M6r -alshehi

[الجلجلي]

السلام عليكم ورحمة الله وبركاته

السلام عليكم ورحمة الله وبركاته

9\5\2010

حبيت أمسي عليكم ..

وبما أني أحب اسم "هيا"...

تذكرت قصيدة الأمير "محسن الهزاني العنزي" أمير منطقة الحريق

في السعودية واللي اسمها "مبسم هيا" ويقول الشاعر:

قـالوا كـذا مـبسم هـيا قلت لا لا
بـين الـبروق وبـين مبسم هيا فرق


ويالله بــنـوٍ مـدلـهم الـخـيالا
طـافح ربـابه مثل شرد المها الزرق


لا جـا عـلى الـبكرين بـنا الحلالا
ولاعـاد لا يفصل رعدها عن البرق


يـسقي غـروسٍ عـقب ماهي همالا
وحـط الحريق ديار الاجواد له طرق


يـسـقي نـعامٍ ثـم يـملا الـهيالا
ويـصبح حـمامه ساجعٍ يلعب الورق


جـريت انـا صوت الهوى باحتمالا
في وسـط بـستانٍ سقاه اربعٍ فرق


طـبّيت مـع فـرعٍ جـديد الـحبالا
وظـهرت مـع فرعٍ تناوح به الورق


روشـن هـيا لـه فـرجتينٍ شـمالا
وبـابٍ على القبله وبابٍ على الشرق


مبسم هـيا لـه بالظلام اشتعالا
بـين البروق وبين مبسم هيا فرق


بـرقٍ تـلالا بـأمر عـز الـجلالا
واثـره جبين صويحبي واحسبه برق


يـا شـبه صـفرا طار عنها الجلالا
طـويلة الـسمحوق تنزح عن الدرق


لـه ريق احـلى من حليب الجزالا
واحلى من السكر الى جاء من الشرق


حـنيت انـا حـنة هـزيل الـجمالا
يـنقض ردي الـخيل قد حسة الفرق


ويــا قـلتةٍ في عـاليات الـجبالا
مـاها قـراح مـير من دونها غرق


مـاعـاد لـلصبيان فـيها احـتمالا
مـن كـود مـرقاها يديهم غدن طرق


قـالوا تتوب من الهوى قلت:- لا لا
الا ان تتوب ارماح علوى عن الزرق


قـالوا تتوب من الهوى قلت:- لا لا
الا ان يـتوبون الحناشل عن السرق


قـالوا تتوب من الهوى قلت:- لا لا
الا ان تتوب الشمس عن مطلع الشرق

 

[الجلجلي]

السلام عليكم ورحمة الله وبركاته

9\5\2010

مساكم ورد يالزعيمين

حبيت أحط أول رسمتين حطيتهم بالبرزة


يعني لهم معزة خاصة بقلبي...

 

[الجلجلي]

السلام عليكم ورحمة الله وبركاته

أمس سرت النادي أسبح بحوض السباحة

لأني كنت من أفضل السباحين بالمنطقة

أسبح 5 كيلو بخمس دقايق حتى مسميني "الطراد"

المهم كان المسؤول عن حوض السباحة واحد مصري

غير الأولي ..الأولي كان اسمه "علاء خميس"

أول مرة أشوف مصري اسمه "خميس" ليكون من ربعنا باااااا

اول ما نطيت بالحوض ويصرخ الكوتش المصري اليديد واسمه "ممدوح عبدالسلام"

لا لا مش كده يا ابني لازم تنط بشكل مستقيم...

أقلو كيف يعني مستقيم؟؟؟

كان يقصد "رواسي"

أقول بنفسي ادمر بختك عني لا ...

هاللزجة شو يابه الحوض اليوم الله يزوله ربشنا

ويوم سبحت حتي كيلو واحد ما قدرت أطوفه شكلي شيبت لا حول ولا قوة الا بالله

وكان المصري محله يشوفني وكأني يالس أسبح بحوض أبوه..

واللي قهرني انه تم يعطيني تعليمات وكأني يديد في هالمجال

ما كأني اعلم عشرة مثله ..

والمصيبة اني ما قدرت أطوف كيلو واحد وهو يطالعني ...لا والله شكلي شيبت....


يقول الشاعر علي الخوار :

يا شيب بي شيبت يا شيب.....شفت الشقا والشعر شابي

أتشفق لشوف الغراشيب...وأتشفق لشمعة شبابي

عشب الحشا عقب المعاشيب...ذاب بشعاع الشمس ذابي

عطشان ويشوف المشاريب.... يا أهل الرشا وين الشرابي؟؟

مشيت في شف الهوا شيب...شبلن وشردت الثيابي

واليوم لا شبلن ولا ذيب...طحت وشقا عمري مشابي

لو بشتكي بشكي على الشيب....من هم شيبي وانتشابي

ليت الشباب يشوف ويشيب...ويرد لي نشوة شبابي

 

[الجلجلي]

السلام عليكم ورحمة الله وبركاته

15\5\2010

مساء الخير والاحساس والطيبة

مساء ما يليق الا بأحبابي ....

أمس مسكتني الشرطة كانت مسوية نقطة تفتيش

ويوم سألني الرقيب عن الليسن ...

رحت أدوره بالسيارة ما حصلته

كنت ناسينه بالبيت..

ويصكني بمخالفة وتضارب وياه في الشارع

قهرني ما عنده سالفة ...

ياخي" جل من لا يسهو "...

يقول معالي "علي بن سالم الكعبي":

للنبض عشره والقلوب اتشاكن
قلبي لـ قلبك يشتكي ضيق واحزان
من غيبتك ضايقت بلاد وماكن
ماكن لي ديره ومسكن وعنوان

أقلامي الجزله عليك اتباكن
من كثر ماخطيت ضلع القلم بان
اخفت شعاع الشمس والجو داكن
شخصي على شوفت محياك ولهان

الناس من حولي كثيرين لكن
وقف على لكن تعرف الذي كان
محد وفى لك مثل قلبي ولكن
كثر الذي كنه من عتاب واشجان

العمر يجري وان سكن فيه ساكن
لا بد مايرحل ورى حدود الازمان
دنياك ماتسوى وكم حي ماكن
فيها تمكن وقد واصبح خبر كان

جرب على كيفك جميع المساكن
مالك سوى قلبي على الارض مسكان
من نبض عشره والقلوب يتشاكن
قلبي لـ قلبك يشتكي ضيق واحزان
من غيبتك ضايق بلاد واماكن
ماكن لي ديره ومسكن وعنوان

 

[الجلجلي]

السلام عليكم ورحمة الله وبركاته

15\5\2010

مساكم الله بالخير

كل واحدن باسمه

اليوم نشيت من الصبح متضايق

ما عرفت وين أسير !!

وامشي أشل السيخ مال الغوص وأشل النظارة

مال الغوص أي(الكشمة مال البحر) وسرت المكان المعتاد

عند الكاسر أدور نغر (حبار) شكيت 3 بس العادة اييب أكثر

شكله ماشي رزق هالأيام....او النغر كان راقد بعدو...أخبرو يقوم من الصبح !!!

نسيت أخبركم ان بن عمي كان معي...

هاذي غنيمة اليوم

وهذي واحدة من الغنائم بعد (ميته وتطشر حبر بعد)

 

[الجلجلي]

السلام عليكم ورحمة الله وبركاته

مرحبا بكم الربع

اسميني متضايق ومتكدر ومهموم

ما بقادر أوصف حالتي موووول


يقول الشاعر "سطام الشلفان":

البال سجن الهم.. و الصبـر حـرًاس===واليوم مثل الأمس.. والأمـس قاسـي

أصبح على هوجاس..وامسي بهوجاس===رآسي وما ادراك باللـي فـي راسـي

اليآس طاغي والامل!! ضـاع فاليـاس===هذا وانا اللي ميزتـي قـو .. باسـي

جالس في وسط الناس.. ماني مع الناس===ربعي و ناسـي كنهـم غيـر ناسـي

يا وجد حالي كـل مـا هـب نسنـاس===ابحـر مـع اهجـوسٍ بليـا مراسـي

مع كل هبًه.. يبتـدي حبـس الانفـاس===واعقد حجاجـي والخفـوق امتناسـي

اللي وهبته حب..وافـراح..و ألمـاس===واسقيـه كاسـي وقـت ذروة يباسـي

كنت آتنومـس فـي محبتـه نومـاس===وكان الوحيـد اللـي بقلبـي اساسـي

شخصٍ حسبته صافي القلـب حسـاس===وظنيت قلبـي طـاح فيـه امتواسـي

واثري انا واحلامـي البيـض يئًـاس===غدره!! غرف قلبي.. و موًت حماسـي

يا هم عينٍ مـا لفـى حولهـا نعـاس===دقـات قلبـي حارمتـنـي نعـاسـي

مغبون.. غبن اكليب من غدر جسـاس===و ازريت اكون بـرد فعلـي سياسـي

ماهيـب والله خفـة القلـب و الـراس===ثقلـي.. يحطـم كـل رقـمٍ قيـاسـي

لكن انا ما نيـب واحـد مـن النـاس===وهذا ماهـو قـدري ولا هـو مقاسـي

واسمي اذا حطوه مـن بيـن الاقـواس===ما هو ترى من صورتـي او لباسـي

باقواس لاني بالشعـر طيـر قرنـاس===ويطيب شعري من بعض طيب رآسـي

و كاني انا اخطيت و امًنت (جسًاس)..===مليون (زيـرٍ) بيـن ربعـي و ناسـي

 

[الجلجلي]

السلام عليكم ورحمة الله وبركاته

20\5\2010

هوما حالكم الربع

ما شي أخبار ماشي علوم؟؟؟

اليوم اتصلت بالكلية عشان اسجل

قالوا لازم تجي بروحك قلت لهم ما أقدر

قالوا اذا ما جيت بروحك ما راح نسجل لك المواد

الا بشرط اذا يبت لنا عذر انك مريض..

قلت ما مشكلة بسير المستشفى وبييب الاجازة المرضية

ويوم سرت المستشفى شفت واحد من الربع من المطاوعة

يعني مطوع ولحيته لي السرة

واول ما شافني سلم ورحب ويقول لي وينك ياريال ما مبين

من سنتين ما شفتك..

وبعدين قال لي سلامات شو مرضك؟؟؟

قلت له ما شر بس ياي اهنيه أخذ اجازة مرضية

واستغرب وقال يعني انت مو بمريض؟؟ قلت له لا

قال يعني تكذب !!! قلت لا ما اكذب بس عشان الكلية

قال "أستغفر الله استغفر الله" يا أخي المسلم الا تعلم ان الكذب حرام

قلت له أدري يا مطوعنا بس انا مجبور

وقال وان يكن فأنت آثم قلبك

قلت لا حول ولا قوة الا بالله ..قلت صلي ع النبي وخلني ادش وآخذ الاجازة

قال لا تعال معي يا أخي نذهب الى المطعم نأكل طعام الفطور(الريوق) وبعدها

ننتظر آذان الظهر لأني احضر لك مفجأة جميلة

سوف نقيم درسا بعد صلاة الظهر عن الفقه في العبادات الاسلامية

وكيفية تطبيقها في الحياة العملية......

وأنا على راسي علامة استفهام كبيرة ووقفت وانا مصدوم ....شو السالفة ؟؟

من وين طلع لي هالمطوع؟؟ وكيف اباخذ الاجازة

حاولت اتشرد منه ما قدرت وفعلا سرنا المطعم نتريق وجوا ربعه المطاوعه

كلهم المطعم كل واحد لحيته واصله كرشه وأنا مستغرب

وبعدها صلينا الظهر وسووا الدرس وانا وياهم وخلصوا الساعة 2 الظهر

يعني ماشي أجازة مرضية...

 

[الجلجلي]

السلام عليكم ورحمة الله وبركاته

مساكم ورد ...

كنت أقلب الأوراق القديمة وحصلت رسمة

رسمتها قبل خمس سنوات ..

يقول الشاعر "سعد بن علوش الهاجري":



الجهل بيني وبينك طايح سوره -

من مر الايام سارت عندنا خبره

الجهل بيني وبينك طايح سوره"

من مر الايام سارت عندنا خبره "

ومدام عينك من الي سار مقصوره "

اجمع شموخك وخفف حدة النظره"

لا تتوجهك الي غيرته الفوره"

اشوف قلبي ليا من مل من صبره "

ياخر مبالات قلبي واول شعوره "

شف لي سنع في غلاك وشوف لي دبره "

خليت نفسي من الايام مقهوره "

وخليت حالي لمن لا يعتبر عبره"

غديت في دنيتك مهدي الثوره "

في روضة اخريم مثل مضيع الابره "

خلصت معاد اقاوم صدك وجوره "

القلب قده بموت وغيبتك قبره "

فراق الي تو تكفى لا يجي دوره"

سرت احسب له وافكر فيه واعتبره "

ماني بناسي هذاك الطيش وغروره "

يومنك اخلفت ظن فيك وش كبره

" واذا انك ناسي انا منسى هاك الصوره "

اكفيت تضحك وانا خصتني العبره "

 

[الجلجلي]

السلام عليكم ورحمة الله وبركاته

26\5\2010

مساكم ورد ياورود

اليوم غير الأمس والأمس قاسي..

تموت المشاعر في زمن غياب المشاعر...

آخر مرة سرت عند يدي

كان مصمخ وساكت أول مرة أشوفه ساكت

حبيت اهرش معاه شوي وسألته..

يدي انت تزوجت يدتي عن حب ولا؟؟

عصب وقال عن قلة الادب يالماصخ

قلت بل هودااا هوووه يدي دوم تعجبه هالسوالف!!!

بعد ذلك سكتت..

وتميت أقلب القنوات وأحصل نانسي عجرم تغني

وأحطها وأشوف يدي يتخيول بطرف عيونه

واونا أقول بنفسي يالعيار ومسوي روحك مطوع بعد هاااا

الله يحفظه لينا تاج فوق روسنا...


يقول الشاعر القطري "محمد بن حمد بن فطيس المري":ماهـو بكفـو الوقـت حبـك يمحّـيـه
ياللي تخـاف صـروف الايـام تمحـاه
ارتـاح ..مـادام المـواصـل يقـوّيـه
انت انت..وانـا انا..وقلبـي هـو ايـاه
حتـى ولـو بتغيـب ذكـراك تكفـيـه
ياواحـدٍ تكفـي عـن النـاس ذكــراه
حبـك علـى رملـة خفوقـي مواطيـه
ورياح عذلي عنـك مـا تمسـح خطـاه
واللي يعـذل القلـب عـن درب غاليـه
الله بمـا يـبـلا الموالـيـف يـبـلاه
اخفيـه يابالفـيـت والـحـال يبـديـه
ادنـاة واحـد ينظـر الحـال يـقـراه
مخفيـه فيـه ومعتنـي ٍ بـه وحاميـه
مـن كـل عيـن ٍ ودهـا تنـزل حمـاه
قلب ٍ يحبـك والهـوى الـذرب ماليـه
كانـك مكذبنـي ؟؟ بعيـنـك تـحـلاه
شـرط ٍ تشوفـك فيـه منـت بحواليـه
ويمكن تشـوف ديـار واماكـن ارعـاه
وبتشوف بـه تمثـال والوقـت هاريـه
وبتشـوف زرع ٍ ميـت وواقـفٍ مـاه
وبتشوف جـرح ٍ فيـه سكيـن راعيـه
راح ونسـى السكيـن والجـرح ينخـاه
وبتشوف حصن ٍ عـج الاقـدار سافيـه
وبتشـوف باقـي بيـت راعيـه خـلاه
لا تنزعـج هـذا خفـوقـي وباقـيـه
ولا تضايـق مـن تـصـدع زوايــاه
قـد زلزلـه فرقـا وهـزت عـراويـه
والله ستـر والحـظ عـانـه وعـافـاه
ابغيـك بـس مـن المفـارق تـداريـه
وازهل مـن يـداري شعـورك ويـدراه
وحلـل وحـرم فيـه يابـرك بـلاويـه
وحلّه وراع رضـاي ورضـاك ورضـاه
جعلك بعد بعض الوجيه ... امحق وجيه
نـاس ٍ مراتعـهـا الرفـيـق بتقـفـاه
انـواع واخطـر نـوع مانـي بناسيـه
نوع ٍ علـى تفريـق الاثنيـن مسعـاه
تلـقـاه دوم وكــل يــوم ٍ تلاقـيـه
والـى بغيتـه صـدق مـا عـاد تلقـاه
ولا انت ردك كـل مـا ادعيـك.. لبيـه
انشهـد ان منتـوا بفيعينـي اشـبـاه
منت بمع العالم ولا تقـول لـي.. ليـه
انت ادرى منـي وش جوابـي وفحـواه
كذيـه... ومـن الله يـازيـن وإلـيـه
واغلا طـروش القلـب ودواه مـن داه
الحلـم ياتيـنـي بـزولـك واراعـيـه
وفـي كـل حلـم اقـوم قبـل اتحفـاه
اعشق سميك فـي البزاريـن وادعيـه
واقبـل خطـاه الـى اخطـا واتلـقـاه
واسمـك يروعنـي الـى مـر طاريـه
واحـب ملقـوف ٍ يسولـف وطــراه
وامـر بيتـك مـن بعيـد ٍ ولا اجـيـه
وانـا لونـه فـي يـدي مـا اتـعـداه
حتى (توايـر) (موتـري) تلتفـت فيـه
تبغي تلـف ويستحـي العقـل والجـاه
وصلك يخيـط الصـدر والبعـد يفريـه
ويابـري حالـي كـان صديـت بريـاه
ويلي علـى ادري حبنـا ويـش تاليـه
وويلي على ادري وش ورى الغيب ويلاه
عشـان اشـوف اذا محبتـك ..ترفيـه
والله لا اقفي عنّـك....... استغفـر الله

 

[الجلجلي]

السلام عليكم ورحمة الله وبركاته

4\6\2010

ياحيهم الربع

اسميني اشتقت للبرزة وللمدونه كنت مشغول وايد بالدراسة

وبأمور الحياة..

أمس في الليل دخلت الصالة وأشوف أخوي الصغير يشوف فلم هندي

سألته شو تطالع ؟؟؟؟

قال فلم "جودا أكبر" انا استغربت !!!!

يا الله يالقديم فلم مال أول ...

المشكلة انه يشوفه للمرة الثالثة

يقول لي ان الفلم رومانسي وايد

اقوله ويش ليك بالرومانسية يالكوز

والله واستويت رومانسي مثل أخوك العود يالطبل!!!!