حـيــــــاتــــي كــتـــــــاب مـفـتـــــــــوح

[السنيورة]

ملاحظة : رجوا زيارة الصفحة السابقة cat





تصفيق لكلن من :

همس النجوم , جدايـــــل , زيتونة(><) , سطام بن زيد , شيبه محتشر , أنا و قـلبي , الصيـاد , عنابة , ●ْ~ هذا انـا ~ْ●

على زيارتهم للمدونه ^^




الأعـــــــصـــــــــــار

بديت مدونتي بأعصاار جونو ... والله يستر من الأعصار الياي ..
الحمد لله يقولون انه خفيف ومب شرات جونو يعني ..
بس عندنا الغيوم تزيغ ... الجووو مخيف والسما سودا ...
الله يعين اهل عمان .. والله يعينا نحن لأنا ييرانهم ^^


أبوي متعود كل يوم يطلع البحر ... كلللل يووووم .. الله لحفظه ..
والحين الشرطة مانعه الصيادين يطلعون ... وابوي مقهووور ..
كله ولا البحر عنده ... خخخ


والحين كلنا نتريا يطووف هالأعصار بهدوء ..
مع ان اسمه اعصار فكيف بيمر بهدوء .. خبروني بالله عليكم ..


واذا ما شفتوني ادخل اسئلوا عني يمكن شلنا الاعصار هههه

 

[السنيورة]

الأعـــــــصـــــــــــار (2)


أخبار اليوم

البحر طلع والشرطة مسكرة الشوارع ..
حتى الفجيرة ما تقدر نروح .. الدرب مسكر ..
والشرطة طواري يا حليلهم ..
وكني اشوف جماعه الكوارث ما اعرف شو يسموهم .. يايين من الشارجة ..
وتلفزيون الشارجة يصور .. وكني اشوف قناة الظفرة بعد متواجدين ..

والحين الجو مغيم والنفاف خفيف ... الجو روعة
بس الطلعه كلش مب شي ... زحمة والشوارع مسكرة ..


هذي الأخبار حاليا
معكم مراسلتكم
السنيورة
قناة البرزة
كلباء

 

[السنيورة]

أغراض العيد



هذي كندورتي زاهبه خخخ









عمتي الله يذكرها بالخير دوم يوم نطري لها العيد تقول ..

العيد لا يانا ولا مر .. حشى ولا بالعين ريناه
العيد غرب ساحل البر .. صوب الذي زاهي بحناه

ههههه







وتعظيم سلام لكل من زار المدونه

شحي عز وفخر , رونق العين~~}.. , شيبه محتشر , عنابة , زيتونة(><) , حنين الأيام , الجارح2003
:yaw:

 

[السنيورة]

الكل مستغريبن مني لأني مخلصه ملابس العيد من الحين .. :h_afaker:
الحين شهر 6 و 7 الحين الناس يفصلون ... و 8 بيكون رمضان .. يعني شهر عباده مافيه سوووق ..



وانا متعقدة من سالفة الثياب خخخ

العيد اللي طاف .. يا العيد وثيابي مب زاهبه .... تتخيلون ؟؟؟ :hm00mm:
الدمعة على وشكك الزول ... واشتريت وحدة زاهبه .. والمشكلة انها طويله والخياط مب راضي يقصرها ...


مأساه ..

والعيد اللي قبلة .. الخياط بعده يخيط الكندورة .. والناس بيصبحون معيدين وانا اترياه يخلص حاظرته .. :cry:
والحمد لله خلصها .. بس ما لحقت اغسلها ... مشيت حالي ...

بس الفاجعة الكبرى .. يوم لبستها .. شفتها مخيوطه اي كلام .. يعني من صوب قصير و الصوب الثاني طويل ..
ياخساااااااارة الخوااااااااااار ...


الحيييين تووووووووووبه تووووووبه ..
اتزهب للعيد قبل العالم .. عسب ما تصير هالمأسي .. :eeek:

 

[السنيورة]

تصفيق حاااااااااااااار لزوار المدونه

شيبه محتشر , أنا و قـلبي , عنابة , الجلجلي ,جدايـــــل



مســلســل تـــاريـــخــــي + هــنــــــدي

اليوم حلمت اني اجهز أحتفاااااال كبير .. لملك بلاد السند والهند ...
أعلق أعلام .. واجهز اللباس للجاريات هههه
ويوم وصل الملك .. اختبصت الحفلة وما صارت على مزاجي ..
وعصب الملك اونه وقام يشخط في هذا وينازع هذا ..
المشكله ان ملك بلاد الهند والسند يرمس مواطن .. كيف ما ادري .. حلم حلم خخخ
المهم دخلت انا وقعدت اغني للملك .. تشقق وقعد يسمعني .. اونه اعجب فيني هههه
ما من زين الصوت !!! هههههههههههه
وهو اللي ما يستحي ما يعرف إنا بنات ناس وحمايل ؟؟
ملك أخر زمن .. هههه

 

[السنيورة]

رسووووم اليوووم


تدرون .. اول كنت قول اني مستحيل اشوف الرسوم اليديده .. لأني احس انها تافهه وماتستاهل حد يشوفها
بس اول ما شفت حلقة من رسوم ( سبونج بوب سكوير بانس )





مت من الضحك .. وعيبني .. وتميت ما افوت حلقه ..
شو نسوي رديت لأيام الطفوله ..

اللي يتابعه يقول لي فالتقاااييم خخخ

 

[السنيورة]

هلا والله باللي ما يفتقدوني :h_kaak:
خخخ



سبب انشغالي

الله يسلمكم هالأسبوع كان عندنا عرس ولد خالي .. وكنا مربوشين من الخاطر ..
عاد هالانسان رفيق العمر .. كنا نلعب و نذاكر مع بعض.. وحتى يوم كبرنا .. كنا مثل أخوان ..
وكان عرسه وناسه .. والله يديم عليهم السعادة قولوا آمين ..
كان عرسه فرحه فرحه عجيبة .. :m_razfah:





معلومة خطيرة

امس ولد عمتي قال لنا ان يدت ابوي شحية خخخ
وعاد انا ما صدقت خبر .. سيدة سألت ابوي وأكد لي المعلومه ..
وانا اقول ليش احب المنتدى !!! طلع العرق دساس خخخ

 

[السنيورة]

كــفـــايــــة أنـــانـــيـــة



امس مر علي موقف شغل لي بالي ...
ياهل امه تنزل من السيارة .. وهو ماسكنها وما يباها تنزل .. لأنه يبا يتم عند أبوه .. وفي نفس الوقت يبا يتم وياها ..
وياحليله محتار مع منو يتم .. ويالس يمط عباة امه عشان تقعد عند الأبو ويرتاح هو من هالتعذيب ..

موقف يضحك الصراحة .. والكل ضحك عليه .. بس بعد هالموقف قعدت أفكر ..
شو شعور الياهل لما يتطلق الأم والأبو ؟؟ وكل واحد يروح في درب ..!!!
أكيد هالشي يأثر في نفسيته وشخصيته بعد ..
ويخلي الياهل محتار

الياهل محتاج لحنان الأم .. وأمان الأبو في نفس الوقت ..
ولو فقد واحد من الأثنين .. محد يعلم بشعور الطفل ألا هو ...

وتشوفون لو يات الظروف وسمحت للأم والأبو انهم يتقابلون ولو بالصدفه في مكان ما
شو تتخيلون شعور ولدهم ..؟؟؟
والله احسه من الفرحه ما بيرقد الليل ..

الله يبعد الطلاق عن كل المسلمين
ويرد كل أبو لحرمته ... وكل حرمه لريلها
ترى اليهال يستاهلون الواحد يصبر لو شوية عشانهم

وكفايه انانية

 

[السنيورة]

هلا والله ..
من زمان ما شكرت زوار المدونة .. سامحوني مشاغل .. والشكر واجب علينا .. افا عليكم انتوا بس ...

شكر حار جدا لكلن من :

أنا و قـلبي , دلوعة الوصل , سحروتـــه , الصيـاد, عنابة , حنين الأيام , شيبه محتشر , غياهيب ,


الــلــقــيــطـــة

الأسبوع اللي طاف كان اخوي اللي صف اول ثنوي .. طالع يصلي الفير مع ولد جيرانا ..
وهم رايحين المسيد يسمعون صياح ياهل صوب الزبالة .. ويوم تقربوا شافوا ياهل مفرور في كيس .. تتخيلووون ؟؟
يقول ان كان شكله مقرف ... يعني الحبل السري موجود مكانه و والدم والوصخ والياهل يصيح ياحليله ..

والشبيبه بهتوا ما عرفوا شو يسوون .. وعلى طول اتصلوا بالشرطة
يقول اخوي تموا عن الياهل لين ايون الشرطة وفي هذي الأثناء كانت سيارة تحوم حوليهم تروح وترجع صوب هالزبالة.. يراقبون الوضع يعني ..
اعووذ بالله .. قلوب من حديد ؟؟ ناس تتمنى الياهل وناس تفره في الزبالة ؟؟
ما فكرتوا بهالموقف قبل لا ترتكبون جرايمكم ويقص عليكم الشيطان الله يلعنه ...

المهم يوا الشرطة وأخوي ما قصر خبرهم عن السيارة اللي تحوم وعطاهم الرقم بعد ..
وشلوا اخوي المركز ياخذون أقواله ... وقالوا له ان بيسموون الياهل على اسمه .. يوسف خخخخ

بس للأسف طلعت بنت .. قالوا بيسمونها مريم ..
وعقب حطوا هالبنت في الجرايد وأظني في قناة دبي والا سما دبي ..
وعقبها طلبوها مركز الرعاية في بوظبي .. هم بيربونها وبتعيش مع اللقطاء ..

اخس الله امها وابوها ..
يتحرون المساله عدت على خير ..
لكن رب العالمين فوق ..

 

[السنيورة]

السنيورة
(عضو موقوف )



فجأة اول ما دخلت البرزة .. أكتشفت اني عضو موقووف .. ليييييش انا شو سويت ؟؟
زعللللللت ... اشوف الأعضاء يشاركون ومستانسين .. وانا عضو موقوف ؟؟
اصلا انا صايره ما يخصني بحد .. وفحالي .. ما غلط علي حد ولا شي ..
ولا سويت شي ضد قوانين البرزة ..
وعلى طول اتصلت لعنابة .. اخبرها .. هي بروحها سألتني .. ليش موقفينج ؟؟
قلت لها والله يا عنابة ما ادري ..
وفجأة فجأة وبدون سايق انذااااااااااار

قمت من الحلم خخخخخ


البرزة حتى لاحقتني في أحلامي .. من زود الحب هههه
وعدا الحلم على خييييييير ^^