-
مرحبا ٬ في حال تعتذر تسجيل الدخول ، يرجى عمل استرجاع كلمه المرور
هنا
أنت تستخدم أحد المتصفحات القديمة. قد لا يتم عرض هذا الموقع أو المواقع الأخرى بشكل صحيح.
يجب عليك ترقية متصفحك أو استخدام
أحد المتصفحات البديلة.
السلام عليكم ورحمة الله وبركاته
7\6\2010
الجلجلي شيخ المشايخ ناش من الصبح
على حشرة الباكستانيين ما أدري الهنود
الله يهداه أخوي عنده تعديلات في البيت
واليوم من الساعة 6 الصبح والهنود يشتغلون
ما خلوني أرقد ....كأنهم يدقون معلاية
والمصيبة انهم أمس العصر جوا وفرشوا الرمل برا البيت
واسمع حشرة يهال صغار وأطلع برا وأشوف عيال الحارة
كلهم يرقصون ويغنون ويدورون حول الشيول والتنكر وكأنهم أول مرة يشوفوا
شيول!!!!!!!!!!!!.....المهم خليتهم يلعبوا شوي وقليتهم عن الحشرة
تموا يلعبون لين الساعة 8 وانا طالع لصلاة العشا وأشوف الشلة زادت صاروا 10
والصراخ يعطي وطيحين يتسبحوا بالرملة وكأنها بركه صناعية
المشكلة ان عيال حارتنا مرتقدين اول مرة يشوفون رملة
وازق فيهم وترد علي اصغر واحدة فيهم "شب يالتبال"
حتى كلام بعدها ما تعرف تتكلم "تبال" تقصد سبال
واسألها عن اسمها قالت اسمي" رغد" وانت شو يخصك يالتبال
يوم شفت أن أصغر واحد فيهم هزئتني وأحرجتني قلت خلني اسير
اصلي ابرك لي وخلهم ياخذوا راحتهم بالرملة عليهم بالعافية
يقول الشاعر "سالم سيار":
عسى مازعلتك البارح وزودت الجراح جراح..
عسى مامرت الدمعه على اهدابك من أسبابي..
جرحتك من كثر شوقي وخليت الكلام رمـــاح..
ولا أدري شلون ياعمري طعنتك حيل بعتابــي..
بدون شعور صدقني ترى كثر الغلا ذبــــــــاح..
تعال وشوف بغيابك غلاك شلون سوابــــــــي..
حرام تغيب من عمري وتعطيني الفراق وشاح..
حرام الدمع في عيني مناديله هي أهدابــــــــي..
غيابك يشغل عيون الزوايا وأمتلى أشبـــــــاح..
وأنا انثر صوتك بقلب المكان وأشعل أبوابـــي..
تلفت للأمل دام الرجاء في عمــــــري الملواح..
أناديلك ولو شرهة وصولك تقطع أعصابـــــي..
أبيك الجاي من عمري أنا ماأبيك شيء وراح..
مدامك أجمل وأخر مدامك أول أحبابـــــــــــــي..
أبي أرتاح ياعمري وأنا أدري هم تبي ترتــاح..
تعال وقبل ماأفرح ترى تفرح بك ثيابـــــــــــــي..
أحبك يابعد عمر الحزن والجرح والأفــــــــــراح..
أحبك كثر مانامت عيونــك داخل أهدابـــــــــــــي..
السلام عليكم ورحمة الله وبركاته
10\6\2010
اليوم حبيت أمسي عليكم
ماشي أخبور ماشي علوم؟؟؟؟
اليوم ركضت 6 كيلو أحس ان صيمي نقع
من كثر الركض ....والله رطوبة البلاد
وأنا أركض تذكرت كلمات توصف حالتي
وكان الكلمات كتبت فيني ....
واقفة بيني وقلبي .. لا سبب ولا غرض
تشغلي قلبي بغرامك .. ولا خبرته اعترض !
لابغيت ينساك قلبي غصب عني تذكّر
ولو غلطتي فيني مره .. عنك قلبي تعذّر
أكرهك ..
وفي عز كرهي احس اني احبك اكثر
مدري حالي ذا طبيعي ؟
ولا حالي ذا مرض !
الغريبة ان قلبي يبيعني ويجيك عنوه
والغريبة ان طبعك فيه رقه وفيه قسوه
والغريبة اني جنبك القى في الحرمان نشوه
ولو الوم قلبي في غرامك علي قلبي يتنكر
أكرهك ..
وفي عز كرهي احس اني احبك اكثر
مدري حالي ذا طبيعي ؟
ولا حالي ذا مرض !
الحقيقة انا في حيرة مع قلبي ومعاك
والحقيقة لا اقدر اوصلك ولا اقدر امنعك
والحقيقه قلبي عصاني وانتي طاوعك
ولو بغيت ابعد بقلبي اخاف قلبي يتأثر
أكرهك ..
وفي عز كرهي احس اني احبك اكثر
مدري حالي ذا طبيعي ؟
ولا حالي ذا مرض !
مدري حالي ذا طبيعي .. ولا حالي ذا مرض !
كلمات حلوة والأحلى اني أحس انها تعنيني
السلام عليكم ورحمة الله وبركاته
9\7\2010
الجلجلي يمسي على الجميع من
منبر الأسود والذئاب...
والله اشتقت للبرزة
كنت مشغول وايد معي صيفي
والله نتختنا الشمس
الحمد لله افتكينا اوود
امس سمعت قصيدة للشاعر العملاق
"سلطان بن وسام الهاجري"
واسمها المزون المظلمة
يوصف فيها الطيارة
وتذكرت أول مرة ركبت فيها الطيارة
اسميني كنت مرتقد
تيلق حلقي كمو الأبله وروسي معلق مع الجامة
أشوف الدنيا من فوق ....شي عجيب
حسيت عمري صقر حر يعشق التحليق في سماء المجد
والبطولات ...اصلا اونا صدق صقر ...
بخليكم مع القصيدة...
راكب اللي حسها تسمعه من كـل صـوب=مثل زلزال الرعد فـي المـزون المظلمـه
كنها يـوم استـدارت وضاقـن الـدروب=فرخ شيهانٍ على الطلع ينهـض مقدمـه
تلها جورج الخواجه وعرضهـا الهبـوب=وأعلنوا بإطفاء الزقايـر وربـط الأحزمـه
إسم كبتنها خواجة ماهـو بلبـاس ثـوب=أخذ من االفوتكا سك ومن الشـي عدمـه
من سلايل شايبٍ ما جمع غيـر الذنـوب=والديانة عكس الإسـلام ماهـي مسلمـه
مايعرف يقول هـذي شمـال وذي جنـوب=الدليلـة بوصلـة والحـروف مترجـمـه
واهني اللي علـي رحلتـه يلقـي ركـوب=إن رجع وألاتوفـى عسـى الله يرحمـه
إن نوى في مشرق الأرض وألا في الغروب=المهـم ينفـذ الـلازم الـلـي يلـزمـه
فاقدٍ لي شيـخ قـوم غالـي ومحسـوب=محزمٍ في الضيق يابعـز منهـو محزمـه
والجفا من بين الأصحاب عيب من العيوب=والصداقـة مـن بنـى بيتهـا مايهدمـه
والغلا والكره ما تسكـن إلا فـي القلـوب=بس مابـه قلـب فيـه الثنيـن مخيمـه
والرجل لاصار بيـت مـذرى ومحجـوب=استوى عنـد النشامـا وجـوده وعدمـه
أتحمل مزح الأصحـاب عذبيـن السلـوب=وأتخيـر وآكـل التمـر واطـش عجمـه
وأعرف الكذبة إليا جات من فـم الكـذوب=لاقعـد يرفـع لسانـه ويرخـي برطمـه
والطرب لامن جرفني مع اللحن الطـروب=أنسف البيت المدمدم علـى اللـي دمدمـه
واقفل الجوال عن راعي الغـوج الهـذوب=وأفصل التعميـم عـن بيجـري واعممـه
زلة الطيب مـا تجـرح متينيـن الجنـوب=عقب اللـي زلـةٍ مـن صحيبـه تفحمـه
ايه ياضيدان والنـاس حـارب ومحـروب=والأعـادي كـل واحـد بحبـره وقلـمـه
السلام عليكم ورحمة الله وبركاته
مسيكم الله بالنور والسرور
اذكر يوم كنت صغير يمكن عمري 5 سنوات او 6
وفي ايام الصيف يعد
كانت يدتي تعطيني جبان او طاسه
وتقلني حوووه
امشي النخل وحت لينا خليل (خلال)
انتوا ما ادري ويش تسموه المهم كنت أمشي من الصبح وادور بالنخيل نخل نخل
وهي موصتني اني ما امشي الا نخلنا بس اونا البهيس
كي اسوي ادور عليهم نخل نخل وانفضهم كلهم
وكان في واحد اسمه حم روشد معو نخل
قدوم نخل يدي وما يحبني مووول
ويكرهني كره العمى ...
وفي ذلك الصباح قلت بمر على نخله وبشل الخلال اللي بالنخل
كامل وامشي واقشره كامل
ويبرح لي الحبيب من بين النخيل
بللللللل وكأنه راقد بالنخل
مخلي النخل فندق يبيت فيها الله يوفقه دنيا وآخره
ويمسكني وياخذني لجدي وانضرب ضرب البلى ذاك اليوم
مسك لي اسوة ويخبطني على ظهري تميت اسبوعين ما اطلع من البيت
وكله بسبة حم روشد الله يوفقه ويسعده...
ذكريات بااااا
اهم شي ان يدتي كانت راضية علي ويبت لها الخلال
السلام عليكم ورحمة الله وبركاته
15\7\2010
اليوم معزوم على ملكة واحد من الربع
المشكلة اني ما أعرف آكل العيش من دون داغوس
واستحي اقول لهم في ربشة الملكة ان يجيبون لي غرشة داغوس
لا يضحكون علي الربع ...
بس يلا خلنا نجرب عيش اللحم من غير الداغوس
أصلا انا ما احب عيش اللحم وايد...
السلام عليكم ورحمة الله وبركاته
أمس لعبت السيف
وانطرت رجلي
دست غرشة..
على طاري الجروح اذكر في مرة طريت
ايدي بالسيف وسرت المستشفى
وجت الممرضة عشان تخيط الجرح اللي ف ايدي
اول ما شافت الجرح لاعت جبدها
وخفت لا ترجع علي "تزاوع" او "تتقيأ"
واقلها هووووي مولش؟؟؟؟
قالت لا لا لا عادي ما مشكلة
وبعدين قامت تتنافض وتختلي "ترتجف"
وهي تخيط الجرح وقام ينزف واخبل اونا ذيك الساعة
واقل الدكتور هوووي
جيب لي ممرضة عليها قلب اسد
وياب لي ممرضة الله لا يبلاكم
شكلها افريقية
مسكت ايدي وتسحبها بقوة وكأنها تسحب
فشة وتخيط الجرح بكل برود
انا اشهد ان قلبها من حديد
وسميتها "ريتشارد قلب الاسد"
يقول الشاعر المصري ما اعرف اسمه:
ياأنا يا مفيش اصل معنديش فى الحب هزار
يا أنا يا بلاش ومتحسبهاش مفيهاش اعذار
أنا اللى اقول فين وامتى وانا اللى اختار
لو حد نداك اعمل مش سامع برضاك انا قولت كلامى وده نظامى ومش باقى كلام
انا مش مضمون انا ممكن اقلب مجنون لو شوفتك مع غيرى يا ويلك مش هابقى تمام
انا جيت خلاص راحت خلاص ايام زمان
ولا فى كلام ولا حتى سلام غير باستأذان
لا تقولى عشرة ولا قريبى هتلاقى جنانـــــ
---
لو حد نداك اعمل مش سامع برضاك انا قولت كلامى وده نظامى ومش باقى كلام
انا مش مضمون انا ممكن اقلب مجنون لو شوفتك مع غيرى يا ويلك مش هابقى تمام
السلام عليكم ورحمة الله وبركاته
23\7\2010
أمس اتصل بي واحد من الأهل
عشان اساعدهم يركبوا لمبات مال العرس
فوق السطح وسرت ...
حلوة جمعة الشباب كلها ضحك
وعطوني ربطة لمبات وخلوني أعلقهم
ومن دون لا أقصد وانا اركب اللمبات... طاحت الربطة من فوق السطح وتكسرت اللمبات
وتقشر وجهي مع الجماعة وانا مسوي عمري
الخبرة بهالسوالف..
أنا كنت أحسن واحد يشغل لمبات ف حارتنا
وكنت أحسن واحد يسوي سلطة
وكنت أحسن واحد بحيش السخول
وكنت أحسن واحد بسفط السمك
وكنت أحسن واحد يلبق التنور
وأحسن واحد يسوي فريد وشوهي زعتر
بس الحين صرت بمبو خلي
مامني فايدة
أظن ان حد صكيني بعين
الحساد وايد هالزمان واونا انسان موهوب
ما شاء الله علي
في كل شي موهوب
يقول الشاعر السعودي منصور القانوس:
ليتك بنفسك عنيت وقلت لي عذرك..
ما كنت ابيها تجي مــن واحـدٍ غــيرك..
خــطاك في حــق نفــس علها هجرك..
مسموح من قبل لا تبدي معاذيرك..
تبقى مثل منت غالي ما نقص قدرك..
ويبقى مكانك بعيني رغــم تقصــيرك..
لو مات حبك ترا بضيق انا بصدرك..
ما مات حبٍ في قلبي عاش من خيرك..
الحــب عــاده مثل ماهو علــى خــبرك..
لا ينشغل لو يطول الوقــت تفكـيرك...
من قبل لا تعتذرلي راضــي بعــذرك..
مسموح رغم الجروح ورغم تقصــيرك..
ليتك بنفسك عنيت وقلت لي عذرك..
ما كنت ابيها تجي مــن واحــدٍ غيرك..
خطاك في حق نفسٍ علها هجــرك...
مسموح من دون لا ترسل معاذيرك..
السلام عليكم ورحمة الله وبركاته
27\7\2010
اليوم سرت هالمنطة مع واحد من الربع ساير
عنده زرب هناك
وهناك سرنا نشوف منطقتهم عن كثب
وانا طالع من الزرب وأحصل واحد من شوابهم
قاعد تحت الحر والشمس برا البيت ولا بس وزار مخطط وما لابس فانيله
والعرق يتصبب من جسمه ...شو مكلفنك !!!!!! انا استغربت
وسألت عن اسمه قال لي صاحبي اسمه ابو تركي
وسرت وقعدت وياه
وسألني عن اسمي؟ ومن أبوي ؟ وشو أشتغل ؟ وكم عمري ؟
وشو هواياتي ؟وشو السيارة اللي أسوقها؟من المطرب اللي يعجبني؟
وهذا مزرعة موجودة هناك بعد...ومحطين "فزاعات" بعد خخخخخخخ
المهم وبعد هالسوالف سألته شو تتريا الحاج هنيه؟؟
قال لي أتريا " المنخبط" انا استغربت شو المنخبط؟؟؟
قلت شو المنخبط قال لي هذا الي يجيب السيل!!!!
وبعد ما فهمت !!!!
وبعدين قال لي ربيعي هذا يقصد "المنخفض" المنخفض الجوي
هو العادة يسمع الأخبار وحالة الجو والطقس
ويحسبهم يقولو "منخبط"..
وأنا ما قدرت أمسك عمري وضحكت من خاطر
وبعدين قلت له يا بو تركي المنخفض ما يجي بعز الصيف
المنخفض العادة يجي ف الشتا
وقال وانت شو دراك يالتمبر؟؟
انا كل سنه أترياه مثل هالوقت ويجي ويملى الدنيا
سيول ووديان ورديد بأذن من الله تعالى
أنا قلت بنفسي هذا شكله مخرف خلني أسير أحسن لي
وهاي الصورة من فوق بس أبوتركي
ما مبين أحيده لابس وزار وجاعد عدال الزرب وبيده يرز يتريا المنخبط خخخخ
السلام عليكم ورحمة الله وبركاته
اليوم بحط ليكم صورة السخل
مولي واسمه "سعود"
قولوا ما شاء الله ولا اله الا الله
تراه من السلالة العربية النادرة
وينسب الى السلالات العريقة من الغلم في الجزيرة
العربية .....
آخر مرة بغوا يذبحونه بعرس واحد من الأهل بس أنا
رفضت لأني أحبه وايد وهو بعد يحبني...
وهاي صورته ...شكله زعيم ياخي الله يحفظه ويخليه
السلام عليكم ورحمة الله وبركاته
مساء الورد ع الجميع
اسميني اشتقت للمدونة
كنت مشغول شوي بأمور الدنيا
لكن العود أحمد....
أمس تبهدلت مع بن عمي الصغير اسمه عبدالرحمن
انقشع من الشربية أمس ويفتق راسه ويشرشر الدم
ويركض اخوه لينا ويقلنا أخوي مات...
صب قلبي الله يهديه يبس فخوضي..
وركضنا بيتهم واشوف الحبيب متسبح بدمه
واشله وكان راسه منطر بجرح عميق
وخذيناه المستشفى والحمد لله
وخاطوا جرحه والحين يطنطط مثل القرد
الحمد لله والشكر لك يارب
بس منظر ثوبي وأنا في المستشفى
وكأني ذابح لي سخل من السخول
يقول الشاعر المخضرم "محمد بن زميع القحطاني":
يا الله يـا اللـي نبتهـل لـك ونخشـاك
يــا خـالـق الدنـيـا ورافــع سـمـاهـا
يا واحـدٍ مـا هـي بتحصـى عطايـاك
الخلـق كــل الخـلـق مـحـدٍ حصـاهـا
الجود من جودك وعطفك وحسنـاك
يـا مستجيـب الداعـيـه فــي دعـاهـا
أنـت الكريـم اللـي نخـافـك ونــدراك
لــو لاك نفـسـي مــا تحـقـق منـاهـا
أنـك تثبتـنـي عـلـى غـايـة ارضــاك
عـبـدك ولا غـيـرك حيـاتـي ولاهـــا
سجـدت لـك يــا دايــرٍ كــل الأفــلاك
يــا غـايـة الشـكـوى ويــا منتهـاهـا
لــولاك يــا رب السـمـاوات لـــولاك
مـا تقبـل التوبـه عـلـى مــن نـواهـا
يـا العبـد مالـك غيـر ربّـك ومــولاك
كــل البـشـر تفـنـى ويمـحـى ذراهــا
اهْـو الـذي صـوّرك سـوّاك وأنشـاك
إعجـاز مـا وصـل البشـر مستـواهـا
لا تشمـت العالـم وتنـسـى خطـايـاك
احكم هوى نفسـك وحاسـب خطاهـا
حاسب ضميرك قبل لا تدفـع خطـاك
كـم مـن قـدم قلـب المشـقـى حفـاهـا
علـيـك بالإحـسـان والــرب يحـمـاك
مـن قــدم الحسـنـات يلـقـى جـزاهـا
شيطـان نفـسـك لا يـغـرّك ويـغـواك
قبلـك غــوى نــاسٍ وكــدّر صفـاهـا
من زمرة الطاغوت حـذراك حـذراك
لا تبتـلـي بـجـروح يصـعـب دواهــا
وإلى مشيت اعرف دروبك وممشاك
احرص على نفسـك وخالـف هواهـا
أمّــارةٍ بالـسـوء مــا هــي بتـنـهـاك
اقبـض عليهـا لـيـن يجـلـى صـداهـا
اقـطــع نـوايـاهـا بـديـنـك وتـقــواك
هـلّــل وعـنــد الله سـريــعٍ شـفـاهــا
والعيـن لا تنـظـر بـهـا مــن تـعـدّاك
المحصـنـه لــو تلتـفـت لــك وراهــا
اصبـر علـى همّـك وغـمّـك وبـلـواك
عـــف وتـعـفـف لا يـغــرّك حــلاهــا
واترك حرام القوت مـا هـو بيمـلاك
كــل البـطـون الجايـعـه مــا مـلاهــا
رشفة حلال اتسد جوعك ومضمـاك
تسـوى مشـاريـب الـحـرام وغثـاهـا
النـار فـي جوفـك وتصـلـى حنـايـاك
نــار الجحـيـم تـزيـد لـلــي وطـاهــا
واحـفـظ لسـانـك لا يـجـرك ويـبـلاك
اخــذ الثميـنـه لــو غـلـى مشتـراهـا
الهـرج ميـزانـك ويكـشـف خفـايـاك
كـلـمــة تـعـيـبـك لا تـبـيّــن نـبـاهــا
صون الكلام وصون نفسك ومبـداك
للنـفـس حشـمـة لا تفـصّـم عـراهــا
اصمت مدامك عـارفٍ سيـر مجـراك
لا تـنـقـل الـنّـمـة وتـبـحـث خـفـاهـا
يــزول قــدرك عـنـد أقــرب دنـايـاك
لـو هـو ولـد عـمّـك حيـاتـك جفـاهـا
واحلـم تـراه الحـلـم يـرفـع مـزايـاك
هــو سـيّـد الأخــلاق هــو مبـتـداهـا
وصّى به المبعـوث مـا هـو بيخفـاك
شفـعـيـنـا يــــوم الـمــلاقــاة طـــــه
خـل الجهـل لا تجعـل الغيـظ ياطـاك
تـرى الجهـل سـم القلـوب وعمـاهـا
وإلى ابتليـت ارفـع إلـى الله شكـواك
لا بـدّهــا الأيـــام تـكـشـف غـطـاهـا
اصبـر يزيـن الحـظ ويزيـن مـرمـاك
الله يـفـرجــهــا ويـــدفـــع بـــلاهـــا
لا تمنـع المـحـروم لا مــن تنـصّـاك
الناس لأجل الناس وأحسن عطاهـا
ابــــذل لــوجـــه الله والله يــجـــزاك
مثـل الغـروس اتطيـب للـي سقـاهـا
لا ضاع معروفك ولا ضـاع حسنـاك
إن كــانــهــا لله تــلــقــى جـــزاهـــا
جارك ولو هو جار تسقيه من مـاك
عـلـيـه لا تـرفــع يـديـنـك عـصـاهـا
أحسن جوار الجار لـو كـان يشنـاك
ترى العـرب تحشـم كـلاب اقصراهـا
بـكــره يـشــد ويـكـتـب الله فــرقــاك
عـسـاه يـذكـر جيـرتـك مــا نـسـاهـا
الظلـم شيـن ويجعـل الـنـار مـثـواك
راع الظليـمـه عيشـتـه مــا هـنـاهـا
فوقـك إلــه الـعـرش عـالـم نـوايـاك
ينظـر قلـوب النـاس وش محتواهـا
يسمـع بمـا تجهـر وعـارف خفايـاك
بأمره شروق الشمس ترسل ضياها
هـو عـالـمٍ غيـبـك وركّــب خـلايـاك
هـو خالـقٍ فـيـك الـعـروق ورواهــا
والضيف لـه حـقٍ إلـى حـل بحمـاك
قـلّـط ضـيــوف الله وأكـــرم لـحـاهـا
لا تحقـر الضيـفـان واتـشـح بـغـذاك
مــن مــا عـطـاك الله قـلّـط عـشـاهـا
وعليـك باللـي حـزة الضيـق يـفـداك
لا شـانــت الـدنـيـا ودارت رحــاهــا
لا من زهمته لو علـى المـوت لبّـاك
عينـي لجـل عينـك وروحــي فـداهـا
ترى الخوي نبراس روحك وملْجاك
لا كـلّـحــت بـقـعــا وزادت غـثـاهــا
حذراك من بعض المخاليـق حـذراك
بعض العرب مـا تفرقـه مـن نساهـا
تايـه وضـايـع بـيـن ذولا .. وذولاك
فـيــه الجـهـالـة واصـــلٍ منـتـهـاهـا
