๑ يا ليالي السعد بالفرحات هلي...واجمعي شمل الغريم بشوف خله.. كم شكيت من الدهر وافراق خلي...وامرضي يزاداد عله فوق عله ๑
سهيل : ادخلي الباب مفتوح..!
كان منسدح ع شبريته ومحطي غترته ع ويهه والغرفه شابه ضو من الحراره ..سهيل يكره الحر ودومه قبل مايوصل البيت بنص ساعه يتصل عسب نشغل المكيف ..!
اتقربت منه حمده ويلست ع طرف الشبريه..لحظة صمت ..!
حمده : ليش راد من وقت ما من شر..!
سهيل : صداع نصفي بيذبحني... وينها اليازيه ..!
حمده : فوق مع البنات يطالعن فلم ...غايه بعد هني ..!
وقامت حمده عسب تغير جو الغرفه شغلت المكيف وظهرت له من ثلاجته ماي بارد ..!
حمده : سهيل شو بلاك جيه انزين خذ لك بندول ..!
سهيل يشل الغتره عن ويهه وشعره الطويل نوعا ما وبكلته ع عيونه..كان شعره اسود فااااحم ونعيم وغليظ...!
سهيل : مافيني شي المهم قولي لها انا ماكنت ادري انه في عندنا حد في البيت ..!
حمده سكتت ليش سهيل جيه متوتر... ودومه يعانيي من الصداع النصفي بس اول مره جيه اشوفه..يمكن لانها صدته اليوم في المطبخ..الله يعيني عليكم ..!
حطت حمده دبة الماي ويايه بتظهر..!
سهيل : صكي الباب وراج وبندي الأبجوره ..!
حمده استغربت من تصرفه حتى انه مابدل ثيابه كيف جيه بيرقد ..!
سارت حمده فوق ..واول مادخلت الصاله صدت عليها اليازيه ونظراتها متعلقه بحمده وعليها علامات استفهام..عيونها مليئه بالأسئله ..!
حمده تجاهلت اليازيه شويه ع أساس انه غايه وفطيم يالسات..!
بعد ماخلص الفلم ع الساعه 2 ونص تقريبا دخلن البنات حجرهن..!
اليازيه واقفه عدال التسريحه اسحي شعرها قبل لا ترقد وترمس حمده ..!
اليازيه : سهيل ماقالج شي ..!
حمده تفرك ريولها بفازيلين : ماشي قال بس ماكان يدري انه في حد غيرنا في البيت..!
اليازيه حست بضيق يعني ولا اهتم يعتذر..وليش يعتذر ..صدق هو ماكان يدري..بس نظراته كانت غريبه لي حتى ولو في الظلام قلبي يحس ابها ..!
حمده : بندي الليت باجر امايه بتوعينا كالعاده من غبشه ماداّني الرقاد لين الظهر..!
اليازيه : الله يعيني تدرين بي رقيده ..اول مابنش بتصل بمنصور خل يشلنا..!
حمده : انجبي بتمن عندنا لين العصر شو عندكن في البيت اقولج مريوم اختج مابترمض معانا مابتي من سويحان ..!
اليازيه : بلى اظني ريلها بيكون عنده دوره اسبوع وبتيلس معانا..!
الساعه 9 الصبح..!
اليازيه تجلب يمين ويسار اصلا هي مارقدت عسب تنش ...افكار سخيفه كانت تلاحقها أمس في الليل..طلعت ثيابها شوي شوي عشان ماتزعج حمده ودخلت اسبحت ولبسة ثوب ورديه مع شيله ع نفس التدرجات وقالت اكيد بس خالوه اللي وعايه ونزلت تحت ..!
ام راشد + خليفه + عوشه + ساره ..يالسين يتريقون ..!
سلمت عليهم اليازيه ويلست تتريق ..!
ام راشد : اشحالج بنيتي جيف اصبحتي..!
اليازيه : بخير وسهاله خالوه ..علومج عوشه وين من زمان عنج والله ولهنا عليج ..!
عوشه : هي امره انتي اللي تنشافين مره ماتيون صوبنا..!
اليازيه : تعرفين دوام الكليه وضغط علينا يالله الأربعاء والخميس انسم ع اعمارنا اشحالها شما..!
عوشه : الا شراتكن كارفهه عمرها في الجامعه..!
خليفه وساره جالبين الصاله حلبة مصارعه والمكعبات والألوان والألعاب كل مكان ..!
عوشه : انا بعد شويه بسير بيت ابويه عموه بتيين معايه..!
ام راشد : هي بيي امج امس كانت عندي وقت فوالة العصر ..!
عوشه : خلاص عموه انا بسير بيتنا ببدل ساره شوفي شو سوت في ثيابها..!
ام راشد : وانا بدخل حجرتيه باخذ عباتي ولاحقتنج الا بتخبرج راشد وين ..!
عوشه : وين يا عموه اليوم ظاهرين فيا قوم بن سعيد البحر..!
اليازيه صبت لها شاي حليب وقاعده تاكل خبز خمير والصاله صخه محطيه على مسلسل في دبي ويالسه اطالع ..!
طلع سهيل من حجرته لابس فانيلا ووزار يوم شاف اليازيه ويهه استوا احمر وهي نفس الشي
طنشها ورد دخل حجرته..انقهرت منه اليازيه ع الأقل يسلم عنبو يهوديه عداله..!
عشر دقايق وسهيل طالع من حجرته لابس كندوره حليبيه وشال غتره حمره وعقال بيده مكانه المعتاد اللي يقول ماعنده منظره في الحجره وقف عدال جامة المكتبه ويعدل غتره وعقاله وصوره اليازيه تنعكس ع الجامه لانها يالسه وراه وهي مب حاسه..فاجه ثمها وتتطالع شعر سهيل اللي كان خرسان ماي ..!
سهيل بصوت مزعج متروس بالرقاد : صبي لي حليب ..!
اليازيه بدون تردد لانها تتوقع تحصل رمسه جاسيه منه صبت له حليب وقربته صوبه ..!
يلس سهيل شويه بعيد عن اليازيه ويشرب الحليب ومب معبرنها..!
سهيل : تريزا تريزا..!
تريزا : yes sir ..!
سهيل : where is the newspaper ..!
راحت تريزا يابت له الجريده وفتحها ويلس يقراها ..!
اليازيه حست عمرها غبيه ليش هي يالسه هني مع هالشخص اللي مايحس ولا يتحرك..!
قامت اليازيه بتروح فوق ..!
سهيل : ناوليني غرشة العسل..!
اليازيه قامت تتنافض يوم تسمعه يآمر عليها وخت شلت غرشة العسل بتعطيه بدون قصد طاحت من ايدها ونجبت ع الزلويه نصها وشويه منهاع كندورة سهيل ..!
اجمعت الدموع في عيون اليازيه من نظرت السهيل اللي مليئه بالجبروت ..!
نظرات اليازيه في الأرض بس تعبر عن اللي في داخلها انها مب قاصده..!
سهيل مع شحنة عصبيه : يا الخديه ماشوفين ..!!
ركضت اليازيه فوق ودموعها تسابقها دوم بقول وبظل طول عمري اقول متسلط وانا ليش مهتمه فيه وليش ..وليش..!
"عفوا ان الهاتف اللذي طلبته مغلق او خارج نطاق الخدمه حاليا يرجى معاودلة الإتصال فيما بعد"
منصور وبتأفف : اليازيه الحماره ليش تليفونها مغلق من متى اتصل فيها ..!
بتصل ع بيت خالوه ..!
فيصل : نعم استعلامات الدليل ...!
منصور : الله يخزيك وين يزيوي..!
فيصل : يزووي يزووي تليفون ..!
اليازيه : هلا منصور اشحالك ..!
منصور : لا والله من متى اتصل بج من نص ساعه كله تليفونج مغلق ليش ان شاءالله..!
اليازيه : من أمس المغرب هو مغلق مفضي مافيه جارج ..انت وين اللحينه ..!
منصور : عقب صلاة العصر خلكن زاهبات لانه عقب عندي شغل بسير اشوف الهنود شو يسوون خلصو خيمة رمضان ولا الكلاب عنبو لو خيمه معاريس قدها خلصت من يومين..سهيل وينه الهرم اتصل به من متى مايرد يا خط ثاني ..!
اليازيه اتغيرت نبرة صوتها وحست بغصه : مادري ماتغدا معانا..!
منصور : خلاص برايج شرات ماقلت لج بطلع من المسيد وسيده بكون عند بيت خالوه..!
المغرب قبل بيوم من رمضان..فطيم شاله المدخن ويالسه ادخن الحجر والبيت وهي مستانسه لسببين اليوم بيوصل عبدالله من دلما ولهانه عليه ودي احبه ع يبهته كانت فطيم تحب عبدالله وايد واكثر الأوقات يوم عبدالله يكون في البيت اتكون هي يالسه معاه عكس تعاملها مع سهيل..والسبب الثاني انه في رمضان اكيد ميود دوم بيي بيتهم ..!
+ وصلت عند حجرة فيصل +
فطيم : شو هالريحه ..هافيصل دوم جيه ريحة غرفته وخاصه الحمام..اخيه بزوع..قربت من ثيابه اللي معلقات بدخهن وشمت الريحه اقوا...تمت مضايجه ومب مصدقه..كانت دوم شاكه انه فيصل يدوخ وحتى ريحته ماتنطاق يوم يكون ياي من خاري ..شو هالحاله شو أسوي ماشي غير اخبر عبدالله يتفاهم معاه لانه لو سهيل درا مابيرحمه بيغسله غسال..!
تــرن ..ترن..!
فطيم : ألو ..!
شما : هلا فطيم اشحالج حبيبتي..!
فطيم : هلا شميم مبارك عليج الشهر..!
شما : لاو الله انا اللي متصله ليش تسبقيني ..!
فطيم : والله مشكلتج من سبق لبق..وينج دبووه ولهنا عليج متى بتيين عندنا..!
شما : والله تدرين جامعه زايد كيف كارفينا دواماتنا لين العصر مرات ..!
فطيم : الله يعينكن عاده في رمضان مالج حجه لازم اتيين صوبنا نبى نشوفج ..!
شما : وانتي ليش ماتيين ان شاءالله ولا مادلين بيت عمج..!
فطيم : انزين انزين كلتيني..تبين حمده ..المدخن شب ضو الله يغربل عدوج..!
شما : لا رمست حمده انا متصله عشان ارمسج احمدي ربج مسويه لج سالفه..!
+ شما بنت عم حمده وهي من عمر حمده ..وعم حمده " محمد " ماعنده غير عوشه و شما وحامد
حامد عمره 24 سنـه ..وعندهم عمه مسمين فطيم عليها بس ماكانت تييب عيال وريلها مطلقنها من سنين واللحينه يالسه مع اخوها محمد +
شما تساند راسها على القنفه وتقول في خاطرها : اكيد بيي بيتكم يا فطيم انا عيوني ماتذوق النوم وانا ولهانه عليه ..!
๑ ياحياتي كم بشكيلك عن تعب روحي من اسبابك .. خلني يالغالي دخيلك سالمن من ضرب نشابك ريح قلبي من تعليلك دارني شروات مدرالك .. ياحبيبي مااقدر اجفيلك لان وسط القلب منزالك ๑
عبدالله واقف عند باب الصاله عق شنطته عدال الباب ويفصخ الجوتي وموخي يعق دلاغاته ويفج باب الصاله شوي شوي يبا يسوي حركته المعتاده يخوفهم ويصارخ اول مايدخل..بس هالمره ما ظبطت معاه..!
حمده : بووووو زخيتك والله عبدالله تقول حرامي..وخاشمته..!
عبدالله : هههههههه اشحالج حمدوه عساج بخير ..!
حمده : بخير فديتك شو بلاك جيه غادي اسود ..اكثر عن سهيل ..!
عبدالله : هههههههههه ماسمعج لو رحتي فيها..!
حمده وتناوله الماي : اظني في المطبخ تدري باجر رمضان اشوف اخر الترتيبات ..!
عبدالله : انزين انا بسير حجرتيه باخذ لي سبحه محترمه وبرد أنزل..!
عبد الله في حجرته ..!
عبدالله : هالله شو هالريحه الخنينه اكيد هاي فطيم فديت روحها دومها سنعه وهب ريح ..!
ظهر له ثياب وسبح واتمدد ع الشبريه يرتاح من الخط..!
منصور واقف مع الهنود ويفاتن عليهم مابقى غير يركبون المغاسل خاري الخيمه..وتليفونه يرن في مخباه..!
منصور : ألو
...... : مرحبــا
منصور : نعم أختيه بغيتي شي من امس وانتي تتصلين قلت لج هذا هب تليفون حمد..!
........ : بس انا اباك انت هب انت منصور ولد غيث..!
منصور : هب شغلج واجلبي ويهج يا بنت الحلال ولا تتصلين ع رقمي وديه ثانيه..!
وصكر في ويها التليفون..!
دخل ع المكالمات المستلمه يشوف رقمها عسب يسيفه ويوم تتصل مره ثانيه يعرف انها هي ومايرد عليها وسيفها بأسم " البالوعه " طاحت عينه ع رقم بدون اسم الساعه 8 ونص امس..تم يفكـر شويه قال في خاطره هالوقت انا كنت فيا البنات يوم نزلت ماكدونلز ومحد اتصل بي غير يزووي...!!
واذكر انه كان محطي سماعه وماانتبه للرقم أصلا..تم مويم ويفكر..قال صح ويزوي تليفونها مفضي واممم اكيد دقو لي من تليفون الغناه محد غيرها عنده موبايل..ابتسم وصكر عينه وتم يتذكر شكل حمده يوم كانو امس في كارفور..وحفظ رقمها بدون مايفكر ليش بإسم ( ونيس الروح )
الساعه 11 ونص عبدالله كان توه ياي من عند ربعه..!
محد تحت في الصاله على طول طلع فوق..!
فطيم يالسه اشوف تلفزيون..!
عبدالله : السلام عليكم ..!
فطيم : وعليكم السلام هلا عبودين من وين ياي امبونك ماتبطي..!
عبدالله : عنبوو اللحينه 11 ونص يعني بطيت وين حمده ..!!
فطيم : في حجرتها بتخبرك انت شفت امايه اليوم..!
عبدالله : هي شفتها المسا قبل لا أظهر ..!
عبدالله تم ساكت يشوف التلفزيون فطيم يالسه اشوف فلم..!!
لفت فطيم صوبه وعرف في خاطرها شي..!
عبدالله : ها الفطم قولي غناتي شي محتايه..!
نزلت فطيم راسها استحت لانه عبدالله كاشفنها : بغيتك في موضوع بس زايغه..!
عبدالله : افااا تخافين من عبودين يالله قولي اسمعج..!
وخبرت فطيم عبدالله سالفه فيصل ويوم خلصت عبدالله من القهر دق بيديه ع الطاوله وقام واقف..!
فطيم بخوف : عبدالله انا ماقلت لك عشان تعصب هد اعصابك انا قلت انت لانك بتتفاهم فياه..!
عبدالله : لا اله الا الله محمد رسول الله خلاص خلاص فطيم انا بتصرف تصبحين ع خير ..!
دخل غرفته وصك الباب بقوو..!
فطيم مبهته مكانها اول مره اشوف عبودين مضايق جيه..لانه بطبيعته هادي جدا عكس سهيل العصبي..!
الجمعه ..!
الساعه 5 ونص في بيت أم راشــد ..!
حمده وفطيم فيا أمهن في المطبخ يعابلن فياها الفطور..!
فطيم : أخ والله بطني يقرصني من اليوع..!
حمده : هههه تستاهلين وعيتج تتسحرين تقول وحده سكرانه امره ماتحسين..!
فطيم : حمدوه دخيلج دسي عني صحن الثريد الشيطان بيقص عليه وبمد أيدي وباكل ..!
حمده : هههه في رمضان تنحبس الشياطين..!
وحدر عليهم سهيل ...!
سهيل : الله أشم ريحه هريس ..!
فطيم : منو قالج هذا الشيطان الأكبر وصل..!
سهيل : اللهم إني صائم..!
نقعو عليه من الضحك..ولا امبونه عادي يكسّرها صح فطيم لسانها طويل لكن مظلومه مرات..!
تمن فطيم وحمده يساعدن البشاكير ويشلن الصحون و الظغاطات من المطبخ لين داخل الصاله..اليوم عوشه بتفطر في فلتها اروحها عشان عبدالله موجود..فما حبت تحرجه وخلته ياخذ راحته..!
فطيم شاله جيك اللبن وواقفه في نص الحوي ترمس حمده ..!
سمعن صوت سياره تدخل الحوي لفت حمده ..!
حمده : هههههههههههه هي ميود بس غادي اسود..!
وماتوعا الا بدحه على ظهرها من فطيم لانه اصلا الدريول اللي ياب الفطور ...!
فطيم : والله انه سخيف اللحينه من متى هب شايفته ماعرف اييب الفطور ..!
حمده : اقولج ادخلي ادخلي قبل لا يشوفنا حد واقفين جيه...ودخلو داخل الصاله..فيصل مسدح يشوف مسلسل ..عبدالله في حجرته يقرا قرآن..!
وسهيل في المطبخ ملوع جبد امه بالسخافات..!
نزل عبدالله من فوق وشاف فطيم وعرف انها تبى تساله اذا رمس فيصل ولا لا..!
قرب منها ورمسها بصوت واطي ..!
عبدالله : بتخبركم ينسمع الأذان لين داخل..!
حمده : مرات خل بفج الباب عسب نسمع ..!
فيصل : يالله خل يأذن بفكنا بيغمى عليه من اليوع..!
عبدالله : شو خل يفكك بكيفه هو أسميك..!
خمس دقايق وأذن والكل قاعدين ع السفره يفطرون..!
فيصل + سهيل + عبدالله + حمده+ فطيم + ام راشد
عبدالله : فطيم صبي لي عصير برتغال..إلا اقول سهيل هالسنه الخيمه وين حطيتوها..!
سهيل : عند بيت خالوه اسميه منصور لعن خير الهنود لين ماركبوها..!
فطيم : وطبعا نحن مانروم نيلس في الخيمه 24 ساعه وانتو زابنين فيها..!
سهيل : يالله انطمي قصووركم هاي خيمه حق الشباب وبنفطر فيها كل كم يوم شرات ما تعودنا كل سنه عندكم الخيمه اللي هني في بيتنا داخل ولا اللي في بيت خالوه ..!
أم راشد : سهيل يوز عن أختك وكلو وانتو ساكتين..!
الرياييل طالعين من صلاة التراويح وعبدالله توه بيفج باب سيارته بيرد البيت عشان يغير ثيابه ويسير الخيمه في بيت عمه..شاف ولد جيرانهم عمر وزقره ..!
عمر + من عمر فيصل وربيعه في الكلاس +
عبدالله : عمور تعال شويه بغيتك..!
ويقرب صوبه عمر ويخاشمه..!
عمر : اشحالك عبدالله ربك بخير وينك ماتنشاف..!
عبدالله : تدري الدوام وأشغال الدنيا..الا بتخبرك عمور ماتدري فيصل وين يسير بعد مايظهر من صلاه العشا..!
عمر : اممم هي مرات يجمعون عند الدكان اللي في آخر الفريج مال عبدالعزيز ومرات عند بيت فهود..!
عبدالله : مشكور يا عمر وسلم ع هلك..!
ركب عبدالله سيارته وتوجه عند بيت عمه..حدر وسلم ع الشباب والكل يالس..!
اللي يلعب ورقه واللي يلعب بلي استيشن..واللي يسولف ويشوف تلفزيون..!
عبدالله : السلام عليكم جميعا ياعرب..!
كل الشباب : وعليكم السلام حي الله بوحميد ..!
سهيل : ها عبودين تعال العب معانا ورقه..!
عبدالله : غشاشين محد يلعب فياااكم..!
عيسى : تعال تعال ماعليك بنقطعهم اليوم...!
فاهم : محد ملوك الغش غير سهيل ومنصور ..!
منصور : افا وانا مخاوي شما يالله بنلعب ونشوف..!
ويلسو الشباب سوالف وضحك..!
وفي الخيمه الداخليه متيلسات..!
أم حميد + غايه + يزوووي ..!
أم حميد : يزوي دقي ع بنات خالتج اشوفهن اتحيرن امبونهن الساعه 9 هني..!
اليازيه : ان شاءالله امايه بسير داخل موبايلي في الصاله ..!
وغايه يالسه وتاكل قيمات..!
أم حميد : غايوه بسج من يلستي وانتي تسرطين هالقميات هب زين واايد متروسه دبس..!
غايه : اخ هاذوه ها شار في التقويم بس دبسكم عجيب..امايه وين ابويه من زمان ماريته..كل الناس يشوفون ابهاتهم ويباركون لهم بالشهر الا نحن..!
أم حميد سكتت ووطت راسها وحست بغبنه : مادري يابنيتي من زمان ماشفته..!
غايه : عنبوها من حاله..سار خذالج ع راسج وحده لا وهنديه بعد مادري من وين ضواها ومايخطف علينا ولا يسأل عنـا..جان الا احتجنا بيزات بيعطي منصور..نحن هب محتاجين بيزات نحن نبى ابو يقعد معانا يشوف شو محتاجين نشكيله اذا ضقنا....ومارامت تحبس دموعا زوود وعطتهن الحريه ..!
أم حميد لوت ع بنتها..يمكن تهدى في حضنها شويه..و تمسح ع شعرها..!
حدرت عليهم يزووي..!
اليازيه : بسم الله شوبلاكن ..شو غايوه غصيتي باللقمه..!
تمت امبهته..لا البنت شكلها مش طبيعي وعرفت على طول انه غايه اكيد طرت ابوها وتمت اتصيح..!
اليازيه : بالله عليج غايوه مامليتي من هالطاري خلاص بالنسبه لي تعودت..وصارت امايه هي ابويه وهليه واخواني وكل دنياي..وتقربت وحبت راس امها..!
أم حميد : بس بعد يا غناتي هذا ابوج والظفر مايظهر من لحمه..!
اليازيه : انا ماقلت شي..بس هو اللي ماينشد عنا..ولا جنه عنده عيال..ماغير مجابل الهنديه وعيالها..!
غايه : بس يزوي تدرين انه ظبيه و معضد مالهم خص..!
اليازيه : صدق والله مهما يكون هاذيلا اخواني..حليلها ظبووي من زمان ماشفناها بسوي لها تليفون خلاف..!
أم حميد ساكته..ماتعلق بس تسمع رمسة بناتها ودموعها تنزل على خدودها اللي الزمن خط عليها تجاعيد بسيطه مب من الكبر في السن لكن من الهم..وفي خاطرها..!
شو سويت لك ياغيث..سرت خذت ع راسي وحده وانا بعدني حامل في حميد يبت لك رياييل وبنات والنعم ابهم..ويوم ولدك معضد خطب بنت اختيه حمده قبل سنين ورفضو لانه حمده صغيره هجرتني خليتني بين جنه ونـــار..!
اليازيه تبى تلطف الجو وتغير السالفه : امايه خالوه قالت دقايق وبيكونن هني وسمعي حشره قوم منصور لين هنــي واصله مقلع هالشباب..!!
عشر دقايق الا بيت ام راشد واصلات..حمده و فطيم وامهن ومعاهن خليفه ولد راشد..!
ام حميد : الا وينها عوشه ماشوفها..!
ام راشد : مودين ساره الدختر يشنترونها عندها تطعيم اليوم ..!
ام حميد : ياحليلها الا علومها ام حامد من زمان ماريتها..!
ام راشد : بخير وعافيه باجر بسير الها بتخاويني..!
نطن اليازيه و حمده : نحن بعد نبى نسير من زمان ماشفنا شميم..!
ام حميد : عنبوكن لصقه يصير خير لين باجر ولا تيلسن تتمسعن الرمسه..!
مايد : هووود هوووود ياحريم تغطن..ميووود Is Coming ..!
ام حميد : هدا هدا يا مايد اقرب ولديه محد غريب غير خالتك وبناتها .. شو قال عقب ..!
اليازيه : ههههههه ماشي يا امايه روحه يخورط..!
ميود في خاطره : هــا احم طالعو شكلي انا وقحفيتي ماريد ماريد مابدخل..!
مايد : السلام عليكن يا حريّم ..!
اليازيه : حريم في عينك نحن بعدنا بنات..!
مايد : اوووف..!
اليازيه : اوف ولا اون..!
مايد : انطمي امايه ماشوفين بنتج..!
وسلم ع خالته وحبها ع راسها..!
مايد : اشحالج حمده وشحالج فطيم عساكن بخير..!
حمده :بخير بوسلطون انت اشحالك..!
مايد : الحمدلله نشكر الله خيتوو..وانتي ليش ماتردين..!
فطيم حست بقافطه اصلا هي من شافته اعتفست وقلبها يخفق بالشوووق له ولعيونه..!
فطيم : بخير ولد خالوه يسرك الحال..!
مايد : هي توج الحرمه تغدي حرمه..امايه دلت الشاهي خلصت خلي البشكاره اتسوي وحده ثانيه..!
ام راشد : وليش البشكاره هاذيلا البنات ميلسات لا شغله ولا مشغله عقب شويه تعال المطبخ بشوفها زاهبه..!
ظهرن البنات كلهن خاري متوجهات للمطبخ..!
غايه+ اليازيه + فطيم + وحمده..!
وخليفه سار مع مايد خيمه الرياييل..!
مايد : هههههههه ياحليلكن يالله يالله بسرعه نباه مظبوووط انزين..!
غايه : مع هالويه لو عندنا سم جان حطيناه صح يابنات..!
الكل ما عدا فطيم : ايوه صح..!
ميود بهدووء وعيونه فيها لمعه حلوه : فطيم واهون عليج..!
فطيم ومنزله ويها وغادي احمر : انزين انا مارديت..!
مايد : فديت حرمتيه انا ..!
