حـيــــــاتــــي كــتـــــــاب مـفـتـــــــــوح

[السنيورة]

ملاحظة : رجوا زيارة الصفحة السابقة cat




حنين الأيام , عنابة

يسلمو عالمرور والتعليقات الفنتك ^^









البوسنة والهيرسك

اذكر يوم كنت صغيرة ذكرى مأساوية مب حلوة الصراحة
اتذكر كانوا يعرضون في قناة دبي اظني عن مآسي حرب البوسنة والهيرسك.. والشيشان بعد اظني
ما كنت اعرف شو السالفة بس كنت اذكر ان فيه برامج تحط الناس مقتولين ومذبحين وأناشيد حزينة


مثل : يا ايها الأنسان هل .. تبكي لما ابكاني ..


كنت وايد اتألم لهالمناظر بس اكون مصرة واشووف ليييين نهاية البرنامج ..
انا ما كنت عارفة شو السالفة .. ولا نهاية الحرب .. هلا انتهت والا بعدها مستمرة..

والحين صارت قناة دبي الفضاية فقط لبرنامج تااااراااتااااتاااا ... وغني خليجي ..

 

[السنيورة]

أعوذ بالله من الشيطان الرجيم


اليوم الفجر يابت لي أختي ولدها يرقد معاي وفرشت له دوشك تحت ورحت انا رقدت حذالة .. وتم السرير فاضي
والساعة 8 فتحت عيني لأني حسيت بحركة في الغرفة ... شي مب طبيعي ..
كنت احس بيااهل كان فوق السرير الناقز .. وولد أختي حذالي راقد ..
ماشفته شوف العين ... بس كنت اسمع الصوت .. ياااهل يناااقز ويلعب فوق سريري ..

ماتتخيلون شعوري ذيك الساعة ... قعدت اتعوذ من الشيطان بصوت عالي ... وحسيت لساني ثجيييل ...
عقب قمت من مكاني .. كان السرير متعفس .. بس شكلة الحبيب اللي كان يلعب روح ..


حاولت اقنع نفسي انه هالشي حلم .. لأنه اول مرة يصير لي .. واستانست لأني كنت شجاعة هههه
قلت يمكن يكون ياثووم .. بس كيف ياثووم وانا ما حسيت اي شي يضغط علي ولا شي يأذيني
اللهم لساني ثجل من الخوف ..

المهم .. قمت وصليت لي ركعتين ... ورديت ارقد ..

 

[السنيورة]

الجلجلي , شيبه محتشر , ولهانة زايد , الجارح2003

تسلمون عالمرور جميعا ^^




الحمد لله على السلامة

امس وصلت امي من العمرة .. كان البيت كلش مب حلو بدونها ..
وابوي اول مرة اسمعه يعبر عن شعورة لأمي ويقولها البيت مافيه روح وانتي محد .. كشخه رومنسية الشياب هههه
أخوي كان رايح ويا امي ( اللي حصل اللقيطة .. خبرتكم عنه قبل ههه).. وهو بعد كان له وحشة الصراحة ..
واحسدة لأنه راح هاذيج البلادين ... !!!
وهذا هو يسلم عليكم ..
( عيبتني العبارة اللي على ظهرة ):^^:

 

[السنيورة]

ان شاء الله أنجح







توي قبل شوي يايه من درس تعليم السوالقة .. وأحسني اسوق زين .. دامي في سيارة التعليم .. بس يوم أطلع في سيارة أخوي ..
احسني ارتبك واخوي دومه يصرخ علي .. تعالي اهنه .. لفي هناااك .. ويييه وانا اتوتر .. وسيدة ارجع البيت ..
ليش ؟؟ مع اني فسيارة التعليم اسوق عدل .. خخ .. الله يعين شو بسوي يوم بيكون عندي تراي ؟؟
انا اخوي يقعد صوبي ارتبك .. باجر شرطي بيقعد يشوف سواقتي .. احسني بدخلهم فالدكانين ههههcat


على طاري الدكاكين .. وانا اسوق في سيارة التعليم شفنا دكان مكسر .. قالت لي المدربة هذي وحدة تبا تبركن ..
بدل ما تدوس بريك داست عالبتروول .. ودشت في الدكان ... ساااجدة اظني ههههه
اسميني ضحكت .. وعقب قلت ما بضحك عليها .. ما من زين سواقتي الحين ..

وادعو لي انجح ..
^^

 

[السنيورة]

كل الشكر لـــ

رفيع الشان , درع القبيلة , الجلجلي , شيبه محتشر, عنابة , الجارح2003

لزيارتهم مدونتي المتواضعة ..


ييت بكحلها عميتها


انا اليوم متضايجة من الخاطر وحاسة بالذنب ..
ماادري اخبركم بالسالفة والا ما اخبركم .. بس والله ضيق الصراحة .. مب شي يوم تسوي شي والناس يفهمونك غلط
وتصير نتائج مؤسفة .. والسبب انت .. وانت اصلا مب قاصد اللي استوى ..

والله مأساة ..
السالفة ومافيها اني استغربت من وحدة من اهلي يوم شفتها تهزب وامها وتنازعها جدامنا ..
انا اعرفانها ماتحترم امها .. بس ذاك اليوم يوم كنت موجودة .. كانت امها ترمسنا وهي ترد عليها وتقول لها : هاه شو قلتي ؟؟ ( وكانت معصبة ماادري ليش )
امها تقول لها : ماقلت شي .. ترد على امها .. انتي محد يقعد وياج اصلا ..
والأم ياحليلها متفشلة منا .. حتى مب قادرة تحط عينها في عيونا ..
انا ما سويت شي ساعتها .. بس سألت خواتها أن اختهم ليش جي تعامل امهم ؟؟ وانا اللي هي مب امي بس ما تهون علي اكلمها جي ..
استغربوا وقالوا لي اقول لهم كل اللي صار !!
وانا من ناحيتي قلت الصراحة .. خل يأدبونها شوي ..

وبعدين عرفت انهم هلكوها من الضرب .. وهي تصارخ .. ذبحوها ذباااح ..
يوم عرفت ان جي صار ... تميت اصيح .. وحسيت بالذنب .. وما نمت الليل ..
واليوم الصبح قلت لها اني انا اللي خبرت خواتها , لأني تضايقت من اسلوبها ويا امها .. بس ماكان قصدي يضربونها وجي

والغريبة انها كانت مب زعلانة مني .. وقالت لي انها تستاهل اللي صار ..
والغريبة انها كانت من سنة وشوية ما تكلم اخوانها .. والبارحة يوم ضربوها .. تصالحوا وخبوا خشوم بعض ..
وعم السلام في المنزله منزلهم السعيد ههه.. البنت مب زعلانة مني .. والكل يشكرني عاللي سويته
بس بعده قلبي مقبوض .. ما ادري ليش

اووووف

 

[السنيورة]

الشكر واجب لكل من

عنابة , شيبه محتشر , قلبي ّ وردي ّ . .


استعدي ايتها الشوارع
فالسنيورة قاااااادمة

اقسم بالله بطيييير من الفرحة .. اقول لكم نجحت فالتراي ومن اول مرة .. عشان تعرفون الخبرة والحكمة والرزانة والصلابة السؤدد خخخ
اللي وياي كانت وايد واثقة ياحليلها لكنها رسبت لأنها بغت تشل لها نسيان هههه
ترى كل شي جايز وما تعرفون شو بيصير حزتها ..

بس شي غريب لاحظته في مركز الشرطة ..
ان الشرطة يبركنون في الموقف الخاص للمعاقين:212: .. شرطي حد يقدر يخالفة ؟؟؟ لأ طبعا
حاميها حراميها ...

عالعموم .. انا الحين مستانسة .. رجاءا محد يعكر علي فرحني خخخ:yaw:

 

[السنيورة]

أول شحفة



ياااربييي توي ماخذه الليسن .. ومن أولها اشحف الإيدار خخخخ
والله نكته ..

هذي عينكم اصلا .. والا انا سويقة ماشاء الله علي .
بس ما ادري متغيرة علي السيارة والأبعاد عندي مش مضبوطة

وياحليلها السيارة .. تعورت شوية ..
حصلت لي هزبتين .. ونزلت دمعتين ..
وفريت الليسن .. ( اسوي اكشن )
كسرت خاطرهم
بس صدق اعتصر قلبي عالسيارة .. كلة ولا ألتيمتي المتواضعه ههه

وهذي الشحفة الله يسلمكم

 

[السنيورة]

شكر حااار لزوار المدونة :

¢.ṽ.ţ , الجلجلي ,شيبه محتشر ,عطرالاماكن ,أنا و قـلبي





وين ساااار ؟؟

مبروك عليكم الشهر .. مع انها متأخرة وايد ههه
بس اليوم صار موقف حبيت احطه فالمدونة

اليوم كنا كلنا متجمعين قبل الفطور بشوي .. اللي يسولف واللي يحط الأكل واللي متسدح وجي
ويوم أذن درنا كلنا عالأكل .. وبعد ما ترسنا البطوون تصددنا يمين ويسار الا أخوي يسوف محد ..
ترييناه يمكن في الحمام والا شي بس ما مبين ..
ابوي يقول يمكن حد عازمنه عالفطور .. بس هو مايروح مكان الا لازم يخبرنا ..
وتمينا كلنا نحاتي .. وين سااار .. والأدهى والأمر ان مبايله كان مسروق وتام بدون موبايل ..

المهم .. ترسنا بطونا .. وصلينا .. وقعدنا نشرب جاي ونشوف شعبية الكرتون .. والأخ ما بين ..
وكلنا متحرقصين ونطالع بعض بس محد يرمس هههه
وفجأة انفجر أبوي وعصب وقالم يتوعد له .. كيف يطلع جي بدون ما يخبرنا ..
وأمي الوساوس تمت تلعب براسها لعب ..
ونحن زيغانين ..

وفي هذي الأثناء دخل علينا يوسف ..
والكل سأله مرة وحدة .. وين كنت ؟؟؟

وهو رد علينا بسؤال .. وقال ..

فطرتوا عني ؟؟ أذن المغرب ؟؟

طلع الأخ راقد ونحن ما عندنا خبر ..
فاتتكم نظرته وهو يطالعنا ..

انا اول وحدة انفجرت من الضحك .. ومحد ضحك غيري ما ادري ليش ههه

 

[السنيورة]

الأبو .. كلمة تخوفني .. لأن ابوي يخوفني ..

دايما اقول يوم بعرس .. بخلي عيالي يموتون على ابوهم .. ويتعلقون فيه ويحبونه

ما يتشاردون اذا دخل عليهم ..

ولا يخافون يصارخ عليهم بس لأنهم يهال ويلعبون ..

ولا يخافون يقولون له ابوي نحن بخاطرنا نشتري الشي الفلاني .. ويشوفون نظرة غضب فعيونه ..

ولا اشوفهم فيوم من الأيام مب قادرين يحطون عينهم بعينه ..

ولا يخالفون له أمر حتى لو كان غلط ..

وما يحسون باللي احسه انا الحين ..

 

[السنيورة]

^^عيدكم مبارك ^^


اليوم حطيت موضوع في قسم الشعر ..
من زماااااااان ما كتبت ولا خربشت خخخ

القصيدة تقول :


ذبلت وماتت فرحة أعيادي ** وشلون أفرح واسعد بعيدي
ابـتـسـم بـس الـحزن بـادي ** يـوم اسـلـم تـرتـجـف إيـدي
هم اندفن في داخل فـؤادي ** ما دروا اهلـي ومسـانـيـدي
الناس تفرح يوم الأعيادي ** وانـا فـقـلـبـي جرح ياسيـدي
يجرحوا وأقول لهم عادي ** يتحسبوا لي قلب (ن) حديدي
يــالله يـــا رب الـعــبـــادي ** جـد طـلـبـتـك تـاخــذ بــإيــدي


http://www.alshohooh.ws/vb/showthread.php?p=1839856#post1839856