حـيــــــاتــــي كــتـــــــاب مـفـتـــــــــوح

[السنيورة]

( رفيع الشان ) x( السنيورة)

دوومي أقول ان الشعر أكتبه فضفضه ... محاولات شعرية
وأحس ان رفيع الشان ندم انه اختارني للمناظرة ... لأنه يعلق على اسلوبي وشعري وانه مب بالمستوى المطلوب

الظاهر انا راح ننهي المناظره ونفتك:a050:
مب زعلانه لكني حزينه شوي ^^



خلني أكلمكم عن العيد

أول يوم عيد موول ولا كنه عيد .. محد يانا موول ( الا كمن عيله بس ) ..
وانا من ناحيتي مارحت لحد ..

ثاني يوم يونا أهلنا من عيمان ... ماشاء الله كانوا وايدييين ونحن مسوين لهم مالح وسمك مشوي ( لأنهم يموتون عليه شبعانين من اللحم )
وقعدنا واستانسنا مع بعض ..

ثالث أيام العيد تعبت عمتي ووديناها المستشفى .. وقالوا فيها التهاب بالصدر ولازم ينومونها بالمستشفى 5 أيااام ..

وهذا العييد .. مافيه شي يديد


فضيحه

والله توي ادري ان شارون لقعة الله عليه .. مااات !!!!
متى مات حسبي الله عليه !!!!
الله لايرحمه ولا يسامحه لا دنيا ولا آخرة .!!!

 

[السنيورة]

هنوني هنووني ... ياناااس هنووني ...
حبيبي راجع لي ... وتفرح عيووني ...

احم احم

شحالكم شخباركم ؟؟ والله هالمدونة لها وحشه ما تتخيلون كيف !!
خلني بدردش شوي وأقول لكم شو أسوي من اصبح لييين أنام .. !!

(الصبح )
أقوم الساعة 10 ونص ..
اشرب لي كوب حليب ..
وآكل بيضة ..
وأقعد أفرفر فالتلفزيون اشوف صباح الخير يا عرب والا اي شي ثاني ..
اتينا جارتنا أحيانا ونقعد نتفاول لين يأذن الظهر


( الظهر )
اقوم أصلي وعقب أحط قناة نور دبي وأشوف ام حسن شو مسوية عالغدا ههه
وعقب اقعد (عاللاب توب) والا اقعد العب (بالبلي ستيشن) او اقرى السوالف اللي يطرشونها عالـ ( بلاك بيري )
أتغدى و أتم أقلب القنوات وأغفل شوي ..


( العصر )
اقوم أصلي .. وافتح خزنة الحلاوة واطلع فالحوش مع اليهال اشوفهم وهم يلعبون ..
واقعد أسقي الزرااعه ههههه

( المغرب )
اصلي وأقعد عاللاب توب شوية .. عاد ماتهون علي البرزة ما أطل عليها ..
ونقعد نسولف ..

( العشى)
اصلي العشى واطلع اروح السوق ..والا عيادة والا خياط .. والا نطلع عالبحر والا نتفرفر فالشوارع
نغير جو عن حبست البيت ...
وأتصل البيت اشوف شو العشى .. اذا ما يعجبني .. ناخذ لنا بيتزا .. والا شاورما والا اي شي .. ونرجع البيت ..
والساعة 10 يحطون مسلسل مهند .. ( العشق الممنوع ) حلوة القصة عسب جي تابعته مب عشان مهند هههه
وبعد ما يخلص ابند الليتات وأحط لي فلم رعب .. اشوفه وارقد ...


وهالشي يتكرر يوميا تقريبا ..

وعلى هالحااااااااااااالة ..

 

[السنيورة]

تعالوا ما رمستكم عن يوم الأتحاد

قررت اروح الروضة لأن بنت اختي مشتركه معاهم بالحفلة
وهذي هي تيموه ربييحفظها



وعبود بعد لبسناه مع انه مايخصه بالحفلة ولا بالروضة




وعلاوي كذلك .. مايستوي مايحتفل معانا




واستانسوا اليهال واستانسنا معاهم ...
بس مامشينا في المسيره ..


واحد من اهلنا من الخور كان يمشي في المسيرة وشاف واحد قطري يمشي في المسيرة وياهم ..
وهذي سيارة
( اقروا العبارة المكتوبه .. وناسه والله )



كشخة لاه ..

 

[السنيورة]

(1)
البارحة تغديت صالونه سمك + نغر مقلي
وأول مرة أحب النغرر .. حسيت انه لذيذ .. وطحت فيه طيح ..
والحين كل يوم اشتهي نغر عالغدا ههه يم يم
وما لحقت اصور حتى كله فالبطن .. ^^


(2)
البارحة العصر سرت صوب شجرة الهمبا مالنا ..
ماشال الله الحين ثامرة .. وبناكل حدااااااااال حااااااامض ههه




ما بعطيكم لا تحاولون ههه



(3)
استانست وايد يوم شفت ( ريمان ) مشاركة عندنا فالبرزة ..
وقمت عاد اتذكر المواقف اللي كانت تصير لنا فالجامعة ..






أذكر مرة كنا رادين من المطعم وسايرين الجناح ..
ونحن أصلا فالدور الثالث .. قامت ( ريمان ) النذلة وضغطت عالدور الثاني
وانا وعنابه ماعندنا خبر .. نسولف ومندمجين
وأول مافتح المصعد .. عالدور الثاني رحنااااا ركيييييض ودخلنا الجناااح ..
ونحن نصرخ ونتدازز .. ويوم وصلنا نص الجناج عاد عقب ردت فينا الحاسية ..

هذا مب جناحنا !! هذولي مب ربعنا !! وين ريمان والربع !! ؟؟؟
عاد عقب عرفنا انها حركة نذالة مسوينها فينا .. ونحن على نياتنا ياحليلنا

عاد بلعنا لسانا وطلعنا من الجناح بهدوووء تاااام وقفطه مالها مثيل ههههه
ورحنا صوب جناحنا .. ونحن نتوعد لريمان نردها لها فيوم من الأياام هههه

والله كانت أياام حلوة ^^

 

[السنيورة]

السلام عليكم ورحمة الله ...
وحشتني المدونه ووحشتني البرزة بناسها .. ^^

الله يسلمكم كنت مربوشه .. الأسبوع اللي طاف كانت ملجة أختي ..
واستانسنا وااايد الصراحة ..:yaw:
يوم كنت اشوفها مستانسه بالفستان والبنات مستانسين حوليها .. والله اتيني صيحه ..
بس أحاول ما ابين لها .. لكن فآخر الحفلة مارمنا نمسك بعض نحن الثنتين وتحاضنا وتمينا تصيح ههه
فديت اختي الصغيرة .. والله كبرت وشفناها عروووس ^^

خلونا من أجواء العرس وبخبركم عن سالفة صارت لي ..


مافيه شي بعيد عن الله

فيه شخص قريب مني وغالي علي .. شخصيته حلوة وعقل وثقل و يساعد الناس ويتصدق ويزور كبار السن والعيلة كلها تحبة ..
لكن مع هذا كله فيه شي واحد مب زين انه كان ما يصلي

كنت وايد أنصحه واحن فوق راسه .. لين حسيته انه بدا يبتعد عني ويتحاشى يقعد معاي ..
فقمت اسكت عنه .. ولا اييب طاري الصلاة .. بس يوم كان يأذن اقوم اصلي .. وأحسه يستحي على ويهه ..
مع ذلك كان يحطي راسه وينام ..
ما يصلي الا الجمعة .. وانا خلاص فقدت الأمل فيه .. مب بس انا .. العيلة بكبرها ..

وفي يوم من الأيام سمعت شريط لنبيل العوضي وهو يحكي قصة بنت ريلها مايصلي وكانت تدعي له ويوم سمعها تدعي له لان قلبه وقام يصلي ..

المهم انا قمت ادعي له وتبون الصدق كنت أدعي وانا اقول فخاطري احس انه ما بيتغير لكني بعدي له عسى الله يستجيب الدعاء ..

وقول الصدق أحسن .. اني ما دعيت له الا ليله وحدة بس ..

مر اسبوع وفاجأني انه يبا يروح العمره مع ربعه .. في الويك ايند بس ..
فلت له انت اول مرة تسير العمره لازم تتم هناك عالأقل اسبوع عسب تشبع من الجو الروحاني فالحرم وجي ..
لكنه ماسمع كلامي .. كأنه رايح يشوف الكعبة ويرجع بس ..

المهم راح الخميس ورد يوم السبت .. لكن شو صااار ؟؟
دخل علي وويهه وقااار ما شفته من قبل .. وحبني على راسي ..
وقام يضبط المنبة على صلاة الفجر كل يوم .. وصار يقوم قبلي ويقومني ..

يا سبحانك يا رب ..
انا دعيت له بالهدايه مرة وحدة .. وهو زار الحرم يوم واحد .. لكن الرهبة رب العالمين دخلت قلبه وصار انسان رائع الصراحة ..

واللحية طالعه عليه وااااو هههههه

حبيبي يا ربي .. لك الحمد والشكر الف مرة .. فديت ويهك
يارب تهديني وتهدي جميع المسلمين يا رب العالمين

 

[السنيورة]

يالهوي .. يالهوي

همتني مدونتي الصراحه ههه:cry:

والله تبون الصدق ماعندي شي اقوله بس ابي ارفع المدونه :yaw:
لالا ابا اقول لكم انكم وحشتوني طوول هالفترة اللي ما دخلت فيها البرزة
ولكم وحشه قاااااااااااااااااااااد الدنيا

________________________

يخطر على بالي سؤال غبي لكن فعلا سؤال يحير ..

كيف العقل .. تتخزن فيه العواطف ؟؟
يعني العقل شي جامد .. نمسكه بايدنا .. كيف يفكر ويحب ويكره ..؟؟
سبحان الله ..
بس تعالوا الحب فالعقل والا فالقلب ؟؟
واذا فالقلب ..!! كيف القلب يحب ويكره ؟؟

بلاني انا اليوم محششه ؟؟ هههههههه:syad:

بروح انام وايد احسن وابرك خخخ

 

[السنيورة]

مستانسه حدي

البارحه كنت البس بروح عرس أخو وحدة من ربيعاتي
لكن وحزت ما كنت بطلع عطيت الشغالة تكوي الشيله عالسريع
وشوفوا شو سوت :h_yalahwy




الحلوة حرقت لي الشيلة .. وكنت مستانسه وعكرت مزاجي ..
وكسرت خاطري قامت تصيح :g_hmm:
المشكلة منبها عليها الف مرة ..تتأكد ان الكوايه حرارتها معتدلة ..
لكن يقول المثل : علم فالمتبلم .. يصبح ناسي
المهم طنشت السالفة وتعوذت من الشيطان ولبست عباة غيرها وانطلقنا

ويوم وصلنا شفت ربيعاتي وستانست وااااااااايد
رديت 5 سنين لورى .. :h_ttmasha

ويوم طلعنا من العرس مرينا هني


انا كنت متعشية بس اللي عندي مب متعشين :Faces:

وردينا البييييييييييت :yaw:


حدث مهم صح ههههه
عاادي بالنسة احلى حدث
فديت اللي شفتهم والله:ah:

 

[السنيورة]

فيه تطور

امس الصراحه حسيت بالمسؤولية << اول مرة خخ

ياييبين شغاله يديدة ومحد فاضي يوديها تفحص فالمستشفى ..
وانا دقيت الصدر وقلت انا بوديها ..
واسميني دخت السبع دوخات
اوراق وملفات وفحوصات وطفره الصراحة ..
ويوم خلصنا وطلعنا .. اوني الحين شخصية اول مرة اسوي شي منه فايده ههه
تحمست وحلفت الا ارد البيت وامشي بالشارع العام << من زمان اسوق وما اروح الشارع العام .. مب خوف لالا مالي مزاج خخخخ
واقول لكم مشيت عالشارع العام وانا رافعه الخشم اوني مسويه انجاز يعني ( ريمانه اذا كنتي تدخلين المدونه من وراي لاتضحكين رجاءا ) ههههه


البارحه تغدينا مشوي قباب .. وابوي من حطوا الغدا لين شالوه وهو يتغزل فالقبابه هههه
بس مشويه بطريقه عجيبة ولذيذه كنت ناويه اصورها لكن نسيت .. اليوع كافر هههه

 

[السنيورة]

اول ما تعرفت على ربيعاتي وكانوا يرمسون شحي ..
كنت احس اني في متاهه صعب اطلع منها ههه
كله قاف وراء .. لا والراء يدلعونها بعد ههه
المهم الحين الحمد لله
صرت اعرف اغلب المصطلحات وارمس شراتهم بالعكس وناسه
الا الراء مب راضيه تضبط عندي ههه

وعاد قولوا شومناسبه هالرمسه اليووم ؟؟خخ
تم ادراج كلمة جديدة للقائمة
الا وهي

يــحــيـــق


لقطتها من ريمانه اليوم هههه
ويوم سألتاه شو يعني تمت سنة لين وصلت لي المعلومه .. يعني يحفر ويصيح ويل على قولتهم هههه

على فكرة فيه مصطلحات شحية يوم ادقق فيها اكشف انها لغة عربية بحته
بغض النظر عن يحيق هههه


وبس

 

[السنيورة]

مراحب ..

انا يوعانه ابا اتغدى ياخي ... بس كلهم تغدوو ووانا ما اعرف اتغدى بروحي ..
مسوين صالونه لحم .. شكلها لذيذه ..
احسني وايد ارمس عن الاكل خخ

المهم


بالجمعه سرنا زيارات عائليه .. ومرينا صوب البحر ..
لااااازم نلز صوب البحر شوي .. ما نعرف نعديها بسلام ههه







وهني الجماعه .. متانسين عالموووي
وهزاع ولد اختي منخش .. يخاف من البحر ههه
اما عبود بطل خخ







وبعدين زاد الحماس






وهالشي الغريب كان على كبر السيفه





وهني واقفين عند كنتاكي
حد يروح كنتاكي العصر ؟؟
لكن الشبيبة يوعانين ماشي طاقه ههه









وبالليل كانت عندنا مناسبة سعيدة ..
مع اني ما احب اروح عرووس لكن ما اروح الا الغالين علي ويا مكثرهم ههه


بس بس تعبت وايد يعرسون ..
محد يخطب ولا حد يملج ولا حد يعرس ..
تعبنا الصراحه عطونا بريك هههه










اتريااا شخص مغصص بي ورافع ضغطي ...
ابااااااا اعتررررررررررررف له بشيييييييي ههههه
مب حلو يوم تتريا
والله الوقت يمشي بطيييي بطيييي والقهر يوم محد حاس فيك ..

وايد ارمس أدري محد فاهم شي
بس شو نسوي ..
اسمها مدونه .. لازم ندون الأحاسيس :

وسلامتكم