اخر الليل يوم برمس راشد ...دشت حصه علي الحجره جافتني يالسه رفعت راسي اطالعها ..

شهقت حصه: شوووووووووق ابيه ليش جي شكل ويهج..
انسدحت ع الشبريه جني وحده خلاص يأسه من حياتها

حصه: ما تبين تملجين..
ابتسمت و جني اتطنز عليها: امبلى ابا اليوم قبل باجر "كنت اقصد راشد"

حصه يلست جريب مني : لو تبين ليش اتسوين ابروحج جذا .."حطت ايدها ع يبهتي " ع بالي محمومه

يلست و انا كارهه نفسي :زين خليهم يأجلون الملجه
حصه: ليش ما قلتي سعيد ..

طالعتها : سعيد قال سوا حساب لي في البنك و حط البيزاتي ..بس ما اجوف البطاقه وينها ..؟؟
حصه مبتسمه: عندي و انا يايتنج اقولج تعالي انروح السوق اليوم انا و انتي موزي ..علشان تزهبي .. و غير اندور لج فستان حق الملجه ..


طالعتها : من قالج ابا حفله حق الملجه ترا العرس بعد اسبوع حق شوه حفله الملجه..
طالعتني: زين ما بنسوي حفله بس عالاقل اشتري شي تكشخين فيه ..يوم بجوفج ذياب ..اول مره ..

وقفت ابسرعه و رحت ابعيد عن حصه و كأني اشرد منها يوم طرت اسم ذياب طالعتها: وين البطاقه ..
حصه: في الحجره تبينها ..؟؟

رديت عليها : هيه اباها .. و خبري سعيد ..ابا الملجه الخميس الياي اتكون شيخاني مخلصه امتحاناتها ..

جفت حصه وقفت و طلعت من حجرتي حسيت انها زعلت لاني كنت جافه معاها ...رحت صوب التسريحه طالعت ويهي فـ المنظره ..جفت السواد تحت اعيوني ..و خطوط ادل ع اني صج وحده مريضه ..خذت نفس طويل ...باجر جي راشد بجوفني بشرد مني ..

رحت الحمام تغسلت ..عقبها ..سرت لـ صوب حجرة حصه ..دقيت الباب و دشيت جفتها قاعده اترتب ثياب سعيد..رحت صوبها : انا اسفه ..مستويه وايد دفشه مدري ليش ..؟؟
حصه مبتسمه: عاذرتنج و الله ..

نشت من مكانها و فجت الشنطه .. عطتني بطاقه مكتوب عليها بنك دبي الاسلامي: هذي الامانه ..
زخيت البطاقه من ايدها و كأني كنت خايفه انها تطير مني ..
طالعتني حصه بنظرات مستغربه :شوق بديت اشك في شي..

وقف قلبي : شوه..؟ظ

ابتسمت: مدمنة مخدرات ههههههههههههه

طالعتها بالبدايه مستغربه عقب تذكرت الموقف فضحكت: هههههههههههههه
قلتها: وين حمودي ..

حصه: يصايع بيت امايه ...و سعيد في الدوام..
ترجيتها: حاولي تقنعيه ان نملج عالاسبوع الياي بليز..خذي لج حجه عشانج عشان شيخاني مب عشاني ..الله يخليج..

حصه اتحط الثياب في الكبت: ان شاء الله اتبين شي ثاني.
ابتسمت لها: هي ابا اروح الصالون ..اسوي تنظيف بشره و هالسوالف انتي اتعرفين..

حصه مستانسه: اخيرا اقتنعتي انج بتستوين عروس

شوق: هيه جفت شكلي في المنظره يخرع..
حصه: هههههههههههههههههههه اوكى حياتي بس اهم شيء ..ترقدين زين ما تسهرين علشان السواد الي تحت اعيونج يخوز امبين عليج التعب ..

ابتسمت لها : خلاص اوعدج...يلا اتصلي بموزي .. و انا بروح اجوف ابوي ..مشتاقه له .... و اشرب لي كوب حليب ..
حصه: من عيوني اهم شي اتكونين مستانسه..

ابتسمت لها و طلعت من الحجره ..كنت اتمنى اكون مستانسه.. و افرح و ارتب نفسي ..بس كنت احس بداخلي شي ..للحين ما عرفت شو هو ؟؟؟

عقب ساعتين خلصنا من الصالون ...مرينا محلات..كنت اشتري و اعرف اني ما بستخدم هالاغراض لاني بسافر باجر خلاص مع راشد ..بس كنت ابا اسايرهم ..

علشان ما يشكون بشيء ...وقت العصر .طرت من الوناسه يوم حصه خبرتني ان ذياب رضى ان تتأجل الملجه للاسبوع الياي علشان خاطر شيخاني و امتحانااتها

و فكرت اني ما اخبر راشد ..اسوي له مفاجاه في المطار ...جمدت ابمكاني يوم دش علي سيفاني .. و كانت ملامح ويه جامده كالعاده ..

قال : يعني اجلتي الملجه..
طالعته من غير ما ارد عليه .و ابوي سعيد محد في البيت منوه بنقذني منه ....تجدم مني فرديت راسي لورا و رفعت ايدي اغطي ويهي و جني احمي نفسي منه بس فاجاني يوم يير ايدي شهقت بس عقب ..زخ راسي و باسني ..للحظه بس حسيت الدنيا توقفت ..

استوعب شو الي قاعد يستوي ..رفعت راسي اطالع سيفاني مستغربه ..جفت ابتسامه ع محياه: اتصدقين شوق حتى انا ما اباج تملجين بسرعه ..

بطلت اعيوني مستغربه من كلامه: بنفتقدج وايد ..بيكون طعم البيت غير ..من دونج..
ابتسمت له مرتاحه و مب متوقعه اسمع ها الكلام من سيفاني ..

سالني : حتى بعد ما بتعرسين بتمين جذا اتخافين مني ..
هزيت راسي بمعنى لا : بيكون وراي ظهر ..
ما توقعت ضحكته: هههههههههههههه وراج ريال و مب أي ريال ..الله يهنيج..
انتهزت الفرصه و سالته و كنت خايفه : انت قلت لي انك بتخطب ندى علشان ما ينكسر خاطرها ..

ابتسم: هي اذكر قلت حرام اربيعتها اتعرس و هي بعدها خليكم اتعرسون مع بعض انتي و ندى و انا ذياب ..
طالعته مستغربه: انت ربيعك ذياب..

رفع حياته: ليش ؟؟ استغربتي ..
بلعت ريجي : احيده رفيج راشد ولد خالوه حليمه..
اشر بيده: يزول راشد ...

سار عني بس لحقته: ندى امحيره حق راشد..

وقف فجاه و طالعني شهقت و رديت لورا خايفه منه بس تم واقف ابمكانه و قال: ادري ..

وصعد الدري ..يلست اطالعه الين ما اختفى ...فديتك سيفاني تبا ندى ..حطيت ايدي ع حلجي يا ويلي ما تسمعنا بدور بتجلع عيني و عين سيفاني ..هههههههههه..افتقدت شيخاني فكرت اروح حجرتها بس خفت تحشرني ففضلت اروح حجرتي ..جفت مكالمات اشكثر فتحت اللسته ..جفتها كلها من راشد شو مستوي ..؟؟ لا يكون غير رايه ..!!

اتصلت له ابسرعه رد علي من اول رنه سالته: شو مستوي ..؟؟
راشد بعصبيه: انتي وينج ليش ما اتردين..

قلته: الموبايل كان بعيد عني شو مستوي ..؟؟
سالني: ما تبين التذكره ..؟؟

قلته: امبلى ..بس سيفاني داخل كيف اييبها ..

تم ساكت و كأنه يفكر عقبها فاجأني : خلاص انا بييبها لج..باجر الدريول بيمر عليج الساعه 5 العصر زين..
بلعت ريجي حسيت برجفه: اوكى راشد..

راشد: احتمال ما برمسج اليوم فـ ليل ..بس باجر بنتلاقى فـ المطار ..

قلته: انا وايد خايفه..
راشد: انا معاج لا اتخافين..
همست له : ان شاء الله ..

وصكر عني الموبايل .قفلت علي باب حجرتي ..خفت..اني اكون بـ حلم..مستانسه اني برتبط باجر بـ راشد و بنفس اللحظه خايفه من الي يصير ...تفاجات يوم سيتي دقت لي باب الحجره.. و عطتني جيس ..فجيته جفت التذكره ..مينون راشد كيف يعطيهاا حق سيتي ..ابسرعه دسيت التذكره داخل الشنطه ..كنت امفكره اتم قافله علي الباب بس خفت لا يشكون ...

في اليوم الثااني و ع الغداا ..دشت شيخاني علينا الصاله امبرطمه ..
امايه: خير يمه..

شيخه رايحه صوب الدري: صعب جان ايب ستين نعمه..
حصه: الله يوفجكم يا رب ..

قلتهم: شيخاني ضعفت وايد..
امايه: شو اتسوي فديتها بنتي همها الامتحانات ...الله يوفقهم جميع..
بها اللحظه دش سيفاني يوم حصه قالت: الله يعين بدور مدري شو سوت..
التفت سيفاني صوبنا: شو بلاها ..؟بدور؟

طالعته مستغربه اتهمه بدور !! بس البارحه قال يبى ندى ..
امايه: امتحانهم صعب ..
سيفاني : اهاا ..امايه انا ابا ارقد لا اتزقروني حزت الغدا ..

بلعت ريجي زين بعد يوم بظهر بيكون سيفاني راقد...و حصه بتروح بيت امها ..كل عصر اتكون هناك.. الحمدلله البيت بفضى ..طالعت باباتيه نشيت من مكاني .. و لويت عليه..حسيت اني بصيح..ما اريد افارجك فديتك باباتيه..

امايه: شوق !! شو صابج..
حصه: من زمان ما جفناها تحضن عمي ..خليها باجر بتعرس ..

امايه: وااعليه ..

ما قدرت ارد عليه باي جمله ..لان لو تكلمت بصيح و ما بيود روحي ..تمتيت ساكته ...ياه سعيد من برع و حطينا الغداا ..كنت احسب الساعه و الدقايق ...قفلت علي باب حجرتي ..غفلت ..شويه ما حسيت الا الموبايل يهتز فوق صدري نقزت ...بطلت اعيوني بكسل جفت الموبايل فوقي ..لمحت الساعه اربع ونص نقزت من مكـاني ..و شي رساله بطلتها .."روحي تحبك" بسوي لج رنه ظهري برع الدريول بيكون يترياج"

حسيت ابرجفه ابسرعه رحت الحمام ..اتغسلت عقبها طلعت برع اجوف منوه فـ البيت ..نزلت تحت ..جفت البيت فاضي ..سالت سيتي ..عنهم قالت بس شيخه موجوده فـ الملاحق اتذاكر ..و سيفاني راقد .. و باباتيه بالزراعه .. و امايه محد

حسيت بالرااحه...ربعت حجرتي ...طلعت الشنطه من تحت الشبريه ..طالعت موبايلي الي رن رنه و كانت من راشد..لبست عبايتي و شيلتي .. و شلت شنطتي ..

فتحت باب حجرتي بسرعه ..ربعت برع جفت سياره قوم خالوه حليمه الدريول ..فجيت باب السياره ..

و فتحت ابواب يديده بـ حياتي ..و انا كلي امل اني اعيش مرتاحه و متهنيه مع الانسان الي اختاره قلبي و اختارني قلبه



>>>>>.يتبع

 

[أدركت القـ م ـر]

رد: خل العذول موطـي الراس منكوس..* معاني..*



هههه تسلمين ما قصرتي ..



هييييييه ها الجزء امممممم الله يعين <-- ما احب اقوول عسب ما اخرب على الاحداث

بس حسيت بالقهر ياخي مهما كان الحــــب ومهما وصل من مقادير المفروض ما ترخص نفسها
بها الشكـل... وتحسس عمرها بالـذنب ( هذا إذا كان يهمها سمعة أهلها ، وصحة باباتها )


كشخه كشخه يا معاني ... يلا لا تطاولين وايد تراني شوي وبخلصها ^.~

 

[أدركت القـ م ـر]

رد: خل العذول موطـي الراس منكوس..* معاني..*

وينـــــــــــج

 

[الفاتنة الشحوح]

رد: خل العذول موطـي الراس منكوس..* معاني..*

تسلمين معاني على القصة وبصراحة دورت عليها في منتدى غير وحصلتها ههههههههههههههههههه

واستانست من النهاية عجيبة

 

[أدركت القـ م ـر]

رد: خل العذول موطـي الراس منكوس..* معاني..*

خخخخخخخخخخ
معاني الناس خلصت من القصه
وانتي بعدج ذالتنا هاع