✨قصيدة تعبر عن نفسها ✨
مـا روم اجـاري ضابط مـرور
متخـصص بنصـب الـرادارات
بــداخــله بـركـان و يثــور
فــوق الكـواكــب والمجـرات
وان جيـت لـه بـالشعر دستـور
يمشي علـى كـل المـسـارات
وان دار لـه بالـراس زاغـــور
يغــرف مـن بحـور ومحيطـات
حـامـل رادار متحــرك يــدور
كنـه بحـرب يشــن غــارات
يـاخـذ الصـوره بفـن محضور
الشعـب منـه يصيـح ويـلات
شبـابنـا ع الكـاش مــجبور
ولا تنقبـل مـنهـم الـشيكـات
تأمين مـع تسجيــل وأمـور
والـرقم يشـرى م المـزادات
شيـاً ظهرتـه وشـي مستـور
ما ينحصـر فـاق الحسـابات
البـارحـه مـع جمـع جمهـور
صدفـه صدفته صـالح بالـذات
نـاصب راداره بعالي السـور
بيــن الشــوارع والمسـارات
مـادري بأمـره والا مـأمـور
يصطـادنـا بـوقـت الصـلاوات
يـابوعبـدالله طيعني الشـور
والله عفى عــن الـذي فــات
تـرى الأوادم عـانت الجــور
يـدعـو عـليك سـاده وسيـدات
سم الافـاعي داخل الـجحـور
يصيـب لـو مـن غيـر لدغــات
خـايف عليك والـزمـن يـدور
تلحقك مـن العيـون نظــرات
الله يحفظك من كـل لشـرور
وتعيـش بالدنيــا شـراغات
المسـامحه ان ياكــم قصــور
منــك العـذر بنظـم الابيــات
اخوك الشاعر /
عبدالله محمد الخنبـولـي ( بوجمال )
✨ حي الكتاب ✨
حي الكتاب وحي لسطور
من شاعر جزل ف الابيات
يامرحبا ما ناحت طيور
علي غصون الورد ساعات
حبيت أوضح بعض لامور
وأبين اشياء خفيات
الشارع عند الرمس مخطور
ياكم راحت به وفيات
الناس تسرع به لا شعور
وتصيح تالي الليل ويلات
وبعض الشباب يلف ويدور
يحوط لا يقيل ولا يبات
من شهر واحد طاح بالخور
غط ف البحر مابين مايات
وواحد تكسر داعم السور
مسرع ولا يترك مسافات
كم من شباب تحت لقبور
تمت لهم بالقلب حسرات
أحط لهم رادار مجبور
ماهو قصد حق جمع بيزات
للسرعه قانون ودستور
لوحات ورموز وعلامات
ياناس يا عالم ياجمهور
مانبغي حد يزيد سرعات
تأنا وخل الحال مستور
والشرطه تبغي لك سلامات
ويا بوجمال مشكور مشكور
يحفظك ربي كل لوقات
وأبشرك يابولي بلستور
كمرات تضبط ع الاشارات
بالدور بتتركب وبالدور
تضبط علي كل إتجاهات
الشاعر / صالح عبدالله الحصن الشحي
13/10/2015
✨✨✨
