مدرسة المشاغبيــن

[الساحق الخاطف]

مشاركة: مدرسة المشاغبيــن

الجزء الثالث


في صف (أ) .. وأثناء الإمتحان .. كل الطلاب والطالبات كانوا يتذمرون .. ويشتكون من صعوبة الأسئلة .. بس الاستاذ عين الصقر مب راض يرد على تأففاتهم وشكواهم ..
بوهزاع : استاذ انا ما بجاوب على الاسئلة ..
عين الصقر يقري الكتاب وما يرد على بوهزاع ..
بوهزاع : استاذ انت اكيد ما بتحسب الامتحان ..
عين الصقر يفتح صفحة الكتاب اللي ماكسنه دلالة على التجاهل..
بوهزاع : شو قاعد اكلم حيطة أنا ..
عين الصقر يرفع عيونه ويطالع بوهزاع بعين حارة ..
بوهزاع : عيل ليش ما ترد على يوم أكلمك ..
عين الصقر : انت متى بتتعلم تتكلم مثل الأوادم
بوهزاع : يوم بيبيض الديك ..خخخخخخخ
ويضحك الطلاب والطالبات ..
عين الصقر : يالله بس ..( بصوت عالي )
ويصخ الكل في خوف ..
عين الصقر : يالله حل ولا تعور لي راسي ..
بوهزاع : والله حاله ..
بن هدية واقف عند سؤال معين مب قادر يحله .. يلتفت يمين وشمال .. يشوف هجران محطية القلم .. وكأنها مخلصة حل .. وشوي بن هدية يعق عليها المحاية .. وكرد فعل من هجران تطالع من وين يت المحاية وتلقى بن هدية يأشر على السؤال اللي ما عرف يحله ..
هجران ( بهمس) : انت مينون .. شو تسوي ؟؟
بن هدية (بهمس) : السؤال الرابع في القطعة ..
هجران (بهمس) : ما اقدر .. بيشوفني وبيحط لي صفر بعدين ..
بن هدية (بهمس) : عطيني ورقتج وبعطيج ورقتي وحلي لي ..
هجران (بهمس) : لا أخاف ..
وترجع تصد لجدام ..
بن هدية (بهمس) : هجران .. هجران يالدبة ردي ..
وهجران ما تصد له ..
حور الامارات : عبالك محد يشوفك ..
بن هدية ( يلتفت لورا بخوف ) : هذا انتي .. الله يغربل ابليسج ..
عين الصقر : يا صبي .. صد لجدام ..
بن هدية .. يلتفت لجدام ويوخي راسه من الخوف والاحراج ..
حور الامارات : قلعتك محد قالك ما تذاكر ..
عين الصقر : حور شو قاعدة تقولين ..؟؟
حور : ولا شي استاذ ..
عين الصقر يطالعها وهو يحمر عيونه (اونه يبى يخوفها ) ..
حور توخي راسها وتطالع ورقتها أونها قاعدة تراجع ..
ويبقى الحال بين محاولة للغش وأخرى ..

وفي صف (ب) ..
بعد شرح المدرس ملخص الدرس السابق ..
بن ماكس : انزين .. انا طلبت منكم اتسوون بحث .. يالله كل واحد يطلع بحثه ويحطه على الطاولة ..
نص الطلاب والطالبات طلع البحث مالهم والنص الثاني قام يتلفّت يمين وشمال ..
بن ماكس : اعتقد اني اتكلم عربي ..
وشوي تصير حشرة في الصف من الهمس ..
بن ماكس : هاه شو صار .. ليش هالحشرة ؟؟
ويصخ الكل ..
بن ماكس يوقف ويدور بين الطاولات .. طبعاً معظم الطاولات كانت خالية من البحث اللي طلبه استاذ العلوم ..
بن ماكس يكمل مشيته إلين ما رجع ووقف عند كرسيه .. يفسخ نظارته .. ويقول ..
بن ماكس : اللي ما سوا البحث يوقف ..
ويوقف من الطلاب العوسج وسعود وسراب البيد والقيصر وبن سليمان ..
ومن الطالبات رمااايل وأوشي وقلب العاصمه..
بن ماكس : أفا يا بن سليمان .. ما هي عوايدك ..
بن سليمان يوخي راسه من الخجل ..
بن ماكس : هذي نتيجة الصحبة ..( ويطالع القيصر وسراب البيد )
بن سليمان ينكس راسه زيادة من المستحى ..
بن ماكس : ما عليه .. قعدوا الحين .. ولي معاكم صرفة بعد الحصة ..
ويقعد الكل .. وبن سليمان تحرقه كلمات استاذ العلوم ..
بن ماكس : طلعوا كتب النشاط ويالله على المختبر ..
ويطلع بن ماكس صوب المختبر .. عشان يجهز للتجربة ..
والكل يقوم يطلع كتاب النشاط .. ويال المصيبة ..
بن سليمان : وين كتابي .. القيصر وين كتابي ؟؟
القيصر : تسألني أنا .. وأنا اشدراني ..
سراب البيد : دوره عدل .. يمكن في الدرج ..
بن سليمان : ما شي ماشي .. كله من هذولا الفراشات ..
القيصر : تعال معاي تعال .. ( ويسحب بن سليمان من ايده )
ويطلع الكل صوب المختبر .. إلا بن سليمان والقيصر وسراب البيد ..
وفي غرفة الفراشات ..
شيخة البنات : أووف .. هلكت اليوم من تنظيف الحمام ..
خيالة : مب وحدج كلنا تعبنا ..
شيخة : انتي ما سويتي شي .. كله قاعدة تسمعين اغاني آخر زمان .. وتطالعينا ..
خيالة : الله اكبر على الكذب .. معاني انتي شفتيني وانا امسح الارضية صح ؟
معاني ( وهي سرحانة بعالم ثاني ) : هاه .. شو ؟؟
شيخة : منو ماخذ عقلج ؟؟
معاني : نعم .. انتي شو تخرفين .. شو ماخذ عقلي .. ما شي ..
خيالة : شوفي البنت بس كيف انعفست بس ..
ومعاني ( ويها صارويهها مثل الوان الطيف ) : بس بس عاد .. شو هالكلام ..
شيخة وخيالة : يووو .. كشفناج .. يالله قولي .. خخخخخخخخخ
ويدش عيهم القيصر واقف وراه بن سليمان وسراب البيد ..
القيصر ( يكلم خيالة ) : أي انتي .. ما شفتي كتاب النشاط ما ربيعنا ؟؟
خيالة : انت ما تستحي .. المفروض منك ادق الباب ..
القيصر : فراشات آخر زمن ..
شيخة ( وهي توقف بويه القيصر ) : أي انت عن الغلط ..
سراب البيد : بسكم عاد ..
معاني : انتوا شو تبون هالحزة يايين ؟ ما عندكم حصة ؟؟
بن سليمان : اوووف .. ناقصنكم أنا .. انا بسير ..
ويشده القيصر من ايده ..
القيصر : بسك عاد .. اصبر شوي .. خلنا نتفاهم وياهم .. ( ويرجع يطالع معاني ) نحنا نبي كتاب رفيجانا ( ويأشر على بن سليمان ) اللي كان في درجه ..
معاني : والله نحنا نظفنا وما شفنا شي ..
خيالة : معاني بس ..
معاني تطالع خيالة بعيون حارة ..
معاني : صح يا خيالة ؟؟
خيالة : هاه ..بلى ما شفنا شي ..
القيصر قعد يطالعهم .. وحس انه في شي ..
سراب البيد ( يهمس للقيصر ) : يالله خلنا نسير ..
القيصر : يالله مشينا .. ( يلتفت للفراشات ) كملوا رمستكم البطالية .. سلام ..
ويسكر الباب ..
معاني : شو ها الطلاب اللي يلوعون الجبد ..
خيالة : ليش سويتين جي ؟؟
معاني : شو سويت ؟؟
شيخة : أنا مو مصدقة ؟؟ اول مرة انتي اسوينها ؟؟
معاني : شوفيكم علي .. شو سويت ؟؟
خيالة : يالله انتي الحين ما شفت ويه بن سليمان .. والله يقطع القلب ..
معاني : أحسن .. هي نتيجة اهماله .. ابيه شويه يحس ..
شيخة : حرام عليج .. الحين من وين بيجيب كتاب ؟؟
خيالة : على حد علمي ان حصتهم الحين .. علوم ..
معاني : لازم يكسروا الحواجز ..
شيخة : شو قصدك ؟ أي حواجز ..
خيالة : دومج غبية وتلقطينها ..
شيخة : لا تقولي غبية لأعطيدج كف الحين ..
معاني : بسكم .. اوووف .. كله تتضاربون ..
شيخة : هي اللي بدت ..
خيالة : اونه ..
معاني : بس عاد بس .. اوووف .. انتوا اطرفون بالواحد ..
معاني بتقوم .. وتشدها شيخة من كندورتها ..
شيخة : ما تروحين غير لما تقولين لي شو قصدج ..
معاني : خيالة انتي فهميها ..
خيالة : معاني تبي الصفين يكسروا الحواجز اللي بينهم ..
شيخة بعد بطلت كندورة معاني ..
شيخة : آهاااا .. انزين .. دامج تخططين من البداية .. ليش ما تخبرينا عشان نساعدج ..؟؟
معاني : ما خططت ولا شي .. بس هذي الفكرة خطرت ببالي الحين ..
شيخة : ما شاء الله عليج عبقرية وانا ما ادري ..
معاني ( تكلم نفسها ) : انا دومي عبقرية .. بس الحظ لعب علي ومقعدني ويا اشكالكم اللي ما تسرلا صديق ولا عدو ..
خيالة : يالله معاني قعدي .. وين بتسرين ..
معاني : امري لله .. و هذي قعدنا ..
وتقعد معاني معاهم .. ويكملوا سوالف ومصخرة ..
وفي الممر اللي بين اللي يفصل الصفين عن بعض .. وقف بن سليمان مساعند على أحد الأعمدة .وقف سراب البيد والقيصر عداله ..
بن سليمان : ماني ساير المختبر بدون كتاب النشاط ..
القيصر : لو كان كتابي معاي كنت عطيتك .. بس أنا تاركنه في الزرب ..
سراب البيد : شو يسوي في الزرب ؟؟
القيصر : ما قلتلك .. شيتي البرشة ربت ..ويابت صخل وخشرة ..
سراب البيد : قول والله .. متى ... ما خبرتني ؟؟
بن سليمان ( بعد ما حس انه بيموت من القهر ) : بس عاد انت وهو .. والله انكم متفيجين ..
القيصر : هو شفيك انزين .. يلي هو كتاب ..
بن سليمان : انت ما شفت استاذ العلوم كيف كان يطالعني ..
سراب البيد : وين شفته .. انت كنت موخي راسك ..
بن سليمان يطالع سراب البيد بطرف عينه من القهر ..
سراب البيد : اسولف .. هو شفيك ..
القيصر : تبي حل ؟؟
بن سليمان : اكيد .. هذا ما يبالها سؤال ..
القيصر يطالع كل من بن سليمان وسراب البيد ..
القبيصر : يأسفني أقول هالشي .. بس ما شي غير نسلّف من جيرانا ..
بن سليما وسراب البيد ( بصوت عالي ) : شووووو ؟
القيصر : قصروا حسكم لا يسمعنا الصياد .. ويضاربنا ..
سراب البيد : انت اكيد تخبلت .. أنا لو اموت ما تسلف من هذول ( ويأشر على صف (أ) )
القيصر : عيل شو تبينا نسوي ؟؟ من وين نجيب كتب ؟؟
سراب البيد : انا كتابي كل يوم في مكان .. والاستاذ كل حصة يهزبني ..
القيصر : الحال من بعضو ( يقولها بلهجة مصرية )
بن سليمان : قلتلكم .. مستحيل ادش المختبر وما يكون بيدي كتاب النشاط ..
وظل الربع على هالحالة مو عارفين شو يسوا ..

هل يا ترى بكسروا من نفسهم ويسيروا للصف الثاني .. ولا راح يظلوا واقفين يفكروا في حل ثاني ..؟؟
يا ترى شو راح يصير ؟؟

الجواب في الجزء القادم ..​

 

[حورالامارات]

مشاركة: مدرسة المشاغبيــن

حور الامارات : قلعتك محد قالك ما تذاكر ..



يستااااااااااااااااااااااهل

عجبتنــــــــــــــــــــــــــي

تسلم يا الساااااااااااحق ...


بس انا مب جامدة يا السااااااااحــــق انا ريلااااااااكس

 

[الوصلاوية]

مشاركة: مدرسة المشاغبيــن

افا ذبحني الفضول يالله نتريا
الوصلاوية

 

[بو هزاع]

مشاركة: مدرسة المشاغبيــن

خخخخخخخخخخخخخخخخخخخخخخخخخخخخخخخخخخخخخخخخخخخخخخ
تعجبني يا ولد

خخخخخخخخخخخخخخخخخخ



وين عيل من زمان ما انتبهت لهاي القصه

والله حاله


كل يوم والثاني يطلع لنا فن يديد



خخخخخ


بقراها زين ما زين بعدني ما تمكنت منها




تسلم يا ولد



بس تعال يوم بطرش رساله اكتب شي عنابو بس وصله وخلاص والله حاله

المهم فديت خشمك وتسلم ياخوك



بوهزاع

 

[معاني]

مشاركة: مدرسة المشاغبيــن

الساحق .. :smile: :smile:

اتريــــــــا التكمـــــــــله ...


اتعـــــرف وين توقف ...

و هالله هالله بمعاني.. ترا ما اتروم تنظف المدرسه بكبرها ... :smile:

معاني..

 

[غزالة الجبال]

مشاركة: مدرسة المشاغبيــن

تسلم يمنااااااااااااك اخوي الساحق الخااطف عالقصه..

بانتظاااااااار التكمله يا ابوي لا تتاخـــــــــــر ،..

^_^ بسرعععععععععععععععععععععه


(`'•.¸(` '•. ¸ * ¸.•'´)¸.•'´)
«´¨`.¸.* غـزوووولـة*. ¸.´¨`»
(¸. •'´(¸.•'´ * `'•.¸)`'•.¸ )

 

[فتى شعم]

مشاركة: مدرسة المشاغبيــن

تسلم اخوي على القصه الجميله

ابدعت

ونتريا منك ما هو جديد وجميل




ف ت ى

ش ع م

 

[الساحق الخاطف]

مشاركة: مدرسة المشاغبيــن

أختي حورالامارات

تسلمين اختي على التواجد ..
وبالنسبة للدور .. أتوقع انه مبين في الجزء الأول أكثر من الجزء الثالث ..
ومشكورة على الوجود ..​

 

[الساحق الخاطف]

مشاركة: مدرسة المشاغبيــن

أختي الوصلاوية

لهذي الدرجة ..
مشكورة أختي على وجودك .. وتواصلك ..
كلامج عطاني حافز اكثر اني اكمل القصة ..​

 

[الساحق الخاطف]

مشاركة: مدرسة المشاغبيــن

أخي بو هزاع

تسلم من طيبك أخوي ..
والله القصة موجودة من أمس .. بس عاد يبالها واحد منفتح عيونه عدل ..
وبالنسبة للرسالة .. قلت وصلة بتكفي .. بدل ما اقعد اكتب قصة طولها طول ..
ومشكور على الوجود المميز ..
ولا تقول ولد .. تحسسني اني ياهل .. وانا مب ياهل ..​