مدرسة المشاغبيــن

[الساحق الخاطف]

مشاركة: مدرسة المشاغبيــن

أخي راعي الويلات

عاد الإدرارة لأصحابها .. ما نروم نحطك هناك ..
موقعك ادراي بس غير شكل عاد ..
لا تخاف بتشوف دورك .. كل شي في وقته .... حلو ..
وجودك هو الابداع .. تسلم يا خوي ..​

 

[الساحق الخاطف]

مشاركة: مدرسة المشاغبيــن

الجزء الرابع

في صف (أ) ..
عين الصقر وقف عند الطاوله ويطالع ساعته ..
عين الصقر : عنبوه .. شو قاعدين تحلون .. يالله بس .. اللي ورا يعطي اللي جدام ..
الطلاب والطالبات .. اللي يحل واللي يطالع اللي عداله .. كأن الإلهام ما يجي غير في اللحظة اللي تسلّم فيها الأوراق ..
عين الصقر : بوهزاع وراشد الشحي والزين كله والمنسي .. عطوا اللي قدامكم بسرعة ...
الزين كله ( بخوف وحزن ) : أنا بعدي ما حليت كل الاسئلة ..
عين الصقر ( يقلد صوتها ) : والله ما يخصني ..
الزين كله ( شوي وبتصيح ) : حرام عليك استاذ عطنا خمس دقايق ..
عين الصقر ( ومعصب على الآخر ) : بس يالله بس .. وايد عطيناكم ويه ..( ويمشي لطاولة الزين اللي في آخر الصف ) يالله عطيني الورقة ..
الزين كله ماسكه القلم وتحاول تكتب أي شي يخطر في بالها ..
عين الصقر بدون مبالاة .. ينشأ عنها الورقة ..
عين الصقر : عاد انتي كله جي ..وياليت تجيبين درجة زينه ..
الزين كله ( والدموع شوي وبتطيح من عيونها ) : وانت عمرك ما بترحمنا بالأسئلة ..
بس عين الصقر ما عطاها ويه ومشى صوب طاولته ..
عين الصقر : الأسيف خذ أوراق الشباب .. وسندريلا خذي أوراق البنات ..
ونفذ الطالبين كلام الاستاذ .. وبغضون ثواني كانت الأوراق على طاولة الأستاذ ..
عين الصقر : يالله الحين رجعوا طاولاتكم مثل قبل .. وطلعوا كتاب الورك بوك على صفحة 111 .. واقروا القطعة الثانية ..
وتصير حشرة في الصف .. كل واحد يكلم اللي عداله أو اللي وراه أو حتى اللي في أول الصف يكلم اللي في آخر الصف ..
الأسيف : بوهزاع .. دز طاولتك شوي لورا .. الباب ما بيتبطّل جي ..
بوهزاع : والله مو مشكلتي .. دانجر مان .. ارجع شوي لورا .. ما تشوف طاولة الأسيف سادة الباب ..
دانجر مان : والله أنا ما احرك طاولتي غير مرة وحدة بس .. وجان فيك حيل قوم دزها عني ..
بوهزاع : نعم نعم .. زين زين .. هالكلام في الصف .. اصبر الفرصة وانا ارويك يا السبال ..
دانجر مان ( يوقف بعد ما كان يالس ) : منو السبال .. يا الثور ؟؟
بوهزاع : والله طالت وشمخت يا ولد عايشة ..
دانجر مان : هيه عن الغلط .. لا اسدحك في نص الساحة واخليك فرجة للي يسوى واللي ما يسوى ..
عين الصقر .. يطالع المسرحية اللي قاعدة تصير ..
عين الصقر : لا بعد عطه شويه من عندك .. شو ها انتوا عبالكم وين قاعدين في الشارع ( وبعصبية وعيون حمر )
بوهزاع ( يهمس من تحت لي تحت ) : اعتقد قاعدين في الصف ..خخخخخخخ
ويسمعه راشد الشحي اللي قاعد عداله .. وينهد بالسقيع ..
راشد الشحي : ههههههههههههههههههههههه .. حلوة هذي ..
عين الصقر ( وهو معصب ): هذا اللي ناقصنا بعد .. الشحي قوم اوقف .. وقول لنا شو اللي يضحكك عشان نضحك وياك ؟؟
راشد الشحي ( ينخرس ويوقف بحركة آلية ) : لا .... لا .. بس .. .... وأنا ... استاذ ... و وو .. و للل ... لل .. ولا ... ش ... ششش . ولا شي ..
عين الصقر : وعيل هالضحكة حق شو ؟؟ ( ويحمر عيونه للشحي )
راشد الشحي يوطي راسه .. وما يرد ..
عين الصقر : الشحي وبوهزاع ودانجر مان والأسيف .. عقاباً لكم على الحركة البايخة اللي توكم سويتوها .. بتنسخون كلمات الوحدة الرابعة عشرين مرة ..
دانجر مان : بس يا استـ..
ويقاطعه استاذ اللغة الانجليزية ..
عين الصقر (وبصوت عالي) : واي معارضة اخليها اربعين مرة ..
ويصخون .. وكل واحد يطالع الثاني بكره والود وده انه يشوه ملامح اللي يطالعه ..

وخارج صف (أ) ..
وقف بن سليمان بحزن وياه القيصر وسراب البيد .. وشوي يشوفون دارك آنجل ياي من عند الادارة وهو يغني : كوتش كوتش هوتاهيه ( على حد علمي اغنية هندية ) ويلوح بإيده جنه بيطير .. ويحط ايده على قلبه ويقول : ( ياهي دل .. ديفانا .. هاها ديفانا )
بن سليمان والقيصر وسراب البيد يطالعونه ومستغربين من حركاته ..
بس دارك آنجل ما كان يدري انهم يطالعونه .. وكان يكمل غنى وحركات مع ايقاع الاغنية ..
وشوي يوقف عند باب الصف (أ) .. ويدق الباب ويفتح الباب ..
دارك أنجل : مرحبا .. أووه .. استاذنا المحبوب .. يا هلا بك ..
عين الصقر ( يطالع الاربعة اللي بعدهم واقفين بعصبية ) : هلا .. عطني السجل اشوف .. ( ويتنهد تنهيدة طويلة من القهر اللي فيه )
دارك آنجل : هاه شوفيك .. لا يكون ميننين فيك هذول الميانين .. خخخخخخخ
عين الصقر : إلا قول يموتون الواحد ما يينون فيه ..
دارك انجل ( يضحك ويطالع الشباب اللي موقفين ) : هههههههههههههههه .. خخخخخخخخخخ
بوهزاع يأشر عليه بمعنى ما عليه انا بروايك .. ما عليه ..
دارك انجل يخفف ضكته بالبطئ ألين ما يبلعها من كثر ما هو خايف من بوهزاع ..
بوهزاع ( يهمس لي راشد الشحي ) : شوفني في الفرصة شو بسوي بالسبال اللي جدامي وها الهندي اللي يضحك علينا .. براويهم نجوم الظهر ..
راشد الشحي ( يهمس بعد ) : الله يعينهم منك ..
عين الصقر : بس انت وياه عبالكم ما اسمعكم ..
دارك انجل : خلصت .. ابا اودي السجل للصف الثاني بعد ..( وهو يبلع ريقه )
عين الصقر : هو شوفيك مستعيل .. خلني احسبهم بس ..
زمان الوصل : استاذ انت من ثلاث سنين ادرسنا .. ما رمت تحفظ عددنا لليوم ..
وينهد الكل بالسقيع ..
عين الصقر ( يتمصخر ) : هاهاهاهاها .. تخففين دمج .. يالله أوص .. (بصوت عالي )
ويصخ الكل .. وتنحرج زمان الوصل .. وتنزل راسها ..
عين الصقر يحسب الطلاب والطالبات .. ويسجل الحضور والغياب .. ويسكر السجل ويعطيه لدارك آنجل ..
عين الصقر : اعتقد بتشوف الصف الثاني في المختبر ..
دارك آنجل : زين يوم قلتلي .. ما روم اهيت في ها المدرسة ادور عليهم ..
ويبتسم دارك انجل .. ويقبض الباب بسرعة .. وده الفكاك ..
وهو بره ..
القيصر : بووووووووووو
دارك أنجل : قل اعوذ برب الفلق من شر ما خلق ..
القيصر : ههههههههههههههههههاي ..
سراب البيد : خخخخخخخخخ .. مشكلة الفراشين .. هههههو ..
بن سليمان : هههههههههه ..
دارك آنجل : اونكم عاد بتخففون دمكم .. حركة بااااااااااااايخة .. زين ..
القيصر : اوص يالله .. فراشين آخر زمن ..
دارك آنجل : ما عليه بخبر الصياد انكم فاضين من حصتكم .. ( ويحاول يشرد بعد ما قال هالجملة )
بس القيصر وسراب البيد كانوا له بالمرصاد ..
سراب : على وين ..؟؟
القيصر ( فاج عيونه مثل البومة ) : ان خبرت الوكيل شي .. بتشوف شي ما يسرك زين ..
دارك آنجل ( وشوي بيموت من الخوف ) : خلاص خلاص ما بقول شي ( ويحط ايده على تمه )
بن سليمان : شوي شوي على الريال ..
القيصر ( يلتفت ويكلم بن سليمان ) : لا تخاف ما بنسوي فيه شي اذا حط لسانه في حلجه وما يدخل في اللي ما يخصه ( ويرجع يطالع دارك آنجل )
دارك آنجل وايده بعدها على تمه .. ويهز راسه بالايجاب ..
سراب : خلاص سير .. ولا نشوف رقعة ويهك هني ..
دارك آنجل ما صدق خبر وشرد ..
بن سليمان : والله انكم تخوفون بلاد ..
سراب : هي عيل شو بعد ..
القيصر : اخ .. يتني فكرة جهنمية ..
بن سليمان : هاه .. اكيد لقيت حل لمشكلتي ..
القيصر : سير ناد هالهندي قبل لا يسير المختبر ويخرب خطتي ..
سراب البيد يركض بسرعة ويكفش دارك آنجل ..
دارك آنجل : يا ويييييييييلي ..
سراب البيد : اسكت .. اسكت لا تفشلنا ..
دارك آنجل : والله ما بقول.. صدقني ما بقول ..
سراب البيد : تعال وانت ساكت ( ويحمر عيونه )
دارك آنجل(يبلع ريقه ويقول في خاطره) : أنا شو اللي دازني على ها الشغلة .. دوم هذي شغلة راعي الويلات .. وش هالحظ الردي يا دارك ..
ويجي من بعيد سراب البيد ومعاه دارك آنجل ..
القيصر : دومك سريع يا سراب ..
سراب : هيه شو بعد .. ولا كارل لويس بزمانه ..
القيصر وبن سليمان : ههههههههههه
دارك آنجل : شو تبون مني ؟؟ .. قلتلكم ما بقول شي ..
القيصر : ابيك تدش صف (أ) .. وتقول للحمير اللي داخل ان استاذ لعلوم يبي ثلاث كتب نشاط ..
دارك آنجل : اكيد ناسيين كتبكم ..
سراب البيد : شب يالله .. ما يخصك انت .. سو اللي نقولك عليه بدون كلام ..
دارك آنجل : انزين انزين خلاص .. بس هد قميصي ..
سراب البيد يهده .. والقيصر يأشر له على الباب
القيصر : احنا بنوقف عند الزاوية هذيك .. انت دش وجيب الكتب .. اياني وياك تسوي شي ..
دارك آنجل ( وهو مرعوب ) : ان شاء الله ان شاء الله ..( ويهز راسه )
ويبتعد الثلاث عن موقع الخطر .. ويتركون دارك آنجل لمهمته ..
دارك آنجل يدق الباب ويدخل ..
عين الصقر : then ahmed asked his brother …. ( ويسكت )
دراك آنجل : سوري على المقاطعة استاذ ..
عين الصقر : خير في شي ؟؟
دارك آنجل ( وهو بيموت من الخوف ) : لا بس استاذ العلوم ... يبي .... ثلاث كتب نشاط .. ( ويبتسم ابتسامة عريضة )
عين الصقر : أها ... يالله طلعوا ثلاث كتب وعطوا الريال ..
وتستوي حشرة .. وتلقى كل واحد يفر ويه صوب .. ومحد راضي يطلع كتابه ..
عين الصقر ( وهو شوي وبيعصب) : يالله طلعوا الكتب .. ابى اخلص الدرس ..
سندريلا الشحوح : والله استاذ العلوم ولا مرة طلب منا كتبنا غير في حصته ..
عين الصقر ( وهو معصب خلاص ) : والحين صار وطلبها .. شو فيها ؟؟
هاند : والله لو بيعطيها للصف الثاني .. نحنا ما بنطلع كتبنا ..
طواش : اوووه .. عاشوا هاند .. يا حيج ..
عين الصقر يطالع طواش ويحمر له عيونه .. بس طواش يصد بن هدية أنه ينقل اللي كتبه ..
دارك آنجل : يعني والحل ؟؟ شو اقول للأستاذ ؟؟
عين الصقر : الوصلاوية والجوكر والمنسي ..طلعوا كتبكم .. وما ابي نقاش ..
وبتأفف شديد .. يطلعون كتبهم ويسلموها لدراك آنجل ..
دارك آنجل : مشكور استاذنا .. واعذرنا على المقاطعة ..
الأسيف : استاذ .. أنا تعبت .. ما اروم اكتب وانا واقف ..
عين الصقر ما يرد عليه ويكمل قراءة القطعة ..
عين الصقر : then he took the key and open the door …
دارك آنجل يسير صوب الباب .. ويطلع ..
القيصر : طلع طلع .. وبايده الكتب ..
بن سليمان : انت عبقري ..
ويسيرون صوب دارك آنجل ..
سراب البيد : عطني خلني اشوف .. هذا كتاب المنسي ووالجوكر .. ووع .. وهالدبة الوصلاوية ..
القيصر : دبة ولا غيره .. هي كتب وخلاص ..
بن سليمان : اووف .. واخيراً ارتحت .. الحين خلونا انسير المختبر .. اتاخرنا واايد ..
القيصر : مشكور يالهندي .. ومردودة ان شاء الله ..
دارك آنجل : لا مشكور .. بس خلك بعيد عني ..
ويمشي الثلاثة بسرعة عشان يلحقون الحصة ..
سراب البيد ( وهو يمشي بسرعة صوب المختبر ) : سويت له فلم رعب ما بينساه بحياته ..
القيصر ( وهو يمشي ويطالع سراب) : أصلاً هذول ما يجون غير جي .. ( ويلتفت لبن سليمان ) : هاه .. ارتحت الحين .. الكتاب ووصلك ..
بن سليمان : ما تقصر والله .. عزيز وغالي ..
القيصر : عشان ما تقول ربع بس اسم ..
ويبتسم بن سليمان ..
وفي المختبر .. يا ترى شو يترياهم ..؟؟
بنعرف ..
بس في الجزء القادم ..​

 

[قناص الآريام]

مشاركة: مدرسة المشاغبيــن

السلام عليكم ورحمة الله وبركاته

الساحق الخاطف

تسلم مبدعنا

يعطيك العافيه أخوي

لا خلينا ولا عدمنا

أخوك قناص الآريام

بوهزاع شراره محد يتلغب فيه خيييبه .........

 

[هجران]

مشاركة: مدرسة المشاغبيــن

صدقت لما سميتها برزة المشاغبين او مدرسة المشاغبين


وتسلم على هالابداع الجميل




السموحة
هجران

 

[الساحق الخاطف]

مشاركة: مدرسة المشاغبيــن

أخي قناص الآريام

وعليكم السلام ورحمة الله وبركاته

وتسلم يا شاعرنا المتألق ..
ومشكور على الوجود الرائع ..​

 

[الساحق الخاطف]

مشاركة: مدرسة المشاغبيــن

أختي هجــــــران

تسلمين أختي على تواجدك الرائع ..
وأتمنى نشوفج دوم ..​

 

[هجران]

مشاركة: مدرسة المشاغبيــن

لحظة



اقول




كيف انا مؤدبة ؟؟!!!!!!!
فديتني

ما اغشش


بسم الله علي



صدق هاي شخصيتي

ما احب الغش




السموحة
هجران

 

[الساحق الخاطف]

مشاركة: مدرسة المشاغبيــن

أختي هجــــــران

ترا انا طبقت المقولة اللي تقول

الشخص المناسب ( هجران ) في المكان المناسب ( طالبة مؤدبة وما تحب الغش)​

 

[رهف]

مشاركة: مدرسة المشاغبيــن

عافاانا الله

واناا ابد ما ذكرتني بالقصه
ولا طرشت لي رساله تخبرني عنهاا
جني عضوه غير مرغوب فيهاا :frown:

انزين ما عليه جان خليتني ع الاقل راعية الباص
او راعية المقصف :mf_viking :frown:

بس ما عليه مردوده يالساحق يالخاطف :mf_bond:


بس تعرف
القصه واايد حلوووه
احداثها رووعه
ما ادري اذا كانت هااي اول قصه لك فما شاء الله عليك واللهم لا حسد
اسلوبك في الحوار وتسلسل الاحداث رهيب ومرتب ومنسق واايد حلوو
عيبتني الصرااحه :wink:

تسلم ايدك
ونترياا التكملة


رهووف

 

[راعى البورش]

مشاركة: مدرسة المشاغبيــن

ولا يهمج رهش قصدى اختى رهف بخليج تبيعين سمبوسه عند المدرسه


افااااااااا عليج كم رهووووووووف فى البرزة